TBP Balochi

بلوچستان ءَ زورانسری آوار جنگ بوتگیں مردمانی کھول ءِ گوشگ انت کہ بلوچستان ءِ تہ ءَ انسانی المیہ ءِ ودی بوتگ، ھزارانی کچ ءَ مردم بیگواہ انت ءُ تنی وھدی زورانسری آوار جنگ بوتگیں مردمانی دروگیں میڑ ءَ کوش برجاہ انت، کہ چریشی ءَ بیگواھیں مردمانی کھول ترس ءِ آماچ انت –

بیگواھیں مردمانی کھولاں چہ انسانی ھکانی ادارھاں گوں لوٹ کتگ کہ آیانی دوستگیں مردمانی وش ءُ سلامتی یل کنائینگ ءَ وتی کرد ءَ پیلو بہ کن انت –

سوراب ءِ جھمنند زورانسری آوار جنگ بوتگیں سیف اللہ رودینی ءِ گھار پرزانہ رودینی ءِ گوشگ انت کہ منی برات سیف اللہ ءِ زورانسری آوار جنی ءَ دھ سال سرجم بوتگ انت اے دھیں سالاں ما ھر ھمک در ٹُک اِتگ ءُ توار چست کتگ بلے روچ مروچی اے ریاست ءِ نیمگ ءَ بید مایوسی ءَ دگہ ھچ نہ رستگ –

آئی ءَ گوشتگ کہ منی برات یل کنگ بہ بیت ءُ مارا چہ اے زوراکی ءِ تہ ءَ رکینگ بہ بیت – سیف اللہ بیست ءُ دو نومبر سال دوھزار سینزدہ آوار چہ سوراب ءَ دیم پہ ھزدار ءَ رؤگے وھد ءَ زورانسری آوار جنگ ءُ بیگواہ کنگ بوتگ –

سِی ءُ یک اگست سال دوھزار ھژدہ ءَ چہ پکنک پوئنٹ زنگی ناوڈ زورانسری آوار جنگ بوتگیں آصف بلوچ ءُ رشید بلوچ ءِ گھار سائرہ بلوچ ءَ گوشتگ کہ منی براتانی زورانسری آوار جنی ءَ پنچ سال سرجم بوتگ انت – زورانسری آوار جنی روچانی گیش بوگ ءَ ما ماژگی نادراھ جوڈ بوان انت – پہ فلسطین ءِ ھاتر ءَ ارس ریچوکیں پاکستانیاں گوں دزبندی انت کہ کمو بلوچستان ءِ مردمانی نیمگ ءَ دلگوش بہ دئنت کہ شمے پوج ءَ مئے زند ویران کتگ –

زورانسری آوار جنگ بوتگیں ممتاز ءِ گھارزتگ بانڑی بلوچ ءَ گوشتگ کہ بلوچستان ءِ مات ءُ گھار وتی دوستیگیں مردمانی ھاتر ءَ وتی ھوناں جوشین انت ءُ آیاں مزن کناں وانین انت تاکہ باند ءَ آ پیر بنت ءُ آ آیانی سھارگ بہ بنت، سھارگ دیگ وتی جاہ ءَ نوں پہ دیدار ءَ تلوسگ انت – بانڑی بلوچ ءِ ناکو ممتاز بلوچ شش ستمبر سال دوھزار ءُ بیست ءُ دو ءَ چہ ھزدار ءَ آوار جنگ ءُ بیگواہ کنگ بوتگ – دو رند ءَ آ پیسر ءَ ھم آوار جنگ ءُ یل کنگ بوتگ –

بیگواھین باپاری مردم عبدالحمید زھری ءِ زھگ سعیدہ حمید ءِ گوشگ ات کہ ماھروز ءُ ھمل وتی پت ءِ ودار ءَ نشتگ ءُ وتی پت ءِ آیگ ءِ راہ ءَ چارگ انت، وانگ وانگ انت، دلسیاھی ھم کنگ ءَ نہ انت – زورانسری آوار جنوک بیت کنت سرپد مہ بنت کہ گس ءِ یک مردمے ءِ آوار جنگ ءُ بیگواہ کنگ ءَ ناکہ ایوک ءَ یک ءَ آوار جنگ انت بلکنہ آ گس ءِ درسیں وشی، زھگانی کندگاں ھم آوار جنگ انت * سعیدہ حمید ءِ پت عبدالحمید زھری دھ اپریل سال دوھزار ءُ بیست ءُ یک ءَ آوار جنگ ءُ بیگواہ کنگ بوتگ – عبدالحمید ھم چو ایندگہ بیگواھیں مردمانی وڈا گار انت ھچ ھال اھوال نیست –

بلوچ لبریشن آرمی ءِ جارکّش جیئند بلوچ ءَ ماں رسانکدر ءَ وتی شِنگ کُرتگیں درشانے ءَ گْوشتگ کہ بلوچ لبریشن آرمی ءِ سرمچاراں یک چیریں کُتگیں بمب اُرشے ءَ پی ایم ڈی سی ءِ پروجیکٹ منیجر شبر مرزا ءَ را نِشانگ کُرتگ ءُ کُشتگ ۔

جارکش ءَ گْوشتگ کہ بی ایل اے ءِ سرمچاراں شال ءِ دمگ ڈغاری ءِ نزیّک ءَ سورینج ءِ ھند ءَ پاکستانی منرل ڈیولپمنٹ کارپوریشن (پی ایم ڈی سی ) ءِ پروجیکٹ منیجر شبر مزار ءَ گوں چیریں کتگیں بمب اُرشے ءَ نِشانگ کُرتگ ،تراک ءِ آسر ءَ شبر مرزا ھما جاہ ءَ مُرتگ ءُ آئی ءِ ڈرائیور ٹپی بیتگ-

آئی ءَ گْوشتگ کہ پی ایم ڈی سی گوستگیں بازیں سالاں چہ بلوچستان ءَ بلوچ راجی مڈّیانی لُٹّ ءُ پُل ءَ ھوار اِنت وھدیکہ اے لُٹ ءُ پُل ءِ تہ ءَ اے ادارہ زورگریں پاکستانی پوج کُمک گون اِنت۔ بلوچ لبریشن آرمی ءَ اے پدّر کُرتگ کہ بلوچ مڈّیانی لُٹّ ءُ پُل ءِ رزامندی ھِچ کس ءَ دیگ نہ بیت اِنت۔

جارکشّ ءَ دیمتر ءَ گْوشتگ کہ بلوچ لبریشن آرمی ءِ سرمچاراں دِگہ یک اُرشے ءَ 26 ستمبر 2023 ءَ گْوادر ءِ دمگ پسنی ءَ وارڈ نمبر 2 ءِ دمگ ءَ یوفون شِرکت ءِ یک ھال اھوالی ٹاورے ءِ مشینری مانداشتگ ءُ ناکارہ کُرتگ انت ۔

جارکشّ جیئند بلوچ ءَ گُڈی ءَ گْوشتگ کہ اِے اُرشانی زمہ واریاں منّ ایں ۔ زورگریں پاکستانی پوج ءُ آئی ھمراھدارانی سر ءَ مئے اُرش برجاہ بنت اِنت ۔

سربوتگیں ھالانی رِد ءَ کیچ ءِ دمگ اپسی کھن ءُ کلبر ءَ ھوار آواران ءِ دمگ مشکے ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ ، ارش ءَ پوج ءَ جانی تاوانانی دیمپانی کنگ کپتگ –

گیشیں ھالانی رِد ءَ آواران ءِ دمگ مشکے ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کُتگ – اے اُرش مروچی یک شمبے ءِ بیگاہ ءِ سے ءَ مشکے ءِ ھند ملش بند ءَ برجاھیں زورگریں پاکستانی پوج ءِ پانگس ءِ سر ءَ کنگ بوتگ –

دمگی اھوالکارانی رِد ءَ اے اُرش داں دیر ءَ برجاہ بوتگ، ھمے گمان کنگ بیت کہ اُرش ءَ پوج ءَ جانی تاوان ءِ دیمپانی کنگ کپتگ –

دومی نیمگ ءَ کیچ ءِ دمگ مند ءِ سیمسری ھند اپسی کھن ءَ ھم ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کُتگ –

دمگی اھوالکارانی رِد ءَ اے اُرش اپسی کھن ءِ دُز راہ ءَ برجاھیں پاکستانی پوج ءِ پانگس ءِ سر ءَ کنگ بوتگ ءُ اُرش ءَ پوج ءَ جانی تاوانانی دیمپانی کنگ کپتگ –

ھمے وڈ کیچ ءِ دمگ کلبر ءَ ھم ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کتگ – اے اُرش کلبر ءِ ھند مات بند ءَ برجاھیں پاکستانی پوج ءِ پانگس ءِ سر ءَ پانگس ءِ سر ءَ کنگ بوتگ –

ھرسَئیں ارشانی درگت تنی وھدی سرکاری واکدارانی نیمگ ءَ ھچ وڈیں درشان دیگ نہ بوتگ – زانگ بہ بیت اے ھند ءُ دمگاں پاکستانی پوج ءِ سر ءَ بوتگیں ارشانی زمہ واریاں گیشتر بلوچ آجوئی لوٹوکیں سلاہ بندیں گل منّ انت بلے تنی وھدی سلاہ بندیں گلانی نیمگ ءَ ھم ھچ وڈیں درشان دیگ نہ بوتگ –

بلوچستان ءِ بُنجاھی شھر شال ءَ گوستگیں روچاں سی ٹی ڈی ءَ ٹاہ داتگ اَت کہ یک میڑے ءَ بی ایل اے دو باسک جنگ بوتگ انت ءُ دومی نیمگ ءَ چاگردی ترامجاھاں گوشگ بوگ ءَ انت کہ سی ٹی ڈی ءِ دست ءَ جنگ بوتگیں ھردو مردم پیسر ءَ چہ زورانسری آوار جنگ بوتگیں مردم بوتگ اَنت-

سی ٹی ڈی ءَ ٹاہ داتگ ات جنگ بوتگیں مردمانی سیادی گوں بلوچ آجوئی لوٹوکیں سلاہ بندیں گل بی ایل اے ءَ انت ءُ آیانی گور ءَ سلاہ ءُ پرپٹ ءِ دستیگ کتگ –

سی ٹی ڈی ءِ دست ءَ جنگ بوتگیں ھردو ورنایانی جون ماں شال ءِ سول نادراھجاہ ءِ مردگ جاہ ءَ برگ بیتگ انت کہ مروچی آیانی پجار کنگ بیتگ انت –

سی ٹی ڈی ءِ دروگیں میڑ ءَ کُشگ بوتگیں محمد شفیع ءِ کھول مروچی شال ءَ اتکگ ءُ آئی ءِ جون پجار کتگ وھدیکہ ھمے وھد ءَ آئی ءِ کھول بیگواھیں مردمانی پانکجنیں گل وی بی ایم پی ءِ بنجل ءَ ھم شتگ ءُ وتی رپورٹ نبشتہ کنائیں اِتگ کہ محمد شفیع بلوچ پیسر ءَ چہ زورانسری آوار جنگ ءُ بیگواہ کنگ بوتگ –

چہ وی بی ایم پی ءِ بنجل ءَ آیاں وتی شنگ کتگیں تامری درشانے ءِ تہ ءَ گوشتگ کہ محمد شفیع بنگلزئی ھمے سال ءِ سینزدہ اگست ءَ پاکستانی پوج ءَ مزنیں کچے ءَ آئی ءِ گس ءَ ماں شال کمبرانی ءَ بیڑ برتگ ءُ آئی ءِ برات محمد سلمان ء حیان بنگلزئی ءِ ھمراھی ءَ آوار جتگ ءُ گوں وت برتگ –

ورنایے کھول ءَ سی ٹی ڈی ءِ ٹاہ رد کتگ گوشتگ کہ محمد شفیع گِس ءِ مردمانی دیم ءَ زورانسری آوار جنگ ءُ بیگواہ کنگ بوتگ ھمے گوشگ بوتگ کہ پٹ پول کنگ ءُ یل کنگ بیت بلے مروچی آئی ءِ جون دست کپتگ –

محمد شفیع ءِ ھمراہ آئی ءِ برات سلمان ھنگت گار ءُ بیگواہ انت –

ھمے میڑ ءَ جنگ بوتگیں دومی ورنایے پجار ھم بوتگ کہ آ ہیسر ءَ زورانسری آوار جنگ بیگواہ کنگ بوتگ آئی ءِ نام محمد یوسف نجاری انت کہ ھمے سال ءِ بیست ءُ شش اگست ءَ پاکستانی پوج ءَ چہ شال ءَ زورانسری آوار جتگ ءُ بیگواہ کتگ بوتگ –

زرینہ ءِ دردناکیں ودار

ٹی بی پی شونگال

‏”منی لوگ واجہ چہ گوستگیں بازیں سالاں بیگواہ اِنت، من نزاناں کہ من وت ءَ را آئی ءِ لوگیگ سرپد بہ باں اگاں جنوزام” زرینہ چہ ھپت سالاں زورانسری بیگواھی ءِ آماچیں لوگ واجہ شبیر بلوچ ءِ یل کنائنگ ءِ ھاتر ءَ کراچی ءَ برجاھیں زھرشانی ءَ گُشتگیں اے لبزاں بلوچ زالبولانی درد ءُ ازیت ءَ پدر کن اَنت، کہ اے چہ بازیں سالاں زورانسری بیگواھیں دوستیگانی وداریگ اَنت ءُ ودار آیانی بھت جوڑ بیتگ۔

بلوچ اسٹوڈنٹس آرگنائزیشن ءِ بنجاھی انفارمیشن سیکٹری شبیر بلوچ چار اکتوبر دو ھزار ءُ شانزدہ ءَ چہ کیچ ءِ گورکوپ ھنکین ءَ فرنٹیر کور ءَ زورانسری بیگواہ کُتگ اَت۔ شبیر ءِ گوھار سیما ءُ لوگی زرینہ چہ ھپت سالاں آئی ءِ یل کنائنگ ءِ ھاتر ءَ زھرشانی کنگ ءَ اَنت، اسلام آباد ءُ شال ءِ ریڈ زون ءَ نندانک ھم داتگ اِش، شال، ھب چوکی ءُ کراچی ءَ یکشل ءَ زھرشانی کنگ ءَ اَنت۔ پاکستان ءِ آمید گس ءُ مردمی اگبالانی کمیشنانی در ٹُک اِتگ اَنت اِش بلے سالانی گوزگ ءَ پد ھم شبیر بلوچ یل کنگ نہ بیتگ۔

جنگ زدگیں بلوچستان ءَ بازیں زرینہ ھست اَنت کہ آ نزاناں آیانی لوگواجہ زندگ اَنت اگاں کُشگ بیتگ اَنت۔ سیما، فرزانہ ءُ رخسانہ ءِ پئیمیں گوھار چہ بازیں سالاں وتی براتانی راھاں چارگ ءَ اَنت ءُ بازیں پیریں مات ءُ پِتاں وتی بچانی ودار ءَ اے جھان یل کُتگ ءُ رپتگ اَنت۔ بلوچستان ءَ چشیں کجام ھم دمگے پشت نہ کپتگ کہ آ چہ زورانسری بیگواھیاں اسرمند نہ اِنت۔

پاکستان ءِ بلوچ جنگ ءِ دارگ ءِ ھاتر ءَ زورانسری بیگواھی ءَ سلاہ ءِ پئیم ءَ کامرز کنگ ءِ شوربندی ءَ بلوچستان ءِ تہ ءَ یک انچیں تُرسچاری ءِ ودی کُتگ کہ چریشی ءَ ھزارانی کھول اسرمند اَنت۔ زورانسری بیگواھیانی سر ءَ دگنیائے ءُ میان استمانی مردمی اگبالانی ادارگانی ھاموشی ءُ چہ پاکستان ءَ جُست گِرگ ءَ پھریز بلوچستان ءِ ناگیگیں جاورانی گنتر کنگ ءِ سوب جوڑ بئیگ ءَ اِنت۔

شمبے ھپت اکتوبر ءَ اوگانستان ءِ دمگ ھرات ءَ بیتگیں زمین چنڈ ءِ آسر ءَ بیرانیانی کچ دوھزار ءَ سر بیتگ اَنت-

تالبان ھکومت ءِ کھر ءُ وئیلاں چہ گر داروکیں وزارت ءِ جارکش ملا جانان سائق رِد ءَ تاں انّو بیرانیانی کچ دوھزار بنجاہ سے وھدے کہ ٹپیانی کچ نُھ ھزار دوسد چلّ اَنت-

جارکش رِد ءَ اے زمین چنڈ ءَ یک ھزار سے سد بیست نُھ لوگ ءُ ماڑی کمو یا سرجمی ءَ پروشتگ اَنت-

اوگانستان ءِ انفارمیش ءُ کلچر منسٹری ءِ یک کارندھے عبدالواحد ریان ءَ ھم اے گپ راست کتگ ءُ ٹپیانی کچ بے کساس گیش اَنت-

مھکمہ جان سلامتی ءِ یک کارندھے ڈاکٹر دانش ءِ رِد ءَ دو سد ءَ گیش بیران بیتگیں مردم جتاجتائیں نادُراھجاھاں آرگ بیتگ اَنت ءُ اشانی تہ ءَ گیشتر زالبول ءُ زھگ بیتگ اَنت-

زانگ بہ بیت کہ شمبے ءِ بیگاہ ءَ تاں بیرانیانی کچ شانزدہ گوشگ بیتگ اَنت بلے شمبے ءِ سُھب ءَ ریڈ کراس نیمگ ءَ گوشگ بیتگ کہ بیرانیانی کچ پنچ سد بیتگ اَنت-

ملا جانان سائق ءِ رِد ءَ ایرانی سیمسر ءِ نزیک ءَ ھم وھد ءَ ھم دہ ریسکیو ٹولی کُمکی کاراں دلگوش اَنت-

ھاش ءُ زاھدان ءَ ایرانی لشکر ءَ شش مردم آوار جنگ ءَ پد بیگواہ کتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھاں سَے مردم آوار جتگ ءُ بیگواہ کتگ اَنت-

چہ زاھدان ءَ سر بیتگیں اھوالانی رد ءَ آوار جنگ بیتگیں مردمانی پجار یاسر نھتانی، فضل احمد تیموری ءُ حمد اللہ علیزئی ءِ نام ءَ زانگ بیتگ-

اھوالانی رد ءَ اے مردم آدینگ ءِ روچ ءَ چیریں ادارھاں دزگیر کنگ ءَ پد بیگواہ کتگ اَنت-

ھمے وڑ ءَ روکپتی بلوچستان ءِ دمگ ھاش ءَ آوار جنگ بیتگیں مردمانی پجار عبدالواحد ، یحیٰ ءُ عثمان گمشاد زئی ءِ ناماں زانگ بیتگ اَنت-

اھوالانی رد ءَ عبدالواحد الخلیل مسیت ھاش ءِ انتزامیہ اِنت ءُ یحیٰ ءِ ھواری ءَ آوار جنگ بیتگ –

اھوالانی رد ءَ عثمان چہ ھاش ءَ آوار جنگ ءَ پد آ زاھدان ءَ برگ بیتگ –

زانگ بہ بیت روکپتی بلوچستان ءَ اے دو ھپتگانی توک ءَ کساس سد مردم ءِ کچ ءَ مردم آوار جنگ بیتگ اَنت کہ آیانی توک ءَ بیگواہ بیتگیں مردمانی اُمر چِل سال ءَ جھل ءُ ھژدہ سال ءَ برز ھمے میانی اُمری مردم ھوار اَنت-

چہ کراچی ءَ دیم پہ پنجگور ءَ روکیں مساپر برین بس نال ءِ ھند ءَ کلٹی بیتگ، دو مردم بیران بیتگ انت ءُ بازینے زدگ بیتگ اَنت-

گیشیں اھوالانی رد ءَ نال ھڑمبو چڑھائی ءَ چہ کراچی ءَ دیم پہ پنجگور ءَ روکیں مساپر بریں بس پیچ ءَ کاٹگے وھد ءِ وھد ءَ پیچ گپتگ ءُ کپتگ – وئیل ءَ دو مردم بیران بیتگ اَنت ءُ بازینے زدگ بیتگ اَنت-

دمگی مردمانی رد ءَ بس ءِ چیر ءَ بازیں مردم چیر تر اتگ اَنت ءُ انتزامیہ ءَ کشگ بندات کتگ اَنت-

بلوچستان ءِ بنجاھی شھر شال ءَ بیتگیں یک بمب تراکے ءَ یک مردمے بیران ءُ یکے زدگ بیتگ-

بیران بیتگیں مردم ءِ پجار پاکستان منرل ڈیولپمنٹ کارپویشن پروجیکٹ ءِ منیجر شبر مرزا ءِ نام ءَ زانگ بیتگ –

پولیس ءِ رد ءَ تراک سورینج ءَ کوئلہ مائن فیلڈ ءِ نزیک ءَ سڑک ءِ کش ءَ گاڑی ءِ نزیک ءَ بیتگ- تراک ءَ یک مردمے بیران ءُ یکے زدگ بیتگ-

تراک ھما وھد ءَ کنگ بیتگ کہ پروجیکٹ منیجر شبر مرزا پی ڈی ایم سی کارپوریشن ءَ کوئلہ مائن فیلڈ ءَ روگ ءَ بیتگ- تراک ءِ زمہ واری تنی وھدی کس ءَ پہ وت ءَ نہ زرتگ-