TBP Balochi

ایران ءِ اُستان کرمان ءَ ھواریں زرباری ھند اسلام آباد رووبار ءَ یک ورنایے ناشناسیں مردماں آوار جتگ ءُ گوں وت برتگ –

آوار جنگ بیتگیں مردم ءِ پجار بیست سالی ئیں علی اکبر بلوچ جھمنند اسلام آباد ءِ نام ءَ زانگ بیتگ-

دمگی مردمانی رد ءَ علی اکبر یک دکانے ءَ کار ءَ بیتگ ءُ آئی ءَ ھچ کس ءَ گوں دشمنی نہ بیتگ –

آوار جنوک ءُ آوار جنی ءِ بارو ءَ دگہ سرپدی دیم ءَ نیتکگ اَنت-

حماس ءَ اسرائیل ءِ بگیری ءَ جنگ ءِ جار جتگ ءُ جنگول اسرائیل ءِ تہ ءَ پُترتگ انت – ارب رسانکدرانی رِد ءَ حماس ءَ اسرائیل پوج ءِ یک میجر جنرل ءِ ھُلوچ (دزگیر) کتگ –

فلسطینیانی پوجی گل حماس ءَ اسرائیل ءِ سر ءَ بازیں راکٹ گولہ ءِ آس داتگ ءُ وتی جنگول اسرائیل ءِ سیمسراں گوازینتگ انت – حماس ءِ اُرش ءَ پد اسرائیل ءَ شیواری جار جتگ وھدیکہ پوج ءَ ملک ءِ تہ ءَ جنگ ءِ جار جتگ ءُ پسوی ءَ غزہ ءِ سر ءَ وتی اُرش بندات کتگ انت –

حماس ءِ پوجی کماندار محمد دائف ءَ شمبے ءِ روچ ءَ دمگی رسانکدرے ءِ اھوالکاراں گوں تران کنان ءَ اسرائیل ءِ سر ءَاُرش ءِ جار جتگ ءُ اے آپریشن الاقصی اسٹورم ءِ نام داتگ –

امریکی رسانکدر وائس آف امریکہ ءِ رِد ءَ اسرائیل ءِ بگیری ءَ جنگ ءِ جار جنان ءَ آیاں ٹاہ داتگ کہ اسرائیل ءِ نیمگ ءَ پنچ ھزار راکٹ آس دیگ بوتگ – فلسطینی اسرائیل ءِ بگیری ءَ دگانی سر ءَ جنگ دیگ ءَ ساڑی انت –

حماس ءِ راکٹ اُرش ءَ یک زالبولے ءِ مرگ ءِ ھال انت وھدیکہ غزہ ءِ سیمسری دمگاں کمک کار کمک ءَ دلگوش انت –

بی بی سی ءِ نوکتریں رپورٹ ءِ رِد ءَ حماس ءِ نیمگ ءَ بوتگیں اُرش ءَ دوسد ءُ پنجاہ اسرائیلی وھدیکہ اسرائیل ءِ پسوی اُرش ءَ دوسد ءُ سِی ءُ دو فلسطینی مرتگ انت – بازیں اسرائیلی پوجی ءُ دمگی مردم فلسطینی جنگولانی دست ءَ ھُلوچ کنگ بوتگ انت –

چاگردی ترامجاھاں شنگ بوتگیں تامرانی تہ ءَ گندگ بیت پوجی پوشاک گوریں سلاہ بندیں جنگول اسرائیل ءِ سیمسری شھر سدیروت ءِ دگانی سر ءَ تر ءُ گرد کنگ ءَ انت –

دگہ تامری ءِ تہ ءَ فلسطینی گندگ بنت کہ اسرائیلی پوجی ءِ گور ءَ اشتاتگ انت ءُ ھمے گوشگ انت کہ اللہ درساں مستر انت – دگہ باز تامرانی تہ ءَ گندگ بیت اسرائیلی ٹینگ ماندارگ بوتگ انت ءُ سلاہ بندیں جنگول شاتکامی کنگ انت ءُ بازیں پوجی کارمندے آیاں ھلوش کتگ –

بلے چاگردی ترامجاھاں شنگ بوتگیں تامرانی تنی وھدی ھچ وڈیں ھال شنگ کنگ نہ بوتگ کہ آ راست انت کہ ناں –

حماس ءِ اُرش ءَ پد اسرائیل ءِ زرباری دمگاں شیواری ءِ ھارن جنگ بوگ ءَ انت ءُ مردم ھمے گوشگ بوگ ءَ انت وتی گسانی تہ ءَ بہ بہ ئے – اسرائیل ءِ مزن وزیر ءَ ھم ملک ءِ نگیگیں جاورانی پژدر ءَ گوں پھازگی لشکر ءَ گند ءُ نند کتگ –

ارب رسانکدرانی نیمگ ءَ گوشگ بوگ ءَ انت حماس ءَ اسرائیلی پوج ءِ میجر جنرل ءِ ھم ھلوچ کتگ –

چاگردی ترامجاھاں شنگ بوتگیں تامرانی تہ ءَ یک تامرے ءِ تہ ءَ اے ھم گندگ بیت فلسطینیاں پنچ اسرائیلی پوجی ھلوچ کتگ ءُ ترگ انت – اے ھم گندگ بیت کہ فلسطینیاں اسرائیلی پوجی چہ میتگاں دزگیر کتگ ءُ پرپٹانی سر ءَ دیم پہ غزہ ءَ برگ ءَ انت –

چہ غزہ ءَ اس دیگ بوتگیں راکٹ گولہ، فلسطینیانی ماں اسرائیل ءَ پُترگ ءُ اسرائیل ءِ پوجیانی ھلوچ ءُ طوفان الاقصی ءِ اے آپریشن ءَ جھان ھیران کتگ –

دومی نیمگ ءَ اسرائیل ءَ ھم غزہ ءِ حماس ءِ بگیری ءَ آپریشن نفاذ ءِ جار جتگ ءُ اے آپریشن بندات کتگ – غزہ ءَ نشتگیں بازیں مردمے در اتکگ شتگ –

اسرائیلی رسانکدر ہارٹز ءِ اے ھال شنگ کتگ کہ سلاہ بندیں فلسطینیاں بیر سبع ءِ مگرب ءَ یک میتگے ءِ سر ءَ اُرش کتگ – چدوپیسر رسانکدر “العربیہ ” اھوالکاراں اے ھال شنگ کتگ کہ فلسطینی جنگول غزہ نزیکیں چار میتگاں مانریتکگ ءُ مردم ھلوچ کتگ انت ءُ اسرائیل ءِ تہ ءِ بازیں دمگ ءِ وتی انگر ءَ کتگ –

ارب رسانکدرانی رِد ءَ فلسطین ءِ دمگ غزہ ءِ سلاہ بندیں گل حماس ءِ جنگولاں اسرائیل ءِ سر ءَ اُرش کتگ ءُ اے میان ءَ پنجاہ اسرائیلی پوجی ءُ شھری ھلوچ کتگ انت گوں وت برتگ انت –

گوستگیں سھب ءَ حماس ءَ چہ غزہ ءَ اسرائیل ءِ سر ءَ زمینی، زری ءُ برزی اُرش کتگ ءُ اُرشاں چہ اسرائیلی پوجیاں ھوار چِل اسرائیلی مُرتگ انت ءُ ھپت سد ءَ گیش زدگ بوتگ انت کہ آیانی تہ ءَ بازینے ءِ جاور نگیگ انت – دومی نیمگ ءَ ارب رسانکدر اے ھم گوشگ انت کہ حماس ءِ جنگولاں اسرائیلی پوج ءِ میجر جنرل نمرود الونی ھلوچ کتگ ءُ گوں وت برتگ –

اوگانستان ءَ زمین چنڈ سما کنگ بیتگ- گیشیں ھالانی رِد ءَ روکپتی اوگانستان ھرات بادغیس فرح ابید نمروز دمگاں تُرسناکیں زمین چنڈ سما کنگ بیتگ- بنداتی ھالانی رِد ءَ سی مردم بیران وھدے کہ ھپتاد ٹپی بیتگ اَنت- مزنیں کچے ءَ لوگ لُمبیتگ اَنت-

امریکی جیالوجی بُنجاہ ءَ زمین چنڈ ءِ تُرندی 6.2 نکش کنگ بیتگ تنی وھدے ھچ وڑیں جانی تاوان ھال سر نہ بیتگ بلے بازیں ھنداں لوگانی کپگ ءِ ھال اِنت ماڑیاں مزنیں کچے ءَ تاوان داتگ اَنت-

درملکی رسانکدر ءِ ھالانی رِد ءَ اوگانستان ءَ 6.2 تُرندی زمین چنڈ سما کنگ بیتگ- گوشگ بیتگ کہ ترکمانستان ، ازبکستان ءُ ایران ءَ ھم زمین چنڈ سما کنگ بیتگ-

زانگ بہ بیت چیزے روچ ءَ ساری نیپال ءُ ھندوستان ءَ ھم زمین چنڈ سما کنگ بیتگ- نیپال ءَ 6.2 تُرندی ءِ زمین چنڈ سما کنگ بیتگ کہ آئی ءِ اسر گوریچانی ھندوستان ءَ شنگ اِتگ-

امریکی زمینی چار ءُ ٹپاس کنوک رِد ءَ اے زمین چنڈ ءِ بُنجاہ چین سیمسر ءَ گوشگ بیتگ- بلے تنی وھدے ھچ وڑیں جانی ءُ مالی تاوان ھال سر نہ بیتگ-

اتر پردیش ءِ بُنجاھی شھر لکھنئو ءُ ھندوستان ءِ بُنجاھی شھر دھلی ءَ ھم زمین چنڈ ءِ تُرندی سما کنگ بیتگ چریشی ءِ سبب ءَ مردم تُرس آماچ بیتگ ءُ کارگس ءُ لوگاں چہ ڈن درتکگ اَنت-

گیشیں اھوالانی رد ءَ گمانی دروشم ءَ یک مردمے ءَ وتکشی کتگ ءُ وتی زند ھلاس کتگ-

دراتکگیں لاش ءِ پجار پاکستان ءِ اُستان سندھ ءِ جھمنند نوشاد علی ء سلیمان ءِ نام ءَ زانگ بیتگ-

اے لاش مروچی سھب ءَ چھبار ءَ ھواریں دمگ بریس ءَ دزکپتگ –

لاش ءِ شنگ بیتگیں اکس ءُ تامرانی تہ ءَ گندگ بیت اِنت کہ بیران بیتگیں مردم ءَ وتی کُشگ ءَ بلاک پادانی چیر ءَ کتگ ءُ وتی زند ھلاس کتگ-

آئی ءِ پُچاں چہ زانگ بیت اِنت اے مرد پوریاگری ءَ بیتگ ءُ آئی ءَ وتی زند پاھو داتگ-

پاھو دیگ ءِ سبب ءُ دگہ بابتانی درگت ءَ گیشیں اھوال دیم ءَ نیتکگ انت –

بلوچستان ءَ شومک ءِ نادراھی گیشی، کیچ ءَ دو کس ءُ چاگی ءَ یک کسے مرگ ءِ ارجان بیتگ –

اوست ویلفئیر آرگنائزیشن ءِ چیئرمین ءُ میڈیکل ٹیم ءِ انچارج وپا بلوچ ءَ گوشتگ کینسر ھمک روچ پہ روچ گیش بوان اِنت – گوستگیں ھپتگ ءَ بلڈ کینسر ءِ نادراھیں دو ورنا بیران بیتگ اَنت آیانی توک ءَ سیادی بلیدہ ءُ ناسر آباد ءَ اِنت –

آئی ءَ گوشتگ من مھلوک ءَ گوں دزبندی کن آں ماوا، گٹکا، شیکر، بیئر ءُ اسٹینگ ءُ دگہ تاوان دیوکیں وردنانی ورگ ءَ یل بہ کن ات-

آئی ءَ گوشتگ ما وتی سرپدیں مھلوک،باپاری مردم، سیاسی ءُ چاگردی مردماں گوں دزبندی کن ایں کینسر ءِ نادراہ ءُ مالی جیڑھانی آماچیں نادرھانی واستا اوست ویلفئیر آرگنائریشن ءَ سرجمی ءَ کمک بہ کن اَنت-

ھمے وڑ ءَ چاگی کینسر ءِ نادراھیں بیران بیتگ – مردمانی گوشگ اِنت نھاد داریں ساہ کینسر نادراہ ءُ سرکاری کمک نہ رسگ ءِ سبب ءَ مارا جتا بوگ ءَ اَنت-

گیشیں اھوالانی رد ءَ چاگی لشکراپ ءِ دمگ ءَ سیادی حافظ القراب فضل الرھمان گوستگیں یک سال ءُ نیمے ءَ کینسر ءِ نادراھی ءِ آماچ بیتگ – یک سالے ءُ نیمے ءَ کینسر ءَ گوں جنگ کنان ءَ بیران بیتگ-

زانگ بہ بیت رخشان ڈویژن ءَ بازیں نھاد داریں ساہ کینسر ءِ وڑیں نادراھی ءَ زند ءَ چہ چُٹ اتگ اَنت ءُ بازیں مردم انگت ءَ نادراہ اَنت-

مردمانی گوشگ اِنت سھر ءُ چاندی ءِ درکنوکیں زمین بلوچستان ءَ داں انگت ءَ کینسر ءِ ھسپتال نیست اِنت –

متھدہ ارب امارات ءِ سروک شیخ مھمد بند زاید ال نھیان ءَ ملائیشیا ءِ سر وزیر انور ابراھیم ءَ گوں گند ءُ نند کتگ ءُ ھردوکیں ڈیھانی سیادی ء کمک کنگ ءِ سر ءَ گچینی شوربندی کتگ-

امارات ءِ سرکاری ھال سرکنوکیں ادارہ وام ءِ رد ءَ ھردوکیں رھشوناں ملائیشیا ءُ امارات ءِ میان ءَ کمکی جتا جتائیں پھناتاں گپ کنگ بیتگ کہ چریشی ءَ دوستی ءُ ھمسنتیں لوٹانی رھبندانی رد ءَ چار ءُ ٹپاسکاری بیت اِنت-

ایشی ءَ ابید ھردوکیں ڈیھانی نپ ءُ دیمروی ءِ وشھالی ءِ دیم ءِ واستا گپ ءُ تران بیتگ اَنت-

ایشی ءَ پیش امارات ءِ سروک ءَ ابوظبی ءَ الشاطی ماڑی ءَ ملائیشیا ءِ سروزیر انور ابراھیم ءِ وش اتک کتگ بیتگ-

ھردوکاں امارات ءُ ملائیشیا ءِ میان ءَ بند ءُ ساچی زرکاری، باپاری، دراج کشیں روچداری ءُ فوڈ سیکیورٹی ءِ وڑیں گچینی تکانی کمکانی ءُ آیوکیں وھد ءَ چار ءُ ٹپاسی ءِ سر ءَ بیتگ اَنت-

ھمے وھد ءَ استمانی ءُ میان اُستمانی جاورھالانی سر ءَ ھم گپ ءُ تران بیتگ-

عرب نیوز ءِ رد ءَ ملائیشیا ءِ سرکار ءَ سر وزیر انور ابراھیم ءِ تر ءُ تاب ماں امارات ءِ درور دیان ءَ گوشتگ امارات سال دوھزار ءُ بیست ءُ پنچ ءَ ملائیشیا ءَ دَہ گیگا واٹ بجلی ءِ منسوبھاں برجم کنگ ءَ کمک کنت اِنت-

تر ءُ تاب ءِ وھد ءَ ھردولیں ڈیھاں زرکاری ءُ باپاری کمکانی سر ءَ سھت کنگ بیتگ اَنت ءُ اے مساماں ابوظبی ءِ فیوچر انرجی کمپنی ءِ نیمگ ءَ ملائیشیا ءَ بود داریں توانائی ءِ منسوبھاں ھشت ارب ڈالر داں زرکاری ءِ زبان ھوار اِنت-

ملائیشین انویسٹمنٹ ڈیولپمنٹ اتھارٹی ءُ امارات ءِ انٹرنیشنل انویسٹمنٹ کونسل ءَ ھردوکیں ڈیھانی میان ءَ نپ ءِ بند ءُ ساچی ءِ کمک ءَ گیش کنگ ءَ تپاک کتگ-

ایران ءَ پہ زالبولانی ھکانی ھاتر ءَ توار چست کنگ ءِ پژدر ءَ دوازدہ سالاں بندیگیں نرگس محمدی ءَ اے سال ءِ دوھزار ءُ بیست ءُ سَے ءِ نوبیل داد گپتگ –

داد دیوکیں کمیٹی ءَ وتی جار ءِ تہ ءَ گوشتگ نرگس محمدی ءِ ھاتر ءَ اے داد ءِ جار پہ ھما مردماں کلوہ ءِ کہ ایران ءَ ھستیں وھد ءَ بوؤکیں زھرشانیاں ھوار انت ءُ نرگس محمدی ءِ یل کنگ ءِ لوٹ ءَ کنگ ءَ انت –

نرگس محمدی ماں ایران ءَ زالبولانی ھک ءِ دیگ ءُ مرگ ءِ سزائے ھلاس کنگ ءِ ھاتر ءَ کار کنگ ءَ بوتگ – کہ چریشی ءَ سوب ءَ باز براں بندیگی ءِ دیمپان کنگ کپتگ –

نارویجیئن کمیٹی ءَ وتی جار ءِ تہ ءَ گوشتگ کہ اے داد درساں پیش ایران ءَ بوؤکیں سرجمیں زرمبشت ءَ انت آئی ءِ رھشون نرگس محمدی انت –

کمیٹی ءِ گوشگ ات کہ پہ ایران ءِ واکداراں جوانیں پیسلہ ایش بیت کہ آ نرگس ءَ یل بہ کنت ءَ دسمبر ءِ ماہ ءَ وتی داد ءِ دز گرگ ءِ موکل دیگ بہ بیت –

ایران ءِ بھتام انت کہ زالبولانی ھک ءُ بُرکہ ءَ ھوار ایندگہ کانودانی بگیری بؤکیں زھرشانی ءَ روکپتی ڈیھانی دست مان انت –

نرگس محمدی اے وھدی ماں ایران ءَ اوین بندیگ جاہ ءَ بندیگ انت – آئی ءَ بازیں شَرانی سر ءَ دوازدہ سال ءِ سزا دیگ بوتگ – ھکانی گل فرنٹ لائن ڈیفنڈر ءِ رِد ءَ نرگس محمدی ءَ باز برا بندیگ کنگ بوتگ آئی ءِ سر ءَ جنگ بوتگیں الزامانی تہ ءَ ریاست ءِ پروپکنڈہ کنگ ھم ھوار انت –

نرگس محمدی ڈیفنڈر آف ہیومن رائٹس سنٹر ءِ کمک سرکماش ھم بوتگ – اے درسرکاری گل ءِ سرکماش شیرین عبادی ءَ سال دوھزار سَے ءَ ایمنی ءِ نوبیل داد دیگ بوتگ –

نوبیل داد ءِ جار ءَ پد پیرس ءَ نندوکیں نرگس محمدی ءِ لوگواجہ تقی رحمانی ءَ رسانکدر “رائیٹر” ءِ اھوالکار ءَ گوں تران کنان ءَ گوشتگ کہ اے داد ءَ چہ انسانی ھکانی ھاتر ءَ نرگس ءِ جھد مھکم تر بیت – راستی ءَ اے داد ایران ءَ برجاھیں زرمبشت زن، زند، آجوئی ءِ انت –

ایمنی ءِ نوبیل داد ءَ ھوار کساس دھ لک ڈالر ءِ داد ھم دیگ بیت – نوبیل داد ءُ زر ھمے سال ءِ دھ دسمبر ءَ ماں اوسلو ءَ مراگش ءَ دیگ بنت ءُ اے رمس نوبیل داد ءِ سروک ءُ سوئیڈش موجد الفریڈ نوبیل ءِ سالروچ انت – آئی ءِ مرگ ءَ پیش گُڈی گپانی رِد ءَ سال ھژدہ سد ءُ نود ءُ پنچ ءَ اے داد دیگ بندات کنگ بوتگ –

بلوچستان ءِ بنجاھی شھر شال ءَ آدینگ ءِ روچ ءَ پریس کلب ءَ شائر ءِ آشوب مبارک کازی ءِ یات ءَ بلوچ لبزانکی دیوان شال ءِ نیمگ ءَ برجم دارگ بیتگ-

نیاد ءَ گچینی ءِ مھمان نیشنل پاٹی ءِ سروک ڈاکٹر عبدالمالک بلوچ بیتگ ءُ ھمے وڑ طلوچ زبان ءِ پروپیسر اے آر داد بلوچ، بلوچ ڈپارٹمنٹ ءِ چیئرمین رحیم مھر ءُ ایشی ءَ ابید دگہ تک ءُ پھناتاں سیادی داروکیں مردماں بھر زرتگ-

دیوان ءِ بندات ءَ پروپیسر اے آر داد بلوچ ءُ رحیم مھر ءَ شائر ءِ آشوب مبارک کازی ءِ شائری ءِ سر ءَ وتی لیکہ درشان کتگ اَنت-

ڈاکٹر عبدالمالک بلوچ، ڈاکٹر سلیم کرد ءُ دگہ تران کنوکان مبارک کازی ءِ یات ءَ تران کتگ اَنت-

گوشداروکاں گوں دلگوش کنان ءَ پروپیسر اے آر داد ءَ مبارک کازی ءِ شائری ءِ جھلانکی ءِ سر ءَ گپ جتگ ءُ وتی شائری ءِ دروشم ءَ مردم دلگوش کتگ اَنت-

تران کنوکاں گوشتگ کہ مبارک کازی ءَ وتی شائری ءِ دروشم ءَ بلوچ ءِ بھادری، گلامی، سیاسی ءُ نیزگاری ءِ جاور پیش کتگ اَنت-

ھمے وڑ ءَ پبلک ویلفئیر سینٹر پسنی ءِ باسکاں مبارک کازی ءِ نزیکیں شائر ءُ سنگتاں گوں گند ءُ نند کتگ –

اود ءَ شائر ءُ لبزانکی مردماں بھر زرتگ ءُ اود ءَ سوڑگ بیتگ کہ کازی ءِ چِل ءَ رند پسنی ءَ یک مراگشے برجم دارگ بیت اِنت-

بلوچستان ءِ دمگ کیچ ءُ ھرنائی ءَ پوج ءِ لشکر کشی ، سلاہ بند ءُ پاکستانی پوج ءِ میان ءَ جنگ ءُ چوپ ءَ دونیمگی ءَ جانی تاوانانی ھال اِنت-

تربت ءَ پولیس ءَ ٹاہ داتگ کہ پاکستانی پوج ءَ ھوشاپ ءَ لشکر کشی کتگ – اے میان ءَ پوج ءِ تیرگواری ءَ چہ دو مردم بیران بیتگ اَنت کہ آیانی لاش ایف سی بلوچستان ساؤتھ ءِ ھیڈکوارٹر تربت ءَ برتگ اَنت-

پولیس رِد ءَ تنی وھدے لاشانی پجّار نہ بیتگ اَنت ، لاشاں ایف سی ھیڈکوارٹر ءَ چہ لیویز نیمگ ءَ ٹیچنگ ھسپتال آرگ ءِ تیاری ءَ کنگ ءَ اَنت-

دومی نیمگ ءَ ھرنائی ءِ دمگ چھپر لیٹ ءِ دمگ ءَ پاکستانی پوج ءَ لشکر کشی کتگ ، دمگی اِھوالکارانی رِد ءَ لشکر کشی ءَ پوج ءِ بالگرداں ھم بھر زرتگ بلے تنی وھدے ھچ وڑیں جانی تاوان ھال نیست اِنت-

زورانسری بیگواھیں کنگ بیتگیں سیف اللہ رودینی ءِ گھار فرزانہ رودینی ءَ مروچی آدینگ ءَ شال پریس کلب ءِ دیم ءَ مسنگ پرسنز بُنجل ءَ بھر زرتگ-

آئی ءَ گْوشتگ کہ ھمے میان ءَ گپ تران کنان ءَ گْوشتگ کہ منی برات دہ سال ءَ ساری بیست دو نومبر دوہزار سیزدہ ءَ زورانسری آوار جتگ ءُ آ انگت بیگواہ ءَ اِنت ما گوستگیں دہ سالاں چہ کورٹ ، کمیشن ءَ ھوار سرجمیں ادارھانی دراں ٹُکگ ءَ ایں بلے تنی وھدے مارا ھچ وڑیں انساپ رسگ ءَ نہ اِنت ، انساپ ءِ مول ءِ پشگیجگ ھکیکت ءَ انساپ دیگ ءَ چہ ندیگ ءِ برابر اِنت-

آئی ءَ گوشتگ کہ مئے دوستناک بے میار اَنت، آیاں ھچ وڑیں جرم نہ کتگ اگاں ایاں چُشیں جرمے کُتگ گُڑا ھر جُرم ءِ ھاتر ءَ کانود ھستیں آیاں آمیدگس ءَ پیش بکن اَنت، اَبید یک منّانک ءُ کورٹ ٹرائل ءَ اَبید اے وڑ بے کانودی زورانسری بیگواہ کنگ بُنکی انسانی ھک ، انسانیت کانود ءِ تُرندتریں پادمالی اِنت-

آئی ءَ گْوشتگ کہ نو مارا گیش گم ءُ رنج مدے اِت ، منی برات سیف اللہ رودینی یل بکنائین اِت مارا اے درد ءُ گماں چہ بہ رکّین اِت-