اے سالے (2023)ءِ لبزانکی نوبل داد ناروے ءِ ندکار، کسمانک نویس ، شائر ، گدار نویس ءُ نبشتہ کار جون فوسے ءَ کٹ اِتگ –
سویڈش اکیڈمی ءَ گوستگیں روچ ءَ پنچ شمبے ءَ وتی داتگیں درشانے ءِ تہ ءَ گوشتگ کہ اے سال ءِ لبزانکی نوبل داد شست ءُ چار سالی جون فوسے ءَ دیگ بوتگ – اے داد نارویجن کسمانک نویس آئی ءِ ساچیتگیں کسمانک ءُ ردانکانی شان ءُ شرپ ءَ دیگ بوتگ ، کہ آ ھما بنگپاں درشان کنت کہ درشان کنگ بوت نہ کن انت ،فوسے ءِ نبشتگیں دانک چہ مواد ءَ گیش آئی ءِ دروشم ءَ درشان کن انت ، ھمودا کہ ھچ گوشگ نہ بیت آ مدام چہ گوشتگین ءَ گیشتر اثر داریت –
سویڈش اکیڈمی ءَ گوشتگ کہ فوسے ءِ لبزانکی کار بازیں رنگ ءُ تھرانی تہ ءَ انت کہ آیانی تہ ءَ کسمانک ، گدار ، شائری ، نبشتانک ءُ زھگانی کتاب ءُ رجانک ھوار انت-
نوبل داد ءِ رسگ ءَ پد جون فوسے ءَ وتی درشانے ءِ تہ ءَ گوشتگ کہ مناں جوزگاں انگرّاں زُرتگ ءُ من آیانی منت واراں ، من اے نوبل داد ءَ پہ لبزانک ءَ انچیں ٹیکی ءِ بستار ءَ چاراں کہ آئی ءِ بُنکی ءُ پُرارزشیں مول ءُ مراد دگہ ھچ ءَ پہ نہ انت ءُ بس لبزانک اِنت –
اے درگت ءَ نوبل کمیٹی ءِ سرکماش اینڈرس اولسن ءَ گوں اھوالکاراں تران کنان ءَ گوشتگ کہ فوسے آئی ءِ جوزگاں مہمیز دیگ ، راہ ءَ گار کنگ ءُ الوہیت ءِ نزیک ءَ سر بوگ ءُ یک جُھلانکیں تجربہ ءَ سر کنوکیں ساچشت کار ءِ بستار ءَ زانگ بیت۔ آئی ءِ مزنیں کاراں “بوتھ ہاؤس” ءُ “میلانکولی ” ھوار انت –
آئی ءَ گوشتگ کہ مروچی آ جھان ءِ تہ ءَ درساں گیش پیش دارگ بوتگیں کسمانک نویساں چہ یکے ءُ آئی ءِ گچینی ردانک ءَ ھم آ پجارے داتگ –
فوسے ءِ نوکتریں کتاب ’’ سیپٹولوجی‘‘ نیم زند نامھی ءُ یک مزن شانیں کتابے ءُ اے ھپت بھرانی تہ گیشن اِتگیں سَے جلد ءِ کتاب یک انچیں مردمے ءِ درگت ءَ اِنت کہ گوں وت ءَ دگہ ورژنے ءَ دپ کپیت – ایشی ءِ سیمی جلد سال دوھزار بیست ءَ میاں اُستمانی بکر پرائز ءِ واستہ شارٹ لسٹ کنگ بوتگ –
سال نوزدہ سد ءُ نود ءِ بنداتی ماھاں فوسے ءَ گوشگ بوتگ کہ آ یک کسمانکے ءِ بنگیجی گپاں نبشتہ بہ کنت بلے کسمانک نویسی انچو وش بوتگ کہ آئی ءَ سرجمیں کسمانک نبشتہ کتگ کہ آئی ءِ نام بوتگ ، ’’ کسے آھگی اِنت‘‘ اے کسمانک نوزدہ سد ءُ نود ءُ نھ ءَ اسٹیج ءَ پیش دارگ بوتگ ءُ گوں ھمیشی ءَ فوسے نامدار بوتگ – فوسے ءَ وتی گلگدارے ءِ تہ ءَ گوشتگ کہ اے کسمانک ءِ نبشتہ کنگ ءِ وھد ءَ من انچو ماریتگ گوش یے نبشتہ ءِ اے تھر پہ من ءَ جوڑ کنگ بوتگ، ءُ پدا نوزدہ سد ءُ نود ءُ چار ءِ دومی ڈرامہ “ما ھچبر گستا نہ بہ ایں” آئی ءِ نامداری گیش کتگ –
جون فوسے ءِ نارویجن شنگکار Samlaget ءِ گوشگ انت کہ آئی ءِ کسمانک سرجمیں جھان ءَ ھزار رند ءَ گیش اسٹیج ءِ سر ءَ پیشدارگ بوتگ انت ءُ آئی ءِ ساچشت ءُ کار کساس پنجاہ زباناں رجانک کنگ بوتگ انت –
جون فوسے ءَ سال دوھزار سَے ءَ گوں فرانسیسی رسانکدر “لی مونڈے” ءَ تران کنان ءَ گوشتگ کہ من لبزانی روایتی مانایاں کارستانی درگت ءَ نبشتہ نہ کناں ۔ من مردم گری ءِ درگت ءَ نبشتہ کناں۔‘‘
اے سال ءَ لبزانکی نوبل داد گروکیں جون فوسے ءِ درگت ءَ ھمے گوشگ بیت کہ آ نوبل داد گپتگیں کسمانک نویس سیموئیل بیکٹ ءِ ھم دروریں ساچشت کارے، آئی ءِ کسمانک کم وھدیگ انت ءُ تچک ءُ سادگیں زبانے ءَ انت کہ تال ، راگ ءُ ھاموشی ءِ وسیلہ ءَ وتی کلوہ ءَ سر کن انت –
زانگ بہ بیت جون فوسے بیست ءُ نُھ ستمبر نوزدہ سد ءُ پنجاہ ءُ نُھ ءَ ماں ناروے ءَ ودی بوتگ ، آئی ءَ ناروے ءِ بیرگن شھدربرجاہ University) of Bergen) گریجویشن کتگ – فوسے ءِ اولی گدار Raudt, Svart نوزدہ سد ءُ ھشتاد ءُ سَے ءَ چھاپ ءُ شنگ بوتگ –
