TBP Balochi

بلوچستان لبریشن فرنٹ ءِ جارکش میجر گھرام ءَ وتی شنگ کُتگیں درشانے تہءَ گُشتگ کہ کلات ءِ ھند شاہ مردان ءَ بلوچستان لبریشن فرنٹ ءَ زورگریں پاکستانی پوج ءِ بنجل ءِ سر ءَ اُرش کُرتگ، اُرش ءَ دُژمنیں لشکر ءِ دو کارمند کُشتگ ءُ دو ٹپی کُرتگ۔

میجر گھرام بلوچ ءَ گُشتگ کہ 7 اکتوبر ءِ شپءَ ھپت ءُ نیم ءَ گوں ٹوھیں سلاھاں سلاہ بند بیتگیں سرمچاراں کلات شاہ مردان ءَ برجاھیں پاکستانی پوج ءِ بنجل دوئیں نیمگاں انگِر کُرتگ۔ اے اُرش ءَ سرمچاراں شپ ءِ وھد گچین کُرتگ داں کہ بنجل ءِ نزیک ءَ اُرش کنگ بہ بیت ءُ ھما وھد ءَ اُرش کنگ بہ بیت کہ دُژمن ءَ گیشاں چہ گیش تاوان دیگ بہ بیت۔

جارکش ءَ گشتگ کہ بلوچستان لبریشن فرنٹ بلوچستان ءَ وتی کارانی گیش کنگ ءِ کارشونی ءِ سر ءَ کار کنگ ءَ اِنت داں کہ بلوچ راجی زور ءُ توان ءَ بلوچ راجی آجوئی زْرمبشت ءِ سر ءَ ھرچ بہ کن اَنت۔

بی ایل ایف ءِ دیمروی ءُ سوبمندی پہ بلوچ راجی زْرمبشت ءَ نیکیں پالے۔اے توان پہ بلوچ راجی آجوئی ءِ آدگہ گلاں نزیکی آرگ ءَ جوانیں کِردے پیلو کنت۔ بلوچ ورنایاں لوٹ کن ایں کہ آ راجی آجوئی جنگ ءَ بی ایل ایپ ءَ ھوار بہ بنت ءُ بلوچ راجی آجوئی ءُ پد ءَ پہ یک وژھالیں بلوچستانے ءَ آشوبی سیتانی سرجم کنگ ءَ وتی زور ءُ توان ءَ کارمرز بہ کن اَنت۔

بی ایل ایف ءِ دُرسیں باسک ءُ زمہ وار آں پرمان دئیں کہ آ وتی مھمکیں ھال ءُ اھولوالاں لیکھی،آشوبی ءُ راجی پگر ءِ دیم ءَ برگ ءَ کارمرز بہ کن اَنت۔ مارا بلوچ ورنایانی یک انچیں بانداتے ءِ گچین کنگ ءَ کمک کنگی اِنت کہ ایردستی ءِ ھچ دروشُم پدر مہ بیت۔ کلات بلوچستان ءِ یک انچیں دمگے کہ اود ءَ بی ایل ایپ راج ءَ پیش اتکگیں دُرسیں جنجالانی دیم پہ دیمی کنگ ءَ بلوچ راجی سیتانی پھریزگ ءَ وتی کَرد ءَ پیلو کنت۔

جارکش ءَ گُڈ سرءَ گشتگ کہ بلوچستان لبریشن فرنٹ اے اُرش ءِ زمہ واری ءَ منّ ایت ءُ دُژمن ءِ سیتانی بگیری ءَ بلوچستان ءِ آجوئی ءَ ما وتی اُرشانی برجاہ دارگ ءِ کول ءَ کن ایں۔

بلوچستان ءِ دمگ پنجگور ءُ مستونگ ءَ دگ ءُ وتکشی ءِ وئیلانی آسر ءَ زالبول گوں سئیں چُکاں ھوار چار مردم بیران ءُ سے ٹپی بیتگ اَنت-

پنجگور ءَ سی پیک دگ سر ءَ تُرسناکیں وئیلے ءَ مات گوں دو چُکاں ھوار بیران بیتگ اَنت-

گیشیں ھالانی رِد ءَ پنجگور ءَ سی پیک دگ سر ءَ برجاھیں الامارات ھوٹل نزیک ءَ پرپٹ ءُ کسانیں گاڑی ءِ میان ءَ ڈک ورگ ءَ چہ پرپٹ ءَ سوار مھمد ابراھیم ءِ لوگ بانُک زلیخا ، چار سالی ئیں صبر اللہ ء محمد ابراھیم ، دوازدہ سالی ئیں فوزیہ ء ابراھیم بیران بیتگ اَنت-

وھدے کہ وئیل ءَ بیست دو سالی ئیں اسلام ء محمد اکبر ، پنچ سالی ئیں شاہ ولی ء شاھد علی ، دہ سالی ئیں جنکے ٹپی بیتگ-

اِھوالکارانی رِد ءَ اے مردم پرپٹ ءَ سوار بیتگ ءُ وتی لوگ پیرے جھلگ ءَ روگ ءَ بیتگ اَنت کہ کسانیں گاڑی ءَ ڈکّر جتگ ءُ پُشت ءَ آؤکیں دگہ یک گاڑی ءَ آ لپاشتگ اَنت چریشی ءَ مات وتی چُکاں ھوار ھما دمان ءَ بیران. بیتگ اَنت-

ٹپی ٹیچنگ نادُراھجاہ پنجگور ءَ برتگ اَنت آیانی تہ ءَ دہ سالی ئیں جنکو ءِ جاور نگیگ اَنت- ٹپی ءُ بیران بیتگیں مردم یکیں پرپٹ ءَ سوار بیتگ اَنت گاڑی ڈرائیور پولیس ءَ دزگیر کتگ ءُ گیشیں پٹ ءُ پول کنگ ءَ اِنت –

ھمے وڑ مستونگ ءَ یک مردمے ءَ وتکشی کتگ –

گیشیں ھالانی رِد ءَ مستونگ ءِ دمگ کلی کونگڑہ ءِ جھمنند اورنگزیب پنّام ءِ جیرا گوستگیں شپ ءَ وتکشی کتگ ءُ وتی زندمان کُٹینتگ-

وتکشی ءِ وئیل سوب انگت زانگ نہ بیتگ- زانگ بہ بیت سرجمیں بلوچستان ءَ وتکشی وئیل ھمکروچ نکش کنگ بوگ ءَ اَنت-

بلوچستان ءِ دو جتاجتائیں دمگ کیچ ءُ آواران ءَ پاکستانی پوج ءَ سے مردم زورانسری آوار جنی ءِ نشانگ کتگ اَنت-

سربوتگیں ھالانی رِد ءَ کیچ ءِ تھسیل تمپ ءِ ھند گومازی ءَ پاکستانی پوج ءَ گوستگیں شپ ءِ ساھت دو ءَ بلوچی زبان ءِ شائر اختر عمر لوگانی سر ءَ بیڑبرتگ ءُ زوراکی کنان ءَ آئی ءِ چُک چاکر ء اختر آوار جتگ ءُ گوں وت برتگ-

ھمے وڑ آواران ءَ گوستگیں روچاں پاکستانی پوج ءَ بیڑبرتگ ءُ دو مردم زورانسری آوار جنی ءِ نشانگ کتگ اَنت-

آوار جنگ بیتگیں مردمانی پجّار عالم ء شاکر ءُ غمانی ء باھوٹ نام ءَ چہ بیتگ اَنت-

خان محمد ءُ زندان

نبشتہ کار: شئے بلوچ

دی بلوچستان پوسٹ

من وہمھدے پاکستان ءِ چیریں ادارهانی بندیگ جاه ءَ بند ات آں برے برے کہ شرّیں سنتری ءِ اتک چونھا شرّیں سنتری نیست اَت من همیش واستا شرّ گُوشاں برے برے پہ چیر ءُ اندری مارا گپّ ءِ کمُّو موه اِش دات،
من نوزده نمبرے Cell ءَ بند ات آں منی نزدیک ءٍ Cell ھژده نمبر اَت ءُ آئی ءِ تہ ءَ خان محمد بند اَت، برے برے کہ چیریں ادارهانی اپسر اتکاں خان محمد ءِ Cell ءِ دپ ءَ گُڑا بس همیش تُرسناکیں بیمناکیں آواز ءَ گُوں گُشت ئے “ٱٹهو کمانڈو” پد ءَ دُرستیں سنتری آں همیش نام ءَ خان محمد ءَ توار کُت کمانڈو کمانڈو یک روچے گُڑا یک پٹانے سنتری ءں ڈپٹی بوت من ء گپّے موه رس ات گُون خان مهمد آئی ءَ وتی گِرگ ءِ وتی دوئیں ماهانی کُل ازیت من ءَ گُشت آں کہ من ءَ وهدے آؤرتگے من کرنٹ دیگ بوتگ آں، منی جسم ءِ سر ءَ پٹرول پرریچگ بوتگ وهدے منی جسم هُشک بوتگ گُڑا منی پشک اش کشّ اتگ ءُ پہ چتّر پہ ویر، ھر رنگیں سزا اِش داتگ 6 روچ واب ءَ نیشتگ اِش، ایشاں چہ ابید وتی ڈنّے نندگ ءُ پادایگ ءٍ گپّ وتئ هما بیوسی ءُ لاچاری ءِ کسّہ بلے یک گپّے مُدام جَتے کہ من زاناں منی چُک بزّگ آں وهدے ائید بوتگ گُڑا گیشتر گمیگ بوتگ کہ منی دو کسانیں چُکّ انت آیاں کے پُچ چَپل دنت بلے برے برے انچُوش مُهکم اَت مارا تسلھے دات ءُ وتی درد وتی گم ءِ چیر دات اَنت-

بلے‌! خان مهمد ءِ Cell ءِ ھر شپ کُبل پچ کنگ بوت ایشانی سزا دئیگ ءِ کُوٹی یکے ڈنّ ءَ اَت یکّے جیل ءِ دیم پہ دیم ءَ اَت بلے گیشتر خان مهمد دیم پہ دیم ءِ کُوٹی ءَ برگ بوت سزا دیگ بوت ایش لٹّانی آواز کُوکار ءَ بندیگیں کیدیان ءَ هم گریت بس مُدام کہ خان مهمد ٹارچر روم ءَ برگ بوت جیل ءِ توک ءَ بس پریات اَت کیدیانی، بلے! خان مهمد انگت مھکم اَت نہ پُرشتگ اَت وهد گُوزان گُوازان من ءَ 4 ماه بوت خان مهمد ءَ شش ماه بوت مئے گیشتر هال ءُ اهوال گوں دیوال ءِ ٹُکّگ ءَ بوت وهدے ھژده نمبر Cell ءَ ٹُکّگ ءِ آواز اتک من مارِتگ خان مهمد سلامت اِنت شش ماه ءَ رند سھب ءِ کساس پنچ بج ءَ منی گُوشاں ھژده نمبر ءِ Cell ءٍ نیمگ ءَ آواز بوت کہ کُبل پچ کنگ بوت من وهدے دیوال ٹُکّ ایت گُڑا من ءَ پسُّو نہ رس ات من سمجیت خان مهمد آجو کنگ بوتگ، یک سالے ءَ ھژده نمبر ءِ Cell هالیگ اَت- سال ءُ چار ماه ءَ رند ھژده نمبر ءِ Cell پچ کنگ بوت مردُمے آرگ بوت مان کنگ بوت داں شش روچ ءَ هچ ٹُکّگ ءِ آواز نہ یتک ھپتُمی روچ ءَ بیگاه اَت من ءَ ٹُکّگ ءِ آواز اتک ءُ گپّے موه رس ات گُڑا من گُشت سنگت تو کئے؟ وهدے سنتری پہ دزنماز ءَ کیدیاں برگ ءَ ات گُڑا من چہ وتی Cell ءِ کسانیں ٹُنگ ءَ چہ چار ات ایش سنگتے مھار کُتگ اَت سکّ ھلاس اَت سنگت ءَ بس گُشت “یا اللہ من ھانو آں” کہ کسے بزانت من همدا یاں، لھتیں وهد ءَ پد یک برے پد ءَ من ءَ گپّے موه رس ات پد ءَ هما ھژده نمبر پد ءَ هما سنگت خان مهمد اَت من جُست کُت تو کُجا بیتگے بس گوں سکُ نزوریں آواز ءَ همیشے گُشت کہ من 3 جاگہ جیل بوتگ آں کوئٹہ ءَ اسلام آباد ءَ لاهور ءَ من ءَ ھر رنگیں سزا دیگ بوتگ منی سر وش وش نہ ایں منی گُٹگ درد کن انت من ءَ ایشاں جیلاں ھر رنگیں سزا ءُ بیماری داتگ، وهد گوں جیل ءِ آزابی ءُ سنتریانی لٹُّ ءُ کُٹّ گِرّ ءُ نھرّ آں گُوزان اَت من ءَ دو سال ءُ شش ماه سرجم بوت ءُ خان مهمد ءَ دو سال ءُ هشت ماه بوت من گُوں دو سال ءُ شش ماه ءِ آزابی ءَ آجو بوت آں، وهدے من ءَ ڈنّ ءَ سے ماه بوت گُڑا هال اتک شال ءٍ دمگ کاهان ءَ سی ٹی ڈی ءَ پنچ مردُم جتگ ءُ دُروگیں میڑ ءِ نام داتگ ایشانی اکس سوشل میڈیا ءَ تالان ات انت منی چم کپت آدگہ من پجّا نیارت آں بلے خان مهمد ولد گُل مهمد سُوراب ءِ جاهمنند گُوں بارگیں بالاد ءَ گُون اَت سرگ ءَ چار تیر ءٍ نشان ھست اَت گُڑا من خان مهمد ءِ دُرستیں کسّه ءُ آزابانی ترانگ داں زندگاں گُوں دل ءَ بندوک کن آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءَ گوشتگ بی ایل اے ءِ سرمچاران گوستگیں روچ ءَ تربت ءَ یک اُرشے ءَ زورگریں پاکستانی پوج نشانگ کتگ ءُ دشمن ءِ سَے کارمند کشتگ اَنت-

آئی ءَ گوشتگ کہ بی ایل اے ءِ سرمچاراں گوستگیں روچ ءِ بیگاہ ءِ ساھت پنچ ءَ تربت ءَ زورگریں پاکستانی پوج ءِ یک گاڑی یے سر بستگ ءُ وتکاریں سلاھاں اُرش کتگ-

آئی ءَ گوشتگ اے کارمند گشکور ءَ بند بوھوکیں ڈیم ءِ نزیک ءَ وتی پوسٹ ءِ نیمگ ءَ روگ ءَ بیتگ اَنت- اُرش ءَ کم چہ کم سَے کارمند مرتگ ءُ بازینے زدگ بیتگ اَنت-

بی ایل اے ءِ جارکش ءَ گوشتگ گوستگیں آدینگ ءَ کیچ ءِ بنجاھی شھر تربت ءَ زورگیریں پاکستانی پوج ءِ گون ءَ یک دراج کشیں جنگے ءَ دشمن ءِ پنچ کارمند مرتگ ءُ کم چہ کم ھپت زدگ بیتگ اَنت – ھمے وڑ ھمے وھد ءَ بی ایل اے ءِ دو جنگول بھادری ءَ گوں جنگ کنان ءَ شھیدی پہ وتی نام ءَ اش کتگ-

جیئند بلوچ ءَ گوشتگ آدینگ 6اکتوبر 2023 ءَ تربت ءَ سامان ء کور ءِ ھند ءَ زورگریں پاکستانی پوج ءَ بلوچ لبریشن آرمی ءِ یک ھزاروکیں بنجلے ءِ سر ءَ ڈرون اُرش کنگ ءَ پد جتا جتائیں نیمگاں ھیلی کاپٹرانی گون ءَ کارمنداں ایر گیجان بیتگ ءُ سرمچارانی انگیر کنگ ءِ جھد اش کرتگ بلے بلوچ سرمچاراں یک مھکم ءُ جوانیں جنگی رپکاں دشمن ءِ انگیر پروشگ ءَ سوبمند بیتگ اَنت – چریشی ءَ پد جتا جتائیں جاھاں بلوچ سرمچارانی ءُ دشمن ءِ میان ءَ ترندین جنگ ءُ چوپ بندات بیتگ اَنت – چریشی ءَ سرمچاراں کم چہ کم پنج پوجی کارمند کشتگ ءُ ھپت زدگ کتگ اَنت-

آئی ءَ گوشتگ ھمے وھد ءَ دشمن ءِ انگیر ءِ پروشگ ءُ آ دگہ سرمچاراں پہ سلامتی ءَ درکنگ ءَ دیم پہ دیمی جنگ ءَ بلوچ لبریشن آرمی ءِ دو سرمچاراں دیمونی ءِ راہ گچین کنان ءَ شھیدی وتی نام ءَ کرتگ – شھید بیتگیں سرمچارانی توک ءَ شھید کامریڈ مقصود پنام ءِ کامریڈ مھروان ءُ شھید مسلم رضا پنام ءِ گرو جبار ھوار اَنت-

جارکش ءَ گوشتگ شھید کامریڈ مقصود ء احمد ءِ سیادی تربت ءِ دمگ ھیرونک ءَ بیتگ – آئی ءَ 2012 ءَ ھمراھیں گل ءِ باسکی ءِ بستار ءَ بلوچ آجوئی ءِ سلاہ بندیں جد ءُ جھد ءَ ھوار بیتگ ءُ سال 2015 ءَ بی ایل اے ءَ ھوار بیتگ – ایشی ءَ پیش کامریڈ مقصود بلوچ نودربر گل ءِ پتر ءَ نودربر سیاست ءَ پرکار بیتگ ءُ اود ءَ آ یک سرجمیں سیاسی باسکے زانگ بیتگ-

جارکش ءَ گوشتگ شھید کامریڈ مقصود پنام ءِ مھروان یک با گچین ءُ مھنتکارین ھمراھے بیتگ، زوت آئی ءَ وتی کردانی ءُ ھمک روچیگیں کاراں بی ایل اے ءِ توک ءَ وتی واستا یک گچینی جاھے جوڑ کرتگ – آئی ءَ نا ایوک ءَ مھنت ءُ دیمونی ءِ کردانی سر ءَ با ایوک ءَ ستک داشتگ بلکیں آئی ءَ وتی ھمک روچیگیں کاراں وتی نندگ ءُ پادایگ ءُ مھکمیں جاھے ءِ واھند بیتگ – چریشی ءِ سبب ءَ آئی ءَ سرمچارانی میان ءَ یک گچینی جاھے پہ وت کتگ – آئی ءَ درستیں سرمچارانی گون ءَ مھر ءُ دوستی یے یک چراگے کشتگ – آ وت باز براں نادراہ بیتگ بلے پد ءَ ھم آئی ءَ بلوچ راجی آجوئی ءِ واستا وتی کرد پیلو کنگ ءَ ھچ جھلی ءُ برزی نئیشتگ – آئی ءَ زامران ،بلیدہ،کلبر،تمپ ءُ تربت ءَ بازیں رنداں سوبمندیں بیڑاں بھر زرتگ ءُ دشمن تاوانانی دیمپان کتگ-

جیئند بلوچ ءَ گوشتگ شھید بیتگیں دومی سرمچارین ھمراہ شھید مسلم ء رضائی ءِ سیادی تربت ءِ ھند آپسر ءَ بیتگ – آئی ءَ راجی آجوئی ءِ ھاتر ءَ سلاہ بندیں جنگ ءِ بندات2012 ءَ ھمراھیں گل ءِ پتر ءَ بندات کتگ ءُ 2015 ءَ بلوچ لبریشن آرمی ءِ بھر جوڑ بیتگ – شھید مسلم پنام ءِ گرو جبار ءَ زامران، بلیدہ،کلبر،تمپ ءُ تربت ءَ بازین جنگانی توک ءَ وتی پرز پیلو کتگ – شھید مسلم بلوچ گوریلا جنگ ءِ رپکاں چکاریں ھمراھے بیتگ – آئی ءَ بی ایل اے ءِ رینکس ءِ اندر ءَ وتی مھکم ءُ جوانیں جنگی رپکانی سبب ءَ نام آورتگ – آئی ءَ گوستگیں سال ءَ مجید بریگیڈ ءِ فدائی ءِ دروشم ءَ کمکاری ءَ وتی پرز پیلو کتگ ءُ وتی باریگ ءِ ودار ءَ بیتگ-

بی ایل اے ءِ جارکش ءَ گوشتگ بلوچ لبریشن آرمی وتی بامردیں سرمچارانی اے گچینی کربانی ءَ مراد باتی گوش ایت ءُ اے سوگند کنت کہ شھیدانی ھون ءِ مٹ آیانی مول ءُ مراد، بلوچستان ءِ سرجم ءَ آجوئی ءُ وت واجھی ءَ چہ دشمن ءَ گیپت اِنت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءَ گوشتگ اِجاز ء مراد مھمد راجی میاربارے بیتگ کہ بی ایل ایف ءِ گْور ءَ آئی ءِ سلکاریانی منّانک ھست بیتگ اَنت پمیشکا بی ایل ایف ءِ سرمچاراں آئی ءِ دزگیر کنگ ءِ زمہ واری دیگ بیتگ- سرمچاراں آئی ءِ سُر ءُ پُرانی سر ءَ چم سَک داتگ اَنت کہ گْوستگیں یکشمبے ءِ روچ ءَ چہ ناسر آباد ءَ واتر آھگ ءَ بیتگ کہ نودز ءُ ھیرآباد ءِ میانجی ءَ سرمچاراں دست داتگ ءُ دزگیر بیگ ءِ گْوشتگ بلے آئی ءِ گھگیری کُرتگ کہ ھمے میان ءَ سرمچاراں آئی ءِ کُشگ ءِ شور کُرتگ۔

بی ایل ایف ءَ گوشتگ اجاز تچکی ءَ پاکستانی لشکر ءِ کمکار بیتگ،بلوچ سرمچارانی گِسانی سر ءَ اُرش کنگ،راھانی بندگ ءُ لشکرکشیاں پاکستان لشکر ءِ ھمراہ بیتگ- پاکستانی لشکر ءِ گْوشگ ءِ پَد ءَ منشیات ءِ کاروبار،دُزی ءُ بےمیاریں مردمانی کُشگ ءُ ھند ءَ تُرس ودی کنگ ءَ ابید ایم آئی ءِ یک ٹولی یے ءِ سروک بیتگ۔ گل ءِ اینٹلیجنس ءَ سربیتگیں ھال ءُ مردمانی گْوشگ ءِ پَد ءَ آئی ءِ سزا دیگ ءِ شور کنگ بیتگ۔

میجر گوھرام بلوچ ءَ گوشتگ میاربار اجاز شھید دلاور پنام کمالو ءِ زور بیگواہ کنگ ءَ گون بیتگ کہ پاکستانی لشکر ءِ آزاجاھاں آجو بیگ ءَ پد زوراکیانی سْوب ءَ پد ءَ شھید بیتگ۔

آئی ءَ ریاست ءِ دُرسیں چریک ءُ کمکار گوں ترندی ءَ کڈن کنگ بنت کہ آ پاکستانی لشکر ءِ کمکاری ءَ دزکَش بہ بنت اگاں نہ گڑا چیدگ کنگ بنت۔بلوچ راجی زْرمبشت ءُ راجی سیتانی بگیری ءَ کار کنوکیں مردم یل کنگ نہ بنت۔ھر کجام مردم کہ دُژمن ءِ ھمراھداری ءَ کنت آ نابود کنگ ءُ سزا دیگ بیت۔

آئی ءَ گوشتگ اِجاز ء مراد مھمد وتی کھول ءِ اولی مردم نہ اِنت کہ بلوچ راجی سیتانی بگیری ءَ راج دُژمنی ءِ راہ گچین کُرتگ۔آئی ءِ گھار زھگ نوشیر ء ھامد جھمنند پل آباد ءَ ھم ھمے سِلیں مرگ ءِ راہ گچین کُرتگ۔

آئی ءَ گوشتگ ما نوشیر ءَ کڈن کن ایں کہ انگت وھد ھست کہ آ وت ءَ شَر بہ کنت ءُ راج ءِ بگیری ءَ دُژمن ءِ ھمراھداری ءَ مہ کنت ءُ بنامیں مرگ ءَ وتی نام ءَ مہ کنت۔چریک ءُ کُشندہ ٹولی ءِ کارمندانی کھولانی ھم زمہ واری اِنت کہ وتی مردمانی سر ءَ بگر اَنت ءُ وتی مردماں چہ ردیں کاراں گِر ءُ دار بہ کن اَنت اگاں نہ ما ھمے سرپد بہ ایں کہ بدبھتی آیاں گوں وتی دستاں نبشتگ ءُ آ یک ھنچیں مرگے ءِ نوبت ءَ اَنت کہ آیانی آؤکیں پدریچ گوں آیاں وتی سیادی سند ایت۔

آئی ءَ گوشتگ بی ایل ایف ءِ’ آپریشن کلین اپ, داں دُژمن ءِ گُڈّی کمکار ءُ چریک ءِ کُشگ ءَ گوں ترندی ءَ برجاہ بنت۔

روکپتی بلوچستان ءِ بنجاھی شھر زاھدان ءَ لس پوشاکی کارمنداں یک مردمے آوار جنگ ءَ پد گون وت برتگ-

گیشیں اھوالانی رد ءَ آوار جنگ بیتگیں مردم ءِ پجار علی احمد مھمدانء ء سعید اھمد جھمنند زاھدان ءِ نام ءَ زانگ بیتگ-

اھولانی رد ءَ علی چیزے روچ پیش آوار جنگ بیتگ ءُ آئی ءِ کھول ءَ سجوئیں جاگہ چار اتگ اَنت بلے آئی ءِ درگت ءَ ھچ اھوال نیست اَنت-

ھمے وڑ ءَ گوستگیں ھپتگ ءَ آوار جنگ بیتگیں ھشتاد مردم یل کنگ بیتگ اَنت-

اھوالانی رد ءَ گوستگیں ھپتگ ءَ جمعہ ھونین ءِ یات ءَ زھرشانی کنوکیں ھشتاد مردم یل بیتگ اَنت کہ ایانی توک ءَ کسان سالیں ورنا ھوار اَنت-

اے مردم گوستگیں ھپتگ ءَ گرگ بیتگ اَنت ءُ گوستگیں روچ ءَ بلوچ ھاکمانی گوشگ ءَ پد اے مردم یل کنگ بیتگ اَنت-

سال دوھزار ءُ بیست ءِ سَے ءِ معاشیات ءِ نوبیل داد امریکہ ءِ پروفیسر کلاڈیا گولڈین ءَ دیگ ءِ جار جنگ بوتگ –

ہارورڈ یونیورسٹی ءِ پروفیسر کلاڈیا گولڈین ءَ اے داد ھمے واست ءَ دیگ بوتگ کہ آئی ءَ پوریاگر مارکیٹ ءَ زالبولانی ھک ءِ ھاتر ءَ کار کتگ –

رائل سویڈش اکیڈمی آف سائنس ءِ رِد ءَ پروفیسر کلاڈیا ءَ گوستگیں دور ءِ میان ءَ زالبولانی ھوار بوگ ءُ آیانی آمدنی ءِ درگت ءَ وتی چمشانک پیش کتگ –

فزکس، کیمسٹر، درمان، لبزانک ءُ ایمنی نوبیل دادانی دیم ءَ اے داد ءَ sveriges Riksbank داد گوشگ بیت – پرچاکہ اشی ءِ بندات نوزدہ سد ءُ شست ءُ ھشت ءَ سویڈش ءِ بنجاھی بینک ءَ کتگ –

اے سال ءَ پروفیسر کلاڈیا دیگ بوتگیں اے داد پنجاہ ءُ پنچمی نوبیل داد بوتگ –

گوستگیں سال ءَ اے داد امریکہ ءِ سَے زانتکار بین ایس برنانکے، ڈگلس ڈبلیو ڈائمنڈ ءُ فلپ ایچ ڈیبوگ ءَ دیگ بوتگ انت – اے سَئیں مردماں ھمے واست ءَ دیگ بوتگ کہ آیاں بینکانی کرد ءُ مالی جاورانی نگیگی سر ءَ پٹ پول کتگ بوتگ –

زانگ بہ بیت اے سال ءَ نوبیل دادانی دیگ ءِ درچ دو اکتوبر ءَ بندات کنگ بوتگ –

شال ءَ سردار بھادر خان ویمن یونیورسٹی انتظامیہ ءِ نیمگ ءَ چہ پیسانی تہ ءَ گیشی کنگ ءِ بگیری ءَ نودربرانی زھرشانی ، نودربراں پیسانی گیش کنگ ءِ انتزامیہ ءِ بگیری ءَ تُرندیں نارا ھم جتگ وھدے کہ زھرشانی ءِ سبب ءَ نونیورسٹی ءِ سرجمیں تبک مھتل بیتگ اَنت-

نودربرانی گْوشگ اِنت کہ زھرشانی ءِ بند کنگ ھاتر ءَ انتزامیہ ءِ نیمگ ءَ چہ بیھار دیگ بیتگ – نودربراں دیمتر ءَ گْوشتگ کہ سمسٹر وائز سرجمیں تبکانی پیس گیش کتگ اَنت-

نودربرانی رِد ءَ ھشت ھزار ءَ چہ پیس گیش کتگ ءُ ھپدہ ھزار کتگ اَنت- یونیورسٹی ءَ نوک نام نکش کنگ پیس سی ھزار ءَ چہ گیش کتگ ءُ چل ھزار کتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ سرمچاراں 8 اکتوبر ءَ آواران ءُ کیچ ءَ دُژمنیں لشکر ءِ سر ءَ اُرش کُرتگ ءُ دو کارمند کُشتگ انت۔

آئی ءَ گوشتگ بلوچ سرمچاراں زی سَے ءَ آواران ءِ ھند مشکے ملش بند ءَ برجاھیں زورگریں پاکستانی لشکر ءِ پانگس ءِ سر ءَ گوں گرنیڈ لانچراں اُرش کُرتگ، سرمچاراں پانگس ءِ سر ءَ باز گرنیڈ لانچر آس داتگ کہ چہ ایشی ءَ دُژمنیں لشکر ءِ یک کارمندے جاھی مُرتگ ءُ دو سَک ٹپی بیتگ انت۔

گوھرام بلوچ ءَ گوشتگ دگہ یک اُرشے ءَ گْوستگیں یکشمبے ءِ بیگاہ ءَ بی ایل ایف ءِ سرمچاراں کیچ ءِ ھند تمپ ءَ اپسی کھن ءِ دُزراہ ءَ برجاھیں زورگریں پاکستانی لشکر ءِ پانگس چہ جتائیں نیمگاں نشانگ کُرتگ۔اے اُرش ءَ اسنائپر ٹولی ءَ دُژمن ءِ نشانگ کنگ ءَ پد یک کارمندے کُشتگ کہ چہ ایشی ءَ دُژمن سَرّا بِرّا بیتگ، پد ءَ سرمچاراں گوں نوکین ءُ ٹوھیں سلاھاں اُرش کُرتگ ءُ دُژمن جانی ءُ مالی تاوان داتگ۔

آئی ءَ گوشتگ بی ایل ایف ءِ اسنائپر ٹولی ءِ نیمگ ءَ کَش اِتگیں اکس رسانکدر ءَ شنگ بیتگ ءُ آئی ءِ تہ ءَ لشکری کارمند ساپ گندگ بیت کہ پد ءَ سرمچاراں نشانگ کُرتگ انت۔

جارکش ءَ گوشتگ بلوچستان لبریشن فرنٹ دوئیں ارشانی زمہ واری ءَ منّ ایت ءُ کول کنت کہ داں زورگپتیں بلوچستان ءِ آجوئی ءَ دُژمن ءِ دُرسیں زورگری سیتانی سر ءَ بی ایل ایف ءِ اُرش برجاہ بنت اِنت۔