TBP Balochi

روکپتی بلوچستان ءِ دمگ راسک ءَ ایرانی لشکر ءَ تیرگواری کتگ ءُ تیل کشیں مردمے زدگ بیتگ ءُ چریشی ءِ پشدر ءَ مھلوک ءَ زھرشانی کتگ ءُ لشکر ءُ مھلوک ءِ میان ءَ سنگ جنگی بیتگ-

گیشیں اھوالانی رد ءَ راسک ءِ ھند جکیگور ءَ مھلوک ءَ ایرانی لشکر ءِ ھلاپ ءَ زھرشانی کتگ ءُ دگ بند کتگ ءُ چریشی ءَ چہ لشکر دگ ءِ پچ کنگ ءَ اتکگ بیتگ-

اھوالانی رد ءَ مھلوک ءَ زھرشانی ءِ میان ءَ ایرانی لشکر ءِ گاڑیاں سِنگ جتگ ءُ چریشی ءَ چہ گاڑیانی شیشگ پُرشتگ اَنت-

اھوالانی رد ءَ زھرشانی ءِ ھمے واستا کنگ بیتگ کہ ایرانی لشکر ءَ ابید دارگ ءَ یک گاڑی یے سر ءَ تیرگواری کتگ ءُ چریشی ءَ چہ گاڑی ءِ ڈرائیور زدگ بیتگ ءُ مھلوک برانز گپتگ ءُ دگ اش بند کتگ-

زدگ بیتگیں ڈرائیور ءِ پجار نہ بیتگ ءُ مھلوک ءِ سنگ جنگی ءَ ایرانی لشکر واتر وتی بنجل ءَ شتگ –

روکپتی بلوچستان ءِ بنجاھی شھر زاھدان ءُ راسک ءَ یک مردمے آوار جنگ بیتگ ءُ دو کس یل بیتگ اَنت-

گیشیں اھوالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءَ یک مردمے ءِ گس ءَ بیڑ برتگ ءُ اود ءَ یک مردمے دزگیر کتگ ءُ گون وت برتگ-

برگ بیتگیں مردم ءِ پجار مھمد علی نارویی ءِ نام ءَ زانگ بیتگ-

اھوالانی رد ءُ مھمد علی ناروئی مکی مسیت ءَ کیمرہ ءِ زمہ واری ءِ سر ءَ کار ءَ بیتگ ءُ آئی ءِ لوگ ءِ سر ءَ بیڑ برگ بیتگ ءُ آ دزگیر کنگ ءُ برگ بیتگ-

ھمے وڑ ءَ راسک ءُ زاھدان ءَ نیکراھی وانگ جاہ ءِ گرگ بیتگیں دو اُستاد یل بیتگ ءُ وتی لوگاں سر بیتگ اَنت-

یل بیتگیں مردمانی پجار مولوی کامران سالم زئی ءُ مولوی نظیر بخشی زئی ءِ ناماں زانگ بیتگ اَنت-

روکپتی بلوچستان ءِ جتا جتائیں جاھاں تیرگواری ءُ کارچ جنگ کائی وئیلاں پنچ مردم بیران بیتگ اَنت ءُ یکے زدگ بیتگ-

گیشیں اھوالانی رد ءَ سراوان ءَ ناشناسیں مردماں تیرگواری کنان ءَ یک مردمے کُشتگ-

کُشگ بیتگیں مردم ءِ پجار مھمد گمشادزئی ء مجید جھمنند زاھدان ءِ نام ءَ زانگ بیتگ کہ گوستگیں شپ ءَ ناشناسیں مردماں گاڑی ءِ سر ءَ تیرگواری کتگ ءُ کُشتگ-

ھمے وڑ ءَ روکپتی بلوچستان ءِ دمگ جالک ءَ ناشناسیں مردماں مات ءُ زھگ کارچ جتگ ءُ کُشتگ اَنت-

اھوالانی رد ءَ جالک ءَ چہ لوگ ءَ وپتگیں ھپتاد سالی ئیں حمیدہ رئیسی ء ھورنگ ءُ پنجاہ سالی ئیں رضا رئیسی ء کریم جھمنند جالک کارچ جتگ ءُ کشتگ اَنت-

اھوالانی رد ءَ گوستگیں سال ءَ ھم ھمے زالبول ءِ دگہ سَے زھگ ناشناسین مردماں کُشتگ بیتگ اَنت کہ اے کوشانی بارو ءَ دگہ اھوال دیم ءَ نیتکگ اَنت-

ھمے وڑ ءَ سرباز ءَ ناشناسیں مردماں تیرگواری کتگ ءُ دو مردم کُشتگ ءُ یکے زدگ کتگ-

کُشگ بیتگیں مردمانی پجار نعیم ایراندوست، نوید ایراندوست ءِ ناماں زانگ بیتگ اَنت ءُ عزیز ایراندوست زدگ بیتگ –

اھوالانی رد ءَ اے مردم ھما وھد ءَ نشانگ کنگ بیتگ اَنت کہ وتی گاڑی ءِ ھمراھی ءَ روگ ءَ بیتگ اَنت-

بلوچ نیشنل مومنٹ ءَ وتی شنگ کتگیں درشان ءَ گوشتگ بلوچ شھمیرانی روچ ءَ بلوچ راجی زْرمبشت ( بی این ایم ) ءِ باسک پہ بلوچ شھمیرانی ستک شانی ءَ جھان ءِ جتائیں کنڈاں وڑ وڑیں مراگش برجم دار اَنت۔درانڈیھ ءَ بی این ایم ءِ تک ءُ ماں ڈیھ ءَ چہ ھنکینانی نیمگ ءَ برجم بیوکیں اے مراگشاں بلوچ آجوئی ءِ زْرمبشت ءِ بنگپ ءُ ماں بلوچستان ءَ مردمی اگبالانی جاور سھرا کنگ بہ اَنت۔ وھدے کہ ’ بلوچ شھمیرانی‘ تندجاہ ءُ چاگردی رسانکدر ءِ تاکاں دامگی باوستے ھلائینگ بیت۔چہ بی این ایم ءِ نیمگ ءَ بلوچ شھمیرانی تندجاہ، ایکس ، پیس بک ، انسٹاگرام ءُ ٹیلی گرام تاکاں چہ یک نومبر ءَ گر داں 13 نومبر ءَ ھم روچ نکان شگان کنگ بیت۔

بی این ایم ءِ جارکش ءَ گْوشتگ پاکستان ءَ پہ بلوچ راجی زْرمبشت ءِ ایرموشگ ءُ بلوچ راج ءَ چہ آجوئی ءَ زبھر کنگ ءَ ھزارانی کچ ءَ بلوچ کشتگ۔ اے روچ مارا ھما شھمیرانی دیمونیانی یات ءَ دنت کہ آیاں پہ بلوچ راج ءِ آجوئی ءَ وتی سر نْدر کرتگ اَنت۔

آئی ءَ گْوشتگ 13 نومبر ءِ روچ ناں ایوک ءَ آ شھمیرانی دیمونیاں پدر کنت کہ آیاں پہ ’ڈیھ بلوچستان‘ ءِ آجوئی ءَ برتانیا ءِ ارشانی دیمپانی کرتگ بلکیں اے گْوستانک ءِ مزرو (مُز رُو ۔ سمت) ءَ ھم تچک کنت۔13 نومبر 1839 ءَ انگریزاں آجوئیں ڈیھ بلوچستان ءِ سر ءَ ارش کرت ءُ بلوچستان ءِ بادشاہ ’ لال شھید مھراب ھان ‘ گوں ھمراھاں شھید کرت۔ھمے روچ ءَ بلوچ ءِ زیردستی بندات بوت ، چہ ایشی ءَ پد زوراکیں انگریزاں بلوچستان گیپت ءُ بھر ءُ بانگ کرت۔اگاں 13 نومبر ءِ ویل مہ کپتیں مروچی بلوچستان ءِ گْوستانک اے نہ اَت۔ چہ ایشی ءَ پیش بلوچستان دیمروئی کنوکیں ڈیھے اَت کہ آئی ءِ تْرام ءُ سرکاری کار کم کم ءَ نوکیں زمانگ ءِ رنگ ءَ رجگ ءَ اَت اَنت۔

بی این ایم ءِ جارکش ءَ گْوشتگ ھچ راج ءَ دگہ راجے زیردست کرت نہ کنت۔ راجانی میان ءَ سیادی یک دومی ءِ مانشت ، برابری ءُ یک دومی ءِ آجوئی ءِ منگہ دیگ ءِ بنیاد ءَ جوڑ بہ اَنت۔ نوک آبادی توان ایوک ءَ مھترھندی زور ءِ پارست ءَ راجاں زیردست نہ کنت بلکیں اے تْرام ( نظام ) بالادست ءُ زیردستیں راجانی میان ءَ سھرائیں کشکے رند ایت۔ انچوش کہ زوراکیں انگریزانی باریگ ءَ انگریزاں ھندی مردم ءُ آیانی ربیدگ چہ وتیگاں کمتر لیک اتگ اَنت ھمے پیم مروچی ھم اے تْرام زیردستیں راجاں سیمی رم ءِ شھری سرپد بیت۔ مئے زبان ءُ ربیدگ ھم پہ بالادستیں راجاں گھگیر اَنت پمیشکا آ چہ ایشاں کینگ دار اَنت ءُ آیاں گار کنگ یا ژانگولینگ لوٹ اَنت۔

آئی ءَ گْوشتگ پنجاب ءَ گوں بلوچ راج ءَ مھترھند ءُ مردمانی تک ءَ ھما کردگار بیگ ءَ اِنت آ بالادستیں راجانی روان (نفسیات ) ءِ چھرگ اِنت۔بلوچ راج ءِ رستگاری ءِ تیوکیں راہ بلوچ راج ءِ آجوئی اِنت۔ پہ ایشی ءَ دیمونی المی اِنت مارا شھمیرانی رند پداں روگی ءُ پہ راجی آجوئی ءِ سوبمندی ءَ وتی تہ ءَ داشت ودی کنگی اِنت۔

اقوام متحدہ ءَ گوشتگ کہ غزہ نون زھگانی مانشجاہ جوڑ بوتگ – کہ اودا نوں چہ شد ءُ تُن ءَ چد ءُ گیشتر بیرانی بوت کن اَنت –

درملکی ھالتاک اے ایف پی ءِ رپورٹ ءِ ردد ءَ غزہ ءِ جانسلامتی ءِ واکدارانی گوشگ انت کہ اسرائیل ءِ بمب گواری ءَ تنی وھدی ھشت ھزار ءُ پنچ سد مردم بیران بوتگ انت کہ آیانی تہ ءَ گیشتریں کچ لس مھلوک انت –

اقوام متحدہ ءِ زھگانی ادارہ یونیسیف ءِ جارکش جیمز ایلڈر ءَ گوشتگ کہ ترس ھمیش انت کہ چہ بمب گواری ءَ بیران بوتگیں زھگانی کچ زانگ نہ بوتگ انت –

جارکش ءَ گوشتگ کہ بیران بوتگیں زھگانی کچ بیمناک انت کہ اودا سَے ھزار ءُ چار سد ءُ پنجاہ ءَ گیش زھگ بیران بوتگ انت ءُ ایشی ءِ تہ ءَ روچ پہ روچ گیشی آیگ ءَ انت –

آئی ءَ گوشتگ کہ غزہ ھزاراں زھگانی مانشجاہ جوڑ بوتگ، اے نوں پہ درساں چوں جھنم ئے دروشم انت – جارکش ءَ دیمتر ءَ گوشتگ کہ غزہ ءَ دھ لک ءَ گیش زھگ چہ ساپیں آپ ءَ زبھر انت –

جارکش جیمز ایلڈر ءَ گوشتگ کہ غزہ ءَ ھمک روچ آپ ھما پنچ درسد انت ءُ ھمے ترس انت کہ زھگ چہ تن ءَ چد ءُ گیشتر بیران بنت اِنت –

یونیسیف جنگ بندی ءِ لوٹ ءَ کنگ ءَ انت ءُ ایشی ءِ سر ءَ زور دیگ ءَ انت کہ پہ غزہ ءَ مردمی کمک، آپ، ورگ، درمان دگہ آسراتی دیگ ءِ راہ پچ کنگ بہ بنت –

جارکش ءَگوشتگ کہ اگاں جنگ بند کنگ نہ بیت، آپ، درمان، سرکنگ نہ بوت، انگِر ءِ زھگ یل کنگ نہ بوتاں گڑا بہ زاں ما پہ زھگانی سانمند کنگ ءَ مزنین بیمناکیں جاورے ءِ نیمگ ءَ روگ ءَ ایں –

جیمز ءَ گوشتگ کہ اے راستی ءِ کہ غزہ ءَ زھگ انت کہ چہ بمبگواری ءَ مِرگ ءَ انت، بمبگواری ءَ سانمند بوگ ءَ انت بلے آیانی زند رکینگ بنت –

آئی ءَ گوشتگ کہ چہ غزہ ءَ جانسلامتی ءِ واکدارانی کچ ءُ کساس ءِ رِد ءَ نُھ سد ءُ چِل زھگ بیگواہ انت –

اقوام متحدہ ءِ انسانی کمک کاریں ادارھے جارکش جینز لائیر ءَ گوشتگ چیر تر اِتگیں زھگانی درگت ءَ گپ جنگ نہ بیت ءُ آیانی در کنگ امکان باز کم انت –

میان استمانی جانسلامتی ءِ جارکش ءَ گوشتگ غزہ ءَ مردم تھنا چہ بمبگواری ءَ مرگ ءَ نہ انت بلکنہ اودا آپ ءُ دگہ اژدری سامان ھم نیست انت –

جارکش ءَ گوشتگ کہ مئے گور ءَ یکسد ءُ سِی تپل انت کہ آ انکیوبیٹرز ءِ سر ءَ انت –

ارجنٹینا ءَ سیادی داروکیں فٹبال لیبی نامداریں اسٹرائیکر لیونل میسی ءَ دوھزار ءُ بیست ءُ سَے جوانتریں لیبی ءِ داد “بیلن ڈی اوور” ھشتمی رند ءَ کٹ اِتگ –

پیرس ءَ برجم دارگ بوتگیں مراگش ءَ میسی سال دوھزار ءُ بیست ءُ سَے ءِ جوانتریں لیبی گوشگ بوتگ، میسی ءِ کپٹنی ءَ گوستگیں سال ءَ ارجنٹینا ءَ فیفا ورلڈ کپ ھم وتی نام ءَ کتگ بوتگ –

لیونل میسی ءَ ھمے سال ءَ امریکہ ءِ فتبال کلب انٹر میامی ھم اولی رند ءَ لیگ ءِ کپ ءِ کٹارینگ ءَ وتی کرد پیلو کتگ، آئی ءَ میجر لیگ ءِ ھژدہ گوازیاں یازدہ گول اسکور کتگ انت –

میسی ءَ درساں گیش ھشت رند ءَ “بیلن ڈی اور” ءِ داد کٹ اِتگ – وھدیکہ کرسٹیانو رونالڈو ءَ اے داد پنچ رند ءَ کٹ اِتگ –

رونالڈو ءَ گڈی رند ءَ سال دوھزار ھبدہ ءَ جوانتریں لیبی ءِ داد کٹ اِتگ بوتگ، گوستگیں سال ءِ بیلن ڈی اور ءِ داد فرانسیسی فٹبالر کریم بنزیما ءِ نام ءَ بوتگ –

زانگ بہ بیت بیلن ڈی اور ءِ داد چہ فرانس فٹبال ءِ نیمگ ءَ ھر سال جوانتریں لیبی ءَ دیگ بیت وھدیکہ اشی ءِ تہ ءَ جھان ءِ سد اھوالکار کٹوک ءِ ھاتر ءَ گچینکاری کن انت –

فرانس ءِ شھر پیرس ءَ برجم داشتگیں ھمک سالی فٹبال مراگش ءَ ایندگہ لیبی ھم داد دیگ بوتگ انت کہ اودا زالبولانی فٹبال ءَ بیلن ڈی اور بارسلونا ءُ اسپینش لیبی ایتنانہ بونماتی لے اُڑے وھدیکہ ارجنٹینا ءِ ایملیانو مارٹینیز ءَ سال ءں جوانتریں گولی داد دیگ بوتگ –

میسی ءِ دیم ءَ جوانتریں لیبی سویڈن ءِ ھالینڈ جوانتریں اسٹرائیکر گوشگ بوتگ کہ آئی ءَ اے سال ءَ درساں گیش پنجاہ ءُ چار گول کتگ انت –

سربوتگیں ھالانی رِد ءَ بلوچستان ءِ باپاری شھر ھب ءَ تیرگواری ءِ وئیلاں بیست ءُ پنچ سالی ورنایے بیران ءُ یکے زدگ بوتگ وھدیکہ مستونگ ءَ دگ ءِ وئیل ءَپانزدہ مردم زدگ بوتگ انت –

گیشیں ھالانی رِد ءَ ھب ءَ کوسٹ گارڈ مدینہ کالونی شارجہ کالونی نزیک ءَ ناشناسیں مردمانء تیرگواری ءَ بیست ءُ پنچ سالی سمیر احمد ء قادر بخش بیران بوتگ –

پولیس ءَ جون دست گپتگ ءُ گیشیں پٹ پول بندات کتگ –

ھمے وڑ ھب ءِ بازار ءَ پولیس ءَ دگ بستگ ءُ ھمے میان ءَ یک گاڑی ءِ سر ءَ تیرگواری کتگ چریشی ءَ گاڑی ڈرائیور زدگ بوتگ – وئیل ءَ پد مردماں مزنیں کچے ءَ کراچی تاں شال ءَ رؤکیں شھدگ ءِ سرءَ زھرشانی کنان ءَ دگ بند کتگ –

دومی نیمگ ءَ بلوچستان ءِ دمگ مستونگ ءَ دگ ءِ وئیل ءَ پانزدہ مردم زدگ بوتگ انت –

اے وئیل مروچی سَے شمبے ءِ روچ ءَ مستونگ ءِ دمگ چوتو بوتگ کہ دو گاڑیانی ڈیک ورگ ءَ زھگ ءُ زالبولاں ھوار پانزدہ مردم زدگ بوتگ انت –

زدگ بوتگیں مردم ھما دمان ءَ نواب غوث بخش میموریل نادراھجاہ ءَ برگ بوتگ انت کہ اودا ٹپانی درمان کنگ ءَ ھمایانی کہ جاور نگیگ بوتگ انت شال ءَ دیم دیگ بوتگ انت –

دمگی مردمانی رد ءَ گوستگیں روچاں مستونگ کیڈٹ کالج ءِ نزیک ءَ ایف سی پانگس ءِ نزیک ءَ ایف سی ءَ زورانسری یک اسپیڈ بریکرے جوڑ کتگ چریشی ءِ سوب ءَ ھمک روچ وئیل بوگ ءَ انت –

دمگی مردماں مدامی ایف سی ءِ نیمگ ءَ جنگ بوتگیں زوریں اسپیڈ بریکر ایر جتگ ءُ وتی ھیال درشان اِتگ انت –

سے شمبے ءِ روچ ءَ بلیدہ ساچ وانگجاہ سر ءَ بیتگیں اُرش ءِ بگیری ءَ یک زھرشانی ئیں روانکے کشگ بیتگ- اے روانک بلیدہ ءِ زامران ءِ بازیں مھلوکے ءَ بھر زرتگ-

اے روانک ءَ جتاجتائیں پڑ ءَ ھمگرنچیں مردم کہ آیانی تہ ءَ ، نودبر، شائر ، استاد ، انجمن تاجران ، سِول سوسائٹی ءُ جتاجتائیں سیاسی پارٹیاں گوں سیادی داروکیں مردماں بھر زرتگ-

زھرشانی کنوکاں جتاجتائیں دمگاں چہ اے رونک ءَ مزنیں کچے ءَ بھر زرتگ ءُ اشی ءِ ھمراھی ءَ اے اھد کتگ ءُ گوشتگ کہ اے زانشتی وانگجاہ مئے آؤکیں پدریچ ءِ رُژن باندات ءُ چاگرد دیمروئی ءِ یک بلاھیں کردے پیلو کُت کن اَنت ءُ اے زانشتی ادارہ مئے راجی اھساس اَنت اے زانشتی ادارھانی سر ءَ اُرش یا پروپیگنڈہ ھچ وڑ اوپار کنگ نہ بنت- ءُ بلیدہ ءِ سرپدیں ءُ زانت دوستیں مھلوک ءَ یکجاہ بوتگ ءُ اِھد کتگ کہ ما وتی وانگجاھانی ھمکوپگیں ءُ ھرچ وڑیں شوربندیاں بے سوب کن ایں-

روانک ءَ لوٹ کنگ بیتگ کہ بلیدہ زامران ءِ زانشتی ادارہ ءُ استاد نودربرانی پھازگ ءَ باور بکنائین اَنت-

زھرشانی کنوکاں لوٹ کتگ کتگ زانت دُزمن ءُ چاگرد ءِ دُژمناں دیم ءَ بیار اَنت- انتزامیہ بلیدہ زامران ءَ ایمنی برجم دارگ ءِ ھاتر ءَ گامگیج بزور اَنت-

بلوچ اسٹوڈنس ایکشن کمیٹی ءِ نیمگ ءَ بلوچستان شھدربرجاہ ءَ سَے روچی زھرشانی بنجل ءِ جنگ بوتگ – اے سَے روچی زھرشانی بنجل بلوچستان شھدربرجاہ ءَ زورانسری آوار جنگ بوتگیں دو نودربر سہیل بلوچ ءُ فصیح بلوچ ءِ یل نہ کنگ ءِ بگیری ءَ برجم دارگ بوتگ –

سہیل ءُ فصیح کہ نوشکی ءِ جھمنند انت ھردو نودربر سال دوھزار ءُ بیست ءُ یک ءِ دو نومبر ءَ چہ بلوچستان شھدربرجاہ ءَ زورانسری آوار جنی ءَ پد بیگواہ کنگ بوتگ انت کہ ھنگت بیگواہ انت –

گل ءِ جارکش ءِ رِد ءَ سہیل ءُ فصیح ءَ دو سال انت کہ بیگواہ انت، دو سال ساری اشانی زورانسری آوار جنی ءِ بگیری ءَگل ءَ ایندگہ نودربر گلانی ھمراھی شھدربرجاہ ءِ تہ ءَ تاں ماھے ءَ نندانک جتگ کہ پدا رند ءَ سرکار ءِ واکدارانی باور کنائینگ ءَ پد ھلاس کنگ بوتگ ھمے گوشگ بوتگ کہ پانزدہ روچانی میان ءَ زاھر کنگ بنت – چریشی ءَ چہ پدر بیت کہ بلوچستان ءِ سرکار ءِ ماں بلوچستان ءَ زورانسری آوارجنی ءَ تھنا دست مان نہ انت بلکنہ آیانی پشت پناھی ءَ ھم کنگ ءَ انت –

آئی ءَ گوشتگ کہ دوسالانی گوزگ ءَ پد ھم آیانی ھچ ھال اھوال نیست ھمے درگت ءَ ما سَے روچی زھرشانی نندانک ءَ نشتگ انت ءُ اے زھرشانی کمپئین گیش کناں کن ایں ءُ سرجمیں بلوچستان ءَ زھرشانی کن ایں –

سہیل ءُ فصیح کہ پاکستان اسٹڈی ءِنودربر بوتگ انت ءُ چہ بلوچستان شھدربرجاہ ءَ آوار جنگ بوتگ انت، اشی ءِ بگیری ءَ نودربر گلاں شال ءَ ھوار سرجمیں بلوچستان ءَ زھرشانی کتگ انت بلے اے ھردو نودربر زاھر کنگ نہ بوتگ انت – وانگجاھاں بلوچ نودربرانی پروفائلنگ ءُ آ ترسینگ بنت ءُ زورانسری آوار جنگ ءُ بیگواہ کنگ بنت چریشی ءِ سوب ءَ بلوچ ورنا مدامی ترس ءِ آماچ انت کہ کجا ناں کجا آ ھمیشی ءِ آماچ مہ بنت –

سربوتگیں ھالانی رِد ءَ زورانسری آوار جنی ءَ پد بیگواہ بوتگیں عبدالحمید زھری سِی ءُ یک ماھاں پد یل بوتگ ءُ وتی گِس ءَ سر بوتگ –

عبدالحمید زھری ءِ یل بوگ ءِ ھبر آئی ءِ زھگ سعیدہ حمید ءَ ماں چاگردی ترامجاہ ایکس ءَ داتگ ءُ گوشتگ کہ سِی ءُ یک ماھاں ماں بندیگ جاھاں ازیت سگگ ءَ پد منی پت عبدالحمید زھری یل بوتگ ءُ گِس ءَ سر بوتگ –

زانگ بہ بیت کہ عبدالحمید زھری دھ اپریل سال دوھزار ءُ بیست ءُ یک ءَ ماں کراچی ءَ زورانسری آوار جنی ءَ پد بیگواہ کنگ بوتگ –

عبدالحمید زھری ءِ کھول ءَ آئی ءِ زورانسری آوار جنی ءِ بگیری ءَ گوستگیں دو سالاں ماں کراچی، اسلام آباد ءَ ھوار بلوچستان ءِ تہ ءَ وتی زھرشانء نبشتہ کنائیں اِتگ انت –