TBP Balochi

نبشتانک: سکی ساوڑ ءِ گُناہ؟

نبشتہ کار: نعیم اسد ساجدی

دی بلوچستان پوسٹ

“منی گُناہ همیش اِنت کہ هِچ گُناہ اوں نیست”

“منی میار همیش اِنت کہ بے میاراں مَن”

اے گپ ءَ ما دْراہ سرپد ایں کہ یک زورگِریں دُژمنے چہ دُرستاں پیسر گُلامیں راج ءِ زُبان ءَ تاوان دیگ ءِ جُھد کنت۔ زُورگریں دُژمن نہ لوٹ ایت کہ گُلامیں راج وتی زُبان ءَ بوان ایت ءُ آئی ءِ وانِندھیں چاگِرد زُبان دوست بہ بیت پرچا کہ زُبان دوستی راج ءَ راجدوست کنت ءُ راجدوستیں راج وتی راج ءِ لگتمالی ءَ کبول نہ کنت پمیشکا دُژمن راج ءِ زُبان دوستیں نودربر، جھدکار ءُ ندکاراں آزاری دنت کہ گُلامیں راج ءِ زُبان گار ءُ بیگواھی ءِ آماچ بہ بیت سکی پُل تو زاناں پرچا بیگواھی تئی دگاں ھچ گُناہ ءِ نیست اَت پرچا تو زُبان ارزشت مردم بوتگاں ؟ گڑا اے درگپ ءَ ما گندگ ءَ ایں کہ چہ ائید ءَ پیسر راجی زُبان ءِ جُھدکار سکی پُل تو ءُ دگاں بازیں سنگت پاکستانی لشکر ءَ چہ گِس آوار جنگ ءُ بیگواہ کُتگ آ اے راجی زُبان ءِ ورنائیں ندکار ءُ زُبان جُھدکارانی گُناہ تھنا ایش اِنت کہ اے وتی واجہ زُبان ءِ واستا مھر ءُ کار کنگ ءَ اَنت آیاں وتی زُبان ءُ راج ءِ بزگی مار اِتگ ھمے جیڑ اِنت کہ اگاں اے بدواھیں دُژمن نہ لوٹ ایت کہ بلوچ راج ءَ ماں وانگجاھاں یکے شریں وڑے ءَ بوان انت ءُ نبشتانک بکن اَنت بس مئے واجہ نبشتہ کار سنگت ھمے واست ءَ گار ءُ بیگواہ کنگ بوگ ءَ آں پرچا مارا وتی زُبان ءِ سر ءَ مھر ھست اِنت۔

سکی جان ترا یاد بیت کہ تو من ءَ گون یار تو وتی زبان بوان ءُ جھد بکن اِنت پرچا مرچی ھر بلوچ ءِ زھگ ءَ وتی زُبان وانگ ءُ نبشتہ کنگ الّم آں ءُ سکی مرچی من نبشتانک کنگ ءَ بلّے اپسوس کہ تو بیگواھی آں۔

گھتر ھمیش اِنت پہ آیوکیں پدریچ ءِ جُست ءِ پسّو ءَ مارا مرچی جیڑگی اِنت ءُ وتی دگ تچک کنگی اِنت ،وتی راجی ڈُبّہ ءُ زمہ واری زانگی اِنت ،اگاں نا گْوستانک مارا ھِچّ رنگ ءَ نہ بکش اِیت اے نُوں گوم ءَ کپتگ کہ مارا پہ وت چے پکار اِنت شْرَپداری یا زُزوائی پرے ھاتِر ءَ ما دِلجم بہ بَہ اِیں کہ راجدپتر ءُ آیوکیں پدریچ مارا ھِچّ رنگ ءَ نہ بکش اِیت۔تئی کسترے براس نعیم اسد ساجدی

بلوچ راج شالا یکمُشت ھمکوپک ءُ ھمتوار بات اَنت ۔بلوچی ، بلوچ ءُ بلوچستان شالا آجو بات اَنت ۔۔آمین شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گریوگ پہ تو ائیب اِنت

نبشتہ کار: گوگی وتیانگو

رجانک کار: ساحر اسحاق

چمشانک: شبیر بلوچ

دی بلوچستان پوسٹ

گوگی وتیانگو گُش ایت کہ پہ یک نبشتہ کارے ءَ دو راہ اَنت۔ یکّے آ وتی پیرُک ءِ زھم ءَ دز بہ جنت ءُ پہ چاگر ءِ مَٹی ءُ بدلی ءَ جُھد بہ کنت۔ دومی آ بہ گوش ایت کہ من ءَ گوں پیرُک ءِ زھم ءَ کار نیست ءُ گوں ھمایاں گون بہ کپ ایت کہ چاگرد اش ایردست کُتگ۔ پہ یک نبشتہ کارے ءَ میانی رابند نیست۔

گوگی وتیانگو ءِ اسل نام جیمز گوگی بوتگ۔ 1976 ءَ گوگی وتی شنگکار ءَ ھال دنت ءُ گُش ایت کہ آئی ءِ درائیں کتاباں چہ آئی ءِ نام ءِ دیم ءِ لبز ”جیمز” دور کنگ بہ بیت ءُ ایوک ءَ گوگی وتیانگو نبشتہ کنگ بہ بیت۔شنگکار ھبکّہ بیت ءُ گوگی ءَ گُش ایت کہ درائیں دگنیا ترا جیمز گوگی ءِ نام ءَ زانت ءُ وان اِیت, توکہ چوش بہ کن ئے گڑا تئی کتاباں کس نہ وان اِیت۔ اے ھبر ءِ پسّو ءَ گوگی گوش اِیت کہ بس اِنت، چِد ءُ گِیش من انگریزانی داتگیں پجّار ءَ وتی کوپگاں زُرت ءُ دیم ءَ شُت نہ کن آں، من وتی اپریکی پجّار ءَ زور آں ءُ دیم ءَ جنز آں۔ اگاں یک نیمگے ھما وتی اَدا بچّاراں چینکس دری داتگیں پجّار ھما وتی کُرتگ مئے اسکولانی تہ ءَ زھگانی پُچ ءُ گُد، بلوچی ءُ براھوئی زبان ءِ تہ ءَ ھزار رنگیں مٹّی ءُ بدلی، مئے گوستگیں رسم ءُ رواجانی شموشگ، اوں زند ءِ گوازینگ ءِ ھر وڑیں تک ءُ پھنات بہ بیت ھمّا مٹ کُرتک اَنت اے رد ءُ بدل شہ دَری آوُکیں مردمانی وجہ ءَ بوتگ انت۔

ماں اگاں گیشتر لوٹیں کہ اے ھزاب چہ ھمّا دَر آیاں گڑا ھمارا درستیں بلوچ کوم ءَ را ھمراہ ءُ ھم کوپگ بیگی اِنت دانکہ ما دَری کومانی سَر ءَ زورتگیں پندل سازی چہ وت ءَ رکینت بہ کن ایں-

ماتی زبان ءِ ارزشت ءُ زبان ءِ سیاست ءِ بابت ءَ گوگی جوانین رنگے ءَ نگد کنت۔ وھدے کہ 1977 ءَ گوگی یک تیھٹر پروگرامے ءَ وتی ماتی زبان ءَ گیکیو ءَ کنت۔ ھمے سبب ءَ گوگی دزگیر کنگ بیت گڑا زندان ءَ ھمے جیڑ ایت وھدے من انگریزی ءَ گپ ءُ ھبر کُرت من ءَ کس ءَ ھچ نہ گُشت ۔ بلئے ھمے کہ من وتی ماتی زبان ءَ تیھٹر کرت گڑا ایشاں من ءَ گِپت ءُ زندانی کُت۔گوگی ھمد ءَ چہ ماتی زبان ءِ ارزِشت ءَ سرپد بوت۔ چہ ھمد ءَ گوگی انگریزی زبان ءَ رُکست کُت۔ ھون ءِ پُلتاک (petals of Blood) گوگی ءِ گڈی گدار اِنت۔ ڈی کالونائیزنگ دی مائنڈ ءِ تہ ءَ گوگی اے گپّ ءَ تچک تچک ءَ گوش ایت کہ آ نوں ھِچّ رنگیں کتاب انگریزی ءَ نبشتہ نہ کنت۔

گوگی ءِ اے اوگام وھدے تاں شنگکار اں سر بنت تو آ ھبکّہ بَنت ءُ گوش اَنت توکہ ماتی زبان ءَ نبشتہ کن ئے گڑا دنیا ترا چون وان اِیت؟ گوں ھمے جُست ءَ گوگی دُرائنیت انچوشکہ انگریزی ءَ نبشتہ بوتگیں مواد اپریکی زباناں رجانک بَنت، ھمے پیم ءَ اَپریکی زباناں نبشتہ بوتگیں کتاب انگریزی ءَ رجانک بہ بَنت، ما زبان اِیں، آکہ مئے زبان ءَ نہ زان اَنت گُڑا اے ھمایانی جیڑہ اِنت، انچوشکہ ما آیانی زبان ونتگ ءُ دربُرتگ, آ ھم اَنچوش بہ کن اَنت، مئے ماتی زبان ءَ بہ وان اَنت ءُ در بر اَنت۔

ما اگاں چماں وتی کَش ءُ کِرّا شانک بہ دئے آں مئے مرچیگیں باز کم نودربر شہ وتی براھوئی، بلوچی زبانانی ارزشت ءَ سرپد ایں مئے وانگجھاہ ءَاستاد بلوچ زھگاں دَری زبانانی ارزشت ءَ ھر وڑ ءَ زانت سرپدی دَنت بلئے اے گپ گوں اپسوز ءَ گُشگ بیت کہ چہ وتی ماتی زباناں زبھر اَنت پد ءَ ھمے زھگ مزن باں وتی زبان ءِ بابت ءَ ھچ نہ زان اَنت ھمے وڑ ءَ مئے زبان روچ پہ روچ ءَ گار ءُ گُم بیان بنت۔
مرچی باندا مارا شمارا مزنیں کَچ ءُ کِساسے ءَ انچیں وانوک ءُ زانت کاریں بلوچ نودربر دست کپ ایت کہ ءَ چہ دَری زبانانی ارزِشت ءَ سّک سرپد ایں اوں ھمے چیزے سر ءَ گوں پھر ءُ شان ءَ وتی سر ءَ پَکر کنت بلئے شہ وتی جندے زباناں بہ ھال انت۔ کالونائزر وھدے کہ یک راجے ءِ سَر ءَ اُرش کنت ءُ کبزہ کنت اولی سر ءَ ھما ایردستیں راجے ھما چیزاں گار ءُ بیگواہ کنت کہ آ آئی ءِ پجار بہ بنت(زبان،رسم ءُ رواج ، وانگجھاں) وھدے کہ ایردستیں راج ءِ اے چیز گار بنت گڑا پہ آ راج ءَ وتی رکینگ ءَ ھِچ پشت نہ کپ ایت۔

نوں بیا اِت وھدئے زلورت ھمیش اِنت کہ ما درستیں راج دوست ھُور ءُ ھَوار بہ باں وتی راج ءَ شہ کالونائزر ئے داتگیں پندل سازی( discourse) آں بہ رکین اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: مارا وتی دود ءُ ربیدگ زانگی اَنت

نبشتہ کار: نپیسہ مجید

دی بلوچستان پوسٹ

برے برے لبز دْروہ اَنت، سسّا هم گار بیت، انچیں جیڑه سر ءَ کپ اِیت کہ ھچ پھم کار نہ کنت کہ چے بوگ ءَ اِنت؟ هما وهد ءَ کہ راست ءَ را دْروگ ءِ پارسنگ ءَ کنگ بہ بیت۔ بلے اد ءَ منی جیڑه تهنا پہ وت ءَ نہ اِنت بلکیں پہ وتی راج ءِ گْران بھائیں گهار ءُ زالبولان اِنت۔

آ ھک کہ مارا مئے شریت ءُ دین ءَ داتگ اَنت آهاں یلہ بدے کہ اِد ءَ مُسلمانی ءِ نام پَش کپتگ ءُ بس بکول ء مبارک کازی ئیگ ءَ کہ ”مُسُلمانی کجا پشت کپت باریں یزیدیں کاپرانی واجھی اِنت“ بلے هما ھک کہ مارا مئے دود ءُ ربیدگ ءَ داتگ هما چہ ما پُلگ بوتگ۔ کمو گْوست ءَ بچار اِت ءُ چمشانکے بہ دے اِت، راجدپتر ءَ بہ پول اِت کہ گْوست ءَ زالبول ءِ بستار ماں بلوچ چاگرد ءِ تہ ءَچے بوتگ ءُ بلوچ ءِ دود ءُ ربیدگ چے بوتگ؟ بلوچ ءِ گور ءَ زالبول ءَ را چینچوکیں ارزشتے دیگ بوتگ اگاں جنگے، مزنیں کُشت ءُ کوشے بوتگ زالبولے اگاں میان ءَ اَتکگ ھما جنگ بند کنگ بوتگ بیر بکشگ بوتگ۔ بلوچ ءِ گور ءَ زالبول ھچ بَر پُشت ءَ کنگ نہ بوتگ راجدپتر ءِ نمیرانیں کارستے بانڑی ءِ نام وت اِے گپ ءِ گْواھی ءَ دنت کہ دھلی ءِ بادشاہ ءَ گوں دیم پہ دیم جنگ ئِے کُتگ بلے چاکر گوں لشکر ءَ تتکگ رند ءَ کہ ھوش ئِے کُتگ بانڑی گوں نہ اِنت نو میران ءَ جبزگ کُتگ کہ ”من رو آں ھوتیں بکر ءَ چار آں من وتی مات ءِ لاش ءَ کار آں “ ایشی ءَ چہ اِے زانگ بیت کہ بلوچ ءِ زالبول ءُ مردین برابر بوتگ اَنت جنگانی تہ ھم بھر زُرت اِش کُتگ ایوک ءَ لوگ ءِ تہ بند نہ بوتگ اَنت۔
ھمے وڑ ءَ گُل بی بی اِنت کہ بلاھیں لشکرے ءِ کماندار بوتگ۔ چُشیں بازیں کارست ھست کہ بلوچ راجدپتر آیانی سر ءَ پھر بنت ایت، اگاں ما بلوچ راجدپتر ءَ بوان ایں اود ءَ زالبول ءِ ھوال ءَ بلوچ ءِ دود ءُ ربیدگ چہ دُنیا ءِ کُلیں راجانی دود ءُ ربیدگاں چہ سرجم ءُ برجم تِر بوتگ چُش کہ ایندگہ راجانی تہ ءَ زالبول پدمنتگ ءُ ڈالچار کنگ بوتگ آیانی سر ءَ زُلم ءُ زیادتی کنگ بوتگ بلوچ ءِ گور ءَ نہ بوتگ، برات ءُ گھار یک ھساب بوتگ اَنت۔

بلے مرچی کہ بلوچ گُلام اِنت بلوچ ءِ دود ءُ ربیدگ، زمین ءُ زُبان، مال ءُ مَڈّی ءَ ھوار لج ءُ ننگ ھم پُلگ بوگ ءَ اِنت۔ ایشانی رکینگ ءِ واست ءَ جَد ءُ جُھد کنگی اِنت، وت ءَ چہ گُلامی ءِ زمزیلاں در کنگی اِنت۔ ایوک ءَ جنگ کنگ ءُ زمین ءَ آزات کنگ ءَ پہ ما اِے گُلامی ءِ زمزیلاں دراَتک نہ کن ایں بلکیں مارا وتی بلوچی ءِ پجّار اوں رکینگی اِنت، گُڑا مئے پجّار ھمیش اِنت کہ دست ءَ ماں دلبند ءَ بہ جن ءُ بروتاں تاب بہ دے این ءُ شلوار ءِ پادگاں گوازے گوازے بہ کن ایں کہ ما بلوچ ایں؟
پسّو : اِنّا-

واجہ سید زھور شاہ ھاشمی ءَ گُشت کہ”بلوچ پہ دود بلوچے” ایشی ءِ بزانت ایش اِنت کہ مئے تہ ءَ بلوچیت بہ بیت گُڑا ما وت ءَ چہ اِے گُلامی ءَ در کُت کن ایں۔

وتی زُبان ءَ چہ بے سما، وتی دود ءُ ربیدگ، راجدپتر ءُ پجّار ءَ چہ بے سما بس وتی شلوار ءَ گوازے پِر کن ریش ءَ بہ رند سیکل ءَ سوار بو گُش ئے زاناں ”پی آئی جھاز“ ءَ سوار آں، ھوٹل ءَ بہ نِند ٹانگ ءَ ٹانگ ءِ سر ءَ کن سگریٹ پہ سگریٹ بو ءُ چاہ بور گوں سنگتاں بٹاک بہ جن کہ من بلوچے آں اِے کجام بلوچی اِنت؟.یکبرے بلوچیت ءِ جِند ءَ بزان ایں گُڑا وت ءَ بلوچے بکن ایں، مات ءُ گوھارانی سر ءَ زُلم کنگ ءَ پہ ما بلوچ بوت نہ کن ایں ءُ نیکہ وتی آزاتی ءَ پچ گِپت کن ایں۔ مرچی وتی دود ءُ ربیدگاں چہ بےھیال اِیں ءُ کبزہ گیر ءِ زُبان ءُ دود ربیدگ زُرتگ اَنت گُڑا کجام شَرم ءَ آجوئی ءِ گپ ءَ بجن ایں؟ ما زالبول ھم ھمے چاگِرد ءِ بھرے ایں گُڑا مارا چی ءَ مئے ھک دیگ بوگ ءَ نہ اِنت؟ مرچی اے کم نِزّریں چاگرد ءَ مارا انچو نز آؤرتگ کہ ما یک لبزانکی دیوانے( وٹسپی گُروپ) ءَ ھوار بوت ءُ وتی زُبان ءَ ونت اوں نہ کن ایں۔
مئے بدواہ وَ وش اَنت کہ بلوچی گار ءُ بیگواہ بہ بیت پمیشکا چُشیں ادارھے نیست کہ اود ءَ بلوچی وانینگ بہ بیت بلے لھتیں راجدوست ءُ زُبان دوستیں واجھاں کہ وٹسپی دیوان اڈ کُتگ ءُ بلوچی وانینگ ءَ اَنت ھمے دیواناں ھم ما ھوار بوت نہ کن ایں کہ وتی زُبان ءَ بوان ایں ھیل بکن ایں۔ من ءَ گوں وتی زُبان ءَ مھر اِنت پمیشکا من وٹساپی دیواناں ھوار بوتگ آں کہ وتی زُبان ءَ ھیل کن آں۔ بلے برے یک گونگیں مردے کیت کہ وتی اکس یا تواربندے دیم بہ دے تانکہ ما بزان ایں کہ تو جنکے ئے یا ما گوں تو گپ کن ایں۔

دُنیا ھمے سوشل میڈیا ءُ دامگ ءَ چہ کجا کجا سر بوتگ پہ زُبان ءِ واستا مرچیگیں سوشل میڈیا چینچو ارزشت دار ایت بلے مارا اِے سُد نیست ءُ ما چے کنگ ءَ ایں؟ یک جنکے اگاں وتی زُبان ءِ وانگ ءَ دیوانے ءَ ھوار اِنت آئی ءَ دل سیاہ ءُ ٹارچر کنگ بیت کہ تو وتی اکسے، تامُرے ءُ تواربندے روان دے باریں تو جنکے ئے یا بچکے۔

جِند ءِ براتانی کہ ھال ایش اِنت گُڑا دْرامداں چَہ چے گِلگ؟ نو باید اِنت مارا جیڑگ لوٹ ایت، سما کنگ لوٹ ایت کہ اِے مئے دود نہ بوتگ کہ زالبول ءَ وانگ ءِ ھک نیست یا زالبول لوگ ءَ ڈن دراَتک نہ کنت، نو دُژمن ءِ دود یلہ کنگی اِنت مارا وتی دود ءُ ربیدگ ءُ زُبان زِندگ کنگی اِنت گُڑا ما باج ءَ بُرت کن ایں۔ گُڈّسر ءَ ھمے گُش آں کہ وتی تہ ءَ بلوچیت ءَ زندگ بدار اِت۔ بلوچستان آجو بات، بلوچ ءُ بلوچی زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

آزمانک: من ءَ کَے لاپ دنت؟

نبشتہ کار: لیاقت کے بی

دی بلوچستان پوسٹ

بلُک مھناز ءُ آئی نواسگ کمال یک مزنیں میتگے ءَ جہمنند اَت اَنت۔ کمال ءِ پِس جنگ ءَ شھید بوتگ اَت۔ مات ءَ دگے مردے گپتگ اَت کمال وتی بلُک ءِ کِر ءَ اَت کمال ءِ اُمر 17 سال اَت کمال سُھب ءَ وانگجاہ ءَ شت پہ وانگ ءَ بیگاہ ءَ کار ئِے کرت وتی ءُ بلُک ءِ لاپ ئِے والینت کمال سکیں مھنتی ءُ اکلمندیں مردمے اَت کمال وتی وانگجاہ ءِ تہ ءَ درستاں چہ وانگ ءَ شرتر اَت۔ ھر وھدے ماسٹر ونگجاہ ءَ دیر ءَ ھت اَنت کمال وانگجاہ ءَ را سنمبال اِت کمال ھر مردم ءَ را وتی دوست پھم اِت میتگ ءِ سجھیں نودربر شپ ءَ کمال ءِ ءُ بلُک ءِ کر ءَ ھت اَنت۔ بلُک ءَ کِسہ جت ءُ آ دگراں گوش داشت۔

کمال چوناھا سکیں بے توارے اَت وھدے گپ ئِے کُرت گڑا وتی سرڈگار، زُبان ءُ دود ءُ ربیدگ ءِ بارو ءَ۔ بلُک ءَ ھر وھد کمال منہ کُرت کہ بچا چشیں گپ مہ جن ھالات ھراب اَنت ھر وھد سرڈگار ءُ زُبان ءِ گپ ءَ جن ئے تی پِس ءَ ھمے وڑ کُرت آ اِنت جِنگ بوت ما چے کُرت۔ زی آ اِنت اَلی ءُ سرور چست کنگ بوت اَنت ما چے کرت مئے دست نہ رس ایت کمال ءَ گوں لاھم لاھم ءَ پَسو دات بَلُو ما توار مہ کن ایں چِست کنگ بہ ایں پرچا ما بلوچ ایں مئے کسور مئے بلوچی اِنت۔ گڑا بَلی ءَ گُشت گڑا کمالو ما وتی بلوچی ءَ چہ وت ءَ چون بہ کش ایں۔ کمال پَسو دات بَلّی بلوچی مئے ھون ءِ تہ ءَ ھوار اِنت۔ تانکہ مئے ساہ مان اِنت مئے بلوچی ھست بلُک ءَ بس کرت بلُک ءَ چاراِت کمال ھبر نہ زور اِیت۔ بلُک ءَ را زاہ بد کنگ ءَ دل نہ بوت کمال گڑا ھمئے وڑ ءَ کمالی وانگ برجاہ اَت۔

وھدے کمال دھمی تبک گوں شریں نمبر ءَ پاس کُرت۔ دیم ءِ وانگ ءَ واست ءَ کمال ءَ زر نیست اَت کہ دیم ءَ بہ وان اِیت گڑا کمال میتگ ءِ میر ءِ کر ءَ شت کہ مئے میتگ ءِ تہ ءَ وانگجاہ ءِ بند ءُ بست ءَ بہ کن مئے میتگ ءِ گونڈو دور وانگجاہ ءَ شت نہ کن اَنت اِد ءَ کہ بیت گونڈوانی پند نزیک بیت میر ءَ گوشت اے وَ شریں گپے من جھد کن آں بلکیں مارا وانگجاھے رس اِت۔ گڑا کمال ھر روچ میر ءِ کر ءَ شت ءُ اَتک۔ وانگجاہ رست ئِے نا ھر روچ میر ءِ کر ءَ شت۔ کمالی ھر روچ ءِ روگ ءُ آیگ ءَ میر ءَ ونگجاھے چہ سرکار ءِ نیمگ گپت ءُ میتگ ءِ تہ ءَ بَست وھدے اسکول تیار بوت گڑا کمال پد ءَ ھر سھب میر ءِ گِس ءَ اَت میر استاد کدی کیت گونڈواں وانین اِیت۔

میر ءَ گُشت تو برداشت کن استادے اَلم وڑ کناں گوڈواں وانین اِیت میر ءَ کمال دلبڈی دات اَلم استادے کار اِین گڑا کمال وش بوت کہ میر استادے کار اِیت کمال وتی پہ کار ءُ روزگار ءِ نیمگ ءَ شت لھتیں روچ ءَ پد پد ءَ کمال ھت میر ءِ کر ءَ میر تو نہ گوشت من استادے کاراں بلے تو انگت استاد نیاورت من وت گونڈواں وانین آں۔ گڑا کمال وت میتگ ءِ گونڈوانی وانینگ بِندات کرت۔ لھتیں ماھانی تہ ءَ گونڈو سک شر بوت اَنت توجہ اِش گوں وتی وانگ ءَ دات اِش میتگ ءِ مردماں کمال ءِ اے جھد ءَ پد میتگ ءِ سجھیں مردماں کمال گوں ھر کمُک ءَ جاڑیگ اِت اَنت ساری ءَ میتگ ءِ ورنا سِلکاری ءِ نیمگ ءَ روگ ءَ اِت اَنت۔

کمال ءِ اے جھد ءَ میتگ ءِ ورنا وتی نیمگ ءَ آورتگ اِت اَنت۔ ھر گونڈو ءِ واھشت اَت من ھم بہ واناں یک شریں مردمے جوڑ بہ باں کمال ءِ میتگ ءَ چہ ابید کِر ءُ گور ءِ میتگ ءِ گونڈو ھمد ءَ کمال ءِ کِر ءَ اِت اَنت وانگ ءَ۔ میتگ ءِ مردم سک وش اِت اَنت کہ مئے گونڈو چہ سِلکاری ءَ دور بوت اَنت۔ یک شریں بانداتی یے ءِ واھند بنت پہ وتی راج ءَ جھد ھمئے وڑ ءَ جاری اَت۔یک روچے کمال وانگجاہ ءَ بیت گونڑوانی وانینگ ءَ لھتیں مردم کیت۔ کمال ءَ گُش اِیت تو وتی وانگجاہ ءَ بند کن تو ھر چیز لوٹ ئے ما ترا دے اِیں تو بس وانگجاہ بند کن۔ بلے کمال گُش ایت من وتی وانگجاہ بند نہ کنان ءُ من چہ شُما ھچ نہ لوٹ آں آ سک کمال ءَ لَٹ ءُ کُٹ کن اَنت۔ بلے کمال پہ وانگجاہ ءِ بند کنگ ءَ تیار نہ بیت۔

کمال گُش اِیت من پہ وتی راج ءِ واست ءَ ھر کربانی ءَ تیاراں۔ شُما ھرچی کن اِت بہ کن اِت بلے من وانگجاہ ءَ بند نہ کن آں آ کمال ءَ لَگت ءُ مُشت جن اَنت رو اَنت ھمئے ھال گڑا میتگ ءِ مردماں سر بیت میتگ ءِ مردم سک پریشان بنت کمال ءَ گش اَنت تو وانگجاہ ءَ مہ رو میتگ ءَ بہ نند بلے کمال ایشانی ھبراں گُوش نہ دار اِیت گُش اِیت من ءَ اے ھچ نہ کن اَنت۔ ھر روچ ءِ ڈول ءَ کمال وانگجاہ ءَ روت۔

بیگاہ ءَ کارجاہ ءَ یک شپے شپ ءِ سئے نیم ءَ بیت۔ بلُک ءُ کمال واب بنت۔ گِیٹ توار کنت بلُک ءُ کمال پاد کاینت بلُک کمال ءَ نیل اِیت روگ ءَ وت روت گیٹ ءَ پچ کنت۔ لھتیں سلاہ بند اَنت۔ آ بلُک ءَ سوج نہ کن اَنت ھنچو لوگ ءِ تہ ءَ پُتر اَنت۔ کمال ءَ گران کن اَنت۔ بلُک زار ءُ پِریاد کنت میتگ ءِ مردم کاینت سلاہ بند کسی ھبراں نہ زور اَنت۔ میتگ زالبول وس کن اَنت بلے آ زالبولاں دِکہ دے اَنت۔

کمال ءَ گِران کن اَنت گوں وت بر اَنت بلُک پریات کنت گُش ایت۔ منی زھگ شّما جت، کمال ءَ بر اِت گڑا من ءَ کَےلاپ دنت؟

پسنی ءِ اُرش ءُ بلوچستان ءَ نہ رک اتگیں زرکاری

ٹی بی پی شونگال

سَے نومبر ءَ گوادر دمگ ءِ پسنی ھنکین ءِ ھد ءَ تیاب دپی شھدگ ءِ سر ءَ پاکستان آرمی ءِ سر ءَ تُرندیں ارشے ءِ تہ ءَ پوج ءِ جونئیر کمیشنڈ اپسر ءَ ھوار چاردہ کارندہ کُشگ بیتگ اَنت۔ تیاب دپی شھدگ چین پاکستان زرکاری راھداری ءِ پُرارزشتیں کِشک اِنت کہ گوادر ءَ گوں کراچی ءَ ھور کنت، ایشی ءِ جتاجتائیں جاھاں چد ءُ پیسر ھم پاکستانی پوج، نیوی ءُ کوسٹ گارڈ ءِ سر ءَ ھترناکیں ءُ ترندیں اُرش بیتگ اَنت کہ ایشانی زمہ واری بلوچ آجوئی ءِ جھد ءَ ھواریں سلاہ بندیں گلانی ھم سنتی بلوچ راجی آجوئی سنگر ءَ من اتگ اَنت۔

چین پاکستان زرکاری راھداری ءَ پاکستان وتی زرکاری جیڑھانی گیواری سرپد بیت بلے بلوچستان ءِ راجدوست ءُ آجوئی لوٹوکیں ادارگ ءُ پاٹی یکشلی ءَ گوں وتی تُرس ءِ درشانی ءَ کنگ ءَ اَنت کہ اے یک لُٹ ءُ پُلی شوربندی اِنت، کہ لڈ ءُ باری مَٹیانی سوب جوڑ بیت ءُ چین ءِ کمک ءَ گوں پاکستان اے شوربندیانی کمک ءَ گوں بلوچستان ءِ سرءَ وتی قوضہ ءَ مھکم کنت اِنت۔

بلوچ سلاہ بندیں گل چین پاکستان زرکاری راھداری ءَ بلوچستان ءِ تہ ءَ دارگ ءِ ھاتر ءَ یکشلی ءَ گوں راھداری ءَ بندوکیں شوربندیاں نشانگ کنگ ءَ اَنت۔ بلوچ لبریشن آرمی ءِ مجید بریگیڈ ءَ چین ءِ زرکاری مُز ءُ انجینئرانی کُشوکیں ھترناکیں ارش کُتگ اَنت ءُ چین ءَ شوربندیانی ھلاس کنگ ءُ چہ بلوچستان ءَ در نہ کپگ ءِ دروشم ءَ گیشتر ھترناک ءُ ترندیں ارشانی بیھار داتگ انت۔

پاکستان جھانی زرکاراں ءُ جتاجتائیں ڈیھاں بلوچستان ءَ کاریزکاری ءِ شوربندیانی سر ءَ زرکاری ءِ لوٹ کنگ ءَ اِنت بلے بلوچستان ءِ جنگ زدگیں جاورھال درملکی زرکاری ءِ ھاتر ءَ گیگ نہ اَنت۔ پاکستانی ٹاھاں ابید داں وھدیکہ بلوچی راجی تاکت اے شوربندیانی ھلاپ اَنت داں ھما وھد ءَ چین پاکستان زرکاری راھداری ءَ ھوار بلوچستان ءَ کجام ھم شوربندی ءِ سر ءَ درملکی زرکاری رکیتگ نہ بیت اِنت۔

سربوتگیں ھالانی رِد ءَ دوشی شپ ءَ پاکستانی پوج ءُ چیریں ادارھانی کارمنداں دو ورنا زورانسری آوار جتگ ءُ بیگواہ کتگ انت –

گیشیں ھالانی رِد ءَ گوستگیں شپ ءَ تربت ءِ دمگ چاھسر ءَ پرانا ہوٹل ءِ نزیک ءَ گاڑی سواریں سلاہ بندیں مردماں عبدالوہاب ء محمد جان نامی ورنایے آوار جتگ ءُ بیگواہ کتگ –

ھمے وڈ چہ تربت ءِ دمگ آپسر ڈکی بازار ءَ ھم کسان سالیں ورنایے ءِ زورانسری آوار جنی ءِ ھال انت –

اھوالکارانی رِد ءَ گوستگیں شپ ءِ ادار یک ءُ نیم ءَ پاکستانی پوج ءُ چیریں ادارھانی کارمنداں دلپُل ءِ گِس ءَ بیڑ بُرتگ ءُ آئی ءِ کسانسالیں ورنائیں زھگ شاھد ء دلپل آوار جتگ ءُ بیگواہ کتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ نیمگ ءَ زورانسری آوار جنیانی درچ یکشل ءَ برجاہ انت ـ چشیں ھند ءُ دمگ ءِ پش نہ کپ اِتگ کہ اودا پاکستانی پوج ءِ نیمگ ءَ زوراکی کنگ نہ بوتگ ءُ ورنا ءُ کماش آوار جنگ ءُ بیگواہ کنگ نہ بوتگ انت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی گدان ءَ مروچی پنچ ھزار ءُ دوسد ءُ نوزدہ روچ سرجم بوتگ انت – مروچی چہ کلات ءَ سیاسی ءُ چاگردی باسکاں ھوار ھر تک ءُ پھناتاں سیادی داروکیں مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ بلوچ راجی جھد ءِ پژدر ءَ مروچی ھزارانی کچ ءَ سیاسی باسک بندیگ انت ءُ زورانسری آوار جنی ءِ آماچ انت ءُ اے درچ یکشل ءَ گیشی ءَ گوں برجاہ انت –

آئی ءَ گوشتگ کہ وتگڑیں سی ٹی ڈی بہ بیت یا ریاستی کشندہ ٹولی آ سیاسی باسکانی توار ءِ ایرموش کنگ ءَ پہ بیمناکیں وڈے ءَ مردماں کُشگ ءَ انت-

ماما قدیر بلوچ ءَ گوشتگ کہ راج ءَ یکجاہ بوگی انت ءُ بیگواھیں مردمانی یل کنائینگ ءِ ھاتر ءَ آیانی کھول ءِ توار جوڑ بوگی انت ءُ راجی جھد ءَ وتی کردار پیلو کنگی انت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ پنجگور ءَ زورگریں پاکستانی پوج ءِ یک پانگسے ءِ سر ءَ اُرش کتگ-

جارکش ءَ دیمتر ءَ گْوشتگ کہ سرمچاراں چتکان ءَ رخشان پُھل نزیک ءَ برجاھیں زورگریں پاکستانی پوج ءِ پانگس سر ءَ گرنیڈ لانچر ءَ چہ بازیں گولھے آس داتگ ، تراکانی آسر ءَ دُژمنیں پوج ءَ جانی ءُ مالی تاوان چست کنگ کپتگ-

بلوچ لبریشن آرمی اے اُرش زمہ واری ءَ منّ اِیت-

بلوچ نودربر سہیل بلوچ ءُ فصیح بلوچ ءَ ھوار ایندگہ ورنایانی زورانسری آوار جنی ءُ یل نہ کنگ ءِ بگیری ءَ ماں تربت ءَ بلوچ اسٹودنس ایکشن کمیٹی تربت ھنکین ءِ نیمگ ءَ زھرشانی ءُ روانک کشگ بوتگ – درنگاز کنوکاں چہ عطاء شاد ڈگری کالج ءَ بگر تاں شھید فدا احمد چار راھے سر ءَ روانک ءِ کش اِتگ ءُ ھمدا زھرشانی کتگ-

درنگاز کنوکانی دست ءَ بینر بوتگ انت کہ آیانی سر ءَ زورانسری آوار جنگ بوتگیں مردمانی یل کنگ ءِ نارہ نبشتہ بوتگ انت وھدیکہ آیاں نارہ جنان ءَ زورانسری آوار جنی ایرجتگ ءُ بیگواھیں مردمانی یل کنگ ءِ لوٹ کتگ –

زھرشانی ءَ درنگاز کنوکاں تران کنان ءَ گوشتگ کہ زورانسری آوار جنی میان استمانی کانود ءُ ملکی کانودانی بگیری دارگ انت، بلے پہ بلوچ ورنایاں اے درچ روچ پہ روچ گیش بوان انت ءُ ملکی ادارہ اشی ءِ سر ءَ ھچ گوشگ ءَ نہ انت –

آیاں اے کار بلوچ ءِ چُکچینی گوشتگ ءُ ترندی ءَ گوں ایرجتگ ءُ ھمے لوٹ کتگ کہ بیگواھیں مردم زاھر کنگ بہ بنت آمیدگساں آرگ بہ بنت پرچاکہ اے آیانی کانودی ھک انت –

بساک ءِ رھشونانی گوشگ ات کہ بلوچستان ءَ زورانسری آوار جنیانی درچ سنگین بوان انت کہ اشی ءَ بازیں دھکے بیت برجاہ انت – اے دردناکیں انسانی زوراکی ءَ بلوچ چاگرد نگیگ کتگ – زورانسری آوار جنیانی تہ ءَ یکشل ءَ گیشی آرگ اے گپ ءِ گواھی ءَ دنت کہ وفاق ءُ صوبہ ءِ واکداریں ادارہ اے انسانی زوراکی ءَ پہ دل زورگ ءَ ساڑی نہ انت –

آیانی گوشگ ءَ ات کہ یک نیمگ ءِ بلوچ نودربرانی زورانسری آوار جنیانی تہ ءَ یکشل ءَ گیشی آیگ ءَ انت ءُ دومی نیمگ ءَ واکدارانی نیمگ ءَ پرایمنیں نودربر پروفائلنگ ءُ ترسینگ بوگ ءَ انت کہ آئی ءِ تہ ءَ وانگجاھانی واکدار ھم ھوار انت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں آواران ءَ زورگریں پاکستانی لشکر ءِ پانگس ءِ سر ءَ اُرش کُرتگ ءُ یک کارمندے کُشتگ ءُ کم چہ کم دو ٹپی کُرتگ۔

آئی ءَ گوشتگ اے اُرش 30 اکتوبر ءِ بیگاہ ءِ پنچ ءَ تیرتج آواران ءَ پاکستانی لشکر ءِ یک پانگسے ءِ سر ءَ کنگ بیتگ۔دُژمن ءِ دلگوش ءِ بھر ءُ بانگ کنگ ءَ دُرساں پیش بلوچستان لبریشن فرنٹ ءِ اسنائپر ٹِک تیراں یک کارمندے نشانگ کُرتگ ءُ کُشتگ۔اے اُرش ءَ پد پانگس ءِ تہ ءَ جاک ءُ سلوات بندات بیتگ کہ سرمچاراں وتی نشانگ ءِ سر ءَ گوں نوکیں سلاھاں اُرش کُرتگ۔اے اُرش ءَ کم چہ کم دو کارمند ٹپی بیتگ۔

آئی ءَ گوشتگ بی ایل ایف ءِ نوکیں جنگی کارشونیاں دُژمن ءِ تہ ءَ تُرسے دور داتگ۔ بلوچستان ءِ سرڈگار پہ آئی ءَ تنک کنگ بیتگ۔ دژمن ءِ توانمندی ءَ ابید بلوچ وتی آجوئی ءِ جنگ ءَ گوں سوبمندی ءَ جنزان اِنت ءُ سوبمندی بلوچ ءِ تالِہ ءَ اِنت۔

گوھرام بلوچ ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ کول کنت کہ داں بلوچستان ءِ آجوئی ءَ زورگریں لشکر ءُ آئی ءِ کمکاراں ھوار دُژمنیں ریاست ءِ دُرسیں سیتانی سر ءَ گوں تُرندی ءَ مئے اُرش برجاہ بنت۔