TBP Balochi

یکشمبے ءِ روچ ءَ شال ءَ زورانسری بیگواہ جھانزیب بلوچ ءِ یل نہ کنگ ھلاپ ءَ زھرشانی کنگ بیتگ-

زھرشانی ئیں روانک ءَ وائس فار بلوچ مسنگ پرسنز، بی وائی سی، نودربراں ھوار بلوچ بیگواھیں مردمانی کھول ءَ ھم بھر زرتگ-

زھرشانی کنوکاں بینرز، پلے کارڈ ءُ بیگواھیں مردمانی اکس چست کتگ شھر ءِ دگانی سر ءَ گشت کنان ءَ زورانسری آوار جنی ءِ ھلاپ ءَ ناراہ جتگ-

اے درگت ءَ کھول ءَ گوشتگ کہ جھانزیب بلوچ ءَ سے مئی دوھزار شانزدہ ءَ چہ شال ءَ بیگواہ کتگ – آ ٹیلر ماسٹرے بیتگ- جھانزیب بلوچ ءَ ھوار ءَ سرجمیں بیگواھیں مردمانی یل کنائینگ لوٹ کتگ-

کھول ءَ گوشتگ کہ زورانسری بیگواہ جھانزیب بلوچ شال شھر سریاب ءِ دمگ ءِ جھمنند اِنت ءُ آ یک درزی یے بیتگ- آ یک سیرکتگین ئِے آئی ءِ جنکو انچش ودی بیتگ ھما اِنت زھرشانی اِنت-

مات ءَ گوشتگ کہ معصومہ آئی ءِ یکیں چکیں، ھما روچ ءَ کہ جھانزیب بیگواہ کنگ بیت ھمے روچ ءَ معصومہ ءِ اُمر شش ماہ بیتگ-

گل سیمہ ءَ گوشتگ کہ گوستگیں ھشت سال ءَ چہ تھنا ناں آ بلکیں آئی ءِ سرجمیں کھول مردم درد ءُ رنجانی تہ ءَ اَنت-

آئی ءَ گوشتگ مارا چہ واب پچگر بیتگ، ما نادُراہ جوڑ بیتگیں ءُ نو بس دوا درمانانی اُمیت ءُ زندگ آں-

گُڈی ءَ زھرشانی کنوکاں گوشتگ کہ اگاں آئی ءَ چُشیں جرمے کتگ گُرا آمیدگس ءَ پیش کنگ بہ بیت-

بلوچستان ءِ سرکار ءَ اردو ءُ بلوچی ءِ نبشتہ کار اسسٹنٹ پروفیسر عابد میر ءِ سیادی سلاہ بندیں گلاں گوں ھوار کنگ ءَ فورتھ شیڈول ءَ ھوارینگ بیتگ-

دمگی اھوالانی رد ءَ شال ڈگری کالج ءَ درکنگ ءُ ڈیرہ بگٹی ءَ کنگ بیتگ-

عابد میر بازین کتابانی نبشتہ کار اِنت، رجانکار ءُ کواسدار اِنت، آ بلوچستان ءِ جاورھالانی سر ءَ یکشل ءَ نبشتگ کنگ اِنت ءُ آئی ءَ سیاسی ءُ لبزانکی ءُ چاگردی مزنیں شرپے ھست اِنت-

زانگ بہ بیت بلوچ یکجھتی کمیٹی ءِ زھرشانی ءَ پد کساسی سَے ھزار سیاسی باسک، اھوالکاف ءُ چاگردی باسکانی نام بلوچستان ءِ سرکار ءَ فورتھ شیڈول ءَ ھوار کتگ اَنت-

پاکستانی پوج ءِ دست ءَ بیگواھیں ورنایے یل کنگ بیتگ-

گیشیں اھوالانی رد ءَ ھمے ماہ ءِ سَے ستمبر ءَ بلوچستان ءِ دمگ کیچ تربت شاھی تمپ ءَ بیگواھی ءِ آماچیں ورنایے یل بیتگ-

یل بیتگیں ورنا ءِ پجار داد شاہ بلوچ ء ماسٹر سلیم ءِ نام ءَ زانگ بیتگ-

ورنا ءِ یل بوگ ءِ ھال آئی ءِ نزیکیں مردماں راست کتگ-

روکپتی بلوچستان ءِ دو جتا جتائیں جاھاں دو مردم ناشناساں کشتگ اَنت-

سر بیتگیں اھوالانی رد ءَ روکپتی بلوچستان ءِ دمگ نیکشھر ءَ ناشناسیں مردماں یک ورنایے کارچ جتگ ءُ کشتگ-

وئیل نیکشھر ءِ دمگ کوچینک ءَ پیش اتکگ کہ اود ءَ ناشناساں ھبدہ سالی ئیں عبداللہ سابکزئی ء میرین کارچ جتگ ءُ کشتگ-

اھوالانی رد ءَ عبداللہ ناشناساں کارچ جتگ ءُ زدگ کتگ پد ءَ نادراہ جاہ ءَ آئی ءَ وتی ساہ داتگ اَنت-

ھمے وڑ ایرانشھر ءَ ناشناساں تیرگواری کتگ ءُ یک مردمے کُشتگ-

اھوالانی رد ءَ وئیل ایرانشھر ءِ ھند ھورآپ ءَ تاج مھمد کلینک ءِ دیم ءَ پیش اتکگ کہ اود ءَ ناشناساں علی بلوچی ء شھدوست کشتگ –

ھردوکیں وئیلانی بارو ءَ دگہ گیشیں سرپدی نہ بیتگ اَنت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ یو بی اے ءِ سرمچاراں گوستگیں بیگاہ ءِ شش نزیک ءَ کلات ءِ دمگ نرمک تخت ھند سر ءَ برجاھیں زورگریں پاکستانی پوج ءِ بُنجاھی بُنجل سر ءَ بازیں BM12 ءِ گولہ آس داتگ کہ پاکستانی پوج ءِ بُنجاھی بُنجل تہ ءَ کپتگ ءُ گوں تُرندی ءَ ترکّ اِتگ اَنت ءُ بُنجاھی بُنجل آس چستی گندگ بیتگ- چریشی ءِ آسر ءَ زورگریں پاکستانی پوج ءَ مزنیں کچے ءَ جانی ءُ مالی تاوان چست کنگ کپتگ ءُ اشی ءِ زمہ واری ءَ مئے گل منّ اِیت-

جارکش ءَ گْوشتگ کہ اُرش ءَ پد ھمے بُنجل ءِ سر ءَ شال نیمگ ءَ چہ شش ھیلی کپٹرانی آیگ ءُ نندگ ءَ پد پد ءَ شال نیمگ ءَ بال بیگ اے پدر کنت مئے سرمچارانی اُرش ءِ آسر ءَ زورگریں پوج ءَ مزنیں کچے ءَ جانی ءُ مالی تاوان چست کنگ کپتگ ءُ اے ھیلی کاپٹرانی آیگ پدر کنت کہ زورگریں پاکستانی پوج وتی مرتگیں ءُ ٹپی ئیں کارمند ھیلی کاپٹرانی سر ءَ شال ءَ برتگ اَنت-

جارکش ءَ گوشتگ کہ مئے اے وڑیں اُرش زورگپتگیں بلوچستان ءِ وتواجھی ءَ تاں برجاہ بنت-

بلوچستا لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ چار ستمبر چارشمبے ءِ بیگواہ شش کلات ءِ دمگ شاہ مردان ءَ برجاھیں زورگریں پاکستانی فرنٹیئر کانسٹیبلری ءِ چیک پوسٹ ءِ کارمند ھما وھد ءَ اسنائپر اُرش نشانگ کتگ اَنت وھدے آ وتی ڈیوٹی ءَ مٹ کنگ ءَ بیتگ اَنت، چریشی ءِ نشانگ ءَ اَتکگ ءُ ایف سی کارمند مرتگ-

جارکش ءَ گْوشتگ اُرش ءَ پد سرمچاراں پوسٹ سر ءَ راکٹ گولہ آس داتگ کہ چیک پوسٹ تہ ءَ کپتگ چریشی ءَ چہ پوج ءَ دگہ گیش جانی ءُ مالی تاوان چست کنگ کپتگ-

جارکش ءَ گْوشتگ بلوچستان ءَ پاکستانی آرمی ءُ ایف سی مزنیں کچے ءَ نوکیں مشینری گون اِنت بلے چیرجنگی ءِ شوربندیاں بلوچستان ءَ پوج سسّائی نادُراھیانی آماچ کتگ- پاکستانی پوج ءِ گور ءَ اے نادُراھیاں چہ رکک یکیں راہ بلوچستان ءَ چہ سرجمی ءَ دراھگ ءَ اِنت-

جارکش ءَ گوشتگ ِبی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی تاں اُرشاں برجاہ دارگ اِھد کنت-

داد گروگیں انسانی ھکانی باسک ءِ پرکاریں باسک ءُ بیگواھیں ڈاکٹر دین مھمد ءِ جنک سمی دین بلوچ ایف آئی اے ءَ کراچی جناح بالی پٹ ءَ داشتگ-

سمی دین ھما وھد ءَ دارگ بیتگ آ عمان ءَ روگ ءَ بیتگ-

سمی دین ءَ سوشل میڈیا پلیٹ فارم ایکس ءَ ایئرپورٹ ءِ امیگریشن آفس ءُ یک لیٹرے ءِ اکس شنگ کنان ءَ گوشتگ من ءَ مروچی مسکت، عمان ءِ روگ ءَ کراچی ائیرپورٹ ءِ امیگریشن کاؤنٹر ءَ داشتگ-

سمی دین ءَ گوشتگ من ءَ ایف آئی اے ءِ واکداں گوشتگ بلوچستان ءِ سرکار ءَ منی نام ایگزٹ کنٹرول لسٹ ءَ ھوار کتگ – من ءَ چار اداراں سیکورٹی کوٹی ءَ ودار ءَ کتگ ئے ءُ من ءَ سر ءُ پر کنگ ءِ اجازت نیست اِنت-

سمی دین ءَ گیش نبشتگ کگگ منی پاسپورٹ ءَ واتر کنگ ءَ نہ اَنت نانکہ من ءَ سبوت دیگ ءَ اَنت ءُ من ءَ چی بنیاد ءَ اجازت دیگ ءَ نہ اَنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ بی ایل اے ءِ سرمچاراں تربت،نوشکی، پنجگور ءُ بارکھان ءَ پوج، مڈی بروکیں گاڑی، دشمن ءِ کمکار ءُ رھوتی ھالرسان نشانگ کتگ اَنت-

آئی ءَ گیش اھوال دیان ءَ گوشتگ بلوچ لبریشن آرمی ءِ سرمچاراں آدینگ ءِ شپ ءَ تربت ءِ شھر ءَ پاکستانی پوج ءِ یکسد ءُ شست ءُ ھشت ونگ ءِ پوسٹ ءِ سر ءَ دزبمبے چگل داتگ کہ چریشی ءِ آسر ءَ دشمن ءِ سَے کارندہ ٹپی بیتگ اَنت-

جارکش ءَ گوشتگ یک دگہ اُرشے سَے ستمبر دوھزار ءُ بیست ءُ چار ءِ شپ ءَ بلوچ لبریشن آرمی ءِ سرمچاراں نوشکی ءَ مڈی بروکیں گاڑی نشانگ کتگ اَنت-

آئی ءَ گوشتگ سرمچاراں نوشکی ءِ ھند سرمَل ءَ مڈی بروکیں دو گاڑیانی سر ءَ اُرش کتگ ءُ یک گاڑی یے سوتکگ ءُ دومی ءِ ٹائر ترکینتگ انت-

جیئند بلوچ ءَ گوشتگ دو ھپتگ ءَ پیش مئے سرمچاراں پنجگور ءِ دمگ گچک ءَ زورگریں پوج ءِ کمکار مراد پنام ءِ ڈولی دزگیر کتگ – مراد پنام ءِ ڈولی ء بھرام جھمنند گچک ، لاٹیار گوستگیں بازین سالاں زورگریں پاکستانی پوج ءِ واستا چاریگیری ءِ کار ءَ بیتگ-

آئی ءَ گوشتگ پٹ ءُ پول ءِ وھد ءَ آئی ءَ من اتگ گچک، گوارگو،دراسکی ءَ پوج ءِ زوراکیاں پوج ءِ کمکار بیتگ – زوراکیانی وھد ءَ لس بلوچانی گِسانی ماندارگ ءُ ھمے ڈولیں جرماں ھوار بیتگ-

مراد پنام ءِ ڈولی ءَ من اتگ کہ آ سردار علی ھیدر مھمد ھسنی ءِ کمکار سرکماش گلام سرور ساجدی ءِ سروکی ءَ ڈیتھ اسکواڈ ءِ بھر بیتگ- ءُ بلوچ آجوئی لوٹوکانی سر ءَ ڈنگر بیتگ-

جارکش ءَ گوشتگ ایشی ءَ من اتگ کہ اگست دوھزار ءُ بیست ءَ پنجگور، گچک ءُ کش ءُ گوری دمگاں ھشت روچاں برجاھیں زوراکیاں پوج ءِ ھمراہ بیتگ – ھمے وھد ءَ بی ایل اے ءِ سرمچار آصف پنام ءِ پدا ء لال جان ءُ گلاب پنام ءِ وھید ء پلان شھید کنگ ءَ ھوار بیتگ-

جیئند بلوچ ءَ گوشتگ مراد پنام ءِ ڈولی ءِ سر ءَ راجی گداری ءِ سابت بوگ ءَ بلوچ راجی آمیدگس ءَ مرگ ءِ سزا داتگ ءَ گوستگیں روچ ءَ بی ایل اے ءِ سرمچاران سرجم کتگ –

جارکش ءَ گوشتگ بلوچ لبریشن آرمی ءِ سرمچاراں یک دگہ کاروائی چار ستمبر دوھزار ءُ بیست ءُ چار ءَ بارکھان ءِ ھند چھودی ءَ یوفون کمپنی ءِ ٹاور نشانگ کتگ ءُ تباہ کتگ-

گوستگیں شپ ءَ ناشناسیں مردماں روکپتی بلوچستان ءَ بندوکیں نیکراھی رھشون مولوی عبدالاھد پارسا ءُ آئی ءِ ھمراھانی کُشگ ءِ جھد ءَ آیانی سر ءَ اُرش کتگ ءُ ٹپی کتگ اَنت-

اے وئیل گوستگیں شپ ءَ پیش اتکگ کہ اود ءَ بیرجند ءِ ھند منصور آباد ءَ ناشناسیں چار گاڑی سواراں مولوی عبدالاھد پارسا ءِ راہ بستگ ءُ آیانی سر ءَ اُرش کتگ ءُ اُرش ءَ مولوی عبدالاھد گوں ھمراھاں کساسے ٹپی بیتگ ءُ آ نادراہ جاہ ءَ برگ بیتگ –

نادراہ جاہ ءَ آئی ءَ وتی شنگ کتگیں تامر بند ءَ گوشتگ ناشناسیں مردماں مئے سر ءَ لٹ ءُ کُٹی دگہ ڈوکاں اُرش کتگ ءُ چریشی ءَ من گون ھمراھاں ٹپی بیتگ اَنت-

وئیل ءَ پد مھلوک ءَ نادراہ جاہ ءِ دیم ءَ زھرشانی کتگ ءُ جرمکارانی گرگ ءِ لوٹ کتگ –

مولوی عبدالاھد پارسا امام جمعہ تالقان ھمراہ ءِ مولوی خلیلی نیاز ءُ دگہ ھمراہ ھوار بیتگ اَنت-

مولوی عبدالاھد چہ بیرجند یَ واتر آیگ ءَ بیتگ کہ چار گاڑیاں آیانی سر بستگ ءُ اُرش کتگ-

بلوچ یکجھتی کمیٹی ءِ جارکش ءَ وتی درشان ءِ تہ ءَ گوشتگ کہ ما پاکستانی بنجاھی سرکار ءِ نیمگ ءَ چہ بلوچستان ءَ ریاستی پوج ءُ ادارھاں شک ءِ بُنیاد سر ءَ کجام شھری ءَ دزگیر کنگ ءُ سے ماہ تاں بے ایف آئی آر ءَ بندیگجاہ ءَ بند کنگ واک دیگ ءِ اے پیسلہ سر ءَ تُرندیں پھازی اِنت، اے گامگیج درکانودی ھساب ءَ برجاہ بلوچ چُکچینی ء جواز پیش کنگ ءُ اشی ءِ تہ ءَ گیشی آرگ ءِ جُھد اِنت-

آئی ءَ گْوشتگ کہ راستی ایش اِنت کہ پوج پیسر ءَ اے وڑ واک گون بیتگ، مدامی ھساب ءَ بلوچ شھریاں کانودی کاروائی ءِ بید بیگواہ کنت ءُ آیاں دراجیں مدتے ءَ تاں گیشتر ماھاں ءُ سالاں تاں، بید دگہ ایف آئی آر ءَ چیریں آزارجاھاں بند کنگ ءُ اے درکانودی کار بازیں سالاں چہ بلوچستان بے گر ءُ دار ءَ برجاہ ءَ اِنت

جارکش ءَ گْوشتگ سرجمیں بلوچستان ءَ مکران ءَ بگر دانکہ کوہ سلیمان ءَ تاں، زورانسری آوار جنی ءِ یک ھمکروچی جوڑ بیتگ- ھر روچ بلوچاں زورانسری آوار جنی ءِ نشانگ کنگ ءُ اے نوکیں کانود ءِ بُن ھشت، وتگڑیں ” شکی ئیں مردم ” سرھال ءَ چہ اے زورانسری آوار جنی ءِ تہ ءَ گیش آرگ ءُ بلوچستان ءَ انسانی ھکانی تُرندیں ھلاپ ورزیانی کانودی پھاز دیگ بہ بنت-

بی وائی سی رِد ءَ بلوچستان ءَ پیسر ءَ چہ زورانسری آوار جنیانی سبب ءَ چہ گیشتر اسرمندیں ھند اِنت کہ اود ءَ ھمکروچ یکے ءَ گیش بلوچ بیگواہ کنگ بنت، وفاقی حکومت نوکتریں شوربندی ءِ مول ریاستی پوج ءَ بلوچستان ءَ زورانسری آوار جنی سر ءَ سرجمی ءَ کانود ءُ راھبندی واک دیگ اِنت-

آئی ءَ گوشتگ کہ اے شوربندی اے گپ ءَ باور کنائین اِیت کہ پوج بلوچستان ءَ ناں تھنا زُلم ءُ زوراکی ءِ واک ھست بلکیں پوج ءِ ھرچ کار کانودی رد ءَ پھاز دیگ بیت-

جارکش ءَ دیمتر ءَ گْوشتگ کہ اے ترسناکیں گامگیج ءَ بلوچستان ءَ انسانی ھکانی جاورانی درگت ءَ یک جُھلیں ترس ودی کنت- مارا ترس اِنت کہ اے وڑیں گامیگج ءَ چہ بلوچستان انسانی ھکانی ھلاپ ورزیانی بُنجاہ جوڑ بیت چریشی ءِ گمان اِنت لکانی مردم بیگواہ کنگ بنت-

آئی ءَ انسانی ھکانی میان استمانی گلاں چہ لوٹ کتگ کہ آ اے شوربندیانی ھلاپ ءَ توار چست بہ کن اَنت ءُ زوت گامگیج بزور اَنت دانکہ بلوچستان ءَ دگہ گیش زوراکی ءَ گر ءُ دار کنگ بہ بیت-