TBP Balochi

آپریشن ھیروپ

نبشتہ کار: سازین بلوچ

دی بلوچستان پوسٹ

ھیروپ ھما توپان اِنت کہ آ چاریں نیمگ ءَ چہ کَیت ءُ ھر چیز ءَ اے دیم ءُ آ دیم کنت بزانکہ تباہ کنت۔ بلوچستان ءِ تہ ءَ آجوئی لوٹوکیں گل بی ایل اے ءِ انیگیں ھمگرنچیں ءُ مزنیں اُرش ھم یک انچیں توپانے بوتگ چوشکہ وتی نام ءَ چے پدر اِنت۔ دژمن ءِ وار ءُ پشل بوتگ ھچ گمانے نہ بوتگ کہ منی گوم ءَ چے بوگ ءَ اِنت ۔ بلوچ جھدکاراں وتی ھمت ھوسلہ ، جنگی زانتکاری ، مکسد ءِ گوم ءَ مُھکمی ءُ سِتکی ءَ دژمن ءَ انچیں ٹوکے جتگ اِش کہ زورگِیر ءِ روتگ جکس اِتگ اَنت۔

چوشکہ جنگ ءِ تہ ءَ ھوسلہ ءُ مھکمی یک مستریں سلاھے لیکگَ بیت ، بلوچ ھم مرچی ھمے رھبند ءِ سر ءَ سرجم ءُ برجم اِنت بلوچ ءِ ھوسلہ ءُ وتی مکسد ءِ گوما سِتکی وتی برزتریں تبکاں سر اِنت ، مرچی بلوچ ورنا ءُ شیرزالانی مِھنت ءُ کربانی اَنت کہ جنگ وتی گرَندگاں گوں دژمن ءِ پاداں آئی ءِ کینٹانی تہ ءَ لرزینگ ءَ اِنت۔

ورنا آس ریچان ءَ رَو اَنت دژمن ءَ تاچین اَنت ءُ بُن دے اَنت ، مِڑ آن ءَ آیانی وَھد ءَ گڈُی تیر ءَ وتی نام ءَ کن انت ءُ ابدمان بنت ءُ گلزمین ءِ زبادیں وشبواں ھوار بَنت۔ جنگانی تہ ءَ سوبمَندی ھوسلہ ءُ دل نَہ چَنڈیں کِرد ءَ گوں بَستگ اَنت ءُ کرد “کار ءُ کربانی“ ءِ نام اِنت کہ مرچی بلوچ جُھدکار گوں سِتکیں دِلے ءَ کنگ ءَ انت۔

ھمے جنگی کارستانی برورد انت کہ بلوچ پہ وتی شناس ءُ پجار ، گلزمین ءُ راجی دلوَتانی بارو ءَ بیدار ءُ آگاہ اِنت مرچی پہ راجی جُنز ءَ ابید زالبول ءُ مرداں پرک ءَ بلوچ زَھگ اھوار ءُ ندر بُوان اَنت ، ءُ آجوئی ءِ جھد تُرندی ءَ دیم ءَ روان اَنت ۔

ھیروپ آپریشن ءَ بلوچ راج ءَ را ھمے باور کنائینتگ کہ بلوچ جھدکار دژمن ءَ ھمک جاگہ ءَ کہ بہ لوٹ انت جَت اِش کنت ، پرچا کہ جھدکار وتی سر ءَ کہ بِگوَُز اَنت گڑا ھمک وڑیں گرانیں کار کرت کن اَنت۔

ھیروپ آپریشن بلوچ آشوبیں زرمبشت ءِ توک ءَ اولی رَند اِنت کہ یک روچے ءَ بلوچستان ءِ 44 دَمَگاں کسان ءُ مزنیں اُرش کتگ ءُ ڈیھ ءِ مزنیں بَھرے ءِ دزمھار وتی دست ءَ کتگ ءُ دژمن ءَ را بلائیں جانی ءُ مالی تاوانے داتگ ۔ گودی ماھل بلوچ ءِ گوں سنگتاں ھمراھی کینٹ ءِ سر ءَ اُرش ءُ دو براس مھمد بکش ءُ گوس بکش سمالانی ءِ ھمرائی ءَ ٹارگٹ ءَ پِدائی بوگ یک نوکیں دروَرے۔

پنجابی ریاست ءِ زُلم ءُ زوراکی ءِ دارگ ءِ راہ ھم ھمیش اِنت کہ بلوچ وتی جنز ءِ تہ ءَ ھوار بہ بَنت ، جنز ءَ ترند ءُ مھکم بکن اَنت ، وتی زور ءُ زَھر ءَ گوں دژمن ءِ سرین ءَ پروشگ ءِ جھد ءَ راھی بہ بنت کہ آجوئی ءِ سُھب زوت بہ درکپ اِیت ۔ دژمن ءِ گوما گھگیری جنگ پہ گلامیں راجاں زندگ بوگ ءِ گڈی کوشِست اِنت ، کہ راج ءَ را ھمت ءُ تاھیر دنت ، دلبَڈی دنت کہ پادا تو دژمن ءَ چہ کم نہ اِت ، اے ڈیھ ءُ مردم تئیگ انت ، دژمن یک درآمدے تئی ڈیھ ءُ مردم ءُ دوداں چہ نابلد انت ،ترا چہ جنگ کٹَ اِت نہ کنت۔

تو وتی راج ءَ پہ مڑگ ءَ ئے ءُ راج ھم پہم اِیت کہ اے جنگ منی جنگ اِنت ، لس مھلوک ءَ را دِلبڈی Reconstructرس اِیت ءُ آ ڈَڈ بیت بزاں کہ جنگ گلامیں راج ءَ را دوبرجوڑ کنت بزاں کہ راج ءِ تہ ءَ تاکت ءِ مارشتے ودی بیت ءُ لس مھلوک ءِ ھمکاری گیڑت ھمے وڑ ءَ ھیروپ آپریشن ءَ ھم بلوچ راج ءَ را ھمے پیگام داتگ کہ شما انگت تک اگاں یکجا ءُ جھد ءِ ھمکار جوڑ بہ بئیت تاں دژمن وتی ڈیھ ءَ چے کش اِت کُت بکن اِت ، یک وشھالے زندے وت ءَ را ءُ وتی آؤکیں پدریچاں پہ رَکینت کناِت۔

بلوچ ءِ تئی مریں پُسگاں وتی ھوناں گوں دنیا ءَ را پیش داشتگ کہ بلوچ یک زندگیں ءُ شاھِیگانیں راجے ، بلوچ ءَ کدی گلُامی ءِ لانت نہ مَن اِتگ ، ھر وھد ءَ وتی راجی مَیار ءُ شان سَر داتگ ءُ پھریز اِت اَتگ۔ بلوچ پہ ڈیھ ءُ ننگ ءَ کربانی ءَ کدی دو دِل ءُ چک ءُ پد نہ بوتگ ، مرچی ھم بلوچ چو ھیروپ ءِ سردیوکیں ورناھانی دروشم ءَ ھمل جیئد ءُ شھید مھراب ھان ءِ کِشک ءَ روان اَنت ءُ بلوچ ءُ بلوچستان ءِ یک یک نشانے ءِ نگھبان انت۔ ھیروپ ءِ بَرّوبرین ءِ شھیداناں سھریں سلام سھریں سلام کلیں بلوچ شھیداناں زندگ بات بلوچ راج ءُ شالا زوت آزات بات بلوچستان۔

بلوچستان ءِ جتاجتائیں دمگ کلات، مستونگ، ھرنائی ، کیچ کش ءُ گوراں پوجی لشکر کشی برجاہ ءَ اِنت-

بلوچستان ءِ دمگ کلات، مستونگ ءُ ھرنائی ءَ ھم پاکستان پوج ءِ لشکر کشی برجاہ ءَ اِنت، اے دمگاں ھیلی کاپٹرانی روگ ءَ آیگ ءَ گندگ بیتگ اَنت-

ھالانی رِد ءَ ھرنائی ءَ پوجی ھیلی کاپٹرانی روگ آیگ برجاہ ءَ اِنت، زاوی، تنک، شرین، پھوڑ وڈھ ءُ شورو ءَ ھوار جتاجتائیں دمگ پوجی لشکر کشی ءِ نشانگ تہ ءَ اِنت-

ھمے وڑ کلات ءُ مستونگ ءِ دمگاں ناگاھو ءُ اسپلنجی ءَ ھم پوجی ھیلی کاپٹر گندگ بیتگ اَنت بلے اے درگت ءَ نوکیں ھالانی آیگ برجاہ ءَ اِنت-

ھمے وڑ کیچ ءِ دمگ ھوشاپ، تجابان ءُ گورکوپ ءَ پوجی لشکر کشی برجاہ ءَ اِنت-

دمگی اِھوالکار گوشگ اِنت کہ دمگاں مزنیں کچے ءَ پوجی کارمند پترگ ءَ گندگ بیتگ اَنت وھدے کہ جتاجتائیں ھندانی سر ءَ راہ ءُ در بستگ اَنت پٹ پول برجاہ ءَ اِنت ءُ کوھی دْرچاں ھم پوجی کارمند پترگ ءَ گندگ بیتگ اَنت-

زانگ بہ بیت گوستگیں روچ ءَ بولان ، ھرنائی، چمالنگ ءَ ھوار کیچ ءِ جتاجتائیں دمگاں پوجی لشکر کشی برجاہ ءَ اِنت-

پاکستانی واکدار ءَ انگت اے لشکر کشیانی درگت ءَ ھچ وڑیں درشان شنگ نہ کتگ بلے اے دمگاں پوج ءِ پیادگ ءُ گاڑیانی سر ءَ پشگامی ءَ گندگ بیتگ اَنت-

بلوچستان ءِ دمگ چہ کیچ ءَ پاکستانی پوج ءَ سے مردم آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی پجّار اکرم ء نصیر احمد، عبدالمالک ء راشد علی ءُ صلاح الدین ء شیر محمد ناماں چہ بیتگ اَنت-

دمگی اِھوالکار رِد ءَ اے مردم شش ستمبر ءَ پاکستانی پوج ءَ کیچ ءِ تھسیل بلیدہ ءِ دمگ چب ءَ بیڑبرتگ ءُ آوار جتگ اَنت چریشی ءَ پد ھما اِنت بیگواہ اَنت-

ھمے وڑ چہ مستونگ ءَ اھوالکار گوں برات ءَ یل بیتگ

اھوالانی رد ءَ ھپت ستمبر ءَ چہ ٹنڈلان مستونگ ءَ جند ءِ لوگ ءَ اھوالکار زھیر مینگل ءُ آئی ءِ برات مھمد عامر ءَ ھوار عدنان پوج ءَ آوار جتگ ءُ برتگ انت –

اھوالکار مینگل ءُ آئی ءِ برات مھمد عامر یل بیتگ اَنت بلے عدنان انگت ءَ یل نہ بیتگ –

زانگ بہ بیت اَچ بلوچستان ءَ یک نیمگے مردم یل بوگ ءَ اَنت ءُ دومی نیمگ ءَ دو کساسی مردم گرگ ءُ بیگواہ کنگ بوگ ءَ اَنت-

گوستگیں شپ ءَ چہ شال ءَ دو وکیل آوار جنگ ءُ بیگواہ کنگ بیتگ ات اَنت-

بلوچستان ءِ بنجاھی شھر چہ شال ءَ پاکستانی پوج ءَ دو وکیل زورانسری آوار جتگ ءُ بیگواہ کتگ اَنت-

زورانسری بیگواہ کنگ بیتگیں وکیلانی پجار ایڈووکیٹ فدا دشتی ےُ ایڈووکیٹ صلاح الدین مینگل ءِ ناماں زانگ بیتگ اَنت-

اھوالانی رد ءَ ایڈووکیٹ فدا احمد دشتی کاؤنٹر ٹیررزم ڈیپارٹمنٹ ( سی ٹی ڈی ) ءُ دگہ ناشناسیں دیم پوشیں سلاہ بنداں گوستگیں شپ ءَ شال ءِ ھند اے ون سٹی ءَ چہ جند ءِ لوگ ءَ آوار جتگ ءُ بیگواہ کتگ –

ھمے ڈول ءَ بلوچستان ءِ دمگ واشک ناگ ءَ سیادی دادورکیں ایڈووکیٹ صلاح الدین ء محمد ایوب مینگل پاکستانی پوج ءَ گوستگیں شپ ءِ ساھت دوازدہ ءِ نزیک ءَ شال ءِ ھند بروری دگ گولی مار چوک ءَ زورانسری آوار جتگ-

چم دیستگیں مردمانی رد ءَ پوج ءُ چیریں ادارھانی کارمندانی سَے ویگو گاڑیاں سوار بیتگ انت کہ آیاں صلاح الدین آوار جتگ ءُ برتگ –

وکیلانی بیگواھی ءِ پژدر ءَ چاگردی ءُ سیاسی پھناتاں پدردی درشان بیتگ اَنت-

اھوالکار کیّا بلوچ ءَ گوشتگ یک مردمے وتی زند ءِ پنچ سال ، شش سالان کانون ءَ وان ایت ءُ اے سرپد بیت اِنت سرجمیں زند ءَ کانون ءِ پھزداری ءَ کن آں – بلے لھتے مردم کہ کانون ءَ ھچ سرپد نہ بنت اِنت ابید ءِ آمیدگسی پرمان ءَ کاینت ءُ آئی ءَ بیگواہ کن اَنت پد ءَ ٹاہ دے اَنت کہ ما ڈیھ ءَ کانون دار اِنت-

بلوچستان ءِ دمگ بولان، چمالنگ، راڑہ شم ءُ کش گوراں پاکستان پوج ءِ لشکر کشی برجاہ ءَ اِنت، تیرگواریں ھیلی کاپٹراں چہ شیلنگ ءُ تراکانی ھال اِنت-

ھالانی رِد ءَ گوستگیں شپ ءَ چہ چمالنگ، راڑہ شم ءُ بغاؤ ءِ دمگاں پاکستانی پوج ءِ مزنیں کچے ءَ پیادگ ءُ گاڑی پشگامی کنگ ءَ اَنت وھدے کہ اے میان ءَ ھیلی کاپٹرانی بُرز بال ھم برجاہ ءَ اِنت-

دمگی اِھوالکار ءَ ٹی بی پی ءَ گْوشتگ کہ پوجی کارمندانی یک مزنیں کچے چمالنگ ءَ سر بیتگ اَنت وھدے کہ ھیلی کاپٹر یشکل ءَ بُرز بالی ءَ برجاہ-

دومی نیمگ ءَ راڑہ شم ءُ بغاؤ ءِ دمگاں پوج پیشگامی کنگ ءَ اَنت-

اِھوالکار ءَ گْوشتگ کہ کوھلو ءَ پوجی ساز ءُ ساماناں ھوار کارمنداں مچ بیگ ءِ ھال اِنت بلے انگت ھیلی کاپٹرانی بُرز بال ءَ گندگ نہ بیتگ اَنت-

ھمے وڑ بولان ءِ جتاجتائیں دمگ کھوسٹ، شاھرگ ، کمان، بزدار ، ترکڑی، جمبرو ، پُڑ، چکی واڑ ءُ کش گور ءِ دمگ لشکر کشی ءِ تہ ءَ اَنت-

دمگی اِھوالکار ءَ گوشتگ کہ گوستگیں روچ ءَ دمگی مردمانی لوگانی سر ءَ ھیلی کاپٹراں شیلنگ کتگ بلے جانی تاوان ھال نیست-

زانگ بہ بیت بیست پنچ – بیست شش اگست ءَ بلوچ لبریشن آرمی ءَ آپریشن ھیروف ءِ یکجاھی اُرشاں سرجمیں بلوچستان ءَ پاکستانی پوج کارمند ، لیویز ءُ پولیس، تھانہ ءُ دگہ پوجی ماڑی ءُ شوربندیانی سر ءَ اُرش کتگ اَت-

آپریشن ھیروف ءِ مستریں اُرش بیلہ ءَ بی ایل اے مجید برگیڈ ءَ کتگ کہ اود ءَ مجید برگیڈ ءِ ھپت فدائین ءَ پاکستان پوج ءِ بُنجاھی ھیڈکوارٹر اُرش ءَ نشانگ کتگ وھدے کہ جنگولاں بیست کلاکاں تاں ھیڈکوارٹر دستیگ کنگ ءَ سوبمند بیتگ اَنت-

بیلہ اُرش ءَ مجید برگیڈ ءِ زالبول فدائی ماھل بلوچ پنّام ءِ ذلان کرد ءَ شورو ءَ چہ پُریں گاڑی ڈک داتگ اُرش بندات کتگ – ماھل بلوچ سیمی بلوچ زالبولیں فدائی اِنت کہ اے اُرش ئِے کتگ-

بی ایل اے ءَ اے اُرش ءَ پاکستانی پوج، چیریں ادارھاں ھوار دگہ سیکورٹی پوج ءِ یک سد سی کارمندانی کوش زمہ واری منّ اِتگ اَت-

عدل میڈیا ءِ رد ءَ روکپتی بلوچستان ءَ سلاہ بندیں گل جیش العدل ءَ ایرانی لشکر ءِ سَے کارمندانی کوش ءِ زمہ واری من اتگ انت –

گیشیں اھوالاں گوشگ بیتگ گوستگیں روچاں روکپتی بلوچستان ءِ دمگ میرجاوگ ءَ ناشناسیں سلاہ بندین مردماں تیرگواری کتگ ءُ چریشی ءَ ایرانی لشکر فراجا کارمندانی بیرانی ءَ ھوار یک شھری ءِ زدگ بیتگ ات-

عدل میڈیا ءِ رد ءَ ایرانی پورس ’ فراجا‘ کارمندانی سر ءَ ھما وھد ءَ ناشناساں تیرگواری کتگ کہ آ شھر ءَ گشت ءَ بیتگ انت –

اھوالانی رد ءَ چرے تیرگواری ءَ ایرانی لشکر ءِ کارمند امیر ابراھیم زادہ سرباز وظیفہ ، پارسا سوزنی ءُ امین ناروئی ءِ ناماں زانگ بیتگ انت ءُ یک شھری یے زدگ بیتگ-

جیش العدل ءَ وتی ٹیلی گرام چینک ءَ شنگ کتگیں درشان ءَ اُرش ءِ زمہ واری من اتگ ءُ گوشتگ اے پورس لس مھلوک ءِ کُشگ ءُ جنگ ءَ ھوار بیتگ اَنت ءُ چریشی ءِ پژدر ءَ آیانی سر ءَ اُرش کتگ ءُ کشتگ اَنت-

بولان ءِ دمگ ءَ تُرند رؤکیں گاڑی کنڈ ءَ کپگ ءَ چہ ھپت مردم ٹپی بیتگ اَنت-

گیشیں ھالانی رِد ءَ بولان ءِ دمگ تُرندیں ھوارانی سبب ءَ دگانی پروشت ءُ پروش ءِ سبب ءَ تُرند رؤکیں گاڑی ڈرائیور ءَ چہ لکشتگ کنڈ ءَ کپتگ چریشی ءِ آسر ءَ گاڑی ءَ سوار ھپت مردم ٹپی بیتگ اَنت-

ٹپی نادُراھجاہ ءَ برتگ اَنت، آیانی تہ ءَ یکے ءِ جاور نگیگ اِنت-

ھمے وڑ کیچ ءِ بُنجاھی شھر تربت ءَ تُرند رؤکیں گاڑی ءَ یک مردمے لپاشتگ، پولیس رِد ءَ صلالہ بازار تربت ءَ تُرند رؤکیں پک اپ گاڑی ءَ یک دری مردمے فرمان ء فیصل جھمنند پشاور لپاشتگ بیران بیتگ-

وئیل ءَ پد گاڑی درائیور ھما دمان ءَ تچگ ءَ سوبمند بیتگ-

اوستہ محمد ءَ دگہ یک جنکے پت دست ءَ ننگ نام سر ءَ کُشگ بیتگ، میاربار کوش ءَ پد تتکگ-

گیشیں ھالانی رِد ءَ جھل مگسی ءِ دمگ لیویز تھانہ بارھجہ ءَ علی شیر مگسی ءَ وتی جنک فرزانہ ءَ یک مردمے حسین بخش مگسی ءِ گوم ءَ بدکاری ءِ بھتام ءَ تیرجتگ ءُ کُشتگ ءُ تتکگ اَنت-

ھالانی رِد ءَ لیویز فورس ھما دمان ءَ سر بیتگ لاش دستیگ کتگ اَنت نادُراھجاہ ءَ برتگ، وھدے کہ لاش چار ٹپاس ءَ پد کھول دست داتگ کہ لاش انچش لوگ ءَ سر بیتگ واو زاری بندات بیتگ، بلے دزگیری گامگیج زورگ انگت نہ بیتگ-

بولان ءَ گوستگیں روچ ءَ چہ پوجی لشکر کشی برجاہ، ھیلی کاپٹراں شیلنگ، کلبر ءَ چاریگی بالگردانی یکشلہ بُرز بال برجاہ-

بلوچستان ءِ دمگ بولان ءَ گوستگیں روچ ءَ چہ پاکستانی پوج ءِ مزنیں کچے ءَ لشکر کشی ءَ دلگوش-

ھالانی رِد ءَ جمبرو، بُڑ، چکی واڑ ءُ کش گور ءِ دمگاں گوستگیں روچ ءَ لشکر کشی بندات کتگ کہ اود ءَ بازیں ھندانی سر ءَ ھیلی کاپٹراں ءَ شیلنگ کتگ-

اِھوالکار رِد ءَ گوستگیں شپ ءَ ھیلی کاپٹرانی بُرز بال برجاہ بیتگ، وھدے کہ مروچی ھیلی کاپٹرانی بُرز بال ءَ گندگ بیتگ اَنت-

دمگی اِھوالکار گوشگ اِنت کہ گوستگیں روچ ءَ دمگی مردمانی لوگانی سر ءَ تیرگواری کنوکیں ھیلی کاپٹراں شیلنگ کتگ بلے جانی تاوان ھال نیست-

ھمے وڑ کیچ ءِ دمگ تمپ، کلبر ءَ گوستگیں شپ ءَ یکشل ءَ چاریگری بالگردانی بُرز بال بیتگ-

واکدار ءَ اے درگت ءَ ھچ وڑیں درشان شنگ نہ کتگ سرجمیں بلوچستان ءَ پوجی سُر پُرانی تہ ءَ گیشی گندگ اَتکگ-

دو روچ ءَ ساری بولان ءِ دمگ مچھ ءُ آئی ءِ ھمگرنچیں دمگاں ھیلی کاپٹرانی بُرز بالی ءَ ھوار مستونگ ءِ دمگ اسپلنجی ءَ پوج ءِ سُر پُرانی تہ ءَ گندگ اَتکگ-

اسلپنجی ءَ لشکر کشی ءَ دلگوش پوج ءِ کارمند یک بمب اُرشے ءَ نشانگ کتگ اَت آئی ءِ زمہ واری بلوچ لبریشن آرمی ءَ زرتگ اَت-

لھتے کسہ گوں ماتی ءَ

نبشتہ کار: نورین بلوچ

دی بلوچستان پوسٹ

ھمُک آدینگ ءَ روچ ءِ سُھب ءِ سر ءَ پَرپٹے ءِ آواز بوت ھمے ساھت ءَ من چم چِست کت ءُ چار اِت۔ آ اِنت منی مات پیداک اِنت من زوت زوت ءَ دیم ءَ شُت آں وتی ماتُل ءَ چہ پرپٹ ءِ سر ءَ ایر کُت ءُ دست گپت اَنت ءُ لوگ ءِ تہ ءَ بورت۔

ماتی تو جوڑ ئے ءُ تئی شوکیں چُک ءُ نماسگ جوڑ ءُ وش اَنت؟ ماتی ءَ پَسو دات گُشت دُرست جوڑ ءُ وش اَنت۔ ماتی ءَ من ءَ جُست کُت، منی چُک باریں ھالاں بہ دے منی راج دوستانی؟ بانک ماہ رنگ ءِ ءُ سمی دین ءِ نوکیں چے ھال اِنت؟ من گُشت ماتی جان سَمی دین ءُ ماہ رنگ بلوچ وتی راج ءِ در نوں وتی کوپگاں بستگ ءُ ھمُک روچ بلوچ راج ءِ توار جوڑ بوتگ۔

گڑا ماتی ھمد ءَ کند اِیت ءُ گُشت اِیت کہ بانک ماہ رنگ ءِ گپ ءُ تَواراں چہ گْوانکو ءِ تہ ءَ بیار ئِے من ئِے گوش ئِے دار آں۔ من ماتی ءِ اے ارمان ءُ لوٹ سرجم کت ءُ بانک ماہ رنگ ءِ گپ تواربند آورت اَنت ماتی ءَ درستیں گپ گوشداشت اَنت ءُ گپانی گوشدارگ ءَ پد ماتی ءِ چمّانی ارس اولمب بوت اَنت گُش اِیت کہ منی بانک اللہ تئی مدت ءُ کمک بات کہ تو وتی بلوچ راج زرتگ ءُ ھاموشیں دراں توار جوڑ بوت ئے پد ءَ من ءَ گشت ئِے کہ من ءَ بانک مھلب نسیر ءِ گوم ءَ گپ پرمائین کہ من ءَ مھلب ءِ پِربند سک وش بنت گڑا من گُشت ماتی تو مھلب ءِ گوم ءَ دیم پہ دیم گپ بکن گڑا ماتی ءُ مھلب گپ ءُ تران ءَ کپت اَنت وت ءُ مھلب مسکرا ءُ کندگ وتی دیوان ھمے رنگ ءَ سر جم کت۔

منی ماتی ءَ من ءَ توار کت کہ بیا منی ذکر ءِ وھد اِنت منی پوشاک، منی اسپیتیں گُشان ءَ بدے من ماتی ءَ را پوشاک دات اَنت اسپیت گُشان سر ءَ دات تزَبی دست ءَ دات ءُ وش بو ماتی ءَ را جت ماتی شُت ذکر ءَ۔ من چہ زکر ءَ واتر بوت آں، ورگ وارت، ھمے ساھت ءَ وتی گُوھار ءُ براتانی ترانگ ءَ کپت آں وتی گوھار ماتی ماہ بی بی ءَ کسانی ءُ یک جاھے ءَ کِسہ کت انت ءُ چمّانی ارس پیدا وار بوت انت۔

من گُشت کہ ماتی منی مہ ریچ گوھار ءِ ارس وتی تو انوں ڈاکٹر ماہ رنگ اے دِلیرے، گپ گوش داشت انت۔ ماتی وتی لُنٹانی سر ءَ بچکندگ ھیر کت، ماتی پد ءَ واتر وتی گِس ءَ شُت ،ھمُک شپ وتی آواز دیم دات منی ھال گِپت مئے وھد ھمے رنگ ءَ روان بوت ھمُک آواز ءِ تہ ءَ وتی درسی نماسگاں ھال دات اَنت من ءَ، من کند اِت، گڑا من مات ھمد ءَ سھب ءَ نشتگ ات مئے دیم ءَ لھتے کتاب ھِیر ات من آ امداد کتات چارگ انت منی مات گُدے دوچگ ءَ اَت من ءُ امداد ،مبارک کازی کتاب سر ءَ بیس کنگ ءَ اِت ایں۔

گڑا ھمے ساھت بولان گاڑی یے اتک مئے لوگ ءِ دپ ءَ اوشتات منی مات ڈن ءَ شُت دیم ءَ من گشت کہ ماتی اے ساھت ءَ 1:30 ءَ من دل ءَ جیڑ اِت کہ مروچی آدینگ نہ انت ماتی اے ساھت اتک وھدے کہ من ماتی دیست من ءَ وتی رنگ ء موڑ دوست نہ بوت انت اے رندی منی ماتی ءَ ، ماتی سک بیمار اَت گڑا نادْراجاہ ءَ بُرت ما ڈاکٹر گُشت ڈیبگیوائروس انت ، من وت ءَ گوں وت گپ کت کہ منی ماتی باریں چون بیت انت۔

شپ کہ بوت ماتی ءَ چم پچ بوت اَنت من ءَ توار ئِے کت کہ آ نوریناں آ نوریناں من گُشت جی ماتی ! بیا مروچی بانک ماھ رنگ ، بانک کریمہ گپ ءَ گوش دار انت انچوں وپسگاں بیزار انت گڑا من گل بوت آں زوت زوت ءَ وتی گوانکو آرت ماتی ءَ دات بانک کریمہ ءُ بانک ماہ رنگ گپ گوش داشت آنت۔ ءُ موبائل دات من آں۔

ھمے ساھت ءَ ماتی ءَ ھال سک ھراب بوت اے شپ گون ماتی ءَ ھمے رنگ گوست سھب کہ بوت ماتی رہ کراچی دیم دات ھموک ساھت من پون کت ماتی ھال جُست کُت ماتی لَٹ ءُ سواس منی کِر ءَ پشت کپت انت اے ھاس من چہ وت ءَ ھلاس بوت آں ماتی دیم زاھر اَت گڑا ھال درُستاں چہ ساری ءَ من ءَ سر بوت کہ نورو ماتی مارا ھیال دات پد ءَ ھالے اتک کہ تو ناں کراچی ءَ سر بوت ئے ءُ نیکہ کیچ ءَ اوں واتر نہ بوت ئے۔

آدینگ ءِ روچ ءَ من ھمے مار اِت کہ اے باریں مئے چارگ ءَ نیا اتک اَنت اے باریں مئے وش اتک ءَ اے آدینگ ءِ روچ ءَ من وت اتکاں تئی گِس ءَ بلے تو واب اِت ئے بازیں مُچے ئے ھم ھست ات اے رندی ھچ نہ گُشت گڑا اے رَندی منی چم ارسیگ انت اے رند ءَ درُست بدل بوتگ انت اے روچ آدینگ اَت۔

اے رند ءَ من وت تئی چارگ ءَ اتک آں تئی دیدار کت اے رَند ءَ تو چُک ءَ مئے لوگ نیارت سائیکل ءِ سر ءَ اے رند ءَ ترا گوانزگ کتُ نوں نماسگ ءَ بڈا کت پیدل بُرت اے دیگہ جاھے ءَ اے رندی من تئی ائید ءَ گُد نہ دوتکگ انت اے رندی اسپیتیں بانوری گُد دوتک انت۔

اے رندی تو بلوچستان ءِ نازینک گُوش نہ داشت انت اے رندی تو اسیپت ءُ چوگان گُوش داشت انت بس تئی بانوری ءَ میسگ ءُ بو شر کنگ ءَ انت ترا اے پوشاک گوں سینگار انت مِسک ءِ بو گوں ترا پلگار انت ءُ گلزمین ءَ میار کتُ پد ءَ مئے ھنکین چورو بوت ندر پہ ماتی جان بی بی ءَ ۔