یادانک
نبشتہ کار : سمیر بلوچ
دی بلوچستان پوسٹ
لھتیں یاداں کپگ ءَ رند من سما کن آں کہ من ایوک ءَ یادانک ءِ آتراپ ءَ زندگیں مُردمانی لڑ ءَ زند گوازینگ ءَ اَنت، اھو چوناھا راستی اِیر برگی اِنت پرچاکہ من ءَ ترانگانی گرنچے گون اِنت پد ءَ اے گرنچ سک کوھن اِنت۔ برے برے منی دل ھُل کنت سوچ مان دار گیرانی پتاراں، سھتے رند جیڑگانی زِر ءِ جھلانکیاں اوژناگ کنان پدا مار اِت کہ اِنّا دل باز پرمائیت چو کنگی نہ اِنت منی مال ءُ متاہ پشت کپتگیں یات ءُ زھیر اَنت ءُ پد ءَ منی باتنی دردانی دراہ کنگ ءِ تہ ءَ ایشاں وڑ وڑیں درد وارتگ اے ایوک ءَ ترانگ ءُ یاد نہ اَنت اے ھما مُجّتی یادانک اَنت کہ مرگ ءَ رند گُوں من ءَ کَل بنت۔
ھردیں کہ ابیتکی مُلوری ءُ بے وانکی ءِ چاڑ آمد بیت گڑا مردم ایوک ءُ تھنا بیت بلے من چُش نہ آں پرچاکہ منی زند ءِ تہ ءَ یادانک ءِ اجبیں چاڑے کہ گُش ئے زان آں رگ ءُ بنداں اِیر کپان اِنت اگاں یاد بے بلاہ لڈ ءُ بار بہ کناں بزاں آ روچ ءَ منی کبر ءَ کوچ اِت کہ نوں مردمانی نیام ءَ ایوک ءَ بے گویاکیں دلوتے ءَ جاہ کُتگ۔ چوناھا یادانک گیبی آمدے ایشی ءِ سینگارگ ءُ پلگارگ من سرپد باں المّی اِنت چیا کہ چُشیں گیبی آمد ھرکسی بھت ءُ تھالہ نہ کپ اِیت۔
کوہ ءُ کئورانی ترانگ بہ بنت یا رپتگیں بیل ءُ ھمبلانی جگر بُریں زھیر اے دراھیں یادانک ءِ زیبائی ءِ اولی بُنھشت اَنت ابید ایشاں یادانک ءِ کالب ھورک ءُ ھالیگ اِنت۔ من لھتیں سھتانی کارست گُوں ترانگ ءُ تھتالاں سمبھینتگ اَنت ھمے کارستانی ھواری ءَ کوھانی برزی ءُ سر ٹُلاں بہ گِر داں کئورانی کنڈ ءُ بیٹاں درا اے تیوگیں ابرمی زیبائی کہ منی دیم ءَ گوستگ اَنت اے گیشتر من ھما یادانی گرنچاں گُوں ڈک داتگ اَنت۔ اناگہ ءَ لھتیں گرنچ وت ءَ وت بوج اَنت ءُ پر ریچ اَنت ھمے رِد ءَ مھر ءُ بے مھری ءِ سوگاتانی درپشناکی درپش دنت۔ دگہ انچیں تاھیر بکشیں دمان اَنت اے چو ارزانی مردم ءِ سرا ھچبر اِیر نہ کپ اَنت بلے انوں وتی مولمانی پاساں اتکگ ءُ ساڑی اَنت من داں دیراں ھمے اتکگیں ءُ ھما گوستگیں گیرانی تھلیاں تنگان ءُ مولمہ باں۔
یادانک ءِ بزانت ھرکسی یادانی گرنچ بوت کن اَنت اے المّ نہ اِنت کہ ھر مردم اے نبشتگیں لبزی بزانت ءَ گُوں تپاک بہ کنت بلے من ھمے بزانت ءِ پاسداری کنان نبشتہ کنگ ءِ جھد ءَ اَنت۔ اگاں ما بہ چار اِیں یادانک ءَ گُوں سیادی کنوکیں دگہ بازیں بزانت گیشینگ بیت اے وھد ءَ یادانک ءِ کسانیں ٹُکرے شُمئے دیدانی دیمپان اِنت۔ دیمتر ءَ جنزگ ءِ توکل ھست کہ یادانک گیشتر گرنچ بوجان بہ کنت۔ چوناھا یادانک ءِ سپر سک دراج اِنت من جھد کن آں کہ اے دراج کشیں سپر ءَ دومی بھر ءَ شریں وڑے بہ گیشن آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
