ھب : سلاہ بندیں مردماں میتگ سر ءَ اُرش کتگ، دو ٹپی ، کھول ءِ زھرشانی

گیشیں ھالانی رِد ءَ ھب شھر ءِ نزیک ءَ بھوانی ءِ بازیں میتگانی مردم کہ آیانی تہ ءَ زالبول ءُ زھگ ھم ھوار بیتگ اَنت کہ دگانی سر ءَ درتکگ اَنت ءُ شاہ پمپ ءِ ھند سر ءَ شال، کراچی ءِ بُنجاھی شھدگ بند کتگ زھرشانی کتگ-

زھرشانی کنوکاں گوشتگ کہ پولیس ءِ سروکی ءَ یک سلاہ بندیں ٹولی یے گوستگیں باز ماھاں چہ محمد گوٹھ ءَ ھوار دگہ ھمگرنچیں گوٹھاں ڈگاراں کہ اود ءَ دھکاں چہ نندوکیں دمگی ٹکی گوٹھ میتگ سر ءَ ھمگرنچ اَنت آ ھالیگ کنائینگ ءُ آیانی سر ءَ دستیگ کنگ جھد ءَ اَنت ءُ ڈگارانی سر ءَ دستیگ کنگ ءُ آیاں تُرسینگ ءَ اَنت-

آیاں گْوشتگ کہ دمگ ءَ سلاہ بندیں ٹولی ءِ یک تُرسے جوڑ بیتگ ءُ چہ تُرس ءَ وتی لوگاں کپتگیں ما تُرس ءَ وتی چکاں وانگجاہ ءَ راھدات نہ کن ایں-

زھدشانی کنوکانی رِد ءَ گوستگیں روچ ءَ سلاہ بندیں ٹولی ءَ آیانی گوٹھ سر ءَ اُرش کتگ ءُ سلاہ لٹی ئیں مردماں آیانی سر ءَ لٹ کُٹ کتگ ءُ تیرگواری کتگ چریشی ءِ آسر ءَ دو مردم ٹپی بیتگ اَنت-

زھرشانی کنوکانی گْوشگ اِنت کہ ڈرگار ءِ دستیگ کنوکیں سلاہ بندیں ٹولی ءَ دمگی پولیس ءِ سروکی گون اِنت پولیس ءَ ھروچ شکایت کنگ ءَ ابید ھچ وڑیں گامگیج زیرگ نہ بیگ ءَ اِنت-

شھدگ سر ءَ زھرشانی ءِ سبب ءَ گاڑیانی دراجیں لین لگ اِتگ ءُ شھدگ سر ءَ سپر کنوک دلسیاھی ءُ سسّائی ازیت دیمپان اَنت-

زھرشانی ءَ چہ پولیس ءُ تھیسلدار ھب ءَ گپ دیوان ءِ جُھد کتگ گُڑا آیاں نہ منّ اِتگ ءُ پد اسسٹنٹ کمشنر ھب ءَ ھما دمان ءَ سر بیتگ زھرشانی کنوکاں گوں گپ دیوان کتگ-

اے سی ھب امیر حمزہ ءَ گْوشتگ کہ آئی ءَ زھرشانی کنوکاں آیانی ھکانی پھازگ ءُ اُرش ءَ ھمگرنچیں مردمانی ھلاپ ءَ کاروائی ءِ دلجمی داتگ بلے اے جاہ چار ءُ ٹپاس ءُ اسرکپتگین ءَ انساپ دیگ بنت-

اے زی ھب ءِ گپ دیوان ءُ انساپ دیگ ءِ دلجمی ءَ پد زھرشانی کنوکاں زھرشانی ھلاس کتگ-