کمانچر بلوچستان ءِ کمان اَت
نبشتہ کار : سمیح اللّہ رھیم
دی بلوچستان پوسٹ
من کمانچر بِھ نہ دیستگ بس انسٹاگرام ءَ کدی کدی ھال ءُ اھوالے بوتگ ءُ بس زانتَگ کہ یک مزنیں ءُ جوانیں اکسکارے ءُ یک شوکیں انسانے ھم، من ءَ یات بیت سال 2019 اَت من ءَ کمانچر ءِ گندگ سک دل ءَ ات بلے نزانت گندانے یا کہ نا بلے یک روچی من ءُ منی سنگتے پہ وتی کارانی نیت ءَ بازار ءَ شُتیں گُڑا امد ءَ منی ٹیلپُون ءَ فونے اتک چاراں سنگتے ءِ فون اِنت من فون چِست کُت ھبر بیت سنگت ءَ گُشت بیا کمانچر اتکگ ءُ ترا لوٹَگ ءَ اِنت من گَل بُتاں کہ مرچی من بلوچستان ءِ مزن ھستی ءَ گنداں گُڑا ھمد ءَ ما زوتّ ءَ وتئی کار گیشینتاں دیم پہ سنگت ءِ لوگ ءِ نیمگ ءَ روان بیتیں گُڑا ما کہ سر بوت ایں گوں سنگت ءَ ٹیلپُون کُت کہ بیا ڈن ءَ ما اَتکگیں دَر ءِ دپ ءَ اِیں، سنگت اَتک سلام دُروت بوت ایں پد ءَ سنگت ءَ گُشت بریں رویں مَجلِس ءَ کمانچر تئی ودار ءَ کنگ ءَ اِنت ترا گندگ لوٹ ایت من بس وتی دل ءَ ھمے جیڑگ ءَ ات اَنت کہ کمانچر باریں چونیں مردمے ءُ چونیں تبے انسانے بوت ایں پرچا کہ اِیش کُتگیں گپاں ءُ چم ءِ دیستَگیناں زمین ءُ آزمان ءِ پَرک بیت، ھیر ما شُتیں لوگ ءِ توک ءَ ءُ مَجلِس ءَ سر بوت ایں سلام ءُ دُروت بیتیں ءُ نشتیں ءُ ھبر بندات بیت ھمد ءَ پد ءَ من جُست کُت کہ کمانچر ءَ من ءَ پیشدارے شُمئے تہ ءَ کمانچر کُجام اِنت؟ کمانچر ءَ ھمد ءَ مزاک ءِ توک ءَ دگہ سنگتی ءِ نیمگ ءَ وتی دَست دِراج کُت ءُ گُشت اِیش اِنت، ءُ پد ءَ وت کندگ ءَ لگیت گُڑا ھمے دمان ءَ سنگت ءَ گُشت من نیا کمانچر ھمشے ءِ جِند اِنت مَسکرا کنگ ءَ اِنت! منی کِرا گپ ھچ نیست اَت من بس گُشت دگہ تو وش جوڑے تئی مھلوک وشاں دمگ وش بیتگ؟ گُڑا دَراینتے کہ کُل وشاں من ھم یک ئے سر ءَ برابراں، من گُشت ھُدا وش بکنت ءُ وشّ بات ئے! گُڑا منی ھمراہ ءَ جُست کُت زوھیر شُما نیارتا گوں؟ کمانچر ءَ پسّہ دات کہ نا یار زوھیر ءَ کمے کار بیتگ ءُ دگہ نیمگے شُتگ ھیاگ نبیتگے! منی جندا کمانچر ءِ یک ھبری ءِ سرا بِے باور نبیتگ کہ کمانچر یک کوانیں ماڈلیں ٹیلپُونے ءِ سرا چوں چوشیں جوانیں اکسکاری کُت کنت مُدام وت ھم ھمے گپ انسٹاگرام ءَ لایب ءَ جتگے کہ من یک کوھنیں نوکیا ءِ سرا اکس کاری کناں بلے من ءَ بِھ باور نبیتگ!-
من مُدام مسیج کُتگ ءُ جُست کُتگ من ءَ تئی ٹیلپُون ءَ چی شرتریں ٹیلپُونے گوں ءُ دی ایس لِر کیمرھے ھم بلے منی گون ءَ تئی وَڑ ءَ اکسکاری نہ بیت، من ءَ مزاک ءِ سر ءَ گُشتے تو گُڑا کیمرہ ءِ وَڑا نزان ئے کیمرہ ءَ بِدے من ءَ! من گُشت کُربان اَڑے تئیگیں کُجا دیم ایش بدیاں؟ اَڑے پُل من مزاک کناں تئی اکس شوک اَنت جوان اَنت بس پوٹوگراپی کنان بکن وتی دمگ ءِ ءُ دَمگاں پیشدران بکن ھرکس ءَ –
کمانچر ءَ من ءَ مُدام دلبڈی دات من مرچی ھمے گپاں یات کناں ءُ ھمے سرپد باں کہ کمانچر منی اُستاد بیتگ! ءُ پد ءَ ما کایں دیوان ءَ، من کمانچر جُست کُت کہ تئی ھمے ٹیلپُون کُجیں کہ تو ھمیشی ءِ سر ءَ اکسکاری کن ئے؟ پد ءَ کمانچر ءَ دمان ءَ پسّہ دات کہ من نیارتگ گوں! من ھم ھچ نہ گُشت! منی زند ءِ کار باز اِت انت گُڑا ما سنگت اِجازت کُتاں کہ مارا اِجازت بِدے اِت کہ مارا کار اَست شُما باندا بیا اِت منی کیرا سُبارگ ءَ، گُڑا کمانچر ءَ گُشت کہ ما باندا روگیں جاھے ءَ باندا نہ بیت ءُ پُنشی ما رویں کیچ ءَ پد ءَ زندگی بیت الم کایں، من گُشت ھیر اگاں نہ شُتے الم بیا اِت، گُشتے ھیر بیت اِنت اِنشااللّہ گُڑا ما اجازت کُتاں ءُ درکپتیں! بس کدے کدے ھال ءُ اھوال بوت وھد گوازان بُوت یک روچے کمانچر ءَ من ءَ ھال کُت کہ کُجاے؟ من گُشت گْوادر ءَ! پد ءَ گُشتے تو کارے بکن، من گُشت بگُش، تو بُرو اَنیتا جلیل ءِ کیرا لھتیں کتاباں دست بگرے شاہین ترانسپورت ءَ بدے ئے تُربَت ءَ گون کن ئے گوں، من انیتا گُشتگ کہ سنگتے کیت بدے ئے ءِ من گُشت شر اِنت! چِد ءُ پیسر نہ من انیتا جلیل دیستگ ناکہ انیتا جلیل ءِ لوگ، ھیر من سنگتے مسیج کُت جُست کُت کہ تو انیتا جلیل ءِ لوگ دیستگاں؟ گُشت ھو من گُشت منی ھمراہ بے من ءَ کارے ھست لھتیں کتاباں ھمود ءَ دست گرگی اَنت ءُ تربت ءَ دیم دیگی اَنت گُشتے شریں! بلے کدی؟ من گُشت مرچی بیگاہ ءَ! گُشتی شریں گُڑا بیگاہ بوت ما شُتیں انیتا جلیل ءِ لوگا کتاب دست گپتاں شُتیں ترانسپورت ءَ داتاں ءُ من کمانچر ھال کُت کہ من کتاب گون کُتگاں کتابانی اکس تئی وٹسپ ءَ دیم داتَگ گُشتے منتوار! وھد گوازان بوت ھال ءُ ھوال بیان اَت بلے پد ءَ ناں من کمانچر دیست ءُ ناکہ کمانچر ءَ من ءَ بس کدی کدی ھال ءُ ایوالی بُوت انو لھتیں روچ ساری یکے ءَ اسٹوری ءَ اِیر کُتگ اَت کمانچر مریز اِنت من دل ءَ گُشت اے بزگ مُدام مریز اِنت ھُدا ایشی ءَ وش بکنت!-
گُڑا لھتیں روچ گُوست بلے تو وشّ نہ بُت ئے 16 اپریل ءَ سنگتی ءَ وٹسپ ءَ استوری ءَ جتگ اَت کہ، آہ کمانچر ھُدا ترا جنت نسیب بکنت۔
من نہ سنگت مسیج کُت نہ کہ دیگہ کسے ءَ گوں ھال کُت شُتاں انسٹگرام ءَ چاراں جمال بلوچ ءَ ھم اکس جتگ گُڑا نی من باور کُت کہ تو نیستے! بلے کمانچر تو گپے زانے ترا چو اشتاپ ءَ چو زُوت رواگی نہ اَت ترا اَنگت گوں وتی کیمرہ ءَ باز اکسکاری کنگی اَت ءُ ترا باز پند بُرگی اَت، بلے ھُدا تئی جاہ ءَ مُدام وش بکنات رُخصت آف آوارن کمانچر۔
” سلام دیدگاں تئی “
( کمانچر بلوچ ءِ نام ءَ )
ندارگانی لاڈُکی ءِ
لاڈکیں تو سنگت ءِ
زمین ءِ رنگ ءَ زندگ ءِ
شُلُنچ ءِ اکس بے مثال
نگاہ ءِ تُنّی ایں زر ءَ
ھمے کہ رنگی ایں تئ جھان ءَ
ایر باں کدم
تو بےکساس دوست بئے
دل ءُ ھیالاں پچگرءِ
بلوچ ءِ زندمانی ءَ
عزابیانی ءَ پولگ ءَ
اے کِسّہ ءِ پہازگ ءَ
سلام دیدگاں تئی
سلام دیدگاں تئ
” مولُم چراگ”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
