TBP Balochi

بلوچستان ءِ دمگ سبی ءَ ھال اِنت کہ پاکستانی پوج ءَ یک مردمے دزگیر کنگ ءَ پد بیگواہ کتگ-

کھول رِد ءَ محمد یعقوب ء محمد صدیق ءُ علی گل ء سیف اللہ پاکستانی پوج ءَ چہ رند علی بائی پاس ءَ ھمے سال جون ءَ بیگواہ کتگ اَت-

کھول رِد ءَ علی گل ھمے روچ ءَ یل کتگ وھدے کہ یعقوب لھڑی انگت بیگواہ ءَ اِنت-

کھول ءَ تُرس درشان کتگ گْوشتگ کہ یعقوب لھڑی بلوچ بیگ ءِ پشدر دراجیں مدتے ءَ بیگواہ کنگ مہ بیت آیاں پہ سلامتی یل کنائینگ لوٹ کتگ-

ھُزدار میڑ ءَ جنگ بوتگیں مردمانی سیادی چہ مزھبی گل ءَ اِنت-

ھُزدار ءَ چہ ھالانی رِد ءَ کاؤنٹر ٹیررزم ڈیپارنمنٹ ” سی ٹی ڈی ” یک کاروائی ءِ میان ءَ چار شکی ئیں مردمانی جنگ ٹاہ داتگ-

سی ٹی ڈی واکدار رِد ءَ پشمبے ءَ ھُزدار ءَ سی ٹی ڈی ءِ گوم ءَ تیرگواری ءَ چہ چار شکی ئیں مردم جنگ بیتگ لاش دسیتگ کتگ ءُ ھُزدار سول نادُراھجاہ ءَ برتگ اَنت-

سی ٹی ڈی وئیل ءَ جنگ بیتگیں مردمانی سیادی مزھبی گل ءَ چہ کتگ-

زانگ بہ بیت بلوچستان ءَ پاکستانی پوج ھاسکار ایف سی ءُ سی ٹی ڈی نیمگ ءَ چہ اے وڑیں وئیل دیم ءَ اَتکگ اَنت کہ اود ءَ دروگیں میڑاں پیسر ءَ چہ بندیگں مردم کُشتگ اَنت-

بلے مروچی ھُزدار ءَ پاکستانی پوج ءِ میان ءَ میڑ جنگ بیتگیں مردمانی پجّار انگت پدر نہ کتگ-

زورانسری بیگواھی ءِ آماچیں ورنایانی یل کنگ ءِ واستا زھرشانی گوستگیں چار روچاں چہ برجاہ اِنت۔

گوستگیں روچاں بلوچستان ءِ پنجگور ءِ دمگ چہ چٹکان ءَ پاکستانی لشکر ءِ دست ءَ دزگیر کنگ ءَ پد بیگواہ کنگ بوتگیں دوئیں براتانی سیاد ءُ وارسانی نیمگ ءَ زھرشانی کنگ بیتگ –

نزیکیں مردماں جاوید چوک ءَ روانک کش اتگ ءُ ڈپٹی کمشنر پنجگور ءِ کارگس ءِ دیم ءَ زھرشانی نندانک داتگ-

اے تک ءَ زھرشانی کنوکاں دو برات صابر نور ءُ عابد نور ءِ یل کنگ ءِ لوٹ ءَ کنگ ءَ اَنت- کہ گوستگیں ماہ ءِ ستمبر ءِ گڈسر ءَ پاکستانی لشکر ءِ دزگیر کنگ ءَ پد بیگواہ کنگ بیتگ اَنت-

دوئیں ورنایانی جان سلامتی ءِ ھاتر ءَ گوستگیں چار روچاں آھانی کھول ءِ مردم زھرشانی رجم دارگ ءَ انت وھدے کہ اے موہ ءِ سر ءَ پنجگور ءِ سیاسی گلانی ھمراھی ءَ مزنیں کساسے ءَ نودربر ءُ زالبول زھرشانی ءَ ھوار انت۔

ایشی ءَ چہ پیسر پنجگور ءَ کھولانی زھرشانی سی پیک روٹ ءَ برجاہ بوتگ کہ اودا مرچی دھرنا ڈپٹی کمشنر ءِ کارگس ءِ دیم ءَ آرگ بوتگ۔

سیاد ءُ وارساں لوٹ کتگ کہ آھانی بیگواھیں مردم زوت جاہ ءَ آرگ بہ بنت اگاں ناں آ وتی زھرشانی ءَ برجاہ دار اَنت ءُ گیشتر زھرشانی کن اَنت۔

گوستگیں روچاں پاکستانی لشکر ءِ نیمگ ءَ چہ گوادر ءَ بیگواہ بوتگیں لیویز ءِ کارندھانی زورانسری بیگواہ کنگ ءِ ھلاپ ءَ ھمراھیں لیویز ءِ کارندھاں ڈیوٹی کنگ ءَ چہ انکار کتگ ءُ ھمراھیں کارندھانی یل کنگ ءِ لوٹ کتگ۔

لیویز ءِ کارندھاں گشتگ کہ اے زھرشانی ھما وھد ءَ برجاہ بیت کہ سنگت دودا ءُ زکریا یل کنگ نہ بنت اِنت-

اے وھد ءَ لیویز ءِ کارندہ ڈی سی ءِ کارگس ءِ دیم ءَ مزنیں کساسے ءَ وتی زھرشانی ءَ ریکارڈ کنگ ءَ اَنت۔

زانگ بہ بیت کہ 27 ستمبر ءِ شپ ءَ پاکستانی لشکر ءُ چیریں ادارھانی کارندھاں گوادر ءِ ھند چہ نیوٹاؤن ءَ پنچ مردم دزگیر کتگ ءُ بیگواہ کتگ اَنت کہ ایشانی تو ورنایانی پجار لیویز ءِ کارندہ دودا ھالد ءُ زکریا یاکوب ءِ ناماں زانگ بیتگ اَنت-

دمگی وسیلگ ءِ رد ءَ نام گپتگیں ورناھانی ھمراھی ءَ دگہ سئے مردم ھم بیگواہ بوتگ اَنت کہ آھانی تہ ءَ میراج ء نوربخش، اجاز ء ھسین ءُ ایوب ء ھمزہ ھم ھوار اَنت-

اسرائیل ءِ گشگ انت کہ آئی ءَ بیروت ءَ چیرین آپریشنے کتگ۔

چم دیستگینانی گشتگ کہ بیروت ءِ پارلیمنٹ ءِ نزیک ءَ یک ماڑی یے نشانگ جوڑ کنگ بوتگ۔

لبنان ءِ وزارت جان سلامتی ءِ کارندھانی رد ءَ اے اُرش ءَ 6 مردم بیران ءُ 7 ٹپی بوتگ اَنت۔

ھمے وڑ اسرائیل ءِ شھر تل ابیب ءِ سر ءَ چار شمبے ءُ پنچ شمبے ءِ شپ ءِ نیام ءَ ڈرون اُرش بوتگ-

اُرش ءِ تہ ءَ بوتگیں تاوان ءِ بابت ءَ ھچ وڑیں ھال ءُ اھوال نہ بوتگ۔

اسرائیل ءِ رسانکدر ءِ رد ءَ فوج ءِ گشگ اِنت کہ تل ابیب ءِ دمگ ءَ دو ڈرون ءِ وسیلگ ءَ نشانگ جوڑ کنگ ءِ کوشست کنگ بوتگ کہ یکے برز ءَ ھلاس بوتگ ءُ دومی پچیں دمگ ءَ کپتگ۔

رپورٹ ءِ رد ءَ ڈرون اُرش ءِ آسر ءَ ھچ وڑیں تاوان ءِ ھال سر نہ بیتگ

ڈرون ءِ اُرش ھما وھد ءَ بوتگ کہ مردم یھودیانی نوکیں سال ءِ ائید ءَ گوازینگ ءَ بیتگ اَنت-

زانگ بہ بیت ھمے سَے شمبے ءَ ایران ءَ اسرائیل ءِ سر ءَ کساس یک سد ءُ ھشتاد میزائیل آس داتگ بیتگ کہ آ اسرائیل ءِ جتا جتائیں جھاں کپتگ اَنت ءُ چریشی ءَ پد ھردوکیں ڈیھاں ھوار دمگ ءَ جاورناگیگی ءِ دیمپان اَنت-

جھان اے جنگ ءَ ھلاس کنگ ءِ دزبندی ءَ کنگ ءَ اَنت بلے ھردوکیں ڈیھ یکے دومی ءَ بیھار دیگ ءَ اَنت-

بلوچستان ءِ دمگ کیچ ءِ بنجاھی شھر تربت ءَ پاکستانی لشکر ءَ یک ورنا یے زورانسری آوار جنگ ءَ پد بیگواہ کتگ-

بیگواھیں ورنا ءِ پجار انیس ء ملا برکت ءِ نام ءَ زانگ بیتگ-

دمگی وسیلگ ءِ گشگ اِنت کہ گوستگیں شپ ءِ 8:30 ءَ چہ سری کھن تربت ءَ آئی ءِ دکان ءِ دیم ءَ کرولا گاڑی ءِ تہ ءَ سواریں سلاہ بندیں مردماں زورانسری آوار جتگ-

انیس ءِ درگت ءَ گشگ بوھگ ءَ اِنت کہ آ دو سال پیسر 14 اکتوبر 2022 ءَ پاکستانی لشکر ءِ نیمگ ءَ زورانسری بیگواہ کنگ بوتگ ءُ پد ءَ 21 اکتوبر 2022 ءَ یل کنگ بوتگ۔

روکپتی بلوچستان ءِ تیابدپی شھر چھبار ءَ ایرانی لشکر ءَ یک دکانے ءِ سر ءُ بیڑ برتگ ءُ اود ءَ تیرگواری کنان ءَ سَے مردم کشتگ انت ءُ دو زدگ بیتگ اَنت-

تیرگواری ءِ وئیل چھبار ءِ ھند پیر سھراب ءَ پیش اتکگ کہ اود ءَ ایرانی لشکر ءَ یک دکانے ءِ سر ءَ تیرگواری کتگ-

بلوچ کمپعن فعالین ءِ رد ءَ ایرانی لشکر ءَ یک دکانے ءِ سر ءَ اُرش ءَ کم چہ کم سَے شَھری بیران ءُ دو زدگ بیتگ اَنت-

وئیل ءَ بیران بیتگیں مردمانی تہ ءَ یکے ءِ پجار شھاب ء ھاھدا واھد ءِ نام ءَ زانگ بیتگ ءُ زدگ بیتگیں مردمانی پجار شعیب ء صدیق ءُ ھامد ء صمد ءِ ناماں زانگ بیتگ اَنت-

وئیل ءَ دگہ دو بیران بیتگیں مردمانی پجار زانگ نہ بیتگ اَنت-

اھوالانی رد ءَ ھمے ھلک ءَ ایرانی لشکر یک گاڑی یے دمب ءَ کپتگ بیتگ ءُ گاڑی تتکگ ءُ لشکر ءَ ھمے دکان ءِ سر ءَ تیرگواری کتگ-

دومی نیمگ ءَ ایران ءِ سرکاری رسانکدر ءَ شنگ بیتگین اھوالانی رد ءَ ایرانی لشکر ءَ پیرسھراب ءِ میتگ بلینگی ءَ کاروائی کتگ ءُ جیش العدل ءِ سَے باسک کشتگ اَنت-

لس اھوالاں اے اھوال چپ کنان ءَ گوشتگ کشگ بیتگیں مردم لس شھری اَنت ءُ دکان ءَ نندوکیں مردم اَنت-

ٹائم میگزین ءَ بلوچ انسانی ھکانی باسک ماہ رنگ بلوچ دوھزار ءُ بسیت چار ءِ گچینی مردمانی لڑ ءَ ھوار کتگ-

سیاسی باسک ءُ بلوچ یکجھتی کمیٹی ءِ راھشون ماہ رنگ بلوچ نامی ئیں امریکی میگزین ٹائم ءَ دوھزار ءُ بیست ءُ چار ءِ واستا سد دیم ءَ اَتکگیں راھشونانی دروشم ءَ چہ یکے درچتگ-

اے شرپ آئی ءَ بلوچ ھکانی لگتمالی سر ءَ توار چست کنگ ءُ زورانسری آوار جنی ءِ ھلاپ ءَ آئی ءِ جُھد ءِ رُژن دیم ءَ اَتکگ- چریشی ءِ میان ءَ آ تُرسینگ ءُ لَٹ ءُ کُٹ کنگ ءَ ھوار بازیں مردمانی بیھارانی دیمپانی کنگ کپتگ-

ٹائمز میگزین ءَ وتی راجی سروکی کنگ واستا ماہ رنگ ءِ جُھدانی ستا کتگ ءُ آ اسلام آباد ءَ تاں یک پُرایمنیں پندے ءِ سروکی کنان ءَ بیگواھیں مردمانی کھولانی ھاتر ءَ توار جوڑ بیتگ-

مگزین ءِ رِد ءَ سرجمیں اڑ ءُ جنجالاں ترس ءَ اَبید ماہ رنگ ءَ وتی مشن ءَ دیم ءَ جُنزینتگ آئی ءَ ستک بیتگ کہ آئی ءِ سیاسی پُرکاری دگراں انساپ ءُ مردمگری ءِ جُھد ءَ ھوار بیگ ءِ دلبڈی ءَ دنت – ماہ رنگ ءَ گوشتگ ، سک تُرس اِنت – زُلم باز اِنت – پد ءَ ھم ما مردمگری ءُ انساپ ھاتر ءَ جُھد کن ایں-

جھانی میگزین نیمگ ءَ چہ دیم ءَ اَتکگیں راھشونانی دروشم ءَ ماہ رنگ ءِ درچنگ تھنا یک مزنیں سوبمندی یے نہ اِنت بلکیں بلوچ راج ءِ واستا یک اُمیتے ھم اے سروکی کرد ءَ زالبول ءِ بستار ءُ چاگردی انساپ ءِ زرمشبتاں آئی ءِ ھاسیں ھمگرنچی ءِ پدری ءَ کنت-

ٍٹائمز میگزین ءِ نیمگ ءَ چہ جھان ءَ سد اتکگیں مردمانی لڑ ءَ نام ھوار بیگ سر ءَ ماہ رنگ بلوچ ءَ ٹائمز میگزین منت گپتگ گوشتگ کہ آئی اے لڑ ءَ ھوار بے دروریں شرپ ءُ وشھالی اِنت-

ماہ رنگ بلوچ ءَ دیمتر ءَ گْوشتگ کہ آ اے شرپ ءَ سرجمیں بلوچ زالبول انسانی ھکانی پھازوک ءُ زورانسری بیگواہ بیتگیں مردمانی اسرکپتگیں کھولانی نام ءَ کنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں نوشکی، تربت ءُ زامران ءَ سے جتاجتائیں اُرشاں دُژمن ءِ چار کارندہ کشتگ ءُ بازینے ٹپی کتگ-

جارکش ءَ گْوشتگ کہ مئے سرمچاراں یک اکتوبر سے شمبے ءِ بیگاہ ھپت ءَ نوشکی ءِ دمگ زرین جنگل ءَ برجاھیں زورگریں پوج ءِ بُنجل راکٹ لانچر ءُ دگہ نوکیں سلاھاں چہ تُرندیں اُرشے ءِ نشانگ کتگ چریشی ءَ چہ پوج ءِ بُنجل دیم بھر سرجمی ءَ تباہ بیتگ – اُرش نشانگ ءَ آیگ ءَ چہ سے پوجی کارمند جاہ پہ جاھی مرتگ اَنت وھدے کہ بازینے ٹپی بیتگ اَنت-

جارکش ءَ گْوشتگ کہ دگہ یک اُرشے یک اکتوبر ءِ شپ ھشت ءَ تربت شھر ءَ تعلیمی چوک سر ءَ برجاھیں دُژمن ءِ بُنجل سر ءَ دستی بمب ءَ چہ اُرش کتگ چریشی ءَ چہ دُژمن ءِ یک کارمندے مرتگ وھدے کہ جونیئر آفیسرے نائیک اشرف ءُ شاھی ظاھر ٹپی بیتگ اَنت-

جارکش میجر گْوھرام بلوچ ءَ گْوشتگ کہ تراک ءَ پد زورگریں پاکستانی پوج اود ءَ سر بیتگ جاگہ ءِ چار ءُ ٹپاس کتگ ءُ سرمچارانی پٹ پول بندات کتگ بلے سوبمندیں شوربندیانی سبب ءَ سرمچار پہ سلامتی مُھریں اوتاکاں سر بیتگ اَنت-

جارکش ءَ دیمتر ءَ گوشتگ سیمی اُرش سرمچاراں دو اکتوبر روچ ءِ دوازدہ ءَ زامران ءِ دمگ ڈمبان دشتک ءَ برجاھیں زورگریں پاکستانی پوج ءِ چوکی سر ءَ نوکیں ءُ وتکاریں سلاھاں چہ اُرش کتگ چریشی ءِ نشانگ ءَ آوکیں دُژمن ءِ کارمندے ءِ سک ٹپی بیتگ-

آئی ءَ گْوشتگ کہ بی ایل ایف ءِ اُرش سرجمیں بلوچستان ءَ پاکستانی پوج، پوجی شوربندی ءُ دُژمن ءِ چاریگانی سر ءَ تُرندی ءَ گوں برجاہ ءَ اَنت چریشی ءَ چہ دُژمنیں پوج بے کساس سسّائی زور ءِ نشانگ ءَ اِنت-

درشان ءِ گُڈی ءَ گوشتگ کہ بلوچستان لبریشن فرنٹ اے سئیں اُرشانی زمہ واری ءَ منّ اِیت ءُ بلوچستان ءِ وتواجھی ءَ تاں دُژمنیں پوج ءَ را نشانگ کنت-

تربت ءَ ناشناسیں مردماں تیرگواری کتگ ءُ مردمے کشتگ۔

بلوچستان ءِ دمگ کیچ ءِ بنجاھی شھر تربت ءَ سبزی بازار ءِ نزیک ءَ ناشناسیں سلاہ بندیں مردماں تیر گواری کتگ ءُ یک مردمے کشتگ-

تیر گواری ءِ تہ ءَ بیران بوتگیں مردم ءِ پجار سنگانی سر تربت ءِ نندوکیں علی احمد ءِ چُک ممتاز علی ءِ نام ءَ بوتگ۔

دمگی وسیلگ ءِ رد ءَ اے مردم سرکاری کمک ءَ ڈیتھ اسکواڈ ءَ گوں سیادی دار ایت بلے اے وئیل ءَ ھواریں مردمانی بابت ءَ انگت ءَ ھچ وڑیں ھال ءُ اھوال سر نہ بیتگ اَنت-