پنجگور ءُ خاران ءَ پد پسنی ءَ ھم پہ زوریں بیگواھیانی ھلاپ ءَ زھرشانی

زھرشانی ءَ بیگواھیں ورنایانی پجارینگ ءِ واستا زھرشانی نندانک، دگ بند کنگ بوتگ-

بلوچستان ءِ تیابدپی شھر گوادر ءِ ھند پسنی ءِ جھمنند محمد شفقت ءُ عبدالسلام باقی ءِ بیگواھی ءِ ھلاپ ءَ پسنی زیروپوائنٹ زھرشانی ءُ دگ بند کنگ بیتگ –

پسنی ءِ زھرشانی کنوکاں گْوشتگ کہ اے دوئیں مردم اے سال ءِ 13 اپریل ءَ پاکستانی لشکر ءَ دزگیر کتگ ءُ ناشناسیں جاھے ءَ برتگ انت، چہ انگت ءَ آ بیگواہ اَنت۔

پسنی ءِ زھرشانی کنوکاں لوٹ کتگ کہ درمحمد شفقت ءُ عبدالسلام باقی زوت جاہ ءَ آرگ بہ بنت ءُ رکّینگ بہ بنت اگاں نہ مئے زھرشانی برجاہ بیت ءُ گیشتر شدید بیت، سرجمیں زمہ واری واکدار ءُ صوبائی سرکار ءِ سر ءَ بیت، آیاں لوٹ کتگ کہ انسانی ھکانی گل اے جیڑہ ءَ دلجمی ءَ بہ زیر اَنت-

زانگ بہ بیت مرچی بلوچستان ءِ سئے جتا جتائیں شھراں بلوچستان ءِ پہ زوریں بیگواھیانی ھلاپ ءَ زھرشانی ءِ دھرنا بوھگ ءَ اِنت خاران ءِ سیاسی ءُ چاگردی گلانی زھرشانی ءِ دھرنا تاں پنچمی روچ ءَ برجاہ انت-

ھمے وڑ ءَ بلوچستان ءِ دمگ پنجگور ءَ چہ بیگواہ بوتگیں دو برات صابر نور ءُ عابد نور ءِ واستا مروچی دومی روچ ءَ دھرنا برجاہ اِنت۔

پنجگور بیگواھیں مردمانی سیاداں گوستگیں روچ ءَ پریس کانفرنس ءِ وسیلگ ءَ انتظامیہ ءَ را دو بج ءَ تاں داتگ ات کہ آہانی دوئیں برات یل نہ بوتگ انت وھدے کہ سیاداں احتجاجی سی پیک روڈ پہ سرجمیں ٹریفک ءَ بند کتگ۔