TBP Balochi

بلوچ لبریشن آرمی ءِ جارکش جیئند بلوچ ءَ گوشتگ بلوچ لبریشن آرمی ءِ سرمچاراں گوستگین شپ ءَ بارکھان ءِ ھند رکھنی ءَ زورگرین پاکستانی پوج نشانگ کتگ-

جارکش ءَ گوشتگ سرمچاراں رکھنی ءِ ھند بدی ءَ ھستیں زورگرین پاکستانی پوج ءِ یک پوسٹے نشانگ کتگ – سرمچاراں وتکاریں سلاھانی گون ءَ اُرش کتگ ءُ کم چہ کن دشمن ءِ سَے کارندہ زدگ کتگ اَنت-

جیئند بلوچ ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ زورگریں پاکستانی پوج ءِ سر ءَ اُرش برجاہ بنت اِنت-

بلوچ ہکجھتی کمیٹی ءِ نیمگ ءَ بیست ءُ ھشت ءُ جولائی ءَ ماں گوادر ءَ بلوچ راجی مُچی ءِ درگت ءَ جھالاوان ریجن ءَ پنتاک بھر کنگ بیتگ اَنت-

پنتاک وڈھ، نال، گریشہ زھری ءَ بھر ءُ بانگ کنگ بیتگ اَنت-

پنتاکانی ھواری ءَ ھوار ھوار دیوالانی سر ءَ ھم یکجھتی کمیٹی ءِ بلوچ نسل کشی ءِ ھلاپ ءَ بیست ءُ ھشت جولائی ءَ راجی مُچی ءَ بھر زیرگ ءِ پنتاک بھر کنگ بیتگ اَنت-

دومی نیمگ ءَ یکجھتی کمیٹی ءَ یک اھوالے ءَ گوشگ بیتگ دمگی انتزامیہ ءَ یک پندلے ءِ پشت ءَ بیست ءُ یک جولائی ءَ داں بیست ءُ نُھ جولائی ءَ یک میلہ پٹبال ٹورمنٹے ءِ جار جتگ ءُ دمگ ءِ تمبو ءُ اسپیکر برتگ ءُ دگہ اسپیکر والا ترندی ءَ بیھار داتگ انت ءُ گوشتگ یکجھتی کمیٹی ءَ کس اسپیکر مہ دے ات –

آئی ءَ گوشتگ اے ریاست ءِ پروشی ءِ نشانی انت ءُ اے دابیں پندل بلوچ راجی مُچی ءَ داشت نہ کن اَنت ءُ بلوچ راجی مُچی بیست ءُ ھشت جولائی ءَ پیش سوبمند بیتگ-

ھُزدار ءِ دمگ گریشگ ءَ بیگواھیں مردمانی کھول ءُ انتزامیہ ءِ میان گپ ءُ تران ءَ پد نندانک متھل کنگ بیتگ-

گپ ءُ تران ءِ تہ ءَ گوشگ بیتگ کہ مئے مردماں یل بکن اِت اگاں ریاست سرپد بیت کہ آیاں جرم کتگ گُڑا وتی جوڑ کتگیں آمیدگس ءَ پیش بکنت اش- مئے مردم کجام ادارہ ءِ گور ءَ اَنت گڑا مارا اے ادارہ ءِ نام ءَ مئے مردماں جانسلامتی ءِ زمہ واری ءَ بدے اَنت-

اے ڈی سی ھُزدار رحمت اللہ بلوچ ءِ نشبتھی ھساب ءَ یک منگی یے ءَ کتگ اگاں پنچ روچانی تہ ءَ منّگانی سر ءَ گامگیج زیرگ نہ بیت گُڑا اشی ءِ زمہ واری انتزامیہ ءَ اِنت، گپ دیوانی ٹولی ھاسکار اے ڈی سی بیت-

گُڈی ءَ مردماں وتی گپ ایر کتگ اَنت ءُ گْوشتگ اگاں پنچ روچانی تہ ءَ مئے مردم دیم ءَ نیاورت اَنت گُڑا ما واتر دگانی سر ءَ کا ایں ءُ نند ایں-

زانگ بہ بیت کہ ھژدہ جولائی ءَ چہ گریشگ ءَ شاہ جان ء سلیم، گوھر دین ء ھیر جان، مھم جان ء لال بخش، میار ء لال بخش، محمد عارف ء عبدالرحمن، منیر ء سبزو ءَ ھوار بازیں مردمے درکانودی آوار جتگ ءُ ناشناسیں جاھے ءَ برتگ اَنت کہ آئی ءِ بگیری ءَ کھول ءَ زھرشانی ءِ جار جتگ اَت-

بلوچستان ءِ دمگ کیچ ءِ تھسیلدار تمپ بمب اُرش ءَ رکّ اِتگ-

گیشیں ھالانی رِد ءَ تمپ ءَ ناشناسیں مردمانی نیمگ ءَ چہ چیرکتگیں بمب ءِ ترکگ ءَ تھسیلدار تمپ عابد بلوچ ءِ گاڑی ءَ تاوان رس اِتگ بلے آئی ءِ جند رکّ اِتگ-

بمب اُرش ھما وھدے ءَ بیتگ وھدے تھسیلدار تمپ وتی جند گاڑی سر ءَ تمپ بازار ءَ روگ ءَ بیتگ کہ آئی ءِ گاڑی جنکانی وانگجاہ نزیک ءَ بمب اُرش ءِ نشانگ کنگ بیتگ-

تنی وھدے وئیل سوب زانگ نہ بیتگ نانکہ اُرش زمہ واری کسے ءَ منّ اِتگ-

بلوچستان ءِ دمگ بارکھان ءَ سلاہ بندیں مردماں پاکستانی پوج اُرش ءِ نشانگ کتگ ءُ ھمے وڑ کیچ ءَ پاکستانی پوج ءِ گون ءَ جنگ ءُ چوپ ءَ اُرشکارے بیران بیتگ-

بارکھان ءِ دمگ رکنی ءَ بدی ءِ ھند ءَ پاکستانی پوج ءِ بنجاھی بنجل گوستگیں شپ ءَ اُرش ءِ نشانگ کنگ بیتگ-

اُرش ءَ پوجی کارمندانی جانی تاوانانی ھال انت بلے داں انگت ءَ اے درگت ءَ سرکاری بنشونانی گپ دیم ءَ نیتکگ اَنت-

ایشی ءَ پیش کیچ ءِ دمگ گیشکور ءَ گوستگیں شپ ءَ سلاہ بندیں مردماں پاکستانی پوج ءِ پوسٹ ءُ بند ءُ ساچی شرکت ءِ مشینری نشانگ کتگ اَنت-

اے وئیل کیچ ءِ دمگ سامی گیشکور ءِ ھند ءَ پیش اتکگ کہ اود ءَ شپ ءَ ناشناسیں سلاہ بندیں مردماں پوج ءِ چوکی نشانگ کتگ ءُ ھمے وھد ءَ ناشناسیں مردماں بند ءُ ساچی شرکت ءِ مشینری ھم سوتکگ ءُ ناکارہ کتگ انت-

ھالانی رد ءَ پوج ءِ گون ءَ جنگ ءُ چوپ ءَ یک اُرشکارے بیران بیتگ بلے داں انگت ءَ اے درگت ءَ واکداراں دگہ گپ دیم ءَ نیاؤرتگ اَنت-

اُرش ءِ زمہ واری داں انگت ءَ کس ءَ نہ زرتگ بلے اے ھند ءَ بلوچ سلاہ بندیں آجوئی لوٹوکیں گل پرکار اَنت-

شوھاز ءُ نگد ءُ چکاس ءِ مانا

نبشتہ کار : شاھد اھمد

ششمی بَھر

دی بلوچستان پوسٹ

پٹ ءُ پولی سرھال ءِ گچین کنگ
پٹ ءُ پولی اَمل ءِ تہ ءَ مستریں ءُ بُنجاھی چمشانک سرھال ءِ گچین کنگ اِنت۔ اگاں ٹاپِک (سرھال) راست گچین کنگ بہ بیت گڑا نیم کار بزاں سرجم بیت۔ آرٹ ریسرچ ءِ ھُنرمنداں اے گپ ءِ جار جتگ کہ یک پٹ ءُ پولکارے ءَ اے گچین کاری ءِ اَمل ءَ اے جیڑھاں وتی ھیال ءَ بہ دار ایت-

۱: سرھال ساپ ءُ زاھر بہ بیت، ءُ ایشی ءِ تہ ءَ ہچ وڑیں کسمے ءَ پَدّر مہ بیت۔ 2: نودربر سرھال ءَ شری ءَ سرپد بہ بیت ءُ ٹاپِک ءِ بزانت ءَ ءُ درشان ءَ شری ءَ کت بہ کنت۔ 3: بنگپ اِنچو شنگ ءُ تالان مہ بیت کہ آئی ءِ سر ءَ داشت کنگ مہ بیت۔ ۴: اے گپ ءَ گوں بنداتی پٹ ءُ پول ءَ شری ءَ چارگ بہ بیت کہ سرھال واستا بازیں کساسے ءَ مواد دست کپت کُت کنت یاانّا؟ ۵: چُشیں سرھال ءِ سر ءَ کار کنگی نہ اِنت کہ آ بُنگپ ءِ واست ءَ بنیادی مواد مہ بیت۔ ۶: سرھال مدام نوک بہ بیت، کوھنیں سرھال ءِ سر ءَ کار کنگ بے پائدگ اِنت۔ ۷: پٹ ءُ پولکار ءَ را پٹ ءُ پول ءِ سر ءَ جُھد ءُ دوستی بہ بیت آ ھما جیڑہ (سرھال) ءِ سر ءَ کار ءَ اِنت آئی ءِ سر ءَ آئی ءِ دلگوشی بہ بیت۔ ۸: پٹ ءُ پولکار ءِ مجگ بلکل راسبند بہ بیت۔ ایشی ءِ تہ ءَ چُشیں ھِچ زِد ءُ کینگ مان مہ بیت بزاں کسی گپانی سر ءَ سِتک کنگ ءِ کرد مان مہ بیت پرچاکہ ھر دوئیں گپ پہ پٹ ءُ پول ءِ واست ءَ زَھر کُشّوک اَنت۔ ۹: جیڑہ ( سرھال) ءِ گچین کنگ ءِ واست ءَ پٹ ءُ پولکار ءَ راسبند بوگ لوٹ اِیت۔ آ دگہ پیسریگیں چمشانکے ءَ را مہ زور اِیت مہ رؤت بلکیں راستیں مواد ءِ کمک ءَ بہ زور اِیت۔

۱۰: پٹ ءُ پولکار ءَ پہ پٹ ءُ پول ءِ واست ءَ جیڑھے گچین کُتگ۔ ھمے جیڑہ ءِ راست کنگ ءِ واست ءَ ھُنر ءِ درکار بوتگ ءُ ھمے ھُنر پٹ ءُ پولکارے ءِ تہ ھست بہ بنت۔ ۱۱: پٹ ءُ پولی جیڑہ ءِ گچین کنگ ءَ پٹ ءُ پولکار ءَ وتی جان سلامتی، وھد ءُ مالی جیڑھانی سر ءَ ھم ھیال دارگ لوٹ اِیت کہ آ کار ءِ بندات کنگ ءِ وھد ءَ پٹ ءُ پول ءَ گوں وش ءُ وشیں وڑے ءَ کُت بہ کنت۔ ۱۲: اگاں پٹ ءُ پولکار یک شھدربرجاھے ءَ تھیسس پیش کنگ ءِ ھاتر ءَ جیڑھے گچین کنگ ءَ اِنت گڑا اے ھم چارگ بہ بیت کہ جیڑہ شھدربرجاہ ءِ سٹینڈرڈاں گوں ھمگرنچ اِنت یا ناں؟ ۱۳: یک شھدربرجاھے ءِ تہ ءَ جیڑھے ءِ پیش کنگ ءَ پیسر اے چارگ بہ بیت کہ آ ادارہ ءِ تہ رھشونی کنگ ءِ ھاتر ءَ زانوگر ھست انت یا انّا؟ ۱۴: چہ ایشی ءَ ابید! “سرھال انچوش بہ بیت کہ چاپ کنگ ءَ پد ھاسیں ءُ کدی کدی وانوک ھم ایشی ءِ نیمگ ءَ دلگوش بہ بنت۔” ۱۵: ٹاپک زگریں تنقیدی مہ بیت۔ پرچا کہ زگریں تنقید ءَ پٹ ءُ پول ءِ نام دیگ شر نہ اِنت۔ ۱۶: بنگپ ءِ سر ءَ پیسر ءَ کار نہ بوتگ بلے کنگ بوگ ءَ نہ اِنت۔ ۱۷: ھما بنگپ زورگ مہ بیت کہ آئی ءِ سر ءَ پٹ ءُ پولکار ءَ وت پیسر ءَ یک مقالھے نبشتہ کتگ۔ چو کہ پی۔ ایچ۔ ڈی ءِ واست ءَ ایم ۔فل ءِ سبجیکٹ زورگ ءِ وڑ ءَ ۔ ۱۸: ھما مردم یا سرھال کہ بے ترس ءُ بیم ءَ نبشتہ کنگ نہ بیت آ زورگ مہ بنت۔ ۱۹: پٹ ءُ پولی کار پہ زندگیں مردمے ءِ سر ءَ پہ ھچ وڑیں پنت، سر ءُ سوج ءُ دلچسپی ءَ کنگ مہ بیت۔

چوناھا اَملی رد ءَ پٹ ءُ پولکار ءَ اے گپ ءِ پدر کنگ لوٹ اِیت کہ آ بنگپ ءِ روانی ءَ بہ کنت کہ آ-

۱: جیڑہ ( سرھال) ءِ بابت ءَ چنکیاس ءُ چے زانت؟ ۲: دلگوشیں جیڑہ ءِ سر ءَ چہ آئی ءِ گیشتر چنکیاس ءُ چے چے کار کنگ بوتگ۔ ۳: زاناں انوگیں بزاں ھستیں جیڑہ ءِ چِہ کسمے ءَ اِنت؟ ۴: دومی مردماں اے جیڑہ ءِ بابت ءَ وتی چونیں ھیالانی درشان داتگ ءُ اے جیڑہ ءِ بابت آیانی چے رَد اَمل چے بوت کن اَنت؟ ۵: زاناں دومی مردماں اے جیڑہ ءِ سر ءَ پٹ ءُ پول کُتگ ءُ یا ایشی ءِ جیڑہ درگیتکگ اگاں ھو گڑا آسر چے در آتکگ؟ ۶: ھمے آسرانی رژنائی ءَ آیانی دیم ءَ جریدگ اَنت ءُ بچار اَنت ءُ آیاں زاناں ھمے یکیں جیڑہ ءِ سر ءَ پٹ ءُ پول ءِ سر ءَ گنجائش ھست؟

روان اِنت۔۔۔

روکپتی بلوچستان ءِ دمگ راسک ءَ دو گاڑیانی ٹکر ورگ ءَ یک مردمے بیران ءُ یکے ٹپی بیتگ-

گیشیں اھوالانی رد ءَ راسک ءِ ھند سد دو راھی ءَ یک تیل کش ءُ یک سواری گاڑی ءَ ٹکر وارتگ کہ چریشی ءَ سواری گاڑی ءِ مردم بیران بیتگ-

بیران بیتگیں مردم ءِ پجار ابدلگنی جھمنند سد بنپان ءُ زدگ بیتگیں پجار ابدالھک جھمنند کیشکور سرباز ءِ نام ءَ زانگ بیتگ-

اھوالانی رد ءَ گاڑیانی ٹکر ورگ ءَ ابدلگنی ھما جاہ ءَ بیران بیتگ ءُ ابدلھک ٹپی بیتگ ءُ آ راسک ءِ نادراہ جاہ ءَ برگ بیتگ-

زانگ بہ بیت روکپتی بلوچستان ءَ ھمک روچ تیل کشی گاڑی گیشتر وئیلانی آماچ بوگ ءَ اَنت کہ چریشی ءَ چہ مھلوک بازیں کچے ءَ زوالی ءِ دیمپان اَنت ءُ اے وئیلانی گر ءُ داری ءَ انتزامیہ ءِ دست ءُ پاد ھچ وڑ ءَ سرگ ءَ گندگ نہ بنت اِنت-

بلوچ راھشون ڈاکٹر ماہ رنگ بلوچ ءَ گْوشتگ کہ گوستگیں بیست پنچ سالاں چہ مئے ھزرانی دوستناک بلوچ ورنا ءُ کماش پاکستانی پوج ءِ آزار جاھاں تُرندیں گرم ءُ سارتی جاوراں سسائی ءُ جسمی آزارانی دیمپان اَنت مرگ ءُ زندگ ءِ میان ءَ زندگیں لاش جوڑ بیتگ ءُ زند گوازینگ ءَ اَنت – ھمے اُمیت ءِ ھمراھی ءَ کسے ھست دوزواہ کہ مئے واستا توار چست کن اَنت- چے ما یک روچے گوادر ءِ پُرمھر ءُ پُر ارزشتیں گرمیں گوات ءِ تہ ءَ یکجاہ بہ ایں وتی دوستناکانی ءِ ھاتر ءَ یک تُرند ءُ توپانیں توار چست کُت نہ کن ایں-

آئی ءَ گْوشتگ کہ پرچا ما وتی کودکیں ءُ چورھیں زھگانی رنج ءُ دردانی مارشت ءِ زیرگ یکجاہ بیگ ءَ آؤکیں وھد ءَ گیش وتی زھگاں چورھی ءَ رکینت نہ کن ایں؟

پرچا ما گیش وتی مات ءُ گھارانی ارس ءُ گریوگاں گند ایں ءُ اوپار کن ایں پد ءَ سر ءَ جھل کن ایں زند گوازین ایں ءُ گوش ایں کہ ما یک زندگیں راجے ایں-

پرچا اے بے تواری، تُرس، بے دلی وت مئے پیشانی ءُ یک سیاھیں نشانے نہ بیت؟

ماہ رنگ بلوچ ءَ گْوشتگ کہ ما پیسر ءَ ھم گْوشتگ کہ مرچی ھم تچک کن ایں کہ راجی مچی سیاسی کارے، بلے سیاسی مول مراد ءُ سیاسی کار ءَ چہ گیش بلوچ راجی مچی بلوچیت ءُ مردمگری ءِ درد رنج ءُ دلسیاھی ءَ چہ سرریچ ھما دردناکیں پدرائی اِنت کہ ھپت پنچ سالاں چہ ریاست جتاجتائیں پندل ءُ دروشماں چہ بلوچ راج ءِ چُکچینی ءَ ریاست گیش تُرند ءُ دْراجکش کنگ ءِ پیسلہ کتگ-

آئی ءَ گْوشتگ کہ اگاں ما انگت بے توار بہ بہ ایں گُڑا آؤکیں وھد ءَ بلکیں ما یک پسگے زندگ بہ ایں بلے بلوچ راج ءِ نام ءُ نشان نہ بیت-

دیمتر ءَ گْوشتگ پمیشکا سیاست، پارٹی، گل ، زند ءُ کینگ ، ٹولی ءَ چہ یک کر بہ کن اَنت، تھنا بستار بلوچ، تو کجا ءِ، کجام وڑ ءَ ئے، وتی راجی زمہ واریاں سرپد بہ بنت بیست ھشت جولائی ءَ گوادر ءَ بلوچ راجی مچی ءَ گیش ءَ چہ گیش بھر بزور اَنت ءُ بلوچ راج ءِ یکجاہ کنگ ءِ کرد ءَ پیلو بہ کن اَنت-

بلوچستان ءِ جتاجتائیں دمگ ھُزدار ءُ تربت ءَ پاکستانی پوج ءِ دست ءَ بیگواہ کنگ بیتگیں مردمانی کھول نندانک برجاہ ءَ اِنت-

چہ گریشہ ھُزدار ءَ زورانسری بیگواھیں مردمانی کھول ءِ نندانک ءَ مروچی پنچمی روچ ءَ ھم برجاہ ءَ اِنت- چریشی ءِ سوب ءَ شھدگ بند بیتگ ءُ گاڑیانی روگ آیگ مھتل بیتگ-

زانگ بہ بیت ھژدہ جولائی ءَ چہ گریشہ ءَ شاہ جان ء سلیم، گوھر دین ء ھیر جان، مھم جان ء لال بخش، میار ء لال بخش، محمد عارف ء عبدالرحمن، منیر ء سبزو ءَ ھوار بازیں مردمے پاکستانی پوج ءَ زورانسری آوار جنی ءِ نشانگ کتگ ءُ ناشناسیں جاھے ءَ برتگ اَنت کہ آئی ءِ بگیری ءَ کھول ءِ زھرشانی برجاہ-

ھمے وڑ تربت ءَ ڈپٹی کمشنر کیچ ءِ کارگس دیم ءَ بیگواھیں مردمانی کھول نندانک ءَ گوستگیں نُھ ءَ چہ برجاہ ءَ اِنت کہ آیانی تہ ءَ دہ ءَ گیش کھول مردم ھوار اَنت-

آیانی لوٹ اِنت کہ آیانی دوستناکاں پہ سلامتی یل بہ کن اِت-

زانگ بہ بیت مروچی سھب ءَ ڈپٹی کمشنر ءِ سروکی ءَ پولیس ءُ لیویز ءِ مزنیں کچے ءَ نندانکجاہ ءَ سر بیتگ اَنت ءُ کھول ءِ تُرسینگ ءِ جُھد کتگ-

ھمے درگت ءَ زھرشانی کنوکاں وتی دوستناکانی یل کنائینگ ھاتر ءَ تُرندیں ناراہ جتگ-