TBP Balochi

بلوچ لبریشن فرنٹ ءِ جارکش میجر گوھرام بلوچ ءَ وتی شنگ کتگین درشان ءَ گوشتگ سرمچاراں پنجگور، کولواہ ءُ تمپ ءَ چار جتائیں اُرشاں پاکستانی لشکر ءِ پانگس ءُ کاروان گوں نوکین ءُ وتکاریں سلاھاں اُرش کُرتگ اَنت۔ اُرشاں دژمن ءِ شش کارمند مُرتگ ءُ پنچ ٹپی بیتگ انت۔

گوھرام بلوچ ءَ گوشتگ مرچی نیمروچ ءَ سرمچاراں کیچ ءِ ھند رودکان کولواہ ءَ زورگریں پاکستانی لشکر ءِ چار پرپٹانی کاروان ءِ سر ءَ سنگر گِپتگ ءُ اُرش کُرتگ، اُرش ءَ دژمن ءِ یک کارمندے مُرتگ ءُ یکے ٹپی بیتگ۔

میجر گوھرام بلوچ ءَ گوشتگ 20 جولائی ءِ بیگاہ ءِ پنچ ءَ کرک ڈل گچک پنجگور ءَ برجاھیں زورگریں پاکستانی لشکر ءِ پانگس ءِ سر ءَ سرمچاراں پیسر ءَ گوں سنائپر توپک ءَ نشانگ کُرتگ ءُ یک کارمندے کُشتگ ءُ پد ءَ گوں نوکین ءُ وتکاریں سلاھاں اُرش کُرتگ ءُ دگہ یک کارمندے کُشتگ ءُ یکے ٹپی کُرتگ۔

جارکش ءَ گوشتگ یکشمبے ءِ شپ ءِ ھشت ءُ پنجاہ ءَ پل آباد تمپ ءَ سرمچاراں زورگریں پاکستانی لشکر ءِ پانگس ءِ سر ءَ گوں وتکاریں سلاھاں اُرش کُرتگ ءُ دژمن ءِ یک کارمندے مُرتگ ءُ دو ٹپی بیتگ۔

جارکش ءَ گوشتگ دگہ یک اُرشے ءَ سرمچاراں یکشمبے ءِ شپ ءِ نوہ ءَ ملانٹ تمپ ءَ زورگریں پاکستانی لشکر ءِ پانگس ءِ سر ءَ گوں وتکاریں سلاھاں اُرش کُرتگ ءُ دو کارمند کُشتگ ءُ یکے ٹپی کُرتگ۔

جارکش ءَ گوشتگ اُرش ءَ پد چہ تب ءَ لاچاریں ریاست ءِ کارمنداں ھند ءِ لس آبادی ءِ سر ءَ بیڑ بُرتگ ءُ وتی پروش ءِ چیر دیگ ءَ مردم زوراکی ءِ نشانگ کُرتگ اَنت۔

گوھرام بلوچ ءَ گوشتگ بی ایل ایف یک راجی لشکرے کہ آئی ءِ تچکیں سیت راج ءِ ھواری ءَ بلوچستان ءِ آجوئی اِنت۔گل بازیں پِڑاں راج ءِ کمک ءَ زورگریں لشکر پروش داتگ ءُ دیمتر ءَ چہ دژمن ءَ وتی راج ءِ سر ءَ بیتگیں ھمک زوراکی ءِ بیرا ءَ آجوئی ءِ دروشُم ءَ گیپت۔

میجر گوھرام بلوچ ءَ گوشتگ بلوچستان لبریشن فرنٹ اُرشانی زمہ واری ءَ منّ ایت ءُ دیمتر ءَ گوں تُرندیں اُرشاں دژمن ءَ پروش دئیں۔

بلوچ یکجھتی کمیٹی ھب ءِ نیمگ ءَ موٹر سائیکل ءُ گاڑیانی روانک چہ لسبیلہ پریس کلب ءَ دانکہ ساکران ءَ کشگ بیتگ ءُ روانک ےَ بلوچ راجی مُچی ءَ بھر زیرگ ءُ بلوچ نسل کُشی ءِ ھلاپ ءَ اوگام جتگ اَنت-

ھب روانک ساکران سَے نمبر جھاز ھوٹل ءَ سر بوگ ءَ دمگی مردماں وش اتکی دروشم ءَ روانک وش اتکگ ءُ یک مزنیں مُچے ءِ رنگ ءَ مُچ بیتگ ٹ

روانک ءَ بازیں کچے ءَ مھلوک ءَ بھر زرتگ ءُ سمی دین بلوچ ءُ بلوچ یکجھتی کمیٹی ءِ باسکاں تران کتگ-

مُچی ءَ مھلوک ءَ گوشتگ ساکران ءُ سکی داد گوٹھ ءَ ھچ بھر چوشیں نیاد نہ بیتگ انت ءُ مروچی اولی رند اِنت اے دابیں مُچی یے بیتگ ءُ درست راجی مُچی ءَ بھر زیر اِنت –

زانگ بہ بیت بیست ءُ ھشت جولائی ءَ ماں گوادر ءَ بلوچ یکجھتی کمیٹی یک ٹوھیں مُچے یے کنگ ءَ اِنت کہ ھمک پھناتاں مردماں بھر زیرگ ءِ دزبندی ءَ کنگ ءَ اِنت-

روکپتی بلوچستان ءَ پیش اتکگیں تیرگواری وئیلاں یک مردمے بیران بیتگ ءُ دگہ یکے زدگ بیتگ-

گیشیں اھوالانی رد ءَ پھرہ ءَ وتی سنگتانی میان ءَ پیش اتکگیں یک جیڑھے ءِ سر ءَ وتی ھمراھانی تیرگواری ءَ یک مردمے بیران بیتگ-

اھوالانی رد ءَ بیران بیتگیں ورنا ءِ پجار امیر ھمزہ ءِ نام ءَ زانگ بیتگ کہ آئی ءِ اُمر ھژدہ سال گوشگ بیتگ-

اھوالانی رد ءَ امیر ھمزہ ءَ وتی ھمراھانی میان ءَ پیش اتکگیں وئیل ءَ وت ءَ دیم ءَ داتگ ءُ جان ندر کتگ-

دومی نیمگ ءَ سراوان ءَ ایرانی لشکر ءَ تیرگواری کتگ ءُ یک مردمے زدگ کتگ-

گیش گوشگ بیتگ کہ سراوان ءَ ایرانی لشکر ءَ تیل کشین گاڑی یے سر ءَ تیرگواری کتگ ءُ اود ءَ ارمان شئلی نامیں مردمے زدگ بیتگ-

زدگ بیتگیں مردم نادراہ جاہ ءَ اود ءَ آئی ءِ ٹپ درمان بوگ ءَ اَنت-

‎بلوچ ورنا زیت دمبرگ ءُ ارزانی ءَ دلجم بیگ ءِ جاہ ءَ یکشلیں جھدءِ پلسپہ ءَ مھکم بہ کن اَنت ءُ نودربر سیاست ءِ مھکم کنگ ءَ وتی کاملیں زوراں بہ جن اَنت۔ شبیر بلوچ

‎بلوچ اسٹوڈنٹس ایکشن کمیٹی ءِ سیمی بنجاھی کمیٹی ءِ دیوان کماش شبیر بلوچ ءِ سروکی ءَ دو روچ ءَ دلجمی ءَ گوں برجم دارگ بیتگ۔ دو روچی دیوان ءِ تہ ءَ مزن کارگشاد ءِ بنجاھی اھوال کہ آھانی تہ ءَ کُلیں کمیٹیانی اھوال، نگدکاری، گَل کاری، ہندی ءُ میان استمانی سیاسی جاورال ءُ آوکیں گامگیج ھوار بیتگ اَنت۔ دیوان ءَ سرجمیں بنگپانی سرءَ دلجمی ءَ گوں گپ ءُ تران ءَ پد آوکیں گامگیج ءِ تہ ءَ جتا جتائیں پیسلہ زیرگ بیتگ اَنت۔ 

‎دیوان ءِ اولی روچ ءِ بندات چہ بنجاھی کماش ءِ اجازت ءَ کنگ بوتگ، اولی روچ ءِ بنداتی بھرءَ گوستگیں بنجاھی اھوال کہ دیوان ءِ دیم ءَ پیش کنگ بیت اَنت کہ آھانی تہ ءَ گل ءِ کُلیں کمیٹیانی اھوالاں ھوار ایدگہ مزن مزنیں مراگش، صباء لٹریری فیسٹیول ءِ مراگشانی اھوال، بلوچستان کتاب کاروان ءُ بلوچ لٹریسی کیمپئین ءِ اھوال ءَ ھوار گل ءِ کُلیں کارکردگی دیوان ءِ دیم ءَ پیش کنگ بیتگ اَنت۔ 

‎بنجاھی دیوان ءِ دومی بھرنگدکاری اَت کہ آئی ءِ تہ ءَ سنگتاں گوستگیں گل ءِ کارکردگی سرءَ چمشانک دیان ءَ کسان ءُ مزنیں نزوری شون دیان ءَ نگد کُت ءُ پہ کارانی گھترءُ شرتر کنگ ءَ جتاجتائیں شورءُ سلاہ دات۔ نگد ءِ سر ءَ سنگتاں تران کنان ءَ گوْشت کہ نگد ھما سلاہ اِنت کہ آئی ءَ چہ یک سیاسی جھدکارے وتی سیاسی کِرد ءَ تراش ایت ءُ گل ءَ چہ کُلیں رد سیاسی روشت ءُ املاں چہ رکین ایت۔ شئوری ءُ سنجیدگیں نگداں چہ گل وت ءَ روچ پہ روچ مھکمتر کنان ءَ وتی مکسد ءِ سوبمندی نیمگ ءَ جُنزان کنت۔ مئے جھدکار نگد ءَ چہ مہ تُرس اَنت بلکیں آئی ءَ وش اتک بہ کن اَنت کہ آئی ءِ سرءَ نگد بیگ اِنت، بزاں آ جہدکار ءُ گل امل ءَ اِنت کہ نگد بیگ اِنت۔ نگد ءَ چہ تچوکیں جھدکار نزوریں سیاسی سِنچ ءِ واھُند بنت ءُ نزوریں سوچ ءَ چہ بلوچ نودربر سیاست گھترءُ دیمروئی کُت نہ کنت۔ 

‎دیوان ءِ دومی روچ ءِ اولی بھر گل کاری اَت کہ آئی ءِ تہ ءَ بنجاھی سنگتاں ءَ تران کنان ءَ گوْشت کہ گل مرچی جتا جتائیں پروگرام ءُ پالیسیانی وسیلہ ءَ نہ تھنا تنظیم کاری کنگ اِنت بلکیں گل وت ءَ مھکم کنان ءَ کیڈرسازی ءِ امل ءَ ھم اولی سرپ ءَ اوشتاتگ۔ اے سنگتانی شپ ءُ روچی ئیں امل ءِ برورد اِنت کہ بلوچ نودربر سیاست روچ پہ روچ مھکمترءُ شاھگان بیان اِنت، بلے چوشکہ سیاست مٹ بیوکیں املے داں وھدیکہ ما وتی سوچ ءُ پِگرءِ تہ ءَ دیمروئی ءُ آشوب میار ایں گڈا مئے سیاسی امل روایتی ءُ ھوادگ بنت چیاکہ سیاست ءِ تہ ءَ ھچ چیز دیوال ءِ سر ءَ نبشتگیں لبزنگ اَنت کہ کائم ءُ دائم بنت بلکیں بلوچ ورناھاں مرچیگیں دور ءِ کچ ءَ وتی سوچ ءُ پِگر توانا کنگی اَنت ءُ وتی سرجمیں زِند ءُ عمل گوں راجی جہد ءَ بندوک کنگی اَنت ءُ ہرچ ڈولیں ترندیں جاورانی دیم ءَ مھکمی ءَ اوشتگی اِنت۔ 

‎دیوان ءَ گل ءِ بنجاھی کماش ءَ تران کنان ءَ گوْشت کہ مئے ورنا وتی جِند ءُ اے اھد ءِ کدرءُ ارزشت ءَ بہ زان اَنت ءُ وتی مکام ءَ پجاہ بیار اَنت کہ آ چنچو مزن مزنیں کار کُت کن اَنت، پمیشکا آھاں وتی بودناکی ءُ لائکی زوال کنگ ءِ جاہ ءَ راجی گھتری ءِ ھاترءَ کار بندگی اَنت۔ اے وھد ءَ یک بلوچ ورنایے ءَ شیوار ءُ ھساس بیگی اِنت ءُ وت ءَ چہ در سیاسی روشت ءُ نادُراھیاں رکینگی اِنت پرچاکہ مئے نپری تاوان سرجم ءَ راجی تاوان ءِ کالب ءَ کیت ءُ راج ءَ تاوان دات کنت۔ بلوچ ورنا زیت دمبرگ ءُ ارزانی ءَ دلجم بیگ ءِ جاہ ءَ یکشلیں جھد ءِ پلسپہ ءَ مھکم بہ کن اَنت ءُ نودربر سیاست ءِ مھکم کنگ ءَ وتی کاملیں زوراں بہ جن اَنت۔ 

‎دیوان ءِ چارمی بہر ہندی ءُ میان استمانی سیاسی جاورال اَت کہ آئی ءِ تہ ءَ بنجاھی سنگتاں تران کُت ءُ گوْشت کہ میان استمانی سیاست ھما پِڑ اِنت کہ سرزاھر ءَ بگندئے بے توارءُ میزان ءَ جُنزان اِنت بلے اشی ءِ پُشت ءَ مزن مزنیں جنگ ءُ جدل جنزگ ءَ اَنت۔ میان استمانی سیاست ءِ تہ ءَ اناگت یک ویلے سیاسی منتر نامہ ءَ مٹ کنت بلے چوش نہ اِنت کہ سرجم ءَ ھمے ویل سیاست ءَ سُرین ایت بلکیں ایشی ءِ پُشت ءَ جنزوکیں زمینی، راجی، دینی، ماشی ءُ ایدگہ جیڑہ اَنت کہ یکبر ءَ یک ویلے ایشاں

 ترانز(چنگاری) دنت ءُ اِش پاھار بنت درکائینت ءُ دیمتر ءَ اِے جنگ ءِ دروشم ءَ دنیا ءِ سیاست ءَ مٹ کن اَنت۔ دنیا ءِ تہ ءَ ھمے ڈولیں ویل میاں استمانی سیاست ءِ سرءَ سانمند بنت بلے مرچی دنیا ءِ تہ ءَ سدانی کچ ءَ سیاسی جیڑہ ھست کہ دنیا آیانی نیمگ ءَ آ کچ ءَ دلگوش گوْر نہ کنت ءُ دومی نیمگ ءَ دنیا کہ ملٹی پولرءِ نیمگ ءَ شُتگ ءُ ھرچ استان ءَ وتی نپ ءُ سیت یک استانے ءَ گیش بازاستان ءَ گوں بندوک کُتگ اَنت ءُ چوشکہ دنیا ءِ ھرچ استان ءِ وتی جیڑہ ءُ جنجال بازاَنت پمیشکا باز سیاسی جیڑہ یا جنگ دنیا ءَ بازیں مُلکاں دلگوش گور کنگ نہ بنت۔ 

‎دیوان ءِ سرجمیں بھرانی سر ءَ دلجمی ءَ گوں گپ ءُ ھبرءَ چہ پد گُڈی بن گپ آوکیں گامگیج ءِ تہ ءَ پہ گیشیں کارءُ گل ءِ مھکم ءُ دیم ءَ کنگ ءِ ھاترءَ جتاجتائیں پالیسی ٹھیگ بوتگ ءُ پیسلہ زیرگ بوتگ کہ چو اے ڈول ءَ اَنت، اے میان ءَ گل ءِ سرجمیں ھنکیناں لیڈرشپ ورکشاپ اڈ دیگ بیت، نمیرانیں کمانچر بلوچ ءِ یات ءَ لیاری ءَ لیاری آرٹس اِگزیبیشن اڈ دیگ بیت، کیچ، ملیرءُ ڈی جی خان ءَ صباء لٹریری فیسٹیول برجم دارگ بیت، بلوچ لٹریسی کیمپئین ءِ وسیلہ ءَ پہ نودربراں کیرئیر کونسلنگ ءِ کتابُکے چاپ ءُ شِنگ کنگ بیت، ڈیجیٹل لٹریچر ءِ درْچ ءَ ڈیجیٹل لکچر جوڈ کنگ بیت کہ آئی ءِ تہ ءَ نوْشت لکچر ہم ہوار اَنت، اے کُلیں پیسلھاں ھوار دگہ کسان ءُ مزنیں پیسلہ زیرگ بیت اَنت ءُ گل ءِ ہنکینانی مھکم کنگ ءِ ھاتر ءَ پالیسی ٹھینگ بوتگ۔ 

‎دیوان ءِ سرجمیں بھرانی سر ءَ دلجمی ءَ گوں گپ ءُ تران ءُ آوکیں گامگیج ءِ تہ ءَ جتا جتائیں پیسلہ زیرگ ءَ پد سیمی بنجاھی دیوان دو روچ ءِ دیوان ءَ پد چہ بنجاھی کماش ءِ رزا ءَ آسر کنگ بیتگ۔ 

ھمے سال بیست ھشت جولائی ءَ گوادر ءَ بیوکیں بلوچ راجی مچی ءِ چن لانچ برجاہ ءَ اِنت، اے درگت ءَ مروچی ھاران ءَ بلوچ یکجھتی کمیٹی ءِ نیمگ ءَ چہ نواب اکبر بگٹی اسٹیڈیم ءَ یک نیادے برجم داشتگ، چریشی ءَ زالبول ءُ مردیناں مزنیں کچے ءَ بھر زرتگ-

اے درگت ءَ بلوچ یکجھتی کمیٹی ءِ راھشون ڈاکٹر صبحیہ بلوچ ءَ تران کنان ءَ گْوشتگ کہ مارا بلوچ پجّار نام سر ءَ جنگ ءَ اَنت، بلوچ چُکچینی جتاجتائیں دروشماں برجاہ ءَ اِنت-

آئی ءَ گْوشتگ کہ دو سد سال ءَ ساری ئیں بلوچ ءُ مرچگیں جتا اَنت، دو سال ءَ ساری بلوچ وتی راہ راھبند وت بیتگ، مروچی بلوچ نمازی، ذکری ءُ ٹکاں چہ بھر ءُ بانگ اِنت-

آئی ءَ گْوشتگ کہ بالاچ ءَ را کُشتگ کہ بی ایل اے ءِ بھتام جتگ، بلے بالاچ لاش کھول دگ سر ایر کتگ ءُ زھرشانی کتگ آ اے سرپد اَنت کہ بالاچ واتر زندگ نہ بیت بلے آ زھرشانی کنان ءَ دگہ یک بالاچے ءِ گوم ءَ اے وڑ مہ بیت-

آئی ءَ گْوشتگ کہ یک نودربرے وتی راجی ھک ھاتر ءَ گپ کنت آئی ءِ چست کنگ ھاتر ءَ دہ دہ پوج گاڑی کاینت بلے ھما نشہ بھا کنوک مئے پدریچ ءَ تباہ کنگ ءَ اَنت آیانی نیمگ ءَ ھچ کس نہ روت-

آئی ءَ گْوشتگ کہ ما مھکم بہ ایں وتی باندات ءِ ھاتر جُھد کنگی اِنت ما وتی مردماں رکینت کُت بہ کن ایں-

ڈاکٹر صبیحہ بلوچ ءَ تران کنان ءَ گْوشتگ کہ بلوچ راجی یکجاھی ءِ کاروان مروچی سرجمیں بلوچ راج یک زمہ واریں گلے ءُ وتی راجی زہ واریاں شریں وڑے ءَ سرپد بیت ءُ پیلو کت کنت-

آئی ءَ گْوشتگ کہ ھاران ءِ بلوچاں گوں دزبندی کتگ کہ اگاں بلوچ راج ءَ رکینگ لوٹ ءِ، جھان ءَ را یکجاھی ءُ تپاکی ءِ منانک ءَ پیشدارگ لوٹ اِنت گُڑا بیست ھشت جولائی ءِ روچ ءَ بلوچ یکجاہ ءُ دودمانیں راج ءِ پیشداگ روچ اِنت-

آئی ءَ دیمتر ءَ گْوشتگ کہ بیست ھشت جولائی ءَ راجی مچی ءِ سوبمند کنگ ھاتر ءَ ھاران ءِ راج بلوچ یکجھتی کمیٹی ءِ چندہ مھم ءَ جوانیں وڑے ءَ بھر بزور اَنت-

ھاران ءَ شھر ءَ گوستگیں بازیں روچاں چہ شھری ءُ آوار جنگ بیتگیں مردم ءِ سیاد وارس آئی ءِ یل کنگ ءِ ھاتر ءَ زھرشانی اِنت-

ھاران زھرشانی کنوکاں اے درگت ءَ چہ گْوشتگ کہ آوار جنگ بیتگیں دمگی انتزامیہ ءِ نا دلگوشی ءُ بے پرواھی ءِ سبب ءَ تنی وھدے یل کنگ نہ بیتگ ءُ نانکہ مختیار مینگل ءِ کھول ءَ آئی ءِ یل کنائینگ درگت ءَ ھچ سرپدی ندیگ ءَ اَنت-

نندانک ءَ نشتگیں زھرشانی کنوکاں زھرشانی ءَ برجاہ کنان ءَ تھتگ بندیں ھڑتال ھلاس کتگ مروچی چہ ھاران ءَ شال کراچی ءِ بُنجاھی شھدگ سر ءَ نندانک داتگ شھدگ گاڑی واستا بند کتگ زھرشانی ئیں گدانے برجم داشتگ-

دومی نیمگ ءَ ڈپٹی کمشنر منیر احمد سومرو ءَ گْوشتگ کہ مختیار احمد مینگل آوار جنی ءِ وئیل سر ءَ دمگی انتزامیہ آوار جنگ بیتگیں مردم ءِ یل کنائینگ ھاتر ءَ سرجمیں آسراتیاں کارمرز کنگ ءَ اِنت زوت یل کنگ بیت وتی کھول گور ءَ بیت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں وتی درشان ءَ گوشتگ مئے سرمچاراں تربت ءِ شھر ءَ زورگریں پاکستان ءِ چیریں ادرھانی کارمندے کشتگ –

آئی ءَ گوشتگ بی ایل اے ءِ سرمچاراں تربت ءَ گوادر اسٹاپ ءَ پاکستانی چیریں انٹر سروسز انٹیلیجنس ءِ یک کارمند ارشاد ء گل مھمد جھمنند سندھ تیرگواری کتگ ءُ کشتگ-

جارکش ءَ گوشتگ ایشی ءَ وتی رنگ ءُ دروشم مٹ کتگ ءُ آئی ایس آئی ءِ واستا تربت ءِ شھر ءَ چاریگری کتگ-

گڈسر ءَ بلوچ لبریشن آرمی ءَ گوشتگ اے اُرش ءِ زمہ واری ءَ من ایں ءُ زورگریں پاکستانی پوج ءُ آئی شریدارانی سر ءَ مئے اُرش برجاہ بنت اِنت-

ھزدار ءِ دمگ نال گریشگ ءَ بیگواہ بیتگیں مردمانی کھولانی نیمگ ءَ سیمی روچ ءَ سی پیک دگ ءِ سر ءَ زھرشانی نندانک برجاہ انت ءُ چریشی ءَ سبب ءَ روانی مھتل انت-

کھولاں پریس کانفرنس کنان ءَ گوشتگ کہ انتزامیہ مئے برتگیں مردمانی ارزیاں نبشتگ کنگ ءَ نہ اِنت ءُ چریشی ءِ سبب ءَ ما گوستگیں سَے روچاں دگ ءِ سر ءَ نشتگ انت –

آیاں گوشتگ اگاں باندات ءَ دان مئے گپ گوشدارگ نہ بیت اَنت ءُ مئے مردم دیم ءَ آرگ نہ بیت انت گڑا مئے زھرشانی اد ءَ برجاہ بوگ ءِ ھواری ءَ ھزدار ءَ شال ءُ کراچی ءِ مزن شھدگ بند کنگ بیت اِنت-

آیان پریس کانفرنس ءَ گوشتگ آدینگ ءِ روچ ءَ لس پوشاکی کارندھانی ھواری ءَ سی ٹی ڈی ءِ کارمند گون بیتگ اَنت کہ آیاں بیڑ برتگ ءُ شاہ جان ء سلیم، گور خان ء خیر جان، عارف ء عبدالرھمان، مھمد جان ء لال بکش، میار ء لال بکش، منیر اھمد ء سبرو آوار جتگ ءُ برتگ انت-

آیاں گوشتگ نیم راہ ءَ منیر ء سبرو یل کنگ بیتگ ءُ آ دگہ مردمانی بارو ءَ روچ ء مروچی ھچ اھوال نیست اِنت-

روکپتی بلوچستان ءَ سیادی داروکیں پنچ کس پورسز ءَ رودراتکی بلوچستان ءِ تیابدپی شھر گوادر ءَ دزگیر کتگ اَنت-

چاگردی ترامجاھاں شنگ بیتگیں اھوالانی رد ءَ پنچ ماں گوادر ءَ پورسز ءَ دزگیر کتگ ءُ برتگ کہ آیانی سیادی اَچ روکپتی بلوچستان ءِ جتا جتائیں جاھان اَنت-

گرگ بیتگیں مردمانی پجار عارف جدگال جھمنند دشتیاری، نوید جدگال جھمنند چھبار، معین نقشبندی جھمنند راسک، امری مھمد شاہ بخش جھمنند چھبار ءُ عبدالرھمان گمشادزئی جھمنند سراوان ءِ ناماں زانگ بیتگ انت-

اھوالانی رد ءَ ایشانی توک ءَ عارف جدگال ماں بنکی ءَ دشتیاری یے مردم انت بلے اے وھد ءَ آ گوادر ءَ نندوک بیتگ-

زانگ بہ بیت ھردوکیں بلوچستان ءِ سیمسرانی مردم وت ماں وت سیادی کن اَنت چریشی ءَ رپت ءُ آمدگ ھست انت بلے کش اتگیں لکیر ءَ چہ مردمانی سیادی ءُ وارسی سستگ ءُ جتا کتگ –

بلوچستان ءِ دمگ پنجگور ءَ ناشناسیں سلاہ بندیں مردمانی تیرگواری ءَ چہ یک مردمے بیران بیتگ-

بیران بیتگیں مردم ءِ پجّار شکیل ء ڈاکٹر عبدالحمید نام ءَ چہ بیتگ کہ پنجگور بونستان ءِ جھمنند اِنت-

دمگی اِھوالکار گْوشگ اِنت کہ اے مرد ءِ سیادی سرکاری پلارمرزی کنوکیں سلاہ بندیں ٹولی ڈیتھ اسکواڈ ءَ اِنت-

بلے وئیل سوب انگت زانگ نہ بیتگ وھدے کہ اشی ءَ ساری ھم اے وڑیں وئیلانی زمہ واری بلوچ آجوئی لوٹوکیں سلاہ بندیں گلاں منّ اِتگ اَنت-