TBP Balochi

دُرنازیں دُری 

نبشتہ کار: سیپ بلوچ

دومی بھر

دی بلوچستان پوسٹ

آ وهد ءَ کہ من دُری دیستگ اَت دُری نوک سیر کتگ اَت مئے گِس ءَ اتکگ اَت منی ماس ءَ پسّے کُشت داوت کت  دُری منی ماس ءِ دلدوستیں دزگوهار ات ، یکے جاوران ءُ دومی گُژن ءَ من  هَلک یل دات ءُ درانڈهی بوتاں باز مدت ءَ هنکین ءَ چہ سستگ ات آں من کوٹی ءَ نشتگ اِت آں گوں وت ءَ وتسریں جُستاں بارے ایر کتگ ات آیاں دُری چاگرد ءَ پوه اِنت ، ؟ آیاں دری ءَ اے چادر کہ سرا کتگ دُری زانت کہ اے چادر بلوچی یے چنچو مدت بوتگ اے چادر اے میتگاں بند بوتگ ؟ آیاں دری ءِ کَلاش انگت گِس ءَ ایر بیت؟ آیاں دری ءَ مرچیگیں وهدے تورشتاں آشناه انت ، راجی جنزے بلوچ مردیناں هوار بلوچ زالبولانی کوپگ ءَ انت؟ من هیالانی بوجیگ ءَ چاگرد دیم ءَ کتگ ات ءُ جستانی امبارے منی دیم ءَ ات ، من ءَ روگی ات دُری ءِ هلک ءَ پہ تگردے ءِ زیرگ ءَ ، کہ روچ جهل کپان ات من پرپٹ ءَ سوار بوتاں جنزان جنزان ءَ داں درنازین دری ءِ هلک ءَ سر بیت آں ،(چامبئ) لِچّ جتگیں گسے کہ پیسری کُلانی رنگے گسے من دیم ءَ داشت ءُ پس، مُرگ، کُچک، کَرگْوش ءُ کَپودر گِس ءِ دیم ءَ یلو اِت اَنت من ءَ اے ندارگ ءَ گوں وت بُرت داں گس ءَ چہ جنکے در اَتک ، ءُ اتک منی نزدیک ءَ ، من جست کت ناکو میار ءِ گس همیش اِنت؟

جنک ءَ پسہ دات جی هو میار ءِ گِس همیش اِنت بیا گس ءَ من ابّکہ بیت آں ، دومی من ڈن ءِ ندارگ ءَ گوں سک ملار ات آں بلوچی مهرگڑیں دودمانے ءِ ءُ یکروچیگیں استالے ءِ رنگ ءَ من پہ ابدی رنگ ءَ گندگ ءَ ات آں ، داں جنک ءَ یکرندے پد ءَ گْوشت بیا گس ءَ ، من چہ پرپٹ ءَ ایر آتک آں ءُ پہ چمبئی ءَ روان بوتاں داں من چمبئی ءِ تہ ءَ شت آں ، دُری نشتگ ات ، تگردے زان ءِ سر ءَ ات ئِے من وش اتک کت ، ءُ من ءَ جست کت ئِے تو کَی زهگ ئے ابا ؟ 

من گشت من لال بی بی ءِ زھگاان ءُ بچکند ات ئِے هو ! ترا  یکبرے من چم دیستگ کتگ پجاورتگ بلے جست المی پول ات- 

جن ئے براهناز آپ بیار پہ وتی برات ءَ ، داں براهناز ءَ آپ گون ات اتک سارتی ات من تُنیگ نہ ات آں بلے من آپ کمو وارت ، ءُ منی چماں اے گِس ڈنا چمبئی ءِ ات ءُ اندر ءَ تگردوے ، منی دیم ءَ هش ئِے ایر ات ، چد ءُ پیسر انچُش گمان بوت ماش ڈلگ ءَ بوتگ ، منی راستیں کَش ءَ اسپیتیں پس ءِ پژم ایر اِت انت ءُ ششتگ ءُ ساپ اِت انت ، بونڈ ءُ گندل بزان نیپادے دُری دوچگ ءَ بیت ، ءُ دو ڈوڈ پَلِے  دپا ٹَنگ اتگ ات سے سَپت سرماں سر ءَ ایر ات ، گِس ءِ چُلے نیمگ ءَ سِکّہ لگ اتگ انت رُود اِش مان اَت ، گس ءِ دیم ءَ سچکانین تگردانی جلواهناکی من اے ندارگ ءَ گوں هیران ءُ اجکہ اِت آں، دگہ بازیں انچیں چیز ایر ات کہ من نامان اش نزان آں بوت کنت- 

بلے هیرانی ایش ات ، کازی ساب ءِ کتاب ءِ پیتی ءِ سر ءَ ایر ات شاگ ماں سبزیں ساوڑ ءَ ، منی چم پہ کتاب ءَ شت ءُ من دراهینت درجان براهناز وانگ ءَ انت؟

دُری ءَ پسہ دات هو اے جهلی میتگے وانگجاه ءَ روت پہ وانگ ءَ اے سال ءَ وانگ ئِے هلاس بیت ، ده ءَ پد اے دمگاں وانگ جاه نیست ، اے جیڑه ءَ من آشناه ات آں بلے اے ندارگاں کہ گوں من چم دیست ات آں اے ندارگ پہ من مڈی ات انت من ایشانی تہ ءَ اَنچُش گمان بوت کہ لیب ءَ آں من ءَ بازیں جست کنگی ات بلے نوں روچ ایر روان ات براهناز ءَ چاہ آورت انت ، کجام چاه هُشکین شیری چاه کہ من چاه گٹ ءَ ایر بُرت پورا اے چاه من چدو پیسر نہ وارتگ ات اے نوکین تامے ات من جست کت اے میش ءِ شیر انت گڑا براهناز کندگ ءَ لگ ات هو بُزگل انگت نہ اتکگ ترا دوست نہ بیت میش ءِ شیر ، پهل کن ، من گشت نا سک وش آں-

دُری ءَ چدو پیسر گوں من بازیں گپ ءُ هال کت ءُ من اوں بلے من کارے ءَ اتکگ ات آں وتی گپ جت ، دُرجان من ءَ تگردے پَکار اِنت ، روتاپی چیر گیجاں ، کسانیں گڑا دُری ءَ براهناز گُشت پچار کسانیں تگرد هست برات ءَ تگردے بہ دے-

من گوں براهناز ءَ ڈن ءَ در اتک آں دُری اتک کہ ڈنا تگردے ایر ات من گشت من ایشی ءَ زیراں ، کہ اے کسان انت پہ ڈن ءَ چیر گیجگ ءَ شر اِنت من ءَ شهر ءَ راه دیگی انت-

تگرد باز ایر َت پرچا کہ دُری ءِ پوریاگری همے رنگیں چیز آن ات دُری جاگهے پیش ءِ دارے تگردے پژمے بها کنت لوگ ءَ هرچ دنت اے کسہ دُری ءَ پیسر ءَ گِس ءَ کت انت گوں من –

دُری ءَ گشت اے تگرد براهناز ءَ کمو کارمرز کتگ ڈن ءَ چیر گپتگ نشتگ تو دگرے بچار ، من گُشت اے شر انت ءُ براهناز ءَ اوں گُوشت اگاں برات ءَ سِچک دوست اِنت بِل زیر ایت ئِے-

من دِگرے چیر گیج کناں پہ وت من اے مِهراں سرچکاریں مات ءُ زهگ بلوچی دودمان دیست اَنت من ءَ اے سارتی ءَ سارت کنگ ءَ نہ ات من ءَ روگی ات من گُشت پہ تگرد ءَ چنچو زر بہ دیاں ، گڑا دُری ءَ دْراهینت من ترا پہ اے تگرد ءَ زر نہ گراں اگاں بگراں تئی مات سهی بہ بیت منی جند ءَ جنت ، ءُ کند ات ئِے-

من گشت انّا چُش نہ اِنت ، تو چو کن ایشی ءِ زراں بہ زیر ترا زلورت بیت ، گڑا براهناز ءَ گشت هنچش کہ تو اے تگرد ءَ کسے ءَ سوگات کنگ ءَ ئے ءُ من ھم اے تگرد ءَ پہ ترا سوگات کنگ ءَ آں،  من گیشیں گپ نہ کت ءُ ایشانی منت گپت ءُ راهادگ بیت آں-

شھزاد بلوچ ءِ کھول ءِ مردمانی نیمگ ءَ زیارت ءِ شھیدانی دومی سالروچ ءِ درگت ءَ یک پرسداری دیوانے برجم دارگ بیتگ کہ ایشی ءِ سر ءَ کھول ءِ مردم ءُ ایدگہ مردماں بھر زُرتگ۔

گشتانک دیوکاں شھیداں داد پیش کتگ ءُ گشتگ کہ شھید شھزاد بلوچ گوں آئی ءِ دوئیں ھمراہ ھتیک بلوچ ءُ اھمد بلوچ ءَ 4 جُلکان 2022 ءَ لشکر ءِ کارندھاں سول پوشاک ءَ گوں موسیٰ کالونی کالج ءِ نزیک ءَ پہ زور بیگواہ کتگ انت۔ 2022 ءَ شھزاد بلوچ، ڈاکٹر مکتار گوں دگہ 9 بیگواھیں مردم زیارت ءِ نزیک ءَ دروگیں انکاؤنٹر ءَ شھید کنگ بوتگ اَنت۔

ھمے درچ ءَ گوں تران کنان ءَ ھواریں مردماں گْوشتگ کہ ریاستی ادارہ بلوچستان ءِ بے گناھیں بلوچاں آوار جن اَنت ءُ وتی ٹارچر چیمبراں ٹارچر کن اَنت، آیانی مردگیں لاشاں تیر جن اَنت ءُ ویرانیں زمینانی تہ ءَ ٹارچر کن اَنت یا سک ٹارچر کن اَنت۔

شھزاد بلوچ ءِ گوھار ءَ وتی ھیال درشان کتگ ءُ گشتگ کہ کلات ءِ شھیدانی کُلیں کھول ءُ کلات ءِ ایدگہ نزریاتی نودربراں منت واراں، آیاں کلات ءِ شھیدی ءِ دومی سال ءِ درگت ءَ مروچی برجم داشتگیں ھوالہ ءَ بھر زرتگ ات، شمئے گندگ ءَ گوں سنگتاں، من ءَ مرچی سما بیت کہ ما تھنا نہ ایں، شما درست مئے ھمراہ اِت، شھزاد تھنا یک ٹبرے ءِ چک نہ اِنت بلکیں آ بلوچ راج ءِ چُک بوتگ۔ بیا اِت ما درست یکجاہ سوگند بہ کن ایں کہ وتی شھیدانی رند ءَ رو ایں ءُ بیگواھیں بندیگانی توار بہ ایں-

زیارت ءِ شھیدانی یات ءَ شھزاد بلوچ ءِ کھول ءِ مردماں کُرآن ونت ءُ گڈی ءَ لنگر بھر کت۔

بلوچستان ءِ اڑوکی سروزیر سرفراز بگٹی ءَ پاکستان ءِ یک ٹی وی چینلے ءَ گپ ءُ تران کنان ءَ گوشتگ آ بلوچستان ءِ آجوئی ءَ پرکاریں گھگیریں تاکتاں گوں گپ ءُ تران ءِ زور ءَ ایمنی ءِ جاوراں ودی کنگ ءِ ستک ءَ دار انت، بلے ھمے گُلگِدار ءِ وھد ءَ بلوچستان ءِ ناگیگیں جاوراں ریاستی پریام ءَ ابید بلوچ سلاہ بنداں گوں ھوارینگ ءَ بلوچ زرمبشت ءَ تاکت ءِ زور ءَ ھلاس کنگ ءِ لیکہ ءَ دار اَنت – بلے دومی نیمگ ءَ بلوچ راجدوستانی نیمگ ءَ اے بھتام ھست انت سرفراز بگٹی وت یک کشندہ ٹولی ءِ سروک انت ءُ بلوچستان ءِ ناگیگیں جاوراں گیشتر دمینگ ءَ اِنت-

بیست ءُ یکمی کرن ءِ بندات ءَ پوجی زوراک جنرل پرویز مشرپ ءَ پوجی بیڑ بندات کتگ ءُ بلوچستان کُشت ءُ ھونانی توک ءَ مِچلینتگ – چریشی ءَ پد پیپلز پاٹی، مسلم لیگ نون ءُ تھریک انساپ ءِ سرکارانی وھد ءَ بلوچ راج ءَ گوست ءِ ناانساپیانی سر ءَ پھلی لوٹ اتگ بلوچ جیڑہ ءَ را پُر ایمنیں رنگے ءَ گپ ءُ تران ءِ گون ءَ شور داتگ، بلے ایشانی سرکار ءِ وھد ءَ ھم بلوچستان ءَ پوجی بیڑ برجاہ بیتگ اَنت ، ھزاراں مردم زورانسری آوار جنی ءِ نشانگ کنگ بیتگ انت، سدانی کچ ءَ زورانسری بیگواھیں مردمانی لٹ ءُ کٹ کتگیں لاش دزکپتگ انت ءُ بازیں بیگواھیں مردم ناپجاریں مانشاں کل کنگ بیتگ اَنت، سدانی ھساب ءَ دروگیں پولیس دیم پہ دیمی میڑاں کُشگ بیتگ اَنت ءُ اے سلسلگ داں انگت ءَ برجاہ اِنت-

بلوچستان ءِ چیر ءُ اندریں جاورانی سرپدیں سیاست دان ءُ کواس ھمک وھد ءَ لیکہ درشان کنگ ءَ انت بلوچستان ءِ پیسلہ ءَ املی دروشم ءِ سر ءَ پاکستانی پوج ءِ گوشگ ءَ کنگ بیت اِنت ءُ پوج ءِ واھگ ءُ لوٹ ءَ ابید بلوچ جیڑہ ءِ سر ءَ گپ کنگ، بلوچستان ءِ آڑوکی سرکار ءُ سروزیر ءَ واک نیست اِنت-

بلوچستان ءَ گپ ءُ تران کنگ ءِ واستا سازگاریں جاورانی ودی کنگ ءُ بلوچ راج ءِ سر ءَ ریاستی زوراکیانی ھلاس کنگ ءَ ابید گپ ءُ تران کنگ ناسرجمی گندگ ءَ کیت اِت انت- گیر سنچداریں درشان ءُ تاکت ءِ کارمرد ءَ گپ ءُ تران بیت نہ کنت انت-

دومی نیمگ ءَ بلوچ آجوئی لوٹوکیں سلاہ بند ءُ بے سلاھیں گلاں گوں گپ ءُ تران ءِ بنگپ ءِ سر ءَ یکشل ءَ گوشگ ءَ انت آ بلوچستان ءِ سرکار ءَ یک بتیں سرکارے سرپد بنت اِنت ءُ آ گپ ءُ تران ءَ تچک ءَ پاکستانی پوج ءَ گوں میان اُستمانی پتر ءَ، بلوچستان ءِ آجوئی ءِ بنگپ ءَ گوں بیت اِنت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ وتی شنگ کتگیں یک درشانے ءِ تہ ءَ گْوشتگ کہ ما پر ایمن بیتگ ایں، ما پر ایمن ایں ءُ پرایمن بہ ایں- راجی زانت سرپدی ءُ زانشت مئے اولی لوٹ اِنت – بلوچ راجی مچی ءِ کاروان مروچی سرجمیں بلوچ راج ءِ زمہ واریں گل اِنت ءُ وتی راجی زمہ واریاں شریں وڑے ءَ سرپد بیت ءُ پیلو کنت-

ڈاکٹر ماہ رنگ بلوچ ءَ گْوشتگ کہ ما سرجمیں دودمانیں جھان ءَ اے گوشگ لوٹ ایں کہ آ ریاست پاکستان ءَ گوں تُرندی ءَ لگام بہ دنت کہ آ مئے سرڈگار ءِ سر ءَ مئے پُرایمن، کانودی ءُ انسانی ھکانی جُھد ءَ ایرموش کنگ ءِ ھاتر ءَ وتی نئیت ءَ مٹ بکنت ءُ راجی مچی ءَ اڑنان مان کنگ ءِ ھچ وڑیں جُھد مہ کنت-

اگاں ریاست ءَ اے پُرایمن راجی توپان ءِ دارگ ءِ ھاتر ءَ تاکت ءِ کارمرز کنگ جُھد کُت گُڑا پد ءَ اے راجی توپان ءِ گر ءُ دار کنگ ءِ نا ممکن بیت ءُ پد ءَ آسر ھما بنت کہ ریاست ءِ وھم ءُ گمان ءَ نہ بیت انت-

آئی ءَ یکرندے پد ءَ بلوچ راج ءَ گوں دزبندی کتگ کہ اگاں بلوچ راج ءَ رکینگ لوٹ ئے، جھان ءَ راج ءِ یکجاھی ءِ منانک ءَ پیشدارگ لوٹ ئے گُڑا بیست ءُ ھشت جولائی ءِ روچ ءَ بلوچ تپاکی ءُ دودمانیں راج ءِ پدر کنگ ءِ روچ اِنت-

ھمے سال ءِ بیست ھشت جولائی ءَ گوادر ءَ بیوکیں بلوچ راجی مچی ءِ چن ءُ لانچ برجاہ، بلوچستان ءِ جتاجتائیں دمگاں سرپدی مھم برجاہ-

شمبے ءِ روچ ءَ بلوچ یکجھتی کمیٹی ءِ یک ٹولی ءَ شمبے ءَ ھب بار روم ءَ وکیلاں چہ دیوان کتگ ءُ آیاں راجی مچی ءِ درگت ءَ داوت داتگ اَنت-

ھب ءِ وکیلاں بی وائی سی ءِ ٹولی ءِ ھرچ وڑیں کنک ءِ دلجمی داتگ، ھب بار ءَ بلوچ یکجھتی کمیٹی ءِ آوکیں ٹولی ءِ شرپ ءَ بار روم ءَ یک مراگشے برجم داشتگ-

اے درگت ءَ بی ایس او پجّار ءِ گوستگیں چیئرمین ایڈوکیٹ واحد رحیم بلوچ، بلوچ یکجھتی کمیٹی ءِ بُنجاھی آرگنائزنگ کمیٹی ءِ باسک عارف بلوچ، مای زیب بلوچ ءَ وتی ھیال ءُ لیکہ درشان کنان ءَ بلوچ یکجاہ بیگ ءَ زور داتگ اَنت-

ھمے وڑ گوادر ءَ بلوچ یکجھتی کمیٹی ءِ بُنجاھی راھشوم صبغت اللہ شاہ جی ءِ نیشنل پارٹی ءِ دمگی سیکریٹریٹ ءَ شتگ-

نیشنل پارٹی دمگی سروک ھوت عبدالغفور صوبائی فشریز سیکریٹری آدم قادر بخش تحصیل صدر حاجی ناگمان تحصیل جنرل سیکرٹری ولید مجید ءَ مھمان وش آتک کتگ اَنت آیانی ھمراھی ءَ وسیم سفر ءُ جمیل بلوچ بیتگ اَنت- دمگی سیاسی درگت ءَ گپ ءُ رپ بیتگ – آیاں راجی مچی ءَ بھر بیگ ءِ داوت داتگ اَنت-

ھمے وڑ مروچی بلوچ یکجھتی کمیٹی کراچی زون ءِ نیمگ ءَ جھانگیر دگ بلوچ پاڑہ ءَ یک نیادے اڈ دیگ بیتگ ءُ بیست ھشت جولائی ءَ گوادر راجی مُچی ءِ درگت ءَ سرپدی دیگ بیتگ-

دومی نیمگ ءَ کراچی ءَ فقیر کالونی ءُ لیاری ءِ جتاجتائیں ھنداں بلوچ یکجھتی کمیٹی نیمگ ءَ بیست ھشت جولائی ءَ بیوکیں راجی مچی ءِ درگت ءَ سرپدی دیگ ھاتر ءَ اسٹیکرز جتگ ءُ دیولانی سر ءَ نبشتہ کنگ بیتگ ءُ پتانک بھر ءُ بانگ کنگ بیتگ – ھمے وڑ لیاری ءُ ملیر ءِ بازیں جاھاں چندہ مھم ءِ تر ءُ تاب کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں چہ گوادر ءَ دیم پہ پنجاب ءَ مادن بروکیں دو ٹرالرانی سر ءَ اُرش کُرتگ ءُ تاوان داتگ اَنت۔

جارکش ءَ گْوشتگ کہ کیچ ءِ ھند شھرک ءَ مادیان کور ءَ سی پیک دگ سرمچاراں بستگ ءُ یک ٹرالرے ءِ سر ءَ تیرگْواری کُرتگ ءُ ٹائر پاٹینتگ اَنت ءُ دومی ٹرالر دگ ءِ میانجی ءَ اوشتارینتگ ءُ مانداشتگ۔

آئی ءَ گْوشتگ کہ پاکستان ءُ چین ءِ وتگڑیں راہ ءَ پاکستان دیمروئی ءِ پارست سرپد بیت ءُ پہ اے شوربندی ءِ آسر کنگ ءَ پاکستان ءَ بلوچستان ءِ سر ءَ لشکرکشی کُرتگ ءُ بلوچ راج ءَ زور بیگواھی، ژانگولیں جون ءُ لڈینگ ءِ سوگات داتگ، بلے چہ دژمنی ءَ نا آژنائیں پاکستانی لشکر بلوچ سرمچارانی دیم ءَ اگولو بیت۔

جارکش ءَ گْوشتگ بی ایل ایف ءَ پیش ءَ ھم باپاری مردمان ءَ کڈن کُرتگ کہ بلوچستان یک جنگجاھے کہ پاکستانی زور ءُ زوراکیانی دیم ءَ بلوچ سرمچار چہ راج ءِ کمک ءَ سُرپ ءِ دیوال جوڑ بیتگ اَنت۔ ما یکبرے پد ءَ ھما دُرسیں باپاریاں کڈن کن ایں کہ پاکستان ءِ ھرچ پیمیں شوربندی ءِ کمک کنوک راج دُژمن لیکگ بنت ءُ پمشکا چہ پاکستانی لشکر ءِ شوربندیاں وت ءَ گستا بہ کن اِت اگاں نہ گڑا وتی تاوان ءِ زمہ وار وت اِت۔

میجر گْوھرام ءَ گْوشتگ کہ بلوچستان لبریشن فرنٹ اے اُرش ءِ زمہ واری ءَ منّ ایت ءُ دیمتر ءَ تُرندیں اُرشانی پارست ءَ پاکستان ءَ پہ دراھگ ءَ لاچار کنگ ءِ کول ءَ کنت۔

بلوچستان ءِ دمگ کیچ ءِ بنجاھی شھر تربت ءَ ناشناسیں مردماں تیرگواری کتگ ءُ سندھ ءِ جھمنندے کشتگ-

پولیس ءِ رد ءَ تیرگواری ءِ وئیل تربت ءَ گوادر اسٹاپ ءَ پیش اتکگ کہ اود ءَ ناشناسیں مردماں تیرگواری کتگ ءُ سندھ ءِ شھر لاڑکانہ ءَ سیادی داروکیں ارشاد ء گل مھمد کشتگ-

پولیس ءِ رد ءَ تیرگواری ءَ یک رھگیرے زدگ ھم بیتگ ءُ آ ٹپانی درمانی ءَ ھسپتال ءَ برگ بیتگ-

ھسپتال ءِ رد ءَ زدگین ءِ تیر کوپگ ءَ لگ ات ءُ ھترہ ءَ ڈن انت-

بلوچستان ءِ دمگ ھاران ءَ پاکستانی پوج ءَ یک مردمے آوار جنگ ءَ پد گون وت برتگ-

گیشین اھوالانی رد ءَ ھاران ءِ دمگ شیروزی دگ ءَ گوستگیں شپ ءِ ساھت سَے ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ یک مردمے آوار جنگ ءَ پد گون وت برتگ-

آوار جنگ بیتگیں مردم ءِ پجار صضیر اھمد ء نزیر اھمد پیرکزئی ءِ نام ءَ زانگ بیتگ-

اھوالانی رد ءَ صغیر اھمد نادرہ کارگس ءَ یک ملازمے بیتگ –

ھمے ڈول ءَ چہ مستونگ ءَ سَے سال ءَ پیش بیگواہ بیتگیں مردمے یل بیتگ-

گیشیں اھوالانی رد ءَ سَے سال پیش مستونگ ءِ دمگ اسپلنجی ءَ آوار جنگ بیتگیں عبدالطیف بنگلزئی یل بیتگ ءُ وتی لوگ ءَ سر بیتگ-

آئی ءِ یل بیگ ءِ ھال بلوچستان ءَ بیگواھیں مردمانی یل کنائینگ ءِ ھاتر ءَ جد ءُ جھد کنوکیں گل وائس فار بلوچ مسنگ پرسنز ءَ راست ءُ کتگ ءُ گوشتگ عبدالطیف بنگلزئی یل بیتگ ءُ وتی گِس ءَ سر بیتگ-

بلوچستان ءِ دمگ آواران ءِ ھند مشکے ءَ پاکستانی لشکر ءِ لشکر کشی برجاہ، لشکر کشی ءَ گن شپ ھیلی کاپٹر ھم بھر زیرگ ءَ اَنت-

سر بیتگیں اھوالانی رد ءَ مشکے ءِ دمگ بزی، مرماسی، خلخلونک، پچڑ، کاھلو، لھڑو ءُ کش ءُ گوری دمگاں لشکر ءِ لشکر کشی برجاہ اِنت-

دمگی مردمانی رد ءَ لشکر بالگرد ھم آیگ ءُ نندگ ءَ اَنت – جتا جتائیں جاھاں ترندیں تیرگواریانہ درچ ھم برجاہ اَنت ءُ ھمے ڈول ءَ پاکستانی پوج ءُ سلاہ بندیں مردمانی میان ءَ جنگ ءُ چوپ ھم برجاہ اَنت-

دمگ ءَ پوجی لشکر کشی ءِ سبب ءَ تاوانانی اھوال سر نہ بیتگ اَنت- ءُ نانکہ واکداراں اے درگت ءَ دگہ گپ دیم ءَ آورتگ اَنت-

گوستگیں روچ ءَ بلیدہ ءَ ھم جنگ ءُ چوپانی اھوال بیتگ اَنت ءُ کہ اود ءَ پاکستانی پوج ءِ پلامرزی ءَ ھستیں گل ڈیتھ اسکواڈ ءُ بلوچ آجوئی لوٹوکیں سلاہ بندانی میان ءَ ترندیں جنگ ءُ چوپ بیتگ اَنت –

جنگ ءُ چوپ ءَ دگہ تاوانانی اھوال سر نہ بیتگ اَنت-

روکپتی بلوچستان ءَ یک جنکے کور ءَ کپتگ ءُ بڈ اتگ ءُ بیران بیتگ-

اھوالانی رد ءَ روکپتی بلوچستان ءِ ایرانشھر ءَ یک جنکے کور ءَ کپتگ ءُ پد ءَ بڈ اتگ ءُ بیران بیتگ-

وئیل ایرانشھر ءَ ڈمن ءِ کور ءَ پیش اتکگ کہ اود ءَ نوزدہ سالی ئیں پائزہ کاسمزئی ءِ نام ءَ زانگ بیتگ جہ آ رسول آباد ءِ جھمنند گوشگ بوگ ءَ اِنت-

ھالانی رد ءَ پائزہ گوں وتی دگہ دو دزگوھارانی گون ءَ ڈمن ءِ کور ءَ شتگ بیتگ کہ اود ءَ جھلانکیں آپ ءِ سبب ءَ اوژناگ ءَ نابلدی ءِ سبب ءَ بُک اتگ ءُ بیران بیتگ-

اھوالانی رد ءَ آ آئی ءِ لاش چہ آپ ءَ کشگ بیتگ ءُ کھول ءَ دست گپتگ –