TBP Balochi

بلوچستان ءِ دمگ کلات ءَ سلاہ بندیں مردماں بند ساچی شرکت ءِ مشینری مانداشتگ ءُ تباہ کتگ اَنت-

کلاے ءِ دمگ مھلبی مرجان ءِ ھند سر دگ دگ جوڑ کنگ ءِ ھاتر ءَ کارمرز بیوکیں کرش پلانٹ مشینری سلاہ بندیں مردماں مانداشتگ ءُ تباہ کتگ-

دمگی اِھوالکار رِد ءَ گوستگیں شپ ءَ سلاہ بندیں مردماں مزنیں کچے ءَ سائٹ انگر کتگ شرکت کارمند دزگیر کتگ اود ءَ ساڑی ئیں سرجمیں گرانیں مشینری مانداشتگ ءُ تباہ کتگ اَنت-

وسیلگ رِد ءَ شرکت کارمند پد ءَ یل کتگ ءُ اُرشکار ناشناسیں جاھے ءَ تتکگ اَنت-

واکدار ءَ اے درگت ءَ ھچ وڑیں درشان شنگ نہ کتگ-

زانگ بہ بیت بلوچستان ءِ دگ ءُ دگہ پروجیکٹس سر ءَ کارکنوکیں شرکتانی سر ءَ بلوچ آجوئی لوٹوکیں گل نشانگ کنگ ءُ آیگ ءَ اَنت-

اے گلانی گوشگ اِنت کہ جوڑ کنگ نام سر ءَ پُل پانچیں پروجیکٹس دیم برگ اِنت وھدے کہ دگ جوڑ کنگ پوجی مولانی ھاتر ءَ کارمرز کنگ بنت-

اے اُرش زمہ واری انگت ھچ گل ءَ نہ زرتگ-

پاکستان استان خیبرپختونخوا ءِ دمگ بنوں ءَ پولیس لائنز سر ءَ سلاہ بندیں مردماں اُرش کتگ ءُ تیرگواری ءِ رِد برجاہ ءَ اِنت-

اُرشکار پولیس لائنز تہ ءَ پُترتگ اَنت ءُ اے وھد ءَ تُرندیں تیرگواری ءِ رِد برجاہ ءَ اِنت-

تُرندیں تیرگواری ءِ سبب ءَ دگ ھالیگ بیتگ اَنت- وسیلگ رِد ءَ اُرشکار پولیس لائن تہ ءَ پترتگ ءُ تیرگواری بندات کتگ اِت-

پولیس گوشگ اِنت کہ تاں انو سے پولیس کارمند بیران ءُ چار ٹپی بیتگ اَنت-

کمکی کارکناں ٹپی زوت نادُراھجاہ ءَ برتگ اَنت-

بلوچی زبان ءِ شائر ءُ نبشتہ کار سرباز وپا ءِ کتاب “ جنگولیں پدا ” چہ صباء انسٹی ٹیویٹ آف ریسرچ اینڈ پبلکیشنز ءِ نیمگ ءَ چھاپ ءُ شنگ بیتگ-

شنگ بیتگیں جار ءَ گوشگ بیتگ اے کتاب پہ وانوکیں جتا جتائیں جاھاں دز کپ ایت ءُ ایشی ءَ وانوک وتی نزیکیں بک اسٹوراں ھم زرت کن اَنت-

آئی ءَ گوشتگ اے کتاب پہ بلوچی لبزانک ءَ جوانیں سوگاتے ءُ اے کتاب ءِ تہ ءَ سرباز وپا ءَ“ شھید انور بلوچ پنام ءِ پدا ” ءِ جنگی سپر نبشتگ کتگ اَنت-

زانگ بہ بیت چہ صباء انسٹی ٹیوٹ آف ریسرچ اینڈ پبلکیشنز ءِ نیمگ ءَ ھمے زوتاں اے چارُمی کتاب اِنت چھاپ ءُ شنگ بوگ ءَ اِنت-

صباء انسٹی آف ریسرچ اینڈ پبلکیشنز یک کتاب چھاپ کنگ ءِ ھواری ءَ پٹ ءُ پولی ادارھے کہ اود ءَ جتا جتائیں وھداں پہ وانوکاں کتاب چھاپ کنگ ءَ انت –

صباء انسٹی ٹیوٹ آف ریسرچ اینڈ پبلکیشنز بلوچی ءَ ھوار براھوئی، اردو ءَ ھم پہ وانوکاں کتاب چھاپ کنگ ءَ اِنت-

پی ٹی ایم ءِ سروک منظور احمد پشتین ءِ سروکی ءَ پشتون راجی جرگہ سئے روچ ءِ دراجیں دیوان ءَ پد آسر بوتگ کہ ایشی ءِ تہ ءَ ھزاراں پشتون سیاسی رھشون، قبائلی رھشون ءُ سیاسی کارکناں بھر زرتگ ءُُ یک رندے پد ءَ 20 نکات ءِ کراردادانی سر ءَ تپاک کنگ بیتگ-

کرارداد ءِ تہ یَ اے گپ ھوار انت کہ اے زمین ءِ سر ءَ زورگیر کنوک وردی ءِ تہ یَ بہ بنت یا بے وردی ءَ 60 روچ ءِ تہ ءَ زمین ءَ یل بہ کن انت۔ وکیل پہ اے سرڈگار ءِ شھید، بیگواھیں مردم ءُ زمینانی دارگ ءَ آمید گس ءِ وسیلہ ءَ راج ءِ کیس ءَ جنگ کن اَنت۔

وھدے کہ مرچی ءَ پد کس 5 کلدار ءَ چہ گیش فی یونٹ ءِ زرّ نہ دنت، اگاں بجلی بند کنگ بہ بیت یا لوڈ شیڈنگ جوڑ کنگ بہ بیت گڑا ٹرانسمیشن سسٹم پروشگ بیت اِنت-

اے مسام ءِ تہ ءَ ڈیورنڈ لائن ءِ سر ءَ پاسپورٹ یا ویزا ءِ رد ءَ سپر کنگ ءِ اجازت دیگ ھوار اِنت۔ ءُ جرگہ کمیٹی پشتون زمین ءِ سرا برجاھیں زمینی جیڑھانی گیش ءُ گیوار ءِ ھاتر ءَ جرگہ ءِ رد ءَ راہ ءُ درے شوھاز کنت۔

جرگہ ءَ پیسلہ کنگ بیتگ کہ مرچی ءَ پد وردی پوشیں یا بے وردی ءِ مردماں الاؤنس دیگ نہ بیت، اگاں کسے ءَ پون اتک گڑا درستیں پشتون گوں آئی ءَ اوشت انت۔

جرگہ ءَ پیسلہ کنگ بیتگ کہ دراھیں آئی ڈی پیز واکدار دیگ بوتگ ، روچ ءُ وھد ءِ پیسلہ ءَ شما بہ کن اِت، درستیں جرگہ ءُ پختون راج شمئے رھشونی ءَ کن اَنت۔ پنجاب، سندھ ءُ فیڈریشن ءَ پکتون نودربرانی سر ءَ ڈک ءُ درک بند کنگ بہ بیت اگاں ناں دراجیں جرگہ ءُ پکتون وتی وتی دمگاں رو انت ءُ آھانی کمک ءَ رونت۔

پد ءَ اے ملک ءِ کوھنیں جوڑیشت ءِ مسام (آئین) بے سوب بوتگ، نوکیں جوڑیشت ءِ مسام اے سرڈگار ءِ سروکانی واھگ ءِ رد ءَ کنگ بہ بیت۔ جرگا ءَ پیسلہ کت کہ قبائلی دمگاں جار جتگیں ایوارڈ، فنڈز یا گرانٹ پیلو کنگ بہ بنت۔

دگہ کرارداداں ھوار انت کہ بجلی ءِ پشکپتگین زوت ادا کنگ بہ بنت۔

پشتون ءِ فوجی آمیدگس ءُ دفن کنگ ءِ مراگش سرجم ءَ رد کنگ بوتگ ءُ ھلاس کنگ ءِ لوٹ کنگ بوتگ۔ آرٹیکل 158 ءِ رد ءَ پختون ءِ زمیناں 1991 ءِ سندھ آپ ءِ مسام ءِ رد ءَ قدرتی گیس ءُ آپ ءِ ھک دیگ بہ بیت۔

جرگہ ءَ دراھیں سیاسی بندیانی یلہ کنگ ءِ لوٹ کتگ، جرگہ ءِ کاروائی ءِ تہ ءَ دزگیر بوتگیں دراہیں بندیگ زوت آجو کنگ بہ بنت۔

جرگہ ءَ پیسلہ کتگ کہ اگاں کسے ءِ ھلاپ ءَ جرگہ ءِ برجم دارگ، بھر زورگ یا پلامرزی کنگ ءِ ھاتر ءَ کارروائی کنگ بیت گڑا جرگہ سکیں برانز چست کنت۔ قبائلی ضلع ءُ پختونخوا ءَ کمک ءَ سیاہ قانون ءِ قانون زوت ھلاس کنگ بہ بیت۔

جرگہ ءَ اوگانستان ءَ جنکاں وانگ ءُ زانگ ءِ اجازت دیگ ءِ وھد ءَ “سورا” ءِ کوھنیں دود ءُ ربیدگ ءِ ھلاس کنگ ءِ جار جتگ۔

پیسلہ کنگ بوت کہ آیوکیں یک شمبے ءَ اے جرگہ ءِ لوٹ ءُ پختون ءِ دمگ ءِ سر ءَ برجاھیں زلم ءُ زوراکیانی ھلاپ ءَ سرجمیں دمگانی ھیڈ کوارٹر ءَ زھرشانی کنگ بیت انت۔

روکپتی بلوچستان ءِ بنجاھی شھر زاھدان ءَ ایرانی لشکر ءَ یک مردمے آوار جنگ ءَ پد بیگواہ کرتگ-

اھوالانی رد ءَ گوستگیں روچ ءَ ایرانی لشکر ءِ کارمنداں بیڑ برتگ ءُ یک ورنایے آوار جنگ ءَ پد ناشناسیں زنداناں برتگ-

آوار جنگ بیگگیں مردم ءِ پجار بیست ءُ شش سالی ئیں عبداللہ رودینی ء ھسن ءِ نام ءَ زانگ بیتگ کہ آ زاھدان ءِ جھمنند اِنت-

اھوالانی رد ءَ یک مردمے ھم آوار جنگ بیتگ بلے آئی ءِ نام ءِ بارو ءَ دگہ اھوال دیم ءَ نیتکگ اَنت-

بلوچستان ءِ جتاجتائیں دمگاں تیرگواری ءُ دگہ وئیلانی آسر ءَ زالبولے ءَ ھوار پنچ مردم بیران –

گیشیں ھالانی رِد ءَ سبی ءِ نزیک ءَ لوگے ءَ چہ یک زالبولے ءِ لاش دزکپتگ-

ایس ایچ او سٹی ذکا گجر ءَ وئیلجاہ ءَ سر بیتگ لاش سول نادُراھجاہ ءَ برتگ-

انتزامیہ رِد ءَ گمان اِنت کہ لوگ واجہ ءَ کُشتگ، پولیس آئی ءِ دزگیری ءِ واستا جتاجتائیں ھندانی سر ءَ بیڑبرگ اِنت-

ھمے وڑ مستونگ ءِ دمگ کھڈکوچہ ءَ ناشناسیں مردمے ءِ لاش دزکپتگ-

لیویز رِد ءَ لیویز تھانہ کھڈکوچہ قمر ھند ءَ یک ناشناسیں مردمے ءِ لاش دزکپتگ کہ آئی ءِ گیشیں چار ءُ ٹپاس ھاتر ءَ غوث بخش رئیسانی ھسپتال ءَ برتگ-

ھمے وڑ گنداخہ ءِ نزیک ءَ ناشناسیں مردمانی تیرگواری ءَ چہ دو مردم بیران-

پولیس رِد ءَ گنداخہ تھانہ ءِ ھاک باغٹیل ءِ نزیک ءَ ناشناسیں مردماں تیرگواری کتگ محمد اقبال مگسی ءُ زوالفقار علی مگسی کشتگ اَنت دوئیں ورنا جھل مگسی ءِ دمگ کوٹ مگسی ءِ جھمنند گوشگ بیگ ءَ اَنت کہ شھداد کوٹ سندھ ءَ چہ واتر وتی میتگ ءَ روگ ءَ بیتگ اَنت-

پولیس ءَ ھما دمان ءَ سر بیتگ لاش چار ٹپاس ھاتر ءَ سول نادُراھجاہ اوستہ محمد ءَ برتگ اَنت وئیل ءَ پد میاربار تچگ ءَ سوبمند بیتگ اَنت-

اشی ءَ اَبید ڈیرہ بگٹی ءِ تھسیل سوئی ءِ شھر ءِ تہ ءَ پرپٹ سواریں سلاہ بندیں مردماں تیرگواری کتگ شلا بگٹی نامیں مردمے کشتگ-

دمگی وسیلگ گوشگ اِنت کہ اے مردم ءِ سیادی سرکاری پلامرزی کنوکیں ٹولی ءَ اِنت-

پاکستانی پوج ءَ سے مردم آوار جنگ ءَ پد ناشناسیں جاھے ءَ برتگ اَنت-

بلوچستان ءَ زورانسری آوار جنینانی وئیل ءِ درچ یکشل ءَ برجاہ، کیچ ءَ ھوار ھمگرنچیں دمگاں لشکر کشی ءِ میان ءَ تنی وھدے بازیں مردمے زورانسری آوار جنی ءِ نشانگ کنگ بیتگ اَنت-

بلوچ نیشنل مومنٹ ءِ انسانی ھکانی ادارہ پانک ءَ چہ تربت ءَ زورانسری آوار جنی راست کتگ گْوشتگ کہ عطاء اللہ ء نور بخش، یاسر بلوچ ء حمید اللہ ءُ بلال امام ء امام بخش پاکستانی پوج ءَ آوار جنگ ءَ پد بیگواہ کتگ اَنت-

پانک رِد ءَ سئیں ورنا ھشت ءَ چہ سیزدہ اکتوبر دوھزار بیست چار ءَ چہ تربت ءِ ھند کیچ ءَ زورانسری آوار جنی ءِ نشانگ کنگ بیتگ اَنت-

بلوچستان ءَ زورانسری آوار جنی ءِ وئیل یکرندے پد ءَ گوں تُرندی ءَ گیشی گندگ آیگ ءَ اِنت اود ءَ ھمے ماہ اکتوبر ءَ دی بلوچستان پوسٹ ءَ را بلوچستان ءَ ھوار دگہ دمگاں زورانسری آوار جنی ءِ بیست یک رپورٹ دزکپتگ آیانی تہ ءَ چار مردم یل کنگ بیتگ اَنت وھدے کہ ھپدہ انگت بیگواہ اَنت –

ھمے سال ءِ ستمبر ءِ ماہ ءَ زورانسری آوار جنی ءِ چل یک رپورٹ نکش بیتگ اَنت وھدے اشانی تہ ءَ لھتے یل کنگ بیتگ اَنت-

بلوچ یکجھتی کمیٹی ءَ یک درشانے ءِ تہ ءَ گوشتگ کہ بلوچ ورنایانی زورانسری آوار جنی گیش بیگ ءَ اِنت- گوشتگیں چیزے روچاں نیم درزنے ءَ چہ گیش بلوچ ورنایاں فورس، ایف سی ءُ سی ٹی ڈی زورانسری بیگواہ کنگ بیتگ اَنت-

درشان ءِ تہ ءَ گوشگ بیتگ کہ شبیر احمد ء امیر احمد، آفتاب احمد ء نزیر احمد، راشد علی، وھدے کہ بیست نُھ ستمبر ءَ چہ ساکران دگ ھب چوکی ءَ سے مردم آیانی تہ ءَ جنید حمید ء عبدالحمید جھمنند بھوانی، یاسر حمید ء عبدالحمید جنید ءُ یاسر دوئیں برات زورانسری بیگواہ کتگ اَنت-

درشان ءِ تہ ءَ گوشگ بیتگ جنید ھشت اکتوبر ءَ چہ ھب ءُ یاسر یازدہ اکتوبر ءَ چہ کلات ءَ آوار جتگ اَنت-

زانگ بہ بیت کہ اشی ءَ ساری یاسر دوھزار بیست دو ءَ زورانسری بیگواہ کنگ بیتگ-

درشان ءِ دیمتر ءَ گوشتگ عمران ء محمد اقبال جھمنند امیر آباد ھب چہ ھب چوکی بھوانی شاہ پمپ نُھ اکتوبر ءَ بلال امام ء امام بخش جھمنند للین کیچ ھشت اکتوبر ءَ چہ میزان بینک ءَ دزگیر کنگ ءَ پد بیگواہ کتگ ءُ بینک ءَ بزنس ڈیولپمنٹ آفیسرے-

درشان ءِ تہ ءَ گوشگ بیتگ کہ ریاست وتی سیکورٹی ءِ بے سوبیاں پد بلوچ ورنایاں نشانگ کنگ ءَ اِنت- بیگواھیں مردمانی کھول یکشل ءَ گم ءُ رنجانی تہ ءَ اَنت ءُ ترس اِنت کہ آیانی چُکاں دروگیں میڑاں نشانگ کنت- بلوچ راج ءَ را ریاست ءِ اے وڑیں زوراکیانی ھلاپ ءَ اوشتگی اِنت ءُ زورانسری آوار جنی ءِ ھلاس کنگ ھاتر ءَ گھگیری کنگی اِنت-

پشتون تھپز مومنٹ ءِ سروک منظور پشتین ءَ پشتون راجی جرگہ ءَ گوں تران کنان ءَ گشتگ کہ پاکستان ءِ انوگیں کانون ھما درملکی کانون انت کہ انگریز ءَ جوڑ کتگ، پرچا کہ اد ءَ ھاکم آ بوتگ انت ءُ مھلوک ءِ واستا آھاں کانون جوڑ کنگ ءِ اے زیردستیں زمین بوتگ۔

آئی ءَ گوشتگ ھمے کانود مرچی ھم ھست اِنت ایشی ءِ تہ ءَ اسلاھات ءِ گنجائش نیست ۔ پیسریگیں مزن وزیر وت گش ایت کہ آئی ءَ جوڑ کتگیں درستیں کانود پنڈی ءِ ملٹری سنٹر (جی ایچ کیو) ءَ چہ اتکگ انت۔ ما چہ جرگہ ءَ دزبندی کن ایں کہ آ پیسلہ بہ کنت کہ چوں پشتونانی جان ءَ رکّینگ بہ بیت۔

منظور پشتین ءَ پشتون دمگاں چہ فوج ءِ کشگ ءِ لوٹ کتگ ۔ آئی ءَ جرگہ ءِ بھر زوروکاں چہ دزبندی کتگ کہ آ اے پیسلہ بہ کن اَنت کہ فوج ءُ طالبان دوئیں دمگ ءَ یلہ بہ کن اَنت پرچا کہ ناامنی ایشانی سبب ءَ بوتگ۔

آئی ءَ گوشت کہ فوج، آئی ایس آئی، ایم آئی، “ھواریں طالبان” ءُ “بیڈ طالبان” ءَ را پشتون راج ءَ را ناشرکاریں گل ءِ رنگ ءَ جار جنگ بہ بیت۔

منظور پشتین ءَ گشتگ کہ قبیلہ ءِ پیریں مردماں اے پیسلہ کنگی اِنت کہ “ڈیورانٹ لائن” ءِ پشتونانی ہچ وڑیں بستار نیست۔ ڈیورنڈ لائن پشتون ءِ واستا نہ کانونی ءُ نہ رسمی بستار داریت۔ اے سیمسر چو پیش ءِ وڑ ءَ پہ تر ءُ تاب ءَ پچ کنگ بہ بیت دانکہ پشتونانی میان ءَ دوری مہ بیت اِنت-

پاکستان ءِ واکداراں یکشمبے ءِ روچ ءَ شنگھائی کمکی گل ءِ سروکی ءَ نیاد ءَ پیش بنجاھی شھر اسلام آباد ءِ بند کنگ ءِ چن ءُ لانچ ءَ کنگ ءَ اِنت، کہ ایشی ءِ سبب گوستگیں جنگولانی اُرش ءُ سیاسی ناگیگی ءِ چیر ءِ نگاھان اِنت-

سَے شمبے ءُ چار شمبے ءَ بیوکیں دو روچی کانفرنس ءَ ھندوستان ءِ وزیر ھارجہ سبرامنیم جے شنکر، روس ءِ سروزیر میخائل میشوسٹن ءُ چین ءِ سروزیر لی کیانگ دمگی سرکاری مزن واکداراں ھوار بیت اِنت-

سروکی نیاد ءَ بنداتی ھپتگاں پاکستان ءِ واکداراں بگیر داروکیں لیکھ کنوکانی ھلاپ ءَ کریک ڈاؤن کتگ- یک راجدوستے زرمبشتے، پی ٹی ایم ءِ سر ءَ بندش جتگ ءُ بنجاھی شھر ءَ زھرشانی دارگ ءِ ھاتر ءَ نوکیں رھبند دیم ءَ آورتگ اَنت-

آئی ءَ جیل بندیں اپوزیشن لیڈر عمران خان ءِ سدانی کچ ءَ منوک دزگیر کنگ بیتگ اَنت کہ آیاں ھمے ماہ ءَ بندات بیتگیں اسلام آباد ءَ مارچ کنگ ءِ جھد کتگ بیتگ-

گوستگین ھپتگ ءَ کراچی ءِ میگاپورٹ سٹی ءَ چینی انجنیئرانی کاروان ءِ سر ءَ بیوکین مزنیں اُرشے ءَ یک اے ڈولیں ڈیھے ءِ پھزداری وھم ءُ چُرت ءَ پِرینتگ کہ اود ءَ آجوئی لوٹوکیں جنگولیں گل چینی شھریاں نشانگ کنگ ءَ اَنت-

اسلام آباد ءَ سروکی کنوکیں نیاد ءِ وھد ءَ دگانی سر ءَ پوج ءِ دارگ ءِ اجازت دیگ بیتگ-

سیکیورٹی زانتکار ءُ سینٹر فار ریسرچ اینڈ سیکیورٹی اسٹڈیز ءِ ایگزیکٹو ڈائریکٹر امتیاز گل ءَ گوشتگ اے میٹنگ یک ھنچیں ڈیھے ءِ واستا گچینی یے دار ایت کہ اود ءَ پھزداری ءِ ترس اِنت-

آئی ءَ اے ایف پی ءَ گوشتگ ‘ سرکار ءِ ٹاپار انت کہ آئی ءَ بازیں کچے ءَ پھزداری کتگ ءُ زانتگی یے پرچاکہ اے ستکی دیگی اِنت کہ اے نیاد ابید جیڑہ ءُ جنجال ءَ وھد گوازینگ بہ بیف اِنت’-

شنگھائی کمکی گل ءِ بادک ‘ ڈائیلاگ یارٹنرز ’ ءِ دروشم ءَ بندوکیں شانزدہ ڈیھانی ھواری ءَ چین، ھندوستان، روس،پاکستان، ایران، قازقستان، کرغزستان، تاجکستان، ازبکستان ءُ بیلاروس ھوار اَنت-

بلے گمان اِنت کہ پاکستان ءِ جھلانکدارین گمان ءِ سروکی نیاد ءِ ترند بیت اِنت-

واکداراں اسلام آباد ءُ ھمساھگیں شھر راولپنڈی ءِ سَے روچ ءِ واستا موکلانی جار جتگ ءُ ایشی ءِ ھواری ءَ کش ءُ گوری ھنداں تر ءُ گردانی سر ءَ کمی کتگ ءُ دگ بند کتگ اَنت-

اے وھد ءَ سروکی کنوکیں نیاد ءِ پتر جاہ ریڈزون ءِ گورنمنٹ کوارٹر تارانی گون ءَ مھکم کتگ-

زَری جاوراں ناگیگیں پاکستان گچین چین ءِ شھریانی پھزداری ءَ چرتیانی دیمپان اِنت کہ اے یک مزنیں جیڑھے ءُ ملین ڈالر ءِ بنیادی بنھشت منسوبھ ءِ واستا فنڈز ءُ مردم دیم دیگ ءَ اِنت-

گوستگیں ھپتگ ءَ کراچی ءَ بلوچ لبریشن آرمی ءِ مجید بریگیڈ ءَ یک مزنیں ‘فدائی ’ اُرشے ءَ چینی کاروان نشانگ کتگ ات- چریشی ءَ بازیں چینی انجینئر ءُ واپار کار مرتگ ات اَنت ءُ بلے واکداراں بس دو انجنیرانی مرگ ءِ ھال راست کتگ اَت-

اے کاروائی بی ایل اے مجید بریگیڈ ءِ فدائی شاہ فھد پنام ءِ آفتاب ءَ کتگ ات- ھمے ڈول جارکش جیئند بلوچ ءَ تچک کتگ ات کہ بلوچ لبریشن ءِ اے مشن ءَ سوبمند کنگ ءَ بی ایل اے ءِ انٹیلیجنس ونگ زراب ZIRAB (Zephyr Intelligence Research & Analysis Bureai کرد بیتگ –