بلوچستان ءِ دمگ کیچ ءَ پاکستانی پوج ءِ لشکر کشی برجاہ اِنت-
گیشیں اھوالانی رد ءَ کیچ گورکوپ ءِ دمگ ءَ پوجی آپریشن برجاہ اِنت۔
دمگی مردمانی گشگ انت کہ اے دمگ ءَ پیادگیں لشکر ءِ رو ءُ آیگ برجاہ انت وھدے کہ پیادگیں لشکر ءِ کمک ءَ گن شپ ءِ ھیلی کاپٹر ھوار اَنت-
آپریشن ءِ درگت ءَ ھچ وڑیں دزگیری ءُ بیرانی ءِ ھال سر نہ بیتگ اَنت-
آپریشن ءِ بابت ءَ واکدارانی بنگپ انگت ءَ پدر نہ بوتگ انت۔
بلوچستان ءِ دمگ کیچ ءَ پاکستانی فوج ءِ کاروان ءِ سر ءَ ناشناسیں مردماں ارش کتگ ۔
پوج ءِ کاروان تربت ءِ دمگ حیراباد ءَ ھما وھد ءَ نشانگ جوڑ کنگ بوتگ کہ آ تمپ ءَ چہ درکپتگ ءُ تربت ءِ نیمگ ءَ روگ ءَ بیتگ۔
دمگی مردمانی رد ءَ کاروان ءِ تہ ءَ ھواریں گاڑی ءِ سر ءَ تراک بوتگ کہ ایشی ءِ تہ ءَ سواریں کارندہ بیران ءُ ٹپیگ بوتگ اَنت۔
بلے اے درگت ءَ واکدارانی گپ انگت ءَ دیم ءَ نیتکگ اَنت۔
زانگ بہ بیت اے مگ ءَ بلوچ آجوئی لوٹوکیں سلاھبند پرکار اَنت، اے دمگ ءَ ھر وھد ءَ پاکستانی لشکر ءِ سر ءَ اُرش بوتگ گُڑا آیانی زمہ واری بلوچ آجوئی ءِ سلاھبنداں من اتگ اَنت، بلے کس ءَ اے اُرش ءِ زمہ واری نہ من اتگ-
ندر پہ استاد جُمّل ساھب ءِ نام ءَ
نبشتہ کار: ممتاز سمد
دی بلوچستان پوسٹ
مرچی اگاں من دو لبز زاناں گڑا ھمے یکیں استاد ءِ برکت اِنت، کہ منی بندات چہ ھمے استاد ءَ بوتگ آئی ءَ من ءَ یک شریں منزلے ءَ سر کتگ۔
من پنچمی تبک ءَ وانگ ءَ اِت آں گڑا استاد ءَ گوشت شمئے چکاس بندات بوگ ءَ اَنت تیاری بکن اِت شمئے چکاس آئی وانگجاہ (ہائی اسکول) ءَ بندات بنت گڑا من وتی لوگ ءَ شُت آن ءُ من وتی مات ءُ پت گشت اَنت من روگ ءَ آں وتی چکاس ءَ گڑا مات ءَ پسو دات شر اِنت منی چُک برو اللّہ ءِ میار ئے۔
من دیم پہ استاد ءِ لوگ ءَ شُت آں ۔
استاد ءَ وھدے من ءَ دیست بچکندگے جت،تو اتک ئے; من پسو دات, جی ھو! پد ءَ من گشت استاد چکاس باریں چون بنت؟
استاد ءَ پسو دات پریشان مہ بو من شمئے ھمراہ آں۔ چکاس بندات بوت اَنت گڑا استاد ءَ گُشت من ءَ گوں دل ءِ واھگاں اُمیت اِنت شما چکاس ءَ سوبین بہ اِت۔ گڑا ما پد ءَ واتر بیت ایں دیم پہ وتی ھنکین ءَ۔
لھتے روچ ءَ رند استاد ءَ من ءَ ھال دات۔ تو چکاس ءَ سوبین بیتگ ئے. شریں لمبر گپتگ من باز گَل ءُ شادان بوت آں گڑا من وتی مات ءُ پت ھال دات اَنت کہ من چکاس ءَ سوبین بیتگ آں۔
مات ءَ پسو دات منی نیکیں دوا گوں تو گون اَنت ھروھد سوبین بات ئے۔ گڑا من گُشت اما منی استاد ءَ اَلّم ءَ مھمان کن ایں۔
مات ءَ پسو دات دلجم بکن وت ءَ انشاءاللہ تئی استاد مئے مھمان بیت۔ پد ءَ من وتی وانگ بندات کُت۔من دیم پہ شھر ءَ شوت آں وانگ ءَ اناگت ءَ لوگ ءَ چہ پُونے اھت اِنت، کہ تئی استاد ءَ وفات کُرتگ۔
من باز پریشان بوت آں۔ دل ءَ جیڑ اِت استاد ءَ مارا اے وھد ءَ چے ءَ یل دات۔
منی کرّ ءَ دگہ چُوشیں لبز نیست کہ پہ تئی واست ءَ نبشتہ بہ کناں۔ منی دوا انِت گوں ھداوند ءَ تو باگیں بھشت ءَ بات ئے!
آمین
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-
گوادر شھدربرجاہ ءُ ھاسٹل
نِبشتہ کار: ناز بلوچ
دی بلوچستان پوسٹ
گوادر ءِ شھدربرجاہ ءَ پاکستانی انٹیلیجنس (آئی ایس آئی ءُ ایم آئی) ھکومتی کنگ ءَ اَنت، یونیورسٹی ءِ درائیں کار ھمیشانی دست ءَ اَنت. ناں اِد ءَ وائیس چانسلر (VC) ءُ نیکہ پرو وائیس چانسلر(pro VC) ناں کہ اد ءَ اِڑمنسٹریشن دروائین ھماھانی چانوگِر اَنت۔
گوادر ءِ یونیورسٹی مئے نه اِنت ءُ اِد ءَ مئے نودربراں ھچ ارزشت دیگ نه بنت. نودربر شپ ءَ تُرسینگ بنت، شپ ءَ وائیس چانسلر (VC) ءُ پرو وائیس چانسلر(pro VC) رجسٹرر ایشانی پِت ‘آئی ایس آئی ءُ ایم آئی’ کاینت ءُ جنِکانی ھاسٹل ءَ پُتر اَنت ءُ جنکاں تُرسین اَنت بیھار دے اَنت۔
ھمے تُرس ءَ مرچی جنک نادراھیانی آماچ اَنت، ونت نکن اَنت. دوشی بزاں که 10-10-2024 ھمے شپ ءِ 1 بجا اے اتکگ اَنت ءُ جنکانی ھاسٹل لگت جتگ ءُ زاه داتگ اَنت کہ ما انوسٹیگیشن کن اِیں، گُڑا ھمے چوکیداراں گُشتگ کہ “شُما پرچا اتکگ اِت ءُ چیا آیگ لوٹ اِت؟ اے جنکانی ھاسٹل اِنت اِد ءَ موکل نیست اِنت شمارا” گؔڑا ھمے وائیس چانسلر (VC) ءُ پرو وائیس چانسلر(pro VC) رجسٹرر ایشانی پِتاں گُشتگ که “هم تمارے رجسٹرر کو فون کریں گے اگر تم نے گیٹ نھیں کولا تو ھم گیٹ کو توڑ دینگے” گڑا ایشی ءَ چہ پد جنک سک دلوارگ بیتگ اَنت ءُ گریتگ اِش ءُ باز جنِک دلوارگ بیتگ ءُ تُستگ اَنت۔
گڑا باز دیراں پد اے شُتگ اَنت ءُ 1بجا پد ءَ اتکگ اَنت پد ءَ انچو زاه داتگ ءُ گیٹ لگت جتگ بیھار داتگ پد ءَ شُتگ اَنت چیزوکے ساھت ءَ رند پد ءَ 3بجا اتکگ اَنت ءُ جنکانی ھاسٹل لگت جتگ ءُ دؤر کتگ ءُ جنکاں واه ءُ زار کتگ گڑا ایشاں گشتگ که ” کل پھر واپس آئینگے انوسٹیگیشن کرنے ھم تمارے وائیس چانسلر (VC) پرو وائیس چانسلر(pro VC) اور رجسٹرر کو بتا چُکے هیں”۔
مئے گور ءَ ناں تنگ کنگ بیگ ءَ اِنت ءُ بچِکانی ھاسٹل ھم ھمیشانی ارجان اِنت ءُ بچِک ھم دلوارگ اَنت ءُ ونت نکن اَنت ‘آئی ایس آئی ءُ ایم آئی’ بچِکانی ھاسٹل ءِ توک ءَ پُتر انت ءُ ایشانی ھمراھی ءَ گوْادر یونیورسٹی ءِ سیکیوریٹی انچارج داد کریم DK دلّار ھم ایشانی ھمبر ءَ اِنت ءُ گون اِنت ءُ کاینت بچِکاں مجگی ٹورچر کن اَنت۔
University of Gwadar ‘knowledge wisdom and service’
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-
روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ یک بندیگے پہ پاھو ءِ واستا جتائیں کوٹی ءَ برگ بیتگ-
اھوالانی رد ءَ کوش ءِ بھتام ءَ گرگ بیتگیں بندیگ گوستگیں روچ ءَ زاھدان ءِ زندان ءَ جتائیں کوٹی ءَ کنگ بیتگ-
پاھو ءِ ھکم ءَ اتکگیں مردم ءِ پجار ابراھیم رودینی ء مھمد گل جھمنند زاھدان ءِ نام ءَ زانگ بیتگ-
اھوالانی رد ءَ ابراھیم سَے سال پیش زابل ءَ یک کوشے ءِ بھتام ءَ گرگ بیتگ ءُ اود ءَ آ پد ءَ زاھدان ءِ مزنیں زندان ءَ دیم دیگ بیتگ ءُ آ داں دو سال ءُ شش ماہ ءَ زاھدان ءِ زندان ءَ بندیگ بیتگ-
آئی ءِ کھول ءَ گڈی گندوک گوستگیں روچ ءَ کتگ بیتگ کہ یک تامر بندے ءَ گندگ بیت اِنت ابراھیم وتی زھگ ءَ گڈی بگلگیری ءَ کنگ ءَ اِنت-
بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں مروچی سبی ءَ دگ جوڑ کنوکیں یک شرکتے ءِ بلڈوزر چیرکتگیں شورواں گوں نشانگ کتگ-
جارکش ءَ گوشتگ کہ بی آر جی ءِ سرمچاراں بلوچستان، سبی ءِ نزیک ءَ مل گورگیج ءَ دگ جوڑ کنوکیں شرکت ءِ یک بلڈوزرے چیرکتگیں شورواں چہ نشانگ کتگ، تراک ءِ آسر ءَ گاڑی سرجم ءَ تباہ بیتگ وھدے کہ آئی ءِ ڈرائیور سک ٹپی بیتگ-
جارکش ءَ گْوشتگ کہ بلوچ ریپبلکن گارڈز اے اُرش زمہ واری ءَ منّ اِیت – بلوچستان ءِ وتواجھی ءَ تاں زورگریں پاکستانی پوج ءُ آئی ھمکارانی سر ءَ وتی اُرشاں برجاہ بدار اِیت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں اپسی کھن ءُ کولواہ ءَ زورگریں پاکستانی پوج ءِ بنجل ءُ پانگس ءِ سر ءَ اُرش کرتگ سے کارمند مرتگ ءُ باز ٹپی بیتگ اَنت۔
جارکش ءَ گوشتگ یادزہ اکتوبر ءَ روچ ءِ دو ءُ پنجاہ ءَ سرمچاراں تمپ، اپسی کھن ءُ شیپچار ءِ میانجی ءَ برجاھیں پاکستانی پوج ءِ پانگس ءِ پھازداریں کارمند گوں اسنائپر ءَ نشانگ کرتگ ءُ کشگ ءَ پد پانگس گوں نوکیں سلاھاں نشانگ کرتگ۔ چہ ایشی دژمن ءَ گیش جانی ءُ مالی تاوان بوتگ۔
جارکش ءَ گوشتگ دگہ یک اُرشے ءَ سرمچاراں یازدہ اکتوبر ءَ روچ ءِ چار ءَ کیچ ءِ ھند کولواہ کڈ ءِ ھوٹل ءَ برجاھیں زورگریں پاکستانی پوج ءِ بنجل ءَ گوں نوکیں، مزن ءُ وتکاریں سلاھاں اُرش کرتگ۔ اُرش ءَ دژمنیں پوج ءِ دو کارمند مرتگ ءُ باز ٹپی بوتگ اَنت۔
جارکش ءَ گوشتگ بلوچستان لبریشن فرنٹ اے دوئیں اُرشانی زمہ واری ءَ من ایت ءُ داں سرڈگار ءِ سرجمیں آجوئی ءَ زورگریں پوج ءِ سر ءَ اُرشانی برجاہ دارگ ءِ کول ءَ کن ایں۔
بلوچستان ءِ دو جتاجتائیں دمگ گوادر ءُ کلات ءَ پاکستانی پوج ءَ بیڑبرتگ ءُ دو ورنا زورانسری آوار جنی ءِ نشانگ کتگ اَنت-
گیشیں ھالانی رِد ءَ چہ گوادر ءَ ھال اِنت کہ سے اکتوبر ءَ پاکستانی پوج ءَ یک لوگے ءِ سر ءَ بیڑبرتگ ءُ اود ءَ ساڑی مردم لَٹ کُٹانی نشانگ کتگ ءُ دزگیر کنگ ءَ پد ناشناسیں جاھے ءَ برتگ-
بی این ایم ادارہ پانک ءَ رپورٹ رِد ءَ سے اکتوبر ءَ عمران بلوچ یک دھکنکاری ءُ وتی کھول ءِ لاپ شوھاز کنوک اِنت، پاکستانی پوج ءَ چہ گوادر ءَ زورانسری بیگواہ کتگ چریشی ءَ پد آ دیم ءَ آرگ نہ بیتگ-
ھمے وڑ بلوچستان ءِ شھر چہ کلات ءَ پاکستانی پوج ءَ لوگ سر ءَ بیڑبرتگ ھب ءِ جھمنندیں ورنایے لَٹ کُٹانی نشانگ کتگ ءُ زورانسری بیگواہ کتگ-
ورنا ءِ پجّار یاسر حمید ء عبدالحمید نام ءَ چہ بیتگ کہ ھب ءِ دمگ بھوانی ءِ جھمنند اِنت وھدے کہ کلات ءَ وتی سیادانی لوگ ءَ جھمنند بیتگ-
دمگی وسیلگ ءَ ٹی بی پی ءَ گوشتگ کہ یازدہ اکتوبر ءِ شپ ءِ ساھت دو سی ملٹ نزیک ءَ پاکستانی پوج ءَ مزنیں کچے ءَ کلات شھر ءَ دمگ انگر ءَ کتگ یک لوگے ءِ دودمان لگتمال کنان ءَ لوگ تہ ءَ پُترتگ اَنت-
وسیلگ رِد ءَ پوج کارمنداں لوگانی تہ ءَ پُروشت ءُ پروش کتگ اود ءَ ساڑی زالبولاں ھوار سرجمیں مردم تُرسینتگ ءُ وھدے کہ یاسر حمید لَٹ کُٹانی نشانگ کتگ ءُ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال نیست-
زانگ بہ بیت یاسر حمید، جنید حمید ءِ مستریں برات اِنت کہ گوستگیں روچاں ھشت اکتوبر ءِ شپ ءَ ھب شھر ءَ زورانسری بیگواہ کنگ بیتگ-
زانگ بہ بیت یاسر حمید اشی ءَ ساری مئی دوھزار بیست دو ءَ زورانسری آوار جنی ءِ نشانگ کنگ بیتگ دہ روچ ءَ پد آ یل داتگ-
مروچی ھب پریس کانفرنس کنان ءَ جنید ءُ یاسر ءِ گھار ءِ گوشگ اِنت کہ بلوچستان ءَ ھرچ مردمے یک دردناکیں کسھے، کسے ءَ چک بیگواہ اِنت ءُ کسے ءِ برات، کسے ءِ لوگ واجہ بیگواہ ءَ اِنت ءَ کسے کھول چمّ چراگ نپسیاتی نادُراھی ءِ آماچ بیتگ ءُ وتکشی ءَ لاچار بیتگ- انچش سما بیت کہ بلوچستان سر ءَ درد ءُ رنجانی ساھگ کہ ھرچ ٹک دیگ ءَ مئے ھون ءِ ورگ ءُ مارا جتاجتائیں نادُراھیانی آماچ کنگ ءَ اَنت ءُ آیانی زمہ واری ھمے مردمانی سر ءَ بیت کہ مردماں زورانسری بیگواہ کن اَنت ءُ ھما مردم زمہ وار اَنت کہ زلم سر ءَ بے توار ءُ ندارگ کنوکیں کرد ءَ پیلو کنگ ءَ اَنت-
آئی ءَ گوشتگ کہ اگاں برات یل کنگ نہ بیت گُڑا لاچار بہ ایں زھرشانی ءِ راہ ءَ در چن ایں-
بلوچ لبریشن آرمی ءِ جارکش جیئند بلوچ ءَ رسانکدراں بیان ءَ شنگ کنان ءَ گوشتگ گل دکی ءَ بیست ءُ یک پشتونیں مزدورانی کوش ءَ ایر جنت- ءُ اے گپ ءَ تچک کنت کہ اے وئیل ءَ مئے گل ءَ گوں ھچ سیادی نیست اِنت- اے کوش پاکستانی پوج ءُ چیریں ادارھانی مکاریانی منسوبھانی بھر اِنت – کہ چریشی ءِ درچ ءَ برادر راج بلوچ ءُ پشتوناں وت ماں وت ءَ میڑینگ ءِ پندلے – بی ایل اے اے کوشانی زمہ واریاں پنجابی ریاست پاکستان ءَ لڈ ایت ءُ اے گپ ءَ تچک کنت کہ اَچ دشمن ءَ اے بے گناھیں مردمانی کوش ءِ ھساب ءَ الم گپت اِنت- بلوچ ءُ پشتون ھمگرنچی ءَ ھواریں دشمن ءِ ھلاپ ءَ یکیں سنگر ءَ یکجاہ بنت ءُ زوت یا دیر پنجابی ریاست ءَ پروش ءِ آماچ کن اَنت-
آئی ءَ گوشتگ بلوچ لبریشن آرمی ءِ سرمچاراں سامی ءُ تربت ءَ دو جتا جتائیں اُرشاں زورگرین پوج ءُ یک پوجی دلارے نشانگ کتگ-
آئی ءَ گوشتگ بی ایل اے ءِ سرمچاراں گوستگیں شپ ءَ کیچ ءِ ھند سامی ءَ زورگریں پوج ءِ بنجاھی بنجل یک اُرشے ءِ نشانگ کتگ ، سرمچاراں گرنیڈ لانچر بازیں کساسے ءَ آس داتگ ءُ وتکاریں سلاھاں گوں دشمنیں لشکر نشانگ کتگ- اُرش ءَ کساس دشمن ءِ سَے کارندہ زدگ بیتگ اَنت ءُ آئی ءَ مالی تاوانانی دیمپانی کنگ کپتگ-
آئی ءَ گوشتگ مروچی دگہ یک کاروائی ءِ وھد ءَ بلوچ لبریشن آرمی ءِ سرمچاراں تربت ءِ شھر ءَ ماھیگانی نھاد جاہ ءِ نزیک ءَ یک اُرشے ءَ پاکستانی پوج ءِ دلار ملا یاکوب پنام ءِ قریش کشتگ-
جیئند بلوچ ءَ گوشتگ اے مرد مسالہ پروش ءِ پوشاکاں پاکستانی پوج ءِ ملٹری انٹیلیجنس (ایم آئی) ءِ واستا کار ءَ بیتگ-
آئی ءَ گوشتگ ملا یاکوب پنام ءِ قریش ایم آئی ءِ کارگس ءَ ھوار شھر ءَ زورگریں پوج ءِ زوراکیانی وھد ءَ ھمراھی ءَ گندگ بیتگ – تربت ءِ شھر ءُ کش ءُ گوری ھنداں زورگرین پوج ءِ واستا چاریگری ءِ کار ءَ ھوار دشمن ءِ واستا دلارانی آرگ ءِ کار ءَ بیتگ-
گڈسر ءَ گوشتگے بلوچ لبریشن آرمی اے ھردوکیں اُرشانی زمہ واریاں من ایت ءُ زورگریں پوج چہ بلوچستان ءَ درکپگ ءَ مئے جنگ برجاہ مان ایت-
خیبر ءَ پشتون تھپز مومنٹ ءِ جرگہ ءِ اولی روچ آسر بوتگ۔
جرگہ شمبے ءِ نیمروچ ءَ بندات بوتگ ءُُ مگرب ءِ وھد ءَ اولی روچ ءَ آسر بوتگ۔ اے درگت ءَ جتاجتائیں دمگاں اتکگیں گشتانک دیوکاں گشتانک داتگ۔
پی ٹی ایم ءِ اے جرگہ ءَ باجوڑ، وزیرستان، شال، ڈی آئی خان، ژوب ءَ ھوار خیر پختونخوا ءُ بلوچستان ءِ مردم ھوار بوتگ انت۔
پی ٹی ایم ءِ سروک منظور پشتین ءَ جرگہ ءِ اولی روچ ءَ ھواریں مردماں گوں تران کنان ءَ گْوشتگ کہ “اے زلم ءُ زوراکی پشتونانی سر ءَ مدام بوھگ ءَ اِنت ءُ ھاسیں رنگ ءَ ناشرکاری ءِ درچ ءَ پد بلوچستان، خیبر پختونخوا ءُ دگہ پشتون دمگاں زلم ءُ زوراکی تیزی ءَ گوں دیم ءَ اتکگ اَنت۔”
منظور پشتین ءَ گشتگ اگاں اے جاور اے رنگ ءَ برجاہ بہ بنت گڑا جاور انگت نگیگ بوت کن انت۔ پمیشکا اے یک موہ یے کہ کلیں پشتون رھشون بہ نند انت ءُ یکیں پیسلہ ءَ بہ کن انت ۔
نوں درستیں رھشون نند اَنت ءُ وتی سوجاں دئینت کہ ایشی ءَ پد سفارشات ھوار کنگ بنت۔ باندا گیشتر گپ جنگ بیت ءُ شوربندی دیم ءَ کیت۔
جرگہ ءَ ”جنگ ءُ جنگولی ءِ تاوان: پشتونانی کیس“ ءِ سرھال ءَ پٹ ءُ پولی وائٹ پیپر شنگ کنگ بوتگ کہ ایشی ءِ تہ ءَ جنگ، جنگولی ءُ ناانساپیانی پشتون آبادی ءِ سر ءَ سکیں زھرناکیں اسر ءِ نبشتہ کنگ بوتگ۔ کہ اودا دمگ ءِ دیریں جنگ ءِ انسانی ءُ لٹ ءُ پلی تاوانانی سر ءَ چمشانک دیگ بوتگ۔
