TBP Balochi

کراچی ءَ بلوچ یکجھتی کمیٹی کراچی زون نیمگ ءَ چہ گودار مُچی ءِ درگت ءَ جتاجتائیں دمگاں نیاد کنگ بیتگ-

گیشیں ھالانی رِد ءَ بلوچ یکجھتی کمیٹی کراچی زون ءِ نیمگ ءَ چہ حاجی وشدل گوٹھ ڈملوٹی ھشت نمبر ملیر ءُ کاٹھور ءَ یک نیادے اڈ دیگ بوتگ-

اے نیاد ءِ تہ ءَ بیست ھشت جولائی ءَ گوادر ءَ راجی مُچی درگت ءَ سرپدی دیگ بوتگ ءُ آیاں گوشتگ کہ بلوچ راج ءَ نو سرپد بوگی اِنت کہ مارا یکجاہ بوگی اِنت گلامی ءِ بگیری ءَ گھگیری کنگی اِنت-

ھمے وڑ مروچی بلوچ راجی مچی ءِ سرپدی درگت ءَ ملیر شرافی ءَ ھوار لیاری بغدادی ءِ گیشتریں دمگاں دیولانی سر ءَ نبشتہ کنگ بیتگ ءُ سرپدی اسٹیکرز لچینتگ اَنت-

دومی نیمگ ءَ شال ءَ ھم بیست ھشت جولائی ءَ گوادر ءَ بؤکیں مُچی ءِ درگت ءَ بلوچ یکجھتی کمیٹی شال زون نیمگ ءَ چہ بلوچستان شھدربرجاہ ءَ بگر تاں کسٹم ءَ دیولانی سر ءَ نبشتہ کنگ ءُ اشی ءِ ھمراھی ءَ پتانک ھم بھر ءُ بانگ کنگ بیتگ-

زانگ بہ بیت راجی مچی ءِ درگت ءَ بلوچستان ءِ جتاجتائیں دمگاں نیاد ءُ دیولانی سر ءَ نبشتہ کنگ ءِ دْرچ برجاہ ءَ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ کسرمچاراں کیچ ءِ ھند کولواہ ءَ زورگریں پاکستانی پوج ءِ دو پرپٹ سواریں کارمندانی سر ءَ اُرش کُرتگ۔

جارکش ءَ گْوشتگ کہ مئے مرچی 18 جولائی ءِ روچ ءِ سَے ءَ رودکان کولواہ ءَ سرمچاراں زورگریں پاکستانی پوج ءِ دو پرپٹ سواریں کارمندانی سر ءَ گوں وتکاریں سلاھاں اُرش کُرتگ، اُرش ءَ دژمن ءِ یک کارمندے مُرتگ ءُ یکے ٹپی بیتگ۔

جارکش ءَ گْوشتگ کہ اے اُرش ھما وھد ءَ کنگ بیتگ وھدے کہ دژمنیں پوج لوکل گاڑیانی سر ءَ وتی راشناں برگ ءَ بیتگ۔

جارکش ءَ گْوشتگ کہ پروش وارتگیں دژمن چہ سرمچارانی اُرشانی تُرس ءَ وتی راشن ءَ وت بُرت نہ کن اَنت،پہ اے کار ءَ آ لوکل گاڑیاں کارمرز کنگ ءَ اِنت۔

میجر گْوھرام ءَ گْوشتگ ما لس مردم ءُ لوکل گاڑیانی واھند ءُ ڈرائیوراں کڈن کن ایں کہ آ دژمن ءِ دست ءَ کارمرز ءُ وتی زْرمبشت ءِ دیم ءَ اڈاند جوڑ مہ بنت، اے زْرمبشت ءَ بلوچ راج ءَ باز دیمونی داتگ، ھرکس اے زْرمبشت ءِ دیم ءَ اڈاند جوڑ بیگ ءِ جُھد ءَ بہ کنت گڑا وتی جان ءُ مال ءِ تاوان ءِ زمہ وار وت اِنت۔

جارکش ءَ گْوشتگ کہ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں سرڈگار ءِ آجوئی ءَ سرمچارانی اُرش زورگریں پوج ءُ آئی ءِ کمکارانی سر ءَ برجاہ بنت۔

بلوچ یکجھتی کمیٹی ءِ رھشون ڈاکٹر ماہ رنگ بکوچ ءَ گوشتگ بلوچ راج، بلوچ چاگرد، بلوچ سرڈگار ءِ سر ءَ دراھیں کالونیل مازگی ءُ پندلی پکرانی ودی کنوکیں ھزاروکی ءُ گیر دروشمیں ٹکی، جھلداری، دمگی، نیکراھی، زبانی، زُریاتی، سیمسری، پاٹی بازی، ٹولی داری ءُ بھر ءُ بانگی ءَ سرگوز کن اَنت بس بلوچ بوگ ءُ راجی مچی ءَ بیست ءُ ھشت جولائی ءَ گوادر ءَ وتی بھر زیرگ ءَ ستکی بہ کن اَنت ءُ بلوچ بوگ ءِ منانک ءِ دیگ ھمک بلوچ ءِ راجی پرز اِنت –

آئی ءَ گوشتگ اگاں بلوچ ءُ بلوچ سرڈگار ءَ رکینگ لوٹ ئے گڑا بلوچ ءِ گور ءَ نی پادیگ، بست کنگ ءُ پِڑ ءَ درایگ ءِ ابید ھچ راہ نیست اِنت – مئے گور ءَ یکجاھی ءُ بستار یک زندگیں راجے ءِ منانک ءُ سرجمیں دنیا ءَ اے گوشگ ءِ وھد اِنت بلوچ نی وتی سرڈگار ءَ وتی نسل کُشی ءَ اوپار کت نہ کنت اِنت-

ڈاکٹر ماہ رنگ بلوچ ءَ گوشتگ کہ بلوچ راھی مُچی ءِ بھر ءُ بانگی پندلی پندلاں یک گور کنگ ءُ بستار ءِ یک راجے ءِ یکجاہ بوگ ءَ راجدپتر ءِ سھریں تاکانی نویسگ ءِ وھد اِنت – اے وھد ءِ زوال ءِ کنگ ءِ تاوان ’ بلوچ راج ئیگ ‘ انت وھد ءِ سر ءَ نپ چِست کنگ راجی پجار ئیگ اِنت-

شال ءَ بیگواھیں مردمانی یل کنائینگ ءِ ھاتر ءَ زھرشانی ئیں نندانک ءَ ھواریں کماش زورانسری بیگواہ کمگ بیتگ-

گیشیں ھالانی رِد ءَ بلوچستان ءِ شھر شال ءِ دمگ چہ نوکلی ءَ پوج ءِ مزنیں کچے ءَ یک لوگے ءَ بیڑبرتگ ءُ یک کماشے آوار جنگ ءَ پد بیگواہ کتگ-

چہ شال ءَ زورانسری آوار جنی ءِ نشانگ کنگ بیتگیں کماش ءِ پجّار کامریڈ رحمت اللہ بلوچ نام ءَ چہ بیتگ کہ شال جھمنند اِنت-

دمگی اِھوالکار رِد ءَ رحمت اللہ بلوچ گوستگیں روچاں بلوچ یکجھتی کمیٹی ءُ ظھیر بلوچ ءِ کھول نیمگ ءَ چہ برجاھیں زھرشانی ءَ ھوار بیتگ اَت کہ اود ءَ پولیس ءَ زھرشانی کنوکانی سر ءَ لَٹ کُٹانی نشانگ کتگ اَنت ءُ اے میان ءَ رحمت بلوچ رسانکدر ءَ شنگ کنگ بیتگیں تامُر شنگ کنگ بیتگ اَنت-

دومی نیمگ ءَ چہ شال ءَ بازیں سیاسی ءُ چاگردی باسک رحمت بلوچ ءِ زورانسری آوار جنی ایر جتگ ءُ کماش ءِ یل کنائینگ ءِ لوٹ کتگ-

بلوچ کواس ءُ کلانیں راجدار میر مھمد علی تالپور ءَ وتی شنگ کتگیں یک تامربندے ءَ راجی مُچی ءَ ھوار بوگ ءِ دزبندی کتگ-

آئی ءَ گوشتگ مروچی بلوچ راج ءَ وتی پیسلہ کتگ کہ آ یکین پتر ءَ یکجاھی ءَ جنز ایت ءُ آ وتی ھمک مڈی ءُ زمین ءُ راج ءِ پھزداری ءَ کنت اِنت-

آئی ءَ گوشتگ نی باز بیتگ ءُ بلوچ راج ءَ سما بیتگ نا کہ وتی کمشرپی ءُ نا وتی مڈیانی برگ ءَ نہ ھیل اِنت-

آئی ءَ گوشتگ ھمے داب ءَ یازدہ جولائی ءَ ریاست ءَ شال ءَ بلوچ زالبولانی سر ءَ بے کساسیں زوراکی کتگ ءُ ایشی ءَ ابید ھم جھدکار زوراکی ءِ دیم ءَ اوشتوک بیتگ اَنت-

آئی ءَ گوشتگ راجی مُچی ءِ مکسد تیوگیں راج ءِ یکجاھی انت جنزان کنت اِنت-

آئی ءَ گوشتگ لھتے مردم ھمے سرپد بیت اِنت کہ راجی مُچی بس یک نیادے بلے اے وڑ نہ انت راجی مُچی دیم ءَ گیشتر مھکم بیت اِنت ءُ جنزان کنت اِنت-

آئی ءَ گوشتگ ھمینکس مئے سر ءَ زُلم ءُ زوراکی بہ بیت بلے ایشی ءِ دیم ءَ برگ مئے شُمئے کوپگان اِنت-

آئی ءَ گوشتگ اے گوست ءِ سیاست ءَ جتا اِنت ءُ ایشی ءِ گام پرایمنیں رنگے ءَ وت ءَ دیم ءَ جنز ایت-

آئی ءَ گوشتگ اے راجی مُچی نا ایوک ءَ ماہ رنگ انت نا ایوک ءَ منیگ انت نا یکجھتی کمیٹی اے راجی مُچی بلوچ راج ئیگ اِنت-

آئی ءَ گڈسر ءَ گوشتگ من دراھیں مردماں دزبندی کن آں آ بیست ءُ ھشت جولائی ءَ ماں برجم دارگ بوھوکیں راجی مُچی ءَ وت ءَ ھوار بہ کن اَنت ءُ مُچی ءَ سوبمند بہ کن اَنت-

روکپتی بلوچستان ءِ دمگ نیکشھر ءَ یازدہ روچ ءَ پیش کسان سالیں زھگے گار ءُ بیگواہ بیتگ کہ چریشی ءَ پد آئی ءِ درگت ءَ ھچ اھوال نیست اِنت-

گیشیں اھوالانی رد ءَ نیکشھر ءِ ھند متسنگ ءَ سیادی داروکیں نُھ سالی ئیں زھگ امیر ھمزہ پولادی یازدہ روچ ءَ پیش گار بیتگ کہ چریشی ءَ پد آئی ءِ درگت ءَ ھچ اھوال نیست اِنت –

اھوالانی رد ءَ کھول ءُ دمگی مردماں ھوار ھوار انتزامیہ ءِ واکدارانی یازدھیں روچانی شوھاز داں انگت ءَ آسر نہ بیتگ-

اھوالانی رد ءَ کھول ءِ ھمدردی ءِ واستا چہ زاھدان ءَ اھل سنت ءِ سروک مولانا عبدالحمید اسماعیل زئی ءِ نمائندگ اتکگ ءُ کھول ءِ گون ءَ ھمدردی یے کتگ ءُ کمک ءِ پیش کش کنگ بیتگ-

بیگواھیں ڈاکٹر دین محمد ءِ جنک سمی دین بلوچ ءَ تامُربندیں کلوھے ءِ تہ ءَ گْوشتگ کہ مروچی ما کل زان ایں بلوچانی سرجمیں زندمان تنگ اِنت بلوچانی مرچیگ یا کہ باندات ءِ ایمنی سرجم تنگ کنگ بیتگ بلوچانی راجی پجّار ءُ پدریچ سرجم اسرمند اِنت-

سمی دین ءَ گْوشتگ کہ مروچی جھان گوں تُرندیں گام ءَ دیمروئی ءِ نیمگ ءَ جُنزان اِنت بلے بلوچ پدمنتگ اِنت بلوچاں ھرچ وڑیں جیڑھاں چہ اسرمند اِنت اود ءَ بلوچ سالانی سال ھمے سرڈگار ءِ زندمان ءَ گوازینگ ءَ اَنت مروچی ھمود ءَ بلوچ مُھر نہ اِنت-

آیاں گْوشتگ کہ مروچی بلوچاں وتی جند بُنکی ھنکیناں چہ زورانسری لڑ ءَ بار کنائینگ اَنت مروچی ھزارانی مردم پاکستانی پوج ءِ آزارجاھاں بندیگ اَنت ءُ آزار اوپار کنگ ءَ اَنت آیانی کھول چتو زندمان گوازینگ ءَ اَنت آ درست مئے دیم ءَ اَنت مروچی بلوچانی تیرسُپتگیں لاش ویرانگاں کپتگ اَنت نان ءُ لاپ جیڑہ بہ بیت یا کہ روزگار ءِ درست بلوچانی واستا جیڑہ جوڑ کنگ بیتگ اَنت-

آئی ءَ گْوشتگ کہ مروچی مئے سرجمیں زندمان جنگجاھے جوڑ کنگ بیتگ بلے من جنگ ناں بلکیں ایمنی لوٹ ایں مارا یک وشھالیں زندمانے ءِ ھاتر ءَ یکجاہ بیگ لوٹ اِیت-

آئی ءَ گْوشتگ کہ بلوچ یکجھتی کمیٹی بیست ھشت جون ءَ گوادر ءَ یک راجی مچی یے کنگ ءَ اِنت اے راجی مُچی ءِ سوبمند کنگ مئے کلانی زمہ واری اِنت ما کل یکجاہ بیگ ءُ سرجمیں جھان ءَ پیش بہ دار ایں ھمے تاکت ءَ بلوچاں چہ زندگ بوگ ءِ ھک پچ گپتگ مروچی بلوچ ھمشی ءِ بگیری ءَ اوشتاتگ ءُ بلوچاں اے پیسلہ کتگ نو زوراک ءَ نہ منّ ایں گُڈسر ءَ سمی دین ءَ گْوشتگ کہ من راج ءَ گوں دزبندی کن آں اے راجی مچی ءَ بھر بزور اَنت ءُ اشی ءَ سوبمند بہ کن اَنت-

بلوچ راھشون ڈاکٹر ماہ رنگ بلوچ ءَ راست کتگ گْوشتگ کہ چار کلاکاں بندیگ سائرہ بلوچ، سادیہ بلوچ ءُ دگہ بلوچ زالبول ھُزدار ءِ راج ءَ راجی گھگیری ءِ زور ءَ ریاستی پوج ءِ پنجگاں چہ آجو بیتگ اَنت-

آئی ءَ گْوشتگ کہ ھُزدار ءِ راج ءَ مزنیں کچے ءَ وتی گھارانی پھازگ ھاتر ءَ ریاستی پوج ءِ گاڑیانی دیم ءَ یکشل ءَ چار کلاکاں تاں گھگیری کتگ ءُ آخرکار راجی گھگیری سوبمند بیتگ-

آیاں گْوشتگ کہ ریاستی پوج ءِ اے زوراکیں رویشگ بگیری ءَ ھُزدار ءِ راج مزنیں کچے ءَ درتکگ ءُ شال کراچی شھدگ بند کتگ ءُ پوج اے رویشگ بگیری ءَ گامگیج ءِ زورگ ءِ لوٹ ءَ کنگ ءَ اَنت- ھُزدار ءَ راج ءَ گوں دزبندی کن ایں گیش ءَ چہ گیش اے زھرشانی ءَ ھوار بہ بنت ءُ راجی تاکت ءَ چہ اے نزام ءَ پروش دے اِیت-

عمان ءِ بنجاھی شھر مسکت ءِ نزیک ءَ امام بارگاہ ءِ سر ءَ اُرش ءِ ذمہ واری داھش ءَ من اِتگ ۔

عمان ءِ واکدارانی رد ءَ دو شمبے ءِ شپ ءَ بنجاھی شھر مسکت ءِ نزیک ءَ امام بارگاہ ءِ سر ءَ اُرش ءُ سیکورٹی آپریشن ءِ تہ ءَ کُل 9 مردم بیران بوتگ۔

وتی ٹیلی گرام چینل ءِ سر ءَ شنگ بوتگیں ھالے ءِ تہ ءَ شدت پسندیں گل بِے بُنے، اسلامی دولت ءَ امام بارگاہ ءِ سر ءَ اُرش ءِ ذمہ واری من اِتگ۔

اے گل ءِ نیمگ ءَ چہ جاڑی بوتگیں ھالے ءِ تہ ءَ گْوشگ بیتگ کہ اسلامی ریاست ءِ سئے وت کُش اُرش کنوکاں گوستگیں شپ ءَ عمان ءِ بنجاھی شھر مسکت ءِ وادی الكبیر ءِ دمگ ءَ شیہ مجلس ءِ سر ءَ اُرش کتگ وھدے کہ آ ھاشورا مجلس ءِ واست ءَ یکجاہ بوتگ اَنت۔