TBP Balochi

پاکستانی استان سندھ ءِ دمگ جامشورہ ءَ پولیس تھانہ ءِ تہ ءَ تراک ءَ پولیس کارمنداں ھوار شش مردم ٹپی بیتگ اَنت- تراک ءِ زمہ واری سندھودیش روولیوشنری آرمی ( ایس آر اے ) ءَ منّ اِتگ-

رسانکدر ءَ شنگ کتگیں درشان ءِ تہ ءَ جارکش ایس آر اے ءِ رِد ءَ اُرش ءَ اپیسراں ھوار بازیں پولیس کارمندے ءِ ٹپی بیتگ اَنت- تھانہ ءِ تہ ءَ اوشتوکیں بازیں گاڑی یے ءُ ماڑی ءَ تاوان رس اِتگ-

جامشورو ءِ سینئر سپرنٹنڈنٹ پولیس ( ایس ایس پی ) طارق نواز رِد ءَ ٹپیاں چہ دو ءِ جاور نگیگ اَنت ھیدرآباد سول نادُراھجاہ ءَ برتگ-

آئی ءَ گْوشتگ کہ تراک ءَ چہ پولیس اسٹیشن ءَ سک تاوان رس اِتگ وھدے کہ رکشہ ءُ پرپٹ ءَ تباہ بیتگ اَنت-

ٹپیانیانی پجّار ھیڈکانسٹیبل محمد بخش، اے ایس آئی رسول بخش ءُ غلام معی الدین ،پولیس کانسٹیبل ارشاد ءُ علی عبدالطیف ءُ یک شکی ئیں مردم ءِ پجّار جمشید نام ءَ چہ بیتگ کہ تراک ءِ وھد ءَ بندیگجاہ ءَ بیتگ-

تراک ءِ آسر ءَ تھانہ ءِ تہ ءَ اوشتوکیں گاڑی کہ آیانی تہ ءَ اسکوٹر، پرپٹ ءُ رکشہ ھوار اَنت تباہ بیتگ اَنت-

پاکستانی پوج ءَ چہ مشکے ءَ چار مردم زورانسری بیگواہ کتگ اَنت-

بلوچستان ءِ دمگ آواران ءِ ھند مشکے ءَ پاکستانی پوج ءُ چیریں ادارھانی کارمنداں چار مردم آوار جتگ ءُ ناشناسیں جاھے ءَ برتگ اَنت چریشی ءَ پد آیانی درگت ءَ ھچ وڑیں ھال دز نہ کپتگ-

دمگی اِھوالکار رِد ءَ گوستگیں شپ ءِ ساھت چار نزیک ءَ پاکستانی پوج ءَ مشکے ءِ دمگ نوکجو ءَ مزنیں کچے ءَ راہ ءُ در بستگ اَنت دمگ انگر ءَ کتگ ءُ ھمے میان ءَ لوگانی سر ءَ بیڑبرتگ-

زورانسری بیگواہ کنگ بیتگیں مردمانی پجّار شھداد ء اللہ بخش، عتیق ء ماسٹر الھی بخش ، منیر ء نبی بخش ءُ جبل ء مجید ناماں چہ بیتگ اَنت-

واکدار ءَ اے درگت ءَ ھچ وڑیں درشان شنگ نہ کتگ-

زانگ بہ بیت مشکے ءَ زورانسری آوار جنی ءَ چہ گیش اسرمندیں دمگاں ھوار بیت وھدے کہ اد ءَ مزنیں کچے ءَ مردم تیرگواری ءِ نشانگ ھم کتگ اَنت- اے تیرگواری کنوک پاکستانی پوج ءِ چیردستی ءَ کارکنوکیں ڈیتھ اسکواڈ ءِ کارمندانی سر ءَ بھتام جنگ بیت-

گوستگیں روچاں ھمے گپ دیم ءَ اَتکگ کہ مشکے ءَ مردماں زور کاربندگ ءَ ھوار آیاں زورانسری وتی ھمراہ کن اَنت دانکہ آجوئی لوٹوکانی اُرشاں چہ بہ رک اَنت وھدے کہ دمگی مردماں پوج ءِ بُنجل ءَ لوٹائینگ ءُ پیش بیگ ءِ پابند ھم کتگ اَنت-

شنگ بیتگیں یک تامُرے ءَ گندگ کئیت کہ ڈیتھ اسکواڈ ءِ کارمنداں لَٹ کٹ کنگ اَنت – دمگی مردمانی رِد ءَ اے مردم زور کار گرگ پاکستان پوج ءِ راہ ءَ آؤکیں دارگ ءُ ڈنگرانی ساپ کنگ ءِ کار ءَ گرگ ءَ اَنت-

شوھاز ءُ نگد ءُ چکاس ءِ مانا

نبشتہ کار : شاھد اھمد

پنچُمی بھر

دی بلوچستان پوسٹ

کار راھبند آرٹ ریسرچ ءِ زانتکار ءِ گشگ ءِ رد ءَ جوانیں ءُ کوالٹی ءِ ریسرچ ھما انت کہ آئی ءِ کار ءِ وڑ ءُ پیم ءِ سر ءَ چہ ھچ وڑیں پڑ ءَ موکل بوگ ءَ مہ دئے۔” آئی ءِ وتی نزریہ ءِ سر ءَ ، گڑا آئی ءِ دراھیں پٹ ءُ پولی جُھد گار ءُ بیگواہ بنت۔ پرچا کہ آئی ءِ نیت شککیگ بوتگ ءُ آ یک راستیں پٹ ءُ پولکارے ءِ مجگ ءِ پلگاری ءُ شوھاز ءِ راستیں جاوراں پیلو کنگ ءَ نہ اِنت۔ پٹ ءُ پولی کار یک زگر ءُ پَھکیں اَملے۔ ایشی ءِ تہ ءَ دز مان جَنی ءِ ھچ وڑیں منّگ نہ بیت۔

پٹ ءُ پولی اَمل ءِ تہ ءَ پٹ ءُ پولکار ءِ رھبند یک سائنسی اَملے کہ ایشی ءِ تہ ءَ پٹ ءُ پولکار (مفروضات) آزمائش ءُ چار ءُ تپاس ءَ پد رستگیں آسراں نبشتہ کنت۔ اے اَمل ءِ تہ ءَ آئی ءِ نامداری سرجم ءَ دگہ رنگے ءَ گندگ بیت۔ پٹ ءُ پولکار چہ لائکی وسیلگاں راستی ءُ جارواں زرت کنت ءُ آیانی (معروضی) تجزیہ ءَ کنت ءُ گڈی ءَ چہ رند رندگیری ءَ یکجاہ کنان ءَ یک چمشانکے ءِ جوڑ کنت۔ چوش کہ آئی ءِ پٹ ءُ پول (منطقی ءُ معروضی )رھبندانی سر ءَ بندوک اِنت۔ اے بنیاد ءَ پٹ ءُ پولکاراں سائنسی رھبند ءِ زورگ ءِ سوج داتگ پرچا کہ “اے رھبند ءِ زورگ ءَ کار نہ ایوک ءَ یکجاہ بیت بلکیں آسر ھم پٹ ءُ پولکار ءِ زاتی (رجحان یا روایتی) رسانکی ءَ چہ آزات بیت۔ اے گوں دُرستیں آسر ءِ گرگ ءِ جزم ءَ بندات بیت۔ پمیشکا ھما جاہ ءَ کہ پٹ ءُ پول بیت اود ءَ سائنس بیت ءُ ھما جاہ ءَ کہ تبّی پدیدگ بنت اود ءَ پٹ ءُ پول بیت۔ آسر ھمیش اِنت کہ (اسلوب) ءِ ھوالہ ءَ پٹ ءُ پول ءِ پجّار ھمیش اِنت کہ آ شرتر، مستند ءُ پدر بہ بیت ءُ ذاتی نپ ءُ سیادی ءُ مراگشانی تہ ءَ پجّار مہ کنت۔

پٹ ءُ پول ءِ تہ ءَ کَچّو چینی ءُ ھیال ءِ اَمل بُرز ءِ لیکہ ءِ تہ ءَ گْوشگ بوتگ کہ پٹ ءُ پولی کار ءِ تہ ءَ یک (معروضی) دروشمے ءِ زیرگ ءِ بنیاد ءَ راستی ءُ جاور یکجا کنگ بنت بلے برے برے اے جیڑہ ءِ گوں ھمگرنچیں راستی ءُ جاور دست نہ کپ اَنت پمیشکا چوشیں جاور ءَ پٹ ءُ پولکار اندازگ ءِ گوم ءَ کار کنگ ءَ مجبور بیت۔

۱: راجدپتر ءِ لبزانک ءِ یک انچیں پڑے ءَ کہ مواد دست نہ کپ اِیت پمیشکا مواد ءِ نہ بوگ ءِ وھد ءَ کچّو چینی ءِ کارمرز کنگ بیت، پرچا کہ ایشی ءِ ھست نہ بوگ ءَ لبزانکی راجدپتر مُجتی برجاہ نہ بیت۔

۲: لبزانکی راجدپتر ءِ تہ ءَ گمان ھم وتی دل تب ءِ رد ءَ نہ بیت بلکیں گمان ھم دلیلانی رژنائی ءَ جوڑ کنگ بیت ءُ چہ ھمے دلیلاں درکپتگیں آسر( منطقی) رنگ ءَ ثابت بوت کن اَنت۔ (مفروضہ) گمان ءِ پٹ ءُ پول ءَ اے گپ المی انت کہ پٹ ءُ پولکار (منطقی) دلیلاں بہ دنت، آئی ءِ (مفروضہ) گمان ءِ بنیاد ءَ ھیالی ھساب ءَ گیشتر جوڑ کنگ بہ بیت، آ گیشتر منّگ بیت۔

روان انت۔۔۔

بلوچ راج بیست ھشت جولائی ءِ روچ ءَ گوادر ءَ سر بہ بنت جھان ءَ کلوہ بدے اَنت کہ ما یک زندگیں آزاتیں راجے ایں- ڈاکٹر ماہ رنگ بلوچ

بلوچ راھشون ڈاکٹر ماہ رنگ بلوچ ءَ گْوشتگ کہ سرجمیں بلوچ راج بیست ھشت جولائی ءِ روچ ءَ وتی لوگاں چہ، وتی دمگاں چہ در بیا اَنت گوادر ءَ سر بہ بنت سرجمیں جھان ءَ اے کلوہ ءَ بدے اَنت کہ ما یکجا ءُ زندگیں راجے ایں، شرپدار ءُ آزاتیں راجے ایں-

آئی ءَ گْوشتگ ناں بلوچ بے وارس اِنت ناں بلوچ ءِ سرڈگار -وتی راج ءُ وتی سرڈگار ءِ رکینگ ءِ ھاتر ءَ گھگیری زندگ اِنت، گھگیری زندگ اِنت ءُ گھگیری زندگ بیت-

بلوچ یکجھتی کمیٹی شال ءِ نیمگ ءَ چہ سریاب، ھدہ ءُ بی وائی سی نوشکی ءِ نیمگ ءَ چہ کلی قادر آباد ءَ یک نیادے برجم دارگ بیتگ، چریشی ءَ بیست ھشت جولائی ءَ گوادر ءَ بیوکیں ” بلوچ راجی مچی ” ءِ درگت ءَ سرپدی دیگ بیتگ-

ھمے وڑ بی وائی سی ءِ راھشون صبغت اللہ شاہ جی ءَ گْوشتگ کہ بلوچ راجی مچی ھرچ وڑیں گلی، تحریکی انجمن ءُ پارٹی ءَ یکر بہ بنت سرجمیں بلوچ توری زند ءِ ھرچ پڑ ءَ گوں سیادی بہ دار اِیت اولی رند ءَ تھنا بلوچ بہ بیت یکجاھی ءَ درشان بہ کنت ما کل بلوچ ایں ءُ وھدے یکجاھی ءِ ھاتر ءَ راج ءَ لوٹائین ایں ما یک راجے جوڑ بہ بہ ایں جھان ءَ وتی یکجاھی ءَ پیش بدار ایں-

روکپتی بلوچستان ءِ دمگ راسک ءَ مَچانی باگ ءَ اس کپتگ ءُ بازین مَچے ستکگ –

اھوالانی رد ءَ آس راسک ءِ ھند پیروز آباد ءَ باگے ءَ کپتگ کہ اود ءَ بازیں مَچے آس ءَ وتی لپیٹ ءَ زرتگ اَنت-

شنگ بیتگیں تامر بنداں مھلوک گوشگ اِنت کہ آس ءِ زور باز اِنت ءُ دمگ ءَ دگہ مَچانی گرگ ءَ ھم گمان ھست اِنت-

زانگ بہ بیت پیروز آبا چہ راسک ءِ شھر ءَ پنچ کیلو میٹر ءِ دوری ءَ اَنت اگاں آس کُشیں گاڑیاں توار بہ کن انت گڑا اے جاہ ءَ وت ءَ سر کت کنت بلے مردمانی گوشگ انت آس کُش ءَ مھلوک ءَ گشتگ بازیں وھدانی گوزگ ءَ پد ھم آیاں وت ءَ سر نہ کتگ-

یک سالے ءَ ساری پاکستانی پوج دست ءَ زورانسری بیگواھیں ورنا عبدالوھاب قلندرانی ءِ مات وپات بیتگ-

زورانسری بیگواھیں ورنا عبدالوھاب ء عثمان قلندرانی ھُزدار ءِ دمگ توتک ءِ جھمنند اِنت کہ پاکستانی پوج ءَ گوستگیں سال بیست جون ءَ چہ بولان کالونی ءَ آوار جتگ ءُ بیگواہ کتگ کہ انگت بیگواہ ءَ اِنت-

عبدالوھاب ءِ مات کہ وتی چک ءِ زورانسری بیگواھی ءَ پد بے کساس گم ءُ رنجانی تہ ءَ دوچار بیتگ گوستگیں سھب ءَ دل ءَ گپتگ ءُ بیران بیتگ-

زانگ بہ بیت کہ بلوچستان ءَ زورانسری بیگواھیں مردمانی مات ءُ دگہ بازیں کھول دوستناکانی ودار ءَ اے جھان ءَ چہ شتگ اَنت-

تربت ءَ زورانسری بیگواھیں مردمانی کھول ءِ زھرشانی ئیں گدان دمگی انتزامیہ کارگس دیم ءَ چارمی روچ ءَ ھم برجاہ-

نندانک ءَ ھک دے تھریک، بی ایس او ءِ گوستگیں راھشوناں ھوار سیاسی چاگردی جُھدکاراں یکجاھی درشان اِتگ-

بلیدہ ءَ ھوار کیچ ءِ جتاجتائیں دمگاں چہ بیگواھیں مردمانی کھول گوستگیں چار روچاں چہ وتی دوستناکانی یل کنائینگ ھاتر ءَ دمگی انتزامیہ کیچ ءِ کارگس دیم ءَ زھرشانی ئیں نندانک داتگ ءُ نشتگ اَنت، نندانک ءَ چہ بلیدہ ءَ سیادی داروکیں مسلم عارف، فتح میار، محمد بلوچ ءِ کھول ءَ اَبید چہ آپسر تربت ءَ سیادی داروکیں جھانزیب فضل، چہ پیدارک ءَ سیادی داروکیں میران حسین، سمیر نعمت اللہ بلوچ، شے کھن ءِ جھمنند ڈاکٹر رفیق بلوچ، ھمے وڑ نثار کریم، حیات سبزل ءُ ولی محمد ءِ کھول ھم زھرشانی ئیں نندانک ءَ ھوار اَنت-

نندانک ءِ چارمی روچ ءَ بی ایس او ءِ گوستگیں چئیرمین کامریڈ ظریف رند، ھک دے تھریک ءِ دمگی چیئرمین حاجی ناصر پلیزئی، مولانا نصیر احمد. سعید جمعہ ، صادو فتح، داد جان رند ءُ دگر کھول گدان ءِ تر ءُ گرد ءَ اَتکگ اَنت آیاں یکجاھی درشان ءِ کتگ، وھدے کہ نندانک ءَ بی ایس او پجّار ءِ دمگی سروک یاسر بیبگر ءُ ورنا ایں چاگردی باسک حمید بلوچ ھم ساڑی بیتگ-

زھرشانی گدان ءَ نشتگیں کھولانی لوٹ اِنت کہ آیانی دوستناک اگاں میاربار اَنت گُڑا آیاں ڈیھی کانود رد ءَ آمیدگس ءَ پیش بہ کن اَنت، زورانسری بیگواہ کنگ ڈیھی کانود ءُ راھبندانی بگیری اِنت اے مارا کبول نہ اِنت ما اشی ءِ بگیری ءَ جُھد کن ایں-

بلوچستان ءِ جتاجتائیں دمگ کیچ ءُ ھاران ءَ پاکستانی چیریں ادارہ ءُ ڈیتھ اسکواڈ کارمندانی دست ءَ چار مردم آوار جنگ ءَ پد بیگواہ کنگ بیتگ اَنت ءُ پد ءَ دو یل کنگ بیتگ-

اِھوالکار رِد ءَ یکشمبے چاردہ جولائی دوھزار چار ءَ کیچ ءِ بُنجاھی شھر چہ تربت ءَ پاکستانی پوج ءِ چیریں ادارھانی چیردستی ءَ کارکنوکیں ڈیتھ اسکواڈ ءِ کارمنداں یک ورنایے زورانسری آوار جتگ آئی ءِ دست ءُ پاد بستگ اَنت گاڑی ءَ مان کتگ ناشناسیں جاھے ءَ برتگ-

آوار جنگ بیتگیں ورنا ءِ پجّار سراج ء شفی محمد جھمنند نودز کیچ نام ءَ چہ بیتگ-

اِھوالکار رِد ءَ اے ورنا ھما وھد ءَ ڈیتھ اسکواڈ کارمنداں آوار جتگ وھدے آ ھوٹل ءَ ورگ ورگ ءَ بیتگ-

ھمے وڑ گوستگیں روچ ءَ بلوچستان ءِ دمگ ھاران ءَ پاکستانی پوج ءُ ادارھانی کارمنداں بیڑبرتگ ءُ لشکر کشی کنان ءَ سے مردم زورانسری آوار جتگ ءُ گوں وت برتگ اَنت کہ آیانی پجّار حفیظ اللہ ء فضل محمد چنال، منظور احمد ء عباس یلانزئی، ضیاء اللہ ء فضل ء محمد چنال نام ءَ چہ بیتگ اَنت, اشی ءَ پد منظور احمد ءُ ضیاء اللہ یل کتگ اَنت-

ھالانی رِد ءَ سئیں مردمانی سیادی ھاران ءِ دمگ چہ زرد گواش ءَ اِنت وھدے کہ اے وھد ءَ اش ھاران ءِ شھر ءَ کبدانی میتگ ءِ نزیک ٹینکی دمگ ءَ اِنت-

زانگ بہ بیت بلوچستان ءَ زورانسری آوار جنی ءِ دْرچ یکشلہ برجاہ ءَ اِنت یک نیمگے زورانسری آوار جنی ءِ گر ءُ دار ءُ بیگواھیں مردمانی یل کنائینگ ءَ بلوچستان ءِ تیاب دپی شھر ماں گوادر ءَ بیست ھشت جولائی ءَ یک راجی مُچی یے برجم دارگ بیگ ءَ اِنت ءُ دومی نیمگ ءَ آوار جنی ءِ نہ کٹوکیں دْرچ برجاہ ءَ اِنت-

درنازیں دُری 

نبشتہ کار: سیپ بلوچ

دی بلوچستان پوسٹ 

مئے چاگرد انگت بازیں جاگہ ءَ گوستانک ءُ گیدی ءِ رنگ جلواناکی ءِ زیبائیاں چہ سرچکار اِنت مئے چاگرد ءَ دری یک کارستے کسهے راستی یے کہ چاگرد ءِ پدمنتگی ءُ بزگی ءَ گیدی ءِ جلواهناکیں رنگاں گوں جنزگ ءَ انت (درناز)ئیں دری ، ءِ کسہ ءُ چاگرد ! من مدتے ءَ رند وتی بنکی هنکین ءَ اتکگ ات آن ءُ بازیں ندارگ، مردم، هلک، کوهن بوتگ ات کہ منی چمانی دروشم ءَ هرچیز ءِ رنگ ءُ چهر جتا گندگ ءَ اتک ، من وتی کوٹی ءَ وپتگ اِت آں سارتیں سارتان ءِ موسم ات ، کہ چہ شهر ءَ سنگتے ءَ پون کُت کہ منی مات! پہ روتاپ ءَ سچکیں تگردے لوٹگ ءَ انت وڑے بکن تئی هلک دمگ کوهی دمگے الم دست کپ ایت ،داں من گشت بس بزاں وڑ بوتگ داں من پون هلاس کُت کہ من ءَ زیکیں ندارگ ءَ یک رندے پد ءَ گوں وت بُرت- 

سهب ءِ روچ ٹک ءَ من کوٹی ءَ وپتگاں ات آں کہ چِیڑینگ ءِ توار ات لیڈوے دِریپگ ءَ ات داں من کوٹی ءِ در پچ کُت هشترے پُل ءُ راڑ انت بارے پیش ئِے لڈ اتگ جنینے ءَ مهار اَت اوشتاتگ ات دیم ءِ جهلا ات گوں منی ماس ءَ گپ ءَ ات وهدے ماس گوں هشتری ءَ دیم پہ بُرز ءِ گسانی نیمگ ءَ روگ ءَ لگ ات من دیست کہ باز زیبناکیں جلواھناکیں نیم امریں جنینے بلوچی چادرے ءَ پیڑاتگ هشترے مهار ءَ اِنت گس ءِ پُشت ءَ هشتر ءِ بار ئِے بوتک ءُ هشتر ئِے مهار ءَ کُت جنزان بوت- 

من ماس جست کت اما اے زال کے انت؟ کہ اے جاورانی تہ ءَ اے وهدے تهنا انگت بلوچی ءِ هما کوهنیں رنگاں گوں سرچکار اِنت ، ماس ءَ پسہ دات تو پجا نیاؤرت ؟

من گشت کمو هان بلے تو بگش بوت کنت کہ من رد بہ باں گڑا ماس ءَ درائینت اے درنازیں دُری اِنت ، مرچان لڈ اتگ دگ ءِ لمب ءَ گس اَنت ئِے  بلے انگت وتی اسل ربیت ءَ شموشکار نہ اِنت دائم پمن دار پیش تگرد کار ایت منی کسانی ءِ دزگوهار بوتگ انگت مهر ئِے هما رنگ ءَ انت ، ماس ءَ بچکندے ءَ پد گوشت ترا دُری یات انت؟

من، هو،شر یات اِنت آ وهد ءَ کہ من دری دیستگ ات دری سلاه بند ات دری اولی زال بوتگ کہ پرپٹ ءِ تاچگ ئِے زانتگ دری اولی زال بوتگ کہ دری ءَ میار جلے بوتگ، دری ءِ سلاه ءِ چست کنگ چہ مهر ءِ کسهے ءَ بوت ، درناز کوه ءِ مالداریں کماش میار ءِ چک ات کہ جنکے ءُ بچکے ءَ گوں مهر کنت ءُ ایشانی کهول رازی نہ بنت وت ماں وت ، دومی جنک ءِ کهول سلاه بندیں مردم ات انت نسلی جنگے ءَ گوں دچار اِت انت کہ جنک گوں بچک ءَ مهر کنت ، همے بچک جنک ءِ کماش ءِ سپاهیگے بیت-

گوں جنک ءَ مهر کنت داں جنک ءَ گوں شور ءُ سلاه کنت مردم رازی نہ بنت گپ جت گوں کهول ءَ کُت نہ کن انت داں کوه ءَ رو انت دری ءِ کماش میار ئیگ ءَ پہ میار جلی وهدے جنک ءِ کهول سهیگ بیت کہ اے شتگ انت کوه ءَ کماش میار ءِ گس ءَ پہ میار جلی گڑا اے سلاهاں بند انت گاڑی ءُ پرپٹ مردم زور انت رو انت کہ جنک ءُ بچکاں کُش اِیں، کہ مئے هاندان ءِ چم اش جهل کتگ انت ، چوناها اے جنک ءِ پت زگریں بلوچے بوتگ بلے جنگ ءُ جیڑهاں مان کپتگ-

وهدے اے رو انت کماش میار دری ءِ پت ءِ لوگ ءَ دری گند ایت مزنیں گاڑی ءُ پرپٹ پیداک بنت گڑا دری سلاهاں بند ایت ءُ جنک ءُ بچک ءَ تگردو ءَ کنت دیم ءَ نند ایت میار ڈن ءَ پات گوپگ ءَ بیت وهدے مردم کاینت بلوچی روایت ءَ دار انت، پامال نہ کن انت میار پاد کیت تگردے پچ کنت مردماں نندارین ایت ۔

گڑا جنک ءِ پت گوں میار ءَ گپاں کنت کہ منی جنک جستگ تئی گور ءَ انت گڑا ناکو میار گوش ایت هو جنک ءُ بچک منی گور ءَ انت بلے منی لاڑیں جنک درناز ءَ پہ میار داشتگ انت من بلوچے آن بلوچی روایت ءَ بلوچ ءِ میار ، بلوچ ءِ سر ءِ بُرگ ءَ پد برگ بیت ، شما نند ات من پہ شما پسے کُشاں شمارا سبارگ دیاں اگاں رو اِت راه پچ انت شت کن اِت جنک منی میار انت ، درجان گوں سلاهاں تگردوے دپ ءَ نشتگ-

همد ءَ جنک ءِ مردمے جاهلی کنت گپ نہ زور ایت کہ من رواں جنک کشّان کناں دَر کناں داں دُری توار پر جنت کسے ءَ تگرد پار کت وتی ساه ءَ چہ روت گڑا دُری کلاش ءَ چمبر کنت مرد  ترس ایت دیم ءَ نہ روت اے مرد ءَ توار کن انت سرپد کن اَنت کہ بلوچی  روایت پامال کنگی نہ انت میار ءِ میار ءَ کار مدار ات ، رند ءَ چار اَنت چے بیت پیسلهے کن ایں داں مردم رو انت-

ناکو میار ءَ بچکیں زهگ نہ بیت میار ءِ جن دری ءِ مات کسانی ءَ مِر ایت دُری ءَ میار رودین ایت ، میار ءِ جنک درناز بچکے ءِ کَنڈ ءَ دار ایت میار ءِ سرجمیں مال ءُ دلوتاں دلگوش کنت چداں چہ سلاه بند بیت ءُ بچک ءُ جنک همد ءَ نکاه کن انت ءُ هلک کن انت میار ءِ مالاں گوں دلگوش بنت بلے سلاه بندی ءَ وتی نہ پروش انت- 

جنک ءِ پت کهول کنت کہ من ءَ بزاں جنکے نہ بوت ءُ آ کسہ ءَ پروش دنت مدتے ءَ میار کوه ءَ بیت ءُ وهدے سرکار ءُ پوج کیت کوه آپریشن بیت میار لڈینگ بیت کیت کوچگ ءَ هنکین کنت دری کوچگی مردے ءَ گوں سانگ کنت بلے کوه دری ءِ دل ءَ چہ در نہ روت دری همک وهد کوه ءَ دار پیش کار ایت ، گوں پس ءُ دلوتاں کوه ءَ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہدی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-

بلوچ یکجھتی کمیٹی ءَ بیست ءُ ھشت جولائی ءَ ماں گوادر ءَ ’بلوچ راجی مُچی ‘ ءِ نام ءَ پنتاکی دروشمہ جارانک شنگ کتگ ءُ گوشتگ با سمائیں بلوچ راج! 28 جلکشان یک سادگیں روچے نہ اِنت بلکیں بلوچ راجی برزائی ءِ روچ اِنت، بلوچ راج ءِ تہ ءَ درد ءُ رنجانی بھر ءُ بانگ ءِ روچ اِنت. اے روچ مرگ ءُ زند ءِ جُھد ءَ سالانی سال پاکستان ءِ زنداناں بندیں نزیکیں مردمانی زندگ کنگ ءِ ھاتر ءَ ترند ءُ رھبندیں جھد ءِ بندات ءِ روچ اِنت۔ بلوچ سرڈگار ءِ سر ءَ بلوچ چُک چینی ءِ ھلاس کنگ ءِ راجی جُنز ءِ بندات ءِ روچ اِنت۔ بلوچ راج ءِ یکجاہ کنگ ءُ آیانی میان ءَ تپاکی ءُ یکمشتی پیداک کنگ ءِ روچ اِنت، راجی مزنی، شرپ ءُ دلیری ءِ منّارینگ ءِ روچ اِنت۔ مئے مات ءُ گْوھار ءُ چُکانی ارسانی کپگ ءَ بند کنگ ءِ روچ اِنت، چادر ءُ چار دیوال ءِ بزاں کسمَپُرسی ئیں زند ءَ پاد کنگ ءِ سالانی ھلاس کنگ ءِ جزم ءِ روچ اِنت، بلوچ ءِ ننگ، بلوچ ءِ ابرو، بلوچ ءِ ناموس ءُ بلوچ ءِ گیرت ءِ رکینگ ءِ روچ اِنت۔ اے روچ زُلم ءُ ھون ریچی ءِ دراجیں راجدپتر ءَ مٹ کنگ ءِ روچ اِنت۔ بلوچ راج ءِ پَجّار ءُ وت واجھیں راج ءِ پاد آیگ ءُ بیدار کنگ ءِ روچ اِنت۔ بلوچ راج ءِ نزور کنگ، گلام کنگ، بَھر ءُ بانگ، نادان، لالچی ءُ جَھلیں لیکھانی رد کنگ ءِ روچ اِنت۔ بلوچ ءِ راجی زور ءِ مَنّارینگ ءِ روچ اِنت۔

آئی ءَ گوشتگ بھادریں بلوچ راج ءِ پُسگ :یک رندے شری ءَ بہ جیڑ اِت۔ ما بلوچ ءِ بستار ءَ بس یک روچے چہ وتی گساں درکپ اِیں ءُ یک جاگھے ءَ یکجاہ بہ بہ اِیں ءُ سرجمیں دگنیا ءَ بہ گْوشیں کہ بس اِنت ،بس اِنت ننگ ءُ شرپ ءِ لگتمالی ءُ وتی زِر ءُ مڈّیانی لُٹ ءُ پُل ءِ سودا ءَ نہ کن اِیں؟ . سمائی ءُ شانداریں بلوچ، مرچی شمئے یات کنگ ءِ وھد اِنت، شموشگی نہ اِنت، پادا اِت ءُ پاد آیگ ءِ وھد اِنت. اگاں انوں نہ اِنت گڑا ھچبر نہ اِنت۔ پد ءَ آ روچ دیر نہ اِنت کہ مئے نا دلگوشی ءُ دیم ترّگ ءِ سوب ءَ نزیکیں باندات ءَ شھر ءُ کوچگ ءُ کوچگ ءُ بازار ءُ دشت ءُ کوھاں روچ پہ روچ سداں بلوچانی لاش دست کپ اَنت ءُ ھر روچ سداں بلوچ گار ءُ بیگواہ بہ بنت۔ ءُ سداں بلوچ ھمک روچ گار ءُ بیگواہ بنت مئے مات ءُ گوھار سرکاری رنگ ءَ وتی گریوگ ءِ جاور ءَ زوراکی کنگ بنت۔

شنگ بیتگیں جارانک ءَ گوشگ بیتگ مرچی سرجمی ءَ ریاست پاکستان ءُ ریاست چین ءَ یکجاہ کتگ کہ بلوچ ءِ ساھل ءُ مڈیانی لُٹ ءُ پُل کنگ ءِ واستا اولی رند ءَ بلوچ راج ھلاس کنگ بہ بیت، بلوچ راج ءِ تہ ءَ رستر ءُ تُرس ودی کنگ بہ بیت دانکہ آیانی راج ، وتی سرزمین ءُ وتی زندگ بوھگ ءِ دیم ءَ اوشتگ ءِ ھاترا بلوچ راج ءِ تہ ءَ ھچ وڑیں عزت ءُ عزت ، ھچ دلیری ، ھچ وڑیں عزت ءُ شان ءُ شان پشت مہ بیت۔

آئی ءَ گوشتگ پمیشکا بیا اِت کلیں بلوچ راج چہ وتی ھند ءُ دمگاں درکپیت ءُ 28 جولائی ءَ گوادر ءَ سر بیت ءُ سرجمیں دگنیا ءَ اے کلوہ ءَ دیم دنت کہ ما یک شاندار ءُ زندگیں راجے، یک شرپداریں ءُ آجوئیں راجے ایں. نہ بلوچ یلگ اِنت ءُ نہ بلوچ گلزمین۔ پہ وتی راج ءُ وتی سرڈگار ءِ پھازگ ءَ مزاحمت زندگ اَت، مزاحمت زندگ اِنت ءُ مزاحمت زندگ بیت۔