شال پریس کلب ءَ پریس مراگش دیان ءَ ماہ رنگ بلوچ ءَ گشتگ کہ بلوچ یکجھتی کمیٹی ءَ 28 جلکشان ءَ گوادر ءَ راجی دیوان بلوچ راجی مُچّی ءِ بندوبست کنگ ءِ جار جتگ۔ بلوچ راجی مُچّی یک ایمن سیاسی اَملے کہ بلوچ چُکچینی، بلوچستان ءِ راجی مڈیانی لُٹ ءُ پُل ءُ بلوچستان ءِ تہ ءَ انسانی ھکانی ھر وڑیں لگتمالی ءِ ھلاپ ءَ بلوچ یکجھتی کمیٹی ءِ جھد ءِ بھر اِنت۔
آئی ءَ گْوشت کہ بلوچ یکجھتی کمیٹی چہ بندات ءَ یک ایمنیں سیاسی گلے بوتگ، لانگ مارچ ءَ چہ مئے درستیں سیاسی اَمل سک ایمن ءُ رھبند ءِ رنگ ءَ روگ ءَ انت ءُ اے وھد ءِ تہ ءَ ھچ وڑیں گامگیج زورگ نہ بوتگ۔ بلوچ یکجھتی کمیٹی ءِ نیمگ ءَ کہ آئین ءُ کانود ءِ ھلاپ اِنت۔ بلے گْوستگیں یک ھپتگے ءَ بلوچ راجی مچی ءِ پروش دیگ ءِ بے سوبیں جھد کنگ بیتگ بلوچ راجی مچی ءِ ھلاپ ءَ، بلوچستان ءِ شھراں ھوار گوادر، ھزدار، پسنی، کوھلو، کلات، تربت، ھب، شال ءَ ھوار۔ مئے زالبول ءُ رھشون آزار دیگ ءُ دزگیر کنگ بوگ ءَ اَنت ءُ کراچی ءَ مردم دزگیر کنگ بوتگ اَنت، سئے جھدکار ٹارچر کنگ ءُ بیگواہ کنگ بوتگ اَنت ءُ مردمانی سر ءَ بازیں ایف آئی آر نبشتہ کنگ بوتگ اَنت۔
آئی ءَ دیمترا گْوشتگ کہ اے پنجاب نہ اِنت، زور ءُ زوراکی ءِ کارمرد کنگ ءَ چہ مھلوک ترسینگ بیت نہ کنت، آ بس بند کنگ نہ بیت۔ اے مئے دود نہ اِنت کہ ما راجکار ءِ دیم ءَ جھکیں ءُ سر ءَ جھل بہ کنیں۔ مئے سر سِدّگ بیت بلے جھکگ نہ بیت۔ اے مئے دود اِنت ءُ اے مئے سیاسی تربیت ءِ ھم بھر اِنت۔ نوں اے گپ تئی سر ءَ بندوک بیت کہ تو وتی بچکندگیں کاراں یک نیمگے یلہ دیگ ءَ زمہ واریں ریاستے سابت کن ئے یا وتی بچکندگ ءُ ابید ذمہ واریں کاراں یلہ دیگ ءَ برجاہ دار ئے۔
آئی ءَ اے ھم گْوشتگ کہ ما ھم شمارا اے گپ ءَ بہ گْوش ایں کہ مارا دوئیں کیسانی تہ ءَ ھچ وڑیں جیڑھے نیست۔ ما دوئیں جاوراں شریں وڑے ءَ کار کت کنیں۔
آئی ءَ گوشت کہ بلوچ راج ءَ را وتی نیمگ ءَ آرگ لوٹ ایت کہ ھما وڑ ءَ کہ شما پہ بلوچ راجی مچی ءَ بلوچ تپاکی کمیٹی ءِ کمک ءَ کنگ ءَ اِت چہ انوگ ءَ گیشتر بکن اِت۔ نوں تئی ذمہ واری دو ءَ چہ گیش بوتگ انت۔ انچوش کہ ٹرانسپورٹراں بیم دیگ بوگ ءَ انت، اے اَمل ءِ سوب ءَ مئے ذاتی ءُ پبلک ٹرانسپورٹ بمب تراک کنگ ءَ انت، ما زور ءُ دھمکی دیوکیں راجے نہ ایں نوں المی انت کہ بلوچی ءُ بلوچیت ءَ زندگ دارگ بہ بیت نوں المی انت بلوچ ءِ دژمنانی پمیشکہ نوں بلوچ راج گوں سرجمیں راجمانی کمک، زور، ءُ جزبگ ءَ بلوچ راجی مچی ءِ تہ ءَ بَھر بہ زور اِیت۔
دیمترا آئی ءَ گُشتگ ات کہ ریاست ءَ گوں تران کنان ءَ ما گُشیں کہ بلوچ راجی مچی ھر ھساب ءَ بیت ءُ گوادر ءِ جند ءَ بیت۔ اگاں تو وتی زور ءَ پہ اے کار ءَ کارمرز بہ کن ئے ھم راجی مُچّی مان ایت۔ بلے اگاں شما ھمے رنگ ءَ زور ءِ کارمرد کنگ ءَ بہ دار اِت گڑا ما سرجمیں بلوچستان ءِ دراھیں مستریں شاھراھاں پہ بے مھتلیں مدتے ءَ بند کن ایں ءُ ھاسیں سرکاری کارگسانی دیم ءَ مزنیں کساسے ءَ زور ءِ دھرنا کن ایں. بلوچ راجی مُچّی ءَ اگاں ریاست امن ءُ ایمنی ءَ کنگ ءَ موہ بہ دنت گڑا ما بلوچ یکجھتی کمیٹی سرجمیں زمہ واری ءَ زوریں کہ سرجمیں راجی مچی ءِ وھد ءَ یک دیگ ءِ ھم پُٹّگ مہ بیت، یک سرجمیں امن ءُ ایمنی ءُ سک باز ڈسپلنیں مراگشے بیت۔ بلے اگاں بلوچ راجی مُچّی ءَ اڑاند کنگ ءِ کوشست کتگ ءُ زور کارمرز کتگ، ءُ لس مھلوک ءَ را پرووک کنگ ءِ جھد کتگ، گڑا آ جاور ءَ ما لس مھلوک ءَ ھچ وڑ ءَ کنٹرول کُت نہ کنیں ءُ سرجمیں زمہ واری ریاست ءِ ارادہ ءِ سر ءَ اِنت۔
