TBP Balochi

وائس فار بلوچ مسنگ پرسنز جنرل سیکریٹری سمی دین ءَ گْوشتگ ھیومن راٹس کمیشن پاکستان ءِ چیئرپرسن اسد اقبال بٹ ءَ را کراچی ءَ پنچ کلاک ءَ داں پولیس ءِ نیمگ ءَ چہ دزگیر کنگ بوتگ ءُ جتاجتائیں بھتام ءُ بے سریں جست ءُ پرس کتگ کہ آئی ءِ تہ ءَ گوادر ءَ بلوچ یکجھتی کمیٹی ءِ چیر دستی ءَ بیست ھشت جولائی ءَ برجم دارگ بیوکیں راجی مچی ءِ درگت ءَ جست ءُ پرس کنگ ءُ دلسیاہ کنگ بلوچ زورانسری آوار جنی ءَ کیساں چہ گیستا کنگ گوشتگ۔

آئی ءَ گوشتگ کہ اے وڑیں بیڑاں چہ اے پدّر بیت کہ ریاست ءَ پُرایمنیں زھرشانی ءِ دارگ ھاتر ءَ زوراکی ءِ گامگیج زیرگ ھاتر ءَ ایر کپگ ءَ اِنت اسد اقبال بٹ ءِ دزگیر کنگ تُرندیں لبزاں گوں ایر جتگ۔

پنجگور ءَ سرکاری پلامرزی ءَ ھستیں ٹولی ءُ بلوچ سرمچارانی میان ءَ ترندیں جنگ ءُ چوپ بازیں اداراں برجاہ، دمگ ءَ بازیں کچے ءَ پوج ءُ ھیلی کاپٹر سر بیتگ اَنت-

مروچی سھب ءَ پنجگور ءِ دمگ کیلکور ءَ بلوچ آجوئی لوٹوکیں سلاہ بندیں گلاں سرکاری پلامرزی ءَ ھستیں سلاہ بندیں گل ڈیتھ اسکواڈ ءِ باسکانی سر ءَ اُرش بیتگ-

دمگی مردماں ٹی بی پی ءَ گوں گوشتگ اُرش سھب ءِ ساھت یازدہ ءَ بندات بیتگ ءُ بیگاہ ءِ چار ءَ داں برجاہ بیتگ-

دمگی مردمانی رد ءَ ڈیتھ اسکواڈ ءِ کارمند بازیں اداراں انگیر ءَ بیتگ انت ءُ ڈیتھ اسکواڈ ءِ سَے کارندھانی مرگ ءُ دو ءِ زدگ بوگ ءِ ھال انت ءُ اے درگت ءَ گیشیں اھوالانی آیگ ءِ ودار انت-

بلوچستان لبریشن فرنٹ ءِ جارکش میجر گوھرام بلوچ ءَ اُرش ءِ زمہ واری منان ءَ گوشتگ سرمچاراں دوشی شپ ءِ دوزدہ ءُ چل ءُ پنچ ءَ تیرتیج آواران ءِ بنجل ءِ سر ءَ اُرش کُرتگ ءُ دژمنیں لشکر تاوان داتگ۔

جارکش ءَ گوشتگ چار شمبے ءُ پنچ شمبے ءِ میانی شپ ءَ آواران ءِ ھند تیرتیج ءَ برجاھیں پاکستانی لشکر ءِ بنجل ءِ سر ءَ سرمچاراں دو راکٹ آس داتگ کہ بنجل ءِ تہ ءَ کپتگ کہ چہ ایشی ءَ دژمنیں لشکر ءَ جانی ءُ مالی تاوان بیتگ۔

میجر گوھرام بلوچ ءَ گوشتگ بی ایل ایف مدام زورگِپتیں بلوچستان ءَ پاکستانی لشکر ءُ آئی ءِ کمکار ءُ شور بندیاں نشانگ کنگ ءَ اَنت۔ زورگریں ریاست ءِ لشکر ءُ شوربندیاں ابید مالی تْرام داں ھما وھد ءَ نشانگ کنگ بنت داں پاکستانی لشکر چہ زورگپتیں بلوچستان ءَ دراھگ ءُ روگ ءَ لاچار نہ بیت۔

گوھرام بلوچ ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ دژمنیں لشکر ءِ سر ءَ اُرش گوں تُرندے ءَ برجاہ بنت انت۔

بلوچستان ءِ بُنجاھی شھر چہ شال ءَ پاکستانی پوج ءَ سے مردم ءِ آوار جنگ ءَ پد بیگواہ کتگ اَنت وھدے کہ دگہ دو بیگواھیں مردم یل کنگ بیتگ اَنت-

بیگواہ کنگ بیتگیں مردمانی پجّار صھیب لانگو ء محمد دین لانگو، وقاص ء محمد بخش ءُ امجد بلوچ ءِ نام ءَ چہ بیتگ اَنت-

اشانی تہ ءَ صھیب لانگو چہ کلی اسماعیل ءَ وھدے کہ وقاص زی چہ ھدہ منو جان دگ ءَ آوار جنگ ءَ پد بیگواہ کتگ- وھدے کہ اشی ءَ ساری بسیت یک جولائی ءَ یکشمبے ءِ روچ ءَ امجد بلوچ نامیں ورنایے ھم پاکستانی پوج ءَ چہ پی ٹی سی ایل کالونی جی پی ءُ شال چوک ءَ آوار جنگ ءَ پد بیگواہ کتگ-

ھمے وڑ بلوچستان ءِ دمگ چہ آواران پیراندر لوپ ءَ یک سالے ءَ ساری پاکستانی پوج ءِ دست ءَ بیگواہ کنگ بیتگیں دو ورنا دیدگ ء موسیٰ ءُ اختر ء صاحبدار گوستگیں روچ ءَ آجو بیتگ ءُ وتی لوگ ءَ سر بیتگ-

دیدگ ء موسیٰ پاکستانی پوج ءَ ھپت نومبر دوھزار بیست سے ءَ بیگواہ کتگ اَنت ءُ اختر ء صاحب داد بیست نُھ نومبر دوھزار بیست سے ءَ پاکستانی پوج ءَ بیگواہ کتگ اَنت کہ زی آجو بیتگ-

بلوچ یکجھتی کمیٹی ءَ وتی شنگ کتگیں جارانکی جار ءَ گوشتگ ریاست بلوچ راجی مُچی ءِ سوبمندی ءَ یکدم سر سر جنگ ءَ اِنت ءُ وتی دراھیں زور ءَ راجی مُچی ءِ ھلاپ ءَ کارمرد کنگ ءَ اِنت- سرجمیں بلوچستان ءِ ٹرانپسورٹ کمپنیاں کال کنگ ءُ بیھار دیگ ءَ اِنت – ما سرپد بہ ایں اے وڑیں کُچکیانی کامرد ءَ ریاست وتی پروش ءِ جار ءَ وت جنگ ءَ اِنت ءُ ریاست ءِ اے وڑیں سر ءُ مانسراں چہ زانگ بیت اِنت بلوچ راجی مُچی سوبمند اِنت-

آئی ءَ گوشتگ ما بلوچ مھلوک ءَ سرپد کن ایں مزنیں گاڑیانی نہ بوگ ءَ ویگن، کسانیں گاڑی، وتی جند ءِ گاڑیانی گون ءَ پرپٹانی سر ءَ ءُ دگہ دگہ درشماں کارمرد بہ کن اَنت-

گوشگ بیتگ کہ ٹرانسپورٹ ءِ درگت ءَ یکے دومی ءَ کمک بہ کن ات ءُ کاروان ءِ دروشم ءَ ھمک دمگ، میتگ،کوچگ ءُ شھراں چہ در بہ کپ اِت ءُ کاروان ءَ ھوار بہ کن ات ءُ یک پرشانیں دروشمے ءَ گوادر ءَ سر بہ بیت –

بی وائی سی ءِ وتی جارانک ءَ بلوچ راج دلگوش کتگ ءُ گوشتگ بلوچستان مئے زمین انت ما زان ایں کجام راہ کجا روت اِنت ءُ ما چون گوادر ءَ سر بوت کن ایں-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سامی ءَ زورگریں پاکستانی پوج ءِ گون ءَ جنگ ءُ چوپ ءَ بلوچ لبریشن آرمی ءِ سرمچار علی جان بلوچ پنام ءِ کریم شھید بیتگ ءُ دشمن ءِ سَے کارندہ کشتگ انت-

آئی ءَ گوشتگ بلوچ لبریشن آرمی ءِ سرمچاراں بیست ءُ سَے جولائی دوھزار ءُ بیست ءُ چار ءِ شپ ءَ کیچ ءِ ھند سامی، گیشکور ءَ زورگریں پاکستانی پوج ءِ یک پوسٹے ءِ سر ءَ اُرش کتگ، ھمے وھد ءَ سرمچارانی دگہ ٹولی ءَ دشمنیں پوج ءِ بنجل ءِ نزیک ءَ لٹ ءُ پلی پروجیکٹے ءِ مشینری نشانگ کتگ اَنت-

جارکش ءَ گوشتگ زورگریں پوج ءِ گون ءَ میڑ ءِ وھد ءَ دشمن ءِ مارٹر گولھانی زد ءَ بی ایل اے ءِ سرمچار علی جان بلوچ پنام کریم ء کمال شھید بیتگ – سنگت علی جان تربت ءِ دمگ سامی ءِ ھند ءَ سیادی کنت اِنت ءُ اے وھد ءَ گشت ءِ کمانڈ بیتگ ءُ آئی ءَ زامران، بلیدہ، کلبر،سامی ءُ تربت ءَ بازیں جنگی وھداں دشمن ءِ ھلاپ ءَ پرکار بیتگ ءُ بھادری ءِ راجدپتر پہ وت یاداشت کتگ –

جیئند بلوچ ءَ گوشتگ بلوچ راجی آجوئی ءِ رھبندانی واستا وت ءَ ندر کنوکیں علی جان پنام ءِ کریم ءَ سال وھزار ءُ ھژدہ ءَ دومی سلاہ بندیں گل ءَ ھوار بیتگ ءُ پد ءَ سال دوھزار ءُ بیست ءَ بلوچ لبریشن آرمی ءَ گون ھوار بیتگ- شھید علی جان ءِ کھول دشمن ءِ زوراکیانی دیمپان بیتگ انت ءُ دشمنیں پوج علی جان ءَ آجوئی ءَ چہ کشگ ءَ بے سوب بیتگ-

آئی ءَ گوشتگ بلوچ لبریشن آرنی شھید سنگت علی جان ءِ اے گران بھائیں کربانی ءَ داد بکش ایت ءُ اے کول کنت کہ زوت یا دیر شھیدانی مشن سرجم بیت اِنت-

روکپتی بلوچستان ءِ بنجاھی شھر زاھدان ءَ بندیگیں یک مردمے یل بیتگ ءُ وتی گس ءَ سر بیتگ-

اھوالانی رد ءَ چہ پھرہ (ایرانشھر) ءَ چِل روچ ءَ پیش گرگ بیتگیں عبدالروف ء دوست مھمد زمانت ءِ سر ءَ یل کنگ بیتگ-

اھوالانی رد ءَ آئی ءِ زمانت ءَ پنچ سد میلیون تومن ایر کنگ بیتگ ءُ پد ءَ آ چہ زاندان ءَ آجو بیتگ-

عبدالرؤف نور آباد سرباز ءِ جھمنند انت ءُ آ چِل روچ ءَ پیش دگہ ھپت مردمانی ھمراھی ءَ گرگ بیتگ بلے آ دگہ ھپتیں مردمانی بارو ءَ دگہ ھچ ڈولیں سرپدی دیم ءَ نیتکگ اَنت-

گوادر ءَ پوجی ھیلی کاپٹراں ھوار سیزدہ بساں بازیں ناشناسیں مردم سر بیتگ اَنت-

ٹی بی پی ءِ اِھوالکار ءَ سر بیتگیں ھالانی رِد ءَ چارشمبے ءِ سھب ءَ گوادر ءَ پنچ پوجی ھیلی کاپٹر سر بیتگ اَنت-

ھمے وڑ شھر ءَ سیزدہ بساں بازیں مردمے ھم سر بیتگ اَنت دمگی اِھوالکار رِد ءَ اے بساں پوج ءُ چیریں ادارھانی کارمنداں آوارتگ اَنت-

گوشگ بیگ ءَ اِنت کہ گوادر ءَ بلوچ راجی مچی ءِ درگت ءَ پوج ءِ سُر پُر ءِ تہ ءَ گیشی آرگ ءَ اَنت-

زانگ بہ بیت سرجمیں بلوچستان ءِ راج بلوچ راجی مچی ءِ چن ءُ لانچ ءَ دلگوش اَنت وھدے کہ دومی نیمگ ءَ جتاجتائیں دمگاں بلوچ یکجھتی کمیٹی ءِ باسکاں ھوار دگراں دزگیری ءُ تُرسینگ ءِ دیمپانی کنگ کپگ ءَ اِنت-

اے درگت ءَ چہ ڈاکٹر ماہ رنگ بلوچ ءَ شال ءَ پریس کانفرنس ءَ گْوشتگ کہ گوستگیں یک ھپتگے ءَ چہ بلوچ راجی مچی ءِ بے سوب کنگ ءِ جُھد کنگ بیگ ءَ اِنت-

آیاں گوشتگ کہ بلوچ راجی مچی ءِ بگیری ءَ بلوچستان ءِ شھر گوادر، ھُزدار، پسنی، کوھلو، کلات، تربت، ھب ءُ شال ءَ ھوار جتاجتائیں شھراں مئے زالبولاں ھوار باسکاں ءُ راھشوناں َتُرسینگ ءُ دزگیر کنگ ءَ اَنت ءُ درزنانی مردم دزگیر ھم کتگ اَنت، کراچی ءَ سے باسک لٹ کٹ کتگ اَنت ءُ بیگواہ کتگ اَنت، اشی ءَ اَبید درزنانی مردم ءِ بگیری ءَ ایف آئی آر نکش ھم کتگ-