TBP Balochi

بلوچ سیاسی باسک ءُ نودربر سادیہ بلوچ ءَ گْوشتگ کہ بلوچ راجی مچی ءَ بھر زیرگ ھاتر ءَ وھدے تونسہ ءَ چہ گوادر ءِ نیمگ ءَ جُنز اِتگیں گُڑا پنجاب گورنمنٹ، ڈیرہ غازی خان دمگی انتزامیہ ءُ ریاستی ادارہ یکشل ءَ چار روچ ءَ منی کھول مردم جتاجتائیں دروشماں ناشرکاری ءِ ٹپ ءَ جنگ ءُ تُرسینگ ءَ اَنت-

آئی ءَ گْوشتگ کہ پولیس ءِ تُرسینگ ءَ دلسیاہ بیتگ منی کھول لاچار بیتگ جند لوگ یل کتگ دگہ لوگ ءَ باھوٹی زورگ کپتگ-

آئی ءَ گْوشتگ کہ کسے سیاسی پُرکاری ءَ بھر زیرگ ءُ بلوچستان ءِ سرڈگار ءَ پترگ ءَ چہ درکانودی ءِ ھساب ءَ کئیت مارا بگش اِت-

آئی ءَ گْوشتگ کہ ما ڈیرہ غازی خان ءَ دمگی انتزامیہ ءُ ریاست تچک کنگ لوٹ اِیت کجام پرایمنیں سیاسی پُرکاری ءَ بھر زیرگ ءُ کانودی ءُ جمھوری ھک ھرچ یک شھری ءَ ھست اِنت-

آئی ءَ گْوشتگ کہ اگاں بلوچ راجی مچی ءَ بھر زیرگ ءِ پُشدر ءَ تو سرجمیں بگیری ءَ راھبنداں پادمال کنان ءَ مئے لوگانی سر ءَ بیڑبرتگ زالبول ءُ زھگ نشانگ کتگ اَنت مارا پُشت کنزگ ءَ لاچار کنگ لوٹ اَنت اے ممکن نہ اِنت پرچاکہ ما پرایمنیں سیاسی مردمیں-

آئی ءَ مردمی ھکانی ادارھاں ءُ سیاسی چاگردی گلاں چہ دزبندی اِنت کہ کجام ھما بلوچ سیاسی باسک بگیری ءَ ریاستی زوراکی ءُ زیادتیانی بگیر ءَ توار چست بہ کن اَنت-

چہ گوادر ءَ سر بیتگیں اھوالانی رد ءَ دامگی رھوت بند کنگ بیتگ اَنت ءُ چریشی ءَ پد دامگی اھوال مھتل بیتگ انت-

گیشیں اھوالانی رد ءَ دامگی اھوال بند کنگ بیتگ اَنت ءُ چریشی ءَ شھریاں جیڑھانی دیمپانی انت-

زانگ بہ بیت بیست ءُ ھشت جولائی ءَ گوادر ءَ بلوچ یکجھتی ءِ یک مزنیں مُچے ءِ بوگ ءَ اِنت ءُ چریشی ءَ بلوچستان ءِ جتا جتائیں ھنداں مھلوک آیگ ءُ مُچ بوگ ءَ اَنت-

مردمی ھکانی باسک ایمان مزاری ءِ گْوشگ رِد ءَ کہ ریاست ءَ چہ گوست ءَ ھچ در نہ بُرتگ، بلوچ باسکانی توار ءِ لپاشگ ءِ ھاتر ءَ تاکت کارمرز کنگ ءَ اِنت-

مردمی ھکانی باسک ءُ وکیل ایمان مزاری ءَ چاگردی رسانکدر ءِ ویب سائیٹ “ایکس” ءِ سر ءَ یک تامُر بندے شنگ کنان ءَ بلوچ راجی مُچی ءِ بگیری ءَ ریاستی زوراکی ءُ پروپیگنڈا ایر جتگ اَنت-

ایڈووکیٹ ایمان مزاری ءَ اے میان ءَ گْوشتگ کہ بلوچ راجی مُچی ءِ بگیری ریاستی زوراکی ءُ اے راجمانی مچی ءِ بگیری ءَ ریاستی ادارہ ءُ وزیرانی پروپیگنڈا ایرجتگ اَنت۔

ایمان مزاری ءَ گْوشتگ کہ راجی مچی ءِ جار ءَ پد ریاستی زوراکی گیش بوتگ، بلوچ یکجھتی کمیٹی ءِ جارچین ءُ بھر زوروکاں زرّ جم کنگ ءِ ماکل دیگ ءَ نہ اَنت ءُ آیاں ترسینگ ءُ بیم دیگ بوتگ اَنت، بازیں مردمے دزگیر کنگ ءَ پد بیگواہ کنگ بیتگ اَنت ءُ ، آواران، ڈی جی خان ءُ ھزدار ءَ ھاسیں رنگ ءَ نشانگ کنگ بیتگ اَنت وھدے کہ آ مچی ءِ واستا کیمپئن کنگ ءَ بیتگ اَنت-

مردمی ھکانی باسک ءَ گوں پاکستان ءِ سیاسی ءُ اھوالکاراں دزبندی کتگ کہ آ بلوچ راجی مُچی ءِ بگیری ءَ ریاستی زوراکی ءِ سر ءَ توار چِست بہ کن اَنت ءُ پہ زورانسری آوار جنی ءِ ایر بہ جن اَنت۔

بلوچستان ءَ ھوار کراچی ءَ بلوچ ورنایانی بیگواہ کنگ ءِ درچ یک رندے پد ءَ گیش کنگ بیتگ ءُ بازیں کچے ءَ لھتے ءَ روچانی توک ءَ مردم بیگواہ کنگ بیتگ انت-

بلوچستان ءَ بیوکیں راجی مُچی ءَ دارگ ءِ ھاتر ءَ پاکستان ءِ واکدارانی نیمگ ءَ بلوچ مھلوک ءِ آوار جنی گیش کنگ بیتگ اَنت-

چہ کراچی ءَ پاکستانی پوج ءَ شپ ءَ بیڑبرتگ بلوچ یکجھتی کمیٹی باسک زورانسری آوار جنی ءِ نشانگ کتگ اَنت-

گیشیں ھالانی رِد ءَ شپ وھد ءَ کراچی ءِ دمگ ملیر ءَ پاکستانی پوج ءَ لوگ سر ءَ بیڑبرتگ بالاچ نامیں مردمے آوار جتگ ءُ ناشناسیں جاھے ءَ برتگ – بیگواہ کمگ بیتگیں مردم بی وائی سی ءِ باسکے کہ بلوچ راجی مچی ءِ چن ءُ لانچ ءَ بیتگ-

زانگ بہ بیت کہ بلوچستان ءُ کراچی ءَ بازیں انچیں ھال سر بیتگ کہ اود ءَ بلوچ راجی مچی ءِ چن ءُ لانچاں دلگوشیں مردم پوج نیمگ ءَ چہ تُرسینگ بیگ ءَ اَنت-

گوستگیں روچاں چہ کراچی ءَ پاکستانی پوج ءَ پنچ مردم آوار جتگ کہ انگت یل کنگ نہ بیتگ اَنت- دومی نیمگ ءَ گوستگیں روچاں ھم بی وائی سی باسکاں پتانک بھر ءُ بانگ ءِ وھد ءَ پوج ءَ انگر کتگ ءُ دزگیری ءِ جُھد ءَ بلے راجی گھگیری ءَ پد دزگیری ءَ بے سوب بیتگ-

بالاچ ءِ زورانسری آوار جنی ءِ درگت ءَ بی وائی سی ءِ گْوشگ اِنت کہ راجی مچی ءِ بگیری ءَ ریاستی پوج ءَ بی وائی سی ءِ بگیری ءَ کریک ڈاؤن برجاہ ءَ اِنت- آئی ءَ پد کتگ کہ بالاچ چہ لوگ ءَ آورجتگ ءُ بیگواہ کتگ-

ھمے ڈول ءَ چہ شال ءَ پاکستانی پوج ءَ دو مردم آوار جتگ ءُ بیگواہ کتگ انت-

آوار جنگ بیتگیں مردمانی پجار ھاپز اسلم ء نواز رودینی ءُ عامر رودینی ءِ ناماں زانگ بیتگ انت-

ات مردم گوستگیں شپ ءَ شال سریاب دگ ءَ کاریز ءَ چہ جند ءِ لوگ ءَ آوار جنگ ءُ بیگواہ کنگ بیتگ اَنت-

گوستگیں روچ ءَ پنجگور ءَ سلاہ بندیں مردمانی اُرش ءَ جنگ ءَ بیتگیں سرکاری پلامرزی کنوکیں مردم سے مردم ءِ پجّار بیتگ اَنت-

گوستگیں روچ پنجگور ءِ دمگ کیلکور ءَ سلاہ بندیں مردماں یک اُرشے ءَ سرکاری پلامرزی کنوکیں ٹولی بزانکہ ڈیتھ اسکواڈ کارمنداں نشانگ کتگ اَنت-

اے ھند سر ءَ میڑ داں بازیں کلاکاں برجاہ بیتگ وھدے اشی ءَ پوج ءِ مزنیں کچے ءَ ھوار ھیلی کاپٹر ھم دمگ ءَ سر بیتگ اَنت-

ھالانی رِد ءَ ڈیتھ اسکواڈ ءِ سروک سعید لاٹو ءِ برات ناصر، جمیل ء نزروک ءُ اسحاق ء نزروک اُرش ءَ مرتگ اَنت وھدے کہ ٹپیاں لشو بالگتری ءُ مھردل بالگتری ھوار اَنت-

دمگی اِھوالکار رِد ءَ اُرش ءَ گیش دو مردم ءِ ٹپی بیگ ھال اِنت کہ آیانی پجّار نہ بیتگ اَنت-

اُرش زمہ واری انگت ھچ کس ءَ نہ زرتگ بلے بلوچ سلاہ آجوئی لوٹوکیں گلاں گوستانک ءَ ڈیتھ اسکواڈ کارمندانی سر ءَ ھم اُرش کتگ-

سرجمیں بلوچستان ءَ پاکستانی پلامرزی کنوکیں سلاہ بندیں ٹولی جاڑیگ اَنت کہ ڈیتھ اسکواڈ نام ءَ چہ زانگ بنت-

اے ٹولیانی سر ءَ بھتام جنگ بیت کہ آ منشیات ، دُزی دازی ءُ دگہ چاگردی سلّکاریاں ھوار اَنت کہ آیاں پاکستان پوج ءُ چیریں ادارہ موکل داتگ اَنت-

بلوچستان ءِ دمگ کیچ ءِ ھند بلیدہ ءَ لشکر کشی برجاہ ءَ پوج ءِ تیرگواری ءَ چہ جانی تاوان ھال وھدے کہ لشکر کشی ءِ میان ءَ پوج ءَ دو مردم آوار جتگ ءُ بیگواہ کتگ اَنت-

بلوچستان ءِ دمگ کیچ ءِ ھند بلیدہ ءَ گوستگیں شپ ءَ پاکستانی پوج ءَ یک گاڑی ءِ سر ءَ تیرگواری کتگ ءُ گاڑی سواریں دو مردم ٹپی ئیں جاوراں گوں دزگیر کتگ-

تیرگواری ءِ وئیل کیچ ءِ دمگ بلیدہ گردانک گشتک ھند ءَ بیتگ-

اِھوالکار رِد ءَ پوج ءَ تیرگواری ءَ پد دمگ انگر ءَ کتگ گاڑی سواریں مردم دزگیر کتگ ءُ ناشناسیں جاھے ءَ برتگ اَنت-

مروچی سھب ءَ دمگ مردم وئیلجاہ ءَ شتگ اَنت اود ءَ گاڑی اوشتوک بیتگ ءُ کہ گاڑی ءِ شیشگ پرشتگ اَنت ءُ جاگہ سر ءَ ھون ھم ریتکگ-

بلے دوشی پوج نیمگ ءَ دمگ انگری ءِ سوب ءَ گاڑی سوار پجّار نہ بیتگ-

ھمے وڑ بلیدہ ءِ دمگ ءَ پاکستانی پوج ءِ دومی روچ ءَ ھم لشکر کشی ءَ دلگوش اِنت-

پوج ءِ کارندہ جتاجتائیں ھندانی بندگ ءَ ھوار دمگاں پیشگامی کنگ ءَ اِنت-

ھالانی رِد ءَ پوج ءِ کارندہ دگہ دو مردم زورانسری آوار جنی ءِ نشانگ کتگ اَنت کہ آیانی پجّار حفیظ ء حمید ءُ داد جان ء اسماعیل جھمنند گردانک ناماں چہ بیتگ اَنت-

ھمے وڑ دگہ یک مردمے ءِ زورانسری آوار جنی ءِ ھم ھال اِنت بلے انگت ھال آیگ پش کپتگ اَنت-

پاکستان پوج ءِ ” آپریشن عزم استحکام ” ءِ جار ءَ پد سرجمیں بلوچستان ءَ پوج ءِ سُر پُرانی تہ ءَ گیشی گندگ ءَ آیگ ءَ اِنت گوستگیں روچاں مستونگ ، نوشکی ءُ کلات ءَ مزنیں کچے ءَ جنگی ساز ءُ سامان آرگ ءَ گندگ بیتگ اَنت-

بلے پوجی واکدار نیمگ ءَ اے درگت ءَ ھچ وڑیں درشان دیم ءَ نیتکگ- زانگ بہ بیت گوستناک ءَ بلوچستان ءِ جتاجتائیں دمگاں بے جار ءَ لشکر کشی گوں تُرندی ءَ برجاہ بیتگ اَنت-

جلکشان بلوچ راجی مُچّی

نبشتہ کار: شَکّل بلوچ

دی بلوچستان پوسٹ

بلوچستان، ڈاکٹر ماہ رنگ بلوچ، بلوچ یکجھتی کمیٹی ءِ آرگنائزر۔ بلوچ راجی مُچّی ءِ لوٹ چہ ریاست پاکستان ءِ نیمگ ءَ تَھنا انّا بلکیں پورائیں دری ملکانی راجانی نیمگ ءَ آگاھی دیگ اِنت کہ پاکستان بلوچستان ءِ تہ ءَ بلوچ راج ءِ چُکچینی ءَ چنکیاس بے ھساب ءَ کنگ اِنت انگت ءَ لانک ئِے بستگ۔ اے گپ ءَ کس رَد کُرت نہ کنت کہ پاکستان ءَ بلوچستان، نوزدہ سد ءُ چِل ءُ ھشت ءَ زور ءُ زبردستی وتی پَنجگاں کُرتگ ءُ بلوچانی سر ءَ زُلم ءُ زوراکی برجا داشتگ۔ بلوچ راج ءِ چُکچینی ءَ ابید بلوچستان ءَ گوں زوراں وتی پوجی کانود جوڑ کُتگ ءُ ھر ھما جاگہ کہ ڈولدار ءُ زیبناک اَنت آیاں کبزہ کنت ءُ گواجناں لُٹ ءُ وت مئیل کنت پہ وتی تاگت ءِ کارمرز کنگ ءَ بلوچانی چُکچینی ءَ کنت۔

پاکستان بُندام ءَ بلوچانی سر ءَ کینگ داشتگ پاکستان نہ لوٹ اِیت کہ بلوچ راج زندگ بہ بیت پرچا کہ پاکستان ءَ بلوچانی تَھنا مال ءُ مڈی یکشل ءَ نہ لُٹ اِتگ اَنت بلکیں بازیں پندلاں گوں بلوچ راج ءِ راجی پجّار ءِ اُرش ھم کتگ، زبان بہ بیت شر یا دود ءُ ربیدگ بلے پاکستان ھجبر وتی پندلاں سوبمند نہ بوتگ چیا کہ بلوچ ءِ راجی ورنا وانندگاں وتی سر ندر کُتگ اَنت بلے دژمن ئِے بے سوب کُتگ۔

مرچی بلوچ راجانی تہ ءَ پیر ءُ کماش، مات ءُ گوھار، برات ھر کس دژمن ءِ کُتگیں کاراں سرپد اَنت ءُ میزان میزان ءَ وتی کاروان ءَ ماں گْوادر ءَ سر کنگ ءَ اَنت۔ بلوچ چُکچینی ءِ ءُ زمین ، زِر ءِ پَھازگ ءَ ”بلوچ راجی مُچّی“ ءِ شکل ءَ بلوچ ماں پورائیں دگنیا ءِ دیم ءَ وتی گْواچنیں زند ءَ پیشدارگ لوٹ اِیت کہ پاکستان بلوچانی سر ءَ چنکیاس زُلم ءُ زوراکی کنگ ءَ اِنت۔

بلوچ راجی مُچّی بلوچ راج ءِ تپاکی ءِ بُنزہ اِنت بلوچ راج نوں شری ءِ سر ءَ سرپد بوگ ءَ اِنت کہ بلوچ راج پاکستان ءِ زلم ءُ زوراکی ءَ نہ مَنّ اِیت ءُ وتی ھَکّ ءَ ھجبر نہ دنت پہ زور زوت وتی ھک ءَ چہ دژمن ءِ دست ءَ پَچ ئِے گپت۔ بلوچ راجی مُچّی ءِ سروکی بلوچ راج ءِ شیرزالیں زال ڈاکٹر ماہ رنگ بلوچ کنگ ءَ اِنت ماں بیست ءُ ھشت جلکشان گْوادر ءَ کنگ ءَ اِنت۔

چہ ایشی ءَ پد پاکستان پرچا ”بلوچ راجی مُچّی“ ءَ تُرسگ ءَ اِنت؟ پاکستان ءَ تُرسگ وَ لوٹ اِیت پرچا مہ تُرس اِیت، ردیں کارانی آسر وَ ھمے بنت نوں زالم ءَ وتی کُتگیں کارانی مُز وَ الم زورگ لوٹ اَنت پرچا کہ بلوچ راج وتی دژمن ءَ ھجبر نئیل اِیت۔

پاکستان وتی گُڈی پندلاں سازینگ ءَ اِنت پہ بلوچ راجی مُچّی ءِ ولگوج کنگ ءَ بریں ٹرانسپوٹاں بند کنائین اِیت ءُ بریں دکان والاں بیھار دنت کہ اگاں شما بلوچ راجی مُچّی ءَ وردن ءُ وراک ءِ بندوبست کُت ما شمارا بیگْواہ کنیں دگہ باریں چے چے پندل ساز اِیت بلے بلوچ راج ءَ ھجبر پروش نہ وارتگ۔

شھید مائی بیبو

نبشتہ کار : ڈاکٹر جلال بلوچ

رجانکار : سمیر بلوچ

دی بلوچستان پوسٹ

شانزدہ سد شست ءُ شش 1666 ءَ اھمدزئی کھول ءَ وتی ھاکمی ءِ بندات کُت گڑا اے اندازگ کس ءَ نہ جت کہ ھمے ھاکمی یکروچے سرجمیں بلوچ سر زمین ءَ برجم بیت۔ اے زمانگ ءَ استان ءِ لشکری تاگت ءِ نزوری ءِ ھال ایش اَت کہ آیاں سیوی ءِ ھاکمانی ھلاپ ءَ یکشل ءَ شانزدہ جنگاں پروش ءِ دیمپانی کنگ کپت

جنگانی تہ ءَ یکشل ءَ پروش ورگ ءَ پد اھد ءِ ھاکم ءَ گیش جنگی شور ءُ سلاہ نہ کتگ اَت پمیشکہ آ جنگانی ھاتر ءَ سرجم ءَ دست کش ءُ دلپروش بوت۔ چُشیں گرانیں ساھتاں وھدیکہ استان ءِ ھاکم ءِ ھمت ءُ توکل ھلاس اَت گڑا استان ءِ شرپ ءُ شان ءِ برجمی ءَ یک انچیں مزنیں ھستی ءَ جھہ جتگ اَت کہ آ لشکر ءِ کمانداری کنگ ءَ ساڑی ات آئی ءَ گوستانک مائی بیبو ءِ نام زانت ءُ سرپد بیت۔

مائی بیبو استان ءِ ھاکم میر اھمد ھان (اولی) ءِ گوھار بوتگ۔ میر اھمد یار ھان وھدیکہ باروزیانی ھلاپ ءَ شانزدھمی جنگ ءَ لاچار بوت گڑا جنگے یل دات۔ بلوچانی اے پروش ءَ پد مائی بیبو ءَ نہ تھنا وتی برات تژن ءُ شگان جت بلکیں آئی ءَ لشکر ساجو کُت باروزیانی ھلاپ ءَ دیم پہ کارراز ءِ پڑ ءَ راہ گپت آ ھم یک انچیں پُرآشوبیں اھدے اَت کہ اُود ءَ استان ءِ ھاکم (اھمد یار ھان اول) یکشل ءَ جنگاں پروش وران ءُ جنگ ءَ چہ دلپروش اَت۔

سپاھیگّانی ھمت ءُ توکل ءَ جواب داتگ ءُ آیانی اندر ءَ گیش جنجالانی دیمپانی ءِ توان نزور تَر اِتگ اَت۔ وھدیکہ ھر نیمگ ءَ نااُمیتی ءِ جمبر گندگ بوت گڑا ھما دشمن کہ آئی ءَ سپاھیگّاں بہ گِر ھاکم نااُمیت کُتگ اَت آئی ءِ ھلاپ ءَ جنگ ءِ جار پرینگ یک ارزانیں کارے نہ اَت بلے ایشی ءِ درور مائی بیبو ءَ ایر کُتگ اَت۔

مائی بیبو ءَ اھمد یار ھان گوں آ وھد ءِ نہ گیگیں جاوراں یل دات جنگولیں لشکر ءِ ھمراھی ءَ وت ماں سیوی ءِ نیمگ ءَ رھادگ بوت۔ باروزیاں بلوچانی لشکر ءِ درگت ءَ سرپدی سر بوتگ اَت پمیشکہ آیاں ڈھاڈر ءِ نزیکیں ھنداں ءُ دمگاں لشکر ءِ سر ءَ اُرش کُت۔ بلوچانی لشکر مائی بیبو ءِ رھشونی ءَ ڈھاڈر ءِ ھنداں سر بوت آیاں دیست کہ باروزیانی لشکر ءَ بُنجل جتگ ءُ مئے ودار ءَ اَنت۔

اینچوکیں ٹوھیں سپر ءِ جنگ ءَ پد سپاھیگاں کمو وھد پہ دم بالا کنگ ءَ درکار اَت بلے اے رِد ءَ باروزیاں بلوچ لشکر ءِ بے تاھیری ءِ پائدگ چست کنگ ءِ موہ رست ءُ بلوچانی سر ءَ اُرشے کُت۔ چریشی ءَ پد تُرندیں اُرش بنا بوت، جنگ ءِ پڑ ءَ دو نیمگ ءَ جنگولاں وتی نہ تُرسی ءِ مزن دلی پیش داشت، شیر زالیں مائی بیبو جنگ ءَ وت ھوار کپتگ اَت ءُ جنگ ءِ نیام ءَ انچیں جنگی رپک ءُ ھنر پیش داران اَت کہ اگل ھیران بوت۔ ھمے ھاتر ءَ باروزیانی درگاھی شائر شیک پازُل ھم آئی ءِ دلیری ءِ سر ءَ نبشتہ کنت۔

“یکے خواہرش بود بنمام”
“ہما مردماں کردار اور اسلام”

“چوں مرداں بہ دیوان نشستی مدام”
“بہ گردش ہمہ مرد اں خاص و عام”

“زنے بود دانا بسے ہوشیار”
“بہ مردانگی در جہاں اشتہار”

مائی بیبو اے جنگ ءَ گوں دژمن ءَ دلیری ءَ جنگ کنت، داں دیراں آ جنگ ءَ دار اِیت ءُ گڈسر ءَ توکل کنان اے میڑ ءَ دیم ءَ جنزینگ ءَ شھید بیت۔ چریشی ءَ پد بلوچانی لشکر کمو دیر ءَ داں گھگیری کنت بلے یک دگہ پروشے آیانی بھت ءُ تھالہ ءَ ھوار کپ اِیت۔ اے پروش ءِ ٹوھیں مُراد ایش اِنت کہ یکّے وَ دژمن ءِ سپاھیگّانی کچ ءُ کساس گیش بیت، دومی گپ بلوچانی لشکر انچو کہ ڈھاڈر ءَ سر بیت آیاں دم کشّگ ءِ موہ نہ رس اِیت ھمے رِد ءَ دژمن ءَ چداں پائدگ رس اِیت ءُ اُرش بنا کنت، سمی رند ءَ بلوچانی لشکر ءِ کماندار بانک مائی بیبو اے جنگ ءَ شھید بیت۔

مائی بیبو بلوچ راجدپتر ءِ انچیں کارستے ایشی ءِ ستا ءُ ساڑاھگ ءَ لبزانی گرنچ بوجگ کپ اَنت۔ یک انچیں جنگی شیرزالے کہ مردینانی چاگرد ءَ مردیناں گوں ھوار جنگ ءِ سرپ ءَ اوشتوک بیت۔ ھما ھستی کہ نہ تھنا جنگی رپکاں شیوار ءُ سرپد بیت بلکیں مائی بیبو ھاکمی ھنراں ھم آژناگیں کردارے انچوش کہ شیک پازُل ءَ درشان کتگ کہ:

“چوں مرداں بہ دیوان نشستی مدام”
‘بہ گردش ہمہ مرد اں خاص و عام”

بانک مائی بیبو ءِ شھیدی یک نہ سگّوکیں تاوانے اَت بلے اے جنگ ءِ تہ ءَ آئی ءِ راجدپتری شھیدی ءَ آؤکیں روچاں ھان اھمد ھان ءُ آئی ءِ لشکر ءَ باروزیانی ھلاپ ءَ جنگی زرمبشتے ءَ پُجّارینت۔ گُڈی ءَ استان ءِ کلات ءِ سوبمندی ءَ گوں آسر بیت۔

گُشت کن ایں کہ نہ تھنا باروزیانی دست ءَ استان ءِ کلات چنگُلاں چہ رک اِت بلکیں مائی بیبو ءِ مھکمیں جنگی زانت ءُ زانش ءِ بروردیں کہ ھژدھمی کرن ءِ تہ ءَ سرجمیں بلوچستان ءِ واب نسیر ھان نوری ءِ اھد ءَ جھان ءِ نکشہ ءَ ایر بوت، اے ٹوھیں ھستیانی جھد ءُ جپا کشی ءِ مُز اِت اَنت۔ اگاں مائی بیبو باروزیانی ھلاپ ءَ جنگ ءِ پڑ ءَ ایر مہ کپتیں گڑا مرچی ما اے درور نہ دیستگ اَت کہ بلوچ آؤکیں روچاں اے سرجمیں ھاک ءِ وارس بوتگ اَت۔

کراچی ءِ جنگ ءُ چوپ ءَ نواب اکبر ھان بگٹی ءِ برزاتک فھد بگٹی ءَ ھوار پنچ مردم جنگ بیتگ-

کراچی ڈیفنس ءِ دمگ خیابان نشاط ءَ دو ٹولیانی میان ءَ تیرگواری ءِ آسر ءَ نواب اکبر ھان بگٹی ءِ برازتک ءُ بلوچستان اسمبلی ءِ گوستگیں باسک میر احمد نواز چک فھد بگٹی ھوار پنچ بیران بیتگ اَنت-

ڈی آئی جی ساؤتھ اسد رضا رِد ءَ کراچی ءِ دمگ ڈیفنس خیابان نشاط سر ءَ دو ٹولیانی میان ءَ جنگ ءُ چوپ بیتگ، تیرگواری ءَ چہ فھد بگٹی، نصیب اللہ ءَ ھوار پنچ مردم کُشگ بیتگ-

تیرگواری ءِ آسر ءَ پنچ ءَ چہ شش مردم ءِ ٹپی بیگ ءِ ھال اِنت- لاش ءُ ٹپی جناح نادُراھجاہ ءَ برگ بیتگ اَنت، ڈی آئی جی ساؤتھ رِد ءَ سرجمیں ٹپیانی جاور نگیگ اَنت-

دوئیں ٹولیانی میان ءَ جنگ ءُ چوپ کوھنیں دُژمنی یے سوب ءَ بیتگ – وئیل درگت ءَ سندھ تھکاری وزیر ءَ اے آئی جی کراچی ءَ چہ رپورٹ لوٹ کتگ-

بیران بیتگیں پنچ مردمانی پجّار پنجاہ سالی ئیں فھد بگٹی ء احمد نواز، نصیب اللہ ء سور بگٹی، شے میر محسم بگٹی، میر عیسیٰ بگٹی ءُ علی ھوار اَنت، سکیں ٹپیانی تہ ءَ میر علی، حیدر بگٹی، قائم علی ھوار اَنت-

بلوچستان ءِ جتاجتائیں دمگاں دگ ، تیرگواری ءُ وتکشی ءِ وئیلانی آسر ءَ ھپت مردم بیران پانزدہ ٹپی بیتگ اَنت-

بلوچستان ءِ دمگ ڈیرہ مراد جمالی ءَ سلاہ بندیں مردمانی تیرگواری ءَ چہ دو برات بیران بیتگ اَنت-

بیران بیتگیں براتانی پجّار صابر علی بگٹی ءُ محمد ابراھیم بگٹی ناماں چہ بیتگ اَنت-

زانگ بہ بیت کشگ بیتگیں براتانی یک براتے ڈاکٹر اسحاق بگٹی اشی ءَ ساری سلاہ بندیں مردمانی تیرگواری ءَ مرتگ-

دمگی مردمانی گوشگ اِنت کہ اے مردمانی سیادی گوں سرکاری پلامرزی کنوکیں ٹولی ءَ اِنت-

ھمے وڑ تربت ءَ میر عیسی قومی پارک نزیک ءَ بمب تراکے بیتگ چریشی ءِ آسر ءَ شھاب ء امیر جھمنند صلالہ بازار ٹپی بیتگ-

زانگ بہ بیت دمگی انتزامیہ نیمگ ءَ چہ میر عیسی قومی پارک ءَ گوستگیں شپ ءَ سموراج کلچر اینڈ لٹریری فیسٹیول بندات کنگ بیتگ، فیسٹیول ءِ رد ءَ جتاجتائیں مراگشانی درچ بیست شش جولائی ءَ تاں برجاہ بیتگ-

ھمے وڑ بلوچستان ءِ دمگ ھُزدار ءَ زیروپوائنٹ ءِ ھند سر ءَ پرپٹ سواراں رکینگ ءَ پک اپ گاڑی وئیل آماچ بیتگ چریشی ءَ سوار شش مردم ٹپی بیتگ اَنت کہ آ ٹرما سینٹر ءَ برتگ اَنت دوا درمان کتگ اَنت-

ٹپیانی سیادی ھُزدار ءِ تھسیل کرخ ءَ گوشگ بوگ ءَ اِنت-

دومی نیمگ ءَ کلات بینچہ ءِ نزیک ءَ القدر کوچ ءُ مزدا ٹرک میان ءَ ڈک ورگ آسر ءَ دو مردم ٹپی بیتگ اَنت، ھال سر بیگ ءَ ٹپی کلات ڈی ایچ کیو نادُراھجاہ ءَ برگ بیتگ اَنت پہ الاج ھاتر ءَ-

ٹپیانی تہ ءَ جنت گل ء عبدالمالک جھمنند سریاب دگ شال ءُ مرزا خان ء صاحب جان کاکڑ جھمنند قلعہ سیف اللہ ھوار اَنت-

ھمے وڑ ھب چوکی ساکران ءَ ماموں ھوٹل نزیک ءَ ترند رؤکیں پولیس وین ءُ سوزوکی گاڑی ءِ میان ڈک ورگ ءِ سبب ءَ دو مردم بیران دو پولیس کارندھاں ھوار پنچ مردم ٹپی بیتگ اَنت-

انچش پنجگور تسپ پنچی ءَ وتاس ءَ لیب کنان ءَ چک ءِ دست ءَ وتاس ءَ آس برگ ءِ آسر ءَ خان بی بی لوگ بانُک محمد بخش نامیں زالبولے ٹپی بیتگ پہ الاج ھاتر ءَ نادُراھجاہ ءَ برتگ اَنت-

ھمے وڑ ھب ساکران حسن پیر نالے ءِ نزیک ءَ ڈُبتگیں یک سی پنچ سالی ئیں ناشناسیں مردمے ءِ لاشے دزکپتگ پہ پجّار ھاتر ءَ ھب نادُراھجاہ ءَ برگ بیتگ-

دومی نیمگ ءَ گوادر ءِ دمگ پیشُّکان ءَ فرید ء اللہ بخش نامیں ورنایے ءَ وتکشی کتگ ءُ ھمے وڑ ھُزدار ءِ ھند سنی ءَ جان ء دادو جھمنند آواران ءَ وتکشی کتگ ءُ آئی ءِ لاش ھُزدار ٹیچنگ نادُراھجاہ ءَ برگ بیتگ-

دوئیں مردمانی وتکشی ءِ سوب انگت زانگ نہ بیتگ اَنت-