TBP Balochi

بلوچستان ءِ تیاب دپی شھر گوادر ءَ مروچی بیوکیں بلوچ راجی مُچی ءِ بگیری ءَ ھکومتی زوراکی برجاہ، بازیں بُنجاھی شھدگ یکشل ءَ بند اَنت-

وھدے کہ بازیں شھراں چہ دراوکیں کاروان ءَ اڑان سرگوز کنان ءَ گوادر نیمگ ءَ جُنزان اَنت، بلے تلار ءِ ھند ءَ پوج ءِ بازیں کارندھے اوشتوک اِنت کہ اود ءَ شپ وھد ءَ پوج ءِ تیرگواری ءَ چہ یک مردمے بیران ءُ یک زالبولے ءِ ٹپی بیگ ءِ ناسرجمیں ھال اِنت، گوادر ءُ تربت ءَ دامگ ءِ آسراتی بندی ءِ سوب ءَ جاورانی درگت ءَ تچک ھال نیست-

اود ءَ بلوچستان ءِ باپاری شھر چی ھب ءَ دی بلوچستان پوسٹ ءَ دزکپتگیں سرپدی ءِ رِد ءَ شال، کراچی، مکران ءَ رؤکیں بُنجاھی شھدگ سیمی روچ ءَ ھم یکشل ءَ بند اَنت، شپ ءَ بازیں کاروانی ءَ اڑان ءَ سرگوز کنان ءَ اوتھل زیرو پوائنٹ ءَ تاں سر بیتگ اَنت، وھدے کہ یک کوچے ءِ سر ءَ تیرگواری ھم کنگ بیتگ-

چاگی، دالبندین ءُ کش گوراں کاروان شپ ءَ پنجگور ءَ سر بیتگ ءُ تربت نیمگ ءَ جُنز اِتگ اَنت-

مستونگ ءَ پاکستانی پوج ءِ تیرگواری ءَ پد مردمانی زھرشانی برجاہ، وھدے کہ شھر سرجمی ءَ شٹر ڈاؤن ہڑتال برجاہ ءَ اِنت – شال سریاب ءِ ھند سر ءَ ھم دمگی مردماں مستونگ وئیل ءِ بگیری ءَ زھرشانی ءَ کنان ءَ دگ بند کتگ اَنت

پشتون تحفظ موومنٹ ءِ راھشون ءَ گْوشتگ کہ پاکستانی پوج ءَ پرایمنیں بلوچ زھرشانی کنوکانی سر ءَ تیرگواری ءِ وئیل ایر جتگ-

پشتون راھشون ءُ پشتون تحفظ موومنٹ ءِ سروک منظور پشتین ءَ مستونگ ءِ نزیک ءَ بلوچ راجی مُچی ءِ ھاتر ءَ گوادر ءِ نیمگ ءَ بلوچ کاروان سر ءَ تیرگواری ءِ وئیل یک دلپدردناکیں کارے-

پشتون راھشون ءَ چاگردی رسانکدر ءَ ایکس سر ءَ درشانے شنگ کتگ گْوشتگ کہ یک نیمگے بلوچ راجی مچی ءِ کاروان ءِ بگیری ءَ دروگ ءُ پندل سازی کنگ ءَ اَنت ءُ دومی نیمگ ءَ کاروان تیرانی ھور، پی ٹی ایم بلوچ راجی مُچی ءِ گوں سرجمی ءَ پلامرزی کن آں ءُ بلوچ کاروان ھرچ وڑیں جار ءِ سر ءَ جوانیں وڑے ءَ ھمراھداری ءَ کن ایں-

زانگ بہ بیت کہ باندا گوادر ءَ بلوچ یکجھتی کمیٹی ءِ نیمگ ءَ چہ بلوچ راجی مچی ءِ نام ءَ یک مچی یے دارگ بیگ ءَ اِنت چریشی ءَ کاروان دروشم ءَ گوادر نیمگ ءَ جنزان اِنت-

گوادر مچی ءَ بھر بیگ ھاتر ءَ مردم پاکستانی پوج فرنٹیئر کور ءُ پولیس ءِ نیمگ ءَ بازیں ھندانی سر ءَ اڑان اوشتارینتگ ءُ دارگ ءَ اَنت وھدے کہ مستونگ نزیک ءَ کاروان سر ءَ ایف سی ءِ تیرگواری ءَ چہ چاردہ ءَ گیش مردم ٹپی بیتگ اَنت-

بلوچ گلاں ھوار پشتون ءُ میانی استمانی سیاسی راھشونانی نیمگ ءَ چہ وئیل ایر جنگ بیتگ ءُ لوٹ کتگ کہ آ پُرایمین بلوچ زھرشانی کنوکانی سر ءَ تاکت کارمرزی بند بہ کنت-

بلوچستان ءِ تیاب دپی شھر گوادر ءَ باندا بیوکیں بلوچ راجی مچی ءِ ھاتر ءَ سرجمیں بلوچستان ءَ چہ کاروان گوادر نیمگ ءَ روگ ءَ دارگ ءِ جھد کنگ بیگ ءَ اَنت، گوستگیں شپ ءَ دزگیریاں پد سھب ءَ ھکومت ءَ بُنجاھی شھدگانی سر ءَ کنٹنر ایر کتگ ءُ بند کتگ اَنت-

بُنجاھی شھر چہ شال گوادر ءَ رؤکیں کاروان پاکستانی پوج ءَ مستونگ ءِ ھند سر ءَ داشتگ – وھدے کاروان ءَ ھواریں مردماں اڑان سر گوزینگ ءِ جُھد کتگ گُڑا پاکستانی پوج ءَ تچکی ءَ بسانی سر ءَ تیرگواری کتگ کہ آیانی تہ ءَ جنین ءُ چک سوار بیتگ اَنت- تیرگواری ءَ چہ ٹپی بیتگیں مردمانی تہ ءَ نودربر سمیع اللہ سریاب شال، محمد جاوید جھمنند مستونگ، شبیر مینگل جھمنند روکپتی بائی پاس شال، محمد آصف جھمنند چاگی، ولی محمد جھمنند چاگی، میا خان جھمنند کانک مستونگ، محمد زمان جھمنند کانک مستونگ، سراج شاکر جھمنند سریاب شال، محمد فرحان جھمنند کلی دیبا شال، محمد عمر کلی جھمنند دیبا شال، مدثر جھمنند مستونگ ( جاور نگیگ ) عبدالمطق جھمنند کانک مستونگ، داؤد کھیتران جھمنند بارکھان، برکت علی جھمنند مستونگ ھوار اَنت-

نوکیں ھالانی رِد ءَ ھکومتی اڑان ءِ بگیری ءَ مردماں مستونگ ءِ ھند سر ءَ نندانک داتگ-

مستونگ ءَ راجی مچی کاروان ءِ سر ءَ تیرگواری ءِ بگیری ءَ شال سریاب دگ دمگی مردماں ٹائر مانداشتگ ءُ زھرشانی کنان ءَ بند کتگ-

ھمے وڑ بلوچستان ءِ باپاری شھر چہ ھب ءَ ھال اِنت کہ بُنجاھی شھدگ ءَ سھب ءَ چہ سرجمی ءَ بند اِنت، راجی مچی ءَ رؤکیں مھلوک ءِ ھمراھی ءَ ھزرانی مساپر پس اِتگ اَنت کہ آیانی تہ ءَ زالبول، زھگ، کماش ءُ نادُراہ ھوار اَنت-

مکران ءَ دامگ ءِ آسراتی بندش ءِ سبب ءَ نوکیں ھال دیم ءَ نیتکگ بلے تربت ڈی بلوچ ءِ ھند سر ءَ مردماں اڑان ءِ بگیری ءَ نندانک داتگ-

چہ گوادر ءَ ھالانی رِد ءَ شھر ءَ سرجمی ءَ پوج ءِ دست ءَ اِنت ءُ لوگاں بیڑبرگ ءَ اَنت-

سرجمیں بلوچستان ءَ بلوچ یکجھتی کمیٹی ءِ نیمگ ءَ چہ برجم دارگ بیوکیں بلوچ راجی مچی ءِ گر ءُ دار ھاتر ءَ پاکستانی پوج نیمگ ءَ تاکت کارمرز کنگ ءَ اِنت-

جتاجتائیں دمگاں چہ ھال اِنت کہ پوج ءَ مردمانی دارگ ھاتر ءَ شھدگانی سر ءَ اَڑان مان کتگ وھدے کہ بازیں دمگاں چہ زورانسری آوار جنیانی ھال اِنت-

نامی ئیں اِھوالکار ونگس رِد ءَ آئی ءَ ماہ رنگ بلوچ ءَ گوں گپ کتگ – ماہ رنگ بلوچ ءِ تران تہ ءَ گْوشتگ کہ ما ھچ وڑ پُشت ءَ نہ کنز ایں- بلوچستان ملٹری زون ءَ مٹینتگ اود ءَ ھچ وڑیں راہ راھبند کانود ءُ مردمی ھکانی مردم ساڑی نہ اَنت-

ماہ رنگ بلوچ ءَ دیمتر ءَ گْوشتگ کہ دوسد ءَ چہ گیش بلوچ باسک دزگیر کتگ اَنت- ما پرایمنیں ءُ مئے بلوچ راجی مچی چیزے کلاکاں بیت-

آئی ءَ گْوشتگ کہ ما پُرایمنیں مچی ءَ ھاتر ءَ ھکومت نیمگ ءَ جُنزگ ءَ ایں بلے ھکومت مئے جمھوری لوٹاں گوشدارگ ءَ نہ اِنت-

آئی ءَ گْوشتگ کہ کاؤنٹر ٹیررازم ڈیپارنمنٹ ( سی ٹی ڈی) باسکانی دزگیری ءَ ھوار اِنت-

دومی نیمگ ءَ چہ شال ءَ راجی مچی ءِ واستا رؤکیں سپریم کورٹ بار ایسوسی ایشن ءِ گوستگیں سروک علی احمد کرد ھم دگہ وکیلانی ھمراھی ءَ شال ھزار گنجی ءِ ھند سر ءَ پوج ءَ داشتگ اَنت وھدے کہ پولیس مزنیں کچے ءَ کنٹینرز ایر کتگ بلوچ راجی مچی ءَ بھر زیرگ ءَ رؤکیں کاروان سونا ھان ءِ ھند ءَ داشتگ-

بلوچستان ءِ بُنجاھی شھر شال ءَ سی ٹی ڈی ءَ مدرسہ جامعہ اسلامیہ صدیقہ کلی پرکانی آباد ھزار گنجی ءَ بلوچ راجی مچی ءِ پلامرزی ءِ پشدر ءَ بیڑبرتگ-

گوشگ بیگ ءَ اِنت کہ مولانا خلیل اللہ ءِ ساڑی نہ بیگ ءَ سی ٹی ڈی ءَ آئی ءِ برات احسان اللہ ءُ نودربر حافظ تنویر احمد ءِ دزگیری ءَ پد بیگواہ کتگ-

زانگ بہ بیت کہ بلوچ راجی مچی ءِ بگیری ءَ زوراکی درچ برجاہ ءَ اِنت، شپ وھد ءَ شال ءِ جتاجتائیِ دمگاں بیڑبرگ بیتگ، چہ شھوانی پلازہ دو درزن ءَ گیش نودربر آوا جتگ اَنت کہ آیانی پجّار انگت نہ بیتگ اَنت-

بلوچ راجی مُچی

ٹی بی پی شونگال

جنگ آماچیں بلوچستان ءَ سیاست ءِ سر ءَ بے جارانکیں بندشے ھست انت ءُ ریاست ءَ بلوچ راجی سیاست ءِ دراھیں راہ لٹ ءُ کُٹ ءَ ھلاس کنگ کتگ انت بلے لھتے سالاں زورانسری ءُ ریاستی زوراکیانی ھلاپ ءَ بلوچستان ءَ ورنایانی چیردستی ءَ سیاسی زرمبشتانی یک نوکیں جنزگے بندات بیتگ، کہ ایشانی توک ءَ یکے بلوچ یکجھتی کمیٹی انت- چُشکہ باندا گوادر ءَ راجی مُچی ءِ نام ءَ پرشانیں مُچی یے کنگ ءَ انت-

بھتام انت کہ بلوچستان ءِ زورگری ءَ بگر داں انیگیں وھد ءَ داں بلوچستان ءَ پر ایمنیں سیاسی زرمبشتاں تاکت ءِ زور ءَ ھلاس کنگ ءِ پالیسی برجم بیتگ – آجوئی ءِ زرمبشت ءَ ھوار ھوار راجی انسانی ھکانی واستا توار چِست کنوکانی آوار جنی بیتگ اَنت ، سیاسی مُچیانی سر ءَ بندش جنگ بیتگ، برجم بیتگیں سرکار ھلاس کنگ بیتگ اَنت ءُ نیشنل عوامی پاٹی ءِ وڑیں راجی پاٹی جنگول نامینگ بیتگ اَنت بلوچ زرمبشتانی ھلاس کنگ ءَ ھروھد ءَ ریاست بے سوب بیتگ-

ریاست ءَ ھما ھنر ءُ ٹگی کہ بلوچ راجی زرمبشت ءِ سر ءَ کارمرد کتگ انت ھما ھُنر ءُ ٹگیاں بلوچ راجی مُچی ءُ انیگین بلوچ گھگیری سیاست ءِ دارگ ءَ کارمرد کنگ ءَ انت – پاکستان ءِ پیسلہ کنوکین پھنات وتی گوست ءِ ردیانی دربرگ ءَ ابید ھما پالیسیاں دوبر کنگ ءَ اَنت- ریاست ءِ ھستیں تاکت اے سرپد بوگ ءَ نادلگوش اَنت کہ زُلم ءُ زوراکی ءَ راجی زرمبشت وھد ءِ ھمراھی ءَ بے تواری بنت بلے اے زرمبشتانی ھلاس کنگ بوت نہ کنت اِنت-

ریاستی زوراکی ءُ سیاست ءِ سر ءَ بے جارانکی بندش ءِ سبب ءَ بلوچستان ءِ سیاسی تک نیزوری ءِ آماچ بیتگ انت بلے بلوچ یکجھتی کمیٹی ءِ انیگیں سیاسی برانز ءِ چِست بوگ ءَ بلوچ چاگرد واب ءَ پاد کتگ ءُ ادارھاں سرگوز کنگ ءُ ریاستی زوراکی ءُ چین ءِ گوشوکیں کردمان ءِ ھلاپ ءَ یکجاھی ءِ جد ءُ جھد ءِ واستا بلوچ راج یکجاہ بیتگ – بلوچ راجی مُچی بلوچستان ءِ گھگیری سیاست ءِ سان دور رو اَنت ءُ ھچ شک نیست کہ راجی مُچی بلوچ راجی سیاست ءَ دوبر زندگ ءُ برانزین ایت-

دومی نیمگ ءَ اے شک ءُ گمان ھست انت کہ ریاست اے راجی مُچی ءَ تاکت ءِ زور ءَ دارگ ءِ جھد ءَ کنت اِنت ، کجام ھم زوراکیں تاکت ءِ کارمرد کنگ ءَ جاور سک ناگیگی ءِ دیم ءَ جنز اَنت ءُ چُشکہ بلوچ سلاہ بندیں گلانی اے گپ ءَ منارین ایت کہ آیاں توپک ءِ سر ءَ امن ءِ سیاست ءِ درانی بند بوگ ءَ چِست کتگ-

چہ شال ءَ پاکستانی پوج ءُ چیریں ادارھاں بلوچ راجی مچی ءِ آرگنائزر ءَ ھوار پنچ مردم آوار جتگ ءُ ناشناسیں جاھے ءَ برتگ اَنت-

گیشیں ھالانی رِد ءَ گوادر ءَ برجم دارگ بیوکیں بلوچ راجی مچی ءِ چن ءُ لانچاں ءَ دلگوشیں بلوچ اسٹوڈنٹس آرگنائزیشن ءِ چئرمین جیئند بلوچ آئی ءِ سنگت شیریار بلوچ ءَ ھوار پنچ مردم پاکستان پوج ءُ چیریں ادارھاں آوار جتگ ءُ ناشناسیں جاھے ءَ برتگ اَنت-

جیئند بلوچ ءَ ھوار آئی ءِ سنگتانی آوار جنگ ءِ گپ آئی ءِ پارٹی ءِ راھشوناں کتگ وھدے کہ دگہ سے بیگواھیں مردمانی پجّار انگت نہ بیتگ اَنت-

گل رِد ءَ آئی ءِ چیئرمین ءُ دگہ سنگت بلوچ راجی مچی ءِ درگت ءَ آرگنائزر ءِ کار ءَ بیتگ اَنت-

زانگ بہ بیت تنی وھدے بلوچستان ءِ جتاجتائیں دمگاں چہ درزنانی بلوچ یکجھتی کمیٹی ءِ راھشون ءُ کمکار پاکستانی پوج ءُ چیریں ادارھاں ءُ پولیس نیمگ ءَ چہ آوار جنگ ھال اِنت وھدے کہ جتاجتائیں دمگاں موباھل ءُ دامگ ءِ آسراتی ھم بند کنگ بیتگ اَنت-

اشی ءَ ساری بلوچستان ءِ سر وزیر سرفراز بگٹی ءُ بلوچستان پولیس ءَ مچی ءِ دارگ ھاتر ءَ تاکت ءِ کارمرز کنگ ءِ جار جتگ اَت وھدے کہ جتاجتائیں دمگاں راجی مچی ءَ بھر زیروکیں کاروان ءُ شھدگانی بند کنگ ھم ھال اِنت-

بلوچ یکجھتی کمیٹی ءَ مچی ءِ پرایمنیں مھلوک سر ءَ ریاستی تاکت کارمرز ءِ ایر جتگ ءُ گْوشتگ کہ اگاں مچی ءَ ھواریں مردماں تاوان رس اِت گُڑا زمہ وار انتزامیہ ءُ صوبائی ھکومت بیت ءُ آئی ءَ وتی بیگواھیں سنگتانی زوت یل کنگ لوٹ کتگ-

بلوچستان ءِ تیاب دپی شھر گوادر ءَ بیست ھشت جولائی ءَ بیوکیں راجی مُچی ءَ گر ءُ دار ءَ گوادر ءَ پد تربت ءَ دامگ بند کتگ-

ھمے وڑ بلوچستان ءِ بُنجاھی شھر شال ءَ ھال اِنت پولیس ءَ زوراکی ءَ کنان ءَ بلوچ یکجھتی کمیٹی ءِ یازدہ باسک ءَ دوزواہ دزگیر کتگ اَنت-

بلوچ یکجھتی کمیٹی ءِ راھشون شاہ جی ءَ گْوشتگ کہ سرجمیں گوادر ءَ اے وھد ءَ نیٹورک ءُ دامگ رھوتی سرجم بند کتگ اَنت چریشی ءِ سبب ءَ چہ سرجمیں نزام سر ءُ چیر بیتگ اَنت ءُ تلار ءَ راہ ءُ در بند کتگ اَنت-

آیاں گْوشتگ کہ مساپرانی روگ آیگ ءِ دلسیاھی ءِ دیمپان، سرجمیں تلار چیک پوسٹ ایف سی ءَ اوشتوک اَنت، ھچ کس ءَ روگ ءِ راہ دیگ ءَ نہ اَنت بازیں مساپر اے وھد ءَ دلسیاھی ءِ جاور اَنت-

بلوچ راجی مُچی بیست ءُ ھشت جولائی ءَ ساھت ءِ سَے ءَ پدی زِر گوادر ءَ برجم دارگ بیت اِنت-

بلوچ یکجھتی کمیٹی ءَ وتی شنگ کتگیں درشان ءَ گوشتگ ریاست پاکستان بلوچ راجی مُچی ءِ بے سوب کنگ ءَ وتی دراھیں زور ءُ تاکت ءَ کارمرد کنگ ءَ اِنگ کہ اے ریاستی ترس آماچی ءُ پروشی ءِ پدراھی انت ٹ

آئی ءَ گوشتگ اے دابی ءَ بلوچ راجی مُچی ءِ دیم ءَ ریاست ءِ پروشی ءُ بلوچ راجی مُچی ءِ سوبمندی سرپد بیت اِنت-

درشان ءَ گوشگ بیتگ بلوچ راج ءَ گوں دزبندی انت بلوچ راھی مُچی ءِ سوبمندی ءِ واستا ریاست ءِ دراھیں زُلم ءُ زوراکیانی ھلاپ ءَ گھگیری ءِ راہ ءُ راھبنداں کارمرد بہ کن اَنت-

آئی ءَ گوشتگ ریاست ٹرانسپورٹ، نگن پچ ءُ دکاندار بیھار داتگ انت ءُ ایشی ءِ پژدر ءَ ھمک بلوچ ءِ سر ءَ پرز بیت اِنت ٹرانسپورٹ راشن ءُ دگہ اژدری چیزاں بہ دے اَنت-

آئی ءَ گوشتگ ریاست ءِ زوراکی ءُ زُلماں بلوچ راجی مُچی گیش دیم ءَ جنزینتگ ءُ نی اے ایوک ءَ بلوچ یکجھتی کمیٹی ءِ نہ اِنت بلکیں سرجمین بلوچ چاگرد ءِ بھر جوڑ بیتگ ءُ بیگی ھم بیتگ – اگاں مروچی ما ریاست ءِ پاکستان ءِ زُلم ءُ زوراکیانی دیم ءَ بے توار بوتیں گڑا ایشی ءِ پژدر مئے آیوکیں نسلاں گوزگ کپ ایت – اے وھد بے تواری ءِ نہ اِنت بلکیں گھگیری ئیگ انت ءُ گھگیری ءِ واستا ھمک مردم ءَ جھد کنگی اِنت ءُ نی ھمک بلوچ ءَ وتی کرد ءِ پیلو کنگ المی جوڑ بیتگ-

جار ءَ گوشگ بیتگ ما بیست ءُ ھشت جولائی ءَ گوادر ءَ ابید ( گوادر ءِ دکاندار بلوچ راجی مُچی ءَ ایوکین مھلوک ءِ سامان ءُ اژدری چیزاں سر کن اَنت-) سرجمیں مکران بلوچ راجی مُچی ءِ شرپ ءَ بہ کنت ءُ شٹرڈاؤن ھرتال بیت اِنت ما سرپد بہ ایں بلوچ راجی مُچی بلوچ نسل کشی، بلوچ راج ءِ میان ءَ ھمسنتی ءُ تپاکی ءِ ودینگ انت ءُ بلوچ راج ءِ یکجاہ کنگ ءَ راجی مُچی یک نوکیں یکجاھی ءِ جد ءُ جھدے ءِ زرمبشتے ءِ بندات انت – ھمے واستا راجی مُچی ءِ شرپ ءَ ھمک دکاندار، واپاری مھلوک ءُ تاجر برادری کمکاری ءَ شٹرڈاؤن ھرتال بہ کن انت ءُ بلوچ راجی مُچی ءُ بلوچ راج ءِ پجار ءِ ھاتر ءَ جد ءُ جھد ءَ وتی کرد ءَ پیلو بہ کن اَنت-