TBP Balochi

اے وھد ءَ گوادر ءِ جاور سک نگیگ اَنت پوج مزنیں کچے ءَ گوادر ءَ ساڑی اِنت وھدے کہ پوج ءَ نیشنل پارٹی ءِ راھشون اشرف حسین دزگیر کتگ-

چہ گوادر ءَ اِھوالکار گوشگ اِنت کہ پوج ءَ بلوچ یکجھتی کمیٹی نندانک انگر ءَ کتگ ءُ زھرشانی کنوکانی سر ءَ تیرگواری ءُ آنسو گیس آس داتگ-

دمگی اِھوالکار رِد ءَ پاکستانی پوج ءَ ڈاکٹر ماہ رنگ ءُ سمی دین دزگیر کنگ ھاتر ءَ سرجمی ءَ تاکت کارمرز کنگ ءَ اِنت وھدے کہ راجی گھگیری ءِ سوب ءَ پوج ءَ آیانی دزگیر کنگ ءِ بے سوب کتگ-

زھرشانی کنوکانی سر ءَ پوج نیمگ ءَ چہ تیرگواری ھم ھال اِنت چریشی ءَ بازیں مردمے ٹپی بیتگ اَنت- آیاں پوج نادُراھجاہ ءَ روگ ءَ نیلگ ءَ اِنت-

اِھوالکار کیّا بلوچ رِد ءَ آ صوبائی اسمبلی ءِ باسکے ءَ گْوشتگ کہ بلوچستان ءِ سر وزیر سرفراز بگٹی زور جاوراں نگیگ کنگ ءَ اَنت- یک ٹولی ءَ گوادر ءَ ماہ رنگ ءَ گوں گپ دیوان کتگ آیانی لوٹانی سرجم کنگی بیتگ اَنت، بلے سرفراز بگٹی ءُ کمانڈنٹ مکران ماہ رنگ ءَ را دزگیر کنگ ءُ شال ءَ برگ لوٹ اَنت-

ھمے وڑ پوج ءَ نیشنل پارٹی ءِ راھشون اسرف حسین لوگاں بیڑبرتگ ءُ دزگیر کتگ – لوگ ءَ ساڑی ئیں سرجمیں مھمانانی اوشتوکیں گاڑیانی کانچ پروشتگ اَنت-

بلوچستان ءِ گوستگیں سر وزیر ءُ نیشنل پارٹی ءِ سروک ڈاکٹر مالک ءَ گْوشتگ کہ حکومت ھوش ناکن ءَ بزور اِِیت ءُ زوراکی ءَ پھریز بہ کنت-

آئی ءَ گْوشتگ کہ گوادر پارٹی راھشون اشرف حسین ءِ لوگ سر ءَ ریاستی کارمندانی نیمگ ءَ چہ پروشت ءُ پروش ءَ گوں تُرندی ءَ ایر جتگ-

آئی ءَ گْوشتگ کہ ریاستی کارمنداں گوستگیں شپ ءَ بلوچ دوداں لگتمال کنان ءَ آیانی لوگ سر ءَ پروشت ءُ پروش کتگ-

نندانک ھند ءَ اَبید پوج ءَ مزنیں کچے ءَ لوگانی سر ءَ پروشت پروش کتگ-

دمگہ مردمانی رِد ءَ راجی مچی ءَ بھر یا دوزواھیں مردم تُرسینگ ءُ بازینے دزگیر کنگ ءُ وھدے باز ٹپی کنگ بیتگ اَنت-

ڈاکٹر ماہ رنگ بلوچ ءَ بلوچ راج ءِ نام ءَ کلوہ دیان ءَ گوشتگ درستان پیش، شمئے اے ھمت، دلیری، گپتار ءُ گال، اوپار ءُ سسا زانتی ءَ گوں دل ءُ ستک دروت انت – مروچی شما نا ایوک ءَ ریاست پاکستان ءَ بلکین سرجمیں دنیا ءَ اے کلوہ دات کہ ریاست ءِ توپک راجی زور ءِ دیم ءَ ھاک ءُ پُر بہ اَنت – مروچی شمئے دلیری ءُ اوپار ءَ اے ریاست ءِ مزن مَری کَل کتگ – مروچی ما پدی زر گوادر ءَ زِر ءِ لمب ءَ مھلوک ءِ زِرے دیستگ کہ آیانی چماں پرجوشی ءُ جزبگ ھست انت – اے دست ءُ گوش ءُ پرایمن اَنت بلے اے ریاست ءِ ایٹم بمب ءَ گیش تاکت ور بہ کنت – ءُ مروچی اے مردمانی چماں سوبمندی ءِ جزبگ دیستگ ءُ اے جزبگ زالم ءُ زورگر ءُ کشندھانی پروش دیگ ءَ بس اَنت-

آئی ءَ گوشتگ بلوچ راھی مُچی اے وھد ءَ پدی زری گوادر ءَ زھرشانی نندانک ءِ دروشم ءَ برجاہ انت ءُ اے جاہ ءَ یک نیمگے ھزارانی کساس ءَ توپک دار ریاستی پوج ءُ دومی نیمگ ءَ لس پر ایمنین بلوچ راج انت ءُ توپک دارانی دیم ءَ بلوچ راج ءِ اوپار ءُ جزبگ کوہ باتیل ءِ پیم ءَ برز اَنت من اے وھد ءَ بس لھتے کلوھانی دیگ ءَ اتکگ آں گیش ءَ چہ گیش مھلوک گوادر ءَ وت ءَ بہ پجارین ایت – راجی ءُ انسانی ھک بس یک پرشانیں راجی گھگیری ءِ جد ءُ جھد ءَ گوں گرگ بنت اِنت – گوادر مئے سرڈگار انت، مارا وتی سرڈگار ءِ سر ءَ ھرجاہ ءَ راجی مُچی کنگ ءِ ھک ھست انت اے ھک ءَ مارا دنیا ءِ کجام ھم تاکت گوں زور ءَ پچ گپت نہ کنت انت-

ماہ رنگ بلوچ ءَ گوشتگ مئے زھرشانی مئے کارواناں داں گوادر ءَ پہ سلامتی سر بوگ ءُ مئے دزگیریں دراھیں مردمانی یل کنگ ءَ برجاہ بیت اِنت – ھمے واستا ما ھرچ رنگیں کربانی ءُ تکلیپانی سکگ ءَ جاڑیگ انت – من دراھیں مردماں، انجمن، سیاسی گل ءُ پاٹیاں گوں دزبندی کن آں بلوچ راجی مُچی ءَ اکلاکی پلامرزی کنگ ءَ انت ءُ آ وتی پلامرزی ءَ املی دروشم ءَ سوبمند بی کن اَنت-

بلوچستان ءِ تیابدپی شھر گوادر ءَ پاکستانی پوج ءَ بلوچ یکجھتی کمیٹی ءِ زھرشانی نندانک ءِ سر ءَ بیڑ برتگ، جاور ھال ناگیگ-

دمگ ءِ اھوالانی رد ءَ اے وھد ءَ زھرشانی نندانک جاہ پوج ءَ ھر چاریں نیمگاں انگیر کتگ ءُ ترندی ءَ زوراکی کنگ ءَ اِنت ءُ ڈاکٹر ماہ رنگ ءُ سمی دین ءِ دزگیر کنگ ءِ جھد ءَ انت –

اے وھد ءَ بازیں کچے ءَ زھرشانی نندانک جاہ ءَ چاریں نیمگاں پوج بازیں کچے ءَ جاڑیگ انت ءُ زھرشانی کنوکانی شنگ ءُ شانگ کنگ ءَ آنسو گیس ءُ تیرگواری کنگ ءِ ھال انت-

بلوچ یکجھتی کمیٹی ءَ گوستگیں شپ ءَ جار جتگ ات کہ بلوچ راجی مُچی زھرشانی نندانک ءِ مٹ کتگ ءُ اے زھرشانی نندانک گوادر پدی زر ءَ برجاہ بیت اِنت-

زانگ بہ بیت مروچی سھب ءَ وزیر داکلہ زیا لانگو گوادر ءَ سر بیتگ – زیا لانگو ءِ سر بوگ ءَ گوادر ءِ جاورھال ناگیگ بیتگ انت ءُ اود ءَ پوج ءِ نیمگ ءَ آنسو گیس ءُ تیرگواری کنگ ءِ ھال انت-

بلوچ راجی مچی ءِ کاروانانی سر ءَ تیرگواری ءُ لٹ ءُ کٹانی وئیلانی ھلاپ ءَ بلوچستان ءِ جتا جتائیں جاہ مستونگ، ھنگول، گوادر، نوشکی ءُ شال ءَ زھرشانی نندانک برجاہ انت ءُ گوستگین شپ ءَ شال ءَ زھرشانی نندانک ءَ نندوکین مردم دزگیر کنگ بیتگ اَنت-

گوستگیں شپ ءِ ساھت سَے ءَ پاکستانی پوج ءَ شال ءَ زھرشانی ءَ نندوکین مردمانی سر ءَ بیڑ برتگ ءُ بیست مردم دزگیر کتگ اَنت کہ آیانی توک ءَ زالبول ھوار اَنت-

بلوچستان ءِ شھدردبرجاہ ءِ دیم ءَ زھرشانی نندوکانی سر ءَ پولیس ءَ گوستگیں شپ ءِ ساھت سَے ءَ بیڑ برتگ ءُ زھرشانی کنوکاں لٹ ءُ کٹانی دیمپانی کنگ کپتگ-

پولیس ءَ بیست مردم دزگیر کتگ کہ آیانی توک ءَ دوازدہ زالبول ھوار اَنت- دزگیر کتگین مردم جتا جتائیں زنداناں برگ بیتگ انت –

اے زھرشانی نندانک بلوچ راجی مچی ءَ بھر زیروکانی سر ءَ تیرگواری ءُ لٹ ءُ کٹانی ھلاپ ءَ بوگ ءَ اَنت-

زانگ بہ بیت گوستگیں روچ ءَ بیوکیں بلوچ راجی مچی ءَ بھر زیرگ ءَ سرجمیں بلوچستان ءَ کاروان گوادر ءِ نیمگ ءَ سپر کنگ بندات کتگ ات کہ آ پاکستانی پوج ءَ سرجمیں بلوچستان ءَ داشتگ ءُ دیم ءَ روگ ءَ نیشتکگ اَنت-

شال ءَ پوج ءِ بازیں اڑانکاں سرگوز کنان ءَ بنجاھی کاروان مستونگ ءَ نواب ھوٹل ءِ نزیک ءَ پوج ءَ تیر پر داشتگ ءُ جتگ انت کہ اود ءَ چاردہ مردم زدگ بیتگ انت ءُ کہ آیانی توک ءَ چار کسانی جاور ناگیگ انت-

ھمے ڈول ءَ ھنگول ءَ چہ کراچی ءَ آیوکیں کاروان ءَ را تیرگواری ءُ لٹ ءُ کٹانی دیمپانی کنگ کپتگ ات-

ھمے ڈول ءَ گوادر ءَ پوج ءِ تیرگواری ءَ دو مردم بیران ءُ ھپت زدگ بیتگ انت کہ ترند ٹپیگینانی توک ءَ چار زالبول ءُ یک زھگے ھوار انت-

بلوچ یکجھتی کمیٹی ءَ گوستگیں شپ ءَ جار جتگ ات کہ بلوچ راجی مُچی نی زھرشانی نندانک دنت ءُ اے زھرشانی نندانک گوادر پدی زر ءَ برجاہ بیت انت-

بلوچ یکجھتی کمیٹی ءَ گوشتگ ات کہ ریاست ءَ تچک ءَ گوش این کہ تئی بے سدی ءَ یک روچی راجی مُچی زھرشانی نندانک ءَ مٹ کرتگ-

زھرشانی نندانک ءِ لوٹ ایر کنگ بیتگ کہ گپتگیں مردم یل کنگ بہ بنت ءُ راہ پچ کنگ ءَ مھتلیں کاروان گوادر ءَ سر کنگ بہ بنت ءُ ایشی ءِ گپ ءُ تران پدی زر ءَ بیت انت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدران وتی شنگ کتگیں درشان ءَ گوشتگ آدینگ 19جولائی 2024 ءَ آجوئی لوٹوکیں کماشیں سروک واجہ واھد کمبر ءِ گوں ھمبلاں رھوت نہ بیتگ، اے باروا زوت پٹ ءُ پول بندات کنگ بیتگ گڑا زانگ بیتگ کہ لھتیں سلاہ بندیں مردماں واجہ واھد کمبر پہ زور یک گاڑی یے ءَ سوار کُرتگ ءُ گوں وت بُرتگ۔

جارکش ءَ گوشتگ داں انوگیں پٹ ءُ پول ءِ رد ءَ ھمے زانگ بیتگ کہ واجہ واھد کمبر ءَ پاکستان ءِ چیریں ادارھاں آوار جتگ۔ ما وتی پٹ ءُ پول ءِ تہ ءَ واجہ واھد کمبر ءِ آوار جنگ ءَ کسے ءِ کمکاری ءِ کِرد ءَ ھوار جتائیں بھرگاں چارگ ءَ ایں۔

میجر گوھرام بلوچ ءَ گوشتگ یات بہ بہ اِت کہ چہ ایشی ءَ پیش 2007 ءَ ھم پاکستانی لشکر ءَ واجہ واھد کمبر آوار جتگ ءُ داں 14 ماہ ءَ لشکری آزارجاھاں بیگواہ کُرتگ ءُ سَسّائی ءُ جانی آزار دیگ ءَ پد دیم ءَ آؤرتگ اَت ءُ آئی ءِ دزگیر کنگ ءَ بازیں ارزی دیم ءَ آورتگ۔ 2011 ءَ واجہ واھد کمبر چہ دُرسیں دروگیں ارزیاں بےمیار بیتگ ءُ دراتک اَت۔

جارکش ءَ گوشتگ پاکستان ءِ چیریں ادارھاں 2022 ءَ دومی رند ءَ واجہ واھد کمبر ءِ آوار جنگ ءِ بےسوبیں جُھدے کُرتگ اَت۔

آئی ءَ گوشتگ بلوچ آجوئی لوٹوکیں سروکانی درکانودی کوش آوار جنگ ءُ زور بیگواہ کنگ ءَ پاکستانی ریاست ءِ شوندات اِنت۔ پاکستان ءِ چوشیں دُرسیں کار نہ تیوک ءَ میان استمان ءِ کانودانی تچکی ءَ بگیری اِنت بلکیں جنگی میارباری ءُ مردمگری ءِ بگیری ءَ میارباری ءُ ریاست ءِ ناشرکاری گْوشگ بیت۔

میجر گوھرام بلوچ ءَ گوشتگ ما زورگریں پاکستانی ریاست ءَ تچکی ءَ گْوشگ لوٹ ایں کہ بلوچ سروکانی کوش آوار جنگ ءُ زور بیگواہ کنگ یا دروگیں ارزیانی پارست ءَ بندیگ کنگ ءَ بلوچ راج چہ آجوئی ءِ جُھد ءَ دارگ نہ بیت ءُ نہ کہ پہ آجوئی ءَ بلوچ راجی کول ءُ کرار ءُ زْرمبشت چہ ریاست ءِ ناشرکاری ءُ لشکرکشیاں نزور ءُ نابود بیت۔ مُردنی اِنت چوشیں کارانی سْوب ءَ پاکستان وتی میارباریاں بار ءَ گران کنت کہ پہ ایشی ءَ بلوچ راج آئی ءَ الم یک روچے جُست کنت۔ ما دلجمیں کہ داں بلوچستان ءِ آجوئی ءَ جُھد برجاہ بیت انت۔

بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ بلوچ راجی مچی پدی زِر گوادر ءَ نندانک دروشم ءَ برجاہ نندانک ءِ دو لوٹ اَنت آیانی سر ءَ گپ دیوان تھنا پدی زر گوادر ءَ بیت-

بی وائی سی ءَ وتی درشان ءِ تہ ءَ گْوشتگ کہ اشی ءَ ساری بلوچ راجی مچی تھنا بیست ھشت جولائی ءِ روچ ءَ یک مچی ءِ دروشم ءَ بیگی بیتگ بلے ریاستی ناشرکاری، زوراکی ءَ یک بے مدتیں روچ واستا نندانک جنگ ءَ ایں- اے وھد ءَ گوادر ءَ کرفیوں ءُ زوراکی ءَ اَبید ھزرانی مردم بلوچ راجی مچی ءَ ساڑی اَنت ءُ وھدے کہ ھزرانی مردم تلار چیک پوسٹ ءَ دارگ بیتگ اَنت کہ اود ءَ نندانک دروشم ءَ نشتگ-

آئی ءَ گوشتگ کہ گوستگیں چل ھشت کلاکاں چہ گوادر ءَ ھوار سرجمیں بلوچستان ءَ کیامت جوڑ کنگ بیتگ، دست گوشیں مردمانی سر ءَ سر ءُ دیم تیرگواری، لَٹ کُٹ ءُ دزگیریاں بلوچستان ءَ را یک سرجمیں جنگجاھے دمگے ءَ مٹ کتگ-

آئی ءَ گوشتگ کہ چل ھشت کلاکاں چہ دامگ ءُ موبائل نیٹ ورک سرجمی ءَ بند کتگ ءُ سرجمی ءَ کرفیو جتگ -مروچی گوادر ءَ یک نیمگے ریاستی زلم ءُ زوراکی دومی نیمگ ءَ بے میار ءُ پُرایمنیں راج ءِ زرے بوتگ ، انتزامیہ ءُ ھکومت ءَ لیویز ءُ پولیس ءَ را لَس مردماں سر ءُ دیم تیرگواری ءُ ھرچ مردم ءَ گندگ ءَ تیر جنگ ءِ پرمان دیگ بیتگ بلے لیویز ءُ پولیس ءَ اے ناشرکاری ئیں پرمان نہ منّ اِتگ اَنت- اشی ءَ پد فرنیئر کورپس ( ایف سی ) ءُ آرمی ءِ کارمنداں تچکی ءَ مھلوک سر ءَ تیرگواری کتگ ھمے میان ءَ یک مردمے جاہ پہ جاھی شھید بیتگ وھدے کہ ھپت مردم ٹپی بیتگ اَنت- ءُ سربندر ءَ چہ آؤکیں کاروان سر ءَ ھم ایف سی ءَ تیرگواری کتگ بلے وشبھتی ءَ سربندر ءِ کاروان رکّ اِتگ-

آئی ءَ گْوشتگ کہ ما بلوچ راج ءَ ھوار سرجمیں جھان ءِ ایردستیں راج ءَ را کلوہ دیگ لوٹ ایں کہ بلوچ راجی مچی پدی زِر گوادر ءَ ھزرانی مردم ءِ ساڑی بیگ ءَ نندانک دروشم ءَ برجاہ ءَ اِنت وھدے کہ ریاست پاکستان ایف سی ءُ آرمی یکشل ءَ بلوچ راجی مچی ءَ ھواریں مردم ءُ انتزامیہ ءَ بیھار دیگ ءَ اِنت ءُ ترسینگ ءَ اِنت مارا تُرس اِنت کہ آ سُھب وڑ ءَ ھنی شپ ءَ وھد ءَ پد ءَ یکرندے راجی مچی ءِ ھواریں مردمانی سر ءَ تیرگواری ءُ زوراکی کنت-

آئی ءَ دیمتر ءَ گْوشتگ کہ ما تچک کنگ لوٹ ایں تئی بے سوبی ءُ بے اکلی ءَ چہ یکروچے ءِ مچی ءَ را نو نندانک ءَ مٹینتگ ءُ اے بلوچ راجی مچی ءِ نندانک ءِ اے وھد ءَ دو لوٹ اَنت – یک ھما جاھاں مئے کاروان زورانسری داشتگ اَنت، سرجمیں راھاں پچ کن اِت مئے کارواناں گوادر ءِ آیگ ءَ بل اِت – دومی مئے ھمینچو مردم دزگیر کتگ اَنت آیاں چل ھشت کلاکانی تہ ءَ یل بہ کن اِت اگاں ناں نندانک بے مدت ءِ واستا برجاہ بیت ءُ ما اے لوٹانی سر ءَ ریاست ءِ گوم ءَ پدی زِر گوادر ھند ءَ گپ دیوان کنگ ءَ ساڑی اِنت- اگاں ریاست ءَ ھنی ھم اکل ھوش ءَ کار زورگ ءِ جاہ ءَ پُرایمنیں راجی مچی ءِ دیم پہ دیمی بیت تاکت ءَ کارمرز کنت گُڑا گوادر ءَ ھوار سرجمیں بلوچستان ءِ جاور ریاست ءِ دست ءَ سرجمی ءَ در کاینت-

آئی ءَ گْوشتگ کہ بلوچ راج ھمے وڑ ریاست ءِ زُلم زوراکی ءُ تاکت ءِ دیم پہ دیمی ءَ پُرایمن اَنت، ھمے وڑ دیم ءَ ھم پُرایمن بہ بنت ءُ اشی ءِ ھمراھی ءَ بلوچ یکجھتی کمیٹی ءِ بُنجاہ چہ گوادر ءَ زوت وتی آؤکیں کارانی جار ءَ جنت-

بلوچ آجوئی لوٹوکیں سلاہ بندانی یکجاھی گل بلوچ راجی آجوئی سنگر ( براس ) جارکش بلوچ ھان ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست پنچ جولائی ءَ پشمبے ءَ پنجگور ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءِ سے کارمندانی کوش ءُ پنچ کتگ-

جارکش ءَ گْوشتگ کہ بلوچ راجی آجوئی سنگر ( براس) ءِ سرمچاراں پنجگور ءِ دمگ کیلکور ءَ وتگڑیں ڈیتھ اسکواڈ ءِ کارمندانی ءِ ساڑی بیگ ھال سر بیتگ ءُ چریشی ءَ سرمچاراں زوت بیڑبرتگ کیلکور ءَ کرکی ءِ ھند سر ءَ کارمنداں انگر ءَ کتگ ءُ آیانی سر ءَ اُرش کتگ-

جارکش بلوچ ھان ءَ دیمتر ءَ گْوشتگ کہ مئے سرمچاراں اُرش ءَ سے ڈیتھ اسکواڈ کارمند ناصر، جمل ء نزروک ءُ اسحاق ء نزروک ھما دمان ءَ مرتگ اَنت سرمچاراں آیانی سلاہ ھم دستیگ کتگ اَنت وھدے کہ اے اُرش ءَ دگہ گیش پنچ کارمند ٹپی کتگ اَنت- اے کارمند ملا سیفو ءُ سعید لانٹو ءِ سروکی ءَ راجی میارباری ءَ ھمگرنچ بیتگ اَنت-

جارکش ءَ دیمتر ءَ گْوشتگ کہ اُرش ءِ وھد ءَ ڈیتھ اسکواڈ کارمندانی رکینگ ھاتر ءَ زورگریں پوج ءِ تیرگواری کنوکیں بالگرداں تیرگواری کتگ بلے آ سرمچاراں تاوان دیگ ءُ وتی کارمندانی ءِ رکینگ ءَ بے سوب بیتگ-

جارکش ءَ گُڈی ءَ گْوشتگ کہ بلوچ راجی آجوئی سنگر ( براس ) اے اُرش زمہ واری ءَ منّ اِیت ما یکرندے پد ءَ کول کن ایں کہ براس سرجمی ءَ بلوچ راجی آجوئی ءَ تاں اے جنگ ءَ برجاہ دار اِیت-

بلوچستان ءِ تیاب دپی شھر گوادر ءَ۔بلوچ راجی مچی ءِ واستا سرجمیں بلوچستان ءَ چہ بازیں کاروان اَڑان ءَ سرگوز کنان ءَ گوادر ءَ سر بیتگ اَنت، وھدے کہ شھر ءَ شٹرڈاؤن ھڑتال برجاہ ءَ اِنت-

دامگ ءِ بندش ءَ چہ جاوراں پدر نہ بیگ ءَ اَنت، بلے نزیکیں دمگاں چہ دمگی مردم گوش اَنت کہ پدی زر ءَ ھزرانی مردم مچ بیتگ اَنت- اود ءَ چہ کراچی ءَ درتکگیں کاروان سر ءَ تیرگواری ءُ انگر ءُ واتر کنگ ءِ ھال اِنت-

گوادر ءِ سید ظھور شاہ ھاشمی چوک ءَ پاکستانی پوج ءَ تیرگواری کتگ یک مردمے کُشتگ ءُ بازیں مردمے ٹپی بیتگ- انڈس نادُراھجاہ واکدار رِد ءَ ٹپیانی ھمراھی ءَ یک لاشے ھم آرگ بیتگ-

گوادر ءَ برجمیں بلوچ راجی مچی ءِ واستا چہ کراچی ءَ درتکگیں کاروان کنڈ ملیر ھند ءَ دارگ بیتگ-

اِھوالکار رِد ءَ پوج ءَ مزنیں کچے ءَ دہ بساں ھواریں کاروان انگر ءَ کتگ وھدے کہ بساں سواریں مردمانی آپ ءُ ورگی توشگ کُٹ اتگ اَنت-

اِھوالکار گوشگ اِنت کہ پوج ناں آیاں دیم ءَ روگ ءَ کلگ اِنت ناں ورگی توژگ زیرگ ءِ موکل دیگ ءَ اِنت-

زانگ بہ بیت بلوچستان ءِ جتاجتائیں دمگاں چہ بلوچ راجی مچی ءِ واستا مردم گوستگیں روچ ءَ گوادر ءِ واستا درتکگ اَنت کہ اود ءَ راہ پوج ناں آ داشتگ اَنت بلکیں آیانی سر ءَ تیرگواری ھم کتگ کہ اود ءَ ٹپی ءُ بیرانی ءِ ھال سر بیتگ اَنت-

دومی نیمگ ءَ ھمینچو کاروان کہ گوادر کش گوراں سر بیتگ اَنت آ پوج ءَ وتی انگر ءَ کتگ اَنت-

دومی نیمگ ناسرجمیں ھالانی رِد ءَ کراچی ءَ درتکگیں راجی مچی ءِ کاروان سر ءَ پوج ءَ تیرگواری ھم کتگ ءُ بازیں مردمے ءِ ٹپی بیگ ھال اِنت ءُ پوج زورگ کنگ ءَ اِنت پہ واتر کراچی ءَ راھدیگ ءَ-

بلوچ راجی مُچی ءِ گر ءُ دار کنگ ءَ سرکار ءَ گوادر ءِ دراھیں راہ ءُ در بند کتگ انت ءُ رھوتی اھوال ھم بند انت-

بلوچستان ءِ تیابدپی شھر گوادر ءَ چہ گوستگیں شپ ءَ دکان ءُ دگانی سر ءَ گاڑیانی اپت ءُ آمد نابرابری ءَ انت-

چہ گوادر ءَ اھوال انت کہ ڈور ءِ ھند ءَ راہ بند کنگ بیتگ ءُ بازیں بساں سواریں مھلوک مھتل اَنت-

زانگ بہ بیت چہ گوستگیں روچ ءَ بلوچستان ءَ ھوار کراچی ءَ جتا جتائیں جاھاں مھلوک پہ راجی مُچی ءَ جنزگ ءَ انت ءُ بازیں جاھان سیکورٹی پورسز ءِ تیرگواریان مردمانی زدگ ءُ بیرانیانی اھوال ھست اَنت-