ورچوئل دیمدرائی
ٹی بی پی شونگال
چاردہ اکتوبر ءَ گوادر انٹرنیشنل ائیرپورٹ ءِ دیمدرائی پھزداری ءِ سبب ءَ گوادر ءَ ابید دوھزاف کلومیٹر دوت پاکستان ءِ بنجاھی شھر اسلام آباد ءَ چین ءِ سروزیر لی چیانگ ءُ پاکستان ءِ سروزیر شھباز شریپ ءِ سروکی ءَ برجم دارگ بیتگ، گوادر ائیرپورٹ ءِ ورچوئل دیمدرائی کنگ بیتگ-
گوادر ائیرپورٹ چین پاکستان گزرانکی منسوبہ ءِ بھر اِنت، چین ءِ ملٹی بلین منسوبہ ءَ بلوچ سیاسی ءُ سلاہ بندیں ادارہ لُٹ ءُ پُلی منسوبھے نامینگ ءَ اَنت،چریشی ءِ پژدر ءَ سیاسی ٹولی تَھ ئِے ءُ دری ھلکاں جتا جتائیں تک ءُ پھناتاں زھرشانی کنگ ءَ اَنت ءُ بلوچ سلاہ بندیں آجوئی لوٹوکیں گلانی نیمگ ءَ پاکستان گزرانکی منسوبہ ءَ بندوکیں واپاری ءُ لشکری اُرد جاہ یکشل ءَ نشانگ کنگ بوگ ءَ اَنت-
چین ءِ سروزیر گوادر انٹرنیشنل ائیرپورٹ ءِ سرجم بوگ ءَ گچینی بنھشت نامینگ اِنت بلے گوادر ءَ ابید اسلام آباد ءَ ائیرپورٹ ءِ ورچوئل دیمدرائی کنگ اے درچ ءِ پدر ءَ کنت اِنت کہ بلوچستان ءَ چین پاکستان ءِ گزرانکی راہ ءُ چین ءِ دگہ منسوبہ ناپھریز اَنت ءُ پاکستان اے منسوبھانی پھریزگ ءَ بے سوب بیتگ-
شنگھائی کمکی گل ءِ اسلام آباد ءَ سِی ئمی نیاد ءِ وھد ءَ گوادر انٹرنیشنل ءِ ورچوئل دیمدرائی ءُ لی چیانگ ءُ شھباز شریف ءِ دو نیمگی گند ءُ نند “ ھمگرنچیں دروشم ءِ سر ءَ ” پھریزی جاورانی ودینگ ءِ واستا “ چیدگ کتگیں پھریزی گامگیج ءِ درکاری ” ءِ سر ءَ کڈن کنگ اے گپ ءِ پدراھی انت کہ چین وتی منسوبھانی بے سوب بوگ ءِ گمان ءَ اِنت- اے جار ھال دنیا ءُ میان اُستمانی واپار دارانی واستا تچکیں کلوھے کہ بلوچ راج ءِ منگ ءُ رز ءَ ابید لٹ ءُ پلی منسوبہ منگ نہ بنت اِنت ءُ تاکت ءِ زور ءَ بلوچستان ءِ لٹ ءُ پُلی منسوبہ سوبمند نہ بنت اِنت-