TBP Balochi

بلوچ یکجھتی کمیٹی ءَ وتی شنگ کتگیں درشان ءَ گوشتگ بلوچ راجی مچی ءِ بنجاھی زھرشانی نندانک گوادر ءَ برجاہ انت- ریاست ھچ ڈول ءَ گپ ءُ تران کنگ ءِ واستا سجیدگ نہ انت، گپ ءُ تران ءِ وھداں سرجمیں بلوچستان ءَ تاکت ءِ کارمرد کنگ برجاہ اَنت ءُ مکران سرجمی ءَ بند انت لکانی مھلوک شد ءُ توپک ءِ زور ءَ کُشگ ءِ شوربندی کنگ بیتگ -مارا گپ ءُ تران ءِ واستا یکشل ءَ بیھار دیگ ءَ اَنت-

آئی ءَ گوشتگ بلوچ یکجھتی کمیٹی سرپد بیت انت کہ ڈی سی گوادر ءُ وزیر سرجم ءَ بے واک اَنت چُشکہ سنجیدگیں گپ ءُ تران ءِ واستا سجیدگیں مردم بیا اَنت-

جار ءَ گوشگ بیتگ گپ ءُ تران ءَ پیش گوادر ءَ ھوار سرجمیں مکران ءَ نیٹ ءُ نیٹورک پچ کنگ بہ بنت اِنت-

گیش گوشتگ کہ بلوچ یکجھتی کمیٹی ءِ بنجاھی جار ءَ ابید بلوچستان ءِ ھچ جاہ ءَ شٹر ڈاؤن ءُ پھیہ جام ھرتال نہ بیت اِنت-

جار ءَ گوشگ بیتگ گوادر ءَ ریاستی پوج ءُ چیریں ادارہ توپک ءِ زور ءَ دکان ،مارکیٹ ءُ دگ اش بند کتگ انت، چریشی ءَ مھلوک یکدم مشکلانی دیمپان انت – ما مھلوک ءَ گوں دزبندی کن ایں اے وھد ءَ درست گوادر ءِ دکاندارانی گون ءَ ھمسنت بہ بنت ءُ دکاناں پچ بہ کن اَنت ءُ دکانداراں گوں دزبندی انت کہ وتی دکان ءُ مارکیٹاں پچ بہ کن اَنت-

گوشگ بیتگ کہ اے وھد ءَ گوادر ءَ ھوار شال، پنجگور، نوشکی، کراچی ءُ تربت ءَ نندانک برجاہ اَنت – اے جاھاں بلوچ یکجھتی کمیٹی ءِ نیمگ ءَ شٹر ڈاؤن ءُ پھیہ جام ھرتال نہ بیت اِنت بس دھرنا برجاہ بنت اِنت-

آئی ءَ گوشتگ بی وائی سی ءِ باسک زھرشانی یا دھرنایانی وھد ءَ ریاستی ادارھانی کارمنداں دلگوش گور بہ کن اَنت پرچاکہ اے وھد ءَ سرجمیں بلوچستان ءَ زھرشانی جاھاں چیریں ادارہ لس مھلوک ءِ مٹ ءَ وت ءَ کن اَنت ءُ جاوراں ناگیگی ءِ نیمگ ءَ برگ ءِ جھد ءَ کنگ ءَ اَنت کہ یکشل ءَ مھلوک ءِ دست ءَ گرگ بوگ ءَ اَنت-

آئی ءَ گوشتگ بی وائی سی ءِ باسک دھرانا زھرشانیاں ھروھد ءَ مھلوک ءَ دوست بہ دار اَنت ءُ مئے زھرشانی نندانکاں مھلوک ءَ ھچ تکلیپ مہ رس ایت-

دیمتر ءَ گوشگ بیتگ کہ بی وائی سی ءِ زھرشانی ھروھد ءَ پر ایمن بیتگ انت ءُ دیم ءَ ھمے وڑ پر ایمن بنت اِنت – ھمے واستا زونل ءِ سروک وتی ھنداں بیوکیں زھرشانیاں جوانیں پھزداری ءِ واستا ٹیم جوڑ بہ کن اَنت-

گڈسر ءَ گوشگ بیتگ کہ بلوچ یکجھتی کمیٹی ءِ بنجاھی دھرنا اے وھد ءَ گوادر ءَ برجاہ انت ءُ گپ ءُ تران بس ایوک ءَ گوادر ءِ دھرنا ءَ بیت اِنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مشکے ءُ زامران ءَ دو جتاجتائیں اُرشانی تہ ءَ زورگریں پاکستانی پوج ءُ پُلپانچیں شرکت ءِ گاڑی نشانگ کتگ۔

جارکش ءَ گْوشتگ کہ مئے سرمچاراں بیست ھپت جولائی ءَ شپ ءِ نُھ ءِ نزیک ءَ مشکے ءِ دمگ نوکجو ءَ پاکستانی پوج ءِ بُنجاھی بُنجل ءِ پھازوکی چوکی اُرش ءِ نشانگ کتگ اَنت، سرمچاراں گرنیڈ لانچر ءَ چہ دُژمنیں پوج سر ءَ بازیں گولھے آس داتگ ءُ وتکاریں سلاھاں چہ اُرش کتگ-

جارکش ءَ گْوشتگ کہ اُرش ءِ آسر ءَ یک کارمندے ھما جاہ ءَ مرتگ وھدیکہ بُنجل ءِ تہ ءَ گولہ ءِ لگگ ءَ آس کپگ ءَ دژمن ءَ گیشتر تاوان رستگ۔

جارکش ءَ گْوشتگ بلوچ لبریشن آرمی ءِ سرمچاراں گوستگیں روچ ءَ زمران ءِ دمگ نھنگ جونکی تنک ءَ پوجی بندساچی شرکت ءِ ٹھیکیدار سرمچاراں چہ تچگ ءِ جُھد ءَ وتی گاڑی یل کتگ چریشی ءَ سرمچاراں مانداشتگ ، اے ٹھیکیدار زورگریں پوج ءِ واستا بند ساچی ءَ ھوار سیمسر ءَ ٹٹ جنگ ءَ ٹیکھ ءِ بھر اِنت-

جارکش ءَ گْوشتگ بلوچ لبریشن آرمی اے دوئیں اُرشانی زمہ واری ءَ منّ ایت۔ زورگریں پاکستانی پوج ءَ بلوچستان ءَ سرجمی ءَ درکنگ ءَ تاں مئے اُرش برجاہ بنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سرمچاراں کیچ ءِ ھند کولواہ، کنیچی ءَ برجاھیں زورگریں دژمن ءِ بنجل ءِ سر ءَ اُرش کُرتگ۔

جارکش ءَ گْوشتگ کہ سَے اگست ءِ بیگاہ ءِ شش ءَ سرمچاراں کنیچی ءَ زورگریں پاکستانی پوج ءِ بنجل ءِ سر ءَ گوں نوکین ءُ ٹوھیں سلاھاں اُرش کُرتگ، اُرش ءَ دژمنیں پوج ءِ یک کارمندے مُرتگ ءُ سَے سَک ٹپی بیتگ اَنت۔

جارکش ءَ گْوشتگ بی ایل ایف گوں نوکیں جنگی رپکاں دژمن ءَ ھرکجا پروش دیگ ءَ اِنت ءُ دُژمن وتی پروش ءِ چیر دیگ ءَ لس آبادیانی سر ءَ زوراکی کنت۔

جارکش ءَ گْوشتگ کہ دژمن گوں نوکتریں سلاھاں بند بیگ ءَ ابید سرمچارانی راجی جوزگ ءِ دیم ءَ پروش وارتگ ءُ تچگ ءِ راھاں شوھازگ ءَ اِنت بلے بلوچستان ءِ سرڈگار ءَ پجاروکیں ھمبلاں ھرکجا دژمن ءِ سُر ءُ پُرانی سر ءَ چم سک داتگ ءُ آئی ءَ نشانگ کنگ ءَ اَنت۔

جارکش ءَ گْوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں پاکستانی پوج ءِ دراھگ ءَ دژمن ءِ سر ءَ اُرش برجاہ بنت۔

گپ ءُ تران ءِ واستا زلوری انت کہ ریاست سازگاریں جاور ودی بہ کنت- ماہ رنگ بلوچ

گوادر ءَ بلوچ یکجھتی کمیٹی ءِ زھرشانی نندانک مروچی ھشتمی روچ ءَ ھم برجاہ انت، شھر انٹرنیٹ ءُ دگہ نیٹورکانی بندشانی آماچ انت ءُ شھر ءَ روکیں راہ یکشل ءَ بند انت ءُ پوجی کارمند اوشتوک انت –

بلوچ یکجھتی کمیٹی ءِ رھشون ڈاکٹر ماہ رنگ بلوچ ءَ دگہ رھشونانی ھمراھی ءَ گوادر ءَ پریس کانفرنس کنان ءَ گوشتگ شرپداریں بلوچ راج ءُ دنیا ءِ سرجمیں گوشداروک ءُ مئے توار جوڑ بیوک، ھنچش شما سرپد ات کہ ما گوستگیں چار روچاں آل پارٹیز ءِ گون ءَ ریاست ءِ گپ ءُ تران کنگ ءَ انت – گپ ءُ تران ءِ وھد ءَ یکشل ءَ ما اے گوشگ ءَ ایں گپ ءُ تران ءِ واستا ریاست سازگاریں جاور ودی بہ کنت انت، سرجمیں بلوچستان ءَ پرایمنیں زھرشانی کنوکانی ھلاپ ءَ تاکت ءُ لٹ ءُ کٹی کارمرداں بند بہ کنت انت، راہ ءُ انٹرنیٹ ءَ پچ بہ کنت انت کہ ایشی ءِ بندش ءِ سبب ءَ مکران ءَ وردنی ءُ درمانی ھلاس بوان اَنت – گوستگیں ھشت – نُھ روچاں مھلوک ءَ وتی مردماں گوں ھچ رنگیں رھوت بوگ ءَ نہ اِنت بلے ریاست مئے آئین ءُ کانونی لوٹاں منگ ءَ ابید گپ ءُ تران ءِ نام ءَ مارا یکشل ءَ ترسینگ ءَ انت ءُ مارا بیھار دیگ انت اگاں زھرشانی نندانک ھلاس نہ کت گڑا کُشت ءُ کوش بیت ءُ زھرشانی نندانک ءَ ھلاس کن ایں-

آئی ءَ گوشتگ اگاں چار روچاں چہ گپ ءُ تران ءِ وھد ءَ یکشل ءَ ریاست ءَ گوشگ ءَ ایں کہ سرجمیں بلوچستان ءَ پُر ایمنیں زھرشانی کنوکانی ھلاپ ءَ لٹ ءُ کُٹ تاکت ءِ کارمردی بند بہ کنت دانکہ اے گپ ءُ تران دیم ءَ شت بہ کنت اِنت بلے ریاست تاکت ءُ لٹ شاپی ءِ کارمرد ءِ بند کنگ ءَ ابید ترندی کنگ ءَ اِنت – اے چار روچاں برجاھیں گپ ءُ تران ءِ وھد ءَ شال ءُ کراچی ءَ پرایمنیں زھرشانی کنوک دزگیر کنگ بیتگ انت ءُ آ رستری ڈول ءَ لٹ شاپ کنگ بیتگ اَنت – ھمے ڈول گوستگیں روچ ءَ ریاست ءَ دراھیں رھبند پروشتگ انت ءُ نوشکی ءَ پُر ایمنیں زھرشانی سر ءَ تیرگواری کتگ ءُ یک ورنایے کُشتگ ءُ بازینے ٹپی کتگ اَنت – چریشی ءَ چہ اے زانگ بیت اِنت کہ اے ریاست ءَ کانونی ءُ آئین ءِ ھچ نام نیست انت-

آئی ءَ گوشتگ یک نیمگے ریاست ءَ وتی انتزامیہ ءُ وزیر مئے گون ءَ گپ ءُ تران ءَ دیم داتگ انت ءُ اد ءَ انتزامیہ ءُ وزیر مئے گون ءَ کَول کن اَنت نی ھچ تاکت ءُ لٹ شاپی کارمرد نہ بیت اِنت، بلے دومی نیمگ ءَ گوادر ءَ برجاھیں گپ ءُ تران ءِ وھد ءَ نوشکی ءُ کراچی ءَ پُرایمنیں زھرشانیانی وھد ءَ تاکت ءِ کارمردی بوگ ءَ انت – زوراکیانیانی ھچ درور دست نہ کپ ایت-

گیش آئی ءَ گوشتگ ریاست پاکستان وتی ھمک گام ءَ پیش دارگ انت بلوچستان ءَ پر ایمنیں زھرشانی ھچ اوپاری نیست اِنت -پر ایمنیں زھرشانی ءِ اجازت وت پاکستان ءِ آئین ءِ توک ءَ ھست انت – بلے ریاست گوادر ءَ پر ایمنیں زھرشانی ءِ ھلاپ ءَ وتی سرجمیں تاکت ءَ بلوچ راج ءِ ھلاپ ءَ کارمرد کنگ ءَ انت – اے کجام کانون انت پرایمنیں زھرشانی نندانک ءِ جاہ ءَ سرجمیں بلوچستان ءَ گوستگیں دَہ روچاں بند بہ کن؟ سرجمیں مکران ءَ اے وھد کرفیو انت ءُ ریاست بلوچاں توپک ءُ شد ھردوکاں کشگ ءِ شوربندی کتگ –

رھشوناں گوشتگ ما ریاست ءَ تچک ءَ گوش ایں کہ تئی زُلمانی آپ سر ءَ سرگوستگ ءُ سرجمیں بلوچستان ءَ لکانی ھساب ءَ مھلوک ءَ دگانی سر ءَ درایگ ءَ لاچار کنگ ءَ ئے – اگان اے زوراکی ءُ رستری ءِ ھلاپ ءَ لکانی مھلوک دگانی سر ءَ سر بہ ریچ ایت گڑا اے مھلوک ءِ توپان ءِ دیم ءَ تئی تاکت ءُ مزن مَری ھاکاں گوں ھوار بیت اِنت-

آئی ءَ گوشتگ ماں میان اُستمان ءَ گوں دزبندی کن ایں کہ آ اے وھد ءَ بلوچستان ءِ ناگیگیں جاورھالانی سرجمی ءَ گامگیج بہ زیر ایت – گوادر ءَ ھوار سرجمیں مکران ءَ لکانی ھساب ءَ مھلوک ءِ زندگی ناوشی ءِ دیمپان انت میان اُستمان ءِ گامگیج ءَ لکانی ھساب ءَ مھلوک ءِ زندگی ءِ رکگ ءِ سبب بیت اِنت-

پریس کانفرنس ءَ گوشگ بیتگ کہ مئے لوٹ نبشتگ انت:

۱- مستونگ،تلار،گوادر،نوشکی ءُ تربت ایف سی ءِ تیرگواری ءَ شھید ءُ ٹپی بیتگیں زھرشانی کنوکانی ارزی نامہ کور کمانڈر ءِ نام ءَ نبشتگ کنگ بہ بیت اِنت-

۲- ھوم ڈپارٹمنٹ سرجمی ءَ نوٹیفکیشن شنگ بہ کنت گیش ریاستی پوج ءِ نیمگ ءَ کجام ھم ڈولیں لٹ شاپی نہ بیت اِنت –

۳-سر وزیر ءُ آئی ءِ کابینہ وت گوادر ءَ بیا انت ءُ مئے گون ءَ پریس کانفرنس بہ کن انت ءُ بہ من انت اے وھداں بیوکیں تاوانانی زمہ وار بلوچستان ءِ سرکار انت ءُ ایشی ءَ مھلوک ءِ پرایمنیں زھرشانی مراگش ءِ پروشگ ءِ جھد کتگ ءُ تاکت ءِ کارمرد کنگ ءِ ھکم دیگ ءِ واک ھست انت- بلوچستان ءِ سرکار جانی ءُ مالی تاوانانی ایرجنی ءَ بہ کن اَنت-

۴- دراھیں زھرشانی کنوک ھما کہ بلوچ راجی مُچی ءِ پژدر ءَ گرگ بیتگ اَنت یا لوگانی بیڑ برگ ءَ پد زورانسری آوار جنی ءِ آماچ کتگ اَنت، اے سرجمی ءَ یل کنگ بہ بنت ءُ دراھیں ایف آئی آر ھلاس کنگ بہ بنت اِنت-

۵- دراھیں راہ پچ کنگ بہ بنت، گوادر ءَ ھوار مکران ءَ ابید جارانکی کرفیو ھلاس کنگ بہ بیت اِنت ، گوادر ءِ آپ پچ کنگ بہ بیت اِنت- دمگ ءَ انٹرنیٹ پچ کنگ بہ بیت اِنت-

۶- پاکستان ءِ سرکار اے گپ ءَ نوٹیفائی بہ کنت راجی مچی ءِ کمکار یا بھر زیروک ھچ کس ترس ءِ آماچ کنگ نہ بنت اِنت نانکہ اے درگت ءَ دگہ ارزی نامھے کنگ بیت اِنت – نانکہ دیم ءَ کجام ھم پُر ایمنیں رھشانی ءِ ابید زلوری تاکت ءِ کارمرد کنگ بیت اِنت-

۷- اے راجی مُچی ءِ وھد ءَ ریاستی پوج ءُ چیریں ادارھانی دست ءَ لس مھلوک ءِ ھمینکس مالی تاوان بیتگ انت کہ ایشانی توک ءَ آیانی لوگانی پرشت ءُ پروش، گاڑیانی ماندارگ، یا زاتی سامانانی برگ ھوار انت کہ اے بلوچستان ءِ سرکار دراھیں تاواناں پُر بہ کنت اِنت-

سَد سَلام راج ءِ شیرزالاں بات
بیر ءُ نپت اَنت پہ دژمناں شھمات

کئے گُش ایت مُرتگ بانڑی شیھک
دژمن مئے کُرت اَنت سمّی ءَ دل تْرک

نوک کتگ نام ءَ تو ملکناز ءِ
بزگیں راج ءِ ھک ءِ آواز ءِ

روشن اِنت جزماں تئی بلوچ باندات

مھلب ءُ بیبو ءُ شَلی شاری
سھر دپیں بامے سدکاں کاری

مئے گھار گون اَنت ھر وڑ ءُ ھر رنگ
توکل اِنت راج ءِ بانکیں مھرنگ

دژمناں نیل ایت ایمن ءُ آزات

شورھاں الگار شیرین نور ھاتون
پاتمہ انچو گرند جنت اِستون

مریم اِنت دائم راج ءَ ناول ایت
آ ھسن سْیاھاں جنت ءُ ھکل ایت

دلجماں راج ءِ دپتراں بیت یات

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ بی ایل اے ءِ ھمبل سرمچار سنگت نصیر بلوچ پنّام ءِ سکندر ءُ سنگت غلام جان پنّام ءِ استاد ساچان بلوچ راجی آجوئی ءِ راہ ءَ پرز ءَ پیلو کنگ ءِ میان ءَ شھید بیتگ اَنت-

آئی ءَ گْوشتگ کہ بی ایل اے ءِ سرمچار نصیر احمد پنّام سکندر بلوچ راجی آجوئی ءِ مول مراد ھاتر ءَ پرز ءِ پیلو کنگ میان ءَ گوستگیں روچاں بیست ءُ سے جولائی دوہزار ءُ بیست ءُ چار ءَ گچک ھند ءَ زھرناکیں مارے ءِ ڈنگ جنگ ءَ شھید بیتگ-

جارکش ءَ گْوشتگ کہ سنگت نصیر احمد پنّام ءِ سکندر ء ملا محمد عیسیٰ ءِ سیادی چہ واشک ءِ دمگ بیسمہ سولیر ءَ بیتگ- تو دوھزار پانزدہ ءَ سنگتیں گل ءَ چہ ھمگرنچ بیتگ ءُ بلوچ راجی ایردستی ءِ بگیری ءَ سلاہ بندیں جُھد بندات کتگ ءُ دوھزار ءُ بیست ءَ بلوچ لبریشن آرمی ءِ بھر بیتگ ءِ-

جارکش ءَ گْوشتگ کہ شھید نصیر بلوچ پنجگور، واشک، رخشان، گوران، کولواہ، ھوشاپ ءُ کیلکور ءِ میڑاں راجی پرز پیلو کتگ اَنت ءُ مزنیں میڑانی بھر بیتگ ءُ دُژمن بے کساس تاوان ءِ دیمپان کنگ ءِ بلاھیں کردے پیلو کتگ-

آئی ءَ گْوشتگ کہ تئی کھول زورگریں پاکستانی پوج نیمگ ءَ یکشل ءَ زوراکی ءِ نشانگ کنگ بیتگ ءُ تئی لوگ شش رند ءَ پوج ءِ بیڑبرگ میان ءَ مانداشتگ اَنت، بلے تو وتی راجی آجوئی ءَ راہ ءَ یک انچے ھم پُشت ءَ نہ کنزتگ ءِ – تو وتی کرد ءُ دیمونی ءَ چہ دُژمن سر ءَ تچک کتگ کہ بلوچ، ایردستی ءِ سر ءَ راجی آجوئی ءُ اے راہ ءَ شھیدی ءَ گچین کن اَنت-

جارکش ءَ دیمتر ءَ گْوشتگ کہ بلوچ لبریشن آرمی ءِ سرمچار غلام جان پنّام ءِ استاد ساچان بیست شش جولائی دوھزار ءُ بیست ءُ چار ءَ کیلور ءَ شھید بیتگ- تو بیست ءُ پنچ جولائی ءَ پنجگور ءِ دمگ کیلکور ءَ زورگریں پاکستانی پوج ءِ جوڑ کتگیں وتگڑیں ڈیتھ اسکواڈ سر ءَ بلوچ راجی آجوئی سنگر ( براس) ءِ بیڑانی بھر بیتگ کہ اود ءَ تیرے ءِ لگگ ءَ چہ تو ٹپی بیتگ ءِ-

جارکش ءَ گْوشتگ کہ غلام جان براس سرمچاراں ٹپی ئیں جاوراں وتی مُھریں اوتاکاں برتگ – اود ءَ دوا درمان کنگ بیتگ بلے ٹپّانی درد نہ سگ اِتگ ءُ شھید بیتگ-

جارکش ءَ گْوشتگ کہ شھید غلام جان پنّام ءِ استاد ساچان ء محمد پنجگور دمگ چہ سیداں سیادی داشتگ – تو دوھزار ءُ سیزدہ ءَ بلوچ لبریشن آرمی ءَ گوں ھمگرنچ بیتگ راجی ایردستی ءِ بگیری ءَ پُرکار بیتگ- شھید غلام جان وتی جنگی بودناکیانی سوب ءَ زوت ھیلکاری کماندار درچنگ بیتگ ءُ ھمے ھاتر ءَ استاد نام دیگ بیتگ-

جارکش ءَ گْوشتگ کہ شھید غلام جان اے وھد ءَ بلوچ لبریشن آرمی ءِ پنجگور بُنجل ءِ سیکنڈ کماندارے ءِ پرز ءَ پیلو کنگ ءَ بیتگ- تو پنجگور، بلیدہ، ھوشاپ، کیلکور، پروم، بالگتر، واشک، رخشان ءُ کولوہ ءِ میڑاں وتی جنگی بودناکی شریں وڑے ءَ پیش داشتگ ءُ دُژمن تاوانانی دیمپانی کتگ-

آئی ءَ گْوشتگ کہ تو بلوچ راجی آجوئی سنگر ( براس ) ءِ جتاجتائیں آپریشنانی بھر زرتگ نا تھنا دُژمن پروش داتگ بلکیں بلوچ راجی یکجاھی ءِ مھکمی ءِ بلاھیں کردے پیلو کتگ- شھید غلام جان ءِ کل ءُ کسارت آئی ءِ بُنکی ھنکین پوجی شرپ ءِ گوم ءَ آجو بلوچستان ءِ بیرک سر ءَ مک اِتگ-

جارکش جیئند بلوچ ءَ گْوشتگ کہ بلوچ لبریشن آرمی شھید نصیر ءُ غلام جان آیانی گرانبھائیں دیمونیانی سر ءَ سُھرچکیں دروت ندر کن ایں کول کن ایں شھیدانی دیمونی ھچبر شموشگ نہ بنت ءُ زوت یا دیر آیانی منزل آجو بلوچستان ءَ دست گر ایں-

پاکستانی پوج ءَ پُرا ایمن زھرشانی ءِ میان ءَ گوادر رؤکیں ٹرانسپورٹ دارگ بیتگ اَنت، چریشی بازیں شھراں ورگی توژگ ڈوکال ودی بیتگ-

بلوچستان ءِ تیاب دپی شھر گوادر ءَ بلوچ یکجھتی کمیٹی ءِ انوگاں بلوچ راجی مچی ءِ دارگ واستا پاکستانی پوج ءَ بستگ ءُ شھر نیمگ ءَ رؤکیں سرجمیں ٹرانسپورٹ داشتگ اَنت چریشی ءِ آسر ءَ شھر ءَ ورگی توژگ ڈوکال ودی بیتگ-

ھالانی رِد ءَ پاکستانی فرنٹیر کور ءَ اوتھل زیرو پوائنٹ ءِ ھند سر ءَ سرجمیں روگ ءُ آیگ بند کتگ ءُ گوادر ءُ مکران ءَ رؤکیں ورگی توژگ سر کنوکیں ٹرک داشتگ اَنت-

تاجرانی رِد ءَ چہ کراچی ءَ مکران ءَ ورگ ءُ آپی توژگانی بروکہ ٹرکانی دارگ سوب ءَ ٹرکانی تہ ءَ ھراب بیگ ءَ اَنت-

دمگی تاجراں گْوشتگ کہ آرت، شکر، ورگی تیل ءُ دگہ اژدری ئیں سامان ٹرکاں گٹ اَنت ءُ مارکیٹ ءَ تاں سر بیگ ءَ نہ اَنت، گوادر ءِ دکاناں ورگی توژگانی ڈوکال ءِ گیشی اَتکگ چریشی ءَ دمگ مردمانی واستا دلسیاھی ودی بیگ ءَ اِنت-

دومی نیمگ ءَ گوستگیں پنچ روچاں چہ ھکومتی پرمانانی سر ءَ گوادر ءَ شادی کور ڈیم ءَ چہ سر کنوکیں ورگی آپانی پائپ ھم بند کتگ اَنت چریشی ءَ دمگی مردماں دلسیاھی ءِ دیمپانی کنگ کپگ اِنت شھریاں اے گامگیجی ءِ سر ءَ تُرندیں بے اُمیتی ءِ درشان کتگ اَت-

زانگ بہ بیت کہ گوادر ءَ ھوار بلوچستان مکران ءَ رؤکیں راھانی سر ءَ بند کنگ ءِ وئیلاں گوادر ءَ بلوچ راجی مچی ءَ دارگ سوب ءَ دیم ءَ اَتکگ بلے گل نیمگ ءَ چہ باز رند ءَ لوٹ کنگ ءَ ھم پاکستانی پوج ءَ دگ پچ کنگ نہ بیتگ اَنت-

گوادر ءَ ھوار سرجمیں بلوچستان ءَ ریاستی تاکت ءَ کارمرزی ءِ بگیری ءَ گل ءَ جھانی رسانکدر ءُ انسانی ھکانی گلاں چہ لوٹ کتگ کہ آ ریاستی پوج اے گامگیجی ءَ ایر جتگ ءُ رپورٹ بہ کن اَنت-

بلوچ یکجھتی کمیٹی ءِ گْوشگ اِنت کہ پاکستانی پوج ءُ صوبائی ھکومت دمگیانی واستا نگیگیں جاور ودی کنان ءَ مئے پُرایمنیں زھرشانی ءَ دارگ جُھد کنگ ءَ اَنت اگاں ریاست پُرایمن دروشم ءَ جیڑھانی گیشینگ ءُ گپ دیوان لوٹ اَنت گُڑا گوادر ءَ رؤکیں دگاں چہ ءَ اَڑاناں دور بہ کن اَنت سرجمیں راھاں پچ بہ کن اَنت-

بلوچ یکجھتی کمیٹی ءَ ھکومت ءَ چہ گپ دیوان ھاتر ءَ وتی لوٹاں گوادر شھر ءَ انگر ءَ ھلاس بہ کن اَنت موباھل ءُ دماگ نیٹورکاں پچ کنگ ءَ ھوار دزگیریں مردمانی یل کنگ لوٹ کتگ بلے ھکومت نیمگ ءَ چہ بی وائی سی ءِ لوٹانی سر ءَ ھچ وڑیں پسّہ دیم ءَ نیتکگ-

کراچی ءَ پولیس ء لَٹ ءُ کُٹ زھرشانی کنوکانی دزگیری ءَ ھوار بلوچستان ءَ ریاستی زوراکیانی بگیری ءَ زھرشانی کنگ بیتگ-

کراچی سول سوسائٹی ءِ نیمگ ءَ چہ گوستگیں روچ ءَ کراچی پولیس ءِ نیمگ ءَ چہ بلوچ یکجھتی کمیٹی ءِ زھرشانی ءِ روانک ءِ سر ءَ اُرش، زھرشانی کنوکانی سر ءَ لَٹ ءُ کُٹ ءُ دزگیریانی بگیری ءَ زھرشانی نکش کنائینتگ-

زھرشانی کنوکاں اے درگت ءَ گْوشتگ کہ بلوچستان ءَ ریاستی زوراکی ءِ تاکت کارمرز دمگ ءَ زورگری ءِ جاوراں پدر کنت پُرایمن زھرشانی کنوکانی سر ءَ تاکت کارمرز انسانی ھکانی ءُ ریاستی کانود ءِ پادمالی اِنت-

سول سوسائٹی ءِ شیما کرمانی ءَ اے درگت ءَ گْوشتگ کہ آ بلوچ زالبولانی دلیری ءُ گھگیری ءَ دروت ندر کن ایں کہ اے جاور ءُ اڑ ءُ جنجالاں پُرایمن گھگیری ءِ راہ در چتگ ءُ اوشتاتگ اَنت-

سول سوسائٹی ءِ گوستگیں روچ ءَ چہ کراچی ءَ بلوچ یکجھتی کمیٹی ءُ سول سوسائٹی ءِ باسکانی دزگیری ءُ پولیس نیمگ ءَ چہ آیانی سر ءَ ایف آئی آر ءِ ایر ھم جتگ ءُ لوٹ کتگ کہ سندھ ھکومت زوت زھرشانی کنوکاں یل بہ کنت-

پاکستان ءِ واکداراں بلوچ یکجھتی کمیٹی ءِ زھرشانی نندانک ءِ ھلاس نہ کنگ ءِ پژدر ءَ واکداراں بی وائی سی ءِ رھشونانی کشگ ءِ بیھار داتگ-

مروچی گوادر ءَ ھپتمی روچ ءَ بلوچ یکجھتی کمیٹی ءِ زھرشانی نندانک یکشل ءَ برجاہ انت – شھر ءَ یک ھپتگے ءَ انٹرنیٹ سروس نیست انت ءُ روگ ءُ آیگی راھاں ھم بازیں کچے ءَ پوج دارگ بیتگ اَنت-

دمگی مردمانی رد ءَ پاکستانی واکداراں بلوچ یکجھتی کمیٹی ءِ سروک ڈاکٹر ماہ رنگ بلوچ، سمی دین بلوچ، ڈاکٹر سبیھہ بلوچ، سبگت اللہ ءِ سر ءَ یک ٹولی ءِ دیم داتگ ءُ بیھار داتگ زھرشانی ءِ ھلاس نہ کنگ ءِ پژدر ءَ بی وائی سی ءِ سروک تچک ءَ تیرگواری کنگ ءُ کشگ بنت انت-

دمگی مردماں گوں ٹی بی پی ءَ گوشتگ اے بیھار پاکستان ءِ چیریں ادارہ آئی ایس آئی ءِ یک آفیسرے ءِ ھکم ءَ دیگ بیتگ-

دمگی اھوالانی رد ءَ اے آئی ایس آئی ءِ آفیسر ڈپٹی کمشنر آفس گوادر ءَ بلوچ راجی مچی ءُ زھرشانی نندانک ءِ ھلاس کنگ ءِ واستا گوستگیں یک ھپتگے ءَ جاڑیگ انت-

زانگ بہ بیت بلوچ یکجھتی کمیٹی ءُ سرکار ءِ میان ءَ گپ ءُ تران بیتگ بلے بی وائی سی ءِ گوشگ انت پیش کرتگیں لوٹانی سر ءَ گامگیج زیرگ بوگ ءَ نہ انت بلکیں ایشی ءِ چپ ءَ یکشل ءَ گوادر پوجی انگیری ءُ دامگی اھوال بند اَنت-

دومی نیمگ ءَ گوستگیں روچ ءَ نوشکی ءَ بی وائی سی ءِ زھرشانی ءِ سر ءَ پوج ءَ تیرگواری کتگ ءُ یک ورانایے کشتگ ءُ دو زدگ کتگ انت-

بلوچ راجی مچی ءِ بگیری ءَ ریاستی زوراکی ءِ بگیری ءَ گوادر پدی زِر ءَ نندانک برجاہ، وھدے کہ جتاجتائیں شھراں زھرشانی کنگ بیگ ءَ اِنت-

اے درگت ءَ چہ بلوچ یکجھتی کمیٹی ءِ گْوشگ اِنت کہ یک نیمگے ھکومت گپ دیوان نام ءَ گرگ ءَ اِنت دومی نیمگ ءَ سرجمیں بلوچستان ءَ پُرایمن زھرشانی ءِ بگیری ءَ زوراکی تُرندی ءَ گیش بیگ ءَ اِنت، چریشی ءِ آسر ءَ بلوچستان ءَ نندانک ءُ زھرشانی ءَ ھواریں زھرشانی کنوک ءُ بلوچ یکجھتی کمیٹی ءِ راھشون ءُ باسکانی سر ءَ ریاستی ادارہ ءُ ھکومت ءِ نیمگ ءَ چہ زوراکی ءَ بازیں مردمے بیران ءُ ٹپی درزنانی مردم دزگیر کنگ بیتگ اَنت-

اے زوراوری بیڑ بلوچ چُکچینی ءِ بگیری ءَ پُرایمن بلوچ زرمبشت ءِ لپاشگ ءَ ھکومتی ادارھاں پدر کنت-

آئی ءَ دیمتر ءَ گْوشتگ کہ اگاں ریاست سرپد بیت کہ بلوچ راج بُنکی انسانی ھکانی ءُ شرپ ھاتر ءَ وتی جُھد ءَ پُشت کنز بیت گُڑا اے رد اِنت، ما اشی ءِ زوراکی ءُ زوراوری ءِ دیم ءَ ھچبر سر ءَ جھل نہ کن ایں دانکہ گُڈی بلوچ بلوچ چُکچینی ءِ بگیری ءَ پیشگام بیت جُھد برجاہ بیت-

زانگ بہ بیت کہ یک نیمگے ھکومت اپوزینش پارٹیانی نیمگ ءَ گوادر ءَ بلوچ یکجھتی کمیٹی ءِ راھشوناں گوں گپ دیوان ءِ ٹاہ ءَ جنگ ءَ اَنت وھدے کہ دومی نیمگ ءَ جتاجتائیں شھراں زھرشانی کنوکانی بگیری ءَ زوراکی ءِ دْرچ یکشل ءَ برجاہ ءَ اِنت-

گوستگیں روچ ءَ بلوچ یکجھتی کمیٹی ءِ نوشکی ءَ برجاھیں نندانک سر ءَ پاکستانی پوج ءِ تیرگواری ءَ چہ یک زھرشانی کنوکے بیران وھدے کہ بازیں مردمے ٹپی بیتگ اَنت وھدے کہ سندھ ءِ شھر کراچی ءَ ھم بازیں زالبولے ءُ مردین زھرشانی کنوک پولیس ءَ دزگیر کتگ اَنت-

بلوچ زھرشانی کنوکانی سر ءَ زوراکی ءِ بگیری ءَ مروچی ھم گوادر نوشکی ءُ دگہ دمگاں زھرشانی ئیں نندانک برجاہ ءَ اِنت وھدے کہ لَٹ کُٹ وئیلانی بگیری ءَ چاگی، نوشکی ءَ ھڑتالاں چہ شھر بند بیتگ اَنت-

ھمے وڑ ءَ بلوچ یکجھتی کمیٹی شال ءَ شنگ کتگیں جار پد ءَ گْوشتگ کہ مروچی بیگاہ ءِ ھپت ءَ بلوچ راجی مچی ءِ شھیداں سھرچکیں دروت ندر کن ایں ءُ آیانی یات ءَ روانک ڈیوا روک کنگ بیت- باندا اے درگت ءَ یکشمبے ءَ یک سمینارے ھم برجم دارگ بیت-

گوادر پُر ایمن مچی ءَ ھواریں مردمانی سر ءَ لَٹ کُٹانی وئیل ءِ بگیری ءَ لاھور ءُ اسلام آباد ءَ ھم بلوچ نودربرانی نیمگ ءَ چہ زھرشانی کنگ بیتگ وھدے کہ انسانی ھکانی گلاں ھم ریاست نیمگ ءَ چہ تاکت کارمرزی تُرندی ءَ ایر جتگ-