TBP Balochi

بلوچستان لبریشن فرنٹ ءِ جار میجر گوھرام بلوچ ءَ وتی شنگ کتگیں درشان ءَ گوشتگ سرمچاراں پنچ اگست ءَ دو شمبے ءِ سُھب ءِ نوہ ءُ نیم ءَ مستونگ ءِ ھند کڈ کوچگ ءَ کلی یلی ءِ نزیک ءَ ٹیلی نار موبائل ءُ یوپون شرکت ءِ ٹاور تیر جتگ ءُ مشین مانداشتگ اَنت۔

آئی ءَ گوشتگ زورگریں پاکستان بلوچ آجوئی لوٹوکانی نشانگ کنگ ءَ موبائل ٹاوراں مِک کنگ ءَ اِنت داں کہ آیاں نشانگ بہ کنت بلے سرمچار اے چیز ءَ شری ءَ زان اَنت کہ پاکستان موبائل ٹاورانی پُشت ءَ آجوئی لوٹوکاں زانگ ءُ نشانگ کنگ لوٹ ایت۔

گوھرام بلوچ ءَ گوشتگ بی ایل ایف ءِ ٹیکنیکل ٹیم ءُ انٹیلجنس ٹیم بلوچ سرمچارانی ھواری ءَ ھما دُرسیں ٹیکنالوجی آں نشانگ کنت کہ پہ آجوئی لوٹوکانی نشانگ کنگ ءَ مِک کنگ بیتگ اَنت۔

جارکش ءَ گوشتگ بلوچستان لبریشن فرنٹ موبائل ٹاورانی تاوان دیگ ءِ زمہ واری ءَ منّ ایت ءُ داں بلوچستان ءِ آجوئی ءَ زورگریں لشکر ءُ آئی ءِ ساماناں تاوان دنت۔

چہ روکپتی بلوچستان ءَ گوادر ءَ راجی مُچی ءِ پلامرزی ءَ یکشل ءَ درشان برجاہ انت-

روکپتی بلوچستان ءِ دمگ کھیر ءَ جامع مسیت ءَ واز ءِ وھد ءَ مولانا نواب ھوت ءَ گوشتگ گوادر ءَ نیشتگیں بلوچ مھلوک ءِ سر ءَ پاکستان ءِ سرکار انساپ بہ کنت ءُ آیانی گون ءَ گپ ءُ تران بہ کنت انت-

آئی ءَ گوشتگ چہ بلوچستان ءَ ھزاراں مردم پاکستان ءِ سرکار ءَ گار ءُ بیگواہ کتگ انت آیانی کس ءَ مردم نزان اَنت مئے مردم کجا انت ءُ چتور انت –

آئی ءَ گوشتگ اگاں گرگ بیتگیں مردم جرمکار انت گڑا آ آمیدگساں پیش کنگ ءُ آیانی کھول سرپد کنگ بہ بنت بلے اے داب ءَ گار ءُ بیگواہ کنگ ءُ آیانی مردماں سرپد نہ کنگ ھچ کانون ءُ شریت ءِ راہ نہ اِنت-

آئی ءَ گوادر ءِ راجی مُچی ءِ سر ءَ لیکہ درشان کنان ءَ گوشتگ انی ھزاراں مردم نیشتگ وتی ھکاں لوٹگ ءَ اَنت ابید ھکانی دیگ ءَ پاکستان آیانی سر ءَ زُلم ءِ کوہ ءَ جوکینگ ءَ اِنت-

زانگ بہ بیت روکپتی بلوچستان ءَ بندوکیں نیکراھی رھشون یکشل ءَ بلوچستان ءَ انسانی ھکانی لگتمالیانی سر ءَ وتی ھتبہ ءُ دگہ جاھاں درشان کنگ ءَ اَنت-

ایشی ءَ پیش زاھدان ءِ سنی کمیونٹی ءِ سروک مولانا عبدالحمید ءَ ھم پاکستان ءِ سرکار ءَ بلوچ مھلوک ءِ ھکانی دیگ ءُ آیانی سر ءَ زوراکیانی بند کنگ ءِ دزبندی کتگ-

بلوچستان ءِ بُنجاھی شھر شال ءَ ھال اِنت کہ تربت ءِ جھمنندیں نودبر ءَ وتکشی کتگ-

وتکشی کنوکیں ورنا ءِ پجّار چراگ بلوچ نام ءَ چہ بیتگ-

اِھوالکار رِد ےَ ورنا ءَ بلوچستان ءِ شھدربرجاہ ءِ ھاسٹل ءَ وتکشی کتگ بلے وئیل سوب زانگ نہ بیتگ-

زانگ بہ بیت کہ بلوچستان ءَ وتکشی ءِ وئیل بلوچستان ءَ یک تُرسناکیں جاورے ءَ دیم ءَ آیگ ءَ اَنت-

گوستگیں ماہ ءَ بیست ھپت جولائی ءَ ھم کیچ ءِ دمگ یک کیسے نکش بیتگ اَنت اود ءَ ناصر ء حاجی محمد عمر جھمنند دشت شولیگ ءَ ناشناسیں سبب ءَ وتکشی کتگ-

زِر وتی ماہ ءَ ￴بے رنگ نہ کنت

اے ار داد

دی بلوچستان پوسٹ

زِر ءَ ￴کہ ترا وش آتک کتگ
اپس وتی داتگ
نوں ھچ رنگیں گْواتے ترا رسینت نہ کنت
نہ کہ تھار کنت مُجے
راھاں
زِر وتی باھوٹی ءَ ￴
مَرگ ءِ ￵کدہ ءَ ￴نوش کنت
ترا بے مہر نہ کنت
زِر ءَ ￴ترا وتی
کد ءُ ￶کالب ءَ ￴ جاہ داتگ
زِر نوں ترا بے سوب نہ کنت
ھدر، کمیٹی ءُ ￶جُمبیل
مُپت ءَ ￴ نہ اوشتاتگ انت دیم !

بلوچستان ءِ تیابدپی دمگ گوادر ءَ پدزی زر ءَ بلوچ یکجھتی کمیٹی ءِ بلوچ راجی مُچی زھرشانی نندانک دھمی روچ ءَ ھم برجاہ انت-

مروچی گوادر زھرشانی نندانک ءَ دَہ روچ سرجم بیتگ کہ یکشل ءَ برجاہ انت-

اے زھرشانی نندانک بیست ءُ ھشت جولائی ءَ ماں گوادر پدی زر ءَ ھوار بلوچستان ءِ دگہ جاھاں مُچی ءِ بھر زیرگ ءِ ھاتر ءَ روکیں مھلوک ءِ سر ءَ زوراکیانی ھلاپ ءَ برجم دارگ بیتگ-

گوادر ءَ ھوار تربت، شال، نوشکی ءُ پنجگور ءَ زھرشانی نندانک برجاہ اَنت ءُ اود ءَ ھم مھلوک بازیں کچے ءَ جاڑیگ اَنت –

زھرشانی نندانکاں گوستگیں روچ ءَ تربت ءَ کینڈل واک کنگ ءُ بلوچ راجی مُچی ءَ شھید بیتگیں مردمانی یات ءِ ستاشانی ءَ ڈیوا بالینگ بیتگ اَنت-

دومی نیمگ ءَ گوادر ءَ آل پارٹیز ءَ ھوار سرکار ءِ بنشون یکشل ءَ گپ ءُ تران ءِ واستا جھد کنگ ءَ اَنت بلے اود ءَ زھرشانی کنوکانی لوٹانی سرجم نہ بوگ ءَ گپ ءُ تران تنی وھدی آسری ءَ سر نہ بیتگ –

مھرنگ گُباراں ساپ بہ کن

الماس بلوچ

دی بلوچستان پوسٹ

اے زِر کہ انگت تُنّیگ اِنت
اے کہ زِر کہ انگت رھچار اِنت
کریاب بوھانیں بے بْرمش ءَ
اندیم کنانیں رنگاں وتی
پْروشانیں چولاں، آوازاں
کرنی ئیں سازاں، امبازاں
تندانی دئیناں جُنزان اِنت
اھدانی گُباراں پوشان اِنت
گیدی ءِ زھیراں نوشان اِنت
چِدو پیش کہ زِر ھاموش بہ بیت
مھرنگ! گُباراں ساپ بہ کن

باتیل کہ نپتاں سگّان اِنت
باتیل کہ گْرنداں اوپاریت
باتیل کہ آھاں والینیت
باتیل کہ جنگاں وانینیت
باتیل کہ رنگاں رنگینیت
باتیل ملنگاں نازینیت
باتیل کہ چمّاں بکشیت دید
باتیل کہ مُرگاں کنت مُرید
باتیل کِرار ءِ دربار اِنت
باتیل کہ راج ءِ دیوار اِنت
باتیل پہ بدواہ سیاہ مار اِنت
مئے ارواہ ءِ مُھریں تار اِنت
چِدو پیسر ھاکاں بار بہ بیت
ماں ھاک ءُ گباراں گار بہ بیت
مھرنگ! گُباراں ساپ بہ کن

بوجیگ چہ کرناں لُڈّان اِنت
بس ھمّل ھمّل ڈسّان اِنت
چولانی زبان ءَ ھمتران اِنت
اھدانی یاتاں تابان اِنت
اُمیت ءِ بھاراں لوٹان اِنت
وشّی ءِ واباں گِندان اِنت
چدو پیش کہ بوجیگ گار بہ بیت
چدو پیش کہ دریا اِرسے بہ بیت
چدو پیش کہ ہرچی، ھچّی مہ بیت
مھرنگ گُباراں ساپ بہ کن!
کہ زِر تئی چمّاں وابین اِنت

ھرنائی ءَ دزکپتگیں لاشانی درگت ءَ چہ رسانکدر ءَ شنگ بیتگیں گپ رد کتگ انتزامیہ ءَ گْوشتگ کہ چہ ھرنائی ءَ لاش دز نہ کپتگ-

ھرنائی انتزامیہ شنگ کتگیں درشان ءِ تہ ءَ لاشانی دزکپتگ چاگردی رسانکدر ءَ شنگ بیگ ءَ اَنت بلے لاش دز نہ کپتگ-

دومی دمگی اِھوالکار گْوشگ اِنت کہ شھدگ ءَ ھوار ھرنائی ءَ ھچ وڑیں نادُراھجاہ ءَ لاش نیست اِنت-

زانگ بہ بیت کہ گوستگیں روچ ءَ چہ رسانکدر ءَ یک ھالے تالان اِنت کہ ھرنائی ءِ دمگ زرغون غر ءَ لوئیزوار ءِ ھند سر ءَ شش مردم ءِ لاش دزکپتگ اَنت یک ناوشیں ھالے، سرجمیں لاش یک جاھے ءَ دزکپتگ اَنت کہ یک شپانکے ءَ وتی پسانی چارینگ ءَ بیگاہ ءِ ھپت نزیک ءَ گندگ بیتگ، سرجمیں مردم بے دردناکی ءَ کُشتگ اَنت- بلے مروچی انتزامیہ ءِ درشان دیم ءَ اَتکگ کہ اے گپ ءَ ھچ راستی نیست-

بلوچ یکجھتی کمیٹی ءَ وتی شنگ کتگیں درشان ءَ گوشتگ چہ باندات ءَ بگر داں یک ھپتگے ءَ سرجمیں بلوچستان ءَ بلوچ راجی مچی ءِ شھیدانی یات ءَ ڈیوا بالینگ بنت اِنت ءُ راجی سوگندی دیوان برجم دارگ بنت اِنت-

آئی ءَ گوشتگ دراھیں زون جوانیں رنگے ءَ شھدانی یات ءَ دیوانانی چن ءُ لانچ ءَ بہ کن اَنت ءُ جوانیں رنگے ءَ ستاشانی کنگ بہ بنت اِنت-

درشان ءَ گوشگ بیتگ بلوچ راجی مچی ءِ سر ءَ ریاست ءِ زوراکی ءُ رستری ءِ ھلاپ ءَ مروچی نھمی روچ ءَ گوادر ءَ دھرنا برجاہ انت-

جارکش ءَ گوشتگ بلوچ مھلوک دراھیں مشکل ءُ جیڑھاں ابید دلیری ءَ گوں دھرنا ءَ نیشتگ انت ءُ بلوچ راجی مچی ءِ سوبمندی ءَ بلوچستان ءِ گھگیری ءَ یک گامے جنز اتگ –

اے دراج کشیں جد ءُ جھدے ایشی ءِ واستا گیشین اوپار ءُ سساکاری لازمی انت کہ چریشی ءَ چہ مارا سوبمندی رس ات کنت اِنت-

بلوچ یکجھتی وتی دراھیں باسکاں کڈن کنت انت دلگوش ءُ ھیال ءَ گوں پکر ءُ سسا ءَ گون اے دراجیں پند ءَ اوپار ءَ جد ءُ جھد کنگی انت ءُ وتی مازگی دروشم ءَ تیار بوگی انت کہ ایشی ءَ چہ مئے سوبمندی ءِ مانزمان بیت کنت انت-

آئی ءَ گوشتگ ریاست ءَ زورانسری بے کساس کارمرد کت بلے ایشی ءَ ابید بلوچانی کوھیں اوپار ءَ ریاست ءِ زوراکی رد کت انت ءُ یک نوکیں دروشمے دیم ءَ آورت – راج مستریں تاکت انت کہ ھمے تاکت ءِ زور ءَ ریاست ءِ تاکت ھاکاں گوں ھوار بیت اِنت-

ھمے ڈول مروچی بی وائی سی ءِ ایکس ءَ اسپیسی دیوانے برجم دارگ بوگ ءَ انت کہ اود ءَ مھلوک ءَ بھر زیرگ ءِ دزبندی کنگ بیتگ انت-

بنگلہ دیش ءِ سرکار ءِ بگیر دار ءُ پولیس ءِ میان ءَ جنگ ءُ چوپاں نود مردم بیران ءُ سدانی کچ ءَ زدگ بیتگ اَنگ – ءُ سر وزیر شیخ ھسینہ واجد ءَ ڈھاکہ یل داتگ ءُ یک مھکمیں جاھے ءَ شتگ-

ھال سر کنوکیں ادارہ اے ایف پی ءِ رد ءَ بنگلہ دیش ءِ سروزیر ءَ ڈھاکہ یل داتگ ءُ مھکمیں جاھے ءَ شتگ – دمگی اھوالاں روئٹرز ءَ گوشتگ کہ شیخ ھسینہ ءُ آئی ءِ گوھار ءَ مھکمیں جاھے ءَ برگ بیتگ اَنت-

شیخ ھسینہ اے وھد ءَ کجا انت اے درگت ءَ دگہ راستیں اھوال نیست اَنت-

بنگلہ دیش ءِ وزیر اعظم وقار الزمان ءِ تران لھتے وھداں دارگ بیتگ – ڈھاکہ ءَ ھوار ڈیھ ءِ بازیں جاھاں پوج دارگ بیتگ انت-

ڈیھ ءَ نودربر سول نافرمانی نامیں زرمبشتے ءَ شیخ ھسینہ ءَ دزکش بوگ ءِ لوٹ کتگ-

بنگلہ دیش ءِ بنجاھی شھر ڈھاکہ ءِ نیمگ ءَ لانگ مارچ جنز اتگ ءُ اے وھد ءَ انٹرنیٹ سروسز بند کنگ بیتگ-

بیران بیتگینانی توک ءَ کساس سیزدہ پولیس آفیسر ھوار انت – سرجمیں ڈیھ ءَ ترندیں زھرشانیانی دارگ ءِ ھاتر ءَ کرفیو جنگ بیتگ-

جولائی ءَ بندات بیتگیں نودربر زھرشانی ءِ بنکی لوٹ سرکاری نوکری ءِ کوٹا سسٹم بیتگ بلے اناگتی اے زوت مٹ بیتگ ءُ سرکار ءِ بگیرداریں زرمبشت جوڑ بیتگ-

داں انگت ءَ بنگلہ دیش ءَ ترندیں زھرشانیانی توک ءَ کم چہ کم دو سد ءُ ھشتاد مردم مرتگ اَنت-