اسرائیل ءَ شمبے ءِ سھب ءَ ایران ءَ فوجی بنجلانی سر ءَ اُرش کتگ۔ اسرائیل اے اُرشاں یکم اکتوبر ءِ بیلسٹک میزائل ءِ اُرشانی پسو ءِ رد ءَ گشگ ءَ اِنت ءُ ایران ءَ اُرشانی سبب ءَ ھچ وڑیں تاوان ءِ ھال دیم ءَ نہ اتکگ۔
اسرائیل ءَ انگت ءَ اے اُرشانی بابت ءَ گیشتریں ھال ءُ اھوال نہ داتگ انت۔
اسرائیل ءِ لشکر ءِ نیمگ ءَ چہ شنگ بوتگیں بیان ءَ گْوشگ بیتگ کہ ” ایران ءُ آئی ءِ دمگ ءِ پراکسی ءَ چہ 7 اکتوبر ءَ چہ ھپت مھاذاں اسرائیل ءِ سر ءَ مدام اُرش کتگ۔ ھوار ھما اُرش کہ چہ ایران ءِ سرزمین ءَ کنگ بوتگ۔
بیان ءَ گوشگ بوتگ کہ اسرائیل ھم ھمک وت واجھیں ملک ئِ وڑ ئَ جواب دیگ ءِ ھک ءَ دار ایت۔
ایسوسی ایٹڈ پریس ءِ رد ءَ ایران ءِ بنجاھی شھر ءَ تراک ءِ توار بوتگ ۔ اودا سرکاری رسانکدر ہم بنداتی دروشم ءَ اے گپ ءَ منگ ءَ انت کہ شھر ءِ کش ءُ گوراں چہ برزی دپاھی نزام ءِ لھتیں توار گوشدارگ بوتگ انت۔
تھران ءِ نندوکیں مردمے ءَ اے پی ءَ گوں تران کنان ءَ گْوشتگ کہ کم چہ کم ھپت تراک ءِ توار بوتگ کہ دمگ لرزگ ءَ اِنت۔ شھری ءَ اے ھال رسانکدر ءَ گوں شرت ءَ وتی پجار ءِ شنگ نہ کنگ ءَ گْوشتگ-
دومی نیمگ ءَ جھانی رھگیراں وتی بالیگانی راہ مٹ کتگ ءُ ایران ءِ سر ءَ گوزگ ءَ ابید دگہ ڈیھانی سر ءَ روگ بندات کتگ-