TBP Balochi

بلوچستان ءِ زورانسری آوار جنی ءِ دْرچ برجاہ ءَ اِنت، چہ جتاجتائیں دمگاں دگہ ھشت مردم آوار جنگ بیتگ اَنت-

بلوچستان ءِ دمگ چہ پنجگور ءَ ھالانی رِد ءَ ھمے ماہ ءِ بیست سے اکتوبر ءَ سرکاری چیردستی ءَ برجاھیں سلاہ بندیں ٹولی بزانکہ ڈیتھ اسکواڈ ءِ باسک ارشاد احمد ء محمد اسماعیل آئی ءِ لوگ نزیک دکان ءَ چہ آوار جتگ ءُ برتگ-

چہ پنجگور ءَ سر بیتگیں ھالانی رِد ءَ چاردہ اکتوبر ءَ چہ گوادر نیمگ سپر کنان ءَ پاکستانی پوج ءَ کلات ءُ پنجگور ءِ جھمنندیں چار مردم آوار جنگ ءَ پد بیگواہ کتگ اَنت کہ آیانی تہ ءَ سے پد ءَ یل کنگ بیتگ وھدے کہ عدنان بلوچ ء امیر انگت دیم ءَ آرگ نہ بیتگ-

دومی نیمگ ءَ تیاب دپی شھر گوادر ءِ دمگ چہ پسنی ءَ نوزدہ اکتوبر ءَ پاکستانی پوج ءَ قدیر احمد ء لال بخش زورانسری بیگواہ کتگ-

ھمے وڑ چہ ڈیرہ بگٹی ءَ زورانسری آوار جنی نشانگ کنگ بیتگیں دگہ پنچ مردم پجّار، شاہ مراد ء تھاپہ بگٹی، مصطفی ء احمد علی بگٹی، بازید ء خالق داد، غلام رسول ء علی خان ، خیراللہ ء نواب بگٹی ناماں چہ بیتگ اَنت کہ ھپدہ ءُ بیست یک اکتوبر میان ءَ ڈیرہ بگٹی ءِ جتاجتائیں دمگاں چہ زورانسری آوار جنی ءِ نشانگ کتگ اَنت-

بلوچ ریپبلکن پارٹی ءِ رِد ءَ گوستگیں ھپتگ ءَ پاکستانی پوج ءِ دستاں چہ ڈیرہ بگٹی ءَ بیست پنچ مردم ءَ نزیک زورانسری آوار جنی ءِ نشانگ کتگ اَنت، بلے دی بلوچستان پوسٹ ءَ انگت بیست یک مردم ءِ نام دزکپتگ اَنت-

زانگ بہ بیت کہ چہ بلوچستان ءَ زورانسری آوار جنی ءِ یک تُرندیں لھرے گندگ اَتکگ کہ اود ءَ تھنا ھمے ماہ ءَ بلوچستان ءِ جتاجتائیں دمگاں چہ ھشتاد نزیک ءَ مردم زورانسری آوار جنی ءِ نشانگ بیتگینانی تہ ءَ تاں انو ھپتاد ھشت مردم ءِ پجّار بیتگ اَنت-

ھمے ماہ ءَ دی بلوچستان پوسٹ ءَ چہ کراچی ءَ دوازدہ بلوچ نودربر ءُ ورنا زورانسری آوار جنی ھال سر بیتگ ءُ چہ کیچ ءَ اے کچ دہ چہ نوشکی ءَ نُھ مردم زورانسری آوار جنی نشانگ کنگ بیتگ اَنت، ھپت زورانسری آوار جنی ءِ ھال گوادر ءُ ھپت چہ پنجگور ءَ دزکپتگ اَنت-

ھمے وڑ چار چہ ھب چوکی ءَ زورانسری آوار جنی ءِ نشانگ بیتگیں، چہ ھُزدار ءَ چار ءُ ھاران، کلات چہ پسنی ءَ یک یک وئیلے نکش کنگ بیتگ-

دومی نیمگ ءَ ھمے سال اگست ءَ چہ ھاران ءَ زورانسری آوار جنی ءِ نشانگ کنگ بیتگیں دو مردم شھزاد مھبوب ملازئی ءُ خدا رحیم یل بیتگ اَنت-

تربت ءَ ناشناسیں مردماں پاکستانی پوج دستی بمب ءَ گوں نشانگ کتگ-

پاکستانی پوج تربت ءَ آپسر ءَ بنڈ ءِ بن دوکرم ءِ ھند سر ءَ نشانگ کنگ بیتگ-

وسیلگ رِد ءَ پاکستانی پوج ءِ کارمندانی سر ءَ ھما وھد ءَ اُرش کتگ وھدے آ دگ سر ءَ بستگ ءُ پول ءَ بیتگ اَنت-

وسیلگ گوشگ اِنت کہ اے اُرش ءَ پوج ءَ تاوان دیمپان کنگ کپتگ بلے واکدار ءِ درشان دیم ءَ نیتکگ-

زانگ بہ بیت کہ اے دمگ ءَ بلوچ آجوئی لوٹوکیں سلاہ بندیں گل پُرکار اَنت اے اُرش زمہ واری انگت ھچ گل ءَ نہ زرتگ-

زورانسری آوار جنینانی ھلاپ ءَ پنجگور روانک ءَ مزنیں کچے ءَ شھریاں بھر زرتگ-

روانک ءَ ھواریں مردماں شھید جاوید چوک ءَ چہ روانک کش اِتگ کہ شھر ءِ جتاجتائیں ھنداں چہ گوزان، زھرشانی کنوکاں بیگواھیں مردمانی اکس چست کتگ بیتگ اَنت وھدے کہ روانک ءَ زالبول ءُ چک یک مزنیں کچے ءَ ھوار بیتگ اَنت-

ھمے درگت ءَ زھرشانی کنوک پولیس ءُ انتزامیہ نیمگ ءَ چہ تُرسینگ دیمپانی کنگ ھم کپتگ زھرشانی کنوکاں اڑان سرگوز کنان ءَ وتی روانک برجاہ داشتگ-

زھرشانی کنوکانی گوشگ اِنت کہ پنجگور انتزامیہ ءَ روانک ءَ ھوار پُرایمنیں زالبول تُرسینگ جھد کتگ اَنت اشی ءِ مول زھرشانی کنوک شوشار دیگی بیتگ اَنت بلے پُرایمنیں وڑ ءَ وتی زھرشانی برجاہ داشتگ اِت-

آئی ءَ دیمتر ءَ گوشتگ اشی ءَ ساری ھم ھما دمگاں کہ زھرشانی کنگ بیتگ اود ءَ پولیس اڑان اوشتارینتگ ءُ شھر ءَ موباھل سروسز بند کتگ مروچی ھمے امل پنجگور ھم ءَ کنگ جُھد کتگ-

بلوچ یکجھتی کمیٹی ءِ مھم، بے تواری ءِ پروش : زورانسری آوار جنیانی ھلاپ ءَ اوشتاتگ ” ءِ سرھال ءَ چہ بلوچستان ءِ جتاجتائیں دمگاان زھرشانی درچ برجاہ ءَ اِنت اود ءَ اشی ءَ ساری کراچی، ھب چوکی ھُزدار، تربت ءُ مروچی پنجگور ءَ ھم زھرشانی نکش کنائینتگ-

بلوچ یکجھتی کمیٹی ءَ اے درگت ءَ دیمتر ءَ گوشتگ کہ اے پُرایمنیں زھرشانی کنوکاں گر ءُ دار جُھد ءَ ریاست نیمگ ءَ چہ یکشل بیھار ءُ زوراکی ءَ اَبید، انساپ ءُ رکینگ اے جنگ مئے جزبگ ءَ مھکم کنت- ما راج ءَ ھاسکار بیگواھیں مردمانی کھولاں چہ دزبندی کن ایں کہ آ زھرشانیاں ھوار بہ بنت ءُ وتی دوستناکاں ڈیٹا ءَ مچ بہ کن اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ شال ءَ اُرش ءِ زمہ واری من اتگ ءُ گوشتگ کہ گوستگیں شپ ءَ سرمچاراں زورگریں پاکستانی پوج ءِ ھیڈکوارٹر یک اُرشے ءِ نشانگ کتگ-

جارکش ءَ گوشتگ سرمچاراں پاکستانی پوج ءِ ھیڈکوارٹرز ءِ سر ءَ گرنیڈ لانچر بازیں کچے ءَ آس داتگ کہ سوبمندی ءَ نشانگ ءَ سر بیتگ انت – تراکانی آسر ءَ دشمن ءِ شش کارندی زدگ بیتگ انت کہ ایشانی توک ءَ لھتے سک زدگ ھوار اَنت-

جارکش جیئند بلوچ ءَ گشتگ اے اُرش ءِ زمہ واری ءَ بلوچ لبریشن آرمی من ایت ءُ زوگریں پوج چہ بلوچستان ءَ درایگ ءَ مئے اُرش برجاہ مان اَنت-

بلوچ اسٹوڈنٹس کونسل اسلام آباد ءِ نیمگ ءَ اولی کتاب ‘گپتمان ’ چاپ ءُ شنگ بیتگ-

اسلام آباد بلوچ نودربر کونسل ءِ نیمگ ءَ شنگ بیتگیں درشان ءَ گوشگ بیتگ کہ اے کتاب بی ایس سی اسلام آباد ءِ آرگن ‘ گندار پبلیکیشنز’ ءِ نیمگ ءَ اولی کتاب انت کہ شنگ ءُ تالان کنگ بیتگ-

آئی ءَ گوشتگ کہ ات کتاب ءِ توک ءَ جتا جتائیں لیکہ کالونیل تھیوری، آشوبی سیاست ءُ آشوبی وانگی راھبند ھوار اَنت-

آئی ءَ گوشتگ کہ اے کتاب ءِ توک ءَ نالج پروڈکشن ءَ ھوار ھوار میڈیا ءِ تھیوری ماں بلوچی ءُ براھوئی زبان ءَ نبشتگ کنگ بیتگ اَنت-

آئی ءَ گوشتگ کہ گپتمان کتاب پہ وانوکاں بی ایس سی ءِ کتاب جاہ ءُ بی ایس سی ءِ سالگشتی مراگش ءِ بک اسٹالاں دز کپ ایت-

یک رندے پد ءَ مکران میڈیکل کالج ءِ نودربر مکران میڈیکل کالج ءِ انتزامیہ ءِ ھلاپ ءَ زھرشانی کنگ ءَ اَنت ۔

نودربراں گوشتگ کہ بازیں رند ءَ چہ نودربراں وتی بنیاتی ھکانی ھاترا زھرشانی کنگ ءَ پیسر کالج ءِ کارمستراں دلجمی داتگ کہ آھانی سرجمیں لوٹ منگ بوتگ انت ءُ آھانی سر ءَ امل کنگ بیت انت-

نودربرانی گْوشگ اِنت کہ ھمے دلجمی ءِ سوب ءَ نودربراں زھرشانی مھتل کرتگ بلے یک ماھے ءَ گیش گوزگ ءَ پد ھم نودربرانی لوٹ پیلو نہ بیتگ اَنت۔

نودربراں گیش گْوشتگ کہ داں اے درستیں لوٹ پیلو نہ بنت ما زھرشانی کن ایں ۔

آیاں گْوشتگ کہ نودربراں چہ وتی جائزیں لوٹانی ھاترا زھرشانی کنگ ایشانی بنیاتی وانگ ءُ زانگ ءِ ھک اِنت کہ آ نہ ایوک ءَ ایشی ءِ ھمایت ءَ کن انت بلکیں ایشانی لوٹانی پجّار ءَ ایشانی ھمراھی ءَ اوشتات کنت۔ بُرزیں واکدار، مھکمہ ءِ جان سلامتی ءُ وانگ ءُ زانگ ءُ میڈیکل کالج ءِ انتزامیہ ءَ چہ لوٹ انت کہ نودربرانی جائزیں لوٹاں منگ بہ بیت ءُ آہانی جیڑہ زوتاں چہ زوت گیش ءُ گیوار کنگ بہ بنت۔

منی ءُ ￶ماھو ءِ مھر

نبشتہ کار: ناسر واھگ

دی بلوچستان پوسٹ

من ماھو ءَ ￴را جُست کت اگاں من سرپد بہ باں کہ منی مھراں چَلنڑ بوتگ گوں ھَوار دِگہ کسّے ءِ ￵ھَم یار اِنت-

ماھو من ترا گپے گْوشگ لوٹ آں ترا باریں گوں من ءَ ￴مھر اِنت کہ نیست اِنت؟ بلے من ھر وھدے ترا جیڑ آں من ھر وھدے تئی ھیالاں گار بہ آں منی زند ءِ ￵ گیشتریں جیڑہ تئی واست ءَ گوزگ ءَ ￴اِنت من اے گپ ءَ ￴دلگران نہ آں کہ ترا من ءَ ￴مھر اِنت کہ انّا یا تو منی مھراں مار اِت کنگ ءَ ￴نہ ئے￷ بلکیں من ءَ ￴باز وشّی بوگ ءَ ￴اِنت کہ من ترا مار اِت ءُ ￶جیڑ اِت کن آں۔

بِلّے تو گوں من مھر مہ کن ئے￷ بِلّے، تو گوں من ءَ ￴یک ھبرے مہ کن ئے￷، بِلّے تو منی نیمگ ءَ چمشانکے مہ دی ئے￷، بلے من مدام ترا جیڑ آں من ءَ ￴وشّی ھم بیت تئی جیڑگ ءَ ￴پرچا!-

کہ منی زند ءِ ￵آ دگہ گم ءِ ￵جیڑہ ھلاس بنت گوں تئی جیڑگ ءَ ￴منی مستریں وشّی ایش اِنت تئی ھیال اِنت کہ من جھد ءَ پرمایگ ءَ ￴اِنت اگاں تئی جیڑہ مہ بوتیں مرچی من ھچ نبشتہ کُت نہ کُتگ اَت اے تئی گم اِنت کہ من ھر جاہ جُھد پرمایگ ءَ ￴اِنت۔ اے ورنائی بے روچاں من زاناں گم سک گران اِنت بلے ھمے گنج اِنت کہ ھمے گم جُھد پرمایگ اَنت۔

اے تئی گم اِنت کہ کدی کدی دل گْوش ایت، شَیر نبشتہ بہ کن کدی گْوش ایت، نبشتانک بہ نبیسّں کدی گْوش ایت، لچّہ نبشتہ بہ کن من باز وش آں بلے تو گوں من مھر نہ کن ئے تئی مھر نہ کنگ ءِ ￵سوب ءَ ￴من جُھد ءَ-

مدام ھست ءُ ￶سلامت بات ئے￷ اے زند ءِ￴توک ءَ ￴ھچبر گم مہ گندات ئے ￵ماھو جان۔

واتر بہ کن کمبر جان

نبشتہ کار: شبیر شاشانی

دی بلوچستان پوسٹ

یک روچے من چہ وانگجاہ ءَ واتر بوت آں گُڑا ھمے من ءَ ھال رِس اِت کہ یک نودربرے بیگواہ بوتگ بلے من انگت ءَ باور نہ کُت تو بیگواہ بہ بَہ ئے۔

تئی میار چے اِنت۔￷ وھدے￵ من کلوہ چار اِت من سک مُلور بوت آں اَنچُوش نبشتہ اَت کمبر جان گار ءُ بیگواہ کنگ بوتگ، منی چمّانی اَرساں شَل کُت گُڑا من ھچ کُت تئی مُدام یات اَتک۔

کمبر جان تو مئے￷ ھمکوپگ ءُ ￵براتے ￵بوتگ ئے تھنا یک نودربرے نہ بوتگ ئے ￵بلکیں تو مئے￷ واست ءَ ￴یک رژنائی یے ءِ ￵ بوتگ ئے ￵اِیواک ءَ پہ میتگ ءَ نہ بوتگ ئے ￵ بلکیں سرجمیں گریشگ ءِ ￵برات ءُ ￶نودربر بوتگ ئے۔ ￵تئی ودار ءَ آں تو زُوت گون وتی بچکندگاں بیا تئی وداریگ آں۔

کمبر پُل ھما تئی گپ ءُ تران شوکیں بچکندگ من ءَ تئی دیوان ءِ سنگتاں گوں وش اگلاک ءَ گوں دیوان کنگ سک یات پیداک ئے۔ چراگے ￵بوتگ ئے ￵تو باندات بوتگ ئے ما کدی تئی کمی نہ مار اِتگ چیا کہ تئی کمی مارا ھچ نہ بوتگ بلے نوں تئی کمی بوگ ءَ اِنت۔ درِچک ءُ ￶دار ترا مارگ اَنت تو کجا شُت ئے￷ تئی ھال پمّن نئیت اِنت تو کجا ئے￷؟

کمبر جان یک اَنچیں مردمے بوتگ ئے کہ ناں ترا گوں دنیا ءَ ￴ کار بوتگ نئیکہ کسّی کارے ھراب کُتگ۔ تئی کار وانگ بوتگ ما زان اِیں ترا ھچ میار نیست بس تئی میار ھمیش اِنت تو یک بلوچے ئے ءُ ￶بلوچ نودربرے بوتگ ئے بس تئی میار ھمیش اِنت۔

زندگی ءِ جتائیں رنگ اَنت ھچ زانگ نہ بنت اَنچو بے مٹیں نودربر گار ءُ ￶بیگواہ بوگ ءَ ￴اَنت۔ تئی وڑیں چراگ اَنچوش آوار جنگ اوں بنت ءُ کنگ ءَ ￴ئے اے دنیا ھچ نہ زانت پُل ءِ ￵چے وشبو اِنت بژنیں گپ ھمیش اِنت تئی وڑیں پُلے ءَ گوں کنٹگاں ھوار کنت۔ کمبر جان بلے چو پُلے ءِ وڑ ءَ ھما وشبو مارا رِس اِیت اُمیت اِنت زوت کن تئی وداریگ آں۔ تئی مات ءُ ￶پِت شپ ءُ ￶روچ تئی ودار ءَ ￴آں تو کدی واتر کن ئے￷ کا ئے ما دُراہ تئی ھما آیگ ءِ ￵ رہ اِنت چارگ ءَ ￴اِنت زُوت واتر کن بے تو مارا وش نہ بیت پُل ۔￶

“ویرانگی ءِ دنزاں مہ روپ اِت منی گس ءِ “
“کّس ئِے ءِ کندگانی توار انت اِد ءَ نہ انت”

اسلام آباد بلوچستان نیشنل پارٹی ءِ سروک سردار اختر مینگل ءُ ھمراھانی ھلاپ ءَ تھانہ سیکرٹریٹ ءَ ایف آئی آر نکش کنگ بیتگ کہ اود ءَ آیانی سر ءَ ناشرکاری ءَ ھوار ھپتب دفعات ءِ رِد ءَ نکش کنگ بیتگ-

ایف آئی آر جمیل احمد جوائنٹ سیکریٹری سینٹ گوشگ پد ءَ نکش کنگ بیتگ-

ایف آئی آر تہ ءَ نشبتہ اِنت کہ بی این پی ءِ سروک ءُ آئی ھمراھاں سینٹ اسٹاف تُرسینتگ ءُ زورانسری پریس کانفرنس ءَ پرمائینتگ اَنت-

زانگ بہ بیت کہ گوستگیں روچ ءَ اختر مینگل ءَ بی این پی مینگل ءِ تتکگیں سینٹر قاسم رونجھو ءِ ھمراہ اسمبلی ءِ دیم ءَ پریس کانفرنس کنان ءَ آئینی ترمیم ھک ءَ زورانسری اوٹ برگ بھتام جتگ-

اشی ءَ پد سینیٹر رونجھو ءَ دگہ یک درشابے شنگ کتگ پارٹی ءِ سروک ءَ زورانسری پریس کانفرنس کنگ بھتام جتگ کہ چریشی ءَ پد مروچی اختر مینگل ءُ آیانی ھمراھانی ھلاپ ءَ جوائنٹ سیکریٹری سینٹ گوشگ پد ءَ ایف آئی آر نکش کنگ بیتگ-

ترکی ءَ چارشمبے ءَ پھریزی بنجل ءَ بیتگیں اُرش ءَ پد کردستان ورکرز پاٹی ءِ ھلاپ ءَ عراق ءُ شام ءَ کاروائی کتگ-

ھال سرکنوکیں ادارہ رائٹرز ءِ رد ءَ ترکی ءِ وزارت دپاہ ءَ گوشتگ کہ انقرہ ءَ ایوی ایشن شائٹ ءِ سر ءَ بیتگین اُرش ءِ پسو ءَ عراق ءُ شام ءِ زرباری ھنداں کردستان ورکرز پاٹی ءِ بنجل نشانگ کتگ اَنت-

ایشی ءَ پیش ترکی ءِ وزارت داکلہ علی پرلیکایا ءَ گوشتگ کہ انقرہ ءَ اُرش ءِ شوربندی گمانی رنگ ءَ کردستان ورکرز پاٹی ءِ باسکاں کتگ-

چارشمبے ءَ ترکی ءِ ایرو اسپیس انڈسٹری ءِ ھیڈکوارٹر ءِ سر ءَ اُرش ءِ آست ءَ پنچ مردم بیران ءُ بیست ءُ دو زدگ بیتگ اَنت ءُ سرکار ءَ اے اُرش ناشرکاری گشتگ-

وزیر داکلہ ءَ گوشتگ کپ ایرو اسپیس انڈسٹری ءِ ھیڈکوارٹر ءِ سر ءَ اُرش کنوکانی کساس دو بیتگ اَنت کہ پسھی اُرش ءُ کشگ بیتگ اَنت-

ترکی ءِ وزیر داکلہ ءَ شَک ءِ سر ءَ گوشتگ کہ ھمے داب ءَ اُرش بیتگ کہ اے رنگیں اُرش کردستان ورکرز پاٹی ءِ باسکاں کتگ- چُشکہ اُرشکارانی پجار ءُ چم دیستگانی یکجاہ کنگ ءَ پد گیشیں گپ دیم ءَ آرگ بنت اِنت-

ترکی گیشتت شام ءُ عراق ءِ ھما جاھاں نشانگ کنگ اِنت آیانی بارو ءَ آئی ءِ گمان اِنت آ کردستان وکرز پاٹی یا PKK ءَ گوں بندوک اَنت-

پی کے کے یک کرد آجوئی لوٹوکیں گلے کہ آئی ءِ بنیاد نوزدہ سد ءُ ھشتاد ءِ دھک ءَ ترکی ءِ ھلاپ ءَ گھگیری کنگ ءَ انت ءُ اے جیڑہ ءَ تنی وھدی ھزارانی مردم مرتگ اَنت-

ترکی ءِ سروک رجب طیب ایردوان اے وھد ءَ برکس سروکی ءِ نیاد ءَ روس ءِ شھر کازان ءَ جاڑیگ انت کہ اود ءَ یک درشانے ءَ آئی ءَ اُرش ایر جتگ-

امریکہ،نیٹو ءُ یورپی یونین ءَ ترکی ءِ پھریزی بنجل ءِ سر ءَ اُرش ایر جتگ-