TBP Balochi

بلوچستان ءِ بنجاھی شھر شال ءَ ریڈزون پچ کنگ ءَ پد مروچی دوبر بند کنگ بیتگ اَنت-

شال پولیس ءِ یک کارندھے ءِ رد ءَ ریڈزون ءِ بندش دوبر گوستگیں شپ ءَ بیتگ –

انتزامیہ ءَ گوستگیں ھشت روچاں بند بیتگیں ریڈزون مھلوک ءِ واستا پچ کتگ ات بلے مروچی پد ءَ پورسز ءِ بازیں کارندہ اتکگ ءُ دگ اش بند کتگ-

زانگ بہ بیت بلوچستان ءِ تیابدپی شھر گوادر ءَ بیست ءُ ھشت جولائی ءَ برجم دارگ بیوکیں بلوچ راجی مچی ءِ سر ءَ سرکار ءِ کریک ڈاؤن ءَ پد اے دومی رند انت ریڈ زون بند کنگ بوگ ءَ اِنت-

ایشی ءَ ابید بلوچستان ءِ دگہ بنجاھی شھدگ بازیں روچاں چہ سرکار ءِ نیمگ ءَ کنیٹر ایر کنگ ءُ بند بیتگ انت ءُ اود ءَ گوادر ءَ روکیں دگ یکشل ءَ بند اَنت-

گوستگین روچ ءَ آدینگ ءِ نماز ءِ حطبہ ءِ وھد ءَ روکپتی بلوچستان ءِ بازیں عالم دیناں ماں گوادر ءَ راجی مُچی ءِ سر ءَ پاکستانی پوج ءِ زوراکی ایر جتگ اَنت-

آیاں گوشتگ پاکستان وتی ھوش ءَ سر ءَ بہ کنت ءُ بچار ایت کہ اے زالبولاں چی گون اِنت کہ آیانی سر ءَ تیرگواری کتگ ءُ جتگ انت-

آیاں گوشتگ پاکستان ءِ ملا غزہ غزہ کن انت ءُ آیانی زُلمانی ھلاپ ءَ روانک کش انت بلے اے جاہ ءَ غزہ ءِ پیم ءَ بلوچانی گون ءَ زُلم بوگ ءَ انت پرچا آ بے توار اَنت-

آیاں چہ پاکستان ءِ سرکار ءَ ھوار ایران ءِ دولت ءَ لوٹ کتگ آ پاکستان ءَ بہ گوش ایت ءُ بلوچانی سر ءَ زُلم ءُ زوراکیاں بند بہ کنت-

مروچی اچ نوشکی ءَ بلوچ یکجھتی کمیٹی نوشکی ءِ نیمگ ءَ پرایمنین روانک ءِ سر ءَ پاکستانی پوج ءِ تیرگواری ءَ یک ورنایے بیران بیتگ ات کہ اے وئیل ءِ ھلاپ ءَ زھرشانی گیش ترند بیتگ ءُ مزن شھدگ این 40 اسٹیشن کلم چوک ءَ زھرشانی نندانک دیگ بیتگ ءُ مھلوک ءَ ھر ڈولین رپت ءُ آمد بند کتگ اَنت-

نوشکی ءَ وئیل ھما وھد ءَ پیش اتکگ کہ بلوچستان ءَ پوج ءِ نیمگ ءَ بیوکیں زوراکیانی ھلاپ ءَ یک روانکے کشگ بوگ ءَ بیتگ انت کہ اود ءَ پوج ءِ تیرگواری ءَ ھمدان ء مرھوم عبداللہ بیران بیتگ ات ءُ دگہ دو کس سک ٹپیگ بیتگ انت-

زانگ بہ بیت گوستگیں شش روچاں گوادر ءَ راجی مُچی ءِ نام ءَ بلوچ یکجھتی کمیٹی ءِ زھرشانی نندانک برجاہ انت ءُ ھمے ڈول تلار، مستونگ، چاگی ءُ بلوچستان ءِ دگہ جاھاں پر ایمین زھرشانی کنوکانی سر ءَ پوج ءَ زوراکی کتگ انت-

جارکش ءَ گوشتگ زامران ءُ پنجگور ءَ سے جتائیں کاراں کشندہ ٹولی، لشکر ءِ راشن ءُ ٹاور نشانگ کُتگ اَنت۔

آئی ءَ گوشتگ مرچی سُھب ءَ ناگ زامران ءَ سرمچاراں راہ بستگ ءُ زورگریں پاکستانی لشکر ءِ راشن بروکیں گاڑی راشناں ھوار دستیگ کُرتگ ءُ ڈرائیور بلوچ بیگ ءِ بنیاد ءَ یل داتگ۔

گوھرام بلوچ ءَ گوشتگ یک کارے ءَ سرمچاراں دوشی شپ ءِ ھشت ءُ نیم ءَ ڈمبان زامران ءَ زورگریں پاکستانی لشکر ءِ دامگ سرویس دیگ ءَ بیتگیں ٹاور نشانگ کُرتگ ءُ تباہ کُرتگ۔

جارکش ءَ گوشتگ دگہ یک کارے سرمچاراں 26 جولائی ءِ شپ ءِ ھشت ءَ پنجگور شھر ءَ چتکان گریب آباد ءَ تیرگْواری کُرتگ ءُ کشندہ ٹولی ءِ کارمند لتیپ ء جلیل ءُ امان اللہ ء ھسین کُشتگ اَنت ءُ آسپ ء دلمراد ٹپی بیتگ۔ مُرتگ ءُ ٹپی بیتگیں کشندہ ٹولی ءِ کارمند ایم آئی ءُ آئی ایس آئی ءِ جوڑ کنگ بیتگیں پرید ٹولی ءَ ھوار بیتگ اَنت ءُ آئی ءِ نزیکیں مردم بیتگ اَنت۔

آئی ءَ گوشتگ باپاری مردماں کڈن کنت کہ آ ریاست ءِ کمک ءَ یل بہ کن اَنت اگاں باپاری ءُ ڈرائیورانی روِشت ھمے وڑ ءَ برجاہ بوت اَنت گڑا وتی تاوان ءِ زمہ وار وت اَنت۔

جارکش ءَ گوشتگ بی ایل ایف ھما دُرسیں مردماں تچکی گْوشگ لوٹ ایت کہ ھرکس ریاست ءِ لوٹ ءُ واھگانے پد ءَ سرمچارانی چاریگی ءُ لس مردماں دلسیاہ کنگ ءَ اَنت، ما آیاں موہ دئیں کہ ریاست ءِ کاراں گستاہ بہ بنت اگاں نہ پہ وتی آسر ءِ سر بیگ ءَ جاڑیگ بہ باں۔

گوھرام بلوچ ءَ گوشتگ گل ءِ اھوتی ٹولی ریاست ءُ ریاست ءِ کمکارانی سر ءَ چم سَک داتگ اَنت ءُ بلوچستان ءَ ھرچ کجا بیتگیں وئیل ءُ جاور چہ اھوتی ٹولی ءَ اندیم نہ اَنت۔

جارکش ءَ گوشتگ بی ایل ایف سئیں کارانی زمہ واری ءَ منّ ایت ءُ دیمتر ءَ گوں تُرندی ءَ اُرشانی برجاہ دارگ ءِ کول ءَ کنت۔

کراچی پولیس ءَ بلوچستان ءَ برجاھیں ریاستی زوراکی ءِ بگیری ءَ زھرشانی ءَ نامی ئیں انسانی ھکانی زالبولیں باسک ءَ ھوار بازیں مردمے دزگیر کنگ بیتگ-

بلوچ یکجھتی کمیٹی ءِ نیمگ ءَ چہ برجم دارگ بیتگیں بلوچ راجی مچی سر ءَ ریاستی پوج ءِ اُرشاں، زھرشانی کنوکانی سر ءَ لَٹ کُٹ ءُ دزگیریانی بگیری ءَ کراچی آرٹس کونسل دیم ءَ زھرشانی ءِ جار جنگ. بیتگ چریشی ءَ بلوچ باسکاں ھوار بازیں انسانی ھکانی باسک ھوار بیتگ اَنت-

بلوچ یکجھتی کمیٹی کراچی پریس کلب دیم زھرشانی ءَ سندھ پولیس ءَ انگر ءَ کتگ دوازدہ نزیک ءَ زالبول ءُ مردین زھرشانی کنوک دزگیر کتگ اَنت-

کراچی ءَ دزگیر کنگ بیتگیں نامی ئیں انسانی ھکانی باسک پروپیسر ندا کرمانی ءَ ھوار بازیں بلوچ زالبول ءُ بلوچ یکجھتی کمیٹی ءِ باسک ءُ راھشون فوزیہ ھوار اَنت کہ آ پولیس تھانہ ءَ برگ بیتگ اَنت-

پاکستانی پوج ءَ بلوچ راجی مچی ءِ چن لانچاں دلگوش کراچی ءَ ھوار چہ شال ءَ مُچی ءَ ھواریں مردم آوار جتگ ءُ ناشناسیں جاھے ءَ برتگ اَنت کہ آیانی تہ ءَ بلوچ یکجھتی کمیٹی ءُ بی ایس او ءِ باسک انگت دیم ءَ آرگ نہ بیتگ اَنت-

پاکستانی پوج ءِ دست ءَ مچی ءَ دو روچ ساری کراچی پولیس ءَ یک لوگے ءِ سر ءَ بیڑبرتگ بلوچ یکجھتی کمیٹی کراچی ءِ زمہ وار بالاچ بلوچ لَٹ کُٹ کنگ ءَ پد وتی ھمراھی ءَ برتگ، یک ھپتگے ءَ گوزگ ءَ اَبید بالاچ بلوچ دیم ءَ آرگ نہ بیتگ-

بالاچ بلوچ ءِ چہ کراچی آوار جنی درگت ءَ بلوچ یکجھتی کمیٹی ءَ گْوشتگ کہ بالاچ بلوچ گوادر مچی ءِ انتزامیہ کارانی سوب ءَ چہ پولیس ءُ سادگیں پوشکانی تہ ءِ چیریں ادارھانی کارمنداں آوار جتگ چریشی ءَ پد بالاچ درگت ءَ چہ آئی ءِ کھول ءُ بی وائی سی ءَ ھچ وڑیں سرپدی دیگ نہ بیتگ-

دومی نیمگ ءَ چہ گوادر مُچی ءَ دو روچ ءَ ساری پاکستانی پوج ءِ مزنیں کچے ءَ شال ءِ یک ھندے ءَ بیڑبرتگ بلوچ اسٹوڈنٹس آرگنائزیشن ءِ یک ٹولی ءِ چیئرمین جیئند بلوچ ءُ آئی ءِ سنگت شیرباز آوار جتگ ءَ ناشناسیں جاھے ءَ برتگ اَنت-

اے درگت ءَ چہ جیئند بلوچ ءِ لوگ بانُک رضوانہ بلوچ ءَ گْوشتگ کہ آئی ءِ لوگ واجہ گوادر ءَ برجمیں مچی ءِ چن ءُ لانچانی سوب ءَ آوار جنگ بیتگ کہ آ ھما روچ ءَ چہ بیگواہ ءَ اِنت دیم ءَ آرگ نہ بیتگ-

گوادر بلوچ یکجھتی کمیٹی ءِ راجی مچی سوب ءَ تاں انو درزنانی مردم آوار جنگ بیتگ اَنت کہ آیانی تہ ءَ بازینے ھچ وڑیں آمیدگس ءُ پولیس تھانہ ءَ آرگ بیتگ اَنت-

بلوچ یکجھتی کمیٹی ءِ رِد ءَ ریاستی پوج نیمگ ءَ چہ آیانی گوادر ءِ مچی ءِ نزور کنگ جُھد کتگ تاں انو یک ھزار ءَ گیش سنگت ءُ زھرشانی کنوکاں دزگیر کنگ بیتگ اَنت وھدے کہ اے دزگیریاں بازیں اوتاکانی درگت ءَ ھچ وڑیں سرپدی دیگ بیگ ءَ نہ اِنت-

ڈاکٹر ماہ رنگ بلوچ ءَ شنگ کتگیں درشان ءِ تہ ءَ گْوشتگ کہ من اد ءَ یک گچینیں گپے درسانی دیم ءَ تچک کنگ لوٹ آں کہ ھما مردم گوشگ ءَ اَنت کہ بلوچ راجی مچی ءَ شھید بیتگیں بلوچ پُسگانی ھونانی نھاد ءَ بگر اِت،ما آیاں گوں تچکیں لبزاں گوشگ لوٹ ایں کہ مئے شھیدانی ھون اینچو ارزان نہ اَنت کہ ما وتی شھیدانی ھونانی نھاد ءَ بہ زور ایں ءُ نانکہ ما نھاد زوریں بلوچ راجی شھیدانی کمشرپی ءَ کن ایں- مئے راجی شھیدانی نھاد اے گھگیری ءِ جُھد ءُ مئے راجی منزل اِنت – ما ناں بلوچ راجی مچی ءَ شھید بیتگیں وتی پُسگانی نھاد ءَ زوریں نانکہ دگہ کسے ءَ زورگ ءَ کلّ ایں- مئے راجی شھیدانی ھونانی بیر پنچ دہ لکّ کلدار اناں بلکیں جُھد یکشل ءَ، گھگیری جُھد، راجی یکجاھی ءُ راجی مِنزل اِنت-

آئی ءَ گْوشتگ کہ وھدے کہ اشی ءَ اَبید بلوچ راجی مچی ءِ کاروان ءَ ٹپی بیتگیں سنگتانی الاج ھاتر ءَ ھم ما اے ریاست ءَ نھاد لوٹ نہ کن ایں بلکیں پہ اشی ءَ ما وت وتی کُمک ءَ چہ دْراھیں ٹپی ئیں سنگتانی الاج ءَ کن ایں – اگاں اشی ءِ واستا مارا لوگ لوگ ءَ چندہ کنگ بہ کپ اِیت ما کن ایں بلے اے ریاست ءَ چہ ھچ وڑ ھم نھاد نہ زور ایں ءُ پدر کن ایں کہ بلوچ یک زندگیں ءُ یک دلیریں راجے-

ماہ رنگ بلوچ ءَ گْوشتگ کہ بلوچاں اے جُھد یک اوپار ءُ دْراجکشیں جُھدے، چریشی ءِ ھاتر ءَ جُھد یکشل ءَ اژدری اِنت ءُ اشی ءِ تہ سوبمندی مھکمیں جزبگ ءُ دیمونی ءَ چہ سریچیں جزبگانی بیت- مارا ستک اِنت کہ ھرچ گام ءَ اے ریاست ءَ گوں دیم پہ دیم بہ ایں ءُ اے جُھد ءَ دیم ءَ بر ایں ءُ سوب مئے بیت-

پرایمیں زھرشانی ءِ سر ءَ پوج ءِ نیمگ ءَ کریک ڈاؤن ءَ پد بلوچستان ءَ زھرشانی گیش ترند بیتگ اَنت، بازیں مزنیں شھدگ بند اَنت-

بلوچستان ءَ سرکار ءُ پوج ءِ ھلاپ ءَ یکشلیں زھرشانی گیش بوگ ءِ سبب ءَ اے وھد ءَ واپاری اوشت ءِ آماچ اَنت-

اُستانی سرکار، پاکستانی پوج ءُ بلوچ یکجھتی کمیٹی ءِ مُچی ءَ بھر زیروک ھما وھد ءَ برانز گپتگ اَنت کہ واکداراں یک پرایمنیں زھرشانی ءِ ھلاپ ءَ تاکت کارمرد کنگ بندات کتگ بیتگ –

بلوچ یکجھتی کمیٹی ءِ رد ءَ پولیس ءُ نیم پوجی ادارہ کہ فرنٹیئر کور ءَ کریک ڈاؤن ءِ وھد ءَ گوادر ءَ بلوچ راجی مُچی ءِ بھر زیرگ ءِ واستا بازیں کچے ءَ مردم دزگیر ءُ لٹ ءُ کُٹ کتگ اَنت ءُ بازینے زدگ کتگ انت-

شش روچاں برجاھیں اے زھرشانی ءِ جار بلوچ یکجھتی کمیٹی ءِ نیمگ ءَ دیگ بیتگ ءُ بی وائی سی ءِ لوٹانی توک ءَ پُر ایمنیں مُچی ءِ ھلاپ ءَ تاکت ءِ کارمرد ءُ دزگیر کتگیں مردمانی یلوی انت-

زھرشانیانی سبب ءَ بنجاھی شھر شال ءَ ھوار بلوچستان ءِ بازیں گچینی دگ بند اَنت –

ھمے وھد ءَ زھرشانی کنوکاں گچینی شھدگاں ریل ءِ ٹریکس ھم بلاک کتگ – کہ ایشانی توک ءَ بلوچستان ءِ ھمساھگین ڈیھ ایران ءُ اوگانستان ءِ ھوار کنوکیں دگ ھوار اَنت- چریشی ءِ سبب ءَ واپار ءُ سپر ءِ روانی اوشت ءِ آماچ اَنت ایشانی توک ءَ ساز ءُ سامان، روک ءُ آیوکیں مھلوک، سیمسراں اوشت ءِ آماچ اَنت ءُ چریشی ءَ میان اُستمان ءِ واپار ھم بازیں کچے ءَ سانمند اِنت-

بی وائی سی ءَ سرکار بیھار داتگ ءُ گوشتگ اگاں سرکار ءَ پر ایمنیں زھرشانی ءِ سر ءَ تاکت ءِ کارمرد برجاہ داشت گڑا وتی زھرشانیاں گیش ترند کن ایں ءُ گمان ھست سرجمیں بلوچستان بند کنگ بیت اِنت-

بلوچ یکجھتی کمیٹی ءَ سرکار ءِ دیم ءَ وتی دراھیں لوٹ پیش کتگ اَنت کہ آیانی توک ءَ دراھیں راھانی پچ کنگ ءُ آیانی گپتگیں ھمراھانی یل کنگ ھوار اَنت-

انسانی ھکانی گل، ایمنسٹی انٹرنیشنل، ھیومین رائٹس واچ ءَ ھوار دگہ گلاں ریاست ءَ را پر ایمنیں رھرشانیانی سر ءَ تاکت ءِ زور، زھرشانی کنوکانی سر ءَ اُرش ءُ دزگیری ایر جتگ اَنت ءُ لوٹ کتگ کک سرکار پر ایمنیں زھرشانی کنوکانی سر ءَ تاکت ءِ زور ءَ بہ دار ایت ءُ شھراں انٹرنیٹ ءُ موبائل سروس ءَ پچ بہ کنت اِنت-

راجی مُچّی ءِ ارزشت ءُ ￶وھد ءِ ￵لوٹ

نبشتہ کار: دروشم بلوچ

دی بلوچستان پوسٹ

مُچّی ، زھرشانی ءُ ￶نِنداک گُلامین ءُ ￶ پدمنتگیں راجانی مزاھمت بزاں گھگیری ءِ ￵چیدگ اَنت ءُ ￶بھر اَنت ،
کہ اِشانی سبوب ءَ ￴گلامیں راج وتی توار ءُ ￶وتی گلامی ءُ ￶چُکچینی ءُ اِستان ءِ ￵زوراکیانی ￵بابت ءَ ￴سرجمیں دنیا ءَ ￴ سرپدی دنت ءُ ￶پہ وتی ھکّ ءِ ￵واستا جُنز ءَ ￴دیم ءَ بر اَنت ، اگاں ما گوست ءَ بچاریں داں ھپتاد سال پیسر اوں بلوچ جھد کنان اِنت ءُ پیداک اِنت ھرچ ھما زوراکی ءِ ￵ھلاپ ءَ ￴ اوشتاتگ کہ آھی ءَ ￴بلوچ زمین ءُ بلوچ راج گلام دارگ ءِ ￵جھد کُتگ ، گُڑا ما گندیں انّوگیں تھریک کہ بلوچ چُکچینی ءِ ￵ھلاپ ءَ ￴ما ” راجی مُچّی “ ءِ نام ءَ ￴گْوادر جُنزینگ بوتگ اِد ءَ ما وتی مردمانی جزبگ وتی مردمانی کربانی ءُ ￶دیمونی ءُ ￶زوراکیانی ھلاپ ءَ ￴ اوشتگ ما دیست کہ چو کوہ ءِ زالمیں اِستان ءِ ￵دیم ءَ اوشتاتگ اَنت-

نو اِد ءَ ما دیست کہ اِستان بزاں زوراک ءِ ￵ردّ ء امل چے اَت بچار یک ھبرے تچک اِنت کہ آجوئی جُنزانی توک ءَ ￴پُرشت ءُ ￶پُروش ، کُشت ءُ کوش ءُ ￶لاشانی کوپگ دیگ نوکیں گپّے￷ نہ اِنت ، دنیا ءِ ￵جُنزانی توک ءَ ￴ما بچاریں ھم ھمے رَنگ ءَ ￴اے درچ یکشل ءَ برجاہ اِنت بلے ما دیست کہ اِستان ھمے راجی مُچّی ءَ ￴چہ چینچو نپسیاتی بیمار جوڑ کُتگ کہ آ ھچبر نہ لوٹ ایت کہ بلوچ یکمُشت بہ بیت ءُ یک پتّرے ءِ سر ءَ وتی زمین ءَ پَد بِجنت-

ھمے واستا آئی ءَ ￴گِپتگ ءُ ￶مئے￷ مردمانی سر ءَ تیرگواری کُت دنیا ءِ دیم ءَ دروگیں پندل سازایت کہ راجی مُچّی بزاں راج ءَ ￴یک بویگ ءَ ￴چہ من بداراں تُپنگ ءِ ￵زور ءَ ءُ ￶زور بیگواھی ءَ تُرس ءِ ￵زور ءَ نوں اِد ءَ مئے￷ پَدمنتگیں راج ءِ ￵سر ءَ کار دار ایت کہ آ چوں وتی راجی کاز ءِ ￵گوماں ایماندار بیت ءُ ￶ وتی جھد ءِ گوما ھمراداری کنت ، زوراک ءِ ￵ھلاپ ءَ ￴مدام راج ءَ یک پلیٹ پارمے ءِ سر ءَ اوشتارینگ ، آیانی مجگ ءَ ￴سیاسی شئور ءِ ￵نادینگ ءُ ￶ھر ساھت وتی راج ءِ ￵سرپد کنگ کہ تو گلام ئے ￵ترا گلامی ءِ ￵ھلاپ ءَ کار کَنگی اِنت اے مئے￷ زمہ واری بنت ، گُڑا بیا اِت اِستان ءَ ￴ھما پالیسی کہ بلوچ ءِ ￵پروش دیگ ءِ ￵واستا جوڑکُتگ اَنت آیاں پُروش دیں ءُ ￶یکجاھی ءِ ￵پالیسی ءَ کاریں ءُ ￶وتی توک ءَ جاہ دے ایں گُڑا مئے￷ جھد وتی گُڈّی سیمسراں سر بیت ءُ ￶ایردستی ءِ ￵ھونی اِیں پَنجگ مئے￷ سر ءَ پہ مدامی گار بنت ۔ بلوچ راج تپاک بات۔ بلوچستان آجو بات۔

بلوچ لبریشن آرمی ءِ جند ءِ رسانکدر چینل ھکل ءَ چل ءُ دو ملٹ ءِ تہ ءِ یک دْراجیں تامُرے ءِ تہ ءَ بی ایل اے جنگولاں گچینی ھیلکاری ءِ تہ ءَ گندگ بنت-

ھائی ریزولوشن ( 4K) ءَ شنگ بیتگیں اے تامُر ءَ سر ماونٹڈ ، ڈرون ءُ دگہ کیمرہ ءَ بے کساس کارمرز کنگ بیتگ- ھمے وڑ نوکیں کیمرہ کارمرز اشی ءَ ساری بی ایل اے ءِ آپریشن درہِ بولان ءِ چن ءُ لانچ ءِ ھد ءَ ٹریننگ ءَ گندگ اَتکگ اَنت-

اے اُرش بولان ءِ ھمگرنچ ءِ دمگ سبی ءِ ھند سانگان ءَ پاکستانی پوج ءِ یک بُنجلے ءَ کنگ بیتگ-

آشوبی سوت ءِ ھمراھی ءَ بندات بیتگیں تامُر ءَ گندگ ءَ کئیت کہ بی ایل اے ءِ سرمچارانی یک ٹولی یے پاکستانی پوج ءِ بُنجل ءِ یک نیمگے ءَ اُرش کنگی بیتگ وھدے کہ دگہ ٹولی یے دومی نیمگ ءَ چہ بُنجل سر ءَ اُرش کن اَنت اے میان ءَ سرمچار یک کورے ءِ گوازینگ ءَ اَنت چو ڈرامھانی دروشم ءَ بی ایل اے سرمچار ءُ سنگر ءَ ساڑی ئیں پاکستانی پوج کارندہ تچکی ءَ یک دومی ءَ تیرگواری کن اَنت-

بی ایل اے ءِ ھاسیں ٹولی پاکستانی پوج ءِ سنگرانی نزیک ءَ سر بنت راکٹ ءُ دگہ سلاھاں چہ آیاں سک تاوان دے اَنت ھمے میان ءَ پوج ءِ یک سنگرے ءَ آس چست بیگ ءَ گندگ کئیت-

اے اُرش ءَ بی ایل اے ءِ سیمی پھازی ٹولی ءِ توار ھم واکی ٹاکی ءَ اش کمگ بیتگ چریشی ءَ آ نزیکیں بُنجل ءِ سر پُراں گوشگ ءَ اَنت بلے پاکستان پوج واستا ھچ وڑیں کمک سر نہ بیت-

اُرش ءِ وھد ءَ پاکستانی پوج کارمنداں وتی سنگراں یل کن اَنت تچگ ءَ گندگ کاینت-

گڈی ءَ شپ وھد ءَ بلوچ سرمچار بُنجل ءِ دستیگ کنگ ءَ سوبمند بنت پد ءَ ندارگ پیشدارگ بیت کہ پاکستانی پوج کارمنداں اے بُنجل ھالیگ کتگ کہ اود ءَ بی ایل اے ءِ سرمچاراں بلوچستان بیرک ءَ منڈگ ءَ اَنت وھدے کہ دگہ گیش گندگ بیت کہ نزیکیں برجاھیں بُنجاھی بُنجل ءَ ھم پاکستانی پوج اُرشاں ھالیگ کن اَنت-

تامُر تہ ءَ گوشگ بیتگ کہ دستیگ کنگ بیتگیں پاکستانی پوج ءِ بُنجاھی بُنجل نو سرمچارانی ٹرینگ ھاتر ءَ کارمرزی اِنت-

جوڑ کنگ بیتگیں اے تامُر ءَ بی ایل اے ءِ ھاسیں ٹولی ءَ یک گرانیں پوجی سنگرانی سر ءَ بیڑبر اَنت سر ماونٹڈ کیمرہ ، ڈرون، آر پی جی، دستی بمب، ایم شانزدہ، ایم 4 ، کلاشنکوف ءُ بازیں جزبگ ءَ دلیری ءَ پیشدارگ ءَ اَنت-

اے تامُر پیشدار اِیت بلوچ سلاہ بندیں آجوئی لوٹوکیں سلاہ بندیں گل بلوچ لبریشن آرمی تھنا وتی جنگی رپکاں ناں بلکیں گل جتاجتائیں پڑاں روچ پہ روچ تُرندی آرگ ءَ اِنت-

بلوچ لبریشن آرمی گوستگیں شش ماہ ءَ بلوچ لبریشن آرمی ءِ سرمچار چل سے دمگاں نود پنچ اُرش کتگ-

رپورٹس رِد ءَ بیڑ ءَ پاکستان پوج ءِ دوسد پنجاہ سے کارمند مرتگ، سد ٹپی وھدے کہ بیست ءَ نزیک ءَ سلاہ دستیگ کتگ اُرشاں سی نُھ دزگیری ھم پدر کتگ اَنت -شش ماھانی میان ءَ بی ایل اے ءَ پاکستانی پوج پنچ بُنجل دستیگ کتگ اَنت-