TBP Balochi

بلوچستان ءِ تیابدپی شھر گوادر ءَ چاردہ اگست ءِ مراگشانی سر ءَ ناشناساں بمب چگل داتگ انت-

مراگش تیابدپی شھر ءِ ھند پسنی ءُ جیونی ءَ نشانگ کنگ بیتگ اَنت-

دمگی مردمانی پسنی ءِ دمگ ببر شور ءَ اسکول ءَ برجاھیں چاردہ اگست ءِ مراگش مروچی سھب ءِ ساھت دَہ ءَ نشانگ کنگ بیتگ ءُ بلے دگہ تاوانانی ھال نہ بیتگ اَنت-

تراک ءَ پد مھلوک شنگ ءُ شانگ بیتگ اَنت ءَ مراگش ھلاس بوتگ –

دومی نیمگ ءَ جیونی ءَ یک تراکے ءِ اھوال انت کہ اود ءَ ھائی اسکول نشانگ کنگ بیتگ-

ھمے ڈول گوادر ءِ دمگ پانوان ءَ ھم واکداراں شوروانی گرگ ءِ ٹاہ داتگ-

بلے داں انگت ءَ اے وئیلانی زمہ واری ھچ کس ءَ پہ وت نہ زرتگ انت- ءُ گوستگیں روچ ءَ شال ءَ دو وئیلانی زمہ واری بلوچ لبریشن آرمی ءَ زرتگ ات اَنت-

بی ایل اے ءِ شنگ کتگیں درشان ءَ گوشگ بیتگ کہ ما اے گپ ءَ تچک کن ایں کہ زورگریں پاکستان ءِ چیردستی ءَ وتگڑیں آجوئی ءِ مراگش مئے نشانگ ءَ اَنت زورگریں پوج کروڑانی زر ھرچ کنت ءُ اے دابیں مراگش جوڑینت ءُ بلوچستان ءَ تاکت ءِ زور ءَ وتی بھر سرپد بیت انت بلے زمین ءِ جاورھالانی چپ اِنت اے مراگشاں اے دروشم دیگ بیت اِنت بلوچ پاکستان بھر انت بلے راستی چوش نہ اِنت-

پنجگور ءَ پاکستانی لشکر ءِ سر ءَ سلاہ بندیں مردمانی اُرش، ھزدار ءَ سرکار ءِ کمک داریں یک مردمے ءِ لوگ ءِ سر ءَ تراک –

بلوچستان ءِ دمگ پنجگور ءَ پاکستانی لشکر ءِ بنجل ناشناسیں مردماں نشانگ جوڑ کتگ ۔

فورسز ءِ بنجل گوستگیں شپ ءَ پروم کلگ کور ءِ ھند ءَ نشانگ جوڑ کنگ بوتگ۔

اھولانی رد ءَ اُرش ءِ وھد ءَ دمگ ءَ دیراں چہ تراک ءُ تیرگواری ءِ توار گوشدارگ بوتگ اَنت ۔ بلے انگت ءَ تاوانانی بابت ءَ واکدارانی بنگپ پدر نہ بوتگ۔

زانگ بہ بیت کہ پنجگور ءِ اے دومی وئیل انت۔

مرچی سھب ءَ ھزدار ءِ شھر ءَ دزبمب اُرشے یونس محمد شھی ءِ بنجل نشانگ کنگ بیتگ ۔ دمگی وسیلگ ءِ رد ءَ اے مردم ءِ سیادی گوں سرکار ءِ کمک ءَ سلاہ بندیں گل ڈیتھ اسکواڈ ءَ اِنت۔

انگت ءَ کس ءَ اے وئیلانی زمہ واری نہ من اِتگ۔

روکپتی بلوچستان ءِ دو جتا جتائیں جاھاں سیادی داروکیں مردم پاھو ءِ ھکم دیگ بیتگ اَنت-

گیشیں اھوالانی رد ءَ چہ ھاش ءَ سیادی داروکیں یک مردمے ماں کرمان ءِ زندان ءَ پاھو دیگ ءِ ھکم نامہ دیگ بیتگ-

اھوالانی رد ءَ اے زندانی ءِ پجار فرج اللہ ھاشی ء برکت جھمنند ھاش ءِ نام ءَ زانگ بیتگ-

اھوالانی رد ءَ فرج اللہ ایرانی ھال چاردہ سد ءُ یک ءَ ماں کرمان ءَ درمانانی برگ ءِ وھد ءَ گرگ بیتگ ءُ پد ءَ آئی ءِ سر ءَ نشہ واپاری ءِ بھتام جنگ بیتگ-

ایرانی آمیدگس ءَ فرج اللہ ءِ سر ءَ بھتامانی بندگ ءِ پژدر ءَ آئی ءِ سر ءَ پاھو ءِ ھکم داتگ بلے فرج اللہ ءَ وتی سر ءَ جتگیں بھتام رد کتگ انت –

آئی ءِ کیس اے وھد ءَ ماں کرمان ءَ چلگ ءَ اِنت ءُ آئی ءِ سر ءَ پاھو ءِ ھکم اتکگ-

ھمے ڈول ءَ چہ سراوان بم ءَ زاھدان ءِ جھمنندیں بندیگے ءِ سر ءَ ھم پاھو دیگ ءِ ھکم اتکگ –

آئی ءِ پجار ھامد شاہ بخشزئی ء اکبر جھمنند کورین زاھدان ءِ نام ءَ زانگ بیتگ-

زانگ بہ بیت سال دو ھزار ءُ بیست ءُ چار ءِ بنداتی شش ماھانی توک ءَ داں انگت ءَ ایرانی آمیدگس ءَ روکپتی بلوچستان ءَ بندوکیں سِی ءُ چار بلوچ پاھو داتگ اَنت-

اے پاھو دیگ بیتگیں مردمانی تہ ءَ دو زالبول ھم ھوار اِنت ءُ ایشانی توک ءُ بیست ءُ ھپت کس نشہ واپاری ءِ پژدر ءَ ءُ ھپت کس کوشانی بھتام ءَ پاھو ءِ دار ءَ درنجگ بیتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گل گوستگیں روچ ءَ مستونگ ءَ ڈپٹی کمشنر پنجگور ذاکر بلوچ ءِ سر ءَ بیتگیں اُرش ءَ ھچ وڑ سیادی نہ دار اِیت۔ ذاکر بلوچ ھچبر بی ایل اے ءِ ھِٹ لسٹ ءِ تہ ءَ نہ بیتگ۔

آئی ءَ گْوشتگ کہ زورگریں پاکستانی پوج ءُ بلوچستان ءَ آیانی بُتیں سرکار مدام پروپگنڈہ کن انت اے وئیل ءَ گوں بلوچ لبریشن آرمی ءَ ھمگرنچ کنگ ءِ جُھد ءَ اَنت ۔ کہ مئے گل ایشی ءَ رد کنت۔

جارکش ءَ گْوشتگ کہ بلوچ لبریشن ، اھوالکار ءُ گلانی سر ءَ اے درشان ءَ چہ پدّر کنت کہ بی ایل اے ءِ مول ءُ مراد پدّر اَنت ءُ اے مول ءُ مرادانی درگت ءَ مئے پالیسی بے بژنی اِنت۔ کہ گل ءِ نیمگ ءَ کجام ھم اُرش ءَ پد بی ایل اے اے اُرش ءَ گوں پھرشانی ءَ منّ اِیت۔ پمیشکا دانکہ گل کجام ھم وئیل یا اُرش بی ایل اے ءِ جارکش نیمگ ءَ گل جند ءِ چینل ءَ منّگ بیت – اے اُرشاں بی ایل اے ءَ ھچ وڑیں سیادی نیست بلکیں ایش ھم الّمی نہ اِنت گل گوں اشاں تپاک بہ بیت-

آئی ءَ گوشتگ کہ دروگ بندگ ءُ ریاکاری لگوریں زورگریں پاکستانی پوج ءِ میار بوتگ، ایشی ءِ سر ءَ بلوچ لبریشن آرمی بُرزیں آشوبی اکلاکی رھبندانی سر ءَ یک بندوکیں گلے کہ بلوچ راج ءَ وتی وس ءُ واک ءِ آدینک لیکان ءَ ، بلوچ راجی آجوئی ءِ پاکیں جُنز ءِ زورگریں پوج ءِ بگیری ءَ دلگوش اِنت ءَ ، ءُ اے راجی آجوئی ءِ جنگ ءَ ھرچ مردمے یا ادارھے کہ گوں بلوچ مُچی مپادانی بگیر داری بہ بیت گڑا گل ھمے رنگیں ادارہ ءُ مردماں گوں سرجمیں زمہ واری ءَ نشانگ جوڑ کنت ءُ دانکہ ھرچ وئیل ءَ ذمہ واری بی ایل اے نہ منّ اِیت گُڑا اے وئیل ءَ چہ بی ایل اے ھچ وڑیں سیادی ندار اِیت-

بلوچستان ءِ دمگ آواران ءَ پاکستانی پوج ءَ لَس مھلوک سر ءَ تیرگواری کتگ استاد کُشتگ-

تیرگواری ءِ وئیل آواران ءِ دمگ مالار ءِ ھند ءَ بیتگ وھدے کہ بیران بیتگیں وانگجاہ استاد پجّار عبدالخالق دوست محمد نام ءَ چہ بیتگ-

بی این ایم ءِ انسانی ھکانی ادارہ پانک ءَ وئیل راست کتگ گْوشتگ کہ اے وڑیں وئیل انسانی ھکانی بگیری اِنت ءُ اشی ءِ زوت جُست کنگ بہ بیت- ما پاکستانی واکدار ءَ زور دے ایں کہ آ شھریانی پھازگ ءَ باور بہ کنائین اِیت ءُ میان اوستمانی کانودانی پاسداری ءَ بکنت-

زانگ بہ بیت دو روچانی میان ءَ اے دومی وئیل اِنت اشی ءَ ساری گوستگیں روچاں پاکستانی پوج ءَ کولواہ ءِ دمگ ڈنڈار ءَ تیرگواری کتگ پنچ سالی ئیں ستارہ ء بشیر احمد کشتگ-

شال ءَ پاکستانی آجوئی شاتکامی ءِ بُنجاھی مراگش سر ءَ بمب اُرش ءِ ھال-

نوکیں ھالانی رِد ءَ نواب بگٹی اسٹیڈیم ءَ برجاھیں مراگش ءِ وھد ءَ کم چہ کم چار تراک ءِ توار اش کنگ بیتگ بلے تاوان ءُ تراکانی تُرندی زانگ نہ بیتگ-

اشی ءَ ساری شھر ءَ پاکستانی آجوئی روچ ءِ بیرک ءِ اسٹال ءُ دگہ ھندانی سر ءَ چار تراک کنگ بیتگ کہ آیانی زمہ واری بلوچ لبریشن آرمی ءَ منّ اِتگ-

بلوچ لبریشن آرمی ءِ جارچین جیئند بلوچ ءَ رسانکدر ءَ داتگیں بیانے ءَ گْوشتگ کہ مرچی شال ءَ دو جتا جتائیں بیڑاں وھد ءَ مئے کارندھاں کبزہ گیریں پاکستان ءِ بے سریں آجوئی ءِ مراگش ءُ بیرک ءِ دکان نشانگ جوڑ کتگ انت ۔

جارکش ءَ گْوشتگ کہ شال ءِ دمگ سریاب ءِ منیر مینگل دگ ءِ سر ءَ مرچی یک وانگ ءُ زانگ ءِ ادارگے ءِ تہ ءَ یک بے سریں آجوئی ءِ مراگشے برجم دارگ بوگ ءَ اِنت کہ بمب تراک ءِ تہ ءَ بلوچ لبریشن آرمی ءِ سرمچارانی نشانگ ءَ بوتگ، ذکر کتگیں جاہ ءَ کبزہ گیریں پاکستانی لشکر ءُ چیریں ادارھانی مراگش برجم دارگ بوگ ءَ بیتگ انت، اے اُرش ھما وھد ءَ ھال ءُ اھوال ءِ بستار ءَ کار کتگ کہ کس ھست نہ بوتگ۔

جارکش ءَ گْوشتگ کہ یک دگہ اُرشے ءِ تہ ءَ بلوچ لبریشن آرمی ءِ کارندھاں شال ءِ چائنا مارکیٹ لیاکت بازار ءَ کبزہ گیریں پاکستانی لشکر ءِ چیردستی ءَ پاکستانی بیرکانی یک اسٹالے ءِ سر ءَ بمب تراکے کتگ ایشی ءِ آسر ءَ اسٹال سرجم ءَ تباہ بوتگ۔

آئی ءَ گیش گْوشت کہ ما اے گپ پدر کن ایں کہ کبزہ گیریں پاکستانی لشکر ءِ چیردستی ءَ برجم داشتگیں بے بُنیں جشن آزادی مراگش مئے نشانگ ءَ بنت۔ کروڑاں کلدار ھرچ کنگ ءَ کبزہ گیر زور ءَ بلوچستان ءَ وتی بھر ءَ پیش دارگ لوٹ ایت کہ اے گپ راجدپتری ءُ زمینی راستیانی ھلاپ اِنت-

گُڈسر ءَ آئی ءَ گْوشتگ کہ اے اُرشانی زمہ واری ءَ بلوچ لبریشن آرمی منّ ایت۔ کبزہ گیریں پاکستانی لشکر ءُ آئی ءِ ھمراھانی سر ءَ مئے اُرش برجاہ مان اَنت۔

14اگست ءَ ھاران ءَ برجاھیں پٹبال ٹورنامنٹ ءِ سیمی پائنل میچ ءِ وھد ءَ یک تراکے بوتگ۔

برجاھیں ٹورنامنٹ ءِ سیمی پائنل میچ شھید نواب اکبر بگٹی پٹبال گراؤنڈ ءَ بوگ ءَ اَت کہ یک مزنیں تراکے بوت کہ ایشی ءِ توار دور ءُ دراج ءَ گوشدارگ بوت۔

وسیلگ ءِ رد ءَ سائیکل ءِ سر ءَ تراکناک سازی کنگ بیتگ بلے اے وئیل ءَ انگت ءَ ھچ وڑیں جانی تاوان ءِ ھال رسگ ءَ نہ اِنت ۔

دومی نیمگ ءَ پنجگور ءِ نیمگ ءَ چہ اے ھال ھم ھست اِنت کہ کلم چوک ءَ جاہ منندیں پاکستانی آرمی ایپ سی ءِ پوسٹ ءِ سر ءَ ناشناسیں مردماں گوں دستی بمباں ارش کتگ ۔ بلے تاوانانی بابت ءَ ھچ وڑیں ھال ءُ اھوال پدر نہ بوتگ۔

بلے انگت ءَ اے دوئیں وئیلانی ذمہ واری کس ءَ نہ من اِتگ۔

بلوچ یکجھتی کمیٹی ءِ جارکش ءَ گْوشتگ کہ آ ورنا ڈی سی پنجگور، مستونگ ءَ، تربت ءِ نندوکیں زاکر بلوچ ءُ آواران ءَ بے گناھیں جنک ستارہ شبیر ءِ کوش ءَ ایر جنت ۔ ذاکر بلوچ ءُ ستارہ شبیر ءِ کوش بلوچستان ءِ یک انچیں ھونی ئیں لڑی یے ءِ بھر اِنت کہ گوستگیں ھپت دھکاں چہ برجاہ اِنت، ءُ ایشی ءِ تہ ءَ ھما تاگتاں دیم پہ دیم ھوار اِنت کہ روچ پہ روچ بلوچ ورناھانی ٹُکّر ٹُکّریں لاشاں نکلی دیم پہ دیم ءَ ایر کن اَنت. آ ایشاں کُشگ ءَ اِنت۔

جارکش ءَ گْوشتگ کہ بلوچستان ءَ ھمے زوراکی ءُ زلم ءُ زوراکی ءِ سَوَب ءَ کوہ سلیمان ءَ بگر داں مکران ءَ ھمک لوگ ءَ روچ پہ روچ سوگ ءُ گم ءُ اندوہ ءِ آماچ انت۔ ھما سئے بلوچ ورنا کہ گوستگیں ھپتگ ءَ بلوچ راجی ءَ شھید بوتگ اَنت آیانی ھون ھُشک نہ بوتگ اَنت کہ گوستگیں روچ ءَ پد ءَ دگہ وئیلے، بے گناھیں جنک ستارہ شبیر ءُ ورنا ذاکر بلوچ ءِ لاش دست کپتگ اَنت۔

آئی ءَ گْوشت کہ اے وھد ءَ بلوچستان یک انسانی وئیل ءِ تہ ءَ گوزگ ءَ اِنت، ءُ بلوچ راج سرجمیں نسل کشی ءِ آماچ اِنت۔ بلوچ یکجھتی کمیٹی چہ میان اُستمان ءَ دزبندی کنت کہ آ انسانی ھکانی گلاں ھوار کہ اے نسل کشی ءِ بند کنگ ءُ لکّانی مردمانی جان ءِ رکّینگ ءِ ھاتر ءَ زوتیں کردے پیلو بہ کن انت۔

پاکستان ءِ آجوئی ءِ روچ ءِ مراگشانی سر ءَ بوت کنوکیں اُرشانی رد ءَ شال ءَ ھوار بازیں شھرانی تہ ءَ سیکورٹی ھائی الرٹ کنگ بوتگ ۔

شال شھر ءِ جتاجتائیں شھرانی سر ءَ سکیں بندش ءُ سنیپ چیکنگ کنگ بوگ ءَ انت وھدیکہ ایپ سی ءُ ایندگہ گل یکجائی ءَ سڑکانی سر ءَ گشت کنگ ءَ انت۔ بازیں دگانی سر ءَ ھم مردمانی پٹ ءُ پول کنگ بوگ ءَ انت۔

14اگست ءِ موہ ءَ انتزامیہ ءِ نیمگ ءَ امن ءُ ایمنی ءِ برجائی ءِ ھاتر ءَ سیکورٹی ءِ گامگیج شنگ کنگ بوتگ انت۔

13اگست ءَ بگر داں دومی اگست ءَ بولان ءِ دراھیں دلگوشی جاہ پہ وھدی بند کنگ ءِ پیسلہ کنگ بوتگ ۔

انتزامیہ ءِ رد ءَ بولان ءَ شپ ءِ شش ءَ بگر داں بیگاہ ءِ شش ءَ داں دگہ جار ءِ رسگ ءَ مساپر ٹرانسپورٹرانی سپر ءِ سر ءَ مدتی بندش جنگ بوتگ ۔

بولان ءَ مساپر بس ءُ ویگنانی آیگ بوگ ءِ موکل ایوک ءَ روچ ءِ وھد ءَ بیت۔

گوادر، لسبیلہ ءُ کلات ءَ آرمی، ایپ سی ءُ پولیس ءَ یکجائی ءَ روڈ ءَ گشت ءُ بیرک ءِ روانک کتگ۔

دومی نیمگ ءَ کوئٹہ ءُ ایندگہ دمگاں پاکستان ءِ آجوئی ءِ روچ مراگش ءِ سر ءَ تراک یکشل ءَ برجاہ اِنت۔

گوستگیں بیست ءُ چار کلاکانی تہ ءَ کوئٹہ ءِ چار جاھاں تراک بوتگ کہ ایشی ءِ تہ ءَ پاکستان ءِ آجوئی ءِ روچ ءِ مراگش ءِ واستا بیرک بھا کنوکیں اسٹال ءُ گچینی جاگہ ​​نشانگ کنگ بوتگ اَنت ۔

پد ءَ گْوستگیں روچ ءَ بلوچ لبریشن آرمی ءِ سروکاں کوئٹہ ءِ یک وانگجاھے ءَ تر ءُ تاب کُتگ ءُ گوں مراگش ءِ تیاری ءَ گُلائیشیں استاد ءُ نودربراں گپ ءُ تران کتگ، چہ ایشی ءَ پد مراگش بند کنگ بوتگ۔

گرلز کالج سریاب مل ءَ بوتگیں تراک ءِ ذمہ واری بلوچ لبریشن آرمی ءَ ھم منّ اِتگ کہ اود ءَ 14اگست ءِ مراگش ءِ تیاری بوگ ءَ ات۔

مرچی شال ءَ بوتگیں تراکانی زمہ واری تننگا کس ءَ نہ منّ اِتگ۔