TBP Balochi

چہ الندور ءَ، نیشنل ڈیموکریٹک پارٹی کیچ زون ءِ نیمگ ءَ ھُدامُرزی مولانا عبدالحق ءِ زند ءُ سیاسی ءُ راجی جُھد ءِ بابت ءَ مراگشے برجم دارگ بوتگ۔

نیشنل ڈیموکریٹک پارٹی کیچ زون ءِ نیمگ ءَ ھُدامرزی واجہ مولانا عبدالحق ءِ سیاسی زند ءُ دگہ زند ءِ پڑانی بابت ءَ ، چہ الندور ءَ یک مراگشے اَڑ دیگ بوتگ۔

ھمے درگت ءَ چہ مراگش ءَ پارٹی ءِ بُنجاھی ڈپٹی آرگنائیزیشن واجہ سلمان بلوچ، ھُدامرزی ءِ زھگ واجہ صبغت اللہ شاہ جی، مفتی فضل الرحمن قاسمی، عصا ظفر، معراج شاد ءُ حیات عبدالحق ءَ وتی ھیال درشان کُتگ اَنت۔

وھدے کہ اسٹیج ءِ زمہ واری زونل آرگنائزر کمیٹی ءِ باسک معراج بلوچ ءَ سمبال اِتگ-

سی یک اکتوبر ءَ آئی جے پی میٹرو سٹیشن راولپنڈی ءِ نزیک ءَ پاکستانی پوج ءِ دست ءَ زورانسری بیگواھیں نودربر آجو بیتگ اَنت-

زانگ بہ بیت کہ پاکستانی پوج ءَ یک پلیٹے ءِ سر ءَ بیڑبرتگ پلیٹ ءَ ساڑی ئیں سرجمیں بلوچ نودربر ناشناسیں جاھے ءَ برتگ اَنت-

آیانی تہ ءَ سلیم عارف ء عارف علی جھمنند تربت بی بی اے ءِ ششمی سمسٹر ءِ نودربر، بالاچ فدا ء فدا اھمد جھمنند تربت بی بی اے ھشتمی سمسٹر ءِ نودربر، خدا داد ء عبدالقادر جھمنند تربت دشت ڈاڈھے آئی آر ھشتمی سمسٹر ءِ نودربر، خلیل اھمد ء سومار جھمنند تیرتیج آواران آئی آر ھپتمی سمسٹر ءِ نودربر، خلیل اھمد ء اقبال جھننند ڈنڈار تربت آئی آر ھشتمی سمسٹر ءِ نودربر، ھمل ھسنی ء سید مھمد جھمنند آواران آئی آر ءِ ھپتمی نودربر، بابر عطا ء عطا جھمنند پنجگور آئی آر ءِ ھپتمی سمسٹر ءِ نودربر ،نور مھیم ء مھیم جھمنند پنجگور آئی آر ءِ پنچمی سمسٹر ءِ نودربر، افتخار اعظم ء مھمد اعظم جھمنند آواران ایجوکیشن ھپتمی سمسٹر ءِ نودربر ءُ احسام ء اکبر جھمنند پنجگور ءِ ناماں زانگ بیتگ اَنت-

وسیلگ رِد ءَ زورانسری بیگواہ کنگ بیتگیں سرجمیں نودربر آجو بیتگ اَنت-

زانگ بہ بیت کہ چہ پنجاب ءُ کراچی ھمے سال ءَ درزنانی بلوچ نودربر زورانسری آوار جنی ءِ نشانگ کنگ بیتگ اَنت-

بلوچ نودربریں راھشونانی گوشگ اِنت کہ ریاستی سیکورٹی ادارہ بلوچ پجّار سر ءَ نودربراں زورانسری آوار جنی ءِ نشانگ کنگ ءَ اَنت-

تیاب دپی شھر گوادر ءِ دمگ جیونی روبار ءِ جھمنند عبدالباسط بیست شش اکتوبر دوہزار بیست چار ءِ بیگاہ ءَ شاھین ءِ شکار کنان ءَ بیست پنچ تیر جتگ کشتگ – آئی ءِ کھول گمان کنگ ءَ اَنت کہ اشی ءِ پُشت ءَ دمگی منشیات پروشانی دست اِنت-

عبدالباسط ءِ برات نیاز احمد ءَ یک ایف آئی آرے درج کتگ کہ آئی ءِ تہ ءَ میاربارانی نام گرگ بیتگ آیانی تہ ءَ جان محمد ء پیری نزر، عطا محمد ءِ چک ءُ رحیم بخش ء مراد محمد ھوار اَنت کہ ربڑ جموری ءِ جھمنند اَنت، آ نام دپ کتگ اَنت-

نیاز احمد ءِ رِد ءَ زمین ءِ جیڑہ ءِ سر ءَ کوش سوب جوڑ بیت کنت – بلے کھول دمگی منشیات باپاری ءِ بلاھیں سیادی ءِ شک اِنت، میاربار دمگ ءَ منشیات ءِ بھا کنگ ءُ بھر بانگ کنگ ءَ ھوار بیتگ –

آیاں مزنیں واکداراں چہ اے میاربارانی ٹولی ءِ ھلاس کنگ ءُ زمہ واراں انساپ ءِ دیم ءَ آرگ ھاتر ءَ زوت گامگیج ءِ لوٹ ءَ کن ایں- عبدالباسط ءِ کھول بندش ءِ مستھک اِنت ءُ بلوچستان ءِ مردم پھاز ءُ انساپ ءِ مستھک اَنت-

اے وئیل ءَ دمگ مردمانی گوشگ اِنت کہ اے وئیل بلوچستان سلکارانی ٹولی بے لگامی ءِ پدری ءَ کنت- ریاستی تاکت گیشتر سیاسی کارکنانی ھلاپ ءَ رد کارمرز کنت بلے اے سلکاریں ٹولی پھلی گوم ءَ کار کن اَنت-

بلوچستان لبریشن فرنٹ ءِ جارکش میجر گْوھرام بلوچ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں آواران ءُ کیچ ءَ زورگریں دژمن ءِ چوکیانی سر ءَ اُرش کُتگ۔

جارکش ءَ گْوشتگ کہ دو نومبر ءِ بیگاہ ءِ شش ءَ آواران ءِ ھند تیرتیج جک ءَ برجاھیں زورگریں پاکستانی پوج ءِ چوکی ءِ نشانگ کتگ، بی ایل ایف اسنائپر ٹولی ءَ چوکی ءِ تہ ءَ ساڑی ئیں کارمند نشانگ کتگ چریشی ءِ نشانگ ءَ آیگ ءَ چہ زورگریں پوج ءِ یک کارمندے یے مرتگ-

آئی ءَ گْوشتگ کہ دومی اُرش کیچ ءِ ھند زامران ءَ بانبلو ءَ سرمچاراں کتگ – یکشمبے ءِ سھب ھشت ءُ بانبلو زامران ءَ برجاھیں زورگریں پوج ءِ چوکی گوں نوکین ءُ ٹوھیں سلاھاں نشانگ کُتگ چریشی ءَ پوج ءَ جانی ءُ مالی تاوان چست کنگ کپتگ-

آئی ءَ گْوشتگ کہ گل گوں وتی جنگی کارشونیاں بلوچستان ءِ ھرچ دمگاں زورگریں پوج سّسائی پروش داتگ، چریشی ءَ ورگریں لس مردماں نشانگ کنگ ءُ وتی پروش ءَ چیر دیگ ءِ ناکامیں جُھد ءَ کنت۔

میجر گوھرام ءَ گوشتگ بی ایل ایف اے دوئیں اُرشانی زمہ واری منّ اِتگ ءُ گْوشتگ کہ داں بلوچستان ءِ آجوئی زورگریں پوج، آئی ءِ کمکار ءُ شوربندیانی سر ءَ مئے اُرش برجاہ بنت۔

وائس فار بلوچ مسنگ پرسنز ءِ چیئرمین نصراللہ بلوچ ءَ وتی درشان ءِ تہ ءَ گوشتگ کہ چہ راولپنڈی اسلام آباد ءَ سے روچ ءَ گوزگ ءَ اَبید نودربر دیم ءَ نیارگ ڈیھی کانود ءُ انسانی ھکانی مزنیں ھلاپ ورزی یے کہ آئی ءِ تُرندیں لبزاں گوں ایر جن ءُ وفاقی حکومت چہ لوٹ کنان ءَ کہ آ بلوچ نودربرانی ملکی ادارھانی دست ءَ درکانودی دزگیری ءَ زوت گامگیج بزور اَنت آئی ءِ پہ سلامتی یل کنائینگ ءِ دلجمی بدے اَنت-

نصراللہ بلوچ ءَ بلوچ نودربراں زورانسری آوار جنی ءِ درگت ءَ گوشتگ کہ سی یک اکتوبر راولپنڈی ءِ آئی جے پی میٹرو اسٹیشن نزیک ءَ برجاھیں بلوچ نودربرانی پلیٹ سر ءَ شپ ءِ ساھت یک ءِ وھد ءَ ریاستی سیکورٹی ادارھاں بیڑبرتگ ءُ اود ءَ ساڑی ئیں سرجمیں نودربر بیگواہ کتگ اَنت- بیگواھیں نودربر نمل یونیورسٹی اسلام آباد ءِ دہ نودربر ھوار اَنت- جن سالم عارف ، بالاچ فدا، خدا داد، خلیل احمد ، خلیل اقبال، حمل حسنی، بابر عطا، نور مھیم، افتخار عظیم ءُ احسام اکبر ھوار اَنت, آیانی سیمسٹر مڈ ٹرم چکاس برجاہ ءَ اَنت- یک نومبر نودربراں راولپنڈی ءِ نیو ٹاؤن تھانہ ءَ وتی دھیں بیگواھیں سنگتانی یل کنائینگ رپورٹ درج کنگ جھد کتگ بلے پولیس ءَ ایف آئی آر درج کنگ انکار کتگ-

بلوچستان ءِ دمگ کیچ مند ءَ مروچی سیمی روچ ءَ پوج ءِ نیمگ ءَ گسانی دستیگ کنگ ءِ ھلاپ ءَ زھرشانی نندانک برجاہ، زھرشانی ننداک ءَ زھگ ءُ زالبولاں ھوار مزنیں کچے ءَ مردماں بھر زرتگ دگ بند کتگ ءُ نشتگ انت ـ

گیشیں اھوالانی رد ءَ زھرشانی کنوکیں مردمانی گوشگ انت کہ پاکستانی پوج ءَ پنچ سال ءَ گیش انت کہ مئے گس ءِ سر ءَ کبزہ کتگ ءُ نشتگ انت ـ بندات ءَ مارا وھد دیگ بوتگ کہ سبر بہ کن ات مرچی باندا ءَ پوج پاد کئیت ءُ روت، بلے نوں پنچ سال ءَ گیش پرگوستگ پاد آیگ ءِ نام ءَ نہ زانت مئے ھم سبر ءِ ھلاس بوتگ نوں چدوگیشتر ما سبر ءُ اوپار کت نہ کن ایں ـ

آیانی گوشگ ات کہ اولسر ءَ مئے گس ءِ سر ءَ کبزہ کنگ بوتگ نوں گِس ءِ دیم ءِ زمین ھوار ایندگہ جاھاں ھم دستیگ کنگ ءِ جھد انت ـ

زانگ بہ بیت مروچی زبیدہ جلال ءِ گوھار رھیمہ جلال ھم اتکگ زھرشانی نندانک ءَ گوں کھول ءِ مردماں گند ءُ نند کتگ کہ دگ ءَ پچ کنگ بہ بیت بلے کھول ءِ گوشگ ات کہ نوں ما چدوگیشتر رد نہ ور ایں، نوں مارا گیشتر ریپنگ مہ بیت ما تاں ھما وھد ءَ ادا نندانک جن ایں نند ایں تانکہ پاکستانی پوج مئے گسانی سر ءَ پاد نہ ایت ءُ نہ روت ـ

کھول ءِ مردماں چہ بلوچ راج ءُ سیاسی سماجی گل ءُ باسکاں گوں لوٹ کتگ کہ مئے ھمراھداری ءَ بہ کن انت ءُ ریاستی زوراکیانی بگیری ءَ توار چست بہ کن انت-

تربت ءَ سرکاری کارگس ءِ سر ءَ ناشناساں بمب اُرشے کتگ ءُ چمالنگ ءَ اشکراں لوڑیں ٹرک ناشناساں مانداشتگ انت-

تربت ءَ ایریگیشن کالونی ءَ ایکسیئن ایریگیشن ءِ سرکاری کارگس سر ءَ ناشناسیں مردماں دستی بمبے چگل داتگ ءُ تتکگ اَنت، کہ تُرندیں تراکے ءَ چہ ترک اِتگ-

تراک ءِ توار شھر ءِ دیر دیر تاں اش کنگ بیتگ-

پولیس رِد ءَ بمب تراک ءَ ھچ وڑیں جانی تاوان ھال نیست، بلے پوج ءَ شھدگ بند کتگ پٹ پول بندات کتگ-

ھمے وڑ ءَ چمالنگ ءَ سَے ٹرک ناشناسیں مردماں مانداشتگ انت-

لیویز ءِ رد ءَ ٹرکانی توک ءَ دو ٹرک لوڑ بیتگ انت ءُ یکے ھالیگ بیتگ –

زورانسری آوار جنی ءِ ھلاپ ءَ بلوچ اسٹوڈنٹس ایکشن کمیٹی ءِ نیمگ ءَ چہ جتاجتائیں شھراں زھرشانی کنگ بیتگ-

بلوچستان یونیورسٹی نودربر سھیل بلوچ ءُ فصیح بلوچ ءِ زورانسری آوار جنی ءَ سے سال سرجم بیگ ءَ مروچی نوشکی ءَ بلوچ اسٹوڈنٹس ایکشن کمیٹی ءِ جار پد ءَ نودربرانی نیمگ ءَ چہ روانک کشگ بیتگ ءُ زھرشانی نکش کنائینتگ-

ھمے میان ءَ روانک ءَ ھواریں مردماں نوشکی پریس کلب دیم ءَ نندانک داتگ ءُ بیگواھیں مردمانی یل کنائینگ ھاتر ءَ ناراہ جتگ-

نوشکی زھرشانی روانک ءَ چہ تران کنان ءَ ترانکاراں گوشتگ بلوچ ورنایاں زانشتی ادارھاں چہ بیگواہ کنگ آیانی باندات تباہ کنگ بیگ ءَ اِنت اگاں مئے دوستناکاں چُشیں. جرمے کتگ گُڑا آیاں آمیدگس ءَ پیش بہ کن اِت گپ جنگ موہ بدے اَنت بھتام پدر ءِ پُشدر ءَ بے جُست پرس ءَ مئے مردماں سالانی سال بند کن اَنت-

ھمے میان ءَ روانک ءَ سالانی سال چہ نوشکی ءَ زورانسری بیگواہ کنگ بیتگیں مردمانی کھول ھم ھوار بیتگ اَنت کہ آیانی دست ءَ وتی دوستناکانی اکس چست کتگ ءُ کنگ لوٹ کنگ ءَ بیتگ اَنت-

بساک ءِ نیمگ ءَ چہ سھیل پسی بلوچ ءِ زورانسری آوار جنی ءَ سے سال سرجم بیگ ءَ بلوچستان ءِ جتاجتائیں دمگاں زھرشانیانی درچ برجاہ ءَ اِنت کہ اود ءَ گوستگیں روچ ءَ شال، ھُزدار، تربت، اوتھل ءَ نودربراں زھرشانی نکش کنائینتگ ءُ بیگواھیں مردمانی یل کنائینگ لوٹ کتگ-

گوں سرگوْات ءَ نمدی ءِ پہ وتی مَکھیں مات ءَ

نبشتہ کار : گیابان بلوچ

دی بلوچستان پوسٹ

سنگے سر ءِ چیرا کُت ءُ وپتاں ،چم آزمان ءَ سک دات اَنت ۔شپ ماھکان اَت ۔آزمان گوں اے چاردھی ماہ ءُ استالاں سک زیب دار اَت ۔گوں اے ماہ ءِ رژُنائی ءُ زمین ءِ زیبائی ءِ ندارگ ءَ دل ءَ تاھیر رسگ ءَ اَت ۔سرگوْات ھم لھم لھم ءَ کَشگ ءَ اَت ھما ساھت ءَ من مات ءِ ترانگ ءَ کَپتاں دل ءَ گُشت کہ پہ مات ءَ نمدی نبشتہ بکن آں ۔

اما مرچی اے چاردھی ماہ ءُ جمہ ءِ شپ ءَ من زاناں تو ڈن ءَ تھت ءِ سر ءَ وپتگے ءُ ترا وتی تسبی دست ءَ اَنت ءُ تئی چم ماں آزمان ءَ سک انت ءُ تو دل ءَ جیڑگ ءَ ئے کہ بارے من چون ءَ ،من ورگ وارت ءَ اگاں نہ انچو گژنگیں لاپ ءَ وپتگ آں،بارے انو اے ساھت ءَ من واب آں یا راہ ءَ سپر ءَ آں ۔من زاناں انو تئی چم ارس اَنت ءُ تو گوں ھدا ھا ھمے دوا لوٹگ ءَ ئے کہ من ھر کُجا آں وش ءُ سلامت بہ با ،من زاناں اما تو اے ھم جیڑگ ءَ ئے کہ اے کوہ ءِ توک ءَ من ءَ گردھانی درد بہ گپت گڑا من چون کن آں بلے اما جان تو ھچ مہ جیڑ ءُ پریشان مہ بو من جوڑ ءُ وش آں ، ءُ انو اے ساھت ءَ من ورگ وارت ءَ ءُ وتی مات (زمین) ءِ کُٹ ءَ وپتگ آں ۔ اما مئے استاد پہ ما چو مات ءِ وڑا مھروان اِنت ۔مارا چومات ءَ سمبالی ادا کُلیں سنگت انچو مھروان اَنت کہ من ءَ اے سما نہ بیت کہ من ترا چہ دوراں ۔

اما من زاناں تو اے جیڑے کہ سردیں زِمستانی شپ ءَ من چون واب کپ آں ،بلے اما تو گپے زان ئے ھمے کہ من پہ واب ءَ سر ءَ زمین ءَ ھیر کن آں زمین من ءَ انچو وتی امبازاں زور ایت کہ من ءَ نہ سردی سما بیت نہ گرمی ،زمین من ءَ چو تئی وڑا وتی امبازاں واپنین ایت ءُ لیلو دنت ءُ من ءَ واب گیج ایت۔

اما من زاناں تو ھما شپ ءِ ترانگ ءَ کپے کہ من تئی دست ءِ سر ءَ وپتگ آں تو من ءَ گُشت ،گیابان من ءَ بھ یل مہ دے ءُ مہ رو ،من گُشت ھو ھچ پریشان مہ بو من ھر وھدا تئی چمانی دیم ءَ باں ،بلے من دل ءَ گُشت کہ من چو ادا نشت کن آں کہ زمین من ءَ توار ءَ اِنت ،من چون زمین ءَ چہ پراموش بوت کن آں ،من چون گوش آں بست ءُ وپت کن آں ،۔من ھر وھد شپ ءَ پاس کن آں ءُ جیڑاں کہ کد من پہ زمین ءِ آجوئی اے جُھد ءَ ھوار بہ باں ءُ پہ زمین ءَ چیزے بکن آں ۔ شر اما نو منی گاٹ ءِ وھد بوھگ ءَ اِنت من رواں آ سنگت کیت کمو وپس ایت،اما وتی ھیال ءَ بدار ءُ ھچ پریشان مہ بو من ھر وھدا وش ءُ سلامت انت ۔

من کاگد پتات ءُ سرگوْات ءِ دست ءَ دات ءُ گُشت اے کاگد ءَ بر گوں منی پیرین مات ءِ دست ءَ دے ءُ منی سلامانی بدے بگُش تئی بچ سلامت اِنت ۔

نبشتانک :من بندیگ آں

نبشتہ کار: سمیر ھمراز

دی بلوچستان پوسٹ

منی رژنائیں واب گوں وت بُرت اَنت،نوں من کجام رنگ ءَ جھان ءَ بچار آں،اد ءَ وَ ھچ میم نہ بیت بید ءِ تھاری ءَ،ھنچو سما بیگ ءَ اِنت،کسانیں بانے، من آئی ءِ توک ءَ آں، ءُ وتی ھردو پاد جُپت کُتگ ءُ نشتگ آں،دست پُشت ءَ بستگ اَنت جان ءِ پُوست سُچگ ءَ اِنت،دیم ءِ کرچک پیداک اَنت-

بس ھمے جیڑگ ءَ آں،باریں امروز ءَ را تو چونیں زیبائی یے بکشاتگ،من پاد کایاں کہ تئی زیبائی ءَ من بچار آں،بَلے چون کناں، منی جان ءِ درستیں آزیاں کار کنگ یلہ داتگ،ھدا بزانت چُنت سال اِنت کہ من ھمے تھاری ءَ زند گوازینگ ءَ آں-

ھدا بزانت اے آزمان،منی گُلزمین،منی لوگ ءُ جاہ،منی سیاد ءُ وارس،ءُ منی ھستی کہ منی ودار ءَ باریں چُنت کرن گوازینتگ اِش پہ منی دروشم ءِ گندگ ءَ،من ءَ سک زھیر کنت،بلے شُت کُت نہ کناں کہ انچیں رسترانی کر ءَ بندیگاں-

باریں اود ءَ منی راج ءِ چہ ھال اِنت کہ ھروچ برگ بنت کُشگ بنت ءُ دور دیگ بنت۔ بس منی یکیں گڈی واھگ اِنت چہ وتی بلوچاں کہ وت ءَ چہ گلامی ءِ سانکلاں بہ سند اَنت۔ ما ھما وھد ءَ تاں گلام بہ ایں تاں وت ءَ چہ گلامی ءَ آجو نہ کتگ۔ شمئے ماتیں ڈیھ شمارا لوٹگ ءَ اِنت برو اِت وتی مات ءَ چہ استان ءِ زوراکی ءَ بہ رکین اِت۔

ءُ منی دل چنچو لوٹ ایت کہ پہ وتی ڈیھ ءَ جنگ بکن آں بلے چوں کن آں من رسترانی زندان ءَ بندیگ آں۔ ھچ وڑ ءَ درآتک نہ کنگ ءَ آں۔ من زاناں کہ من کجام سیمسراں گوزگ ءَ آں۔ ھروچ یکے کیت منی پوست ءَ چہ منی جان ءَ چِنت ءُ روت۔لنٹاں چو ھوشامیں ریگزار ءَ تل بستگ۔

ساہ گوں بندیکے ءَ ڈک داتگ نہ سِد ایت کہ من چہ زورکاں آجو بہ باں نیکہ ایمنی دل ءَ یکیم کنت۔ گوات سُر ایت ساہ روت ءُ کیت۔ منی ھون زمین ءَ چو تتکگیں کورے ءَ تچاں ھمے کسانیں زندان ءَ ءُ من بُکاں در کایاں بُکاں درکایاں۔ منی جوانی پیر ئِے کُتگ ھمے امُر ءِ ودار ءَ کہ کدی باریں من واتر باں پہ میتگ ءَ وتی، کد بگنداں راج ءَ وتی ءُ زیبائیں بلوچستان ءَ۔ کد وتی لوگ ءَ وتی مات ءُ پت گُھار ءُ براتاں کہ کرنے ءِ ودار ءَ بوتگ اَنت پمن۔