بلوچستان ءِ دمگ آواران ءَ پاکستانی لشکر ءَ یک مردمے دزگیر کنگ ءَ پد بیگواہ کتگ –
بیگواہ کنگ بیتگیں مردم ءِ پچار خان مھمد ء واھد بکش ءِ نام ءَ زانگ بیتگ-
دمگی مردمانی رد ءَ بیگواہ کنگ بیتگیں ورناہ پاکستانی پوج ءَ پانزدہ اگست ءَ آواران ءِ دمگ جھاؤ کوھڑو ءَ دزگیر کتگ ءُ برتگ-
کھول ءِ رد ءَ بیگواہ کنگ بیتگیں ورنا ءِ بارو ءَ آیاں سرپدی دیگ ءَ نہ اَنت –
آیاں سیاسی ءُ انسانی ھکانی گلاں گوں دزبندی کتگ کہ خان مھمد ءِ سلامتی ءَ یل کنگ ءَ کرد ءَ پیلو بہ کن اَنت-
کساں سمائی
نبشتہ کار: شَکّل بلوچ
دی بلوچستان پوسٹ
کساں سمائی یک انچیں ھوپے کہ ھر ھما سنگت یا نودربرے بہ بیت، اگاں آ چہ بُندر ءَ چاگرد ءِ تہ ءَ ھر ھما دلی لوٹ، مراد یا واھشتے کہ چہ ریاستی مشینری ءِ نیمگ ءَ آئی ءَ انچُوش کہ زِبھر کنائینگ بوتگ کہ آ ھر چیز ءَ پہ وتی واستا ھچ چُشیں اُمیتے پہ زند ءِ ھاتر ءَ مہ گند اِیت اِش گڑا آ چہ مزن سمائی ءَ دور وَ الم بیت۔
کساں سمائی چوناھا ما اردو ءَ ”احساس کمتری“ بزاں کم زانتی یا سمائی، چاگرد ءِ تہ ءَ ھچ چیز ءَ چہ وت ءَ بے زانگ بوگ۔
زند ءِ کجام ھم پِڑّے بہ بیت آ چہ سیاسی بہ بیت، مالزانتی بہ بیت، کاروڑزانش بہ بیت، سائنس بہ بیت، اگلاکیات بہ بیت، ملکی ءُ درملکی دپتر زانش بہ بیت، ڈیھ ءُ زمین زانش بہ بیت، تب زانش بہ بیت ءُ چاگرد ءِ تہ ءِ کجام ھم جیڑہ بہ بنت اگاں کسے کہ چاگرد ءِ بَھر اِنت، چہ چُشیں پِڑّاں بے زانگ اِنت گڑا آ کساں سمائی ءِ شکار وَ الم بوتگ یا بیت۔
اگاں کَسے کہ من ءَ انگریزی گالانی بابت ءَ جُست ءُ کنت کہ How much ءُ How many ءِ میان ءَ چے تپاوت بوت کنت گڑا من یک برے الم اے گالانی بابت ءَ جیڑاں کہ اے دوئیں گالانی تہ ءَ How وَ ھست اِنت بلے اے Much ءُ Many ءَ چوں بہ گیشّناں؟ منی گپ ءِ مراد ءُ متلب ایش اِنت کہ یک برے من الم جیڑاں کہ ھر دوئینانی تہ ءَ جتائیں بستار وَ بیت من ءَ جُست کنگ بوتگ۔
من گُشاں زانت ءُ مارشت ءِ میان ءَ ھچ تپاوت نیست بلے اے منی لیکہ اِنت متلب اے ھم بوت نہ کنت تپاوت مہ بیت، اگاں تو اے گالانی بابت ءَ مہ جیڑ ئے ءُ پَھک گُش ئے کہ ھمے وڑ اِنت گڑا کساں سمائی تئی مجگ ءَ گیشتر تالان بیت، پرچا کہ الم تئی سر ءِ سر ءَ مُشتگیں چاگردی جیڑہ سک باز اَنت ءُ تو وت گیشّینت کُت نہ کنگ ءَ ئے، ھر چیز ءَ را سر ءَ گْوازینگ ءَ اِت اِش۔
دومی نیمگ ءَ سیاسی گَلانی تہ ءَ باز انچیں نوک باھند ھوار بوتگیں باسک اَنت کہ وت ماں وت نہ گیشّ اَنت، لیکہ ءُ ھیال نہ ٹَھ اَنت، ایشی ءِ مستریں جیڑہ کساں سمائی اِنت، ھر کس ھمے کوشست کنت کہ من گل ءِ مستر آں، من ھرچی گشاں منی گپ ءَ کس مہ کن مہ کنت، اے نزوری یے پہ سیاسی گل ءِ واست ءَ، اگاں ما بچار اِیں، گل ءِ مستریں چیز گل ءِ مکسد اِنت ءُ ھمے مکسد ءِ ھاتر ءَ گل ءِ باسک یا مردم یکجاہ ءُ ھم ھیال بنت۔
کساں سما بوھکیں سنگت مدام دلتپرکہ اِنت، اوپار نیست، سنچ ءُ سسا نہ بوگ ءِ سبب ءَ زوت کار ءِ سر ءَ سوڑگ کنت ، جبزاتی بیت ابید جیڑگ ءَ وتی اَملی کار ءَ بندات کنت، ابید شوربندی ءَ گل ءِ کاراں شگالی کن اَنت کہ مئے کر ءَ وھد نیست، گڑا زاناں ھمے ءِ کارانی کنگ ءَ پیسر ءَ وھد نہ ٹھینتگ؟
چُشیں باز کساں سمائیں سنگت مئے چاگرد ءَ دست کپ اَنت کہ ما ھرچی زانیں، مارا ابید دگہ کس ءَ چُشیں زانت ءُ زانگ ءِ سنچ نیست۔ ھمے سوچ گیشتر گَل ءَ تاوان دے اَنت۔
باید اِنت چُشیں گلاں وانگ ءِ چاگرد جوڑ کنگ لوٹ اِیت، گیشتر چُشیں سنگتاں کتاب ءِ نیمگ ءَ دلگوشی بہ دے اَنت اگاں چیزے سرپد نہ ئے کسے ءَ جُست کنگ ءَ ھیبے مہ لیک اَنت۔
بلوچ چاگرد ءِ تہ ءَ گیشتر چُشیں چیز ھست اَنت بلے زمہ داریں ءُ مزن سمائیں سنگتانی باید اِنت زمہ واری ءَ کاراں بکنت اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت
روکپتی بلوچستان ءِ دمگ سراوان ءَ دو ھسپتالانی ڈاکٹرانی وتکشی ءِ وئیل ءِ دیم ءَ اتکگ اَنت اے ھردوکاں ھمے یکیں ماہ ءَ زوت ماں زوت ءَ وتی کشی کتگ-
گیشیں اھوالانی رد ءَ وتکشی کنوکانی پجار ڈاکٹر مھروان ھسروانیاں جھمنند اسپھان ءُ فاطمہ رضایی پور جھمنند مشھد ءِ ناماں زانگ بیتگ اَنت-
اھوالانی رد ءَ مھروان ھسرونیاں سَے پیش سراوان ءَ نادراہ جاہ ءَ پہ ڈاکٹرے ءَ لگ اتگ بیتگ ءُ آئی ءَ ھمے ماہ ءَ ماں اسپھان ءَ وتی لوگ ءَ وتکشی گولی وارتگ ءُ وتی زند ھلاس کتگ-
دومی فاطمہ رضایی ءَ ھم گوستگیں چار شمبے ءَ زاھدان ءَ گولی وارتگ ءُ ھسپتال ءِ برگ ءَ امام علی زاھدان ءَ آئی ءَ وتی ساہ داتگ اَنت-
ڈاکٹرانی گوشگ انت اے ھردوکیں وئیل یکے دومی ءَ جتا انت بلے ایشانی ھاسین سبب زانگ نہ بیتگ اَنت-
لس مھلوک ءِ گوشگ انت کہ ایشاں پگارانی دگہ زاتی جیڑھانی بارو ءَ یکشل ءَ گپ جتگ بلے گمان ھمے بیت انت مالی درکاری پیش ءَ آیاں وتی ساہ گپتگ اَنت-
تربت ءِ دمگ ناصر آباد ءَ سلاہ بندیں مردماں تیرگواری کتگ ءُ گاڑی یے پچ گپتگ ءُ برتگ-
گیشیں ھالانی رِد ءَ شمبے ءِ بیگاہ ءَ تربت ءِ دمگ ناصر آباد ءِ گراؤنڈ ءَ لیب ھلاسی ءَ سلاہ بندیں مردم گراؤنڈ ءَ اَتکگ ءُ تیرگواری ءُ عبید نصرت جھمنند تگران آباد تمپ نامیں مردمے ءِ برزاتک گاڑی اش پچ گپتگ-
بلے تیرگواری ءَ چہ ھچ وڑیں جانی تاوان نہ بیتگ اے گاڑی ءِ واجکار ءِ سیادی سرکاری پلامرزی کنوکیں ٹولی ءَ گوشگ بیگ ءَ اِنت-
بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں شانزہ اگست ءِ شپ ءِ ھشت ءَ کیچ ءِ بنجاھی شھر تربت، سنگانی سر ءَ سائن بورڈ ءَ برجاھیں زورگریں پاکستانی لشکر ءِ پانگس ءِ سر ءَ دستی بمبے چگل داتگ کہ چہ ایشی ءَ دژمن ءَ تاوان بیتگ۔اُرش ءِ وھد ءَ دژمن ءِ یک کارمندے پانگس ءَ ساڑی بیتگ۔
میجر گوھرام بلوچ ءَ گوشتگ بی ایل ایف بلوچستان ءَ پاکستانی زوراکیانی پسوا سلاہ بندیں جُھد ءِ رِد ءَ دیگ ءَ اِنت ءُ بی ایل ایپ ءِ ھرچ اُرش دژمن ءَ جانی ءُ مالی تاوان دنت۔
جارکش ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ کول کنت داں پاکستانی لشکر ءِ دراھگ ءُ روگ ءَ دژمن ءِ سر ءَ اُرش برجاہ بنت۔
روکپتی بلوچستان ءِ جتا جتائیں جاھاں ایرانی لشکر ءُ ناشناساں تیرگواری کتگ ءُ چار مردم کُشتگ اَنت-
اھوالانی رد ءَ روکپتی بلوچستان ءِ دمگ پھرہ (ایرانشھر) ءَ ایرانی لشکر ءَ تیرگواری کتگ ءُ دو مردم کُشتگ اَنت-
اھوالانی رد ءَ کُشگ بیتگیں مردمانی پجار سالہ جمشیدزئی ء عبدالعزیز ءُ مکتار جمشیدزئی ء عبدالحکیم جھمنند گونیچ دھستان کارواندر ھاش ءِ ناماں زانگ بیتگ اَنت-
اھوالانی رد ءَ سیکورٹی پورسز ءَ بھتام جتگ ءُ گوشتگ ھردوک نشہ واپاری ءِ برگ ءِ بھتام ءَ تیرگواری کتگ ءُ کشتگ اَنت-
لس اھوالانی توک ءَ اے ھال ءِ راستی پدر نہ بیتگ انت ءُ ھردوک کشگ ءَ پد نادراہ جاہ ءَ برگ بیتگ اَنت-
ھمے ڈول ءَ لاشار ءَ ناشناساں تیرگواری کتگ ءُ دو مردم کُشتگ اَنت-
کُشگ بیتگیں مردمانی پجار یاکوب درزادہ ء ھسین ءُ ایوب درزادہ ء مھمد جھمنند اوگنیک لاشار ءِ ناماں زانگ بیتگ اَنت-
ھردوک سے شمبے ءِ روچ ءَ چھبار ءُ ایرانشھر ءِ میانی دمگ لاشار ءِ ھند پیپ جکس ءَ کشگ بیتگ اَنت-
شمبے ءِ روچ ءَ بلوچستان ءِ بُنجاھی شھر شال ءِ دمگ سریاب دگ سر ءَ بلوچستان شھدربرجاہ ءِ نزیک ءَ تُرندیں تراکے بیتگ چریشی ءِ آسر ءَ سے مردم ٹپی بیتگ اَنت-
ٹپی ئیں مردم پہ الاج ھاتر ءَ بی ایم سی نادُراھجاہ شال ءَ برگ بیتگ اَنت کہ آیانی پجّار احسان اللہ ء محمد علی، عبداللہ ء عبدالرشید، رحیم اللہ حوالدار ء عالم گل نام ءَ چہ بیتگ اَنت-
گیشیں پٹ پول ءَ پوج کنگ ءَ اِنت- وئیل ءَ پد پوج ءَ دمگ بستگ ءُ پٹ پول بندات کتگ-
گوستگیں روچ ءَ چہ دالبندین ءَ دزکپتگیں لاشانی پجّار بیتگ-
پولیس رِد ءَ پنچیں مردمانی سیادی چہ لشکر گاہ اوگانستان ءَ اِنت-
آیانی تہ ءَ روزی محمد، رحمت اللہ ء عبد الحمید، سمیع اللہ ء عبدالولی، آغا ء محمد ولی، سردار ولی ء گلاب شاہ ھوار اَنت-
لاش شال ءِ سردجاہ ءَ دیم دیگ بیتگ اَنت گیشیں پٹ پول برجاہ ءَ اِنت-
زانگ بہ بیت کہ گوستگیں روچ ءَ دالبندین کالج نزیک ءَ کمبھاں چہ بندوکیں لاش دزکپتگ اَنت، پنچیں مردم تیر جنگ ءُ کُشگ بیتگ اَنت-
شمبے ءِ روچ ءَ چہ ھاران ءَ پاکستانی پوج ءَ یک مردمے دزگیر کنگ ءَ پد بیگواہ کتگ –
کھول ءِ رد ءَ شھزاد ملازئی ء مھبوب ملازئی مروچی سھب ءَ پوج ءَ گدان ھوٹل ھاران ءَ دزگیر کتگ ءُ پد ءَ بیگواہ کتگ-
آیاں ورنا ءِ سلامتی ءَ یل کنگ ءِ لوٹ کتگ-
زانگ بہ بیت بلوچستان ءَ زورانسری آوار جنیانی وئیلاں ناگیگیں جاورے ءَ گیشی اتکگ –
بلوچ سیاسی پھناتانی نیمگ ءَ زورانسری آوارجنیانی وئیلاں جھلانکداریں سزا گوشگ بوگ ءَ اَنت – آیانی رد ءَ بیگواھیں مردم ءِ ھواری ءَ سرجمیں کھول دردناکی دیگ بوگ ءَ اَنت-
جتا جتائیں وھداں میان اُستمانی دمگی انسانی ھکانی گل چہ بلوچستان ءَ زورانسری ءِ آوار جنیاں ناوشی گوشگ ءَ اَنت ءُ اے دابیں وئیل ھمک روچ رپورٹ بوگ ءَ اَنت-
بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ اُرشانی زمہ واری منان ءَ گوشتگ سرمچاراں سیزدہ اگست ءِ شپ ءَ پروم کلیری ءَ آرمی ءِ بنجل ءِ سر ءَ اُرش کُرتگ ءُ شانزہ اگست ءِ سُھب ءِ یازدہ ءَ بلیدہ کڑکی ءَ آرمی ءِ چیردستی ءَ کارمرز بوؤکیں پی ٹی سی ایل کمیونیکیشن ٹاور تاوان دتگ۔
جارکش ءَ گوشتگ سیزدہ اگست ءِ شپ ءَ سرمچاراں پروم کلیری ءَ آرمی ءِ بنجل ءِ سر ءَ گوں راکٹ لانچرز، گرنیڈ لانچرز ءُ مشین گناں اُرش کُرتگ ءُ جانی ءُ مالی تاوان داتگ۔
میجر گوھرام بلوچ ءَ گوشتگ شانزہ اگست ءِ سُھب ءِ یازدہ ءَ بلیدہ کڑکی ءَ آرمی ءِ چیردستی ءَ کارمرز بیتگیں پی ٹی سی ایل ءِ ٹاور ءِ سر ءَ اُرش کُرتگ ءُ دور داتگ ءُ دُرسیں مشین ءُ سامان مانداشتگ اَنت۔ چہ ھمے رھوتی نزام ءِ پارست ءَ پاکستانی آرمی بلیدہ، زامران ءُ کیچ ءِ جتائیں جاگھاں رھوتی نزام ءَ ھلائینگ ءَ اِنت۔
میجر گوھرام بلوچ ءَ گوشتگ بی ایل ایف نہ ایوک ءَ آرمی ءَ نشانگ کنگ ءُ تاوان دیگ ءَ اِنت بلکیں آئی ءِ چیردستی ءَ کارمرز بیتگیں ٹریکنگ سسٹم ءَ ھم آدرہ کنگ ءَ اِنت چے ءَ کہ چہ ھمے رھوتی نزام ءِ آسراتی ءَ آرمی سرمچاراں ٹریس کنگ ءِ جُھد ءَ کنت۔
جارکش ءَ گوشتگ بلوچستان لبریشن فرنٹ اے اُرشانی زمہ واری ءَ منّ ایت ءُ داں بلوچستان ءِ آجوئی ءَ زورگریں لشکر ءِ سر ءَ اُرش برجاہ بنت۔
