بلوچستان ءِ دمگ کیچ ءَ ناشناسیں سلاہ بندیں مردماں پاکستانی پوج ءِ چوکی اُرش ءِ نشانگ کتگ-
گیشیں ھالانی رِد ءَ مروچی سھب ءِ ھشت ءَ ناشناسیں سلاہ بندیں مردماں کیچ ءِ دمگ زامران بانبولو ءِ ھند سر ءَ برجاھیں پاکستانی پوج ءِ چوکی نشانگ کتگ-
دمگی وسیلگ رِد ءَ اُرش وھد ءَ تیرگواری ءُ تیرانی توار اش کنگ بیتگ اَنت، وھدے کہ وسیلگ گوشگ اِنت کہ اُرش ءَ پوج ءَ تاوان چست کنگ کپتگ-
زانگ بہ کہ اے دمگ ءَ بلوچ آجوئی لوٹوکیں سلاہ بندیں گل پُرکار اَنت بلے اُرش زمہ واری انگت ھچ گل ءَ نہ زرتگ-
روکپتی بلوچستان ءِ دمگ تپتان ءَ گوستگیں دو روچانی توک ءَ پنچ مردم آوار جنگ بیتگ اَنت ءُ گوستگیں روچ ءَ گرگ بیتگیں زالبول یل کنگ بیتگ انت-
گوستگیں آدینگ ءِ روچ ءَ تپتان ءِ دمگ گوھرکوہ ءَ ایرانی لشکر ءُ چیریں ادارھانی کارمنداں دو بلوچ ورنا لَٹ ءُ کُٹ ءِ ھواری ءَ آوار جتگ ءُ بیگواہ کُرتگ اَنت۔
آوار جنگ بوتگیں مردمانی نام ھمید ء سُلتان ءُ رشید ء ابداللہ ھر دوک گوھرکوہ ءَ جھمنند اَنت۔
ھمے وڑ ءَ تپتان ءِ دمگ گوھرکوہ ءَ ھاجی جمشیر بازار ءَ گوستگیں روچ ءَ ایرانی لشکر ءِ دست ءَ بلوچ زالبول ءِ گوں پانزدہ ءُ ھبدہ سالی جنین چُک ءِ ھواری ءَ آوار جنگ بوتگ اَت کہ دمگ ءِ اِسپیت ریش ءُ نامداریں مردمانی میانجی گیری ءَ آجو کنگ بیتگ اَنت۔
آجو بوتگیں بلوچ زالبولانی پجار راجی ء باز مھمد گوں دو پانزدہ ءُ ھَبدہ سالی ئیں جنین چُک ءَ اَنت۔
آں پہ اوگانستان سیمسر گوازینگ ءَ الگدیر اوگانی واڈ ءَ برگ بوتگ اِتاں کہ دمگ اِسپیت ریش ءُ نامداریں مردمانی میانجی گیری ءَ لشکر ءَ آجو کُرتگ اَنت۔
روکپتی بلوچستان ءِ دمگ تپتان ءَ ایرانی لشکر ءَ پت ءُ گوں ھمراھے دو زھگاں آوار جتگ ءُ برتگ-
گیشیں اھوالانی رد ءَ تپتان ءِ ھند گوھرکوہ ءَ ھپیز اھمد بازار ءَ گوستگیں پنچ شمبے ءِ روچ ءَ ایرانی لشکر ءَ اَبید آمیدگس ءِ پرمان ءَ گِسے ءَ بیڑ بُرتگ ءُ پت گوں دو چُک ءِ ھواری ءَ لَٹ ءُ کُٹ ءُ کم شرپ ءَ کنگ ءَ ھوار آوار جتگ اَنت۔
آوار جنگ بوتگیں مردمانی پجار یاکوب ء مھمد آئی ءِ چُک ھالد ءُ ابراھیم ءِ ناماں زانگ بیتگ اَنت-
لشکر ءَ آھانی اوار جنگ ءِ سوب ایرانی پجار تاک ءِ نہ بوگ گُوشتگ۔
زانگ بہ بیت گوستگیں روچ ءَ یک زالبولے ھم گون دو چکانی ھمراھی ءَ آوار جنگ بیتگ ات اَنت کہ آیانی سبب ھم ھمے وڑ ءَ پجار کاڈ ءِ نہ بوگ گوشگ بیتگ ات –
دوستناکاں زوت یل بہ کن اِت
چہ گوادر ءَ زورانسری آوار جنی ءِ نشانگ کنگ بیتگیں کمال بلوچ ءُ شعیب بلوچ کھول ءَ رسانکدر ءَ شنگ کنان ءَ گوشتگ کہ دو اکتوبر دوہزار بیست چار ءَ پاکستانی پوج ءَ گوادر ایف سی چیک پوسٹ چہ دورو کنڈگ ءَ کمال ء حاجی داد محمد جھمنند دشت شولی ءُ شعیب ء مراد محمد جھمنند دشت شولی دوئیں زورانسری آوار جنی ءِ نشانگ کنگ بیتگ اَنت چریشی ءَ پد دوئینانی درگت ءَ ھچ سرپدی نیست کہ چی ھال تہ ءَ اَنت-
کھول ءَ گوشتگ کہ شعیب ءُ کمال گوستگیں یک ماھے ءَ چہ بیگواہ ءَ اَنت ما انتزامیہ ءُ واکداراں گوں دوچار کپتگیں بلے مارا تھا تسل ءَ دیگ بیگ ء اِنت آ مرچی ناں باندا یل کنگ بیت بلے دوئیں ورنا انگت یل کنگ نہ بیتگ اَنت-
کھول رِد ءَ شعیب ءُ کمال کنٹانی ھور ءَ ڈیزل ءِ کاروبار ءَ چہ ھمگرنچ بیتگ اَنت لوگ ءَ روگ ءَ بیتگ اَنت چہ دورو کنڈگ چیک پوسٹ ءَ پاکستانی پوج ءَ آ آوار جتگ ءُ بیگواہ کتگ اَنت-
آیاں گوشتگ کہ ما وتی بیگواھیں دوستناکانی سلامتی درگت ءَ چہ سک دلسیاھیں انسانی ھکانی ادراھاں چہ دزبندی کن ایں کہ کمال ءُ شعیب ءِ یل کنائینگ ھاتر ءَ توار چست بہ کن اَنت دانکہ آیانی یل کنگ ممکن بہ بیت-
مستونگ ءَ زھرشانی کنوکاں شنگ شانگ کنگ ءُ بندیں دگ ءِ پچ کنگ ھاتر ءَ زھرشانی کنوکاں زورانسری پاد کنگ جُھد-
گیشیں ھالانی رِد ءَ مستونگ ءَ گوستگیں روچاں بمب تراک ءُ وئیل ءَ وانگجاہ ءِ چکانی بیرانی ءِ ھلاپ ءَ شھری مروچی سھب ءَ چہ شال کراچی بُنجاھی شھدگ سر ءَ نندانک دارگ اِنت گاڑیانی روگ آیگ بند کتگ وھدے کہ مستونگ ڈپٹی کمشنر ءِ کارگس دیم ءَ ھم شھریاں نندانک داتگ-
مستونگ ءَ زھرشانی کنوکانی لوٹ اِنت کہ مستونگ ءِ ڈپٹی کمشنر ءِ مٹ کنگ بہ بیت وھدے کہ مستونگ تراک ءَ ھمگرنچیں مردمانی پجّار درگت ءَ چہ رپوٹ شنگ کنان ءَ زوت دزگیری گامگیج ءَ بزور اَنت-
مستونگ نندانک ءِ سبب ءَ شال کراچی بُنجاھی شھدگ سر ءَ گاڑیانی دراجیں لین لگ اِتگ-
زھرشانی کنوکاں شنگ شانگ کنگ دگ پچ کنگ ءُ ڈپٹی کمشنر کارگس دیم ءَ نندانک سر ءَ شھریاں پاد کنگ ھاتر ءَ پولیس ءِ مزنیں کچے ءَ نندانکجاہ ءَ سر بیتگ ءُ شھریاں زورانسری دیر کنگ جُھد ءَ اِنت-
مستونگ زھرشانی کنوکاں گوشتگ کہ دانکہ واکدار ڈپٹی کمشنر ءِ مٹ کنگ جار ءَ شنگ نہ کنگ اَنت مستونگ بمب تراک ءَ ھمگرنچیں مردمانی ھلاپ ءَ شریں وڑے ءَ کاروائی ءِ دلجمی ندنت مئے نندانک برجاہ بیت-
آیاں گْوشتگ کہ اگاں پولیس ءَ تاکت کارمرز کنگ جُھد کُت گُڑا جوانیں وڑے ءَ گھگیری کنان ءَ گیش تُرندیں زھرشانی کن ایں-
پاکستانی پوج ءَ یک مردمے آوار جنگ ءَ پد ناشناسیں جاھے ءَ برتگ-
چہ ھب چوکی ءَ ھالانی رِد ءَ بیست دو اکتوبر ءِ شپ ءَ پاکستانی پوج ءَ ھب شھر ءِ الہ آباد ٹاؤن ءَ یک لوگے ءِ سر ءَ بیڑبرتگ ظفر گشگوری نامیں مردمے آوار جنگ ءَ پد وتی ھمراھی ءَ برتگ-
وسیلگ رِد ءَ ماھولیات ءِ تک ءِ کاردار ظفر گشگوری پاکستانی پوج دست ءَ دزگیری ءَ پد انگت دیم ءَ آرگ نہ بیتگ-
بلوچستان ءَ زورانسری آوار جنی ءِ وئیل دْرچ برجاہ ءَ اِنت گوستگیں روچ ءَ دہ بلوچ نودربر چہ راولپنڈی ءَ زورانسری آوار جنی ءِ نشانگ کتگ اَنت وھدے کہ اشی ءَ ساری اکتوبر ءَ زورانسری آوار جنیانی کچ ھشتاد ءَ سر بیتگ اَنت-
اکتوبر ماہ ءَ بلوچستان ءِ شھر چہ ھب چوکی ءَ تنی وھدے شش مردم زورانسری آوار جنی ءِ ھال سر بیتگ اَنت- وسیلگ رِد ءَ اے کچ بے کساس گیش اَنت بلے تُرس ءُ بیھار ءِ سبب ءَ بازیں کھولے رسانکدر دیم ءَ نیاگ ءَ اِنت-
دومی نیمگ ءَ بلوچستان ءَ ھوار پاکستان ءِ دگہ شھراں چہ زورانسری آوار جنی ءِ وئیلانی ھلاپ ءَ زھرشانی ءِ درچ برجاہ ءَ اِنت، زھرشانی کنوک بلوچستان ءَ زورانسری آوار جنیانی وئیل گر ءُ دار ءُ بیگواھیں مردمانی یل کنائینگ لوٹ کنگ ءَ اَنت-
بلوچ آبادی ءَ آیانی لوگاں چہ زورانسری در پہ در کنگ چکچینی ءِ پندل اِنت- میان استمانی مردم گامگیج بزور اَنت – بلوچ یکجھتی کمیٹی
بلوچ یکجھتی کمیٹی ءَ وتی درشان ءِ تہ ءَ گوشتگ کہ کیچ مند ءِ دمگ مھیر ءِ جھمنندیں زورانسری آیانی لوگ ءُ زمیناں چہ در پہ در کنگ ریاست نیمگ ءَ چہ بلوچ چُکچینی ءِ یک پندلے، پاکستانی پوج سکیورٹی نام سر ءَ دمگی زمینانی سر ءَ دستیگ کنگ پوجی بَنجل جوڑ کنگ ءَ اِنت چریشی ءِ آسر ءَ دمگی آبادی زورانسری وتی بُنکی لوگاں چہ در کنگ بیگ ءَ اَنت ءُ آیاں باھوٹی زند گوازینگ ءَ لاچار کنگ ءَ اَنت-
بی وائی سی ءَ گوشتگ کہ مھیر مند ءِ جھمنندیں وتی بُنکی لوگاں چہ در پہ در کنگ آیانی زندمان ءُ زمیناں ھترہ ءِ تہ ءَ کنگ ءَ اِنت، کہ بُنکی انسانی ھکانی مزنیں ھلاپ ورزی یے-
بلوچ یکجھتی کمیٹی ءَ میانی استمانی مردم ءُ انسانی ھکانی گلاں چہ دزبندی کتگ کہ آ بلوچستان ءَ بیوکیں درکانودی ءُ دمگی مردمانی ھکانی لگتمالی ءِ گامگیج بزور اَنت-
پاکستان ءِ بنجاھی شھر اسلام آباد ءَ بلوچ اسٹوڈنٹس کونسل ءِ سروکاں یک پریس کانفرنسے ءِ تہ ءَ گشتگ کہ بلوچستان یک پدمنتگیں استانے ءُ ایشی ءَ چہ ھم تعلیمی بحرانی آماچ انت، اود ءَ تعلیمی ادارھانی کوالٹی ءَ وتی بدتریں رنگ زرتگ۔ وانگ ءُ زانگ ءِ ادارگانی تہ ءَ ریاستی سیکورٹی ادارھانی ھست بوگ، نودربرانی چہ ھاسٹلاں پہ زور بیگواہ کنگ ءُ جنکانی ھاسٹلانی تہ ءَ آزار ءِ کیمرہ ایر کنگ بلوچستان ءِ وانگ ءُ زانگ ءِ جاورانی اِکس اِنت۔ ھمے جاوراں بلوچ نودربر لاچار کُت اَنت کہ آ اسلام آباد ءُ پنجاب ءِ وانگ ءُ زانگ ءِ ادارھانی نیمگ ءَ بچار اَنت، بلے اد ءَ ھم آیاں امن ءُ ایمنی ءِ وانگی چاگردے دست نہ کپت۔ اسلام آباد ءُ پنجاب ءَ بلوچ نودربر روچ پہ روچ وڑ وڑ ءَ تنگ کنگ بنت ءُ آ بیگواہ کنگ ءَ لاچار کنگ بنت کہ اے بلوچ نودربرانی سر ءَ زُلم ءُ زُوراکی ءِ بے رکّیں برجاھی اِنت۔
،
آئی ءَ گْوشتگ کہ بلوچ نودربرانی چیر عدالت زوراکی بیگواہ کنگ، پروفائلنگ ءُ تنگ کنگ ءِ وڑیں غیر آئینی ءُ ناجائزیں کارانی برجاہ دارگ سک دلپدردی ءِ گپ اِنت۔ گوستگیں روچ ءَ 31 اکتوبر ءَ ریاستی سیکورٹی ادارگاں راولپنڈی ءِ آئی جے پی میٹرو اسٹیشن ءِ نزیک ءَ یک بج ءَ بلوچ نودربرانی فلیٹ ءِ سر ءَ چھاپہ جتگ ءُ اود ءَ درائیں نودربر پہ زور بیگواہ کتگ اَنت۔ گاریں نودربرانی تہ ءَ نمل یونیورسٹی اسلام آباد ءِ 10 نودربر ھوار اَنت کہ آھانی تہ ءَ سلیم عارف، بالاچ فدا، خداداد، خلیل احمد، خلیل اقبال، حمل حسنی، بابر عطا، نور مہیم، افتخار عظیم، ءُ احسام اکبر ءِ میان اُستمانی چکاس برجاہ اَنت۔ . یک نومبر ءَ نودربراں وتی 10 بیگواھیں ھمکارانی پجارینگ ءِ ھاتر ءَ راولپنڈی ءِ نیو ٹاؤن پولیس اسٹیشن ءَ رپورٹ درج کنگ ءِ جھد کتگ بلے پولیس ءَ ایف آئی آر درج کنگ ءَ چہ انکار کتگ۔ پاکستان ءَ بلوچ نودربر آوار جنگ ءُ آوار جنگ ءِ گیش بوھوکیں کچ یک سکیں بلاھیں جیڑھے کہ ایشی ءَ گوں زوت گیش ءُ گیوار کنگ لوٹ ایت۔ ایشی ءَ چہ پیسر ائیرڈ ایگریکلچر یونیورسٹی راولپنڈی ءِ نودربر فیروز بلوچ 11 مئی 2022 ءَ یونیورسٹی لائبریری ءِ راہ ءَ زوراکی ءَ بیگواہ کنگ بوتگ ءُ دو سال ءَ گیش ءِ گوزگ ءَ ابید ھم آئی ءِ بابت ءَ ھچ دست نہ کپتگ۔ فیروز بلوچ ءِ ہمکلاس احمد خان بلوچ ہم چہ بلوچستان ءِ دمگ تربت ءَ پہ زور بیگواہ کنگ بوتگ۔ پہ آھانی وش بوھگ ءَ آمیدگساں انساپ ءِ اپیل ، زھرشانی ءُ کیمپانی بندوبست جتا جتائیں جاھاں کنگ بوتگ بلے تاں انوگ ءَ ھچ وڑیں پیشرفت نہ بوتگ۔
،
آئی ءَ گْوشتگ: شما اھوالکار بلوچ پجار ءِ بنیاد ءَ بلوچ نودربر ریاستی سیکورٹی ادارگانی نیمگ ءَ پہ زور بیگواہ کنگ بیگ ءَ اَنت۔ بلوچستان ءِ تہ ءَ انسانی ھکانی زبردستیں لگتمالی ءُ بلوچ نسل کشی ءِ ھلاپ ءَ چہ کیچ ءَ بگر داں شال ءُ پد ءَ چہ شال ءَ بگر داں اسلام آباد ءَ مارچ کنگ بوتگ کہ ایشی ءِ تہ ءَ زوراکی ءَ بیگواہ کنگ ءُ جعلی انکاؤنٹراں بیگواھیں مردمانی کُشگ ھم ھوار اِنت۔ ریاست ءِ زلم ءُ زوراکی ءِ ھلاپ ءَ اے روانک ءَ چہ بلوچستان ءَ ھزاراں مردم ھوار بیتگ اَنت ءُ ریاست ءِ زالمیں پالیسیانی سر ءَ وتی زھر ءُ زاری درشان کتگ اَنت بلے بلوچ راج ءِ رد ءُ بند ءَ ابید ھم ریاست وتی پالیسیانی تہ ءَ ھچ وڑیں بدلی آرگ ءَ ساڑی نہ اِنت۔ بلوچ اسٹوڈنٹس کونسل ءَ اسلام آباد ءُ پنجاب ءَ بلوچ نودربرانی زوراکی ءَ بیگواہ کنگ ءِ ھلاپ ءَ تچکیں گامگیج زورگ ءِ ھک ھست ءُ اے زلم ءُ زوراکی ءِ ھلاپ ءَ قانونی کارروائی ءَ ھوار ھرچ وڑیں گامگیج زورگ ءِ ھاترا جزم اِنت۔ پمیشکا ریاستی ادارگاں 24 کلاک ءِ وھد دیگ بیت کہ مئے 10 بلوچ نودربرانی زوتیں جان سلامتی ءِ ھاترا دلجم بہ بنت اگاں نہ ما سکیں گامگیج زورگ ءَ مجبور بئیں۔
روکپتی بلوچستان ءِ دمگ سراوان ءَ بندیگ جاہ ءَ بندیگیں بلوچے نادراہ بیتگ ءُ آسراتی ءُ ڈاکٹر ءِ نہ بوگ سوب ءَ بیران بیتگ۔
بیران بیتگیں مردم ءِ پجار دادلی مزارزھی چل ءُ پنچ سالی پسکوہ ءِ میتگ کلگ ابز جھمنند اِنت۔
بندیگ جاہ ءِ کارکنوک آ آدینگ ءِ روچ ءَ آئی ءِ کھول ءِ گوانکو رِینگ کُتگ ءُ آئی ءِ بیرانی ءُ جون ءِ برگ ءِ ھال داتگ۔
دادلی پنچ سال پیش ءَ نشئہ باپاری بھتام ءَ دزگیر بوتگ –
مستونگ بمب تراک ءُ بیرانیانی ھلاپ ءَ شھریاں زھرشانی کتگ، انساپ ءِ لوٹ کتگ-
بلوچستان ءِ دمگ مستونگ ءِ مھلوک ءَ مرچی سھب ءَ شال ءُ کراچی ءِ مزن شھدگ ءِ سر ءَ نندانک، زھرشانی کنوکاں گوستگیں روچ ءَ مستونگ ءَ بیتگیں بمب تراک وئیل ءِ ھلاپ ءَ زھرشانی یاداشت کنائینتگ-
مستونگ ءِ زھرشانی ءَ شھری ءُ سیاد ءُ وارساں بھر زرتگ ءُ وئیل ءِ ھلاپ ءَ اوگام جتگ۔
شال کراچی مزن شھدگ ءَ دھرنا ءِ سبب ءَ ٹریپک ءِ واستا بند کنگ بوتگ۔
ھمے وھد ءَ زھرشانی کنوکاں گْوشتگ کہ گْوستگیں روچ ءَ بوتگیں بمب تراک ءَ اسکول ءِ زھگاں وتی جان ندر کتگ اَنت وھدے کہ مستونگ ءَ اے وڑیں وئیلانی دیم ءَ آیگ ءُ پد ءَ بیگ بلوچ نسل کشی ءُ بژن ءِ کارے، وھدیکہ سرکار اے درگت ءَ گیر زمہ واری ءِ درشان ءَ دیگ انت-
زھرشانی کنوکاں چہ سرکار ءُ بُرز ءِ واکداراں لوٹ کرتگ کہ اے وئیل ءِ تہ ءَ ھواریں مردمانی ھلاپ ءَ ترندیں گامگیج زورگ بہ بیر اگاں ناں مستونگ ءِ نندوک ترندیں زھرشانی کنگ ءَ لاچار بنت ۔
زانگ بہ بیت کہ گوستگیں روچ ءَ بلوچستان ءِ دمگ مستونگ ءَ سول ہسپتال ءُ گرلز اسکول چوک ءَ پولیس ءِ موبائل ءِ نزیک ءَ بوتگیں تراک ءِ سبب ءَ 9 مردم بیران ءُ 15 ءَ چہ گیش ٹپیگ بوتگ انت۔
مستونگ ءِ نندوک ءُ بلوچ سیاسی گلاں اے وئیل ءَ را بلوچ نسل کشی ءِ نام داتگ ءُ چہ میان اُستمانی گلاں دزبندی کتگ کہ اے وڑیں وئیلانی گر ءُ دار ءِ واستا گامگیج بہ زور اَنت۔
