TBP Balochi

بیمناکیں اُرش

ٹی بی پی شونگال

نُھ نومبر ءِ سھب ءَ بلوچستان ءِ بنجاھی شھر شال ءَ ریڈ زون ءَ ریل ءِ اسٹیشن ءَ پاکستانی پوج ءِ نان کمیشنڈ آپسرانی یک یونٹے شال کینٹ ءَ پوج ءِ اسکول آف انفنٹری اینڈ ٹیکٹکس ءَ ھیلکاری سرجم کنگ ءَ پد واتر وتی ھنداں روگ ءِ واستا اود ءَ جاڑیگ بیتگ اَنت بلوچ لبریشن آرمی ءِ فدائی یونٹ مجید بریگیڈ ءِ مھمد رفیق بزنجو ءَ پدائی اُرش کتگ- اے اُرش پاکستانی پوج ءِ راجدپتر ءَ آیانی سر ءَ دومی بیمناکیں اُرش بیتگ – چریشی ءَ پوج ءِ سِی ءُ یک نان کمیشنڈ آپسر مرتگ ءُ پنجاہ ءَ گیش زدگ بیتگ اَنت-

آپریشن ھیروپ ءَ پد شال ءَ پاکستانی وزیر داکلہ مھسن نقوی ءَ گوشتگ ات کہ بلوچ سرمچار یک ایس ایچ او ءِ دست ءَ ھلاس بنت اِنت- گوستگیں روچ ءَ ریل اسٹیشن ءِ سر ءَ اُرش پد پاکستانی پوج ءِ چیپ آرمی عاصم منیر ءَ گوشتگ ات راجی زرمبشت ءِ آجوئی ءِ ھلاپ ءَ پوج ءَ مھلوک ءِ پلامرزی گون اِنت- اے درشان بلوچستان ءِ بنکی لیکھی جاوراں بے دلگوش اَنت پرچاکہ اگاں بلوچ مھلوک ءِ پلامرزی بلوچ آجوئی ءِ واستا پرکاریں سلاہ بندیں گلاں گون مہ بیت اِنت گڑا آیاں پاکستانی پوج ءِ سر ءَ مزنتریں اُرش سوبمند نہ بیتگ ات اَنت-

یک ماھے ءِ وھد ءَ چین ءِ زرکار ءُ پاکستانی پوج ءِ کارمندانی سر ءَ مجید بریگیڈ ءُ بی ایل اے انٹیلیجنس ونگ زراب ءِ دومی بیمناکین ءُ سوبمندیں اُرش اِنت- پاکستانی پوج ءِ پنجاب رجمنٹ، ناردن لائٹ انفنٹری رجمنٹ، سندھ رجمنٹ، فرنٹیئر پورس رجمنٹ، بلوچ رجمنٹ ءُ آزاد کشمیر رجمنٹ ءِ سپاھیانی سر ءَ درستیں سرپدیانی بنیاد ءَ سوبمندین اُرش، انٹیلیجنس ءِ اوست ءَ مجید بریگیڈ ءُ زراب ءِ زور ءِ تچکیں منانک انت-

اے اُرش اے گپ ءِ پدرائی اِنت کہ آیوکیں وھداں بلوچ لبریشن آرمی ءِ پدائی یونٹ مجید بریگیڈ ءُ انٹیلیجنس ونگ زراب چین ءُ پاکستان ءِ لشکری ءُ زرکاری بنجلاں ھوار درملکی زرکارانی لوٹانی سر ءَ بیمناکیں اُرش برجاہ بنت اِنت ءُ پاکستانی اُرد ءِ واکدارانی ٹاپارانی چَپ ءَ بلوچستان ءَ بلوچ آجوئی ءِ جنگ ءِ برانز گیش بیان بنت اِنت-

روکپتی بلوچستان ءِ بنجاھی شھر زاھدان ءَ پنچ روچ ءَ پیش ایرانی دادگاہ ءِ دست ءَ دزگیریں نیکراھی رھشون یل بیتگ-

یل بیتگیں نیکراھی رھشون ءِ پجار مولوی عبدالقھار میربلوچزئی ءِ نام ءَ زانگ بیتگ-

عبدالقھار میر بلوچزئی میرجاوگ ءِ امام جمعہ ءِ پیش امام انت کہ گوستگیں روچاں ایران ءِ آمیدگس ءَ تلب کتگ ءُ پد ءَ دزگیر کتگ بیتگ-

اھوالانی رد ءَ مولوی عبدالقھار ھما نیکراھی رھشوناں چہ یکے آ ایران ءِ سرکار ءِ سر ءَ ایراد گر ایت ءُ ناانساپیانی ھاتر ءَ درنگازی کنت اِنت-

آ گوستگیں پشمبے ءَ زاھدان ءَ اھل سنت ءِ سروک مولوی عبدالحمید ءِ گندوک ءَ شتگ بیتگ کہ اود ءَ آ دزگیر کنگ ءُ برگ بیتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں شال ءَ زورگریں پاکستانی پوج ءِ چیریں ادارہ ملٹری انٹیلجنس ( ایم آئی ) ءِ چاریگ دشتی خان تیرگواری کتگ کشتگ –

جارکش ءَ گوشتگ کہ سرمچاراں اے کاروائی گوستگیں شپ ءَ شال سریاب مل ھند سر ءَ کتگ-

جارکش ءَ گْوشتگ چاریگ دشتی خان کرد ء امان اللہ برما ھوٹل سریاب جھمنند بیتگ کہ جتاجتائیں جرمکاری ءَ بی ایل اے ءَ نام دپ بیتگ- اے جرمکاری ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءُ ملٹری انٹیلی جنس ءُ سی ٹی ڈی ءِ کمکاری ھوار اِنت-

جارکش ءَ گوشتگ کہ دُژمنیں چاریگ دشتی خان سریاب ءِ دمگ ءَ لوگانی سر ءَ بازیں رند ءَ بیڑبرگ ءُ دُژمنیں پوج ءِ ھمراھی ءَ ھوار بلوچ ورنایانی زورانسری آوار جنگ ءُ دورگیں میڑاں ورنایانی کوش ءَ تچکی ءَ ھوار بیتگ-

جارکش ءَ گْوشتگ کہ اے چاریگ بلوچ راج ءَ چہ زرگرگ، تُپنگ زور ءَ ورنایاں چمپروشی کنگ آیاں چاگردی سلکاریاں کارمرز کنگ ءَ ھوار بیتگ-

جارکش ءَ دیمتر ءَ گْوشتگ کہ راجی میارباری ءَ ھمگرنچ بیگ ءَ بلوچ راجی آمیدگس ءَ دشتی خان مرگ پرمان داتگ ءُ آ بی ایل اے ءِ سرمچارانی نشانگ تہ ءَ بیتگ چریشی ءَ گوستگیں شپ ءَ سرمچاراں گامگیج زرتگ-

جارکش ءَ درشان ءِ گُڈی ءَ گْوشتگ کہ بلوچ لبریشن آرمی چاریگ کوش زمہ واری ءَ منّ اِیت- اے نیٹورک ءَ چہ ھمگرنچیں دگہ مردم ھم دشتی خان وڑ ءَ زوت وتی گڈی آسر ءَ سر کنگ بنت-

بلوچستان لبریشن فرنٹ ءِ جارکش میجر گوھرام ءَ رسانکدر ءَ شنگ کتگیں درشانے ءَ ￴گوشتگ کہ سرمچاراں دہ نومبر ءِ ￵شپ ءِ ھشت ءَ ￴نوشکی ءِ ￵ھند زرین جنگل ءَ ￴برجاھیں دژمنیں پاکستانی لشکر ءِ چوکی ءِ ￵سر ءَ ￴اُرش کتگ۔ اُرش ءَ ￴دژمن ءِ ￵دو کارندہ مرتگ ءُ ￶چار ٹپی بیتگ اَنت۔

آئی ءَ گوشتگ کہ اُرش داں بیست دمان ءَ گوں ترندی ءَ ￴￴برجاہ بیتگ۔ اُرش ءَ ￴نوکیں سلاہ کارمرز کنگ بیتگ اَنت-

جارکش ءَ گوشتگ کہ سرمچارانی یکشلیں اُرشاں دژمن پروشی ءِ ￵آماچ کیتگ کہ چہ ھمے سبب ءَ ￴آ وتی جانی ءُ ￶مالی تاوان ءِ چیر دیگ ءِ ￴بے سوبیں جھد ءَ کنگ ءَ ￴اِنت۔

جارکش میجر گوھرام بلوچ ءَ گوشتگ ￴اُرش ءِ ￵زمہ واری ءَ ￴منّ ایں ءُ داں سرڈگار ءِ ￵آجوئی ءَ ￴دژمن ءِ ￵سر ءَ ￴سرمچارانی اُرش گوں ترندی ءَ ￴برجاہ بنت انت-

تھکاری وزیر سندھ ضیا الحسن لنجار ءََ کراچی ءَ آئی جی سندھ غلام نبی میمن ھمراھی ءَ پریس کانفرنس کنان ءَ ٹاہ داتگ کہ کراچی ایئرپورٹ ءِ نزیک ءَ گوستگیں روچاں چینی شھریانی سر ءَ وتکش تراک اُرش ءَ ھوار کمکاریں زالبول ھم دزگیر کتگ آئی ءِ پجّار گُلنساء نام ءَ چہ زانگ بیتگ-

آئی ءَ گْوشتگ کہ گاڑی تہ ءَ شوروانی وزن سی ءَ چہ چل کیلو بیتگ، گاڑی حب یا آئی ءَ چہ دیم دگہ دمگے ءَ برتگ، چار اکتوبر دوھزار بیست چار ءَ اے گاڑی چہ ھب ءَ کراچی ءَ آرگ بیتگ-

آئی ءَ گوشتگ کہ جاوید نامیں مردمے دراھیں چیزانی چار ءُ گوزار ءَ کنگ ءَ بیتگ، آئی ءَ ریکی کتگ، تراک ءَ چہ ساری اُرشکار ڈن نیمگ ءَ بیتگ، شپ یازدہ دو ملٹ ءَ وتکش تراک ءِ اُرش کتگ، وتکش تراکّار ءِ پجّار شاہ فھد پنّام آفتاب بیتگ، تراک ءِ جاگہ ءَ چہ گاڑی ءِ چیچز ءُ نمبر پلیٹ دزکپتگ اَنت، گاڑی یک شورمے ءَ چہ ھپتاد یک لک ءَ زیرگ بیتگ، گاڑی واستا زر چہ بینک ءَ راھدیگ بیتگ اَنت-

ضیا لنجار گوشگ اِنت پٹ پول ءَ پد زانگ بیتگ گاڑی ھمراھی ءَ یک رکشایے ھم بیتگ، رکشہ سواریں مردمانی نام فرحان ءُ آئی ءِ ھمراھی ءَ محمد شریف نامیں مردمے بیتگ-

گوستگیں شپ ءَ پورسز بنجل ءِ سر ءَ اُرش ءَ پد دمگ ءَ کرفیو جنگ بیتگ ، دؤر ءُ رؤگ ءِ راہ بند کنگ بیتگ اَنت ، دو ورنا پہ زور بیگواہ کنگ بیتگ اَنت ۔

بلوچستان ءِ دمگ کیچ ءِ ھند دشت کڈان ءَ چہ شنگ بوتگیں ھالانی رد ءَ گوستگیں شپ ءَ پاکستانی لشکر ءِ بنجل ءِ سر ءَ اُرش ءَ پد مزنیں کچے ءَ آپریشن بندات کتگ۔

ھالانی رد ءَ اُرش ءِ پد ءَ دمگ ءِ دکان ءُ وانگی ادارہ بند کنگ بوتگ انت ءُ کرفیو ءِ جنگ بیتگ۔

دمگ ءِ راہ ءُ در بند کنگ بوتگ انت وھدیکہ موبائل نیٹ ورک ھم بند کنگ بوتگ انت کہ چہ ایشی ءَ مھلوک ءِ تہ ءَ ترس ءُ بیم ودی بیتگ انت-

دمگی مردمانی گْوشگ اِنت کہ دمگ ءَ بالی گراب ءِ بال برجاہ اَنت ءُ مزنیں کساسے ءَ لشکری ​​دیم دیگ بیتگ انت۔

دشت پورسز ءِ آپریشن ءِ وھد ءَ طلال ء عمر ءُ عامر ء ابراھیم نامیں دو ورنا دزگیر کنگ بوتگ ءُ ناشناسیں جاھے ءَ برگ بیتگ انت ۔

دزگیری ءَ پد آیانی درگت ءَ دگہ اھوال دیم ءَ نیتکگ انت ۔

زانگ بہ بیت گوستگیں شپ ءَ دشت کڈان ءَ پاکستانی لشکر ءِ بنجل ءِ سر ءَ سلاہ بندیں مردماں اُرش کتگ کہ ایشی ءِ تہ ءَ یک افسرے نائیک سیف اللہ مرتگ ءُ 8 ٹپیگ بوتگ اَنت-

انگت ءَ ھچ گل ءَ اے اُرش ءِ زمہ واری نہ زرتگ بلے واکدارانی گمان اِنت کہ اے دمگ ءِ بلوچ آجوئی ءِ گل اے وڑیں اُرشانی تہ ءَ گون اَنت۔

دمگ ءَ برجاھیں آپریشن ءُ کرفیو ءِ سبب ءَ شھریانی ھمک روچی زند ءِ سر ءَ اسر کپگ ءَ اِنت ءُ رھوتی نزام ءِ بند بوھگ ءِ سبب ءَ گیشتریں ھالانی سر ءَ رسگ مشکل اِنت۔

جیش العدل ءَ گوستگیں شپ ءَ روکپتی بلوچستان ءِ دمگ سراوان ءَ ایرانی لشکر ءِ نیمگ ءَ بسیج ءِ کارندھانی سر ءَ اُرش ءُ جتائی درشان کتگ ءُ گْوشتگ کہ پنچ بلوچ بسیجیانی کوش سرکار ءِ سیکورٹی ادارگانی سازشی کارے گوں نپسیاتی ءُ سیاسی مول ءُ مراد انت- پمیشکا ما گوں دلجمی ءَ راج ءَ سرپد کن ایں کہ اے پنچیں مردم آر جی سی ءِ انٹیلی جنس آرگنائزیشن ءِ دست ءَ کُشگ بوتگ اَنت۔

بیان ءِ تہ ءَ گْوشگ بیتگ کہ بلوچستان ءِ مزھبی گل ءِ ھلاپ ءَ وڑ وڑیں پندل سازگ بیگ ءَ اَنت، اے پندل ءِ نوکیں دروشم بمپیشت ءِ سیمسر ءِ دمگ سرکان ءَ بلوچ باسیجیانی کُشگ اِنت۔ بے شک اے درستیں سازشانی مشترکہ لیکہ جیش العدل ءِ گل ءِ نام ءَ ھراب کنگ ءُ لس.مردمانی نیام ءَ دوری پیداک کنگ ءِ جھد اِنت۔

بلوچستان ءِ دمگ نوشکی ءَ پاکستانی پوج ءِ پوسٹ سر ءَ سلاہ بندیں مردماں اُرش ءِ نشانگ کتگ-

پاکستانی پوج ءِ پوسٹ گوستگیں شپ ءِ ساھت ھشت ءَ زرین جنگل ھند سر ءَ نشانگ کتگ-

دمگی وسیلگ رِد ءَ داں دیراں تیرگواری رِد ءَ برجاہ بیتگ-

واکدار ءَ اے درگت ءَ ھچ وڑیں درشان شنگ نہ کتگ – اے دمگ ءَ بلوچ آجوئی لوٹوکیں سلاہ بندیں گل پُرکار اَنت بلے اُرش زمہ واری انگت ھچ گل ءَ نہ زرتگ –

جھانی راجدپتر ءِ سر ءَ چمشانکے

نبشتہ کار: سمیع اللہ بلوچ

گڈی بھر

دی بلوچستان پوسٹ

آپی راہ چوں،کدی ءُ کَے شوہاز کُرتگ اَنت کے مروچی دنیا جہان ءِ آپی راہ جست انت ءُ دنیا ءِ یک سرے ءَ چہ دومی سر ءَ مردم آپی گُرابانی سر ءَ سپر کن اَنت ایشی ءِ سر ءَ من وتی اے گُڈی بھر ءِ تہ ءَ چمے جن آں-

وھدے روم ءِ تہ ءَ عیسائیانی چرچ سک زور آور بنت گڑا اے گپ ءِ منگ ءَ تیار نہ بنت کہ زمین مدام گردش ءِ تہ ءَ اِنت بلکیں چرچ ءَ اے گپانی سر ءَ مردم سزا داتگ انت ءُ کُشتگ انت بلے پانزدھمی کرن ءَ وھدے آپی راھانی شوہاز ءَ دراج دراجیں سپر کنگ بندات بیت گڑا ہمے گپ سابت بیت کہ زمین تہنا گردش ءَ نہ انت بلکیں گول اِنت ءُ روچ ءِ چپ ءُ چاگرد ءَ ترگ ءَ انت-

وھدے مارکو پولو ءِ سپر نامہ دیم ءَ اتک یورپ اجکّہ بیت ءُ ھندوستان ءُ چین ءِ سُھر ءُ دولتانی شوہاز بازیں مردمانی مکسد جوڑ بیت، اے ہمے زمانگ بیت “اسپین ءِ تہ ءَ چہ مسلمانانی زوال بندات بیت ءُ عیسائی عرب قوم ءَ در کن اَنت بلے تپاک نہ بنت وت ما وت ءُ سنہ 1492 عیسوئی ءَ “اراغون ءِ فرڈینانڈ ءُ کیسٹل ءِ اسبیلا” ءِ آروس کہ بیت گڑا عربانی دست ءَ پشت کپتگیں شھر تہنا “غرناطہ” بیت ءُ پنجاہ سال ءَ پد عیسائی مسلماناں اد ءَ چے ھوں در کن انت ءُ اسپین ءَ عیسائی وت ما وت تپاک بنت ءُ بادشاہی کن اَنت ءُ یورپ ءِ مستریں عیسائی تاکت جوڑ بہ انت ءُ دومی نیمگ ءَ تُرک قسطنطنیہ ءِ سر ءَ کابز بنت ءُ روکپت ءِ بازیں آپی ءُ ھشکی ءِ راہاں کنٹرول کن انت بلے یورپی شوہازگر وھدے زمین ءِ گول بوھگے راستی ءَ سرپد بنت گڑا زان انت کہ روبرکت ءِ نیمگ ءَ اگاں ما سپر بکناں ما ھندوستان ءُ چین ءِ آبادیں سرڈگاراں سر بوت کناں –

پانزدہمی کرن ءَ “پرتگیزی” رودرتک ءَ و “اسپینی” روبرکت ءِ نیمگ ءَ سپر بندات کن انت، اولی سر ءَ پرتگالی اپریکہ ءِ چَٹ روبرکتی نیمگ ءَ ” کیپ ورڈ” ءَ سنہ 1445عیسوئی ءَ شوہاز کن اَنت ءُ ہمے اُمیت ءَ دیم ءَ جُنزاں بنت کہ ھندوستان نوں نزیک اِنت بلے سرجمیں اپریکہ ءِ چِل سال ءَ تاں چکر ءِ جنگ ءَ رند سنہ 1486 عیسوئی ءَ پرتگیزی شوہازگر ” بارتھولومیوڈائز” اپریکہ ءِ زِر باری کُنڈ “راس امید” ءَ تا سر بوت کنت بلے لہتیں سالانی گوزگ ءَ رند دگہ یک پرتگیزی ناھدا ” واس کوڈے گاما” ہمے راہانی سر ءَ سپر کناں راس امید ءَ دیم ھندوستان ءِ شہر “کالی کٹ” ءَ سن 1494 عیسوئ ءَ سر بیت، سنہ 1510ء ءَ “گووآ” ءُ یک سال ءَ رند ” جزیرہ ملاکا” ءَ سر بنت ءُ رندا “جاوا” ءُ چین ءَ سنہ 1576 عیسوئ ءَ سر بنت ۔ ایشانی مکسد کبزہ کنگ نہ بیت بس وت ءَ پہ لہتیں وھداں ہمیدا جاہمنند کنگ لوٹ انت –

دومی نیمگ ءَ جنیوا ءِ یک نیزگاریں مردے بیت (جہان اسپین ءِ “کرسٹوفر کولمبس” ئے نام ءَ پجائے کاریت ) پہ ھندوستان ءُ چین ءِ شوہازگے واستا در پہ در بادشاہاں چہ کُمک لوٹگ ءَ انت آخر اسپین ءِ فرڈنیانڈ ءُ اسبیلا آمادہ بنت ءُ کولمبس ءَ 3 کسان کسانیں آپی جہاز، 88 مردم ءِ دینت ہمیشاں زوریت کولمبس سنہ 1492 عیسوئ ءَ وتی سپر ءَ نا مالومیں زمینے ءِ شوہاز ءَ بندات کنت، 69 روچ سپر کنگا رند کولمبس “جزائر غرب الہند” ءَ وتی کدم ھاں ایر کنت ءُ ہمے سرپد بیت ھندوستان شوہاز بوت ءُ زوت واتر اسپین ءَ روت ءُ پدا گوں بازیں آپی گُراباں و بازیں مردمے زوریت ہمے راہاں جزائر غرب الھند ءَ سر بیت ءُ “ریڈ انڈین” پیسرا چہ ھمد ءَ بنت کولمبس تا مریت روت ہمے سرپد بیت ھندوستان ئے شوہاز کُرتگ ۔۔ وھدے یورپ ءِ تہا رودرتک ءُ روبرکت ءِ نیمگا نوکیں مُلکانی شوہازگے ھال سر بیت گڈاں اسپین ءُ پرتگال اے نوکیں شوہاز بوتگیں مُلکانی سرا وتی وتی ھاکمیت ءِ دھویدار جوڈ بنت گڈاں عیسائیانی پوپ دوئیں مُلکانی وت ما وت جیڑہ ءُ جنگے ھلاس کنگے واستا سنہ 1493عیسوئی ءَ یک پرمان ءِ شنگ کنت “پرمان ھد بندی” ءِ نام ءَ نامدار اِنت ایشی تہ ءَ پوپ “جزیرہ ازورس” ءِ سئے سد میل روبرکت ءِ نیمگ ءَ گوریچان تا زربار یک پرزی لکیر ءِ کَش ایت ءُ پرمان کنت اے لکیر ءِ رودرتک ءَ پرتگیزی سجئیں گیر عیسائی ءُ روبرکت ءَ اسپین سجئیں گیر عیسائی ملکانی سر ءَ کبزہ کُرت کناں ءُ یورپ ءَ سرزمین اے پرمان ءَ چے در کن انت -وھدے روبرکت ءَ پرتگیزی تا چین ءَ رودرتک ءَ ءُ اسپینی تاں امریکہ ءَ سر بنت پرتگیزیانی تہا یک ناھدائے “فرڈنیانڈ مگیلن” ھوں بیت کے رندا وتی پرتگالی واجہاں چے دلگران و زہر بیت روت اسپینی ءِ جوڑ بیت ءُ سنہ 1519 عیسوئی ءَ وتی روبرکت ءِ نیمگ ءَ سپر ءَ بندات کنت ءُ مگیلن ءِ سپر ہما وھدانی دراجتریں سپر سابت بیت کے پنچ جہازانی تہ ءَ 270 ہمراہ زوریت زرباری امریکہ ءَ سر بیت ءُ بلے نہ جلیت بلکیں دیم پہ زِربار ءَ وتی سپر ءَ برجاہ داریت “بھر اوکیانوس” ءَ داریت تا براعظم زِرباری امریکہ ءَ چے یک تنکیں راہے ءَ گوزیت کے ایشی نام مرچاں “آبنائے مگیلن” اِنت ءُ “بھر الکاہل” ءِ تہا پُتریت تا اے وھداں مگیلن ءَ چاردہ ماہ لگیت ءُ یک جہازے چٹ تباہ بیت ءُ یکے بیگواہ ھوں بیت، نوں بھر الکاہل ءِ تہا گوں 3 جہازاں وتی سپر ءَ دیما بارت ءُ بھرالکاہل چہ بھراوکیانوس ءَ گیشتر ہاموش و پُرسکون بیت بلے انگت سکیں دراجیں سپرے بیت ءُ وھدے مگیلن ءِ جہاز ءِ تہ ءَ ورگ و وردن ھلاسی ءِ نزیک ءَ رس انت ءُ 108 روچ اول گوریچان ءَ پدا گوریچانی روبرکت ءِ نیمگ ءَ روان کنت ءُ گوں وتی عقل، ھوش ءُ گوں دلیری ءَ آخر “پِلپائن” ءِ جزیرہاں سر بیت پلپینی سک مہروان بنت بلے اسپینی سکیں مگرور و بد دماگیں مردم بنت ہمیشکا پلپینی ایشاں برداشت نہ کن انت ءُ بازینے کوشگ بیت بلے مگیلن دو پِلپینی سردارانی وت ما وتی داوا ئے ءِ تہ ءَ مریت ، اسپینی اسلا کیمتی مسالہانی شوہاز ءَ بنت ہمیشکا گیشتر جزیرہانی شوہاز ءَ دیم ءَ جُنزاں بنت بلے وتی یک جہاز ءِ پلپائن ءَ آس دینت نوں تہنا ایشانی دستا دو جہاز بنت گڈا سوڈگ کن انت کے یک گُرابے بھرالکاہل ءَ چے ءُ دومی راس امید ءِ راہاں واتر اسپین ءَ رونت بلے اولی گُراب باز دُور نروت کے پرتگیزیانی دستا کپیت بلے دومی گُراب “وٹوریا” گوں تہنا ہژدہ مرماں سنہ 1522 عیسوئی ءَ روانگی ءِ سئے سال رند اسپین ءِ شہر “اسبیلا” ءَ سر بیت ہمے بیت دگنیائے اولی آپی گُراب کے سرجمیں دگنیائے تر و تاب ءَ سرجم کرت کنت ۔۔ دگنیائے دومی سرا “کوریٹس” سنہ 1519 عیسوئ ءَ “میکسیکو” ءَ سر بیت ءُ اسپین ءِ شاہ ءِ نیمگاں چے “ازٹک سلطنت” ءَ فتح کنت ایشی ءَ رند سنہ 1530 عیسوئ ءَ “پزارو” گوریچانی امریکہ ءِ “اٹکا سلطنت” سر ءَ کابز بیت اے سلطنت ہما جاہ ءَ انت کہ وھداں “پیرو” بوتگ اسپینی وھدے میکسیکو ءُ پیرو ءِ سر ءَ کابز بنت گڑا سک باز سھُر ءُ نُگرہ اسپین ءَ دیم دینت کے یورپین ءَ نی واستا ھیرانی ءِ گپے بیت ءُ اسپین ہمے دولت ءِ سوْب ءَ سک تاکتور بیت ءُ چہ رودرتک ءَ بازیں سوداگری ءِ ھوں کنت اسپین ءُ پرتگال ءِ آپی راہانی شوہاز ءَ چے رند انگلستان، جرمنی، پرانس ءُ ہالینڈ ءِ مردمانی تہا ھوں دوریں سپرانی روگ و ایشیاء ءُ امریکہ ءِ راہانی شوہازے مزنیں جوش و جزبہ ءِ ودی بیت ۔۔ بلے اسپینی کورٹیس ءُ پزارو ءَ دو کوھنیں دودمان (مایا ءُ انکا) ءِ پشت کپتگیں آثار گوں وتی مکاری چالاکی تُرس و بیم ءَ چے چٹ ھلاس کُرت اَنت ۔۔ اسپینی و پرتگالی وتی بد دماگی، مگروری ءُ جہالت و زلم ءِ سوْب ءَ سک نامدار بنت بلے دلیر و مہم باز بنت دگنیائے تہ ءَ وتی پد اِش تا روچ مروچی ایر کُرت انت-

نوٹ : اے دراجیں چمشانک ءِ تہ ءَ منی تھنا مکسد یکین اِنت کہ ھرچ مردمے ءَ اگاں اے ارزشت داروکیں کتاب نہ ونتگ ءُ دگنیا ءِ تہ ءَ بوھوکیں بدلیاں چے شری ءَ سرپد نہ انت یانکہ وھد ءُ تاریخاں چے پراموش اَنت یا ناسرپد انت گڑا بگندے کمکے بوت اِش بہ کنت۔