TBP Balochi

بلوچستان لبریشن فرنٹ ءَ دشت کھڈان ءَ پاکستانی پوج ءِ سر ءَ اُرش ءَ آفیسرے ءَ ھوار شانژدہ کارمندانی کوش ، شھید لیفٹیننٹ جمال بلوچ ءِ سھرچکیں دروت ندر کنگ ءُ آواران، کیچ ءُ مچ ءِ اُرشانی زمہ واری منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ گْوشتگ کہ مئے سرمچاراں دہ نومبر دوھزار بیست چار ءَ یکشمبے ءِ بیگاہ پنچ ءَ کیچ ءِ دمگ دشت کھڈان ءَ برجاھیں زورگریں پاکستانی پوج ءِ بُنجل دو نیمگاں چہ انگر ءَ کتگ اشی ءِ سر ءَ نوکیں ءُ مزنیں سلاھاں گوں اُرش کتگ- اُرش ءَ پاکستانی پوج ءِ یک آفیسرے ءَ ھوار شانزدہ پوجی کارمند جاہ پہ جاھی مرتگ ءُ بازین ئِے ٹپی بیتگ اَنت- اُرش ءَ دُژمن ءَ سک مالی تاوان چست کنگ کپتگ-

جارکش ءَ گْوشتگ کہ اُرش ءَ ساری سرمچاراں سرجمیں دمگ ءِ آؤکیں ءُ رؤکیں راہ ءُ در بند کتگ اَنت پد ءَ دُژمن ءِ بُنجل سر ءَ اُرش کتگ – اُرش ھمے وڑ تُرند بیتگ پروش وارتگیں دُژمنیں پوج ءَ گیگ کنگ موہ نہ رس اِتگ-

جارکش ءَ گْوشتگ کہ دُژمن ءِ کمک ءَ آؤکیں پوجی کارمندانی سر ءَ ھم سرمچاراں اُرش کتگ چریشی ءَ دُژمن ءَ گیش جانی ءُ مالی تاوان چست کنگ کپتگ-

جارکش ءَ گْوشتگ کہ اُرش ءَ بی ایل ایف انٹیلجنس ونگ ءُ قربان یونٹ ءِ سنگتاں ھم بھر زرتگ – سرمچاراں دُژمن ءِ بُنجل سر ءَ نوکیں ءُ مزنیں سلاھاں چہ تُرندیں اُرشے کتگ ءُ بُنجل نزیک ءَ سر بیگ ءَ سرمچاراں بُنجل ءِ پھازوکی دیوال ءُ سنگر راکٹ گولھاں چہ نشانگ جوڑ کتگ ءُ تباہ کتگ اَنت- سرمچاراں دُژمن ءِ بُنجل تہ ءَ پُترتگ ءُ سلاھانی دستیگ کنگ ءَ بیتگیں کہ ھمے میان ءَ قربان یونٹ ءِ سرمچار شھید لیفٹنینٹ جمال بلوچ شھید بیتگ- چریشی ءِ سبب ءَ سرمچاراں وتی شھیدیں سنگت ءِ میت زرتگ چہ اود ءَ پہ سلامتی درتکگ اَنت-

جارکش ءَ گْوشتگ کہ اے اُرش ءَ بی ایل ایف ءِ سرمچار لیفٹیننٹ جمال بلوچ پنّام ءِ ناکو ابراھیم ء مولا بخش جھمنند سری بازار تمپ ، گومازی دُژمن ءِ گوم ءَ گوں بامردی جنگ کنان ءَ شھید بیتگ-

جارکش ءَ گوشتگ کہ شھید جمال بلوچ ءِ جُھد، کرد ءُ دیمونی مئے واستا یک درچتگیں راھے، ما آئی ءِ بے بھائیں جُھد ءُ بے میں دیمونی ءَ سھرچکیں دروت ندر کن ایں-

میجر گْوھرام بلوچ ءَ گْوشتگ کہ شھید لفٹینینٹ جمال بلوچ سیاسی دروشم ءَ پھتو ءُ جنگی بودناکی ءَ چہ سرریچ یک تجربہ کاریں سرمچارے بیتگ، آ دوھزار دہ چہ بلوچ آجوئی ءِ زرمشبت ءَ بی ایل ایف ءَ گوں بندوک بیتگ، دو سال ءَ شھری نیٹورک ءَ کار کنگ ءَ پد وھدے آ دُژمن ءِ نگاھانی تہ ءَ اَتکگ گُڑا دوھزار دوازدہ ءَ اوتاک ءَ سر بیتگ ءُ جوانیں وڑے ءَ بھر بیتگ-

جارکش ءَ گوشتگ کہ شھید سرمچار لیفٹینٹ جمال بلوچ پنّام ناکو ابراھیم ءَ سیاھجی، مزبند ، کُلبر ، زامران ، بلیدہ ءُ بالگتر ءَ زورگریں دُژمن ءِ ھلاپ ءَ اُرشاں بھر زرتگ ءُ دُژمن ءَ را سک جانی ءُ مالی تاوان داتگ ، آ وتی مھنت، جنگی بودناکی، بامردی ءُ اوپار ءِ سبب ءَ یک بیسھی سنگتے بیتگ، شھید وتی سیاسی زانت ءِ سبب ءَ چہ گل ءِ ادارہ ءُ بُنجلاں مھکمی واستا ھم ھاسیں کردے پیلو کتگ –

آئی ءَ گْوشتگ کہ دشت کھڈان اُرش ءَ شھید جمال بلوچ سرمچارانی بنداتی ٹولی ” قربان یونٹ ءِ ” کمان کنگ ءَ بیتگ – ا سنگتانی کمک ءَ چہ بُنجل نزیک ءَ سر بیتگ ءُ دُژمن لڑانی تہ ءَ سروکنوگی ودی کنگ سوبمند بیتگ-

جارکش ءَ گْوشتگ کہ شھید لیفٹیننٹ جمال بلوچ ءَ یک سالے ءَ ساری قرنان یونٹ ءِ بھر بیتگ ءُ وتی زمہ واری جوانیں وڑے ءَ پیلو کتگ اَنت – اے اُرش ءَ قربان یونٹ ءِ سنگتانی کمان کنان ءَ آ شھیگ بیتگ ءُ راجدپتر ءِ تہ ءَ نمیران بیتگ-

جارکش ءَ گوشتگ کہ بی ایل ایف بلوچ راج ءِ کمک ءُ پلامرزی ءَ یک مھکمیں جنگی ءُ سیاسی سیاسی کار راھبنداں چہ دُژمن ءَ زوت وتی سرڈگار ءَ چہ در کنگ ءَ لاچار کنت ءُ ھمے وڑ دشت راج ءَ سرمچارانی جوانیں وڑے ءَ کمک کتگ اے گپ پدر بیت کہ راج بلوچ سرمچارانی ھمکوپگی ءَ اوشتاتگ اَنت-

آئی ءَ گوشتگ اُرش ءِ تامُر زوت شنگ کنگ بیت-

جارکش ءَ گُڈی ءَ گْوشتگ کہ بلوچ لبریشن فرنٹ وتی شھیدیں سنگت جمال بلوچ ءَ سھرچکیں دروت ندر کنت ءُ اے کول کنت کہ بلوچستان ءِ آجوئی ءَ تاں دُژمن سر ءَ اُرش برجاہ بنت ءُ بلوچ راج ءِ کمک ءَ چہ راجی آجوئی ءِ بے مَٹیں مول مراداں دزگپت-

جارکش ءَ دگہ درشانے ءَ گوشتگ کہ مئے سرمچاراں آواران ءِ دمگ گیشکور ھور ءَ یازدہ نومبر دوشمبے ءِ ساھت سے ءَ لیویز چیک پوسٹ سر ءَ اُرش کتگ اود ءَ ھستیں سرجمیں سلاہ دستیگ کتگ ءُ لیویز کارمند بلوچ ءُ مردمگری ءِ ھاتر ءَ یل داتگ اَنت-

جارکش ءَ گوشتگ کہ دگہ اُرشے یازدہ نومبر ءِ شپ ھشت چل ملٹ ءَ مچ بولان شھر ءَ پولیس تھانہ سر ءَ دستی بمب اُرشے کتگ ءُ پولیس کارمندانی واستا یک کڈنے کہ آ ریاستی پلامرزی ءَ پھریز بہ کن اَنت-

جارکش ءَ گوشتگ کہ سرمچاراں کیچ ءِ دمگ بالگتر گڈگی ءَ واٹر سپلائی ءَ برجاھیں زورگریں پاکستانی پوج ءِ چوکی یازدہ نومبر شپ ھشت ءَ نوکیں ءُ مزنیں سلاھاں چہ اُرش کتگ ءُ چریشی ءَ پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ بالگتر ءَ دومی اُرش ھما وھد ءَ چمگ ھند سر ءَ کتگ چریشی ءَ زورگریں پوج ءِ سر ءَ مزنیں سلاہ کارمرز کتگ چریشی ءَ پوج ءَ تاوان ءِ دیمپانی کنگ کپتگ-

آئی ءَ گوشتگ کہ دگہ یک اُرشے سرمچاراں دوازدہ نومبر سے شمبے ءِ بیگاہ ءِ ھپت نیم ءَ کیچ ءِ دمگ گورکوپ ءَ زورگریں پوج سر ءَ نوکیں وتکاریں سلاھاں چہ اُرش کتگ دُژمن ءَ جانی ءُ مالی تاوان چست کنگ کپتگ-

جارکش ءَ گوشتگ ما سرجمیں دمگی پورس لیویز ءُ پولیس ءَ کڈن کن ایں کہ آ راجی زرمبشت ءِ ھلاپی پرکاریاں ءُ سرمچارانی سُر پُرانی نگاہ ایر کنگ ءَ پھریز بہ کن اَنت-

جارکش ءَ گوشتگ بی ایل ایف تچک کنت کہ بی ایل ایف ءِ مول آجو ڈیھ ءُ آجو ڈیھ ءِ واب ھاتر ءَ مئے ھزارانی سرمچار بلوچ سرڈگار ءِ پھازگ ھاتر ءَ وتی سر اش داتگ اَنت-

راجی شھیدانی مول ءُ مراد راجی گھبودی ءِ ھاتر بوتگ ھمے فلسفہ ءِ بنیاد ءَ ما نہ لوٹ ایں کہ مئے دست ءَ یک بلوچے ءَ تاوان بہ رس اِیت، بلکیں ما اے ھم سرپد کنگ لوٹ ایں کہ راجی میارباری ءِ ھر مردم مجرم اِنت ءُ مجرم ءِ سزا مرگ اِنت-

جارکش ءَ گْوشتگ کہ بلوچستان لبریشن فرنٹ اے اُرشانی زمہ واریاں منّ اِیت ءُ بلوچستان ءِ وتواجھی ءَ تاں ریاستی پوج ءَ نشانگ کن ایں-

بلوچ لبریشن آرمی ءِ آفیشل میڈیا چینل ھکل ءَ شال ءَ پاکستانی پوج ءِ کارندھانی سر ءَ وتکش اُرش کنوکیں اُرشکار رفیق بزنجو پنام ءِ وشین ءِ گڈی کلوھی تامر بند شنگ کتگ-

تامر بند ءِ بندات ءَ بی ایل اے مجید بریگیڈ فدائی ناشناسیں کوھے ءَ ھیلکاری ءَ گندگ بیت اِنت-

تامری کلوہ ءَ رفیق بزنجو پنام ءِ وشین گوش ایت کہ مروچی من وتی منزل ءِ نیمگ ءَ روگ ءَ آں، من وتی زمین ھاک ءِ واستا کربان بوگ ءِ پیسلہ کتگ- اے ھما شھیدانی پاک ءُ پلگاریں راہ انت کہ آیاں وت ءَ ڈیھ ءِ واستا کربان کتگ ءُ اے کلوہ داتگ کپ بلوچستان مئے مات انت، مئے گلزمین انت- ایشی ءِ پھریزگ مئے پرز انت ھرچ ڈنی الگار اتکگ اَنت ما کربانی داتگ ءُ گلینتگ انت ءُ ما وتی سرڈگار ءِ سر ءَ دری زورگری ءَ دیست کت نہ کتگ اَنت-

آئی ءَ گوشتگ ھزاراں شھیدانی راہ وت ءَ اے راہ ءَ کربان کتگ ءُ اے درچ مروچی ھم جاری انت – راج ءِ دیم ءَ دراھیں چیز پدر اَنت ،راج گندگ اِنت ورنا، مئے گوھار ڈیھ ءِ واستا کربان بوگ ءَ اَنت- من اے گپ ءَ تچک کنگ لوٹ آں جنگ ءَ ابید جنگ ءَ ترندی ءَ ابید مئے واستا دگہ راہ نیست اِنت دگہ دراھیں راہ بند کنگ بیتگ اَنت-

بی ایل اے ءِ فدائی گوش ایت کہ مارا اے سرپد بوگی انے کہ زوت ءَ زوت بازیں کچے ءَ وتی ڈیھ، وتی سرڈگار ءِ واستا بساد ءِ کچ ءَ کار بہ کن ایں ءُ زوت اے دیھاں وتی جان ءَ بہ پھریز اِنت- مروچی اے پیسلہ ءِ زورگ ءَ پف ما زان ایں روگ ءَ پد ما واتر نیا ایں ءُ مرگ ءِ ھچ شوک نیست انت بلے اے چیز تچک کنگی اِنت کہ بلوچ ءُ بلوچستان ءِ ھاتر ءَ کربان بوگی اِنت دانکہ مئے آیوکیں نسل آجو بہ بیت ءُ یک وشھالیں زندے بہ گوازین ایت-

فدائی رفیق بزنجو ءَ گوشتگ کہ من راج ءَ، وتی ورنایاں اے کلوہ ءَ دیگ لوٹ آں کہ بیا اِت اے جنگ ءِ بھر جوڑ بہ بیت – ایشی ءَ وتی بھر سرپد بہ بیت ءُ اے جنگ ءَ دیم ءَ بہ بر اِت – مئے شھیدانی ھمے کلوہ بیتگ کہ منی ھم ھمے کلوہ اِنت آیوکیں وھد ءِ درکاری ھم ھمیش اِنت ما یکجاہ بہ بہ ایں اے جنگ ءَ دیم ءَ بہ بریں-

آ گوش ایت مروچی ما وت ءَ کربان کنگ ءَ ایں اے گپ ءَ سرپد انت کہ اے چیز ءَ تچک ءَ گندگ ءَ ایں کہ جنگ ءِ بھتریں رنگ ترندی ءَ دیم ءَ روگ ءَ انت مارا ستک اِنت کہ آیوکیں نسل یک وشھال ءُ آجوئیں بلوچستانے ءَ گند انت ءُ آئی ءِ سر ءَ وتی زند ءَ گوازین اَنت مئے جھد ھمیش بہ بیت ءُ آیوکیں ورنایانی جھد ھم ھمیش بہ بیت وتی زمین ءِ پھریزگ ءَ وت اے جنگ ءَ دیم ءَ بہ بریں ءُ جنگ ءَ وتی سرپد بہ بہ ایں-

بلوچستان ءِ دمگ چہ کیچ ءُ ڈیرہ بگٹی ءَ پاکستانی پوج ءَ دگہ پنچ مردم زورانسری آوار جتگ ءُ بیگواہ کتگ اَنت-

گیشیں ھالانی رِد ءَ کیچ ءِ دمگ چہ دشت کھڈان ءَ پاکستانی پوج ءَ دمگی بازار ءَ بیڑبرتگ ءُ دگہ سے ورنا زورانسری بیگواہ کتگ اَنت-

زورانسری آوار جنی ءِ نشانگ کنگ بیتگیں مردمانی پجّار بلنگور ءِ جھمنند دکاندار اسماعیل ء اسحاق، نودربر عمران ء ستار ءُ دشت ءِ جھمنند ڈاکٹر لیاقت علی ناماں چہ بیتگ اَنت-

دمگی وسیلگ رِد ءَ پوج دست ءَ بیگواہ اے مردم مبارک قاضی ءِ یات ءَ برجم دارگ بیتگیں مراگش ءَ بھر زیرگ ءَ کھڈان آیگ ءَ بیتگ اَنت، وھدے کہ ڈاکٹر لیاقت دشت مکسر مروچی سھب ءَ پاکستانی پوج ءَ یک بیڑے ءِ میان ءَ بیگواہ کتگ-

زانگ بہ بیت کہ اے دمگ ءَ گوستگیں روچاں ایف سی بُنجل سر ءَ اُرش ءَ پد پوج ءَ دمگ ءَ لشکر کشی بندات کتگ ءُ تنی وھدے پنچ مردم پاکستانی پوج ءِ دست ءَ بیگواہ کنگ بیتگ اَنت-

گوستگیں روچ ءَ پاکستانی پوج ءَ لشکر کشی ءِ میان ءَ چہ کھڈان ءَ طلال ء عمر ءُ عامر بلوچ ء ابراھیم نامیں دو مردم آوار جتگ ءُ بیگواہ کتگ اَنت چریشی ءَ پد دوئیں ورنا بیگواہ اَنت-

ھمے وڑ چہ ڈیرہ بگٹی ءَ سر بیتگیں ھالانی رِد ءَ دو روچ ءَ پاکستانی پوج ءَ ظفر احمد ء عطا محمد بگٹی بازار بُنجاھی دگ سر ءَ برجاہ بھاگیا ھوٹل دیم ءَ وھدے کہ احمد علی پنّام ءِ ڈیو فیض علی بگٹی دوشمبے ءِ سھب ءَ چہ ڈیرہ بگٹی شھر ءَ آوار جتگ ءُ بیگواہ کتگ-

پولیس ءِ آیگ ءَ جاورگیش ناگیگ بوگ، نودربرانی دزگیرہ برجاہ-

شال ءِ بلوچستان میڈیکل کالج ءَ بلوچ ءُ پختون نودربر گلانی نیام ءَ بوتگیں جیڑہ ءِ پد ءَ پولیس ءَ کالج ءِ سر ءَ اُرش کتگ ءُ بازیں نودربرے زوراکی ءَ پد دزگیر کتگ انت۔

اھولانی ءِ رد ءَ شال ءِ پولیس ءَ بولان میڈیکل کالج ءِ ھاسٹل ءِ سر ءَ اُرش کتگ ءُ سرجمیں ھاسٹل وتی دست ءَ زرتگ ءُ ھاسٹل ءِ تہ ءَ آنسو گیس ءِ کارمرد کنگ ءُ زور ءَ دزگیر کنگ ءِ کوشست بیگ ءَ اِنت ۔

نودربرانی گشگ ءِ رد ءَ کالج ءِ ہاسٹل ءَ نودربرانی نیام ءَ کسانیں جیڑھے بوتگ کہ پولیس ءِ ہاسٹل ءِ سر ءَ اُرش کنگ ءَ چہ اے جیڑھ ءِ گیش بوتگ۔

بلوچ نودربرانی بھتام انت کہ پولیس ھم لھتیں بااسریں نودربرانی کمک ءَ کنگ ءَ انت ءُ بلوچ نودربر نشانگ جوڑ کنگ ءُ ٹارچر کنگ بوھگ ءَ انت۔

بلوچ نودربراں پولیس ءُ کالج ءِ انتزامیہ ءَ گوں تچک ءَ بیھار داتگ کہ اگاں کسے نودربر ءَ تاوان رس ایت گڑا پولیس ءُ کالج ءِ انتزامیہ ءِ زمہ وار انت ۔نودربراں گوں بلوچستان ءِ مھلوک ءَ دزبندی کتگ کہ اے پولیس ءِ زبردستی ءِ ھلاپ ءَ توار چست بہ کن اَنت ءُ جاورانی کنٹرول کنگ ءِ ھاترا زور بہ دئے اَنت۔

نودربرانی گشگ ءِ رد ءَ پولیس ءُ انتزامیہ ءِ نیمگ ءَ گوں آھاں ناانساپی کنگ بوھگ ءَ اِنت۔ پورسز ءَ جتا جتائیں نودربر دزگیر کتگ اَنت، ءُ آنسو گیس ھم کارمرز کنگ بوتگ کہ ایشی ءِ تہ ءَ بلوچ زالبولیں نودربر ھم سک باز تاوان دیگ بوتگ اَنت۔

ناشناسیں مردماں پاکستانی پوج ءِ سے جتاجتائیں اُرشاں نشانگ کتگ اَنت-

ھالانی رِد ءَ سے شمبے ءِ روچ ءَ بلوچستان ءِ دمگ مستونگ ءُ کیچ ءَ سے جتاجتائیں اُرشاں پاکستانی پوج بُنجل ءُ چیک پوسٹ نشانگ کتگ اَنت، چریشی ءِ آسر ءَ پاکستانی پوج ءَ جانی ءُ مالی تاوان ھال اِنت-

چہ مستونگ ءَ سر بیتگیں رِد ءَ، ناشناسیں مردماں مستونگ شھدگ سر ءَ کیڈٹ کالج کراس ھند سر ءَ برجاھیں پوج چیک پوسٹ اُرش نشانگ کتگ، اود ءَ اُرشکاراں چیک پوسٹ سر ءَ تُرندیں تیرگواری کتگ-

مستونگ پوج ءُ سلاہ بندیں اُرشکارانی میان ءَ تیرگواری رِد داں دیراں برجاہ بیتگ، چریشی ءَ پد اُرشکار تچگ ءَ سوبمند بیتگ اَنت-

دومی نیمگ ءَ بلوچستان ءِ دمگ کیچ ءِ دمگاں ھوشاپ ءُ تربت ءَ دو جتاجتائیں اُرشاں پاکستانی پوج بُنجل نشانگ کتگ اَنت، چریشی ءَ پاکستانی پوج جانی تاوان ھال اِنت-

وسیلگ رِد ءَ ھوشاپ اُرش ءَ پد پوج ءَ دمگی بازار سر ءَ بیڑبرتگ ءُ دو ورنا دزگیر کتگ ءُ بُنجل ءَ برتگ اَنت-

زانگ بہ بیت کہ بلوچستان ءَ پوج ءِ بُنجل گیشتر دمگی آبادی میان ءَ جوڑ کتگ، اود ءَ بلوچ آجوئی لوٹوکیں سلاہ بندیں گلاں اُرشاں پد پوج ءَ باز رند ءَ دمگی آبادیانی سر ءَ بیڑبرتگ ءُ لوگاں زورانسری بیگواہ کتگ اَنت-

بلوچستان ءَ پوج سر ءَ اُرشانی زمہ داریاں گیشتر بلوچ آجوئی لوٹوکیں سلاہ بندیں گلاں زرتگ اَنت- اے اُرشانی زمہ واری انگت ھچ گلاں نہ زرتگ اَنت-

بلوچستان ءِ دمگ پنجگور ءَ پجّار نہ بوتگیں سلاہ بندیں مردماں پاکستانی پوج نیمگ ءَ چہ پٹ کنگ بیتگیں بازیں کیمرھی تیرگواری کتگ ءُ تباہ کتگ اَنت-

گیشیں ھالانی رِد ءَ پنجگور ءِ دمگ پروم کلہ کور ھند سر ءَ پاکستانی پوج نیمگ ءَ جتگیں کیمرہ نشانگ کنگ ءُ تباہ کنگ بیتگ اَنت-

وئیل درگت ءَ واکدار درشان دیم ءَ نیتکگ اَنت-

زانگ بہ بیت کہ بلوچستان ءَ اشی ءَ ساری ھم ھمے ور وئیل دیم ءَ اتکگ اَنت آیانی زمہ واری بلوچ آجوئی لوٹوکیں سلاہ بندیں گلاں زرتگ اَنت-

بلوچ سلاہ بندیں گلانی گوشگ اِنت کہ پاکستانی پوج ءَ سرجمیں بلوچستان ءَ ھمے وڑ کیمرہ جتگ دانکہ آ وتی سر ءَ اُرش ءَ بلوچ سرمچارانی سُر پُراں ارزانی ءَ دیست بکنت ءُ اے کیمرھاں چاریگری ءِ واستا کارمرز کنت-

بلوچستان ءِ دمگ چہ ھاران ءَ پاکستانی پوج ءَ یک مردمے آوار جنگ ءَ پد بیگواہ کتگ-

بیگواہ کنگ بیتگیں ورنا ءِ پجّار وسیم ء سعید احمد نام ءَ چہ بیتگ-

اے مردم یک کسابے کہ آ زی نیم روچ دوازدہ ءَ پاکستانی پوج ءَ چہ ھاران گواش دگ آئی ءِ دکان آوار جتگ ءُ بیگواہ کتگ-

مئے بلوچ ءُ بلوچستان مئے سرزمین مئے وَتن

نبشتہ کار : بانُک مھمونہ بلوچ

رجانکار : بْرمش شاشانی

دی بلوچستان پوسٹ

مئے بلوچ ءُ بلوچستان مئے سرزمین مئے وَتن ءُ مَات ءُ پِت بْرات ءُ گْوھار مئے مَکھیں مَات ءُ جنّتیں پِت مئے بانُکیں گْوھار پرچا دَگانی سر ءَ کَپتگ اَنت ءُ مئے گْوھارانی سریگ چَہ سر ءَ دُور کَنگ بیگ ءَ اَنت مئے گْوھار پرسیگ اَنت ۔ ءُ مَنی مَکھیں مَات مئے مَکھیں مَات آجز اَنت ءُ اتکگ اَنت دَگانی سر ءَ کَپتگ اَنت شُما کُل بلوچ زان اِت کہ مئے بلوچ راج ءُ بلوچستان چون اِنت کُجام ھَالَانی تَھ ءَ اِنت ءُ مَنی جنّتیں پِت مئے پِت وَتی چُکّاں چَہ وَتی لُوگاں دَر کَن اَنت گُش اَنت بُرو اِت دِیم پَہ وَتی وَانَگ ءُ زَانَگ ءَ ھَمے چُک وان اَنت چینچو باریں وان اَنت پَد ءَ ھمیشاں بَارت ءُ بیگواہ کَنت پِت وَتی دْراھیں زَرّاں ءَ پَہ وَتی ھمے چُکاں رَاہ دَے اَنت ھمے چُک ءَ بَارت گَار ءُ بِیگُواہ کَنت-

چینچُک باریں اِے ورنایانی دِل ءِ مُراد پَشت کَپ اَنت مئے ھَمدِلیں بْرات مَا وَتی دِل ءِ دْراھیں مُراد ءَ سر کَناں پَہ وَتی بْراتاں پرچا بلوچ لَاچَار اِنت دِگہ کُوم ھَست دِگہ مردُم ھَست آ پرچا نَہ اَنت ؟ بس ھُدا ءَ ھمے وڑ آؤرتگ کہ بلوچ اَنچوش لَاچَار بِہ بیت ءُ بلوچ ھمے وَڑ دَگانی سر ءَ بِہ کَپ اَنت مئے مَات ءُ پِتانی دْراھیں امروز اَنچوش بہ روت ؟ مئے مَات ءُ پِت اَنچوش دَگانی سر ءَ بِہ کَپ اَنت مئے مَات ءُ پِتانی اَرس اَنچو بِہ بَنت ؟ مئے گْوھار اَنچو پُرسیگ بِہ بنت پَہ وَتی لَاڑُوکیں بْراتاں کَس ھچ مَہ گُش اِیت ؟ مئے مَات ءُ پِت ھچ نَہ زان اَنت مئے نام چون نِبِشتہ بیت کمّو اَرمان بِہ بیت مَنی جِند ءِ مَات ءُ پِت ءَ مَن ءَ گُشتگ کہ وَانَگ ءُ زَانَگ چی ءَ گُش اَنت شُما پرچا انچوش پَند جَن اِت اِنچو دُور رو اِت ھَمد ءَ نند اِت لوگ ءَ ! نُو مَنی مَات ءُ پِت ءَ گُمان بُوت کہ وَانَگ ءُ زَانَگ چی ءَ گُش اَنت چے ءَ مردُم وَانَگ لُوٹ اَنت ! بلوچ ءَ پَہ یکّیں وَانَگ ءُ زَانَگ پَشت کَپتگ بلوچ ءَ دِگہ چے ھَست ھِچ نیست بلوچانی ورنا گَار ءُ بیگواہ کَنگ بیگ ءَ اَنت کَے ھَالاں سَھیگ اِنت کَے زانت کہ آ ورنا ءُ آ پِت کُجام ھَالانی تہ ءَ اَنت مئے مَات اِد ءَ دَگانی سر ءَ کپتگ اَنت ءُ اَرس ترند ترند ءَ یل کنگ ءَ اَنت گُڑا اِے پَھِل بنت چے گُش اِت شُما ؟ مَن ءَ اِے گُمان بیت کہ مئے مَات ءُ پِت بِرات ءُ گُوھار چَہ دَگان آزات بنت مئے لَاڑُوکیں گْوھار آسُودَگ بنت وَتی لُوگ ءَ پَہ شرّی ءَ نشت کُت کَن اَنت بس بلوچ ءِ ھَال ھمے وَڑ اِنت بلوچ ءِ زُبان گَار ءُ بیگواہ کَنگ بیگ ءَ اِنت بلوچ لَٹ ورگ ءَ اِنت بلوچانی پوشاک پوشاک ءِ وَڑ ءَ نہ اِنت ھمے پُچّ ءُ پوشاک چَہ سر ءَ دَر کَنگ بیگ ءَ اِنت مئے مَات دَگانی سر ءَ لَٹ ورگ ءَ اَنت اِے مئے وَاستا شر اِنت ؟ مئے کَسانیں بِراتانی کَندگ ءِ وھد اِنت کندگ ءِ وھد ءَ مئے بْرات گْریوْگ ءَ اَنت مئے بانُکیں گْوھارانی گردگ ءُ وتی دزگْوھارانی گوما وَانَگ ءُ زَانَگ ءِ وھد اِنت آ دَگانی سر ءَ کَپتگ اَنت ۔ مئے مَاتَانی سَوت ءُ کِسّہ ءِ وھد اِنت گون وَتی سیاداں آ اِے وھد ءَ دَگانی سر ءَ کَپتگ اَنت۔

مئے پِتانی کَار ءُ رُوزگَارے وَھد اِنت کَار ءُ رُوزگَارے کَن اَنت چینچو باریں زَر بنت دِیم دَے اَنت پَہ وَتی لَاڑُوکیں بچّاں چّک ستر ھراب بہ بیت بلے مات ءُ پتاں دوست بیت تو وَتی اولاد ءَ یَل کُت نَہ کَن ئے بِلے باز ھَراب بِہ بیت سَتر تو یَل کُت نَہ کَن ئے مَن وَت دَیستگ کہ مَن کمّو شُپ ءَ دِیر ءَ اَتکگ آں وَتی لوگ ءَ مَنی مَات اَنچو بے ھیال بوتگ مَنی ورنا چُون دِیر کَنگ ءَ اِنت پرچاکہ مَنی مَات ءِ دِل ءَ پَہ مَن ءَ ھَیال ھَست مَن چَہ وَتی لوگ ءَ دَر اَتکگ آں دِیم اَتکگ آں پَہ وَتی وَانَگ ءُ زَانَگ ءَ مَنی مَات ءِ کُلوہ ھَمیش بوتگ بس وَتی ھَیال ءَ بَہ دَار مَنی مَات زانت کہ اِے انّوگیں امروز ھَراب اِنت دِگہ وَڑ اِنت ھَرکَس وَتی ھَیال ءَ کَنت تو بس وَتی ھَیال ءَ بِہ دَار مَن چَہ وَتی لوگ ءَ دَر اَتکگ آں مَنی مَات ءِ چمّ کمّو ھَراب بوتگ اَنت پمّن ءَ منی مات ءِ کُلوہ ھَمیش بوتگ بس بُرو اللہ ء میارئے۔! مَن زَانَاں کہ اولاد سَک دوست بیت اولاد ءَ پَہ جَان کُربان کَنگ بیت ساہ بکشگ بیت کسّے ءِ کہ اولاد یکّے بوتگ آئی اولاد گَار ءُ بیگواہ کَنگ بیتگ گُڑا آ چی کَنت وَتی امروزے تَہ ءَ کہ ورنا ئِے گون نہ اِنت ؟! مَن زَانَاں اولاد سَک دوست بیت ۔ مَن وَتی مَات دِیستگ کہ چُوں بوتگ پَہ مَن۔ وَدَار کَنگ سَک گِران اِنت وَدَار کَنگ ءَ تئی امروز بَدل بیت تئی امروز یک نیمے نیم بیت ۔

وداریگ ءِ گَم سَک باز اَنت وداریگ وَت یَک بَلَاھیں گَمے وداریگ ءِ آس ۔ تو چینچو وَھد وَدَار کَن ئے تو چینچو باریگ ءُ چینچو سَاھت وَدَار کَن ئے وَدَار کَنگ یَک ساھتے ءَ نَہ بیت دْراھیں سَال ءَ پَد ءَ وَدَار بَہ کَن تئی دِل ءِ گَپ بس ھَمیش بِیت باریں کَدی منی ورنا کیت اِنت مَن ءَ اِے سَاھت ھِچ دوست نَہ بیت کہ مَنی مَات ءُ پِت دَگانی سر ءَ چُو بِہ بنت مَنی کَسانیں گْوھار ءُ لَاڑُوکیں بْرات چُو مَہ بنت مئے بلوچاناں چے ھَست وانگجاہ ھَست مئے بلوچانی وَانَگ ءُ زَانَگ ءِ وَھد ءَ مئے ورنا گون ھَاکاں گْوازی کَن اَنت کُجا مئے ورنا بُرو اَنت پہ وَانَگ ءُ زَانَگ ءَ اَگاں آ ورنا گُش اَنت مَا چَہ وتی لوگ ءَ دَر کَایَاں دِیم پَہ رو اَنت وَتی وَانَگ ءُ زَانَگ ءَ اِیشانی دِل ءِ مُراد پُور ءَ نَہ بَنت پرچاکہ بلوچ ءَ را پَہ دریگ ءُ دَر ءَ وَانَگ ءِ ھَاتر ءَ اِنچو زَر نیست کہ اِے ورنا دَر بیا اَنت بُرو اَنت وَتی وَانَگ ءُ زَانَگ ءَ ۔۔! بلوچ ءِ چے چے گَار اِنت ؟ بلوچ ءِ وَانَگ ءُ زَانَگ گَار اِنت بلوچ ءِ بلوچی زُبان گَار اِنت بلوچ ءِ سرزمین گَار اِنت ءُ بلوچی مَھلوک گَار اِنت بلوچی مَات ءُ پِت گْوھار ءُ بِرات دَگانی سر ءَ کَپتگ اَنت بلوچ وَانَگ ءُ زَانَگ ءِ وھد ءَ وَتی وانگجاہ ءَ نَہ اِنت دَگانی سر ءَ کَپتگ اَنت مَن نُو زَانَاں کہ بلوچ چُون روگ ءَ اِنت کُجانگو روگ ءَ اِنت ؟ ما اِے زان اِیں کہ بلوچ بلوچ ءَ گار ءُ بیگواہ کَنگ ءَ اِنت بلوچ مئے بلوچی زُبان ءَ گار ءُ بیگواہ کَنگ ءَ اِنت ھمے بلوچ مئے مات ءُ گْوھارانی سریگ ءَ چَہ سر ءَ دُور کَنگ ءَ اِنت ھمے بلوچ مئے مات ءُ پِتاں چَہ وتی چُکاں جتا کَنگ ءَ اَنت مئے برات ءُ گْوھاراں ھمے بلوچ جَنگ ءُ کُشگ ءَ اَنت مئے گْوھاراں نُو جنگ ءَ اِنت گُڑا مئے واستا چے پشت کپتگ ؟ مئے آجزیں ماتاں جنگ ءُ دَگانی سر ءَ دور دیگ ءَ اِنت مئے براتاں چُورو کَنگ ءَ اِنت گْوھاراں پُرسیگ کَنگ ءَ اِنت-

مَن گوں شُما پَد ءَ دست بندی کَناں کہ بِیا اِت گوں بلوچ ءَ ھَوار بِہ بہ اِت گِون بلوچ ءُ بلوچستان ءَ یَکجَاہ ءَ ھوار ءَ بِیا اِت وَتی بلوچ ءُ بلوچ زَادگ ءِ ھمراہ ءَ بِیا اِت کُل بلوچ یَکجَاہ بَات اِت مئے مَات ءُ پِت گْوھار ءُ بْرات اَلّم شر بنت ءُ شرّیں راھاں سر بنت لَس مَھلوک ءَ گُشگ لُوٹَاں کہ بِیا اِت گُون بلوچ ءَ ھَواری ءَ جُنزان بات اِت سَلامت بات اِت کُل بلوچ ھما کہ مئے ھمراہ اَنت۔

مئے وتن سبز بات

راھشون شھید اُستاد ساچان بلوچ

نبشتہ کار: گزین بلوچ

دی بلوچستان پوسٹ

اگاں من جھان ءَ چم شانکے بدیاں گُڑا مارا زندگی ءِ توک ءَ سک ءَ باز چیز گندگ ءَ کیت ءُ رند ءَ ما وت ءَ را ءُ وتی کوم ءَ ھاسکن بچاریں اے نوکیں دور ءِ تہ ءَ ما چینچو پُشت ءَ پشکپتگ ایں چی ءَ کہ ما یک انچیں کومے بوتگیں کہ ھمک زورگریں ءُ زالمیں کبزہ گیر کہ ھست اَنت مئِے بلوچ راج ءَ ءُ بلوچستان ءَ وتی زُلم ءُ زوراکیانی دیمپان کتگ بلے بلوچ ءَ مُدام زالم ءِ ھلاپ ءَ جنگ ءُ مُزاھمت بندات کتگ وتی سرڈگار چہ دژمنانی پنجگاں آزات کُتگ بلے 1948ءَ پد ءَ یک رندے انگریز ءِ درایگ ءَ پد بلوچ سرڈگار 9ماہ ءَ آزات بوتگ رند ءَ پہ اسلام ءِ نام ءُ دگہ وڑ وڑیں دورگ، پندل ءُ زلمُ زوراکیانی گوما مئِے سرڈگار کبزہ کنگ بُوتگ بگند ئِے بلوچ ءِ سرگاڑ داں روچ ء مرچی ناپاکیں ءُ گیر پتری ریاست پاکستان ءِ وڑیں مکاریں دژمن ءِ وتی زُلم ءُ زوراکنانی آماچ کُتگ بلوچ سرڈگار ھمائی ءِ زورگیری ءُ کبزہ ءِ توک ءَ اِنت رند ءَ ھمے کبزہ ءِ ھلاپ ءَ بلوچ ءِ جنگ ھما روچ ءَ بندات بوتگ ءُ داں مرچیگ ءَ یک شلا برجاہ اِنت ھیر ھمے جنگ ءِ تہ ءَ من ھم ھور کپتاں وتی راج ءِ بزگی ءُ واری دیست اَنت من اتکاں بلوچ راجی پوج بی ایل اے ءِ توک ءَ گڑا چندے وھد گْوَست من شتاں چہ وتی اوتاگ ءَ کمو دگہ نیمگے اوتاگے ءِ سنگتانی گندگ ءَ سنگت بے کساس ھست اَت اوتاگ ءِ تہ ءَ بلے من سنگت چم ءِ وت دیست اَنت ھمک کارے ءِ یاکہ گاٹ ءِ گشت ءِ لنگری ءِ دارے چیزے ءِ چنگ متلب ھمک کار کہ زرورت اِت اَنت ھمے یکیں سنگت مُدام ھمے کارانی گوما دلگوش اَت دگہ سنگت ھم ھست اَت پہ کارانی کنگ ءِ ھاتر ءَ بلے چہ کلاں دیما اَت من بِھ اِشرا پہ نندگ ءَ ندیست اَنت کدی راشن ءَ کدی اد ءَ کدی اود ءَ بس ھمے وڑ اَت نا کہ شپ ئِے زانت ءُ ناکہ روچ ناکہ واب پد ءَ نوکیں سنگتانی ٹریننگ ھمیشی زمہ واری اَت ءُ باز مھروانیں وش لسانیں سنگتے اَت من ءَ باز وشی اھت من اشرا دیست چٹ ھیران بوتاں کہ من باز وش نسیبیں مرمے آں گوں ایشی ءَ دچار کپتگاں ءُ سک من ءَ دوست بوت من گڑا سنگت ءِ نام جست کرت ھمے سنگت کے اِنت من ءَ سنگتاں پس٘و دات ءُ گوشت ایشی نام اِنت اُستاد ساچان گُڑا منی گوما لھتُک وھد ءَ رند واکپ بوت من اُستاد ءِ گوما سک نزدیک بوتاں من ءَ سک باز مھر ئِے دات بلکیں تھنا من ءَ اناں سجّھیں اوتاگ ءِ سنگتانی گوما یک وڑ ءَ ات کندگءُ مزاک ءَ اَت یک روچے من ءَ گش ایت بْیا رو ایں من تو سپرے ءَ دو روچ من ءَ لگ ایت ھمے سپر ءَ من گْشت بلے اُستاد ھیر ما شتیں راہ ءَ گپ کنان ات ایں من گڑا گپ گپ ءِ توک ءَ اُستاد ءَ جستے کت کہ استاد تو بلاھیں ھستی یے مئِے واستا مارا جنگ ءِ بارہ ءَ کمو سرپدی بدے کہ ما چیزے ھاسل بکنیں چتو گڑا سک کند اِت ئِے ءُ گْشت ئِے بل یار ھدا ءَ بچار من کجا ءُ سرپدی دیگ کجا من دست بست ءَ اے وڑیں جست ھاسکن من ءَ چہ مگر دگہ باز زمہ داریں لایک تریں سنگت من ءَ ھست آ ترا شریں وڑے ءَ سرپدی دےاَنت ھیر من وتی دل ءَ کمو دگہ وڑ بوتاں ءُ رند ءَ پد ءَ اُستاد جست کت کہ تو چی ءَ چش گشت من ءَ من اے سوال چہ ترا جست گپت تو من ءَ دگرانی مسال دات من یک زنڈیں امیتے ترا گوں بستگ گوش ایت ھیر تو دل ءَ کُتگ من ترا کمو سرپدی دیاں چینچو منی زانت ءُ زانگ اِنت بلے من یک کسانیں پس٘وےترا دیاں گڑا اُستاد روگ ءِ توک ءَ اَت نشت من ءَ گوش ایت ترا اگاں واکی پہ بلوچ کوم ءَ درد ءُ تکلیپ پر اِنت مئِے ھمراھداری ءَ اتکگ ئے گڑا منی زاتی پنت ءُ نسیت چار ھبر اَنت ایشاں دلگوش بکن-

اولی ھبر اگاں ترا کسے ءَ رد داتگ یاکہ مجبور کُتگ یاکہ شگان جتگ نام ءَ بلوچی نام ءِ سر ءَ اگاں اے جنگ ءَ پکا ئے یا شوک ئیگ ءِ لوٹ ئے ءُ زاتی جیڑہ ءِ دیمپان ئے یاکہ نام کٹگ لوٹ ئے وھد ءِ لوٹ مئِے گلامیں سماج ءِ توک ءَ ھمیش اِنت گُڑا اے جنگ ءِ بھر بوت نکن ئے چی ءَ کہ اے جنگ چہ ھمے وڑیں پگرءُ لیکھاں سک دور اِنت-

دومی ھبر اگاں چہ چیزاں دور بہ ئِے جنگ ءَ وتی کن ئے گُڑا دژمن بے کساس تئی سر ءَ کیت وار کنت متلب تئ لوگ ماندارگ بنت تئی مات ءُ گھار برگ بنت تئی پیریں پِت برگ بیت بْرات رشتہ دار کلیں ایشی ءَ باوجود اے ھرکتاں دژمن تئی سر ءَ ٹرائی کنت شرت ھمیش اِنت کہ نہ پُرش ئِے بھا نہ بہ ئے بدل نہ بئے اگاں بھا ءُ بدل بئِے انیگی برو چی ءَ کہ وتی مکلوک ءَ پیسر ءَ تنگ ءُ تکلیپ مکن اگاں ترا وتی جند ءِ سر ءَ سِتک ءُ باور نہ اِنت اگاں سِتک ءُ باور اِنت وَ سک ءَ جْوانیں ھبرے-

سیمی ھبر یک انکلابی سنگتے جوڑ بوگ لوٹ ئے گڑا مکمل جوڑ بہ بو نام ءِ انکلابی بوگ ءَ شتر اِنت کہ مہ بو گشگ ءِ مول ءُ مراد ایش اِنت کہ وتی پاٹی ءِ آئین ءِ مکمل پاسداری کنگ وتی بلوچ کوم ءَ گوں ھم کوپگ بوگ چی ءَ کہ تئی تپنگ ءِ ھمک تیر ءُ توار انکلاب وت کار ایت اگاں تو شر کارمرز ئِے بکن ئے پد ءَ تو بلوچ کوم ءِ سپاھی ءِ شھیدانی وارس گُشگ بئِے گند ئِے ھمے تپنگ تو وتی راج ءِ سر ءَ ٹال کت بزانکہ تو کل چیزاں دست شُشت اَنت ءُ دژمن ءِ کاراں آساں کنگ ءَ ئِے چی ءَ کہ دژمن لوٹ ایت بلوچ جھد کار ھراب گشگ بہ بنت بلوچ چاگرد ءِ توکءَ من ءَ ھرکس شر بگش ایت پاٹی ءَ چہ مکلوک بد دل بہ بیت گُڑا اے وڑیں مردم ءَ کدی انکلابی جھدکار نہ گوش اَنت بلکیں بلوچ راجدپتر ءِ توک ءَ شر یات کنگ نہ بئِے چینچو شری کن ئِے مئِے راج ءِ واستا ھمیچو شر بہ بئے اگاں شر بوگ لوٹ ئِے بوت کن ئِے-

چارمی ھبر گلامی چی یے مزنیں ھبر ھمیش اِنت کہ اے سک ءَ سک زانگی ءُ مارگیءُ جیڑگی اِنت گلامی چہ کینسر ءَ گنتریں ءُ سلّیں بیماری یے گلامی چہ توک ءِ لانتءَ انگت گنتریں چیزے گلامی ءِ ھون مئِے رگ رگاں ھور ءُ تور اِنت ایشی الاج یک چیزے بس گوں دژمن ءَ جنگ سِرپ اے سلیں ءُ ناشریں بیماری ءَ مارا چہ دور کُت کنت کہ ما وت وتی ڈیھ ءِ واجہ باں اگاں منیگ ءُ تئی توک ءَ کُشگ ءِ ءُ وتی مرگ ءِ جزبہ جوانیں وڑے ءَ بوت کنت وھدے تو اے جنگ ءَ وتی بکن ئے گڑا وھد ءِ ھل ھمیش اِنت بس جنگ جنگ جنگ دگہ ھچ راہ ءُ در نیست بلوچ کوم ءِ کر ءَ-

من اے ھبر اشکت اَنت گُڑا من ءَ باز دلبڈی رس اِت چہ اُستاد ءِ پنت ءُ نسیتاں ھیر وھد ھمے وڑ ءَ گوزاں بوت من اے ھال اشکت اَنت سال 2024 ءَ پَنجْگُور ءِ دمگ کیلکور ءَ بلوچ راجی آجوئی سنگر براس ءِ سرمچاراں پاکستانی زرھریدیں دلارانی یک ٹولے ءِ سر ءَ تُرندیں جنگ ءُ چوپے بندات کرتگ ءُ ھمئے ھال من ءَ سنگتاں دات کہ اُستاد ساچان ءَ تیر وارتگ بلے سھی سلامت اِنت من اے گپ اشکت اَنت باز پریشان بوتاں رند ءَ سک کوشش کُت کہ ھالے بکناں گوں وتی ھمبلاں بلے کسمت ءَ ھمراہداری نہ کُت ھال ءُ اھوال نہ بوت رند ءَ من اشکت اُستاد پہ گلزمین ءَ ندر بوت بازیں روچے ءِ درّدُ دور ئِے سگ اِت گوں زمین ءَ وپا ئِے کُتگ رند ءَ من سوشل میڈیا چار اِت بی ایل اے جارکش جئیند بلوچ ءَ 26 جولائی 2024 ءَ جار جتگ اَت کہ منی یک سنگتے ھمے جڑپ ءَ شھید بوتگ نام گلام جان اُرپ اُستاد ساچان اُستاد واکی تو استادے اِت ئِے ھمے وڑ گوشت ئِے ھما وڑ کُت ئِے پہ گلزمین ءَ شھید بوت ئِے تو بھا نہ بوت ئِے بدل نی بوت ئِے-

لگورنہ بوت ئِے تو نمیران بوت ئے ترا سھرچکیں دروت اُستاد تو زانت ءِ گوں زمین ءَ وپاداری تئی ھونانی بدل آجوئی اِنت تئی داتگیں پگر کوہ ءِ سلیمان ءَ داں مند ءَ تالاں اِنت ءُ ھرجاہ ءَ تئی ھمبل گوں دژمن ءَ چو تئی رنگ ءَ مِڑان اَنت تئی کاروان راوان ءُ راھی اِنت دیم پہ منزل ءَ تئی ھون مدام مئِے بلوچ راجی بامردانی راھبری ءَ کنت-

بلوچستان ءِ جتا جتائیں دمگاں چہ موبائل ڈیٹا سروس بند کنگ ءِ ھال رسگ ءَ انت۔ اے دمگانی توک ءَ ھزدار، گوادر ءُ کیچ ھوار انت۔

دی بلوچستان پوسٹ ءَ رسوکیں ھالانی رد ءَ گْوستگیں شپ ءِ ھشت ءِ نزیک ءَ بُرز ءَ گْوشگ بوتگیں دمگاں موبائل ڈیٹا سروس بند کنگ بیتگ انت۔

دومی نیمگ ءَ نا تچکیں ھالانی رد ءَ پاکستان ءِ سرکار ءِ نیمگ ءَ چہ ھزدار، کیچ ءُ گوادر ءِ دمگاں سرجمیں موبائل نیٹ ورک ءِ انٹرنیٹ ڈیٹا بند کنگ ءِ پرمان داتگ۔

اھوالانی رد ءَ بلوچستان ءِ پریشان کنوکیں جاوراں پد موبائل انٹرنیٹ ءِ بند کنگ ءِ پیسلہ کنگ بوتگ۔

زانگ بہ بیت بلوچستان ءِ دمگ پنجگور ءَ گوستگیں پنچ سال انت کہ انٹرنیٹ سروس بند انت۔ نوں بلوچستان ءِ مزنیں دمگ ھزدار، کیچ ءُ گوادر ءَ انٹرنیٹ بند کنگ بوتگ۔

پنجگور ءِ انٹرنیٹ سروس ءِ بند کنگ ءِ ھلاپ ءَ پبلک سرکلاں باز رند ءَ وتی زھرشانی ریکارڈ کنگ ءَ اِنت وھدے کہ اے جیڑھ پاکستانی سینیٹ ءُ راجی ءُ صوبائی اسمبلی ءَ باز رند ءَ چست کنگ بیتگ۔

پنجگور ءَ انٹرنیٹ سروس بھال کنگ نہ بوتگ، بلوچستان ءِ دگہ دمگاں انٹرنیٹ بند کنگ بیتگ۔

انٹرنیٹ سروس بند کنگ ءَ پد اے دمگانی مردمانی تہ ءَ دلپروشی ءِ ترس پیداک بوتگ مردم گْوش اَنت کہ دگنیا ھما جاہ ءَ سر بوتگ کہ مرچیگیں دور ءَ مارا انٹرنیٹ ءِ وڑیں بنیاتی آسراتی آناں چہ زبھر کنگ بیگ ءَ اِنت۔

کاروباری مردم ءُ نودربر گش انت کہ انٹرنیٹ ءِ ھست نہ بوھگ ءِ اے زمانگ ءَ دنیا یک کوہے ءِ وڑا بیت کہ اودا روچ پہ روچ ءِ لوٹاں بگر داں وانگ ءُ زانگ ءَ ھرچیز انٹرنیٹ ءِ سرا بندوک انت، اے وڑ ءَ انٹرنیٹ ءِ بند کنگ مارا سنگ ءِ زمانگ ءَ گندگ ءِ برابر بیت-

زانگ بہ بیت کہ بلوچستان ءِ سر وزیر سرفراز بگٹی ءَ بازیں رند ءَ چہ بلوچستان ءَ انٹرنیٹ سروس ءِ بند کنگ ءِ بابت ءَ گپ جتگ۔ تُرس اِنت کہ چہ اے دمگاں پد بلوچستان ءِ دگہ ضلع ءُ ضلعانی تہ ءَ ہم انٹرنیٹ بند کنگ بیت انت۔