TBP Balochi

زِر ءَ مُروارِدانی ٹیکیاں گون اَنت

(فدائی ماہل بلوچ ءِ نام ءَ)

الماس بلوچ

دی بلوچستان پوسٹ

ما ونتگ جنگ ماں تاکاں
کتابانی تہا زہم ءُ سِگارانی سَبک ونتگ
گِروکی شہم چِست بنت چہ زِھاں زہم ءِ
چہ پراھیں ملپداں جونانی جوھانے کہ سہرا بیت
ما ونتگ شہسواریں نَپت چو کہر ءَ کپ اَنت ڈیھ ءَ
ما اِش کُرتگ کہ گُل بی بی
سگارانی زِھاں گوں تیل ءُ زمزیلاں کروجاں کنت
ما اِش کُرتگ کہ ماھیں بانڈی پہ دژمناں بِیرے
لپاشان کنتّ زوراکی ءِ ماڑی ءُ کلاتاناں
من جنگ ھیروپیں، الگاریں
کتابانی تہا ونتگ
یا کوھنیں کِسّہانی دْروشم ءَ اِش کُرتگ چہ ماتاں
بَلے مرچی ما چمّ ء وت
وتی ڈیھ ءَ
وتن دیوانگیں گُل بی بی ءِ زھرگ سما کُرتگ
زمین شیدائیں ماھیں بانڈی ءِ جوزگانی رنگ وت دیستگ
ما دیستگ چہ زِر ءَ مُروارِدانی ٹیکیاں شِنگ اَنت
ما دیستگ جنگ ھیروپیں!
ما دیستگ ھار ملّوکیں لپاشان اِنت زوراکاں
ما دیستگ اے زِریں لشکر
پدا لیپگ کنان اِنت زَلم ءِ زمزیلاں
اے کرنی زنگی ئیں تئیلاں

زِر ءَ مُروارِدانی ٹیکیاں گون اَنت
زمین ءِ سبزگ ءِ پاکیں بشارت گِند! سہرا اِنت
چہ کوھاں بُرزیں آوازے کُلوہ بکشان اِنت واھُنداں
مبارک بات!
کہ جنگ ءَ نوک کُرتگ کِسّہ اھدانی
کہ ھیروپانی آتراپ ءَ،
ماں بیرانی تہا یک رژنے سہرا اِنت
ماں گْرندانی تہا دْرپشان اِنت آوازے
کہ ماھیں بانڈی اتکگ
نوں تئیلانی ھزاب ءِ بادگیرانی نہ مان اَنت پَد
نوں زمزیلانی بام ءَ جورکاں داتگ
بُہ لُڈِیت زِر پَھر ءُ شان
کہ “نوکیں بانڈی” ءِ شار ءِ لمب ءَ آجوئی ءِ رُژن سہرا اِنت
زِر ءَ مُروارِدانی ٹیکیاں گون اَنت۔

آشوبی ءِ تچکیں ھیال

نبشتہ کار: شَکّل بلوچ

دی بلوچستان پوسٹ

آشوب ءِ زلورت کجام ھم وھد ءَ بیت ءُ آئی ءِ مستریں مول وھدے کہ چاگردے ءِ تہ ءَ نا انساپی یے، زُلم ءُ زوراکی یے ءُ دگہ باز انچیں بدیں کار کہ چاگردے ءِ تہ ءَ ھست ءُ ودی بنت گڑا آ چہ زوراک ءِ نیمگ ءَ وتی جوڑ کُرتگیں، بدیں رھبندانی پَھک ولگوج کنگ ءَ بیت ءُ اود ءَ آشوپ ءِ بوگ یا آرگ المی بیت۔

درستاں چہ ساری مارا اے گپ الم زانگ لوٹ اِیت کہ چاگردے ءِ تہ ءَ ھما کار پہ آشوبی ءِ واست ءَ المی بنت کہ آ پیسر ءَ چاگرد ءِ لس مَھلوک ءِ تہ ءَ وتی باور ءُ سِتک ءَ ودی کنگ لوٹ اِیت کہ آشوبی مدام پہ آیاں دردوار اِنت، آ مدام پہ آیاں نوکیں زندے ءِ آرگ ءَ ھر چُشیں جیڑھے ءِ ءُ جنجالانی دیم ءَ اوشتوک اِنت۔

آ چہ چاگرد ءِ لس مھلوک ءِ دیم ءَ وتی آشوبی ھیالانی تہ ءَ ھچ وڑیں پیچ ءُ تابیں سَسّا درا مہ کنت چیا کہ آئی ءِ پگر ءُ ھیال چہ چاگرد ءِ لس مھلوکانی دیم ءَ چُشیں بے بُنیں گپاں چہ وتی اندر ءَ پھک ولگْوج بہ کنت۔

نوں ما کا ایں وتی بُن گپ ءِ سر ءَ کہ آشوبی ءِ تَچکیں ھیال کجام اَنت کہ پہ چاگردے ءِ ءُ یا پہ ادارھے ءِ واست ءَ ارزشتے داشت کُت بکنت:

آشوبی ءِ واست ءَ راستیں پگر ءُ ھیال درستاں چہ پیش ھما بہ بیت کہ آ وتی تہ ءَ کارانی سرجم کنگ ءِ ھاتر ءَ وتی (موقف) ءَ مُھکم بہ کنت، ءُ چہ وتی کارانی زمہ واری ءَ شری ءِ سر ءَ پَیلو کُت بہ کنت، چُش مہ بیت کہ زمہ واریانی زورگ ءَ پد کار ئِے ناسرجم ءُ گڑ ءُ منج ءِ تہ ءَ مان بہ گیشّ اِیت رَند ءَ وتی کُتگیں، ناسرجمیں کارانی نہ بوگ ءِ سَوَب ءَ دگہ سنگتے ءِ سر ءَ بہ مُشّ اِیت ئِے۔

دائم تَبی داروکیں لیکھے ءِ منّوگر مدام وتی کاراں شپ ءُ روچ کنت بلے پورا اِش کنت بِلّے کہ چاگرد ءِ تہ ءَ ھر وڑیں جنجالانی دیمپان بہ بیت بلے گوں سِتک ءُ مُھکمی ءَ وتی دْراھیں کاراں سرجم کنت بلے رَدیں اَمل پہ آشوبی ءِ واست ءَ تچکیں ھیال گُشگ نہ بیت گڑا آ وتی تاب ءُ پیچیں پگرے ءِ واھُند بیت۔

گَل ءِ تہ ءَ چُشیں اَمل نہ بوتگیں ھبرے کہ یک سیاسی سنچے ءِ داروکیں آشوبی سنگتے وتی زمہ واریاں پورا کُت مہ کنت پد ءَ وتی گچین کُتگیں زندے ءِ سپر ءَ مشکل اِنت کہ وتی گل ءِ مکسد ءَ سر بہ بیت۔

آشوبی ءِ تچکیں ھیال داروکیں سنگت مدام وتی تہ ءَ پہ کارے ءِ کنگ ءَ جاڑی اِنت آ سرپد ءُ پوہ اِنت کہ منی مکسد چے اِنت ءُ منی زند ءِ ھر تَک ءُ پَھنات ھمے مول ءَ گوں بندوک اِنت، آ مدام پگری ءُ اَملی پلسپہ ءِ منّوگر اِنت ءُ وتی پَھم ءَ دار اِیت۔

آشوبی ءِ تچکیں پگر ءُ تچکیں اَمل مدام کاراں ءُ زمہ واریاں گوں شَوربندی ءَ کنت، ھر کار ءَ پہ وڑے ءَ چار اِیت ءُ اَمل کنت کہ کجام کار ،کجام وھد ءَ کنگی اِنت اگاں آ ابید رِد ءُ بند ءَ وتی زمہ واری ءَ ھجبر پورا نہ کنت ءُ نیکہ ابید آسر ءِ گِندی ءَ وتی کار ءَ بندات کنت۔

اے گپ یات دارگ لوٹ اِیت کہ ھر آشوبی ءِ تچکیں ھیال داروکیں کیڈر ابید مول ءُ مرادے ءَ آئی ءَ را آشوبی یے گْوشت نہ کن ئے چیا کہ آشوپ وت یک جتائیں دگنیا یے دار اِیت ءُ آئی ءِ مستریں مکسد آزات چاگردے ءِ جوڑ کنگ اِنت کہ آ چہ بدیں کاراں چِہ دور بہ بیت، چہ زوراوریں رسترانی دست ءَ آجو بہ بیت گڑا آئی ءَ را آشوب گْوشیں۔

آشوبی یکشّل ءَ وتی یکین ءُ دلجم بوگ ءِ سر ءَ اَمل کنت ءُ وتی کار ءُ لیکہ ءِ سر ءَ پہ وڑ ءُ ڈولے ءَ ھورت چاری کنت ، دل ءِ سِتک وتی مکسد ءِ سر ءَ ایماندار اِنت بِلّے کہ آئی ءِ سر ءَ ھر وڑیں پریشانی ءُ جیڑہ بیا اَنت آ چو کوہ ءَ مِکّ بیت۔ آشوبی وتی مراگش ءُ زمہ واریانی سر ءَ گوں ھورت چاری ءَ اَمل کنت، آشوبی وتی پگر ءُ ھیال ءُ سما ءَ چِہ جُھدے ءَ گوں بندوک بیت ءُ آ ھمے گپ ءَ وتی مجگ ءِ تہ ءَ ایر کنت کہ منی زندگی ءُ مرگ دوئیں ھمے نوں جُھد ءُ جُنز ءَ گوں بندوک اَنت۔

بلوچستان ءِ جتاجتائیں دمگاں چار لاش دزکپتگ اَنت ءُ کیچ ءَ ڈیتھ اسکواڈ ءِ دست ءَ بیگواہ بوگ ءَ پد ورنا کشگ بیتگ-

گیشیں ھالانی رِد ءَ بلوچستان ءِ بُنجاھی شھر شال ءِ دمگ دشت سپیز نڈ ءَ بھٹے نزیک ءَ یک مردمے ءِ لاش دزکپتگ کہ بیست دو سالی ئیں جواد علی ء محمد گل جھمنند اوستہ محمد نام ءَ چہ بیتگ-

شال نادُراھجاہ کاردار رِد ءَ اے ورنا تیرگواری کتگ کشتگ-

ھمے وڑ بلوچستان ءِ دمگ چہ نصیرآباد ءِ دمگ مانجھو شوری ءَ دمگی انتزامیہ ءَ سے مردم تیرسپتگیں لاش دزکپتگ اَنت کہ پجّار ھاتر ءَ نادُراھجاہ ءَ برتگ اَنت-

نصیر آباد ءَ دزکپتگیں لاشانی پجّار ھاتر ءَ چار ءُ ٹپاس برجاہ ءَ اِنت وھدے کہ وئیل سوب زانگ نہ بیتگ-

ھمے وڑ کیچ ءِ دمگ چہ گردانگ ءَ بیست ءُ شش اگست ءِ شپ ءِ نُھ ءِ نزیک ءَ سلاہ بندیں مردم دکان تہ ءَ پُترتگ اَنت حکیم ء علی مراد نامیں ورنایے تُپنگ زور ءَ آوار جتگ ءُ بیست ملٹ ءَ پد دو کلومیٹر ءَ دیر شتگ ءُ گیشتک ھند ءَ بے دردی ءَ کُشتگ-

دمگی مردمانی گوشگ اِنت کہ حکیم بلوچ یک وانندھے ءُ باپاری ورنایے بیتگ- گوستگیں دہ سالاں چہ گردانک ءَ دکانداری کنگ ءَ بیتگ ءُ سک شریپ ءُ سادگیں مردمے بیتگ اشی ءَ ناں سیاسی پارٹی ءُ ناں گل ءِ ٹولیاں سیادی بیتگ-

دمگی مردمانی رِد ءَ اے سلاہ بنداں کہ چست کتگ اے سرکاری پلامرزی کنوکیں ٹولی ءَ چہ بیتگ اَنت ایشی ءَ ساری دو روچ ءَ پیسر شپ وھد ءَ حکیم بلوچ تربت ءَ چہ بلیدہ ءَ روگ ءَ بیتگ کہ راہ ءَ سلاہ بنداں آئی ءِ سر ءَ تیرگواری کتگ ، تیرگواری ءِ آسر ءَ آ رکّ اِتگ بلے آئی ءِ گاڑی ءَ تاوان رس اِتگ-

دمگی اِھوالکار رِد ءَ اُرشکار حسن بادشاہ نامیں صوبی دارے کہ گوستگیں بازیں سالاں چہ بلیدہ ءَ آئی ءِ پوسٹ بیتگ-

انچش گوشگ بیگ ءَ اِنت کہ لھتے روچاں چہ صوبہ دار حسن بادشاہ ھپت پرپٹ ءَ ھوار یک انچیں ٹولی ءِ ھمراھی ءَ بلیدہ کوچگ بزپیش گلی گردانک ءَ تر ءُ تاب کنگ ءَ بیتگ اَنت، اے ٹولی ءِ مردم زبان ءُ پوشکاں چہ ڈن ءَ اتکگیں مردمانی وڑ ءَ بیتگ اَنت-

گوستگیں شپ ءَ سلاہ بندیں مردماں نیوی بنجل راکٹ لانچر ءُ دگہ سلاھاں گوں نشانگ کتگ-

بلوچستان ءِ دمگ کیچ ءِ بنجاھی شھر تربت ءَ سلاہ بندیں مردماں بالی پٹ ءِ ھند ءَ نیوی ءِ بنجل ءِ سر ءَ ترندیں اُرشے کتگ –

دو شمبے ءِ شپ ءَ دی بلوچستان پوسٹ ءَ را دمگی مردماں گوشتگ تربت بالی پٹ ءِ نزیک ءَ ترندیں تیرگواری ءُ تراکانی توار پیداک اَنت ءُ ھمے وھد ءَ شھر ءَ پاکستانی پوج ءِ سر ءُ پراں ھم گیشی اتکگ –

شپ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءَ ھمے اُرش ءِ زمہ واری من اتگ ءُ تامر وتی آفیشل چینل ھکل ءَ شنگ کتگ-

تامر ءَ بلوچ لبریشن آرمی ءِ پند ءَ گشت کنوکیں باسک نیوی بنجل ءَ راکٹ ءُ گرینڈ لانچراں گوں نشانگ کنگ ءَ گندگ بنت اِنت-

بی ایل اے ءِ شھری سرمچار آجوئی ءِ رنگ ءَ بلوچستان ءِ بیرک ءَ برز ءَ کنگ ءَ تربت ءِ شھر ءَ مھلوک ءِ میان ءَ گندگ بنت اِنت-

ایشی ءَ پیش بیست ءُ شش اگست ءِ شپ ءَ ھم تربت ءِ شھر ءَ پاکستانی پوج ءِ بنجاھی بنجل راکٹ ءُ گرنیڈ لانچر اُرشاں نشانگ کنگ بیتگ ات کہ ھمے اُرش ءِ تامر ھم بلوچ لبریشن آرمی ءِ ھکل چینل ءَ شنگ کنگ بیتگ ھمے ڈول تربت ءِ نزیک ءَ سی پیک دگ ءَ بی ایل اے ءِ سرمچارانی نیمگ ءَ ناکہ بندی تامر دیم ءَ اتکگ بیتگ –

زانگ بہ بیت بیست ءُ پنچ ءُ بیست ءُ شش اگست ءَ بلوچ لبریشن آرمی ءَ آپریشن ھیروپ ءِ بندات کنگ ءِ جار جتگ چریشی ءِ لڑ ءَ گل ءَ بلوچستان ءِ دراھیں دگانی سر ءَ ناکہ بندی کتگ ءُ گاڑیانی پٹ ءُ پول، ریل ءِ پٹری ءُ پھل نشانگ کتگ انت ءُ ھمے وڑ بیلہ بنجل ءِ سر ءَ فدائین اُرش کتگ –

بی ایل اے ءِ نیمگ ءَ آپریشن ھیروپ ءِ لڑ ءَ بازیں جاھاں اُرش بیتگ اَنت ءُ بلوچستان ءَ دگہ استاناں ھواریں دگ بازیں اداراں بند بیتگ اَنت-

بلوچ لبریشن آرمی ءَ بیست ادار ءَ پد وتی آپریشن ءِ آسری ءِ جار جتگ ءُ آپریشن ءَ پاکستانی پوج، چیریں ادارھاں ھوار پولیس ءِ یک سد ءُ سِی کارندھانی کوش ءِ زمہ واری من اتگ اَنت-

روکپتی بلوچستان ءِ دمگ سرباز ءِ جھمنندیں بلوچی زبان ءِ مزن نامیں لبزانکار آبد آسکانی ماں کراچی ءَ آغا خان ھسپتال ءَ بیران بیتگ-

آبد آسکانی نوزدہ ءُ پنجاہ ءُ سَے ءَ ودی بیتگ ءُ دوھزار ءُ بیست ءُ چار ءَ ماں کراچی ءَ آگا خان ھسپتال ءَ برین ٹومیر ءِ نادراھی ءَ بیران بیتگ-

آبد سکانی بلوچی زبان ءَ ابید آئی ءَ پارسی زبان ءَ ھم ندکاری کتگ ءُ آ بلوچی ءَ گیشتر تنز لچھی ءُ بچکند ءَ نامان بیتگ –

ھمے زوت ءَ آئی ءِ دو مزنیں کتاب کلیات ءِ نام ءَ چھاپ بیتگ اَنت ءُ ایشی ءَ ابید آئی ءِ دگہ کتاب ھم بلوچی زبان ءَ چھاپ ءُ شنگ بیتگ اَنت-

آئی ءِ نزیکیں مردمانی گوشگ اِنت بازیں وھدے بیتگ کہ آ نادراہ بیتگ ءُ مروچی آئی ءَ اے کوڑھیں امروز یل داتگ ءُ وتی ابدی جاہ ءَ شتگ-

آبد آسکانی ءِ بیرانی ءَ بلوچی لبزانکی پھناتاں دلپدری درشان کنگ ءُ گوشگ بوگ ءَ اِنت کہ لبزانک ءِ پڑا آئی ءِ جاہ ھورک انت-

آبد آسکانی ءِ بازیں کچے ءَ کتاب چھاپ بیتگ انت کہ لھتے کتابانی نام تنز لچھانی کتاب ،چشیں شوم ءُ شانزدہ ،چشیں نیک ءُ نیگبھت ،بے لِٹکیں بُراک ،تنز لچّہانی کُلیات ، دستونکانی کتاب ، مسکیں میدان، سریمگیں بازار ،دستونکانی کُلیات ، دادشاہ ، کیچ ءِ چنال ، فقیر ءِ کچکول ، بلوچ بلوچی ءُ بلوچستان ، ماہ ءِ ایرگوری ءُ گُل سسا ءُ دگہ باز کتاب چھاب بیتگ اَنت-

آئی ءِ کل ءُ کسارات بلوچستان ءِ واپاری شھر ھب چوکی ءَ بوگ ءَ انت –

ایرانی لشکر ءَ تیرگواری کتگ ءُ دو پرپٹ سواریں مردم ٹپی کتگ اَنت-

گیشیں اھوالانی رد ءَ روکپتی بلوچستان ءِ دمگ راسک ءَ ایرانی لشکر ءَ راہ روکیں یک پرپٹے ءِ سر ءَ تیرگواری کرتگ کہ چریشی ءِ سبب ءَ دو مردم ٹپی بیتگ اَنت-

ٹپی بیتگیں مردمانی پجار سھیل سپاھی ء کادر ءُ اھمد سپاھی ء مھمد ءِ ناماں زانگ بیتگ اَنت کہ ھردول شستون ءِ جھمنند گوشگ بوگ ءَ اَنت-

وئیل ءَ پد مھلوک برانز گپتگ ءُ زھرشانی اش کتگ ءُ اود ءَ واکداراں گوشتگ اے مردمانی سیادی جیش العدل ءَ انت بلے آیانی سر ءَ دارگ ءَ ابید تیرگواری کنگ بیتگ –

اھوالانی رد ءَ ھردوکیں ٹپی ئیں مردم ایرانشھر ءَ ھاتم انبیا نادراہ جاہ ءَ برگ بیتگ انت ءُ اود ءَ سھیل ءِ جاور ناگیگ گوشگ بیتگ انت ءُ ھسپتال ءِ ھاسیں جاھاں تھتیگ انت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ آپریشن ھیروپ سرجمیں بلوچستان ءَ بنجاھی شھدگ دوازدہ ادارہ ءُ بیلہ ءَ پوجی بنجل بیست اداراں وتی کنٹرول کنگ ءُ کساسی رنگ ءَ 130 ءَ گیش زورگریں گیش پوجی کشگ ءَ پد سوبمندی ءَ آسر بیتگ – آپریشن ھیروپ وتی زیردستیں سرڈگار ءِ سر ءَ دوبر دستیگ کنگ ءِ چِن ءُ لانچانی بنداتی بھر انت، کہ سوبمندی ءِ گون ءَ وتی مکسد ءِ گرگ ءَ آسر بیتگ –

جارکش ءَ گوشتگ بلوچ سرڈگار ءِ سر ءَ اُرش ءَ پاکستانی پوج گوستگیں ھپتاد ءُ شش سالاں چہ زیردستی ءَ انت – زورگری ءِ بنداتی روچ ءَ بلوچ وتی سرڈگار ءِ پھریزگ ءُ پاکستان ءِ زورگری ءَ وت ءَ آجو کنت ءُ دوبر بلوچ وتن ءِ سر ءَ بلوچ کنٹرول ءُ ھاکمی ءِ واستا تاکتوریں دشمنے ءِ ھلاپ ءَ گھگیری کنگ ءَ اَنت-

بلوچ لبریشن آرمی ھمے راجدپتری گھگیری ءِ درچ ءُ نوکتریں دروشم انت – چُشکہ بلوچ مردین ءُ زالبولیں جھدکارانی گچینی دیمونی، بے کچوئیں مھنت، کھولداری ءُ بلوچ راج ءِ سرجمیں پلامرزی ءُ کمک ءَ یک مھکمیں بلوچ راجی لشکرے ءِ دروشم ءَ دیم ءَ جنزان اِنت ءُ وتی کساس، تاکت ءُ بنکی بودیشت ءَ گیش ءَ گیش کنگ اِنت – چریشی ءِ سبب ءَ بلوچ لبریشن آرمی وتی راجی پھریزگ ءَ ءُ زورگریں پوج ءَ کشگ ءَ وتی سرڈگار ءَ دوبر بلوچانی دست ءَ دیگ ءَ چن ءُ لانچاں ءُ تر ءُ گرد بندات کتگ انت – آپریشن ھیروپ ھمے چن ءُ لانچانی بنداتی بھر اِنت – آپریشن ھیروپ دومی بھر گیش ترند بیت اِنت –

آئی ءَ گوشتگ آپریشن ھیروپ ءَ بلوچ لبریشن آرمی ءِ فتح اسکواڈ ءُ ایس ٹی او ایس (اسپیشل ٹیکٹیل آپریشنز اسکواڈ) ءِ ھشت سد گچینی ھیلکاری ایلٹ جنگجول ءُ مجید برگیڈ ءِ ھپت فدائیناں بھر زرتگ – چریشی ءِ تک ءَ مجید برگیڈ ءِ ھپت فدائین وتی مشن ءَ سوبمندی ءِ گون ءَ سرجم ءَ شھیدی پہ وتی نام ءَ کتگ ھمے وڑ بولان دشمن پوج ءِ میان ءَ جنگ ءُ چوپ ءَ بی ایل اے فتح اسکواڈ ءِ یک سرمچارے ءِ شھیدی بیتگ – وھدیکہ آپریشن ھیروپ ءِ وھد ءَ دشمن ءِ یک سد ءُ سِی ءَ گیش کارندہ کشتگ انت ءُ بازین کچے ءَ زدگ کتگ اَنت – بازیں چیک پوسٹ ءُ یک بنجلے تباہ کتگ ءُ بازیں کچے ءَ دشمن ءِ سلاہ ءُ گولہ بارود دستیگ کتگ اَنت-

آئی ءَ گوشتگ زورگریں پوج ءِ سر ءَ اُرش ءِ وھد ءَ بلوچ لبریشن آرمی ےَ پولیس ءُ لیویز ءِ تچک ءَ سرپدی بیھار داتگ اَنت کہ آ زورگریں پاکستانی پوج ءَ کمک ءَ ابید گستا بہ دار اَنت وت ءَ – بلوچ بوگ ءِ پژدر ءَ آیانی سر ءَ اُرش کنگ نہ بیت اِنت ھمے وھد ءَ بیست ءُ دو پولیس ءُ لیویز کارندہ دزگیر کتگ اَنت ءُ پد ءَ آپریشن ھیروپ ءِ سرجم بوگ ءَ آ سلامتی ءَ یل کتگ اَنت – ھرکجا پولیس ءُ لیویز ءَ گھگیری نہ کتگ آیاناں یک کسانوکیں تاوانے ھم نداتگ بلے کلات کراڑی ءِ ھند ءَ لیویز ءُ پولیس ءَ زورگریں پوج ءِ ھمراھداری کنان ءَ بلوچ سرمچارانی نیمگ ءَ پیشگامی کتگ بلوچ لبریشن آرمی ءَ زورگریں پوج ءِ ھوار ھواری ءَ پولیس ءُ لیویز پورس نشانگ کتگ – چریشی ءَ بازیں کارندہ مرتگ ءُ زدگ بیتگ اَنت – بلوچ لبریشن آرمی یک برے پد ءَ پولیس ءُ لیویز پورس ءِ درگت ءَ وتی پالیسی ءَ تچک کنت اِنت بلوچ بوگ ءِ سبب ءَ بی ایل اے پولیس ءُ لیویز ءِ سر ءَ اُرشاں دور کنگ اِنت ، بلے پولیس ءُ لیویز ءِ کارندہ مردمی رنگ ءَ بلوچ راجی زرمبشت آجوئی ءِ ھلاپ ءَ دشمن پوج ءِ ھوار بوگ ءَ بیتگ اَنت، ھمود ءَ ادارہ پولیس ءُ لیویز زورگریں پوج ءِ ھمراھداری ءَ پوجی الگاری ءُ آپریشناں ھوار بوت اَنت گڑا آیانی ھلاپ ءَ ترندیں کاروائی کنگ بندات بیت اِنت ھما داب کنگ بیت اِنت زورگریں پوج ءِ ھلاپ ءَ بوگ ءَ اِنت-

آئی ءَ گوشتگ آپریشن ھیروپ ءِ درچ ءَ شھدگ ءَ ناکہ بندیانی درچ ءِ وھد ءَ بلوچ لبریشن آرمی ءَ مساپر بریں بس پٹ ءُ پول کتگ اَنت – پٹ ءُ پول ءِ وھد ءَ چیکنگ ءِ وھد ءَ بازیں مردماں چہ زورگریں پاکستانی پوج، چیریں ادارہ ءُ فرنٹیئر کور ءِ سروس کارڈ دزکپتگ اَنت – موکلانی وھد ءَ دوبر بلوچستان ءَ زورگریں پوج ءِ کمپنی ءِ نیمگ ءَ روگ ءَ بیتگ اَنت – چریشی ءَ آیاں سرجمی ءَ پجار کنگ ءَ مرگ ءِ سزا داتگ اَنت-

گیش گوشگ بیتگ آپریشن ھیروپ ءِ وھد ءَ بلوچ وسائل ءِ لٹ ءُ پول کتگ پاکستان ءَ بروکیں بازیں گاڑی بی ایل اے ءِ سرمچاراں مانداشتگ انت ، بلے ایشی ءِ ھواری ءَ بلوچ لبریشن آرمی ءِ اے درچ ءَ تچک کنت اِنت ناکہ بندیانی وھد ءَ انسانی ھمدردی ءَ بنیاد ءِ دراھیں ایمبولینس مھکمیں راھاں دیم داتگ انت سویلین گاڑیاں تاوان نہ داتگ انت، بلے بازیں جاھاں اے ھال انت ناکہ بندیانی ھلاس بوگ ءَ پد بلوچ راج ءُ سرمچارانی میان ءَ بدگمانی ودی کنگ ءِ دروشم ءَ پاکستانی پوج ءِ لس پوشاکی کارندہ ءُ وتگڑیں ڈیتھ اسکواڈ ءِ کارندھاں بازیں گاڑی مانداشتگ اَنت کہ بی ایل اے اے گپ ءَ تچک کنت اے بی ایل اے ءَ نہ کتگ اَنت-

جارکش ءَ گوشتگ بلوچ لبریشن آرمی وتی بلوچ راج ءَ گوں دزبندی ءِ کنت اِنت آ وتی راجی آجوئی ءِ اے جنگ ءَ برزشانی ءِ وھد ءَ وتی راجی لشکر بی ایل اے ءِ ھمراھداری ءَ بہ کن ات- ءُ اے آپریشن ھیروپ ءِ دومی بر ءَ درست وتی لوگاں در بہ کپ اِت بلوچستان ءِ ھمک دمک ءُ دراں دشمن ءِ ھلاپ ءَ گھگیری ءِ بھر بہ بیت ءُ راجی ءُ راجدپتری ءِ کرد ءَ پیلو بہ کن ات-

گڈسر ءَ گوشگ بیتگ بلوچ لبریشن آرمی، آپریشن ھیروپ ءِ اُرش ءُ شھیدانی درگت ءَ زوت رسانکدر ءَ درشان ءَ شنگ کنت اِنت-

سلاہ بنداں پشین، مستونگ ءُ کیچ ءِ جتاجتائیں شھراں چار اُرش کنگ بیتگ-

ھالانی رِد ءَ بلوچستان ءِ دمگ پشین ءَ ناشناسیں مردماں پاکستانی چیریں ادارھانی کارمرزی ءِ ماڑی سر ءَ دستی بمبے چگل داتگ ءُ تتکگ اَنت کہ ماڑی نزیک ءَ کپتگ ءُ تُرندی ءُ ترکّ اِتگ-

پشین انتزامیہ رِد ءَ اُرش ءُ چیریں ادارھانی دو کارمند ٹپی بیتگ اَنت-

ھمے وڑ چہ مستونگ ءَ ھالانی رِد ءَ سلاہ بندیں مردماں پاکستانی پوج بُنجل اُرش ءِ نشانگ کتگ وھدے کہ بُنجل نزیک ءَ چہ تُرندیں تراک ءُ تیرگواری ءِ توار اش کنگ بیتگ-

مستونگ ءَ اُرش ءَ پاکستانی پوج ءَ جانی ءُ مالی تاوان چست کنگ ھال اِنت-

ھمے وڑ بلوچستان ءِ دمگ کیچ ءِ بُنجاھی شھر تربت ائیرپورٹ نزیک ءَ چہ تُرندیں تیرگواری ءُ تراکانی توار اش کنگ بیتگ-

دمگی اِھوالکار رِد ءَ تنی وھدے کساس شش تراکانی توار ءَ سرجمیں تربت شھر جکستگ وھد وھد سر ءَ تیرگواری ءِ ھم ھال اِنت بلے دمگ ءَ پوج ءَ تُرند کتگ وھدے کہ شھر جتاجتائیں شھدگاں پوج شیوار کنگ بیتگ-

دومی نیمگ ءَ کیچ ءِ دمگ تمپ بالیچہ ءَ سے تُرندیں تراکانی توار اش کنگ بیتگ وھدے کہ پولیس ءُ پوج ءِ مزنیں کچے ءَ وئیلجاہ ءَ شتگ اَنت-

کیچ ءِ جتاجتائیں شھراں بیتگیں بمب تراک ءُ تیرگواریانی ھالانی آیگ پش کپتگ اَنت-

انتزامیہ ءُ پاکستانی پوج ءَ شھری لوگانی تہ ءَ نندگ ءُ دکانانی بند کنگ پرمان داتگ-

ھالانی رِد ءَ بیلہ شھر ءَ تاں انگت کرفیو برجاہ ءَ اِنت شھر ءَ ایمبولینس ءِ مزنیں کچے ءَ اوشتاتگ اَنت وھدے کہ انتزامیہ ءَ شھری لوگانی تہ ءَ نندگ ءُ دکانانی بند کنگ پرمان داتگ-

دومی نیمگ ءَ شھر ءِ سرجمیں نادُراھجاھاں ایمرجنسی جنگ بیتگ وھدے کہ چہ بیلہ ءِ نزیکیں دمگ اوتھل ءَ ھم انتزامیہ ءَ نادُراھجاہ ءِ کارادر شیوار کنگ ءَ گْوشتگ اَنت-

بیلہ کش گوراں اوتھل، ھب چوکی ءَ تاں موباھل نیٹورک ءُ دامگ اشی ءَ ساری بند کنگ بیتگ اَنت وھدے کہ بیلہ ءُ اوتھل ءَ اَبید دگہ شھراں دامگ ءِ پچ بیگ بندات بیتگ اَنت-

وھدے کہ بلوچستان ءِ سر وزیر بلوچستان ءَ ٹاہ داتگ کہ اُرشکار بُنجاھی گیٹ ءَ جنگ بیتگ اَنت – دومی نیمگ ءَ بی ایل اے ءِ جند چینل ھکل ءَ تامُر شنگ کنگ بیتگ اَنت اشانی تہ ءَ گندگ بیت کہ فدائین بُنجل تہ ءَ جتاجتائیں جاھاں سنگر اِش گپتگ-

دمگی مردمانی رِد ءَ بُنجل ءَ چہ مروچی بیگاہ ءَ تاں تراکانی توار اش کنگ بیتگ اَنت- وھدے کہ ھیلی کاپٹرانی تر ءُ گرد ھم برجاہ اِنت-

دومی نیمگ ءَ بلوچ لبریشن آرمی ءَ وتی درشان ءَ آپریشن ھیروف ءِ آسر کنگ جار جنان ءَ سرجمیں شھدگانی پچ کنگ جار جتگ-

گل ءِ رِد ءَ آپریشن ھیروگ ءِ لڑ تنی وھدے بیلہ ءَ ھوار جتاجتائیں دمگاں یک سد سی پاکستانی پوج کارمند کشتگ اَنت-

بی ایل اے ءَ آپریشن ھیروف ءُ بیلہ ءَ پاکستانی پوج ءِ بُنجاھی بُنجل سر ءُ فدائین اُرش ءِ گیشیں ھالاں زوت شنگ کنگ جار جتگ-

بلوچ لبریشن آرمی ءِ جارکش جیئند بلوچ ءَ گوشتگ بیست ءُ پنچ اگست ءَ بندات بیتگیں بلوچ لبریشن آرمی ءِ فدائی آپریشن ھیروپ سوبمندی ءَ گوں آسر بوگ ءِ جار ءَ جن ایں-

جارکش ءَ گوشتگ آپریشن ھیروپ ءِ درچ ءَ دشمن ءِ بیلہ بنجل ءِ سر ءَ مجید برگیڈ ءِ فدائیناں دستیگ ءُ سرجمیں بلوچستان ءَ بنجاھی شھدگانی سر ءَ ایس ٹی او ایس ءُ فتح اسکواڈ ءِ ناکہ بندی کنٹرول ءَ کتگ-

آئی ءَ گوشتگ آپریشن ھیروپ ءِ وھد ءَ دشمن ءِ بیلہ بنجل بی ایل اے ءِ مجید برگیڈ ءَ بیست اداراں وتی کنٹرول ءَ کتگ ءُ دشمن ءِ شست ءُ ھشت کارمندانی کشگ ءَ سوبمند بیتگ انت ءُ ھمے وڑ بی ایل اے ءِ یونٹ فتح اسکواڈ ءُ ایس ٹی او ایس ءَ شست ءُ دو کارندہ کشتگ انت ءُ دوازدہ اداراں بلوچستان ءِ سرجمیں دگ بستگ انت ءُ کساسی رنگ ءَ یک سد ءُ سِی کارندہ کشتگ ءُ بازیں کساسے ءَ زدگ کتگ اَنت-

جارکش ءَ گوشتگ آپریشن ھیروپ ءِ ھلاس بوگ ءَ مول ءُ مرادانی درچ ءَ پد دراھیں دگانی ناکہ بندی ھلاس کتگ ءُ بیلہ بنجل ءِ مکسد گپتگ ءُ آپریشن ءِ ھلاسی ءِ جار ءَ جن ایں-

سرجمیں اھوال زوت شنگ کنگ بنت اِنت-