TBP Balochi

سیزدہ نومبر شھیدانی روچ بلوچستان ءِ درگت ءَ چہ بلوچستان ءَ ھوار دگہ ڈیھاں مراگش برجم دارگ بیتگ-

بلوچ شھیدانی کمیٹی ءِ نیمگ ءَ چہ بلوچستان ءِ ھلیجی ڈیھاں شھید سھرچکیں دروت ندر کنگ ھاتر ءَ مراگش ءَ شھید سھرچکیں دروت ندر کتگ اَنت-

جتاجتائیں ڈیھاں مراگشانی وھد ءَ شھیدانی اکسانی سر ءَ پُل درشان کتگ ءُ ڈیوا روک کتگ-

ھمے میان ءَ مراگش ءَ چہ تران کنان ءَ ترانکاراں گوشتگ سیزدہ نومبر ءِ روچ بلوچ راج ءِ واستا یک شرپے ءَ کم نہ اِنت، اے بے بھائیں روچ بلوچ راج ءِ سر ءَ پھری ءَ برز بیتگ وتی شھیدانی دیمونی، بامردی ءُ ماتیں ڈیھ بلوچستان وتواجھی ءَ ھاتر ءَ ریتکگیں ھون ءِ دیمونی ءَ شرپ ءُ شانی ءَ دروشم ءَ یات کنت-

آئی ءَ گْوشتگ کہ سیزدہ نومبر ھاسیں روچے نہ اِنت بلکیں ھما بے میں شھیداں چہ اِھد کول ھاتر ءَ مئے واستا یک بے بھائیں روچے کہ ما شھیدانی واھگ آجو بلوچستان ءِ وتواجھی ءَ اے جُھد دیم برگ کول ءَ کن ایں-

ترانکاراں گوشتگ کہ مروچی بلوچ راج اے روچ ءِ درگت ءَ چہ یکجاھی درشان کنگ ءَ اَنت اے مئے شھیدانی مول مراد اِنت-

ترانکاراں گوشتگ کہ بلوچ ڈیھ ھزرار شناس ءُ ناشناسیں شھیداں وتی ھوناں چہ اے زرمشبت سوبمندی ءِ نیمگ ءَ جُنز اِنتگ-

بلوچستان ءِ بُنجاھی شھر شال ءَ زورانسری آوار جنی ءِ ھلاپ ءَ زھرشانی ئیں گدان ءَ ھم شھیدانی روچ ءِ درگت ءَ ڈیوا روک کتگ ءُ شھید سھرچکیں دروت ندر کتگ اَنت-

دومی نیمگ ءَ چاگردی رسانکدراں ھم شھید سھرچکیں دروت ندر کتگ اَنت-

ھمے وڑ گوستگیں روچ ءَ شھیدانی روچ ءِ درگت ءَ یک بلوچی دیوانے برجم دارگ بیتگ- چریشی ءَ بلوچی ءُ براھوئی زبان ءِ نامی ئیں گُشندہ میر احمد بلوچ، ساول کندیل ءُ میرل بلوچ ءَ شھیدانی جُھد ءُ آیانی دیمونیانی سر ءَ سوت گوشتگ –

بلوچ راھشون سمی دین بلوچ ءَ گْوشتگ کہ مروچی ئیں روچ ءَ بلوچستان ءِ ھما بے مٹیں راجی شھیدانی نام ءَ کہ آیاں وتی زاتی زند، سرجمیں واھگ ءُ وتی دوستناک پشت یل داتگ ءُ یک راجی ءُ مچی سنچ، لیکہ ءُ فلسفہ ءُ انسانی برابری ءَ نمیران بیتگ اَنت آیاں، زلم، تاکت، زوراک ءِ ھلاپ ءَ گھگیری ءِ راہ در چتگ ءُ وت ءَ راجدپتری گھگیری کردانی لڑ ءَ مدامی زندگ کتگ –

آئی ءَ گوشتگ کہ شھید مئے راجی مڈی اَنت، ءُ مارا ناں تھنا اشانی دیمونی یات کنگ لوٹ اَنت بلکیں آیانی فلسفہ دیمونی ءَ مھکم دیگ راجی مچی ءَ مھکم کنگی اِنت- وتی راج ءُ وتی سرڈگار سر ءَ بیتگیں ھرچ وڑیں زُلم زیادھی ءُ زوراکی ءِ ھلاپ ءَ تپاک ءُ یکجاہ بیگ مئے زمہ واری شھیدانی واھگ اِنت-

شُما کُل بلوچ زان اِت کہ شھید چےیے؟

نبشتہ کار: برمش شاشانی

دی بلوچستان پوسٹ

من زاناں شھید کنگ سک گِران اِنت پَہ بُنی آدم ءَ اِے ساھت ءَ کہ تو وت ءَ وت تیر جن ئے اِے ساھت ھچ وش نہ اِنت ءُ اِے ساھت سک گِران اَنت ما وتی گِس ءَ نشتگ اَنت مئے برات ءُ گْوھار وت ءَ وت تیر جن اَنت ءُ وت ءَ وت شھید کن اِنت پَد ءَ ما وتی شھید ءَ چَہ وتی دِل ءَ در کن اَنت ناکو اکتر ندیم گُش اِیت کہ وتی شھیداں وتی دِل ءَ بدار اِت ھرکُجا شھید ءِ بیت آیرا وتی شھید بہ کن اِت من زاناں اِے منی امروز شھید بیت یک روچی من سُر سلام کناں وتی کُومی شھیداں ءُ وتی راجی شھیداں سلام کناں کہ آ وتی ساہ ءَ وتی جان ءَ وتی وَتن ءَ کُربان کن اَنت پرچا ما نہ کن اِیں آیان انچو ساہ دوست بیت آ کہ وتی ساھاں کُربان کن اَنت شھیدانی کہ روچ بیت ما چے کن اِیں پَہ وتی شھیدان اِے کہ شھید بنت اِے مئے واستا بنت اِے وتی تنگوھیں ساہاں کُربان کن اَنت اِے ساہ ءِ کُربان کنگ سک گِران اِنت اِے سوریں تیرے ورگ سک گِران اِنت اِے مزنیں کوھاں گردگ سک گِران اِنت ترا نان نہ بیت ترا آپ نہ بیت تئی دست ءُ پاد ھُشک بند کے سھیگ بیت کے زانت کہ اِے نَرمزار کوھاں گَپتگ اَت ءُ چون اَنت ما دْراھیں شھید بنت پہ وتی وتن ءَ ما ھم وت ءَ کُربان کن اِیں کے سھیگ اِنت کہ شھید ھمید شھید بوتگ ءُ چون بوتگ من نہ زاناں کہ من پَہ وتن چون کُربان بنت منی ھمدلیں برات ھمید چون شھید بوت من چون زاناں کہ کے شھید کُت یک وھدے من کُل شھیدانی بیران گِران من زاناں کہ منی زندگی گون من ھمراہ نہ بیت ما ھم شھید بئے پَہ وتی وتن اِے ھیال ءَ مُدام بِہ دار اِت کہ اِے دْراھیں شھید مئے شھید اَنت اِے ھیال مہ کن اِت کہ من وتی میتگے شھید ءَ وتی شھید کناں وتی اِے کُل بلوچستان ءِ تَھ ءِ کہ شھید اَنت اِے دْراھیں مئے شھید اَنت ءُ مئے بنت ما شھیدانی وامدار اِیں ما شھیدانی گُلام اِیں-

مئے برات وت ءَ پرچا شھید کن اَنت ءُ چے ءَ کن اَنت ءُ کے پر کن اَنت شُما وت زان اِت کہ اِے کُل شھید مئے وتی اَنت ءُ مئے برات ءُ گْوھار اَنت ما ورنا نشتگ اِیں ءُ مئے گْوھار وتی ساہاں کُربان کنگ ءَ اَنت اِے مئے ءُ منی واستا ھچ شر نہ اَنت باھدیں کہ من وتی ساہ پیسر ءَ کُربان بِہ کن اِیں من زاناں کہ مئے بلوچ راج انچوش بئے اِے ھیال نہ اِنت کہ ما شر نہ بنت ما شر بئے اگاں ما یکجاہ مہ بنت ءُ انچو جتا بِہ بنت گُڑا مئے واستا کس پاد نہ اِیت مارا وت ماں وت شر بوھگ ئے اِنت من وت ءَ زان اِیں کہ ما چُون اِیں انگتاں ما یکجاہ نہ بنت باھدیں ما یکجاہ بہ بنت پرچاکہ مئے تنگوھیں برات ءُ گْوھار مئے واست ءَ وت ءَ شھید کنگ ءَ اَنت پرچا آ مئے واستہ وت ءَ شھید کنگ ءَ اَنت آ شھید کنگ ءَ اَنت آ مرد کہ وت ءَ شھید کن اَنت آ پد ءَ چُوش نہ گُش اَنت کہ پرچا پہ شُما وتی جان ءَ کُربان بِہ کن اَنت مرچی آ ورنا وتی جان ءَ کُربان کن اَنت باندا مارا ھم وتی جان ءُ ساہ کُربان کنگ لوٹ اِیت آ کہ وت ءَ شھید کن اَنت آیانی دِل تَھ ءَ انچو ھیال ھست آ کمّو چار اَنت کہ مئے وتن چون اَنت ءُ مئے مات ءُ پِت برات ءُ گْوھار چُون اَنت آ گُش اَنت کہ مرچی ما وتی جان ءَ کُربان مَہ کَن اِیں گُڑا مئے پدریچ ھچ وڑ ءَ شر بوت کُت نہ کن اَنت پمیشکا اگاں مرچی ما وت ءَ شھید مہ کن اِیں گُڑا باندا مئے برات ءُ گْوھار وت ءَ ھچ وڑ ءَ شھید نہ کن اَنت ءُ ما باریں چینچُک روچ زندگ بنت مئے امروز ھمے وڑ بیت ما انچو لاشار بنت-

مات وتی شیرزالیں ماتان سلام پیش کناں کہ آجزیں مات وتی ورنائیں پچّاں پَہ وتن کُربان کن اَنت دِگہ مات باز اِنت آ پرچا وتی پچّاں کُربان نہ کن اَنت پہ وتی سرڈگار ءَ اِے وتن مئے دْراھیں ماتاناں دوست بیت پرچاکہ ورنا پہ شھید کنگ ءَ ھچ دوست نہ بیت اِے ھیال ءَ مُدام بدار اِت کہ کُل شھید مئے وتی شھید اَنت منی راجی شھیداں سد ءُ سُریں سلام ۔۔منی آجزیں ماتاں سد سلام کہ آیان وتی ورنائیاں پہ وتن کُربان کُتگ ءُانگتاں کن اَنت-

راجی شھیدانی روچ کُل بلوچان مُراد بات بِیا اِت وتی شھیداں پَد ءَ نازیں اِیں کُل یکجاہ بنت سُر ءُ سد سلام منی کُومی شھیدانا-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ‏13 نومبر ءِ درگت ءَ راجی شھیداں سھریں دروت ندر کنان ءَ گوشتگ مرچی ھما راجی بامردانی روچ اِنت کہ آیاں وتی زات ءُ زاتی زند پہ بلوچ ءِ وشیں باندات ءَ کربان کُتگ انت، مرچی مئے چاگرد کہ دیمروئی ءِ نیمگ ءَ جنزان انت آئی ءِ پشت ءَ ھمے شھیدانی ھون اَنت۔

آئی ءَ گوشتگ اگاں ما لوٹ ایں کہ ما پہ وت ءَ وش ءُ وشھال ءُ زندگیں چاگردے جوڑ بہ کن ایں ءُ بلوچ دیمروئی کتگیں راجے بہ بیت، گڑا مارا وتی زات ءُ وتی سرکلانی باز چیز مٹ کنگ لوٹ انت، مارا گونڈیں سوچ، کُنت ءُ انا ھلاس کنگ لوٹ انت۔

آئی ءَ گوشتگ اگاں مارا اے نازاکیں ورنایانی کربانی ءُ ھون ءِ اھساس ھست گڑا ما وتی تاکت ءَ یکے دومیءِ ھلاپ ءَ ھرچ کنگ ءِ جاہ ءَ وتی سرجمیں تاکت ءَ “بلوچ ءِ دژمن” ءِ ھلاپ ءَ ھرچ بہ کنیں، راجی یکجاھی ءُ یکشمتی ءِ ھاتر ءَ وتی کسان کسانیں نام، کُنت ءُ انا ءَ کربان بہ کن ایں ءُ وتی سرجمیں زوراں بلوچ جنزءِ مھکم کنگ ءِ سر ءَ بہ دے ایں۔

ڈاکٹر ماہ رنگ بلوچ ءَ گوشتگ بلوچ راجی شہیداں پہ یک وشھالیں بانداتے ءَ وتی سرجمیں زند کربان کُتگ، یک وشھالیں بلوچ چاگردے منی گوں ھوار ھرچ بلوچ ءِ واھشت انت، بلے راج ءُ چاگرد پہ واھشت دیمروئی نہ کن انت ءُ نہ تھنا چہ لھتیں مردماں کربانی لوٹ انت، بگندئے چاگرد یک یک نپر ءَ چہ عمل.ءِ لوٹ کنت۔ مزاحمت، جھد، لبزانک، وانگ، سائنس، ٹیکنالوجی ھرچ یک پیلڈے کہ آئی ءِ راج ءُ چاگرد جوڑ کنگ ءِ تہ ءَ کرد اَست ھما جاہ ءَ وتی کرد ءَ پیلو بہ کن ایں۔

آئی ءَ گوشتگ اے وھد ءَ بلوچ چاگرد جنگ ءِ آماچ اِنت، بلوچ ورنا وتی شہیدانی رتگیں ھون ءُ کربانیاں وتی دیم ءَ ایر بکن انت ءُ بہ جیڑ انت کہ آیا مئے وھد، بودناکی ءُ انرجی پہ بلوچ ءِ جنز ءُ باندات ءَ ھرچ بوگ ءَ اَنت یا انچوش پہ بے سر ءُ پادیں کاراں زوال بوگ ءَ انت، اگاں بے سر ءُ پادیں جاہءَ ھرچ بوگ ءَ اَنت گڑا مارا ایشانی سر ءَ باز سوچ کنگ لوٹیت ءُ وتی زند مٹ کنگ لوٹ ایت پرچہ کہ جنز تھنا پہ ہمدردی ءِ بنیات ءَ سوبمند نہ بنت، بگندئے چاگردے ءِ ھرچ یک نپرے وتی کرد ءَ پیلو بہ کنت۔ مئے چاگرد ءِ ھرچ نپر ھاسکار ورنا ھمے گپ ءَ سک باز سوچ بکن اَنت کہ آ کجام جاہ ءُ کجام پڑ ءَ پہ بلوچ ءُ بلوچستان ءَ وتی کرد پیلو کت کن انت، ھما جاہ ءَ وتی کرد ءَ پیلو بکن اَنت، کسے شریں جھدکارے بوت کنت، کسے شریں ٹیچرے بوت کنت، کسے سائنسدانے بوت کنت، کسے شریں نبشتکارے بوت کنت، کسے شریں جرنلسٹے بوت کنت، کسے شریں آرٹسٹے بوت کنت، کسے شریں زبان زانتے بوت کنت، کسے نوکیں دورءِ ٹیکنالوجی ءِ تہ ءَ زانتکارے بوت کنت بلے اے درستیں بساد ھما وھد ءَ بلوچ چاگرد ءُ بلوچ راجی جنز ءِ کار ءَ اتک کن انت کہ مئے سوچ راجی بہ بنت، مُچانکی بہ بنت، پرچہ کہ اگاں ما اے کلیں چیزاں پہ وتی زاتی نپ ءُ پائیدگانی ھاتر ءَ بہ کنیں گڑا راج ءُ چاگرد ءَ ایشانی ھچ نپ نہ رس ایت۔

ڈاکٹر ماہ رنگ ءَ گوشتگ منی نزیک ءَ بلوچ راجی شھیداں دروت ندر کنگ ءِ شرتریں راہ ھمیش اِنت کہ آھانی گچین کُتگیں راہ ءِ سر ءَ امل بہ کنیں ءُ راجی جنز ءَ وڑے نہ وڑے ءَ الم وتی کرد ءَ پیلو بہ کن ایں۔

‎

بلوچستان ءِ دمگ واشک ءَ ناشناسیں سلاہ بندیں مردماں لیویز چیک پوسٹ سر ءَ اُرش کتگ سلاہ ءُ سامان وتی ھمراھی ءَ برتگ اَنت – وھدے کہ پنجگور ، کیچ ءُ گندوا ءَ پاکستانی پوج سر ءَ اُرشانی ھال اِنت وھدے کہ دکی ءَ بند ساچی شرکت نشانگ کتگ-

گیشیں ھالانی رِد ءَ واشک ءِ دمگ رخشان ءَ سلاہ بندیں مردماں مزنیں کچے ءَ گوستگیں شپ ءَ لیویز چوکی سر ءَ اُرش کتگ لیویز سلاہ، پرپٹ ءَ ھوار سرجمیں گاڑی دستیگ کتگ اَنت وتی ھمراھی ءَ برتگ اَنت وھدے کہ چوکی مانداشتگ-

اے میان ءَ جانی تاوان ھال سر نہ بیتگ-

زانگ بہ بیت کہ دو روچ ءَ ساری ھمے وڑیں اُرشے آواران ءِ دمگ گیشکور ءَ بیتگ اَت ءُ اشی ءِ زمہ واری بلوچستان لبریشن فرنٹ ءَ زرتگ اَت-

دومی نیمگ ءَ کیچ ھالانی رِد ءَ ناشناسیں سلاہ بندیں مردماں ھیرونک ءِ ھند سر ءَ پاکستانی پوج ءِ چوکی اُرش نشانگ کنگ بوتگ-

چہ پنجگور ءَ ھم ھال اِنت ناشناسیں سلاہ بندیں مردماں بُنجاھی بُنجل نشانگ کتگ- دمگی وسیلگ رِد ءَ دمگ ءَ کم چہ کم پنچ تُرندیں تراکانی توار اش کنگ بیتگ اَنت-

ھمے وڑ گنداوہ ءَ پولیس سر ءَ سلاہ بندیں اُرش ھال اِنت وھدے کہ دکی ءَ تاں چمالنگ دگ جوڑ کنوکیں شرکت جالار ھند سر ءَ سلاہ بندیں مردماں نشانگ کتگ مشینری مانداشتگ اَنت-

وسیلگ رِد ءَ اے اُرشاں پوج ءَ تاوانانی دیمپانی کنگ کپتگ واکدار ءَ اے درگت ءَ ھچ وڑیں درشان شنگ نہ کتگ نانکہ اُرشانی زمہ واری گلاں زرتگ اَنت-

ھمے ڈول ءَ پاکستانی پوج ءَ ٹاہ داتگ کہ بلوچستان ءِ دمگ کیچ ءَ یک لشکر کشی ءِ میان ءَ سے سلاہ بندیں مردم کشتگ اَنتٹ چہ آیاں مزنیں کچے ءَ سلاہ ءُ گولہ بارود دستیگ کتگ اَنت-

ٹاہ رِد ءَ کیچ ءَ پوج ءَ کلیئرآپریشن ء سے سلاہ بندیں مردمانی جنگ ءِ ٹاہ داتگ- جنگ بیتگیانی تہ ءَ وتکش تراکّار عدیلہ بلوچ ءَ را ھیلکاری دیوک ثناء پنّام ءِ بارو ھم ھوار اِنت-

سیکورٹی بنشون ءِ رد ءَ ٹاہ داتگ کہ ثناء پنّام ءِ بارو ءَ عدیلہ بلوچ ءِ سلاہ بندیں گل ءَ ھوار کتگ ءُ آئی ءَ را وتکش تراکّاری اُرش ءَ ھیلکاری داتگ- بلے تنی وھدے پوج ءِ ٹاہ راست کنگ نہ بوتگ اَنت-

سیزدہ نومبر شھیدانی روچ

نبشتہ کار : مزار شاشانی

دی بلوچستان پوسٹ

شُما انچو سرپد اِت کہ سیزدہ نومبر مئے راج ءِ شھیدانی روچ اِنت ۔ اِے روچ گَل ءُ وشییانی روچ اِنت ما را اِے روچ ءَ ھچ پریشان مہ بَہ اِیں ۔ پر چیا کہ آیاں وتی ساہ پہ آجوئی ءَ کُرباں کُتگ ۔

آجوئی ءِ بزانت وت واجھی وتی ڈگار ءِ وت واھندی، وتی زُبان ءِ وھندی مئے راج ءِ تہ ءَ سَک شَھید باز اَنت ما اِے ھچ بر مہ جیڑ اِیں کہ ما وت واجھی نہ کن اِیں ما اِے الّم زان اِیں مئے راج ءِ تہ ءَ مرچی اِنکس شَھیداں وت ءَ آجوئی ءَ پہ کُربان کُتگ ما اَلّم وتی منزل ءَ رس اِیں-

اگاں مئے راج ءِ تہ ءَ اِنکس شَھید مہ بوتیں ما مرچی ھچ نہ زانتگ ات مئے کے اِیں ءُ مئے دود ءُ ربیدگ ءُ مئے زُبان چی اِنت مْئے مات ءُ پت گُھار ءُ براس ءِ ھچ بَر اِے درد ءِ تہ ءَ مہ بنت منی بَچ شَھید بوتگ ما اِے زاں آں آیاں وتی ساہ پہ وتی مات ءُ پتاں پہ نہ کُتگ بلکیں آ پہ وتی کُلیں بلوچستان ءِ جھمنند ءُ وتی راج ءِ واست ءَ شَھید بوتگ اَنت-

ما اِے ھم سرپدیں کہ مئے چنچو برات بندیگ جاھاں بند اَنت تھاریں کوٹیانی تہ ءَ اَبیتک ءَ نشتگ ءُ درد ءِ آماچ اَنت دُژمن ءَ اوپار کنگ ءَ اَنت آ ھم پہ مئے واستا سانکلانی تہ ءَ بند اَنت-

وتن دوست ءُ راج دوست سَک باز اِنت ھر کَس وتی جاھ ءِ گپت بلے آیاں چے مستریں کَردار ھمایا اَنت وتی راج ءِ شھیداں ھچ بر بے ھال نہ بیت آ وتی راج ءِ شَھیداں پَجا کار اِیت ءُ یات کنت-

ما انُو اد ءَ سریں ءُ وتی دژمن ءَ گوں ھبر کَنگ ءَ ایں ءُ وتی ھَک ءِ لوٹگ ءَ اِیں آوانی مستریں سَبب مئے راج ءِ شَھید اَنت آیاں وتی ساہ ما پہ ندْر کُتگ ءُ مارا اے پَکر داتگ اِش-

بلوچی ءَ بَتلے گُش اَنت جنگ ءِ نام وش انت بلے کنگ ءِ گراں اِنت اِیشی ءِ بزانت ھمیش اِنت آ جنگ ءَ اَنت بلے جَنگ ءِ نام انسان ءَ سَک دْوست بیت وتی ساہ ءِ کُربان کنگ نہ بیت آ مرچی وتی ساہ کُربان ما پہ کُتگ اَنت ما اَلّم آیاں بےھال مہ بنت-

انچُش کہ چی گویرا گُوش ایت دگنیا ءِ تہ ءَ ھما راج زندگ بوت کن اَنت کہ آیاں وتی راج ءِ شَھید بے ھال نہ کُتگ اَنت ھما ما انوں بچار اِیں کہ بازیں مَلکاں جَنگ کُتگ بلے آیانی سوبمندی اِے بوتگ آیاں وتی راج ءِ شَھید بے ھال نہ کُتگ اَنت-

اگاں ما مرچی وتی راج ءِ زندگ ءُ دیم ءَ کَنزینگ لوٹ اِیں دْراھیناں چے پیسر ماراوتی راج ءِ شَھید زندگ دارگی اَنت ما چہ زندگیں گیشتر آیاں دیم ءَ بہِ بر اِیں یات بہ کن اِیں –

اگاں ما مرچی وتی راج ءِ شھیداں بے ھال بِہ بہ ایں گُڑا آیانی ھون مارا ماپ نہ بیت آیانی بے ھال ءِ سَبب ءِمئے پادنی کُنٹگ بیت ۔ ما مرچی وتی راج ءِ شَھیداں زندگ مہ دار اِیں ءُ آیاں یات مہ کن اِیں باندا مئے چُک اِے ھم نہ زان اَنت کہ بلوچاں وت ءَ پہ وتی سر زمین ءَ ھم ھون بَکشاتگ-

سلام مئے کلیں راج ءِ شَھیداناں کہ آیاں وتی سَر پہ بلوچ ءَ ندر کُتگ-

بلوچستان ءَ ھوار ءَ دگہ ڈیھاں جھمنندیں بلوچ ‘ بلوچ شھیدانی’ روچ ءَ دارگ ءَ اَنت-

بلوچ شھیدانی یات ءَ چاگردی تکاں ھوار دگہ جاھاں پہ بلوچستان ءَ نمیران بیتگیں شھیدانی یات ءَ دیوان ءُ آیانی دروھتی ءِ ھاتر ءَ مھلوک جتا جتائیں تکاں شھیداناں دروت ندر کنگ ءَ اَنت-

زانگ بہ بیت سیزدہ نومبر سال دوھزار ءُ دَہ ءَ بلوچ نودربر گل آزاد ءِ نیمگ ءَ بلوچ شھیدانی یات ءَ نامینگ بیتگ-

سیزدہ نومبر گیشتر سال 1839 ءَ انگزیر ءِ ھلاپ ءَ بلوچ رھشون مھراب خان ءِ شھیدی ءِ روچ ھم زانگ بیت اِنت کہ چریشی ءِ ھواری ءَ بلوچستان ءَ سیاسی گل، نودربر گل ءُ لس مھلوک ءِ ھواری ءَ سلاہ بندیں گل ھم اے روچ ءَ بلوچ شھیدانی یات ءَ یاتگاری دار اَنت-

ھمک سالانی ڈول ءَ اے سال ءَ ھم بلوچستان ءَ ھوار دری ڈیھاں جھمنندین بلوچ، سیاسی تک ءُ پھنات اے روچ ءَ شھیدانی روچ دارگ ءَ اَنت-

شھدا کمیٹی ءِ نیمگ ءَ چاگردی ترامجاھاں ھم سیزدہ نومبر ءِ درگت ءَ مراگش ءُ دگہ دگہ دروشماں یاتگیری کنگ بوگ ءَ اَنت-

ھمے ڈول ءَ بلوچ نیشنل مومنٹ ءِ نیمگ ءَ ھم گوستگیں روچ ءَ ماں جرمنی ءَ مراگش ءُ ڈیوا بالینگ ءُ اکس پیشدارگ بیتگ اَنت-

ھمے ڈول ءَ چاگردی ترامجاھاں بلوچ شھیدانی اکس ءُ تامرانی شنگ ءِ ھواری #13NovBalochMartyrsDay
کارمرد کنگ ءُ بلوچستان ءَ ندر بیتگیں نمیراناں دروت ندر کنگ ءَ اَنت-

بلوچستان ءِ دمگ کیچ دشت ءَ گوستگیں روچ ءَ پاکستانی پوج ءَ فو مردم دزگیر کنگ ءَ پد بیگواہ کرتگ اَنت-

اھوالانی رد ءَ دشت ءِ دمگ شولیگ ءَ سیادی داروکیں دو مردم پاکستانی پوج ءَ دزگیر کنگ ءَ پد بیگواہ کتگ انت-

بیگواہ کنگ بیتگیں مردمانی پجار عبدالستار ء خالد ءُ طارق ء حاجی حمزہ ءِ ناماں زانگ بیتگ انت کہ ھردوک دشت شولی ءِ جھمنند اَنت-

اھوالانی رد ءَ عبدالستار یک ورنائیں فوٹوگراپرے کہ آ گوستگیں روچ ءَ بیگواہ کنگ بیتگ-

دمگی مردمانی گوشگ اِنت اے مردم گوستگیں دو روچ پیش بینگ ءِ گرگ ءَ شتگ انت ءُ اود ءَ پوج ءَ دزگیر کتگ ءُ برتگ انت-

گوستگیں روچ ءَ پوج ءِ آپریشن سیاھجی ءِ کوھی دمگاں برجاہ اِنت کہ اود ءَ بازیں کچے ءَ پوج ءِ گاڑی ءُ پوجی گندگ بیتگ اَنت-

بلوچستان ءِ دمگ کلات نرمک ءَ سَے براتانی لاش دزکپتگ اَنت-

لیویز بنشون ءِ رد ءَ ھرسئیں برات یک ماھے ءَ پیش ناشناسیں سلاہ بندیں مردماں جوھان ءَ آوار جتگ انت – لاش ار ایچ سی منگچر ءَ برگ بیتگ اَنت-

وئیل ءِ بارو ءَ گیشیں سرپدی نہ بیتگ دمگی انتزامیہ پٹ ءُ پول کنگ ءَ اِنت-

روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک بندیگیں بلوچے پاھو دیگ بیتگ-

اھولانی رد ءَ پاھو دیگ بیتگیں مردم ءِ پجار زکریا علیزئی ء مھمد افضل جھمنند گوربند زاھدان ءِ نام ءَ زانگ بیتگ-

اھوالانی رد ءَ زکریا علیزئی سَے شمبے ءِ روچ ءَ جتائیں کوٹی ءَ برگ بیتگ ءُ پد ءَ آئی ءِ پاھو ءِ سر ءَ امل کنگ بیتگ-

زکریا علیزئی سَے سال پیش زاھدان ءَ گرگ بیتگ ءُ پد ءَ دادگاہ انکلاب ءَ آئی ءَ را پاھو ءِ سزا داتگ-

زکریا علیزئی ءِ کھول ءَ گوستگیں روچ ءَ ماں زاھدان ءِ زندان ءَ گڈی گندوک بیتگ ءُ چریشی ءَ پد آ پاھو ءَ برگ بیتگ-