TBP Balochi

بلوچستان ءِ دمگ دکی ءَ پاکستانی پوج ءِ آپریشن بندات کتگ ءُ لوگاں پٹ ءُ ھنڈ کنگ ءَ انت۔

دکی ءَ پاکستانی فپوج مزنیں کچے ءَ آپریشن ءَ گوں دزبند انت- دمگی مردماں ٹی بی پی ءَ را گشتگ کہ زمینی پورسز دمگ ءَ مزنیں کچے ءَ آپریشن کنگ ءَ انت۔

اھوالانی رد ءَ رباط، پوڑی، کورانی ءُ کش ءُ گوری آپریشن ءِ زد ءَ انت- وھدے کہ پورسز ءَ بازیں لوگانی پٹ ءُ پول کتگ انت۔

دزگیریانی اھوالانی بابت ءَ انگت ءَ ھال ءُ اھوال رسگ ءَ نہ اِنت۔ ایشانی ھوار ءَ دمگ ءَ مزنیں تیرگواری ءِ ھال ھم رس اِتگ۔

اے درگت ءَ واکداراں ھچ وڑیں ھال ءُ اھوال نہ داتگ۔

روکپتی بلوچستان ءِ دمگ سراوان ءَ ناشناسیں مردماں گوستگیں شپ ءَ ایرانی لشکر بسیج ءِ سر ءَ اُرش کرتگ کہ چریشی ءَ لشکر ءَ جانی تاوانانی دیمپانی کنگ کپتگ-

گیشیں اھوالانی رد ءَ سراوان ءِ ھمد سیرکان ءَ ایرانی لشکر ءِ چتکان بنجل ءِ سر ءَ ناشناسیں مردماں گوستگیں شپ ءَ اُرش کتگ ءُ پنچ کارمند کشتگ اَنت-

ایرانی لشکر ءِ بنشون ءَ ھال راست کنان ءَ گوشتگ سیرکان ءَ چتکان بنجل ناشناسیں مردماں نشانگ کتگ ءُ چریشی ءَ بنجل ءَ جاڑیگیں عبدالرحمان بلوچزئی، واحد بلوچ زئی، بشیر سپاھی، حاجی شاہ بخش بلوچزئی ءُ عبداللہ بلوچزئی کُشتگ اَنت-

لشکر ءَ گوشتگ اُرشکارانی پٹ ءُ پول ءَ دمگ ءَ بیڑ برجاہ انت-

تنی وھدی گوستگیں شپ ءَ بیتگیں اُرش ءِ زمہ واری ھچ گل ءَ نہ زرتگ، ھمے زوتاں جیش العدل نامیں گلے ءَ روکپتی بلوچستان ءَ ایرانی لشکر ءِ سر ءَ اُرش کتگ بیتگ-

پاکستانی پوج ءِ واکدار ءَ ٹاہ داتگ کہ سندھ پولیس، سی ٹی ڈی ءُ چیریں ادارھاں کراچی ءَ تباھی تالان کنگ ءِ شوربندی بے سوب کتگ دو وتکش تراکّار دزگیر کتگ اَنت-

ٹاہ ءِ تہ ءَ گْوشگ بیتگ کہ کراچی ایئرپورٹ نزیک ءَ اُرش ماسٹر مائنڈ ھم بلوچستان ءِ دمگ چہ وندر ءَ آوار جتگ-

سرکاری وسیلگ رِد ءَ دزگیر کنگ بیتگیں وتکش تراکّاراں چہ وتکش جیکٹ، دستی بمب ، سلاہ ءُ واکی ٹاکی ھم دستیگ کتگ اَنت-

زانگ بہ بیت کہ جاوید بلوچ جھمنند وندر پاکستانی پوج ءَ شانزدہ اکتوبر دوہزار بیست چار ءَ چہ وندر ءَ بیگواہ کتگ اَت ءُ مروچی آئی ءِ دزگیری ءِ ٹاہ داتگ-

بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ سے جتاجتائیں اُرش کولواہ ءُ ھاران ءَ بیتگیں اُرشانی زمہ واری منّ اِتگ اَنت-

جارکش میجر گوھرام بلوچ ءَ گوشتگ کہ مروچی کولواہ ءَ زورگریں دُژمنیں پوج ءِ کاروان ءِ دو جتاجتائیں اُرشاں نشانگ کتگ چریشی ءِ آسر ءَ زورگریں پوج ءِ نُھ کارمند مرتگ ءُ بازین ئِے ٹپی کتگ اَنت-

جارکش ءَ گوشتگ کہ دہ نومبر یکشمبے روچ ءَ دوازدہ نیم ءَ سرمچاراں کولواہ ءِ دمگ مراستان ءَ لشکر کشی نیئت ءَ پُتروکیں پوجی کاروان نشانگ کتگ چریشی ءَ زورگریں پوج ءِ پنچ کامند مرتگ ءُ بازین ئِے ٹپی بوتگ اَنت-

جارکش ءَ گْوشتگ کہ دومی اُرش دہ نومبر یکشمبے ءِ نیم روچ یک نیم ءَ کولواہ ءَ سگک ءُ کڈے ھوٹل ءِ میانی پڑے دمگ ءَ کتگ چریشی ءَ زورگریں پوج ءِ چار کارمند مرتگ اَنت ءُ بازین ئِے ٹپی بیتگ اَنت-

جارکش ءَ گوشتگ کہ مروچی سھب ءَ چہ ھوشاپ ءَ پوجی کارمندانی مزنیں کچے ءَ کولواہ ءَ لشکر کشی ءِ نیئت ءَ چہ پُترتگ، لوگ لوگ ءَ پٹ پول کتگ مردم ترسینتگ اَنت – لشکر کشی ءَ لَس مھلوک ءِ تُرسینگ ءَ پد زورگریں پوج کارمند درتکگ اَنت گُڑا انٹیلجنس ٹولی ءَ ھال رسگ ءَ ساری پیسر ءَ سنگر گپتگیں سرمچاراں اسپیشل آپریشن اسکواڈ ءُ قربان یونٹ ءِ سنگتانی ھمراھی ءَ نوکیں ءُ مزنیں سلاھاں چہ دُژمن ءِ بیست گاڑی ءُ بازیں پرپٹانی سر ءَ ھمگرنچیں کاروان سر ءَ مزنیں اُرشے کتگ-

جارکش ءَ گْوشتگ کہ اُرش نشانگ ءَ چار گاڑی ءُ چار پرپٹانی آیگ ءَ چہ دُژمن ءِ پنچ کارمند مرتگ ءُ بازین ئِے ٹپی بیتگ اَنت، دُژمن ءِ بکتر بند گاڑیاں سرمچارانی انگر کنگ جُھد کتگ بلے جنگی شوربندیاں چہ سرمچاراں دُژمن پروش داتگ دُژمن ءِ شوربندی بے سوب کتگ-

جارکش ءَ گوشتگ کہ اُرش ءَ پد ترس آماچیں پوج دیم روگ ءَ جاہ کڈے ھوٹل نیمگ ءَ شتگ اَنت پرچاکہ آیاں ترس بیتگ کہ کوھی دمگاں دوبر اُرش بیت کنت ھمے ھاتر ءَ پوج ءَ سگک ءِ راہ کڈے ھوٹل نیمگ ءَ مناسب سرپد بیتگ بلے انٹیلجنس ٹولی ءَ ھال سر بیگ ءَ کہ پوج سکگ ءُ کڈے ھوٹل ءِ میان پڑ ءِ راہ ءَ سپر کنگ اِنت، ھمے ھالانی سر ءَ سرمچاراں یکرندے پد ءَ سنگر گپتگ ءُ دُژمن ءِ دہ گاڑیانی سر ءَ مزنیں اُرشے کتگ چریشی ءِ آسر ءَ زورگریں پوج ءِ چار کارمند مرتگ ءُ بازین ئِے ٹپی بیتگ اَنت- اے اُرش روچ ءِ یک سی ملٹ ءَ بیتگ-

جارکش ءَ گوشتگ زورگریں پوج وتی تاکت ءِ سر ءَ گرور اِنت کہ بلوچستان ءِ جتاجتائیں دمگاں زوراکی کنت، بے میاریں راج ءُ زُلم ءُ زوراکیانی نشانگ کنت بلے وھدے آیانی دیم پہ دیم بلوچ سرڈگار ءِ راستیں وارساں گوں بیت گُڑا آئی ءِ تاکت ءُ گرور دِت جوڑ بنت آزمان ءَ گار بنت ءُ تچگ ءَ اَبید آئی ءِ گور ءَ دگہ ھچ راہ نیست-

جارکش ءَ گوشتگ کہ بلوچستان ءِ ھرچ دمگ ءَ بی ایل ایف ءِ سرمچاراں، چیریں یونٹس، قربان یونٹ، ءُ اسپیشل آپریشن اسکواڈ ءِ بے بھا ایں جُھد برجاہ ءَ اِنت- ھرچ سنگر ناں تھنا جنگی بلکیں سسّائی پروش ءِ دیمپانی اِنت، چریشی ءِ سوب ءَ آیانی جزبگ نزور بیگ ءَ اَنت- زورگریں پوج ءِ اے تُرس لرز سرمچارانی شوربندی ءُ بے مٹی پدر اِنت – آ روچ دیر نہ اَنت وھدے بلوچستان ءِ آزمان ءَ آجو بلوچستان ءِ بیرک ءَ پھر سر ءَ منّڈیں ءُ زورگریں توانمند مدامی واستا اے سرڈگار ءَ چہ رُکست بنت-

جارکش ءَ دگہ اُرشے ءِ زمہ واری منّ اِتگ گْوشتگ کہ مئے سرمچاراں دہ نومبر یکشمبے ءَ نیم سے ءَ ھاران ءِ دمگ جلال زئی ءُ سرگردان ءَ سی پیک لنک دگ سر ءَ بند ساچی کاراں دلگوشیں شرکت ءِ دو جتاجتائیں ھنداں یکیں وھد ءَ اُرش کتگ مشینری مانداشتگ اَنت-

جارکش ءَ گوشتگ کہ اشی ءَ ساری شرکت ءِ بلڈوزر سرمچاراں مانداشتگ اَنت ءُ کڈن ھم کتگ اَنت کہ آ ریاست شوربندیاں چہ گستا بہ بنت ءُ مروچی یکرندے پد ءَ کڈن کتگ اَنت کہ پُل پانچیں پروجیکٹ بلوچ سرڈگار سر ءَ ھچ وڑ کبول نہ اِنت-

جارکش ءَ گوشتگ کہ بلوچستان لبریشن فرنٹ اے اُرشانی زمہ واری ءَ منّ اِیت ءُ اے اِھد کنت کہ آجو بلوچستان ءِ وتواجھی ءَ تاں زورگریں پوج ءُ آئی ءِ ھمکار ءُ پُلپانچیں پروجیکٹاں نشانگ کنت-

کیچ ءِ دمگ دشت ءَ ￴ناشناسیں سلاہ بندیں مردماں پاکستانی لشکر ءِ ￵سر ءَ ￴اُرش کتگ۔

دمگی مردمانی ￵رد ءَ ￴سلاہ بندیں مردماں یک شمبے ءِ ￵بیگاہ ءَ دشت کھڈان ءَ برجاھیں ￴￴پاکستانی لشکر ءِ بنجل ءِ ￵￵سر ءَ ￴اُرش کتگ۔ ءُ اُرش بازیں وھداں برجاہ بیتگ ءُ تیرگواری ءُ تراکانی توار دور اشکنگ بیتگ انت-

اُرش ءِ ￵آسر ءَ ￴پاکستانی لشکر ءِ ￵جانی تاوان ءِ ￵ھال اِنت۔ اے درگت ءَ واکدارانی بنگپ دیم ءَ نیتکگ انت-

اُرش ءِ ￵زمہ واری انگت ءَ ￴ھچ گل ءَ ￴نہ زرتگ۔ اے دمگ ءَ بلوچ سلاہ بندیں گل پرکار انت-

بلوچستان ءِ پیسریگیں سر وزیر ءُ نامداریں سیاسی رھشون نواب اسلم رئیسانی ءَ گوستگیں روچ ءَ شال ءَ بوتگیں وتکش اُرش ءِ سر ءَ لیکہ دیان ءَ گشتگ کہ اے وئیل 77سال ءَ چہ بلوچستان ءَ ریاستی نا انساپیانی ءُ انسانی ھکانی لگتمالی ءِ آسر انت۔

آئی ءَ گیش گوشت کہ استان ءَ گیر جمھوری سرکار داری، الس ءِ نمائندگی ءِ کمی ءُُ زوراکی ءَ بیگواہ کنگ ءِ سبب ءَ انچیں چاگردے جوڑ بوتگ کہ مزلومیں مردمانی پژدر ناشرکاری ءِ نیمگ ءَ رھادگ بوھگ ءَ انت۔

اسلم رئیسانی ءَ اے گپ پدر کت کہ ریاستی زلم ءُ نابرابری ءِ سوب ءَ بلوچ راج ءِ تہ ءَ گیش بوھوکیں بے تاھیری نوں زوراکی ءِ رنگ ءَ دیم ءَ آیگ ءَ اَنت۔

آئی ءَ گیش گْوشتگ کہ اے جیڑھ ءِ پائیداریں گیشواری ایوک ءَ بلوچستان ءَ را وت واججی ءِ ھک دیگ، جانسلامتیانی سر ءَ کنٹرول کنگ، ءُ زوراکی ءَ بیگواھیں مردمانی پچ گرگ ءَ چہ ممکن اِنت۔

گوستگیں روچ ءَ بلوچ لبریشن آرمی ءَ شال ریل اسٹیشن ءِ سر ءَ پاکستانی آرمی ءِ یک ٹولی ءِ سر ءَ پدائی اُرش ءَ پد چہ شال پشاور ءَ رؤکیں جعفر ایکسپریس ءُ کراچی ءَ رؤکیں بولان میل چار روچ ءِ واستا بند کنگ ءِ شور بیتگ-

رسانکدر رپورٹس رِد ءَ جعفر ایکسپریس ءُ بولان میل یازدہ نومبر ءَ چہ چار روچ ءِ واستا بند کنگ شور بیتگ، اے شوربندی بی ایل اے مجید برگیڈ پدائی اُرش ءَ پد کنگ بیتگ-

زانگ بہ بیت گوستگیں روچ ءَ شال ءَ ریل اسٹیشن ءِ سر ءَ بی ایل اے مجید برگیڈ ءِ پدائی ءَ پاکستانی پوج ءِ یک ٹولی یے اُرش ءِ نشانگ کتگ ات، بی ایل اے ءِ رِد ءَ اے اُرش ءَ کم چہ کم سی ءُ یک کارمند مرتگ ءُ شست ٹپی بیتگ اَنت-

بی ایل اے ءِ جارکش جیئند بلوچ ءَ گوشتگ کہ بلوچ لبریشن آرمی ءِ پدائی یونٹ مجید بریگیڈ ءَ زرگون دگ ءِ نزیک ءَ برجاھیں شال ریل اسٹیشن ءِ سر ءَ روگ ءِ واستا ساڑی ئیں پاکستانی پوج ءِ نان کمیشنڈ آفیسرانی یک ٹولی یے پدائی اُرش ءَ نشانگ کتگ آئی ءَ گوشتگ کہ اے اُرش ھما وھد ءَ کتگ وھدے کہ اے پوجی کارمند دی اسکول آف انفنٹری اینڈ ٹیکٹکس چہ شال ءَ ھلکاری سرجم کنگ ءَ پد جعفر ایکسپریس ءِ سر ءَ وتی لوگانی نیمگ ءَ واتر روگ ءَ بیتگ اَنت- اے سوبمندیں اُرش ءَ کم چہ کہ سی ءُ یک پوجی کارمند مرتگ اَنت ءُ شست ءَ گیش ٹپی بیتگ اَنت-

بلوچستان ءِ دمگ دشت ءُ پنجگور ءَ پاکستانی پوج ءِ لشکر کشی-

گیشیں ھالانی رِد ءَ پنجگور ءِ دمگ پروم ءَ گوستگیں روچ ءَ لشکر کشی برجاہ ءَ اِنت – وھدے کہ دمگ ءَ مزنیں کچے ءَ پوجی کارمندانی روگ آیگ برجاہ ءَ اِنت-

چمّگدانی رِد ءَ پاکستانی پوج زی کوھی دمگاں پترتگ گُڈی ھالانی رِد ءَ اود ءَ ساڑی بیتگ-

وھدے کہ چہ پنجگور ءَ دگہ گیش پوجیانی دمگ ءَ آیگ ھم برجاہ ءَ اِنت-

ھمے وڑ دشت سیاھجی ءَ ھم زی پوج شتگ مروچگیں ھالانی رِد ءَ پوج واتر بیتگ دگہ جانی تاوان آوار جنی ءِ ھال سر نہ بیتگ-

جنگی ھُنر

نبشتہ کار: سُن زو

رجانک: کوھسار قندیل

سیمی بھر

دی بلوچستان پوسٹ

جوانیں پوجی اُرش: سُن زو گُوش ایت یک جوانیں جنگی ھنرانی توک ءَ یکے اِیش اِنت کہ تو مُلکے ءَ بہ ئے جنگ ءَ زور بہ گر بکن اے،متلب مار ھم بہ مِر ایت ءُ لٹ ھم مہ پُروش ایت جنگ ءَ ھم سوبمند بہ بہ ئے نُکس ءُ تاوان ھم مہ بیت انت۔سپاھیگ اے کُشگ ءَ گیش دستگیر بہ کن جوان تر اِنت کہ آھانی سِلاھان پچ گِت کُت کن ئے ءُ آھان ءَ وتی لشکر ءَ ھوار کُت کن ئے۔

سُن زو گُش ایت میدان ءِ جنگ ءَ باج بَرگ بلاھیں گپے نہ اِنت،دشمن ءِ تاکت ءِ پُروش دیگ ءُ آھان ءَ نپسیاتی شِکست دیگ بلاھیں سوبمندی یے۔ سُن زو وتی گیش ھبرانی توک ءَ اے گپ ءَ باز اھمیت دنت کہ دشمن ءَ منسوبہ بندی کنگ ءَ میل ۔میدان جنگ ءَ دشمن ءِ سر ء جوانیں اُرش بکن ءُ آئی ءَ بھَر ءُ تَھر بکن۔ دشمن ءِ راہ ءُ دگ ءَ بند کنگ ءَ چہ تئی بازین وھدے زوال بوت کنت دشمن اے بُنجل ءُ شھر ءَ ایر کپگ ءَ تئی سپاھیگانی مِرگ ءُ تاوان ورگ ءِ باز ھاتر ھست۔سُن زو گوش ایت جنگ ءِ جوان تِریں رِپک ھمیش اِنت تو دشمن ءَ زھنی پُروش بہ دے ۔ سُن زو ءِ لوٹ بُتگ کہ یک جنگی کمانے ءَ ابید نُکس ءُ تاوان ءَ سوبمندی گِپت بکن ءُ اے پیم ءِ سوبمندی جونیں جنگی ھُنرے۔ سُن زو ءِ متابک ءَ تئی لشکر ءِ سپاھیگ اگاں دشمن لشکر ءِ برابر بیت گڑا جنگ بہ کن،اگاں تو دیست تی کساس کم تِر اِنت گڑا دیم پہ دیمی جنگ مکن ۔اے پیمیں جنگاں چہ تو باز نُکس وارت کن ئے۔دشمن وھدے دیم ءَ کیت گڑا تو وت ءَ پُشتہ کَش ءُ دشمن کہ پُشت کِنزے گڑا تو اچانک ءَ دشمن ءِ سر ءَ اُرش بہ کن چُشیں اُرش دشمن ءَ باز گنوک کنت۔ سُن زو ءِ ھیال ءَ یک بادشاھے ءِ سئے کار ءَ چی وتی جنگی لشکر ءَ تباھی ءِ دروازگ ءَ سر کنت۔ اوّلی ءَ بے سوچ ءُ پَھمگ ءَ وتی پوج ءَ دیم ءَ رھادگ کنت ءُ پُشت کِنزی ھم کنت آرا وتی سپاھیگانی ھالاتانی سماء نہ بیت آ وتی لشکر ءَ ھکومت ءِ ڈول ءَ استمال کنت ءُ سرپد نہ بیت کہ لشکر چی پیم ءَ استمال بُوھگ ءَ اِنت پرچا ھکومت بازین راھبندے گِش اتگ ءُ پوج وت ءَ گوں ھالات مٹ کُت کنت۔وھدی تو جنگی کمانی ءَ چہ جنگی زمہ واری کَش ئے ءُ وتی تب ءِ زمہ واری دے گڑا تئی پوجی راھبند تباہ بنت۔ سُن زو گوش ایت وھدی تئی سپاھیگ بہ ئے ھوسلہ بنت گڑا تو اِچ وڑ ءَ باج بُرت نہ کن ئے ءُ دشمن چہ اے پیمیں ھالات ءَ سک پائدہ چِشت کنت ءُ ترا باز تاوان دنت سوبمند بُوھگ ءِ ھاتر ءَ پنچ گپ سک زلوری اِنت۔ ۱:ھما باج ءَ بُرت کنت کہ مزن ءُ کسانیں پوچ ءِ کارمرز کنّگ بہ زانت۔ ۲:ھما باج ءَ بُرت کنت کہ آ بِزانت کُجام وھد ءَ جنگ کَنگی اِنت ءُ کجام وھد ءَ کنگی نہ اِنت۔ ۳:ھما باج ءَ بُرت کنت کہ آئی ءِ لشکر ءِ ھر سپاھیگ گوں ھمت ءُ جزبگ ءَ سرشار بہ بیت۔ ۴:ھما باج ءَ بُرت کنت کہ آئی ءِ تیاری سرجم بہ بیت ءُ دشمن ءِ سر ءَ اچانک ءَ اُرش بہ کن۔۵: ھما سوبمند بیت کہ آئی ءِ لشکر جنگ ءِ توان ءَ بہ دار اَنت ءُ ھاکم ائیب مہ کن اَنت . سیمی بھر ءِ گڈّی ءَ سُن زو اے گپ ءِ سر ءَ باز زُور دنت کہ وھدی تو وت ءَ پجاّھکارے ءُ وتی دشمن ءَ پجّاہ کارے گڑا سوبمندی الّم تئی بھرا کَپ ایت۔وھدی تو وت ءَ پجّاہ کارے ءُ دشمن ءَ پجّاہ نیار ئے گڑا بلکیں باج ءَ بہ برئے بلے ایشی ءَ پد پُروش ھم وارت کن ئے۔وھدے تو وت ءَ ءُ دشمن ءَ دوئیناں پجّاہ نیار ئے گڑا پُروش وارگ الّم تئی نسیب ءَ بیت اِنت۔