TBP Balochi

بلوچستان ءِ دمگ کیچ ءِ ھند مند ءَ پاکستانی پوج نیمگ ءَ لوگانی دستیگ کنگ ءِ ھلاپ ءَ مروچی دھمی روچ ءَ زھرشانی نندانک برجاہ اِنت-

مروچی یکجھتی ءِ واستا بلوچ وومن فورم ءِ سروک ڈاکٹر شلی مند ءَ سر بیتگ-

گوستگیں دَہ روچاں برجاھیں زھرشانی کنوکانی گون ءَ گوستگیں شپ ءَ برگیڈیر تمپ ءُ دمگدار ءِ سروکی ءَ دمگی سروکانی ھواری ءَ مھیر ءِ میتگ ءِ مردین ءُ زالبولانی گون ءَ گپ ءُ تران بیتگ-

اھوالانی رد ءَ ایف سی ءِ واکدار گپاں ترند کنان ءَ کمیٹی ءِ باسکانی ترند رویشی ءِ روگ ءِ جھدے کتگ بلے میتگ ءِ مھلوک ءَ وت ءَ داشتگ ءُ چریشی ءَ پد آئی ءَ شش ماہ ءِ وھد لوٹ اتگ ءُ مھلوک ءَ رد کتگ-

میتگ ءِ مردماں دمگدار ءِ نمائندگ ءُ رھیمہ جلال ءَ یک ماھے ءِ وھد ءِ لوٹگ ءِ گپ ءُ تران ءِ داوت داتگ چریشی ءِ سر ءَ مھلوک ءَ ھمے شرت ءَ دمگ ءِ گوستگین ءُ انیگین نمائندگ، ڈی سی کیچ ءُ کیچ بار ایسوسی ایشن گواہ کنگ ءَ گپ ءُ تران ءَ رازی بیتگ انت-

چھبار ءُ راسک ءَ ایرانی لشکر ءَ ھپت مردم آوار جنگ ءَ پد بیگواہ کرتگ اَنت-

گیشیں اھوالانی رد ءَ چھبار ءَ ایرانی لشکر ءِ چیریں ادارہ اطلاعات ءَ سَے مردم آوار جتگ ءُ برتگ اَنت-

آوار جنگ بیتگیں مردمانی پجار مھران گونجتی، مھر داد گونجتی، زاھد پرکی ءِ ناماں زانگ بیتگ اَنت-

ھمے ڈول ءَ چہ راسک ءَ ایرانی لشکر ءَ چار کس آوار جتگ ءُ برتگ اَنت-

آوار جنگ بیتگیں مردمانی تہ ءَ یکے ءِ پجار اسلم ء ابابکر ءِ نام ءَ زانگ بیتگ کہ آ راسک ءِ دمگ پارود سردوکان ءِ جھمنند اِنت-

ایشی ءِ ھواری ءَ اسلم ءِ دگہ سَے ھمراہ آوار جنگ بیتگ اَنت بلے لھتے دمان ءَ پد آ یل دیگ بیتگ اَنت ءُ اسلم انگت بیگواہ اِنت-

روکپتی بلوچستان ءِ دمگ ھیرمند، بمپور، راسک، نیکشھر ءُ ھاش ءَ پیش اتکگیں وئیلاں سَے مردم بیران ءُ چار مردم ٹپی بیتگ اَنت –

ھاش ءَ سلاہ بندیں مردماں تیرگواری کرتگ ءُ یک مردمے ٹپی کتگ-

گیشیں اھوالانی رد ءَ ناشناسیں مردماں تیرگواری کرتگ ءُ یک مردمے ٹپی کتگ کہ آئی ءِ پجار زکریا برھانزئی ءِ نام ءَ زانگ بیتگ-

ھمے وڑ ءَ ایرانشھر ءَ ناشناسیں مردماں تیرگواری کنان ءَ یہ مردمے ٹپی کتگ-

ایرانشھر ءَ کارگر میتگ ءَ لالہ پارک ءَ ناشناسیں مردماں یک مردمے ءِ سر ءَ تیرگواری کرتگ ءُ زدگ کتگ-

ٹپی بیتگیں مردم ءِ پجار پرزاد ء ھسن جھمنند ایرانشھر ءِ نام ءَ زانگ بیتگ- گوشگ بیتگ کہ آئی ءِ گوانکو ءِ پُلگ ءِ جھد کنگ بیتگ کہ آئی ءَ گھگیری کتگ ءُ چریشی ءَ آئی ءِ سر ءَ تیرگواری کنگ بیتگ-

ھمے ڈول ءَ نیکشھر ءَ ناشناساں تیرگواری کرتگ ءُ یک مردمے کشتگ-

کُشگ بیتگیں مردم ءِ پجار عبدالصمد بلوچ ءِ نام ءَ زانگ بیتگ کہ جوکان ءِ جھمنند انت ءُ وئیل جوکان ءَ پیش اتکگ بیتگ-

ھمے وڑ ءَ بمپور مھمد آباد ءَ ناشناسیں مردماں تیرگواری کرتگ ءُ یاسین نیاز مند کشتگ –

ھمے وڑ ءَ راسک ءَ ایرانی لشکر ءَ یک تیل کشیں گاڑی ءِ سر ءَ تیرگواری کرتگ ءُ یک مردمے ٹپی کتگ- کہ آئی ءِ پجار جواد پارسا ءِ نام ءَ زانگ بیتگ-

ھمے ڈول ءَ ھیرمند ءَ ناشناسیں مردماں تیرگواری کرتگ ءُ یک مردمے کشتگ ءُ یکے زدگ کتگ-

ھیرمند ءِ ھند گلبیک سعید آباد ءخ ناشناسیں مردماں دو لوگاں بیڑ برتگ ءُ اود ءَ مردم لٹ ءُ کٹ کتگ انت ءُ چریشی ءَ یک مردمے بیران ءُ یکے زدگ بیتگ-

بیران مردم ءِ پجار مھمد رخشانی ء گنی جھمنند گلبیک ءِ نام ءَ زانگ بیتگ ءُ زدگ بیتگین پجار مصطفیٰ رخشانی ء امان اللہ جھمنند سعید آباد ءِ نام ءَ زانگ بیتگ-

پیش اتکگین وئیل ءِ بارو ءَ گیشیں سرپدی نہ بیتگ اَنت-

بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ نُھ نومبر سُھب ءَ گل انٹلیجنس ونگ ءِ ھالانی سر ءَ ھاران ءِ دمگ گواش ءَ دُژمنیں فورس ، فرنٹیئر کور ءِ گشتی ٹولی سر ءَ اُرش کتگ آ نشانگ کتگ اَنت کہ دروشم مٹ کتگ سادھیں پوشاکانی تہ ءَ ھاران شھر نیمگ ءَ پرپٹانی سر ءَ روگ ءَ بیتگ اَنت، یک پرپٹے ءِ سر ءَ سوار دو کارمند اُرش نشانگ ءَ اَتکگ اَنت کہ آیانی تہ ءَ یک کارندھے جاہ پہ جاھی مرتگ وھدے کہ دومی کارمند سک ٹپی بیتگ-

جارکش ءَ گْوشتگ کہ ھاران شھر ءَ سرمچاراں یکشلیں اُرشانی سبب ءَ دُژمنیں پوج نو چہ تُرس ءَ دروشم مٹ کنت لس مردمانی پوشاکاں چہ گشت کنگ ءَ لاچار بیتگ اَنت بلے بی ایل ایف ءِ چیریں ونگ ءَ چہ ھمگرنچیں سنگت ءَ دُژمن سُر پُر دلگوش گور کتگ اَنت ءُ پہ وھد اُرش ءِ ھاتر ءَ جاڑیگ اَنت-

جارکش ءَ گوشتگ بی ایل ایف ءِ زانتکاریں راج ءَ گوشگ لوٹ اِیت کہ آ دُژمنیں پوج ءِ سُر پُرانی وھد ءَ ھیالداری ءَ چہ آیاں گستا بدار اَنت پرچاکہ پروش وارتگیں دُژمن اُرش ءَ پد سرمچاراں گوں دیم پہ دیم بیگ ءَ بے میاریں مردماں نشانگ کنت – ھمے ھاتر ءَ وتی پھازگ ھاتر ءَ زورگریں پاکستانی پوج ءَ چہ گستا بدار اَنت بلوچ سرمچارانی جوانیں وڑے ءَ ھمراھداری بہ کن اَنت-

جارکش ءَ گوشتگ بلوچستان لبریشن فرنٹ اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں پاکستانی پوج، پوجی شوربندیاں ءُ پُلپانچیں شوربندیانی سر ءَ اُرشاں برجاہ دار اِیت-

شال ءَ بیتگیں اُرش، پاکستان ءِ راجدپتر ءَ نان کمیشنڈ آفیسرانی بیرانیانی درگت ءَ چہ دومی مزنیں اُرش اِنت- زانتکار

شال ریل اسٹیشن سر ءَ بیتگیں وتکش تراک اُرش ءَ پاکستانی پوج ءِ بیست در کمیشنڈ کارمندانی بیرانی سرکاری وکدار ءَ راست کتگ اَنت – واکدار رِد ءَ اے اُرش ءَ چل ءَ گیش مردم ٹپی بیتگ اَنت-

ھالانی رِد ءَ اے پوجی کارمند ھمے زوتاں شال انفنٹری اسکول ءَ چہ ھلکاری سرجم کتگ ریل اسٹیشن سر ءَ ساڑی بیتگ اَنت وھدے کہ اُرش بیتگ، وکدار ءَ وئیلجاہ انگر ءَ کتگ پٹ پول بندات کتگ-

بلوچ لبریشن آرمی ءَ اے اُرش زمہ واری منّ اِتگ درشان شنگ کتگ گْوشتگ کہ بی ایل اے – مجید برگیڈ ءِ باسک محمد رفیق بزنجو پنّام ءِ وشین ءَ اے کاروائی کتگ-

بی ایل اے رِد ءَ اے اُرش ءَ بیست ءَ گیش نان کمیشنڈ آفیسران مرتگ ءُ چل ءَ گیش سک ٹپی بیتگ اَنت-

پولکار ءُ زانتکار عبدالسید ءِ گوشگ اِنت کہ اے اُرش پاکستان پوج ءِ راجدپتر ءِ پوجی کارمندانی بیرانیان درگت ءَ چہ دومی درستاں چہ مستریں وتکش تراک اُرش اِنت-

عبدالسید ءَ چاگردی رسانکدر ءَ شنگ کتگیں درشان ءِ تہ ءَ نبشتہ کتگ اشی ءَ ساری دوھزار شش ءَ تھریک تالبان پاکستان ( ٹی ٹی پی) ءِ پاکستانی جھادی سلاہ بنداں مالاکنڈ ءِ دمگ درگئی ءَ وتکش تراک اُرشے کتگ اَت، چریشی ءِ آسر ءَ چل دو ءَ گیش پوجی کارمند مرتگ اَنت-

ھمے وڑ دسمبر دوھزار بیست سے ءَ تھریک جھاد پاکستان نامیں گلے ءَ ڈیرہ اسماعیل خان ءَ پوج ءِ بُنجل سر ءَ اُرش کتگ اَنت آئی ءِ تہ ءَ شش وتکش تراکّار ھوار بیتگ اَنت، آیانی تہ ءَ یک وتکش تراکّارے ھم ھوار بیتگ اے اُرش ءَ بیست پنچ ءَ گیش پوجی کارمند کُشگ بیتگ اَنت-

اِھولکارانی گوشگ اِنت اے اُرش بلوچ لبریشن آرمی گیش بیتگیں تاکت ءَ پدر کنت ، آئی ءِ اُرشاں پاکستانی پوج ءِ گیش کارمندانی بیرانی دیم ءَ آیگ ءَ اَنت-

زانتکارانی گوشگ اِنت کہ اے اُرش یکرندے پد ءَ پدر کنت کہ بی ایل اے ءِ سلاہ جنگی بودناکی گیش بیگ ءَ اِنت، ءُ اشی ءِ آسر ءَ پاکستانی پوج ءَ گیش مزنیں کچے ءَ جانی تاوان دیمپانی اِنت-

بلوچ لبریشن آرمی ءَ شال ءَ بیتگیں فدائی اُرش ءِ زمہ واری منان ءَ گوشتگ مروچی سھب ءِ ساھت ھشت ءُ بیست منٹ ءَ بلوچ لبریشن آرمی ءِ فدائی یونٹ مجید بریگیڈ ءَ زرغون دگ ءِ نزیک ءَ شال ریل اسٹیشن ءَ روگ ءِ واستا ساجو بیتگیں پاکستانی پوج ءِ نان کمیشنڈ آفسرانی یک ٹولی ءِ سر ءَ فدائی اُرشے کتگ – پاکستانی زورگریں پوج ءِ نیمگ ءَ بلوچستان ءِ سرڈگار ءِ سر ءَ برجاھیں زورگری، زُلم ءُ زوراکی ءُ مستونگ ءَ تپلین زھگانی سر ءَ بیتگیں زُلمانی پسو دیان ءَ بی ایل اے مجید بریگیڈ ءِ جانبازیں فدائی شھید سنگت مھمد رفیق بزنجو پنام ءِ وشین ءَ دشمن ءِ نان کمیشنڈ آفسرانی یک ٹولی یے نشانگ کتگ- اے اُرش ھما وھد ءَ کتگ کہ اے پوجی کارمند دی اسکول آف انفنٹری اینڈ ٹیکٹکس شال ءَ ھیلکاری سرجم کنگ ءَ پد واتر جعفر ایکسپریس ءِ سر ءَ وتی گِسانی نیمگ ءَ روگ ءَ بیتگ اَنت- اے سوبمندین کاروائی ءَ کساس سِی ءُ یک پوجی کارمند مرتگ ءُ شست زدگ بیتگ اَنت-

بی ایل اے ءِ مجید بریگیڈ ءِ فدائی اُرش ءِ آماچیں دشمنیں پوج ءِ کارمندانی سیادی پاکستانی پوج ءِ پنجاب رجمنٹ، ناردرن لائٹ انفنٹری رجمنٹ، سندھ رجمنٹ، فرنٹیئر پورس رجمنٹ، بلوچ رجمنٹ ءُ آزاد کشمیر رجمنٹ ءَ بیتگ اَنت- کہ اے شال ءَ انفنٹری اسکول ءَ ھیلکاری کنگ ءَ پد واتر روگ ءَ بیتگ اَنت-

اے سوبمندین اُرش مئے گل ءِ انٹیلیجنس ونگ ‘زراب’ ( زیفر انٹلیجنس ریسرچ اینڈ انالیسس بیورو) ءِ گچینی گامگیج ءُ بے مٹیں انٹیلیجنس ءِ زور ءِ درچ ءَ سرجم بیتگ – زراب ءَ دشمن ءِ ھمک سر ءُ پرانی سر ءَ نگاہ ایر کتگ اَنت ءُ تھ ئِے ءُ ڈنی جاورھال چار اتگ ءُ ھال یکجاہ کتگ اَنت – اے آپریشن ءِ چِن ءُ لانچ بازیں روچاں برجاہ بیتگ ءُ مئے انٹیلیجنس ءَ دشمن ءِ ھمک سر ءُ پرانی سر ءَ پٹ ءُ پول کتگ – مارا ھشت نومبر ءَ اے اُرش کنگ ءِ وھد رس اتگ بلے شھریانی باز مُچ بوگ ءَ ما اے کاروائی داشتگ – دانکہ لس مھلوک ءِ جان زوال مہ بنت اِنت- باندا دگہ یک ٹولی ءِ روگ ءِ چن ءُ لانچی ھم ھست بیتگ کہ بلے زراب ءِ اھوالانی رد ءَ باندا روکیں پوجیانی کساس پنجاہ ءِ نزیک ءَ اِنت- مروچی وھد آئی ءَ چہ گچینتر بیتگ کہ پوجیانی کساس دو سد ءَ گیش بیتگ ءُ مھلوک ءِ تاوانی سک کم بیتگ- زراب ءِ سوبمندیں پریام ءُ مئے گل ءِ تاکتداریں لشکر ءُ انٹیلیجنس ءِ گچینی گامگیجاں اے گپ ءَ تچک کنت اِنت کہ زرمبشت ءِ آجوئی بلوچستان ءِ نا ایوک ءَ پھریزی میدسن بلکیں انٹیلیجنس ءِ دنیا ءَ ھم وت ءَ سر کتگ – ما وتی سرڈگار ءِ آجوئی ءِ واستا ھرنھاد ءِ دیگ ءَ ساڑی یے اِنت- ءُ ما وتی مھلوک ءِ پھریزگ ءَ ھچ وڑیں کربانی دیگ ءَ چَک ءُ پد نہ بہ ایں-

جارکش ءَ گوشتگ دشمنیں پوج ءِ سر ءَ بلوچ لبریشن آرمی ءِ سوبمندیں اُرش گل ءِ ایلیٹ فدائی یونٹ مجید بریگیڈ ءَ زراب ءِ کمک ءَ سرجم کتگ – فدائی اُرش کنوکین شھید سنگت فدائی مھمد رفیق بزنجو پنام وشین، پنام ءِ پھیم ء مراد علی بزنجو جھمنند ھب چوکی ءَ بیتگ- فدائی رفیق بزنجو یک دھکے ءَ بلوچستان ءِ آجوئی ءِ جھد ءَ سیاسی ءُ جنگی کرداں پیلو کنگ ءَ بیتگ- آئی ءَ سیاست ءِ بندات سال دوھزار ءُ سیزدہ ءَ بلوچ اسٹوڈنٹس آرگنائزیشن ءَ کتگ- اود ءَ ابید ءظ سلاھ ءُ پرامنیں سیاسی سنگتانی پاکستانی پوج ءِ دست ءَ شھیدی ءُ زورانسری بیگواھی دیستگ ءُ اے جاہ ءَ سر بیتگ کہ بلوچستان ءَ پرامن، جمھوری ءُ لٹ شاپی سیاست ءِ دراھیں راہ بند کنگ بیتگ انت – چُشکہ آئی ءَ سال دوھزار ءُ ھبدہ ءَ بی ایل اے ءِ پتر ءَ سلاہ بندین جد ءُ جھد ءِ بندات کتگ – آئی ءَ بندات ءَ وتی جد ءُ جھد اربن گوریلا ءِ رنگ ءَ پد ءَ کوھی تکاں شتگ ئے – فدائی رفیق بزنجو ءَ سال دوھزار ءُ بیست ءُ سَے ءَ وتی ھدمت ءُ کمکاری مجید بریگیڈ ءَ پیش کتگ ءُ فدائی ءِ راہ گچین کتگ- یک سالے ءَ گیش ترندیں ھیلکاری ءَ پد آئی ءَ نُھ نومبر دوھزار ءُ بیست ءُ چار ءَ یک گچینی سوبمندی ءَ وتی مشن سرجم کتگ ءُ راج ءُ ڈیھ ءِ پدا بیتگ ءُ راجدپتر ءَ نمیران بیتگ-

جارکش ءَ گوشتگ شھید فدائی سنگت رفیق بزنجو ءِ جرات، وتن دوستی ءُ وت ءَ راج ءِ آجوئی ءِ واستا ندر کنگ ءِ سنچ ءَ منینتگ کہ بلوچ راج ءِ پُسگ وتی سرڈگار ءِ ھزمت کنگ ءَ ھمک تک ءَ شت کن اَنت- شھید ءِ کربانی ءَ دشمن ءَ را اے کلوہ داتگ کہ بلوچستان ءِ آجوئی ءِ راہ ءَ ھچ وڑیں ڈنگر مزن نہ اَنت- فدائی رفیق بزنجو ءِ بے دروریں بھادری ءَ ایوک ءَ دشمن ءَ ترندین تاوان داتگ بلکیں مئے زرمبشت ءِ واستا یک نوکین ساھے بکش اتگ ءُ نوکیں شونے ودی کتگ- تئی اے گچینی کربانی ھروھد ءَ یاد کنگ بیت اِنت ءُ آیوکیں پدریچ ءِ بھادری ءِ دروراں دنت اِنت-

جارکش ءَ گوشتگ ما اے گپ ءَ تچک کن ایں پاکستانی پوج ءُ آئی ءِ واکدار بیھار ءَ دے ایں کہ اگاں بلوچستان ءِ سرڈگار ءَ زوراکی اش بند نہ کت پوج اَچ مئے سرڈگار ءَ دزکش نہ بیت ءُ لس بلوچانی کُشت ءُ کوشانی درچ برجاہ بیت گڑا آیوکیں اُرش سک ترند بنت ءُ بازیں کساسے ءَ بنت اِنت ءُ ایشی ءِ ترندی پاکستان ءِ بنجاھی شھراں داں سما کنگ بیت اِنت – پاکستانی پوج گیش ھونریچی ءَ رکگ ءُ بلوچستان ءَ منگ ءَ سرجمی ءَ وتی لشکر ءَ واتر بہ کش ایت ءُ بلوچستان ءِ وت واجھی ءُ آجوئی ءَ بہ من ایت – ما دو پر امنیں ڈیھانی ھساب ءَ نشت کن ایں – مئے زرمبشت امن لوٹ ایت اگاں زلم ءِ پسو دیگ لازم بہ بیت گڑا ما پشت ءَ نہ کنز ایں – بلوچ راج ءِ ھمک کس وتی ھک ءُ آجوئی ءِ واستا جنگ کنگ ءِ زور ءَ دار ایت – مروچیگیں کاروائی اے گپ ءَ تچک کنت ءُ کلوہ دنت مئے جزبگ ءِ آجوئی کجام ھم زالم ءِ دیم ءَ پروشوکی نہ انت-

جارکش جیئند بلوچ ءَ گوشتگ بلوچ لبریشن آرمی میان اُستمانی برادری ءَ دلگوش دیگ لوٹ ایت کہ آ بلوچ راجی زرمبشت آجوئی راجدپتر،پلسپے ءُ سیاسی تکانی سرپد بوگ ءِ جھد ءَ بہ کنت ءُ بلوچ راج ءَ کانونی ءُ پھریزی جنگ ءَ مئے کمک ءَ بہ کنت اِنت- پاکستانی سرکار ءُ پوج ءَ اے یاد کنگ لوٹ ایت کہ بلوچ راج ءِ آجوئی ءِ واھشت المی انت ءُ ھمک آیوکیں روچ ءِ ھمراھی ءَ مئے مکسد نزیک تِر بیان اِنت-

بلوچ لبریشن آرمی ءِ جارکش جیئند بلوچ وتی رسانکدر چینل ھکل ءَ شال پدائی اُرشکار ءُ اکس شنگ کتگ اَنت-

ھکل ءَ بی ایل اے پدائی سرمچار ءِ اکس شنگ کتگ گْوشتگ کہ نُھ نومبر ریل اسٹیشن سر ءَ پدائی اُرش ءِ انفنٹری اسکول چہ شال ھلکاری سرجم کنوکیں پاکستانی پوج بیست ءَ چہ گیش نان کمیشنڈ آفیسر کشتگ اَنت ءُ چل ءَ چہ گیش سک ٹپی بیتگ اَنت مجید بریگیڈ ءِ اُرشکار محمد رفیق بزنجو پنّام ءِ وشین اِنت-

دومی نیمگ ءَ تراک ءَ چہ ھالانی رِد ءَ بیرانیانی کچ سی یک بیتگ اَنت، شست ٹپی وھدے کہ بیرانیانی مردم نوزدہ پوجی کارمند ءُ دگہ ادارہ مردم ھوار اَنت-

اُرش زمہ واری بلوچ لبریشن آرمی ءَ منّ اِتگ- جارکش جیئند بلوچ ءَ درشان ءِ تہ ءَ گْوشتگ اے اُرش بی ایل اے مجید برگیڈ ءَ کتگ وھدے کہ اُرش ءِ نشانگ انفنٹری اسکول ءَ چہ کورس سرجم کنگ واتر رؤکیں کارمند بیتگ اَنت-

شمبے ءِ سھب ءَ شال ءَ ریل اسٹیشن ءَ فدائی تراک ءِ کیس سی ٹی ڈی تھانہ ءَ ناشناسیں ارش کنوک ءُ آسراتی ءِ دیوکانی ھلاپ ءَ درج کنگ بوتگ۔

تراک ءِ بنداتی پٹ ءُ پولی رپورٹ ءِ رد ءَ ریل اسٹیشن ءِ تراک وت کُشے بوتگ کہ ایشی ءِ تہ ءَ ھپت ءُ ھشت کلوگرام تراکناکیں چیز لاش ءَ گوں بندوک ءُ کارمرد کنگ بوتگ اَنت۔

پولیس ءِ کارندھانی رد ءَ ارش کنوک مساپرانی میان ءَ سر بوتگ ءُ تراکے کتگ۔

اُرشکار ءِ پجارگ ءِ ھاتر ءَ نادرا ءَ چہ کمک زورگ بیگ ءَ انت ارشکار ءِ لاش ءِ بھر فرانزک لیب لاہور ءَ روان دیگ بیتگ انت۔

ھالانی رد ءَ تاں انوگ ءَ تراک ءَ بیران بوتگیں مردمانی کچ 31 ءَ سر بوتگ، 60 ٹپیگ بوتگ انت وھدیکہ بیران بوتگیں مردمانی تہ ءَ 19 فوجی کارندہ ءُ دگہ ادارگانی مردم ھم ھوار اَنت۔

اے ارش ءِ زمہ واری بلوچ لبریشن آرمی ءَ من اتگ۔ جارکش جیئند بلوچ ءَ وتی بیان ءَ گْوشتگ: اُرش بی ایل اے ءِ مجید برگیڈ ءِ نیمگ ءَ کنگ بیتگ، وھدیکہ اُرش ءِ نشانگ ھما کارندہ بوتگ اَنت کہ آ انفنٹری اسکول ءَ چہ کورس سرجم کنگ ءَ پد واتر بوھگ ءَ بیتگ انت-

بلوچ یکجھتی کمیٹی مند زون ءَ وتی شنگ کتگیں درشان ءِ تہ ءَ گْوشتگ کہ نُھ روچاں چہ مند مھیر ءَ نشتگیں کھول ءَ گپ دیوان نام ءَ دمگی نمائندگ ءُ انتزامیہ نیمگ ءَ تُرسینگ بیگ ءَ اِنت کہ آئی ءِ ما تُرندیں لبزاں ایر جن ایں-

آئی ءَ گْوشتگ کہ مروچی سھب ءَ انتزامیہ ءَ ھوار ایف سی نیمگ ءَ نندانک ءَ نشتگیں پرایمن زھرشانی کنوک انگر ءَ کتگ ءُ تُرسینگ ءَ اَنت کہ اے ترسناک اِنت اگاں نندانک ءَ نشتگیں کھول ءَ چیزے بیت یا آیانی سر ءَ تاکت کارمرز کنگ بیت گُڑا زمہ وار دمگی انتزامیہ ءُ نمائندگ بنت-

آئی ءَ گوشتگ کہ مند ءِ شرپمندیں راج ءَ گوں دزبندی کن آں کہ ریاستی زوراکی ءِ ھلاپ ءَ یکجاھی بہ کن اَنت کھول ھمراھداری بہ کن اَنت ءُ وتی راجی زمہ واری ءَ پیلو بہ کن اَنت-

زانگ بہ بیت زھرشانی ئیں نندانک ءَ نشتگیں مردماں مروچی نُھ روچ اِنت کہ نندانک ءَ نشتگ اَنت مزنیں کچے ءَ مردین ءُ چک زالبول ھوار اَنت اے نندانک ءَ بلوچ یکجھتی کمیٹی ءِ راھشون وسیم سپر ءُ سیول سوسائیٹی ءِ گلزار دوست ساڑی اَنت-

بلوچستان ءِ دمگ چہ ھاران ءَ سلاہ بندیں مردماں پاکستانی پوج ءِ گشتی ٹولی اُرش ءِ نشانگ کتگ-

اُرش ھاران ءِ دمگی گواش ھند سر ءَ بیتگ-

وسیلگ گوشگ اِنت کہ گواش دگ سر ءَ سلاہ بندیں مردماں ایف سی گشتی ٹولی ھما وھد ءَ نشانگ کتگ وھدے کہ آ پرپٹانی سر ءَ گشت کنگ بیتگ اَنت-

ھالانی رِدءَ اے اُرش پوج ءِ کارمند مرتگ ءُ ٹپی بیتگ اَنت بلے واکدار درشان اے درگت ءَ دیم ءَ نیتکگ-

ھاران ءَ بلوچ آجوئی لوٹوکیں سلاہ بند پُرکار اَنت بلے اے اُرش زمہ واری انگت ھچ گل ءَ نہ زرتگ-