TBP Balochi

بلوچ یکجھتی کمیٹی ءِ راھشون ءَ گْوشتگ کہ چہ بلوچستان ءَ اسلام آباد ءَ تاں، زلم ءِ چھرگ پدر بیگ ءَ اِنت-

نامی ئیں بلوچ سیاسی ءُ انسانی ھکانی باسک ءُ بلوچ یکجھتی کمیٹی ءِ سروک ماہ رنگ بلوچ ءَ وتی ایکس اکاؤنٹ ءَ درشانے شنگ کتگ گْوشتگ کہ گمان اِنت نو چہ بلوچستان ءَ ڈن نشتگیں مردماں ریاست ءِ زلم ءُ زوراکی ءِ چھرگ ءِ راستی ءَ سرپد بیتگ اَنت-

آئی ءَ اسلام آباد ءَ اِھوالکار مطیع اللہ جان ءِ زورانسری آوار جنی، دروگیں ایف آئی آر ءَ دزگیری ءُ پی ٹی آئی ءِ زھرشانی کنوکانی سر ءَ ریاستی زوراکیانی پالیسی ءِ منانک گوشتگ-

اے وئیلانی درگت ءَ دیان ءَ ماہ رنگ بلوچ ءَ گْوشتگ کہ اگاں ڈیھ ءِ بُنجاھی شھر ءَ کہ اود ءَ ھزارانی کیمرہ ءُ رسانکدر ءِ ساڑی بیگ، اے وڑ دیم پہ دیم زوراکی بیت کنت گُڑا بلوچستان ءِ دیر دراجیں دمگاں کہ اود ءَ ناں رسانکدر ناں دامگ، ریاست ءِ زُلم ءُ زوراکی ءِ ترسانک اِنت-

ماہ رنگ بلوچ ءَ گوشتگ کہ بلوچستان ءَ ریاستی ادارہ مردماں زورانسری بیگواہ کن اَنت، پد ءَ آیاں دروگیں میڑاں کُش اَنت ناشرکار پیشدار اَنت یا دروگیں ایف آئی آر رِد ءَ دزگیری ءَ پدر کن اَنت اے درستاں چہ اَبید رسانکدر ءُ انسانی ھکانی ادارہ بے تواری ءِ ندارگ چاروک جوڑ بیتگ اَنت-

آئی ءَ اسلام آباد ءَ پی ٹی آئی ءِ زھرشانی کنوکانی سر ءَ تیرگواری، کشگ ءُ ٹپی کنگ ءُ ھزارانی مردماں دزگیری ءِ ایر جتگ ءُ گْوشتگ کہ اے وئیل ریاستی زوراکی ءِ تچکیں چیدگ اِنت-

دیمتر ءَ آئی ءَ بلوچستان ءَ برجاھیں زلم ءُ زوراکی ءِ درگت ءَ گْوشتگ کہ گوادر ءَ بشیر بلوچ بازیں ماھاں بیگواہ کنگ ءَ پد دروگیں ایف آئی آر ءَ دزگیری پدر کنگ ءُ پد ءَ آ دروگیں میڑے ءَ کُشتگ ناشرکار پیش داشتگ-

آئی ءَ گْوشتگ کہ ھمے وڑ چہ تربت ءَ ڈاکٹر ظفر ءُ آئی ءِ چک ءَ ھوار بازیں مردمے زورانسری آوار جتگ ءُ بیگواہ کتگ اَنت تھنا گوستگیں ماہ ءَ سد ءَ چہ گیش بلوچ ورنا زورانسری آوار جنی ءِ نشانگ بیتگ ءُ بازیں مردمے کشگ بیتگ-

بلوچ یکجھتی کمیٹی ءِ راھشون ءَ دیمتر ءَ گْوشتگ کہ ما مدام گوشگ ءُ آیگ ءَ اِنت کہ اے ریاست ءِ زُلم ءَ چہ کس مُھر بیت نہ کنت – آ کہ مرچی بے توار اَنت، باندا آیانی لوگاں ھم ھمے ریاست آس روک کنت-

ماہ رنگ بلوچ ءَ انسانی ھکانی گلاں، رسانکدر، ءُ سیاستدانانی بے تواری سر ءَ بژن درشان کتگ گوشتگ کہ اے دردناک اِنت کہ بلوچ راج ءِ سر ءَ بیؤکیں زوراکیانی ھچ کس توار چست کنگ ءَ ساڑی نہ اِنت-

دلجان بلوچ ءِ گوھار ءَ برات ءِ یل کنگ ءِ ھاتر ءَ ڈپٹی کمشنر آواران ءِ کارگس ءِ دیم ءَ تادم مرگ ءِ شدھرتال ءِ بندات ءِ جارجتگ-

گیشین اھوالانی رد ءَ چہ آواران ءَ زورانسری بیگواہ بیتگیں دلجان بلوچ انتزامیہ ءُ دمگی سروگانی ستک ءَ پد ھم داں انگت ءَ یل نہ بیتگ، چریشی ءَ پد بیگواھیں دلجان ءِ گوھار ءَ تادم مرگ ءِ شدھرتال ءِ جار جتگ –

زانگ بہ بیت دلجان بلوچ 12 جون 2024 ءَ آواران ءَ چہ جند ءِ لوگ ءَ پاکستانی پوج ءَ دزگیر کتگ، ءُ چریشی ءَ پد آ بیگواہ اِنت- 18 نومبر ءَ آئی ءِ کھول ءَ ڈپٹی کمشنر ءِ کارگس ءِ دیم ءَ زھرشانی کنگ ءِ جار جتگ ءُ بنجاھی شھدگ بند کتگ اَنت-

انتزامیہ ءِ زبان دیگ ءَ پد زھرشانی کنوکاں دگہ زھرشانی ھلاس کتگ اَنت ءُ بس ایوک ءَ ڈی سی کارگس ءِ دیم ءَ زھرشانی برجاہ داشتگ –

مروچی زھرشانی نندانکجاہ ءَ پریس کانفرنس کنان ءَ دلجان بلوچ ءِ گوھار ءَ تادم مرگ ءِ ھرتال کنگ ءِ جار جنان ءَ گوشتگ انتزامیہ ءِ دروگیں زبان کنگ ءَ بے زار بیتگ-

زھرشانی کنوکاں لوٹ کتگ کہ دلجان بلوچ یل کنگ بہ بیت ءُ زھرشانی ءِ وھد ءَ زھرشانی کنوکانی سر ءَ نبشتگ کتگیں ارزی واتر زیرگ بہ بنت-

زھرشانی کنوکاں گوشتگ اے وھداں اگاں تاوانے بیت گڑا درستیں زمہ وار انتزامیہ ءِ سر ءَ بیت اِنت-

یَکبرے پد ءَ واتر کُت

نبشتہ کار : یاسر بیوس

دی بلوچستان پوسٹ

گرماگ اَت۔ آ تھت ءِ سر ءَ نشتگ اَت ھمے جیڑگ ءَ اَت۔ اے موسم پرچیا مٹ بنت برے یک موسمے کیت برے بچار درچکانی تاک رتکگ ءَ اَنت۔ برے برے بچار ھمے درچکانی تاک سبز ءُ زیبا اَنت پد ءَ آئی ءَ کمّو درچکانی نیمگ ءَ ھیال کُت ءُ جیڑ اِت۔ ھاھاھا گندئے ھمے موسم چون وش اِنت درچْک ءُ دار سبز بنت ءُ زیبا بنت۔

سال ءُ وھد روان اَت اَنت بس آ تھنا ھمے جیڑگانی تہ ءَ گار اَت۔ انچو بوت شش ماہ ءِ تہ ءَ آئی ءِ ھمے گم ءِ جیڑگ ھلاس بوت اَنت۔ آ یک انچیں وشیں زندے گْوازینگ ءَ اَت۔ اوھے بات ھمے چلّگ، آئی ءَ من ءَ مُدام دیستگ ءَ اَت مُدام گمانی آماچ اَت۔ گپّ ھم باز کم کُرت ئِے۔ بلے سک شوکیں مردمے اَت۔ یک نبشتکار ءُ یک کسانیں شائرے ھم ھست اَت۔

سنگتاں آئی ءَ مُدام بھتام جَت تئی شیراں کس نوان ایت تو مپت ءَ گل ئے۔ آئی ءَ کمّو چیڑ اِت ءُ گشت ئِے” منی شائری یک شوکے بلے منی شیراں کس مہ وان ایت۔ من ھَمے وَھد ءَ آئی ءِ نیمگ ءَ چار اِت یکے کسانکیں بچکندگے جَت۔

من زانت اے یک سکیں شریں مردمے، دنیا ایشی ءَ ھرچی بُگش ایت بلے گْوش ندار ایت۔ من مُدام ھمیشی ءِ بابت ءَ جیڑ اِت من گندئے ھمیشی ءِ وڑیں مردمے بوتیناں بلے من ھیال کُت آڑے یل دئے چوناھا اے منی سنگت اِنت، بلے اے یک انچیں مردمے اَت ایشی ءَ کس ءَ گوں سنگتی نہ کُت۔

من ایشی ءَ گوں مُدام گردگ ءَ شُت اَنت یکّ دو سے گپّ ءَ دیم بھ نہ جَت ئِے۔ بلے منی ھیال درستاں چہ گیش منی ایشی ءِ نزیکیں سنگتے ءَ اِت اَنت۔ ھمے وھد ءَ ایشی ءَ چہ کراچی ءَ وَاتر کُتگ اَت باز شَر اَت۔ من ایشی ءِ گْور ءَ شُت اَنت ایشی ءَ من ءَ شائری ءِ نبشتکاری بارو ءَ سوج دات من چہ ھمائی دَربرت۔ اے شش ماھانی تہ ءَ آ باز شَر اَت آئی ءِ دیم ءُ چھرگ مُدام وش اَت گپّ ھم باز کُرت ئِے۔ نوں وَ آئی ءِ درستاں چہ گیش من نزیکیں سنگت بوت اَنت۔

آئی ءَ من ءَ وتی درستیں گپّ گُشت اَنت۔ وتی نادراہ ءِ بابت ءَ من ھالے دات۔ من ءَ گُشت ئِے من مُدام وتسر ءَ وت گمانی آماچ بہ آں۔ من پمیشکا چوش اَنت۔ من نی زانت آئی ءِ نادراھی چے اِنت، بلے آئی ءَ کندگے جَت ءُ گشت من نوں شر آں ھاھاھھا من ھم آئی ءِ ھوری کند اِت بلے اپسوز یک روچے مئے سنگتانی دیوان اَت-

ٹھک ءُ کندگانی یکے دومی ءَ کلاگ زیروکائی اَت۔ من آئی ءِ نیمگ ءَ چار اِت آ پد ءَ ملور اِنت ءُ نشتگ یکّ گپّے ھم نہ جنت۔ پد ءَ ھمے روچاں پد آ پد ءَ پیسری وڑ ءَ بوت۔ اے دھیں روچانی تہ ءَ من آئی ءَ نہ دیستگ اَت۔ من پد ءَ یکبرے گْوش اَنت اوھے بات ھمے چلّگ، من ءَ انچو گُمان بُوت آئی نادراھی پد ءَ اتکگ ھچ گندگ بوگ ءَ نہ اَت۔ اوھے اے نادْراھی بات ایشی ءَ ”یکبرے پد ءَ وَاتر کُت”۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشانے ءَ گوشتگ مئے سرمچاراں نوشکی ءَ سَے جتا جتائیں کاروائیاں بنجاھی شھدگ ءِ سر ءَ سنیپ چیکنگ، لیویز پورس ءِ سلاہ ءُ بند ءُ ساچی شرکت ءِ کارمند گپتگ انت ءُ ھمے وڑ کلات ءُ گوادر ءَ دو کاروائیاں سرمچاران یک چاریگے کشتگ ءُ یکے زدگ کتگ-

جارکش ءَ گوشتگ بی ایل اے ءِ سرمچاراں گوستگیں شپ ءَ زرین جنگل ءِ ھند ءَ شھدگ ءَ ھستیں زورگریں پاکستانی لیویز پورس ءِ کارندھانی یک چوکی ءِ دستیگ کتگ ءُ جاڑیگیں کارمند دزگیر کتگ اَنت- سرمچاراں لیویز پورس ءِ سلاہ ءُ دگہ پوجی ساز ءُ سامان وتی دستیگی ءَ کتگ انت کارندہ بلوچ بوگ ءِ سر ءَ سلامتی یل داتگ اَنت-

آئی ءَ گوشتگ ھمے وھد ءَ سرمچارانی یک جتائیں ٹولی ءَ شھدگ دان یک ادارے ءَ گیش گاڑیانی سنیپ چیکنگ کتگ انت ءُ ھمے وڑ سرمچارانی سیمی ٹولی ءَ یک لُٹ ءُ پولی کمپنی ءِ پروجیکٹے ءَ کار کنوکیض پنچ کارندہ دزگیر کتگ انت ءُ کمپنی ءِ مشینری سوتکگ اَنت ءُ گپتگیں مردمانی جست ءُ پرس برجاہ اِنت-

گیش گوشتگ بلوچ لبریشن آرمی ءِ سرمچاراں گوستگیں شپ ءَ کلات ءِ ھند منگچر ءَ زورگریں پاکستانی پوج ءِ یک کارندھے کشتگ – اے کارندہ گنوکی دروشم ءَ منگچر ءَ زورگریں پوج ءِ واستا چاریگری ءَ بیتگ-

جارکش ءَ گوشتگ بی ایل اے ءِ انٹیلی جنس ونگ زراب ءَ اے مرد ءِ سر ءَ نگاہ ایر کتگ اَنت ءُ زراب ءِ اھوالانی رد ءَ اے مرد منگچر ءَ پاکستانی پوج ءِ نیمگ ءَ چاریگری ءُ گچینی کارمندانی نیٹورکے برجم داشتگ – اے نیٹورک ءَ ھواریں مردم بی ایل اے ءِ نشانگ ءَ اَنت-

آئی ءَ گوشتگ یک دگہ کاروائی ءِ گوستگیں شپ ءَ بلوچ لبریشن آرمی ءِ سرمچاراں گوادر ءِ شھر ءَ ڈھور چوک ءِ نزیک ءَ زورگریں پاکستانی پوج ءِ چاریگانی یک بنجلے نشانگ کتگ چریشی ءَ یک کارمندے زدگ بیتگ – اے مرد ھجام ءِ دکان ءَ زورگریں پوج ءِ چیردستی ءَ پیرول ءُ چاریگری ءَ کنگ ءَ بیتگ اَنت-

جیئند بلوچ ءَ گوشتگ بلوچ لبریشن آرمی اے کاروائیانی زمہ واریاں من ایت-

ھزدار ءِ ھند نوا ءَ ڈیم ءِ سائٹ ءِ سر ءَ سلاہ بنداں اُرش کتگ ءُ دراھیں مشینری مانداشتگ ءُ تباہ کتگ انت-

گیشیں اھوالانی رد ءَ مروچی سھب ءِ ساھت چار ءِ نزیک ءَ ھزدار ءِ ھند نوا ءَ ناشناسیں مردماں ڈیم ءِ جوڑ کنوکیں کمپنی ءِ سائٹ ءِ سر ءَ اُرش کتگ ءُ مشینری کہ آیانی توک ءَ یک ایکسیویٹر، ڈمپر ءُ ڈوزرے ءَ ھوار دگہ مشینری سوتکگ اَنت-

اُرش ءِ سر ءِ بارو ءَ دگہ گیشیں سرپدی نہ بیتگ اَنت بلے اے دابیں اُرش پیش ءَ بلوچستان ءَ کار کنوکیں اے دابیں کمپنیانی سر ءَ بلوچ آجوئی لوٹوکیں گلاں کتگ بیتگ اَنت-

بلوچستان ءِ دمگ چہ تربت ءَ یک زالبولے ءِ لاشے دزکپتگ-

لاش کلاتک ھند سر ءَ دزکپتگ-

دمگی مردمانی رِد ءَ کلاتک ءِ نزیک ءَ گھنہ پھلانی ءِ دمگ ءَ یک زالبولے ءِ بازیں روچ ءِ کوھنیں لاشے دزکپتگ –

لاش ءِ ھال انتزامیہ ءَ دیگ بیتگ آئی ءَ چار ءُ ٹپاس ءَ پد ٹیچنگ نادُراھجاہ ءَ برتگ-

لاش ءِ پجّار انگت نہ بیتگ-

چہ تربت ءَ پاکستانی پوج ءَ دو مردم دزگیر کتگ ءُ ناشناسیں جاھاں برتگ اَنت-

بیگواہ بیتگیں مردمانی پجار وارس ء سلیم ءُ نسار ء اسلم ھوار اَنت-

اے مردم پوج ءَ تربت ءِ ھند آسکانی بازار ءَ مروچی سھب ءَ دزگیر کتگ ءُ برتگ اَنت-

زانگ بہ بیت لھتے روچانی توک ءَ چہ سرجمیں بلوچستان ءَ بازیں مردمے پاکستانی پوج ءَ دزگیر کتگ ءُ برتگ ءُ بیگواہ کتگ اَنت- گوستگیں روچ ءَ ڈیرہ بگٹی ءُ بارکھان ءَ چار کیس رپورٹ بیتگ اَنت – ھمے وڑ تربت ءَ ھم پاکستانی پوج ءَ بازیں مردمے آوار جتگ ءُ برتگ اَنت کہ آیانی توک ءَ ڈاکٹر ظفر ء محمد رحیم، رحیم جان ء ڈاکٹر ظفر ءُ ڈاکٹر محمد کریم ء بھرام ءُ جبار ءِ نام زانگ بیتگ اَنت-

دومی نیمگ ءَ چہ کلات ءَ برجاھیں آپریشن ءَ چِل مردم ءَ گیش دزگیر کنگ ءُ بیگواہ بیتگ انت کہ آیانی نامانی آیگ پشکپتگ انت-

نوشکی ءَ بُنجاھی شھدگ سر ءَ سلاہ بندیں مردماں بستگ، لیویز چوکی گپتگ ءُ سلاہ دستیگ، بند ساچی شرکت ءِ کارمند دزگیر-

بلوچستان ءِ دمگ نوشکی ءَ بلوچ آجوئی لوٹوکاں گوستگیں شپ ءَ زرین جنگل ءِ ھند سر ءَ بستگ ءُ ھمے میان ءَ لیویز فورس چوکی وتی دستیگ کتگ-

دمگی اِھوالکار رِد ءَ شھدگ بندگ بازیں کلاکاں چہ برجاہ بیتگ اود ءَ رؤک ءُ آؤکیں گاڑی پٹ پول کتگ اَنت-

اِھوالکار رِد ءَ سلاہ بندیں مردماں لیویز فورسز ءِ سلاہ ءُ دگہ پوجی سامان وتی دستیگ کتگ اَنت-

ھمے وڑ بند ساچی شرکت ءِ پنچ کارمند دزگیر کتگ ءُ وتی ھمراھی ءَ برتگ اَنت-

واکدار ءَ اے درگت ءَ ھچ وڑیں درشان شنگ نہ کتگ-

ھمے سال ءَ سرجمیں بلوچستان ءَ بلوچ آجوئی لوٹوکانی نیمگ ءَ چہ بازیں جاھاں بُنجاھی شھدگ بندگ بیتگ اَنت-

ھمے سال ءَ بلوچ لبریشن آرمی ءِ سرمچاراں نوشکی ءَ اے وڑیں یک کاروائی یے شھر ءِ نزیک بُنجاھی شھدگ سر بستگ بساں چہ سپر کنوکیں نُھ مردم پجّار کنگ ءَ پد کشتگ اَنت-

بی ایل اے ءِ جارکش جیئند بلوچ ءَ گْوشتگ کہ اے مردم پاکستانی چیریں ادارھانی کارمند بیتگ اَنت چیریں ھالانی سر ءَ کاروائی ءَ کُشتگ اَنت-

بیست پنچ ءُ بیست شش اگست ءَ بلوچ لبریشن آرمی ءِ آپریشن ھیروف ءِ وھد ءَ ھم نوشکی ءِ جتاجتائیں ھندانی سر ءَ بُنجاھی شھدگ سر ءَ بستگ گاڑیانی پٹ پول ءَ ھوار سلاہ دستیگ کتگ اَنت وھدے کہ ریل ٹریکس تراکاں تباہ کتگ اَنت-

دو روچ ءَ ساری بارکھان ءَ بلوچ آجوئی لوٹوکاں شھدگ سر بستگ گاڑی پٹ پول کتگ اَنت – بلوچستان لبریشن فرنٹ ءِ جارکش میجر گْوھرام بلوچ رسانکدر ءَ شنگ کتگ گوشتگ کہ بغاؤ ءِ دگ سر لھتے بلوچ دُژمنیں سپر ھال گل ءِ انٹیلی جنس ونگ ءَ سر بیتگ چریشی ءَ بلوچستان لبریشن فرنٹ ءِ سرمچاراں ونگاٹک ھند شھدگ سر بستگ رؤک آوکیں سرجمیں گاڑی پٹ پول کتگ اَنت-

ھمے وڑ بلوچ آجوئی لوٹوکیں یکجاھی بلوچ راجی آجوئی سنگر ( براس ) ءَ سیزدہ نومبر سرجمیں بلوچستان ءِ بازیں کاروائی ءِ میان ءَ شش ھندانی سر ءَ بُنجاھی شھدگ بستگ اَنت-

نوشکی ءَ بیتگیں کاروائی انگت ھچ گل ءَ نہ زرتگ-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ءُ ھشت نومبر ءِ پشمبے ءِ سُھب ءِ نُھ ءُ پانزدہ ملٹ ءَ تربت ءِ دمگ آبسر بنڈے بن دو کرم پڑی دگ ءَ پاکستان آرمی ءِ دو گاڑیانی ءُ دو پرپٹانی ھمگرنچیں کاروان آر پی جی، ایل ایم جی ءِ اسنائپر ءُ دگہ نوکیں سلاھاں چہ سنگر گپتگ ءُ اُرش کتگ کہ چریشی ءِ نشانگ ءَ آیگ ءَ سپاھی رمضان ءَ ھوار سے کارمند ءُ دو جونیئر کمیشنڈ آفیسر نائیک شمس الدین ءُ لانس نائیک امان اللہ سک ٹپی بیتگ اَنت-

جارکش ءِ رِد ءَ راکٹ گولاھانی لگگ ءَ چہ پوج ءِ یک گاڑی یے ءُ یک پرپٹے ءَ آس کپتگ-

میجر گْوھرام بلوچ ءَ گوشتگ کہ بلوچ سرمچارانی سوبمندیں اُرش ءَ پد پروش وارتگیں پوج ءِ کارمنداں چو مدامی وڑ ءَ تیرگواری کتگ آبادیانی سر ءَ بیڑبرتگ راج لَٹ ءُ کُٹ کتگ ءُ زورانسری آوار جتگ اَنت-

آئی ءَ گْوشتگ کہ اُرش ءَ پد سرمچار پہ سلامتی وتی مُھریں اوتاکاں سر بیگ ءَ سوبمند بیتگ اَنت-

جارکش میجر گوھرام بلوچ ءِ رِد ءَ اے اُرش بی ایل ایف ءِ انٹیلجنس ونگ ءَ ھال سر کتگ چریشی ءَ نوکیں چیرجنگی رپکاں چہ دُژمن سرجمی ءَ بے وس کتگ کہ مئے سرمچارانی جوانیں رپک ءُ چیرجنگی ءَ تژن جنت-

جارکش ءَ گْوشتگ کہ اے اُرش ءَ بے میاریں شھریانی اسرمند بیگ ءَ چہ مارا سک بِژن اِنت- ما ھر وھد ءَ وتی راج ءَ چہ دزبندی کتگ کہ آ ریاستی پوج ءِ کارمنداں چہ دیر بہ بہ اِت، پرچاکہ مئے سرمچار ھر وھد ءَ ھر ھند سر ءَ دُژمن ءَ نشانگ ءِ بودناکی دار اِیت- مئے جُھد آجوئی ءِ اے پاکیں چراگ ءِ رُژن ءَ کنگ جُھد اِنت کہ آئی ءِ تہ ءَ راجی باندات ھست-

جارکش ءَ گوشتگ کہ ما یکرندے پد ءَ وتی راج ءَ چہ دزبندی کن ایں کہ چہ دُژمن ءَ نزیکی ءَ پھریز بہ کن اَنت ءُ وتی سلامتی ءَ دلجمی بدے اَنت دانکہ مئے جُھد ءِ میان بلوچ راج ءَ جانی ءُ مالی تاوان مہ رس اِیت- اے جُھد بلوچ راج ءِ ھاتر ءَ اِنت ءُ ما نہ لوٹ ایں کہ مئے اُرش ءِ ھاتر ءَ تاوان بہ رو اَنت-

جارکش ءَ گوشتگ میجر گوھر بلوچ ءَ وتی درشان ءِ گُڈی ءَ گْوشتگ کہ بی ایل ایف اے اُرش زمہ واری ءَ منّ اِیت ءُ آجو بلوچستان ءِ وتواجھی ءَ تاں دُژمن ءَ را نشانگ کنگ ءِ اِھد کن ایں-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی پاکستانی پوج ءِ پلامرزی ٹولی ولی محمد ءِ اوتاک سر ءَ دستی بمب ءَ چہ اُرش کتگ- تراک ءِ آسر ءَ دو کارمند سک ٹپی بیتگ اَنت-

دوستین بلوچ ءَ گوشتگ کہ مئے سرمچاراں اے اُرش زمہ واری منّ اِتگ اے وڑیں اُرش بلوچستان ءِ وتواجھی ءَ تاں برجاہ بنت-