مطیع اللہ جان ءِ آوار جنگ، پی ٹی آئی ءِ سر ءَ زوراکی، گمان اِنت نی مردم مئے رنج ءُ گماں سرپد بیتگ اَنت- ماہ رنگ بلوچ

بلوچ یکجھتی کمیٹی ءِ راھشون ءَ گْوشتگ کہ چہ بلوچستان ءَ اسلام آباد ءَ تاں، زلم ءِ چھرگ پدر بیگ ءَ اِنت-

نامی ئیں بلوچ سیاسی ءُ انسانی ھکانی باسک ءُ بلوچ یکجھتی کمیٹی ءِ سروک ماہ رنگ بلوچ ءَ وتی ایکس اکاؤنٹ ءَ درشانے شنگ کتگ گْوشتگ کہ گمان اِنت نو چہ بلوچستان ءَ ڈن نشتگیں مردماں ریاست ءِ زلم ءُ زوراکی ءِ چھرگ ءِ راستی ءَ سرپد بیتگ اَنت-

آئی ءَ اسلام آباد ءَ اِھوالکار مطیع اللہ جان ءِ زورانسری آوار جنی، دروگیں ایف آئی آر ءَ دزگیری ءُ پی ٹی آئی ءِ زھرشانی کنوکانی سر ءَ ریاستی زوراکیانی پالیسی ءِ منانک گوشتگ-

اے وئیلانی درگت ءَ دیان ءَ ماہ رنگ بلوچ ءَ گْوشتگ کہ اگاں ڈیھ ءِ بُنجاھی شھر ءَ کہ اود ءَ ھزارانی کیمرہ ءُ رسانکدر ءِ ساڑی بیگ، اے وڑ دیم پہ دیم زوراکی بیت کنت گُڑا بلوچستان ءِ دیر دراجیں دمگاں کہ اود ءَ ناں رسانکدر ناں دامگ، ریاست ءِ زُلم ءُ زوراکی ءِ ترسانک اِنت-

ماہ رنگ بلوچ ءَ گوشتگ کہ بلوچستان ءَ ریاستی ادارہ مردماں زورانسری بیگواہ کن اَنت، پد ءَ آیاں دروگیں میڑاں کُش اَنت ناشرکار پیشدار اَنت یا دروگیں ایف آئی آر رِد ءَ دزگیری ءَ پدر کن اَنت اے درستاں چہ اَبید رسانکدر ءُ انسانی ھکانی ادارہ بے تواری ءِ ندارگ چاروک جوڑ بیتگ اَنت-

آئی ءَ اسلام آباد ءَ پی ٹی آئی ءِ زھرشانی کنوکانی سر ءَ تیرگواری، کشگ ءُ ٹپی کنگ ءُ ھزارانی مردماں دزگیری ءِ ایر جتگ ءُ گْوشتگ کہ اے وئیل ریاستی زوراکی ءِ تچکیں چیدگ اِنت-

دیمتر ءَ آئی ءَ بلوچستان ءَ برجاھیں زلم ءُ زوراکی ءِ درگت ءَ گْوشتگ کہ گوادر ءَ بشیر بلوچ بازیں ماھاں بیگواہ کنگ ءَ پد دروگیں ایف آئی آر ءَ دزگیری پدر کنگ ءُ پد ءَ آ دروگیں میڑے ءَ کُشتگ ناشرکار پیش داشتگ-

آئی ءَ گْوشتگ کہ ھمے وڑ چہ تربت ءَ ڈاکٹر ظفر ءُ آئی ءِ چک ءَ ھوار بازیں مردمے زورانسری آوار جتگ ءُ بیگواہ کتگ اَنت تھنا گوستگیں ماہ ءَ سد ءَ چہ گیش بلوچ ورنا زورانسری آوار جنی ءِ نشانگ بیتگ ءُ بازیں مردمے کشگ بیتگ-

بلوچ یکجھتی کمیٹی ءِ راھشون ءَ دیمتر ءَ گْوشتگ کہ ما مدام گوشگ ءُ آیگ ءَ اِنت کہ اے ریاست ءِ زُلم ءَ چہ کس مُھر بیت نہ کنت – آ کہ مرچی بے توار اَنت، باندا آیانی لوگاں ھم ھمے ریاست آس روک کنت-

ماہ رنگ بلوچ ءَ انسانی ھکانی گلاں، رسانکدر، ءُ سیاستدانانی بے تواری سر ءَ بژن درشان کتگ گوشتگ کہ اے دردناک اِنت کہ بلوچ راج ءِ سر ءَ بیؤکیں زوراکیانی ھچ کس توار چست کنگ ءَ ساڑی نہ اِنت-