TBP Balochi

10 دسمبر ءِ انسانی ھکانی میان اُستمان ءِ روچ ءَ ماں بی وائی سی تُربت ھنکین ءَ روانکے کَشّگ بوتگ۔ ھمے درگت ءَ روانک، پارک ھوٹل دگ ءَ بگر داں پدا شھید چار راہ ءَ سرجم بوتگ۔

روانک ءِ سرجمی ءَ چہ پد بلوچ یکجھتی کمیٹی ءِ باسک نازگل بلوچ ءَ تران کنان ءَ گُشتگ کہ نوید حمید یک باسمائیں چاگردی کارکنے بوتگ کہ پاکستان ءِ چیریں ادارھاں آئی ءَ را ناھکی تیر جَتگ ءُ کُشتگ۔

آئی ءَ گیش تران کنان ءَ گْوشتگ کہ: بلوچ راج ھما راج اِنت کہ پہ چُنڈیں نانے ءَ بزگ اِنت۔

چہ ایشی ءَ پد نوید حمید ءِ گوھار ءَ تران کنان ءَ گْوشتگ کہ منی برات مدام پہ بزگیں بلوچ راج ءِ واستا، کہ آئی ءِ دلی واھگ بوتگ پہ بزگیں بلوچ راج ءَ گژنگی ءَ بہ رَکّیناں بلے ناشریں پاکستانی ریاست ءِ چیریں ادارھاں منی برات ءِ کار نہ وش بوت اَنت گڑا منی برات موٹل ءِ تہ ءَ تیر گواری کنگ ءُ شھید کنگ بیتگ۔

انسانی ھکّانی روچ ءَ بساک ءِ بُنجاھی باسک، محمد جان ءَ گْوشتگ کہ: مرچی پورائیں دگنیا ءَ انسانی ھکانی پَھازگ ءَ جُھد ءَ اَنت، آئی ءَ گیش تران کنان ءَ گْوشتگ کہ انسانی ھکّانی چار مستریں بھر اَنت کہ میان اُستمانی نیمگ ءَ جوڑ کتگ اَنت کہ آ چار پڑاں گوں بندوک اَنت آیانی تہ ءَ یکے انساپ، آزاتی، برابری ءُ شرپ ءُ اِزت اَنت بلے بلوچ راج چریں ایشاں زِبھر اَنت۔ بلوچ ءِ اے بُنکی ھک اِنت کہ پچگرگ بوتگ۔

آئی ءَ گیش تران کنان ءَ گْوشتگ کہ بلوچ ءِ جیڑہ اَنچوش مانگیش اِتگ اَنت کہ چہ ایشاں دراتک کُت نہ کنگ ءَ اِنت۔

ایشی ءَ چہ ابید ماسٹر عبدلغنی ءَ تران کنان ءَ گوشتگ کہ اے مرچیگیں روچ نہ اِنت کہ ریاست ءَ وتی زُلم ءُ زوراکی داشتگ۔ آئی ءَ گْوشت کہ میان اُستمان ءَ اے منّگ نامگ 1948 ءَ اَڑ کُتگ بلے روچ مروچی ما چہ ایشی ءَ بے بَھر اِیں۔

گیش آئی ءَ تران کنان ءَ گْوشتگ کہ پاکستان سکیورٹی ءِ نام ءَ چہ دری ملکاں زر گپت پہ ناشرکاری ءِ ھلاس کنگ ءَ بلے نوں میان اُستمان پاکستان ءِ وتگڑیں اَملاں سرپد ءُ پوہ بوتگ۔

ھمے درگت ءَ عطا ءِ گوھار ءَ تران کنان ءَ گْوشتگ کہ منی برات عطا نوربخش ءَ 13 نومبر ءَ گار ءُ بیگواہ کنگ بوتگ ءُ آ چہ وتی دکان ءَ سجھیں روچ ءَ کار ءَ بوتگ، گُد اِش دوتکگ، آ کمے ساھت ءَ گریوگ ءَ پد ”منی برات ءَ بیار اِت“-

گُڈسر ءَ گار ءُ بیگْواھیں کھول ءَ تران کنان ءَ گْوشتگ کہ منی برات گمشاد ءِ گنی، دودا الی، مزمل ءِ ابدلگپار ءُ مھراج ءِ گمشاد کہ کراچی شھدربرجاہ ءَ زورانسری آوار جَتگ ءُ بیگواہ کُتگ اَنت۔

بلوچستان ءِ دمگ چہ پنجگور ءَ گاڑی سواریں سلاہ بندیں مردماں یک ورنایے آوار جتگ ءُ بیگواہ کتگ-

گیشیں ھالانی رِد ءَ گوستگیں روچ ءَ پنجگور ءِ ھند پروم دز گومازی ءَ صرف گاڑی ءَ سواریں سلاہ بندیں مردماں فدا ء طاھر یک باگے ءَ چہ آوار جتگ ءُ ناشناسیں جاھے ءَ برتگ-

دمگی اِھوالکار ءِ رِد ءَ اے ورنا باگ ءَ پوریاگری کنگ ءَ بیتگ کہ سلاہ بندیں مردماں آوار جتگ-

دمگی اِھوالکارانی گْوشگ اِنت آوار جنوکانی سیادی سرکاری پلامرزی ءَ سلاہ بندیں ٹولی ءَ اِنت کہ بلوچ راجدوست آیاں ڈیتھ اسکواڈ گوش اَنت-

زانگ بہ بیت کہ بلوچستان ءَ راجدوستانی بھتام اِنت کہ بلوچستان ءَ پوج ءَ راجی زرمبشت ءِ ایرموش کنگ ءِ ھاتر ءَ سلاہ بندیں ٹولی جوڑ کتگ بلوچانی آوار جنگ ءُ کُشت ءُ کوش ءَ ھوار جتاجتائیں چاگردی سلکیاراں ھمگرنچ اَنت- وھدے کہ پاکستانی پوج ءَ آ بے لگام کتگ اَنت-

دہ دسمبر ءَ انسانی ھکانی میان استمانی روچ ءَ سرجمیں بلوچستان ءَ بلوچ یکجھتی کمیٹی ( بی وائی سی) ءُ دگہ گلانی نیمگ ءَ چہ جتاجتائیں شھراں زھرشانی، ایمن پند ءُ سیمینار برجم داشتگ-

اے مراگشانی مول بلوچستان ءَ برجاہ انسانی ھکانی لگتمالیانی نیمگ ءَ میان استمانی مردمانی دلگوش گور کنگی بیتگ- بلے اے پُرکاریانی میان ءَ ریاستی واکدار نیمگ ءَ چہ تُرندیں اڑان دیمپانی بیتگ-

زھرشانی ءُ سیمینار

بلوچ یکجھتی کمیٹی ءَ ” ہمارے حقوق، ہمارا مستقبل، ابھی ” مئے ھک ، مئے باندات، ھنی ” سرھال ءَ چہ جتاجتائیں شھراں مراگش برجم داشتگ، کہ آیانی تہ ءَ کراچی، تربت، ھب چوکی ءُ شال ھوار اَنت – زھرشانی ءُ سیمیناراں مزنیں کچے ءَ انسانی ھکانی باسک، وکیل، سیاسی گلانی باسک ، شھریاں ءُ زورانسری بیگواھیں مردمانی کھول بھر بیتگ اَنت-

زھرشانی ءَ ھواریں مردماں اے درگت ءَ بلوچستان ءَ زورانسری آوار جنیانی، انسانی ھکانی ھلاپ ورزی، ءُ بلوچ راج ءِ گوم ءَ ریاستی رویشگ ایر جنان ءَ میان استمانی مردم ءُ انسانی ھکانی گلاں چہ دزبندی کتگ اَنت کہ آ اے جیڑہ سر ءَ دلگوش بدنت ءُ بلوچستان ءَ برجاھیں انسانی ھکانی لگتمالی ءِ ھلاس کنگ ءَ کرد ءَ پیلو بہ کنت-

میانی استمانی ھکانی روچ ءِ درگت ءَ ھب چوکی ءَ بی وائی سی ءِ نیمگ ءَ چہ لسبیلہ پریس کلب دیم ءَ یک پُرایمن پندیں جار جنگ بیتگ اَنت، آئی ءِ مول انسانی ھکانی ھلاپ ورزی ءِ ھلاپ ءَ شئور پدر کنگ بیتگ. بلے دمگی انتزامیہ ءَ پریس کلب راہ بند کتگ ءُ کچرہ ٹرکاں چہ اڑان ودی کتگ زھرشانی کنوک پند جنگ ءَ داشتگ اَنت-

ھمے درگت ءَ زورانسری بیگواہ بلوچ کارکن راشد حسین بلوچ ءِ مات کہ وتی بیگواھیں چُک ءِ اکس چست کتگ ساڑی بیتگ، کہ آئی ءَ گوشتگ کہ کچھر ءِ ٹرک اوشتارینتگ ءُ مئے راہ بند کتگ –

اے اڑاناں اَبید ، زالبول، زھگ ءُ دگہ زھرشانی کنوکاں ھب پریس کلب دیم ءَ زھرشانی کتگ ءُ وتی بیگواھیِں مردمانی یل کنائینگ لوٹ کتگ زھرشانی کنوکاں وتی آئینی ھک درگت ءَ گپ کنان ءَ گوشتگ کہ زھرشانی ءِ دارگ جمھوریت ءِ ھلاپ اِنت ءُ اے بُنکی انسانی ھکانی تُرندیں ھلاپ ورزی اِنت-

شال ءَ جُست پُرس

شال ءَ بی وائی سی ءِ نیمگ ءَ برجم سیمینار ءَ ھم اڑان ودی کتگ انتزامیہ ءُ پولیس ءَ لس شھریاں چہ آیانی نام، پت نام ءُ پجّار کارڈ سرپدی لوٹ اِتگ اَنت کہ پریس کلب تہ ءَ پُترک شرت ءَ جوڑ کنگ بیتگ زھرشانی کنوکانی رِد ءَ، اے گامگیج مول بلوچ سیاسی ءُ انسانی ھکانی کارکنانی پٹ پول کنگ ءُ اشی ءَ پد آیاں دلسیاہ کنگ اِنت-

تربت دلسیاھی

تربت ءَ ھم انسانی ھکانی میان استمانی روچ درگت ءَ چہ سیمنار ءِ میان ءَ زھرشانی کنوک دلسیاھیانی دیمپان کنگ کپتگ – کیچ انتزامیہ ءُ پولیس ءَ زھرشانی ءَ ھوار مردین ءُ زالبول جُست پُرس کتگ ءُ تُرسینگ جُھد کتگ-

بی وائی سی ءِ پدکرد

بلوچ یکجھتی کمیٹی ءَ اے ریاستی گامگیج درکانودی کنان ءَ گوشتگ کہ اے گامگیج آجوئی ھیال لیکہ، مچی، شرپ ، شھری ءُ سیاسی ھکانی تچکی ءَ ھلاپ ورزی اِنت ریاست، کہ انسانی ھکانی میان استمانی جار ( UDHR) ءِ دستھت اِنت کہ بلوچ راج ءَ درانسانی رویشگ ءِ نشانگ کنگ ءُ بلوچستان ءَ انسانی ھکاں چہ زبھریں دمگے جوڑ کتگ-

بی وائی سی ءَ لوٹ کتگ کہ دمگی انتزامیہ وتی درجمھوری گامگیج ءَ بند بہ کنت، اگاں ناں راج گیش تُدندیں زھرشانی کنگ ءَ لاچار بیت-

بی وائی سی ءَ میان استمانی انسانی ھکانی گلاں ءُ اکوام متھدہ ءَ چہ دزبندی کتگ کہ آ بلوچستان ءَ انسانی ھکانی لگتمالیاں گامگیج بزیر اِیت ءُ ریاست ءِ اے کارپداں چہ جُست بگپت- زھرشانی کنوکاں زور داتگ کہ زورانسری آوار جنی ءِ جیڑہ میانی استمانی ھساب ءَ پدر کنگ بہ بیت دانکہ بلوچستان ءَ مردماں انساپ بہ رس اِیت-

انسانی ھکانی میان استمانی روچ درگت ءَ بلوچستان ءَ زھرشانی ءُ سیمنارانی برجم دارگ جُھد ءَ ریاستی اڑان ءُ پابندیانی دیمپانی بیتگ بلے بلوچ راج ءُ انسانی ھکانی کارکناں وتی ھکانی ھاتر ءَ توار چست کنگ ءِ مھکمی داشتگ ءُ گوشتگ کہ اے جُھد تاں ھما وھد ءَ برجاہ بیت دانکہ سرجمیں بیگواھیں مردمانی یل کنگ ءُ بُنکی ھکانی پھاز ءَ دلجمی نہ کنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں کوھلو ءَ زورگریں پاکستانی پوج ءِ یک پوسٹے اُرش ءِ نشانگ کتگ – اے اُرش گوستگیں شپ ءَ نوئے شم ءَ لونڈ ءِ ھند سر ءَ برجاھیں زورگریں پوج ءِ یک پوسٹے ءِ سر ءَ کتگ-

جارکش ءَ گْوشتگ کہ مئے سرمچاراں راکٹ ءُ دگہ مزنیں سلاھاں چہ دُژمنیں پوج نشانگ کتگ، دو دُژمنیں کارمند کشتگ اَنت کم چہ کم چار ٹپی کتگ اَنت- بلوچ لبریشن آرمی اے اُرش زمہ واری ءَ منّ اِیت-

کوھلو ءَ سلاہ بندیں مردماں پاکستانی پوج سر ءَ اُرش، دمگ ءَ ھیلی کاپٹر سر بیتگ اَنت، جانی تاوانانی ھال-

دمگی اِھوالکار رِد ءَ اُرش گوستگیں شپ ءَ نو ئے شم لونڈ ھند سر ءَ کنگ بیتگ کہ اود ءَ تُرندیں تیرگواری ءُ تراکانی توار اش کنگ بیتگ-

اُرش ءَ پد مروچی سھب ءَ ھمے دمگ ءَ ایمبولینس روگ ءَ گندگ بیتگ اَنت وھدے کہ دمگ ءَ بالگرد سر بیتگ اَنت-

واکدار ءَ تاوانانی درگت ءَ ھچ وڑیں درشان شنگ نہ کتگ-

اے اُرش انچیں وھدے ءَ بیتگ کہ دو روچ ءَ ساری دکی ءِ دمگ ءَ یک اُرشے ءَ پاکستانی پوج ءِ دو کارمند بیران بیتگ اَنت-

دکی اُرش زمہ واری بلوچ لبریشن آرمی ءَ منّ اِتگ بلے مروچی بیتگیں اُرش زمہ واری انگت ھچ گل ءَ نہ زرتگ-

زانگ بہ بیت گوستگیں ماہ ءَ بلوچ لبریشن آرمی ءِ مجید برگیڈ ءُ ھاسیں ٹولی فتح اسکواڈ ءَ شال ءُ کلات ءَ دو تُرندیں اُرشاں پاکستانی پوج نشانگ کتگ کہ ششت ءَ گیش کارمند بیران ءُ بازینے ٹپی بیتگ اَنت-

ماتی گِریوگ ءُ کِسّہ کنان اَت

نبشتہ کار : نادیہ بلوچ

دی بلوچستان پوسٹ

ماتی ءِ چّمانی اَرس شَنزگ ءَ اِت اَنت دست لرزگ اِت اَنت ءُ لبز اِیر بُکگ ءَ اِت اَنت آئی ءِ چّمانی دیم ءَ تھاری ءَ مان شانتگ اَت گپ گپ ءَ آئی ءَ گُشت دُرستے کُشت اَنت ئے کس ءِ پشت نَگِیتکگ زالماں نی مئے گِس ءَ یکے ھم نہ گواہ اِیت کہ مارا لاپ بِدنت ءُ مئے لوٹ ءَ سرجم بِکنت مات ءِ گور ءِ پُچ دِرتگ اِت اَنت دِرتگيں گُشانے سر ءَ اِت ئِے میزان میزان ءَ گِریوگ ءِ بُوہ ءَ جتگ اَت پد ءَ بلے اَنگت ءَ گوں وتی ارساں جَنگ ءَ اَت گپ کنگ ءِ بند نہ کُت –

گُڑا ھمے وھد ءَ منی دِل ءَ انچیں دِریکگّے جَت گُوشاں ھمبراداری یل کُت دِل ءَ گُشت پادا چِداں چہ برو ڈن ءَ کوکار کن بِگری سلوات بہ کن ، بلے منی گِریوگ ءَ ناں اَئی ءِ نمیرانيں بچّ آورت کتگ اَت نہ پہ آئی ءَ تُشے اِنساپ کُتگ اَت ءُ من بہ گِریتيں پرچا-

مات ءِ گِس ءِ دپ ءَ کسانُکيں دُدُّپے ھست اَت کہ گوں کُنٹگان اَت پہ بزگی چار مردُم ءِ جاگہ اَت ءُ دُو بان اِت اَنت ءُ لھتے پکائيں لوگ بَستگ اَت کہ بے رنگ اِت اَنت گْوشت ئِے اے لوگ منی (پہ مهر مات ءَ نام کُتگ اَت واجُل )واجُل ءَ پہ وتئی مات مھر اڑ داتگ ءَ گْوشتگ ئِے کہ مات ءِ کوھنیں لوگ مرچی ناں باندا ھور ءُ گوات ءِ بِہ بیت بِگند ئے بہ کپ اِیت گُڑا مات ءِ واستا نُوکيں لوگ بَنداں اِشی ءَ ساری ءَ اِے لوگانی تہ ءَ گام ءَ اِیر بے کنت جَنگ بيت کُشت اِش منی واجُل لوگانی تہ ءَ هِچ مان نیست اَت یک هرابيں پِریجے ھست اَت کہ تو دست جَت تو گوشت کہ کَپ اِیت ءُ یک اَسیرے بزانکہ پترے پَچ اَت کہ سرجميں کوٹی نہ گِپتگ اَت ماتی ءِ سرجميں بازار ءِ مردم وتواکی ءِ تہ ءَ گار اِت اَنت هر کس ءَ کہ ديست ترا چار اِت ئے هیران اِت اَنت-

ماتی ءِ گِس ءَ کُوہ ءِ جھلگ ءَ بُرز ءَ لشکر ءَ وتی زُوراَنسری برجا داشتگ اَت لشکر ءِ تُرس ءَ ميتگ ءِ مردُم ساہ کش اِت نہ کن اَنت نانکہ گرماگ ءِ شَپ ءَ زالبُول ءِ ڈن ءَ وپت کنت نہ کہ بیگاه ءِ وهد ءَ ڈن ءَ گُد ءِ دُوتک کنت اِے بازار ءِ مردين نیم وَ کُشگ بیتگ اَت ءُ نیم پشت کپتگيں وتی زِند ءِ رکينگ ءَ درانڈيھ اِت اَنت بس تھنا زالبولانی مُچی ما ديست ءُ چُک کہ اِے جاوراں سرپد نہ اِت اَنت اے سھت ءَ من ءَ ڈاکٹر مهرنگ ءِ اِے گَپ یات اَتک کہ گْوش اِیت همے زالبول کے جَنگ نہ کنگ ءَ اَنت آ ھم آشوب ءِ بھر اَنت پرچا کہ آیاں وتئی گِس یل نہ داتگ اَت اِشانی وتی زمین ءِ سر ءَ بيگ ھم گھگیری ءِ چِیدگ اِنت –

اِے بازار ءِ تہ ءَ وانگجاہ ءِ ساهِگ ءِ ھم ترا گِندگ ءَ نَیتک ءُ ترا اَنچُش سما بيت کہ اِے بازار ءِ مردُم اَچ وانگ ءُ زانگ ءَ زُور دِیر دارگ بیتگ اَنت کُوهانی مِیان ءَ ھستيں اِے بازار بے کِساس تُرس ءِ آماچ اَت من یک جِنوکے ءِ جُست کُت کہ تو چُنت ونتگ گْوشت ئِے من پنچ کِلاس ونتگ بلے وانگجاہ اَچ مئے ميتگ ءَ سک دِیر بيتگ گُڑا ما گيشتر ونت نہ کُتگ روگ آیگ پہ من گِران بيتگ من گُشت گُڑا تو وانگ زان ئے وتی سر ءِ جھل کُت ھمے وانگجاہ کہ آ بازار ءَ دِیر ھست اَت اود ءَ وانگ نیستی ءِ برابر اَت وانگ ءُ زانگ ءَ اَچ دِیر داشتگيں راج نہ زانت کہ منی هَک وتئی جِند ءِ زمين ءَ چی اَنت ءُ زُوراک ءِ مستريں لوٹ ھمیش اِنت کہ ترا چہ وانگ ءُ زانگ ءَ دِیر بِدار اِیت نی من ءُ تو سرپدیں شریں وڑے ءَ کہ وانگ مئے دُرستيں جيڑگانی هُنڈال اِنت گُڑا من ءُ تو پرچا وتئی هلک ءُ ميتگ ءِ مردُم ءَ نہ وانين ایں-

اے ھد ءَ کہ من نشتگ اِت انت ماتی ءِ دردناکیں کسّہ ءَ نبشتہ کنگ ءَ اِتاں ءُ اِے نِبشتانک سرجم نہ اَت گُڑا من چم کمو گوں رسانکدر ءَ شانک دات اَنت تاں گِنداں گَمشاد ءُ دگے سے سنگتانی اکس اَنت کہ آوار جَنگ بیتگ اَنت ءُ باندا پُونشی باريں نی کئی باریگ اِنت-

روکپتی بلوچستان ءِ بنجاھی شھر زاھدان ءَ ایران ءِ آمیدگس ءِ ھکم ءَ دو مردم پاھو دیگ ءَ جتائیں کوٹیاں برگ بیتگ انت-

اھوالانی رد ءَ زاھدان ءِ مزنیں جیل ءَ گوستگیں روچ ءَ دو مردم پہ پاھو ءَ جتا کوٹی ءَ برگ بیتگ انت ءُ آیانی پاھو نامہ سرجم کنگ بیتگ –

اھوالانی رد ءَ پاھو دیگ بیتگیں مردمانی پجار ھدا بکش کمبرزئی ء مھمد ءُ امید حسینزئی ء نور مھمد ءِ ناماں زانگ بیتگ اَنت ءُ ایشانی ھواری ءَ دگہ یک مردمے ھم پاھو ءِ جتائیں کوٹی ءَ برگ بیتگ بلے آئی ءِ نام زانگ نہ بیتگ-

اھوالانی رد ءَ ھدا بخش ءُ امید سَے سال پیش نشہ واپاری ءِ بھتام ءَ گرگ بیتگ اَنت ءُ ایران ءِ انکلاب ءِ آمیدگس ءَ ھردوکانی سر ءَ پاھو ءِ ھکم داتگ بیتگ انت-

بلوچستان لبریشن فرنٹ ءِ جارکش میجر گْوھرام بلوچ ءَ بلوچستان ءِ دوجتاجتائیں دمگ شال ءُ جھاؤ ءَ پاکستانی پوج ءِ سر ءَ بیتگیں اُرشانی زمہ واری منّ اِتگ اَنت-

جارکش ءَ گوشتگ کہ مئگ سرمچاراں ھشت دسمبر یکشمبے ءِ بیگاہ شش ءَ بلوچستان لبریشن فرنٹ ءِ اسنائپر ٹیکلٹکل ٹولی ( ایس ٹی ٹی ) آواران ءِ دمگ جھاؤ ءَ کوھڑو ءِ ھند سر ءَ برجاھیں زورگریں پاکستانی پوج بُنجل ڈن ءَ اوشتوکیں پوجی کارمند اسنائپر ءَ چہ نشانگ کتگ ءُ کُشتگ-

آئی ءَ گْوشتگ کہ اسنائپر ٹیکٹکل ٹولی ( ایس ٹی ٹی ) بلوچستان لبریشن فرنٹ ءِ ایلیٹ بُنزے کہ آئی ءِ تہ ءَ زانتکار ءُ ھُنرمندیں جنگولاں چہ ھمگرنچ اِنت- اے ٹولی ھاسکار بلوچستان ءَ زورگریں پوج ءُ آئی ءِ ھاسیں پوسٹاں ءُ بُنجل ءَ نشانگ کنگ ءِ تاکت دار اِیت، اود ءَ اشی ءِ سرمچار ھنرمندی ءَ چہ دُژمن ءِ جاھاں نشانگ کنت- اسنائپر ٹیکٹکل ٹولی بُنکی مول دُژمن ءِ ھاسیں سنگراں نشانگ کنگ ءُ آپریشناں سوبمند کنگ ءُ دُژمن ءِ ارادگاں بے سوب کنگ اِنت- اشانی اُرش چیرجنگی، تُرند ءُ اسدمند بنت- چریشی ءَ اشانی رپک ءُ نوکیں سلاھاں کارمرز کنگ ھاسیں کردے پیلو کنت- اے ٹولی وتی آپریشنانی میان ءَ بازیں جاھاں سوبمند بیتگ اَنت کہ بلوچستان لبریشن فرنٹ ءِ چیرجنگی رپکاں یک ھاسیں بھرے-

جارکش ءَ گْوشتگ کہ سرمچاراں یکشلیں اُرشانی سبب ءَ چہ دُژمن سسّائی پروش ءِ دیمپان کتگ چریشی ءِ سبب ءَ آ وتی جانی ءُ مالی تاواناں چیر دیگ ناکامیں جُھد کنگ ءَ اَنت-

جارکش ءَ گوشتگ بی ایل ایف پوجی کارمند ءِ کوش زمہ واری ءَ منّ اِیت-

￵جارکش میجر گوھرام بلوچ ءَ گوشتگ کہ سرمچاراں شال ءَ پاکستانی پوج ءِ یک ￵چوکی یے گوں دستی بمب ءَ ￴نشانگ کتگ۔

جارکش ءَ گوشتگ کہ شش دسمبر ءَ ￴آدینگ ءِ ￵شپ ءِ ￵ھپت ءَ ￴سرمچاراں بلوچستان ءِ ￵بنجاھی شھر شال ءِ ￵ھند بروری بائی پاس ءَ ￴برجاھیں زورگریں پاکستانی پوج ءِ ￵یک چوکی یے ءِ ￵سر ءَ گوں دستی بمب ءَ ￴نشانگ کتگ۔ اُرش ءَ ￴پاکستانی پوج ءَ جانی ءُ ￶مالی تاوان بوتگ۔

آئی گوشتگ کہ اُرش ءَ ￴پد پاکستانی پوج ءَ ￴ھمے ھند انگر کتگ ءُ ￶پٹ ءُ ￶پول کتگ ءُ گوں لس مھلوک زوراکی کتگ۔ سرمچار اُرش ءَ ￴پد ￴پہ سلامتی وتی جاہ ءَ سر بیتگ اَنت۔

میجر گوھرام بلوچ ءَ ￴اُرش زمہ واری منّ اِتگ گوشتگ کہ داں بلوچستان ءِ ￵آجوئی ءَ ￴پاکستانی پوج ءِ ￵سر ءَ مئے ￴اُرش برجاہ بنت۔

بلوچستان ءِ دمگ چہ پنجگور ءَ پاکستانی پوج ءَ یک مردمے آوار جتگ بیگواہ کتگ- وھدے کہ چہ ڈیرہ بگٹی بیگواھیں مردمے آجو بیتگ ءُ لوگ ءَ سر بیتگ-

گیشیں ھالانی رِد ءَ گوستگیں روچاں پنجگور ءِ دمگ چہ پروم ءَ پاکستانی پوج ءَ بیڑبرتگ ءُ چار ورنا آوار جنگ ءَ پد بیگواہ کتگ اَنت – بلے پد ءَ زمانت واستا امان اللہ ی صدیق لوٹارینتگ چریشی ءَ پد پاکستانی پوج ءَ وت امان اللہ ھم آوار جتگ چریشی ءَ پد آ بیگواہ ءَ اِنت-

دومی نیمگ ءَ چہ ڈیرہ بگٹی ءَ ھال اِنت کہ ھمے سال چاردہ مئی ءَ چہ سوئی ءَ پاکستانی پوج دست ءَ زورانسری بیگواہ کنگ بیتگیں دلشاد ء عابد بگٹی آجو بیتگ ءُ وتی لوگ ءَ سر بیتگ-

زانگ بہ بیت کہ بلوچستان ءَ زورانسری آوار جنی ءِ وئیل یکرندے پد ءَ گیشی گندگ آیگ ءَ اِنت-

دی بلوچستان پوسٹ ءَ مُچ کتگیں کچانی رِد ءَ نومبر ماہ ءَ پاکستانی پوج ءَ یکسد چل مردم زورانسری آوار جنی ءِ نشانگ کتگ اَنت-

بلوچ یکجھتی کمیٹی ءِ راھشون سمی دین بلوچ ءَ کراچی پریس کلب پریس کانفرنس کنان ءَ گْوشتگ کہ وھدے کہ یک بلوچے شمئے دیم ءَ پریس کانفرنس کنگ ءَ کاینت، گُڑا شمارا پیسر ءَ چہ سرپدی بیت یکرندے پد ءَ بے میاریں بلوچے زورانسری آوار جنی ءِ نشانگ کنگ بیتگ- بلوچستان ءِ جاور ھمے وڑ ءَ اَنت اد ءَ یکروچے ھم چُشیں نہ گوز اِیت یک بلوچے زورانسری آوار جنی ءِ نشانگ کنگ نہ بیت- مروچی ھم ما یک دردناکیں وئیلے شمئے دیم ءَ ایر کنگ ءَ اَتکگ ایں شمئے نیمگ ءَ چہ مئے توار بُرز واکدار ءُ جھان ءَ تاں سر بہ بیت-

آئی ءَ گْوشتگ کہ بلوچستان ءَ زورانسری آوار جنیانی درچ گوستگیں دو دھک ءَ چہ برجاہ ءَ اِنت، بلے نو اے زُلم بلوچستان ءِ ھاک ءَ چہ درتکگ سندھ، پنجاب ءُ وفاقی دمگاں تاں سر بیتگ- کراچی، اسلام آباد ءُ پنجاب ءِ دگہ شھراں چہ بلوچ نودربر زورانسری آوار جنی درستانی دیم ءَ اَنت-

آئی ءَ گوشتگ کہ گوستگیں شپ ءَ کساس ساھت یک ءَ لھتے چیریں ادارھانی مردم کراچی مسکن ءَ یک فلیٹے ءَ بیڑبرتگ اود ءَ وانگ ءَ ھاتر ءَ جھمنندیں چار بلوچ نودربر آوار جتگ ءُ زورانسری بیگواہ کتگ اَنت – اشانی تہ ءَ دو نودربر پیسر ءَ ھم اے وڑ زورانسری آوار جنی ءِ نشانگ کنگ بیتگ اَنت ءُ ھمے وڑ پیسر ھم دو نودربر پوج ءِ کارمنداں آوار جتگ اَنت مارا ستک اِنت اے رند ءَ ھم اے مردم پوج ءِ چیریں ادارھاں آوار جتگ ءُ بیگواہ کتگ اَنت-

آئی ءَ گْوشتگ کہ زورانسری آوار جنی ءِ نشانگ بیتگیں چار نودربر پجّار کنان ءَ گْوشتگ کہ گمشاد ء غنی ( ایم فل پڑ فلسفہ ، کراچی شھدربرجاہ ) ، دودا الھی ء الھی ( ششمی سمسٹر پڑ میان اسمتانی سیادی، کراچی شھدربرجاہ) مزمل ء عبدالغفار ششمی سمسٹر ، پڑ فلسفہ، کراچی شھدربرجاہ) معراج ء گمشاد ( کہ کراچی شھدربرجاہ انوگ ءَ گریجویٹ، ایم فل ءَ داخلہ ءِ واھشت مند بیتگ اشی ءَ اَبید دگہ یک ورنایے اسماعیل ء ابراھیم کہ بلوچستان ءِ جھمنند اِنت ءُ دبئی کار ءُ روزگار ءَ پد کراچی ءَ اَتکگ کہ اش ھم یکیں وھد ءَ چہ حسن اسکوائر ءَ زورانسری بیگواہ کتگ-

آئی ءِ گْوشگ اِنت کہ اے سرجمیں نودربر بلوچستان ءِ دیر دیریں دمگاں چہ سیادی دار اَنت ءُ وتی وانگ ھاتر ءَ کراچی ءَ جھمنند بیتگ اَنت – اشاں چہ دودا الھی ءُ گمشاد غنی پیسر ءَ ھم زورانسری آوار جنی ءِ نشانگ کنگ بیتگ اَنت ءُ نو یکرندے پد ءَ اے زُلم کتگ-

آئی ءَ گْوشتگ کہ ما سرجمیں نودربراں ءُ اسماعیل ء ابراھیم ءِ زوت ءُ سلامتی یل کنائینگ ءِ لوٹ ءَ کن ایں – مزن واکداراں چہ دزبندی کن ایں کہ زوت ءَ چہ زوت یل کنگ نہ بنت- اگاں آؤکیں دو روچانی تہ ءَ ورنا یل کنگ نہ بیت اَنت گُڑا ما وتی تُرندیں زھرشانی ءِ جار جنگ ءَ لاچار بہ ایں-