TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں دہ دسمبر ءَ سے شمبے ءِ شپ ءِ نُھ ءَ واشک ءِ دمگ رخشان ءِ ھند گیس بروکیں ٹینکر نشانگ کتگ تاوان داتگ اَنت- وھدے کہ ڈرائیور بلوچ ءُ مردمگری ھاتر ءَ کڈن کتگ ءُ یل داتگ اَنت-

جارکش ءَ گْوشتگ کہ ریاست پاکستان وتی باپاری ءِ سھارگ دیگ ھاتر ءَ بلوچستان ءَ جتاجتائیں مڈیاں لُٹ پُل کنت پنجاب ءِ جتاجتائیں شھراں برگ ءَ اِنت دانکہ آئی ءِ باپاری دیم ءَ شُت بہ کنت بلے بلوچ سرڈگار ءِ پُسگ اے سرڈگار ءِ وارس اَنت ءُ پھازدار اَنت کہ اے سرڈگار ءَ چہ دراؤکیں کجام ھما ریاست ءُ ادارہ لُٹ پُل ءِ موکل ءَ ندنت-

جارکش ءَ گْوشتگ کہ کا سرجمیں ٹرانسپورٹراں کڈن کن ایں کہ آ بلوچانی مال ءُ مڈیانی لُٹ ءُ پُل کار ءَ ریاست ھمراھداری دیگ ءَ پھریز بہ کن اِت اگاں ناں جانی ءُ مالی تاوان زمہ وار وت بنت-

جارکش ءَ گوشتگ کہ بی ایل ایف اے اُرش زمہ واری ءَ منّ اِیت ءُ آجو بلوچستان ءِ مول مراد ءَ تاں دُژمن پوج ءُ ریاست شوربندیاں نشانگ کنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں یک درشانے ءَ گوشتگ مئے سرمچاراں گوادر ءَ مروچی سھب ءَ زورگریں پاکستانی پوج نشانگ کتگ ءُ دشمن ءِ دو کارندہ کشتگ اَنت-

جارکش ءَ گوشتگ سرمچاراں گوادر ءِ ھند دڑامب آکاڑہ ءَ راہ بستگ ءُ دشمنیں پوج ءِ پندی کارندہ ھما وھد ءَ نشانگ کتگ انت کہ کاروان ءَ پھزداری ءَ سنگراں روگ ءَ بیتگ انت- اُرش ءَ دشمن ءِ دو کارندہ جاہ پہ جاہ ءَ مرتگ انت ءُ سَے زدگ بیتگ اَنت-

جارکش ءَ گوشتگ سرمچارانی دگہ یک ٹولی ءَ تچوکیں دشمن ءِ کارندھانی سر ءَ اُرش کتگ چریشی ءَ چہ دشمن ءَ تاوانانی دیمپانی بیتگ- بلوچ لبریشن اے اُرشانی زمہ واری ءَ من ایت-

اوگانستان ءِ وزیر مھاجرین چارشمبے ءِ روچ ءَ بنجاھی شھر کابل ءَ وزارت ءِ کارگس ءَ بیتگیں بمب تراکے ءَ جنگ بیتگ-

تراک ءَ خلیل الرھمان ھکانی وتی لھتے ھمراھانی ھمراھی ءَ جنگ بیتگ-

خلیل الرھمان ھکانی جلال الدین ھکانی ءِ برات بیتگ، کہ آئی ءَ تالبان ءِ دو دھکاں جنگ ءُ چوپانی وھد ءَ لھتے ترندیں اُرشانی زمہ واریانی ترسناکیں ھکانی نیٹ ورک ءِ بنھشت ایر کتگ – آ انیگیں وزیر داکلہ سراج الدین ھکانی ءِ ناکو اِنت –

2021 ءَ وھدیکہ تالبان ءِ لشکر ءَ سرجمیں ڈیھ وتی دست ءَ کتگ، امریکہ ءُ نیٹو ءِ چیردستی ءَ درملکی لشکر ءِ ھلاپ ءَ جنگ ءِ ھلاسی ءِ جار جتگ ات کہ چریشی ءَ پد اوگانستان ءَ جنگ ءِ توک ءَ کمی اتکگ ات- بلے اسلامک اسٹیٹ ءِ دمگی ٹولی، چوشکہ اسلامک اسٹیٹ ھراسان ءِ نام ءَ زانگ بیت اِنت – اوگانستان ءَ پرکار اِنت آ تچک ءَ شھری، درملکی ءُ تالبان ءِ کارندھاں اُرشانی نشانگ کنگ ءَ اِنت-

بلوچستان ءِ وانگی ادارھاں ملٹرائزیشن، بلوچ نودربرانی سر ءَ ریاستی کریک ڈاؤن ءُ بولان میڈیکل کالج ءِ بندش ءِ ھلاپ ءَ زھرشانی زرمبشت پانزدھمی روچ ءَ برجاہ اِنت-

زھرشانی بنجل ءَ مروچی یک روانکے کشگ بیتگ کہ چریشی ءَ بازیں کچے ءَ نودربراں بھر زرتگ- زھرشانی روانک ءَ بولان میڈیکل کالج ءِ نودربراں ھوار نودربرانی گلانی رھشوناں تران کتگ-

شال ءِ ترندگیریں سارتی ءَ پانزدہ روچاں زھرشانی بنجل ءَ گوازینگ ءَ ابید انگت ءَ اُستانی سرکار ءُ کالج انتزامیہ ءِ نیمگ ءَ نودربرانی لوٹ سرجم نہ بیتگ اَنت-

زھرشانی کنوکانی گوشگ انت کہ ریاست ءِ مزن مَری ءَ زانگ بیت اِنت کہ یک نیمگے زھرشانی نندانک برجاہ اِنت ءُ دومی بلوچستان ءِ دگہ وانگ جاھانی بند کنگ ءِ درچ برجاہ اَنت چریشی ءَ بلوچستان ءِ ھاسٹلز سیل کنگ برجاہ اَنت ءُ دومی نیمگ ءَ بلوچ نودربرانی سر ءَ کریک ڈاؤن ءُ زورانسری آوار جنی گیش بوان اَنت –

آیاں گوشتگ اے زھرشانی بنجل ءِ زور ءَ ما بلوچستان ءِ مھلوک، بچکیں نودربر ءُ جنکیں نودربراں، سیاسی باسکاں اے کلوہ ءَ دیگ لوٹ ایں کہ بلوچستان ءِ وانگ جاہ ملٹرائیزیشن، وانگی ادارھ ءُ ھاسٹلانی بندش زانتے ءَ ریاستی پندل ءُ پالیسی اَنت-

بلوچستان ءِ دمگ چہ ھُزدار ءَ سلاہ بندیں مردماں تیرگواری کتگ رسالدار بیران-

گیشیِں ھالانی رِد ءَ ھُزدار ءَ ناشناسیں سلاہ بندیں مردماں تیرگواری کتگ لیویز رسالدار حفیظ کرد بیران-

پولیس ءَ وئیل راست کتگ گْوشتگ کہ اُرشکاراں آئی ءِ گاڑی نشانگ کتگ چریشی ءَ آ بیران بیتگ-

اُرش ءَ پد اُرشکار تچگ ءَ سوبمند بیتگ اَنت-

دومی نیمگ ءَ ھاران ءِ دمگ گواش ٹوہ ملک ھند ءَ ناشناسیں سلاہ بندیں مردماں تیرگواری ءَ چہ لیویز کارمند ٹپی بیتگ آ ڈی ایچ کیو نادُراھجاہ ھاران ءَ سر کنگ بیتگ اود ءَ بنداتی الاج ءَ پد شال ءَ برگ بیتگ-

ٹپی ئیں کاردار نصیر گوشگ ءَ اِنت کہ آئی ءِ ڈیوٹی واشک ءَ بیتگ-

بلے دوئیں وئیلانی سوب زانگ نہ بیتگ اُرشانی زمہ واری انگت ھچ گل ءَ نہ زرتگ اَنت-

بلوچستان ءِ دمگ پنجگور ءَ ناشناسیں سلاہ بندیں گاڑی سواریں مردماں یک مردمے دزگیر کنگ ءَ پد بیگواہ کرتگ-

گیشیں اھوالانی رد ءَ دَہ روچ ءَ پیش سلاہ بندیں گاڑی سواریں مردماں یک مردمے دزگیر کنگ ءَ پد بیگواہ کتگ-

بیگواہ کنگ بیتگیں مردم ءِ پجار عنایت ء حیر مھمد ءِ نام ءَ زانگ بیتگ-

دمگی مردمانی رد ءَ اے مرد دَہ روچ پیش ناشناسیں گاڑی سواریں سلاہ بنداں آوار جتگ کہ چریشی ءَ پد آ بیگواہ اِنت-

دمگی مردمانی رد ءَ آوار جنوکیں مردمانی سیادی سرکاری پلامرزی ءَ ھستیں ٹولی ڈیتھ اسکواڈ ءَ اِنت-

زانگ بہ بیت دو روچ پیش ھمے وڑیں گاڑیں سواریں مردماں فدا ء طاھر نامیں مردمے آوار جتگ ءُ برتگ-

سیاسی مردمانی لیکہ اِنت کہ بلوچستان ءَ پاکستانی چیریں ادارھاں ڈیتھ اسکواڈ پہ بلوچانی کُشت ءُ کوش ءَ جوڑ کرتگ ءُ ھمے درور بلوچستان ءِ بازیں جاھاں گندگ بنت اِنت-

سیاسی مھلوک ءِ گوشگ اِنت کہ ڈیتھ اسکواڈ ھمک روچ مردماں آوار جنگ ءُ کشگ ءِ ھواریاں دمگ ءُ چاگردی سلکاری ءُ دگہ دگہ جنجالاں ھوار اِنت-

بلوچستان ءِ دمگ کیچ ءَ پجّار نہ بوتگیں سلاہ بندیں مردماں ٹیلر نشانگ کتگ اَنت – وھدے کہ ھمے میان ءَ پاکستانی پوج ءِ آپ سرکنوکیں ٹینکر ھم نشانگ کتگ اَنت-

ٹیلر ءُ ٹینکر تمپ ھوت آباد ھند سر ءَ نشانگ کتگ اَنت-

اِھوالکار رِد ءَ اُرش ءَ گاڑیاں تاوان چست کنگ کپتگ بلے اُرش زمہ واری انگت ھچ گل ءَ نہ زُرتگ-

بلوچستان ءُ کراچی ءَ زورانسری آوار جنگ بیتگیں 11 مردم یل کنگ بیتگ اَنت-

گیشیں اھوالانی رد ءَ دو روچ پیش کراچی ءَ آوار جنگ بیتگیں چار نودربراں ھوار پنچ کس نودربر دودا الاھی، گمشاد مرید، معراج بلوچ ،مزمل ءُ اسماعیل ابراھیم دو روچ ءَ پد یل بیتگ اَنت-

آیانی یل بوگ ءِ ھال کھول ءَ کتگ اَنت-

اے نودبر ھشت دسمبر ءَ کراچی ءَ یکیں فلیٹ ءَ دزگیر کنگ ءُ بیگواہ کنگ بیتگ اَنت آیانی زورانسری اوار جنی ءِ راستی بلوچ یکجھتی کمیٹی ءَ ھوار نودربرانی کھولاں کتگ اَنت-

ایشی ءَ ابید گوستگیں آدینگ ءِ شپ ءَ کیچ ءَ پاکستانی پوج ءِ دست ءَ آوار جنگ بیتگیں چار مردم یل بیتگ اَنت-

چہ کیچ ءَ سر بیتگیں اھوالانی رد ءَ زورانسری آوار جنی ءِ آماچیں ھاجی ھاسل، عبدالسلام ، یاسر ءُ سالم یل بیتگ اَنت-

ھمے وڑ بلیدہ ءَ زورانسری بیگواھیں ازیر امید ءُ عبدالرھمان قدیر گوستگیں روچ ءَ یل بیتگ ءُ وتی لوگاں سر بیتگ اَنت، اے ورنا گوستگیں ماہ ءِ ھژدہ رمس ءَ پاکستانی پوج ءَ پٹانی زامران ءَ اُمید ءِ لوگ ءَ آوار جتگ اَنت-

بلوچستان ءِ دمگ گوادر ءَ پاکستانی پوج ءِ کارندہ سلاہ بندیں مردماں نشانگ کتگ اَنت-

اُرش مروچی سھب ءِ ساھت دَہ ءِ نزیک ءَ گوادر ءِ ھند دڑامب آکاڑہ ءَ پیش اتکگ –

دمگی مردماں ٹی بی پی ءَ گوشتگ اُرش پوج ءِ پندی کارندھانی سر ءَ ھما وھد ءَ کنگ بیتگ کہ آ کاروانانی پھزداری ءَ وتی ھالیگیں سنگراں روگ ءَ بیتگ اَنت-

اُرش ءَ پوج ءَ جانی تاوانانی ھال اِنت بلے داں انگت ءَ اے درگت ءَ واکداراں اھوال نہ داتگ اَنت-

زانگ بہ بیت بلوچستان ءِ دگہ ھندانی ڈول ءَ گوادر شھر ءُ کش ءُ گوری ھنداں بلوچ سلاہ بندیں گل پرکار اَنت-

ھمے سال ءَ بلوچ لبریشن آرمی ءَ یک ٹوھیں اُرشے گوادر ءِ شھر ءَ گچینی جاھاں پاکستانی چیریں ادارھانی کارگس نشانگ کتگ بیتگ ات-

آ اُرش بی ایل اے ءِ مجید بریگیڈ ءَ کتگ ات کہ آئی ءِ ھشت فدائیناں بھر زرتگ ات- بی ایل اے ءِ جارکش جیئند بلوچ ءَ گوشتگ ات کہ اے اُرش گل ءِ ‘آپریشن زرپھازگ ’ ءِ چارُمی بھر ءِ درچ ءَ کتگ –

زانگ بہ بیت آپریشن زرپھازگ ءِ درچ ءَ بی ایل اے ءِ مجید بریگیڈ ءَ ایشی ءَ پیش گوادر ءَ سَے اُرش کتگ بیتگ اَنت- چریشاں سی پیک ءُ دگہ پروجیکٹساں ھواریں چینی انجینئر، زرکار نشانگ کنگ بیتگ اَنت-

روکپتی بلوچستان ءِ دمگ بمپور ءَ ناشناسیں مردماں تیرگواری کنان ءَ یک مردمے کُشتگ-

گیشیں اھوالانی رد ءَ بمپور ءَ ناشناسیں مردماں تیرگواری کنان ءَ جنید ایراندوست جھمنند ایرانشھر کشتگ-

اھوالانی رد ءَ جنید وتی گاڑی ءِ سر ءَ بمپور ءَ روگ ءَ بیتگ کہ راہ ءَ ناشناسیں مردماں آئی ءِ سر ءَ تیرگواری کتگ ءُ کشتگ-

زانگ بہ بیت روکپتی بلوچستان ءَ ھمک روچ اے دابیں وئیل پیش آیگ ءَ اَنت کہ اود ءَ لس مردم ناشناسیں مردمانی نشانگ بوگ ءَ اَنت-