من اسلم ءِ اھد ءَ زندگ آں
نبشتہ کار :سلمان ھمل
رجانکار : بیبگر بلوچ
دی بلوچستان پوسٹ
بندپتر لھتے مردم ءِ گیرآرگ ءَ پھر بند ایت کہ آیاں بندپتر گوں وتی ھوناں نبشتہ کُتگ۰اڑ ءُ جنجالانی کبول کنگ ءُ دیم ءَ جنزگ ءِ ھُب بہ بیت گڑا ھچ کار نا ممکن نہ اِنت۰من وتی اے گپ ءِ منارینگ ءِ واست ءَ اگاں منانک بدی آں گڑا من ءَ دور روگ ءِ ھچ زلورت نہ انت۰
برے برے اے بارو ءَ جیڑ آں کہ آسن چون آس ءَ کپ اِیت ءُ سُھر جوڑ بیت۰ انسان چون اڑ ءُ جنجالانی دیم ءَ اوشت اِیت ءُ شرپمند بیت۰ نا ممکن چون ممکن بیت۰ جاور چون وتی دست کنگ ءُ پہ وت کارمرز کنگ بنت۰ لوٹ ءُ منزل چون چہ درستاں گیش ارزشت دیگ بنت۰ دیوانگ چون ساہ ءَ دست ءِ دل ءَ ایر کن انت ءُ سپر ءَ در کپ انت۰ ھر چیز ءِ تماہ واھش ءُ وشی ءَ چہ گستا کئے کدی ءُ کج ءَ ءُ چون کنٹگانی سر ءَ سپر کنت۰ دور دور ءَ داں جیڑگ ءَ پد ھیالانی منزل نزیک بیت۰انچوش نزیک کہ چہ وت سندگ نہ بیت گڑا آ منزل اھد اسلم بیت۰
بلوچستان بلوچ ءُ گھگیری وتی تہ ءَ وت یک بندپترے ءُ اے بندپتر ءِ تہ ءَ ھم بندپتر دست کپیت کہ آ بے مٹ انت کہ آ شموشگ نہ بنت۰
مروچی ھما مردم ءِ باور ءَ منشتہ کنگ ءَ جیڑگ ءَ ات آں کہ گوں آئی ءَ بس یک رندے دو ھزار سینزدہ ءَ دوچار کپتگ ات آں۰ آ وھد ءَ سیاسی جنگ ھم ماں آزمان ءَ سر ات ۰ ھر گورا گر ءُ چیلّ ات۰ ھرکس باج برگ ءَ پہ جیڑگ ءَ ات ءُ مئے دیوان ءَ ھم باوست ھمے سرھال ات۰ نزان آں من اے دیوان ءَ چے گشتگ ات بلئے آ گوں نرمیں گالوارے ءَ وتی ھیالاں درشانگ کنگ ءَ ات ءُ ھمک جست ءِ پسو ءَ شوکیں وڑے ءَ دیگ ءَ ات۰ بلے مروچی سماء بیت کہ آ بےمٹ ات۰پرچا آ دیوان نیم شپ ءَ سرجم بوت۰ پرچہ چرائی گیش دربرگ ءِ موہ چہ دست ءَ دراتک۰
مروچی آئی ءِ بارو ءَ نبشتہ کنگ ءَ چینکدر آ کارست ءِ گون ءَ انساپ بیت ۔ من گوں دلجمی ءَ گشت کن آں کہ آئی ءِ کرد ءِ دیم ءَ منی اے نبشتانک ناسرجم انت ءُ من گوں آ کارست ءَ انساپ کت نہ کن آں۰ آ مرد اسلم بلوچ انت کہ آئی ءِ بارو ءَ نبشتہ کنگ ءِ جھد ءَ آں۰ اسلم بلوچ انچیں کارستے کہ اگاں کسے گوں ایمانداری ءَ ند ءَ بُزور اِیت ءُ اسلم جان ءِ بارو ءَ نبشتہ کنگ ءَ بہ نند ایت گڑا دپتر ءِ تاک ھم کم بنت۰
جنز ءِ بندات ءَ یک سپائی ءِ دروشم ءَ کار کنوکیں اسلم گھبودی ءِ ھما منزلاں سر بوت کہ کسی بھت ءَ نہ بوتگ انت۰زمہ واری ءُ زانت ءَ اسلم بلوچ زوت بلوچ چاگرد ءِ دیم ءَ یک کمانڈرے ءِ دروشم ءَ زاھر کُت ءُ کار ءِ ھُب ءَ آ ھمک ھمراہ ءُ سنگت ءِ دل ءَ جاہ دات۰
اسلم جان ءِ ھستی ءِ یک ارزشتداریں درے ایش انت کہ آ سلاھبندیں جھد ءِ تہ ءَ یک سپائی ءِ دروشم اتک ءُ جنرلے ءِ دروشم ءَ شُت۰اسلم ءَ بگرداں جنرل اسلم ءِ سپر ءَ الم آئی ءَ بازیں چست ءُ ایرے دیستگ۰جھد ءِ بنداتی جاوراں بگرداں نزوری ، سودا بازی کمپرومائز درست آئی ءَ گوں وتی چماں دیستگ انت ءُ نو آ یک مھکمیں رھشونے ءِ دروشم ءَ دیم ءَ اتکگ۰جنگانی وھد ءَ مدامی ئیں رھشون نہ بیت۰ جنگ وت رھشون جوڑ کنت ءُ ھمے وڑا جنرل ھم جنگ ءِ جوڑ کتگیں رھشونے پمیشکہ آ چہ آ دگہ رھشوناں جتائیں جاھے ءِ واھند انت۰آ چہ جنگی رپک وڑ ءُ پئیم ءُ رھبنداں بے کساس سرپد ات ءُ جاورانی ھساب ءَ آ سیاسی چست ءُ ایراں ھم پوہ ات۰
جنگ ءُ سیاسی چست ءُ ایرانی سر ءَ دزرسی ایمانداری ءُ پیسلہ زورگ ءِ بودناکی ھم آئی ءِ گورا است ات۰مروچی ھم من وھدے آئی ءِ زرتگیں پیسلھانی درگت ءَ جیڑ آں تاں جیڑگے ءَ کپ آں کہ آ جاوراں وھدے ما گوں یکے دومی ءَ نندگ ءَ ساڑی نہ ات ایں ، باوستاں یکے دومی ءِ کارانی جاہ ءَ یکے دومی جند ءُ ارش پولنگ کتگ ات ءُ برے برے نوبت بھتام ءُ تژن ءَ ھم سر بوت انت ۔اے وھد ءَ ما تپاکی ءُ یکجائی ءِ اوست وَ داشتگ ات بلئے چوش زوت بلوچ تپاک بیت ءُ تپاکی ءَ گوں کاراں دیم بارت اے اوست نہ داشتگ ات۰
بلے اسلم جان ءَ دورچاری کت ءُ توکل کت کہ اچ مارا ھر وڑیں ردی یے بوتگ ما وتی ردیاں منّ ایں ءُ نو مارا ھوار ءُ تپاک بوگی ایں ۰ گواچن اے کار چہ یک نیمگے ممکن نہ ات دومی نیمگ ءَ ھم ھمے ھیال ات بلے اسلم جان ءَ وت گام زرت وتی ردی منّ ات انت ءُ گپ ءُ باوست ءِ شور دات۰اے کریڈٹ اسلم جان ءَ دیگ بیت۰
جنز ءُ جنگ ءِ تہ ءَ ترندی آرگ ءِ واست ءَ اسلم جان ءِ شپ ءُ روچانی جھد ھچ وڑیں توسیپ ءِ درکار نہ انت ءُ نیکہ منی اے پرشتگیں گال گوں آیاں انساپ کت کن انت انچوشکہ من ساری ءَ گشتگ ات۰
بلے اے ھم راستی یے کہ وھدے ھر گورا دلپروشی ات ، راج ، سنگت ءُ چاگرد ءِ درست اوشت ءِ آماچ ات انت گڑا اے اوشت ءِ پروشگ ءِ کار ھم اسلم جان ءَ وتی کوپگاں زرت ءُ جند ندریانی درچ برجم داشت ءُ امبری پیسلہ ریھان ءَ کت ءُ گچین اسلم جان ءَ۰ اے یک چونیں ساھتے بیت کہ یک پتے ءِ واست ءَ کہ وتی جوانیں بچ ءَ ٹریننگ دیگ ءَ انت یک انچیں ارشے ءِ واستہ کہ چہ اود ءَ واتری ھم نیست۰ اسلم جان ءَ بالاچ ءِ کئول عملی دروشمے دات کہ ما ون وے ءَ سپر کنگ ءَ ایں۰ ون وے ءِ سرا سپر کنگ ءِ بزانت شھیدی ءِ منزل ءَ سر بوگ۰
اے ساھت ءَ ھما کس پوہ بوت کنت کہ آئی ءَ گوں گلزمین بلوچ راج ءَ ءُ وتی لوٹ ءَ گوں بے کساس ھدوکنانی بہ بیت۰تقریباً اے ساھت چارگ ءِ قابل بوتگ کہ زمین زادگی ءِ سرا اوشت اِیت۰آئی ءِ واست ءَ اے ساھت ءَ چہ زیبناک تریں ساھت دگہ کجام بیت کہ زمین ءِ وامانی دیم ءَ وتی بچ ءِ ھوناں دیگ ءَ انت۰
اسلم جان ءَ کسان کسانیں جیڑہ یکّر کت انت ءُ مزنیں جیڑھانی سر ءَ چم ایر کت انت۰آ جیڑہ سرزمین ءِ پھازگ ءُ راجی وتواجھی ات ءُ اے تژن ءُ شگان اے جیڑہ آ وھد ءَ ھم است ات انت ءُ دیمتر ءَ ھم بنت بلئے مارا اسلم ءِ شھزانتی زورگی انت ءُ اے جیڑھانی ھستی ءَ پد ھم گوں بیسہ ءَ جنگ ترندی ءَ دیم ءَ برگی انت ءُ اے جیڑہ توجیل کنگی انت۰
مروچی ھم اے جنگ گیش ءَ گیش ترندتر کنگی انت۰ اے درگت ءَ جیڑگی انت شور ٹھینگی انت ءُ جنگ ءِ برجم دارگ ءَ گوں ما اسلم ءَ سھرچکیں دروت شکسات کن ایں۰
اسلم بلوچ ءَ گوں وتی کرد ءَ منارینتگ رھشونے پرچہ کہ میکسویل لا آف لیڈر ءِ تہ ءَ نبشتہ کنت کہ لیڈر ءِ واست ءَ المی انت کہ آئی سرا مردم بیسہ بدار انت ءُ اے بیسہ چہ کرد ءَ گرگ بیت ءُ اسلم جان ءَ اَملی دروشم ءَ کار کتگ ءُ تنظیمی سنگتانی ھمرائی ءَ مئے تہ ءَ ھم بیسہ اش زند کتگ۰ آئی ءَ وتی جند وتی گس ءُ زھگاں چہ پیسر جنگ ءِ درگت ءَ جیڑاتگ ءُ گس ءِ لوٹاں چہ ساری جنز ءِ جنگ ءِ لوٹانی سرجم کنگ ءَ پہ تتکگ پمیشکہ مروچی ھم آ مئے دل ءُ مجگانی تہ بادشاھی کنگ ءَ انت۰
ھمے کتاب ءِ تہ ءَ دیمتر ءَ اے ھم نبشتہ انت کہ رھشونے ءِ واست ءَ ھال اھوال ھم المی انت ءُ اسلم ءَ اے لوٹ ھم سرجم کتگ ات۰ آئی ءَ گوں ھرکس ءَ ھال اھوال کتگ ات۰جونئیر ءُ سینئر ءِ تپاوت آئی ءَ بس زمہ واری ءِ سیمسراں داں داشتگ ات۰ سنگتانی ھال ءَ آ مدام سرپد ات ءُ اے یک لیڈرے ءِ واست ءَ المی انت۰
اسلم جان ءِ تہ ءَ تھنا یک لیڈرے ءِ بودناکی ناں بلکیں جنگی بودناکی ھم ھست ات انت۰بقول چی گویرا مارا گوں دژمن ءَ ناں وت بے کساس نفرت کنگی ایں بلکیں وتی ھمراہ ھم نفرت کنگ ءِ درونت دیگی انت تاکہ مارا دژمن ءِ سرا بزگ مہ کنت ءُ دژمن ءِ مقابلہ ءَ کت بکن ایں۰اسلم جان ءَ ھم ھمے درونت داتگ ءُ وت ھم امل کتگ ءُ پیشداشتگ۰
من مروچی وھدے اے نبشتانک ءَ نبشتہ کنگ ءَ آں من ءَ پھر انت کہ من اسلم ءِ اھد ءَ زندگ آں ءُ بژنیگ آں ھم کہ من اسلم ءَ گوں بس یکرندے دوچار کپت آں۰من گوں جنرل اسلم ءَ باز وھد گوازینگ لوٹ اتگ ات ، باز دربرگ ءِ واھش داشتگ ات بلئے جنگ ءَ موہ نہ دات پد ءَ ھم من ءَ پھر انت کہ من وتی جنرل ءِ اھد ءَ اے کاوران ءِ بھر آں کہ آئی ءِ منزل یک وتواجھیں ڈیھ ءُ وتواجھیں چاگرد انت ءُ جنرل ءِ ھمراہ مئے رھشونی ءَ کنگ ءَ انت۰
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت–
