وداریگیں مات
ٹی بی پی شونگال
بلوچستان ءَ ھمک گوزوکیں روچ ءِ ھمراھی ءَ زورانسری بیگواھیاں گیشی آیگ ءَ انت، ایشی ءِ ھلاپ ءَ سرجمیں بلوچستان ءَ یکشل ءَ زھرشانی ھم برجاہ انت- چہ کیچ ءِ دمگ ھوشاپ ءَ زمان جان ءُ عبدالحسن ءِ کھول آیانی یل کنائینگ ءِ ھاتر ءَ سی پیک شھدگ ءَ زھرشانی نندانک دیگ ءَ انت ، ھمے وڑ راشد ھسین ءِ کھول ءَ ھب ءَ زھرشانی کتگ-
راشد ھسین متھدہ اَرب امارات ءَ زورانسری بیگواہ کنگ بیتگ ءُ کانون ءِ ھلاپ ءَ پاکستان ءَ آرگ بیتگ، اود ءَ داں انگت ءَ ھچ آمیدگس ءَ پیش کنگ نہ بیتگ – راشد ھسین ءِ پیر ءُ آجازیں مات شش سالاں وتی زھگ ءِ یل کنائینگ ءِ ھاتر ءَ زھرشانی زرمبشتاں ھوار بیتگ ءُ توار چِست کنگ ءَ اِنت-
بلوچستان ءَ سیاسی باسک ءُ نودربرانی زورانسری بیگواھی چہ بیست سالاں برجاہ اِنت- بلے گوستگیں لھتے سالاں چہ پاکستان ءَ در بلوچ سیاسی باسک نگاھانی چیر ءَ بیتگ انت- چہ بلوچستان ءَ ھزاراں سیاسی باسک جنگ آماچیں جاورانی سبب ءَ درانڈھاں شتگ اَنت، بلے آ ڈیھ بلوچ جد ءُ جھد ءَ ھواریں مردماں پاکستان ءِ دست ءَ دیگ ءُ آیانی زندماناں ناگیگیں جاورانی دیمپان کنگ ءَ اَنت-
راشد ھسین ءِ مات ءَ ھوار سدانی بلوچ مات دردناکیں زندگی گوازینگ ءَ اَنت ءُ وتی زھگانی یل کنائینگ ءَ زھرشانی ءَ ابید دگہ راہ گندگ ءَ نہ اَنت- پاکستان ءِ آمیدگس ءُ انسانی ھکانی کمیشن زورانسری بیگواھیں مردمانی کھولاں انساپ دیگ ءَ بے سوب بیتگ ءُ بلوچ مات ترندیں زھرشانی ءَ ھم وتی دوستیگینانی یل کنائینگ ءَ یکیں راہ ءَ چاریگ اَنت-