TBP Balochi

چہ ھب چوکی ءَ زورانسری آوار جنی ءِ نشانگ کنگ بیتگیں زبیر بلوچ ءِ یل کنائینگ ھاتر ءَ آئی ءِ کھول ءُ شھریانی یکشل ءَ زھرشانی برجاہ ءَ اِنت- تُرندیں سارتی ءَ اَبید کھول ءَ گوستگیں ھشت کلاکاں چہ کراچی ، شال شھدگ ھب چوکی ھند سر ءَ پہ گاڑیانی واستا بند کتگ ، چریشی ءِ سبب ءَ چہ ھزارانی گاڑی ءُ مساپر گٹّ اَنت-

واکدار نیمگ ءَ چہ گپ دیوان واستا ساڑی بیگ ھال اِنت، بلے زبیر بلوچ کھول ءَ آئی ءِ زوت یل کنائینگ ءَ تاں زھرشانی ھلاس کنگ انکار کتگ-

زھرشانی کنوکانی گْوشگ اِنت کہ زورانسری آوار جنی ءِ یک بلاھیں انسانی ھکانی ھلاپ ورزی یے ءُ آ انساپ ءِ ھاتر ءَ ھرچ وڑیں گامگیج بزور اَنت-

زبیر بلوچ ، کہ بلوچستان شھدربرجاہ ءَ چہ پولیٹیکل سائنس ءَ گریجویٹے ءُ اِھوالکاری پڑ ءَ ھم ھمگرنچ بیتگ، گوستگیں شپ ءَ ھب چوکی ءَ آئی ءِ لوگ ءَ چہ پوج ءَ آوار جتگ ءُ بیگواہ کتگ-

کھول رِد ءَ زبیر بلوچ یک مھنتی نودربرے ءُ ورنا ایں اِھوالکارے بیتگ کہ گوست ءَ دمگی ھالتاک “انتخاب ” ءَ چہ ھم سیادی بیتگ-

زبیر بلوچ ءِ کھول ءَ راج ءَ چہ دزبندی کتگ کہ آ اے زھرشانی ءَ بھر بزور اَنت ءُ وتی توار ءَ اے ایردستانی ھک ءَ چست بہ کن اَنت کہ آ ریاستی ادارھانی نیمگ ءَ چہ نشانگ کنگ بیگ ءَ اَنت-

زھرشانی کنوکاں تچک کتگ کہ اگاں زبیر بلوچ زوت یل کنگ نہ بیت گُڑا زھرشانی ءَ گیش تُرند کنگ بیت-

زھرشانی ءَ نشتگیں مردمانی گْوشگ اِنت کہ آ اے سارتی ءَ ھم پُشت کنزوک نہ اَنت ءُ انساپ ءِ مول ءُ مراد ءَ تاں ھرچ ھد ءَ رو ایں-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ءُ ھشت دسمبر ءَ شمبے ءِ روچ ءَ ساھت ھشت ءُ نیم ءَ کیچ ءِ دمگ تمپ، ملانٹ ءَ برجاھیں زورگریں پاکستانی پوج ءِ سر ءَ اُرش کتگ- اُرش ءَ مزن ءُ نوکیں سلاہ کارمرز کتگ چریشی ءِ آسر ءَ دُژمن ءِ دو کارمند ٹپی بیتگ اَنت-

جارکش ءَ گوشتگ کہ پروش وارتگیں دُژمن ھرچ اُرش ءَ پد لَس مھلوک ءَ نشانگ کنت وتی مردماں دلبڈی دیگ ءِ جُھد ءَ کنت بلے راجدپتر ءِ تاک ءَ اے گپ پدر اِنت کہ جھان ءِ کجام ھما زورگریں ریاست زمین ءِ بچّاں ھرچ پڑ ءَ پروش ءِ دیمپان کتگ ءُ مارا ستک اِنت کہ زوت یا دیر زورگریں پاکستانی پوج بلوچستان ءَ چہ دراھگ ءَ لاچار بیت-

جارکش ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ سرڈگار ءِ آجوئی ءِ تاں زورگریں پاکستانی پوج ءَ نشانگ کنت-

چہ ھب چوکی ءَ زورانسری آوار جنی ءِ نشانگ بیتگیں اِھوالکار زبیر بلوچ ءِ کھول ءُ بلوچ یکجھتی کمیٹی ھب زون ءَ یکجاھی پریس کانفرنس کنان ءَ گْوشتگ کہ زورانسری آوار جنی انچیں ٹپی کہ آئی ءَ ھرچ بلوچ لوگ اسرمند اِنت- کسے ءِ برات، کسے ءِ چک، کسے ءِ پت ءُ اے ریاست ءِ آزارجاھاں بلوچ بیگ ءَ سزا ورگ ءَ اَنت – مروچی ما شمئے دیم ءَ ایں وتی درداں گوشدارگ ءَ اَتکگ ایں- وھدے کہ بلوچستان ءِ جتاجتائیں دمگاں اے زُلم ءِ ھلاپ نندانک برجاہ ءَ اِنت-

آیاں گْوشتگ کہ کلات ءَ سید اختر شاہ کھول ءَ آئی ءِ یل کنائینگ ھاتر ءَ نندانک ءَ نشتگ اَنت، ءُ تربت ڈی چوک سر ءَ ظریف بلوچ ءِ کھول مردم اے درکانودی کوش ءِ ھلاپ ءَ انساپ لوٹ کنگ ءَ اَنت-

کھول ءَ گْوشتگ کہ زبیر ء الطاف بلوچ کہ تجابان، تربت ءِ جھمنند ءُ بلوچستان ءِ شھدربرجاہ ءَ چہ پولیٹیکل سائنس ءَ گریجویٹے، اِھوالکار پڑ ءَ ھمگرنچ اِنت موکلانی واستا ھب چوکی ءَ اتکگ بیتگ گوستگیں شپ ءِ ساھت سے ءَ سلاہ بندیں مردم لوگ تہ ءَ پُترتگ اَنت آ زورانسری چست کتگ ءُ برتگ-

کھول ءَ گْوشتگ کہ ما دلجمیں اے کار ریاست ءُ اشی ءِ ادارھانی نیمگ ءَ کنگ بیتگ، ءُ مارا سک تُرس اِیت کہ زبیر بلوچ ءَ ھم مچی سزا دروشم ءَ نشانگ کنگ ءَ اِنت، ھمے وڑ کہ بلوچستان ءَ دگہ زورانسری آوار جنی ءُ درکانودی کوش وئیلاں گندگ بیگ ءَ اَنت-

آیاں گوشتگ کہ بلوچستان ءَ زورانسری آوار جنی ءِ گیش بیوکیں وئیل ءَ مارا تُرس اِنت کہ زبیر بلوچ ءَ ھم تاوان دات کن اَنت- اے بیت نہ کنت کہ ریاست مئے دوستناکاں لٹ کُٹ بکنت ءُ زورانسری بیگواہ بکنت ءُ مارا بے توار بہ بہ ایں- مئے لوٹ تچک اِنت: زبیر بلوچ ءَ زوت یل بہ کن اِت-

کھول گوشگ اِنت کہ ما ھب چوکی ءَ بھوانی بھائی پاس چوک سر ءَ نندانک ءَ نشتگیں، ءُ تاں ھما وھد ءَ زھرشانی برجاہ بیت دانکہ مئے لوٹ منّگ نہ بنت- ریاست ءَ سے روچ ءِ وھد داتگ کہ زبیر بلوچ ءَ پہ سلامتی یل بہ کن اِت، اگاں کاں زھرشانی تُرندتر کنگ بیت ءُ ترندیں گامگیج زیرگ بیت-

کھول ءَ دیمتر ءَ گْوشتگ کہ راج ءَ چہ دزبندی کن ایں کہ زورانسری آوار یک کھولے ءِ نہ اِنت، سرجمیں راج ءِ جیڑہ اِنت- اگاں مروچی بے توار بہ بہ ایں گُڑا باندا دگہ یکے ءِ چُک، برات یا کہ پت بیگواہ بیت- مارا یکجاھی کنگ لوٹ اِیت وتی توار چست کنگی اِنت دانکہ ریاست ءَ اے کلوہ دات بہ کن ایں ما اے زُلم ھلاپ ءَ بے تواری ءَ نہ نند ایں-

تربت ءِ ھند آپسر بلوچی بازار ءَ ناشناسیں سلاه بندیں مردماں پاکستانی لشکر ءِ ھستیں بنجل ءِ سر ءَ اُرش کتگ-

گیشیں اھوالانی رد ءَ ناشناسیں سلاہ بندیں مردماں مروچی بیگاہ ءَ تربت آپسر بلوچی بازار ءَ پاکستانی پوج ءِ بنجل اُرش ءِ نشانگ کتگ-

دمگی مردمانی رد ءَ اُرش ءِ وھد ءَ ترندیں تیرگواری ءُ تراکانی توار اشکنگ بیتگ انت اُرش ءَ پد پورسز ءِ سرویلنس ڈرون ھم بال بیتگ انت-

اُرشکاراں پشت مانداتگ ءُ شتگ انت ءُ دمگی مردمانی رد ءَ اُرش ءَ پورسز ءَ جانی تاوانانی دیمپانی انت-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل پرکار انت بلے داں انگت ءَ اے اُرش ءِ زمہ واری کس ءَ پہ وت نہ زرتگ-

گوستگیں روچ ءَ چہ پاکستانی لشکر ءِ دست ءَ کشگ بیتگیں ظریف بلوچ ءِ کھول ءَ یک پریس کانفرنسے کتگ ءُ گْوشتگ کہ ما بلوچ راج اے وھد ءَ راجدپتر ءِ یک ھنچیں وھدے ءِ سر ءَ اوشتاتگ انر کہ ما وتی دوستیں مردمانی لاشاں بس چِست کنگ ءَ انت – بلے ما دلپدردی ءِ درشان کنگ یل داتگ ۔ مئے روایتی دروشم ءُدود ءُ ربیدگ اَچ ما پچگرگ بیتھ پرچا کہ ما نوں ایوک ءَ جُست گرگ ءَ ایں-

آئی ءَ گْوشتگ: “شما قلم ءِ وارس اِت، من چہ شما دزبندی کن آں کہ نبشتہ بہ کن اِت کہ بلوچ نوں مردگانی سر ءَ پرس نہ دار اِیت، وتی نزیکیں مردمانی کوش ءَ جُست کنت ءُ انساپ لوٹ اِیت۔”

آئی ءَ گْوشتگ:جمعہ ءِ شپ ءَ تمپ ءَ مئے لوگ ءَ ایف سی ءِ کارندھاں چھاپہ جتگ ءُ ظریف بلوچ پہ زور بیگواہ کتگ۔ دومی روچ ءَ آئی ءِ ٹپ ءُ ٹوریں لاش جنگل ءَ دور دیگ بیتگ۔ وھدے ما آئی ءِ لاش ءَ تربت ءَ پہ پوسٹ مارٹم ءَ آرگ ءَ بوتگ انت گڑا ایف سی ءَ تمپ ءَ کرفیو جتگ ءُ درستیں دگ بند کتگ انت۔

کھول ءِ گشگ ءِ رد ءَ ما بازیں کلاکاں دارگ بوتگ انت ءُ وتی لاش ءَ تابوت ءِ دیم ءَ برگ ءَ دارگ بیتگ انت ءُ سکیں آزار ءُ اذیت ءِ آماچ بوتگیں گُڈسر ءَ ما وتی دوستیں مردم ءَ بے انساپ ءَ کل ءُ کسارت کنگ ءَ مجبور بوتگ انت ءُ مرچی ما وتی کانونی ھکانی ھاتر ءَ زھرشانی کنگ ءَ ایں-

پریس کانفرنسے ءِ وھد ءَ کھول ءَ گْوشتگ کہ ما اے گپ ءَ پدّر کنگ لوٹ ایں کہ ما پاکستانی آئین ءُ کانود ءِ رد ءَ وتی ھکّانی لوٹ ءَ کنگ ءَ ایں بلے مئے سر ءَ ایف سی ءِ کارندھانی زلم ءُ زوراکی برجاہ اِنت پرچا کہ آ وت ءَ کانود ءَ چہ برز زان اَنت۔ ھما کانون کہ زوراکاں گیشتر زوراک ءُ نزوراں گیشتر نزور کنت انت۔

آئی ءَ گْوشتگ کہ ظریف بلوچ ءِ جند ءِ سر ءَ ٹپّ فوج ءِ زُلم ءُ زوراکیانی کسّہ ءَ اَنت۔ ایشانی لاش سُتکگ، زبان بر اتگ ءُ آئی ءں سرا ٹارچر ءِ زاہریں نشانی پر بیتگ انت۔ما اے گپ ءِ ہم ھیال ءَ نہ کنیں کہ آ زندگ بوھگ ءِ وھد ءَ کجام ھد ءَ ٹارچر کنگ بوتگ اے درد مارا سرجمیں زند ءَ واب ءَ نہ دنت۔ اے ٹپ مارا لشکر ءِ زلم ءُ زوراکیاں چہ نپرت کنگ ءِ سکین ءَ دنت کہ اے لشکر کہ وردی پوشیں انسانے نہ اَنت بلکیں انسان ءِ دروشمیں درندگ انت، مئے راج ءِ ھر لوگ ءَ اے کلوہ ءَ سر کن ات کہ ما انسال لوٹ ایں.

کھول ءِ مردماں گْوشتگ کہ آ وتی زھرشانی ءَ ھما وھد ءَ نند انت داں اے ایف سی ءِ کارندہانی ھلاپ ءَ کانودی کارروائی کنگ نہ بیت۔ مئے زھرشانی گیش ءُ گیوار بیت۔ باندا دوشمبے ءَ ما تربت ءَ دگ بند ءُ شٹر ڈاؤن ھرتال ءِ لوٹ ءَ کن ایں ءُ چہ وتی راج ءَ دزبندی کنیں کہ اے زھرشانی ءِ سوبمند کنگ ءَ وتی کرد ءَ پیلو بہ کن اَنت۔

کلات ءَ کراچی ءُ شال ءِ بُنجاھی شھدگ ءِ سر ءَ مروچی دومی روچ ءَ ھم نندانک برجاہ اِنت- زھرشانی ءَ زالبول، زھگ ، کماش ءُ نادُراھیں مردم ھوار اَنت-

اے زھرشانی نندانک زورانسری بیگواہ کنگ بیتگیں اختر شاہ ءِ یل نہ کنگ ءِ ھلاپ ءَ نندانک دیگ بیگ ءَ اِنت-

زھرشانی کنوکانی گوشگ اِنت کہ آ ھم سارتی ءُ دلسیاھی ءَ آماچ اَنت بلے ریاست ءِ بے پرواھی ءَ آ لاچار کتگ اَنت کہ دگ ءَ بند بکن اَنت ءُ زھرشانی بہ کن اَنت-

آیانی گْوشگ اِنت کہ انتزامیہ ءِ نیمگ ءَ چہ سُھب ءَ چہ بیھار دیگ ءَ اَنت کہ اگاں نندانک ھلاس نہ کتگ گُڑا زالبولیں فورس ءَ چہ شھدگ ءَ پچ کنائیناں-

زھرشانی کنوکاں تچک کتگ کہ توری لٹ ءُ کُٹ یا دزگیری، دانکہ سید اختر شاہ یل کنگ نہ بیت- نندانک برجاہ بیت انت-

بلوچستان ءِ واپاری شھر ھب چوکی ءَ پاکستانی پوج ءَ ورنایے دزگیر کنگ ءَ پد بیگواہ کرتگ- بیگواہ کنگ بیتگیں ورنا ءِ پجار زبیر بلوچ ء الطاف ءِ نام ءَ زانگ بیتگ کہ اھوالکاری ءِ تک ءَ توں بندوک اِنت-

زورانسری بیگواہ کنگ بیتگیں زبیر ءِ گوھار ءَ گوشتگ گوستگیں شپ ءِ ساھت سَے ءَ ویگو گاڑی ءَ سواریں سلاہ بنداں لوگ ءِ سر ءَ بیڑ برتگ ءُ منی برات دزگیر کتگ ءُ برتگ-

زورانسری بیگواھی ءِ ھلاپ ءَ کھول ءَ زھرشانی کنان ءَ کیچ تجابان ءَ سی پیک شھدگ ءِ سر ءَ نندانک داتگ ءُ بند کتگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ اے درگت ءَ گوشتگ بلوچستان ریاست پاکستان ءِ ھما زیردستیں جاہ انت کہ اود ءَ آئین ءُ کانون ءَ ابید زوراکی ءُ زورانسری برجاہ اَنت ءُ بلوچ نسل کشی پالیسیانی توک ءَ روچ پہ روچ گیشی آرگ بیگ ءَ اِنت-

آئی ءَ گوشتگ ظریف بلوچ درکانودی آمیدگس ءَ کُشگ ءِ ھلاپ ءَ تربت ءَ شھید فدا چوک ءَ زھرشانی برجاہ اِنت-

آئی ءَ دیمتر ءَ گوشتگ کلات ءَ زورانسری آوار جنی ءِ آماچیں اختر شاہ ءِ کھول ءَ گوستگیں چِل ءُ ھشت کلاں چہ منفی دہ ڈگری ءِ ترندیں سارتی ءَ ھائی وے ءَ زھرشانی نندانک داتگ ءُ نشتگ اَنت-

آئی ءَ گوشتگ کہ ھمے وڑ گوستگیں شپ ءَ ریاستی پورسز ءُ چیریں ادارھانی کارندھاں ھب چوکی ءَ بلوچستان یونیورسٹی ءِ نودربر زبیر بلوچ زورانسری آوار جنی ءِ نشانگ کتگ – آئی ءِ کھول ءَ ھوشاپ ءِ ھند ءَ نندانک داتگ ءُ نشتگ اَنت-

آئی ءَ گوشتگ سرجمیں بلوچستان اے وھد ءَ وتی سرڈگار ءِ سر ءَ زندگ بوگ ءِ بنکی آسراتیانی واستا زھرشانی کنگ ءَ اَنت-

زانگ بہ بیت زبیر بلوچ یک اھوالکار ءُ نبشتہ کارے کہ آئی ءِ سیادی گوست ءَ بلوچستان ءِ نامداریں روتاک انتخاب ءَ بیتگ –

زرباری کوریا ءَ بالی پٹ ءَ یک سد ءُ ھشتاد ءُ یک مردماں بروکیں بالیگ وئیل ءِ آماچ بیتگ چریشی ءَ کم چہ کم ھشتاد ءُ پنچ مردم بیران بیتگ انت-

زرباری کوریا ءِ ھال سرکنوکیں ادارہ ءِ رد ءَ بالیگ ڈیھ ءِ زرباری روکپتی دمگ موان انٹرنیشنل ایئرپورٹ ءَ رن وے ءَ لگوشتگ ءُ دیوال ءَ لگ اتگ-

نیشنل فائر ایجنسی ءِ رد ءَ بیران بیتگینانی توک ءَ ھشتاد ءُ پنچ مردمانی تہ ءَ چِل ءُ شش زالبول ءُ سِی ءُ نُھ مردین ھوار اَنت-

بیرانیانی توک ءَ گیش بوگ ءِ گمان ھست اِنت گیشترین مردمانی پٹ ءُ پول بوگ ءَ انت-

اھوالانی رد ءَ جیجو ایئر تیارہ تھائی لینڈ ءِ شھر بنکاک ءَ واتر روگ ءَ بیتگ ءُ لینڈگ ءِ وھد ءَ وئیل ءِ آماچ بیتگ-

روکپتی بلوچستان ءَ جتا جتائیں وئیلاں چار مردم بیران بیتگ اَنت-

گیشیں اھوالانی رد ءَ زاھدان ءَ یک کسان سالیں زھگے ءَ وتکشی کتگ ءُ وتی زند وتی دستاں گوں ھلاس کتگ-

اھوالانی رد ءَ سیزدہ سالی ئیں زھگے ءَ وتی لوگ ءَ ساد گٹ ءَ کتگ ءُ وت ءَ کشتگ- دگہ گیشیں اھوال زانگ نہ بیتگ اَنت-

ھمے وڑ ءَ ایرانشھر ءَ ناشناسیں مردماں تیرگواری کنان ءَ یک مردمے کُشتگ-

کُشگ بیتگیں مردم ءِ پجار عبدالمجید درخشان پنام ءِ ارمان ء اکرم جھمنند ایرانشھر ءِ نام ءَ زانگ بیتگ-

ھمے وڑ سیب و سوران ءَ ناشناساں یک مردمے تیرباران کتگ ءُ کشتگ-

اھوالانی رد ءَ سوران ءِ شھر ءَ ناشناسیں مردماں تیرگواری کنان ےَ نوید پرکی نامیں مردمے کشتگ-

ھمے وڑ ءَ ایرندگان ءَ یک مردمے ءِ لاش دزکپتگ-

اھوالانی رد ءَ ھاش ءِ دمگ ایرندگان ءَ کوھنیں دگ ءَ یک مردمے ءِ دزکپتگ-

لاش ءِ بارو ءَ دگہ گیشیں اھوال زانگ نہ بیتگ انت ءُ کوھن انت کہ آئی ءِ گوشت چہ ھَڈاں گیش اتگ –

ظریف عمر ءِ کوش زوراکی ءُ گوستانک ءِ پالیسیانی دْرچ اِنت- آل پارٹیز کیچ

آل پارٹیز کیچ ءَ تمپ ءَ ظریف عمر ءِ کوش تُرندیں لبزاں گوں ایر جنان ءَ اے زوراکی ءُ گوستانک ءِ پالیسیانی درچ نام داتگ-

آل پارٹیز کیچ ءَ گْوشتگ کہ پوج نیمگ ءَ ظریف عمر ءِ کھول ءَ تربت ءَ تاں آیگ موکل نہ دیگ انسانی ھکانی ھلاپ ورزی اِنت کھول ءَ پوسٹ مارٹم ءِ موکل دیگ لوٹ اِیت اے آیانی بُنکی ھک اِنت-

آل پارٹیز ءَ لوٹ کتگ کہ ظریف عمر کھول ءَ انساپ دیگ بہ بیت ءُ اے وئیل ءِ پلگاری ءَ پٹ پول بہ کن اَنت ھمگرنچیں میارباراں کانود رِد ءَ سزا بدے اِت ءُ اے وئیل ءِ گر ءَ دار کنگ دلجمی بدے اَنت-

آل پارٹیز کیچ ءَ گْوشتگ کہ کھول اے وئیل ءِ زمہ وار پوج کتگ ءُ گوشتگ آئی جی ایف سی ءُ ھکومت بلوچستان اے وئیل ءِ پٹ پول ءَ بہ اَنت کھول ءَ انساپ بدے اَنت-

بلوچستان ءَ تاکت ءُ زوراکی ءِ کارمرز کنگ مروچی راج ءُ ریاست میان ءَ تچکیں لکیر کش اِتگ اگاں تاکت ءِ بے رھمیں دْرچ برجاہ بنت گڑا جاور گیش نگیگ بنت-