TBP Balochi

روکپتی بلوچستان ءَ سیادی داروکیں دو بلوچ ماں اسپھان ءِ زندان ءَ پاھو دیگ بیتگ انت –

اھوالانی رد ءَ اسپھان ءِ زندان ءَ دو مردم نشہ واپاری ءِ بھتام ءَ پاھو دیگ بیتگ اَنت-

پاھو دیگ بیتگین مردمانی پجار کوروس نارویی پنام ءِ کوروش ء شھبیک خان جھمنند نسرت آباد زاھدان، اھمد براھوئی ء رھمت اللہ جھمنند ھامون لوتک ءِ ناماں زانگ بیتگ اَنت-

اھوالانی رد ءَ اھمد ھپت سال پیش سپر ءِ وھد ءَ اسپھان ءَ گرگ بیتگ ءُ پد ءَ آئی ءِ سر ءَ نشہ باپاری ءِ بھتام بیتگ ءُ آمیدگس ءَ گوستگیں دو روچ پیش جتائیں کوٹی ءَ برگ ءُ پاھو ءِ دیگ ءِ ھکم داتگ-

کوروس ھم شش سال ساری اسپھان ءَ نشہ ءِ برگ ءِ بھتام ءَ دزگیر کنگ بیتگ ءُ پد ءَ داد گاہ ءِ انکلاب پاھو ءِ سزا داتگ-

اھوالانی رد ءَ شمبے ءِ روچ ءَ کوروس ءِ کھول ءَ گڈی گندوک کتگ بیتگ-

ھب بائی پاس ءِ سر ءَ گوستگیں روچ ءُ چہ برجاھیں نندانک مروچی بیگواھیں ورنا زبیر بلوچ ءِ یل بیتگ ءُ دزگیریں سنگتانی یل بیگ ءَ پد ھلاس کتگ ءُ دگ پچ کتگ- یکجھتی کمیٹی

ھمے درگت ءَ پریس کانفرنس کنان ءَ بلوچ یکجھتی کمیٹی کراچی ءِ راھشون فوزیہ بلوچ ءَ گوشتگ کہ زبیر بلوچ گوستگیں شپ ءَ پاکستانی پوج ءَ چہ جند ءِ لوگ ءَ آوار جتگ، چریشی ءِ ھلاپ ءَ کھول ءُ بلوچ یکجھتی کمیٹی ھب بائی پاس ءِ سر ءَ نندانک داتگ-

فوزیہ بلوچ ءَ گْوشتگ کہ زھرشانی کنوکانی تہ ءَ گیشتر زالبول ءُ زھگ ھوار بیتگ اَنت، بلے پولیس ءَ آ تُرسینتگ ءُ مروچی سُھب ءَ پُرایمنیں روانک ءِ درکنگ جُھد کنگ سر ءَ زھرشانی کنوک لٹ کٹانی نشانگ کتگ اَنت-

آئی ءَ اِھوالکاراں گوں تران کنان ءَ گْوشتگ کہ نندانک ءِ میان ءَ پولیس ءَ ھال داتگ کہ زبیر بلوچ آجو بیتگ ءُ آئی ءِ دزگیریں سنگت ھم پولیس دست ءَ اَنت ، آ یل کتگ اَنت-

زانگ بہ بیت کہ بلوچستان ءَ زورانسری آوار جنی ءِ ھلاپ ءَ جتاجتائیں ھندانی سر ءَ نندانک برجاہ ءَ اِنت، اود ءَ ھب چوکی ءَ پولیس ءِ نیمگ ءَ چہ زھرشانی کنوکانی سر ءَ لَٹ کُٹانی شکایت ھم اتکگ-

زھرشانی ءِ میان ءَ جمال بلوچ نامیں یک ورنایے ھم پولیس ءَ آوار جتگ، بلوچ یکجھتی کمیٹی رِد ءَ آ پولیس دست ءَ چہ یل کنگ بیتگ-

فوزیہ بلوچ ءَ گْوشتگ کہ ما بلوچ راج ءَ چہ دزبندی کن ایں آ زورانسری آوار جنی ءِ ھلاپ ءَ وتی توار ءَ چست بہ کن اَنت ءُ بیگواھیں مردمانی کھول بے تُرس ءَ دیم ءَ بیا اَنت-

آیاں زور داتگ کہ راج یکجاہ بہ بیت ءُ وتی دوستناکانی زورانسری آوار جنی ءِ ھلاپ ءَ جُھد بکنت-

ھب بائی پاس سر ءَ زھرشانی ھلاس بیگ ءَ پد گاڑیانی روگ آیگ بندات بیتگ-

زورانسری بیگواھی ءِ آماچیں اھوالکار زبیر بلوچ یل کنگ بیتگ-

گیشیں اھوالانی رد ءَ بلوچستان ءِ واپاری شھر ھب چوکی ءَ زورانسری بیگواھی ءِ آماچیں اھوالکار ءُ نودربر زبیر بلوچ یل بیتگ-

زبیر بلوچ ءِ یل بوگ ءِ ھال آئی ءِ کھول ءَ راست کتگ-

زانگ بہ بیت زبیر بلوچ گوستگیں شپ ءَ ھب چوکی ءَ دارو ھوٹل ءِ نزیک ءَ چہ لوگ ءَ پاکستانی لشکر ءَ دزگیر کتگ ءُ ناشناسیں جاھے ءَ برتگ کہ پد ءَ بیگواہ بیتگ-

اھوالکار ءِ یل کنگ ءِ ھاتر ءَ آئی ءِ کھول ءُ بلوچ یکجھتی کمیٹی ءِ نیمگ ءَ ھب چوکی ءَ زھرشانی بیتگ ءُ ھمے وڑ کیچ ءَ سی پیک دگ ھم بند بیتگ-

ھب چوکی ءَ زھرشانی ءِ وھد ءَ پولیس ءَ زھرشانی کنوک لٹ ءُ کٹ کتگ انت ءُ زھرشانی بنجل ءَ یک دگہ ورنایے جمال بلوچ پولیس دزگیر کتگ کہ انگت ءَ یل نہ بیتگ-

بی وائی سی ءَ گوشتگ ھب ءِ بنجاھی شھدگ ھما وھد ءَ پچ بیت جمال یل کنگ بیت اِنت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ اے ریاست رستری ءُ زوراکی ءِ بے کساسیں کچ ءَ سر بیتگ – ھب ءَ بلوچستان یونیورسٹی ء نودربر زبیر بلوچ ءِ زورانسری بیگواھی ءِ ھلاپ ءَ برجاھیں زھرشانی سر ءَ تچک ءَ تیرگواری ءُ زالبول ءُ زھگانی سر ءَ کٹ ءُ کٹ ریاست ءِ ناشرکاری اِنت-

آئی ءَ گوشتگ ھب ءِ گیرتداریں مھلوک ءَ گوں دزبندی انت کہ وتی لوگاں دربیا اَنت ءُ اے لگتمالیں زالبول ءُ زھگانی ھمراھداری ءَ بہ کن انت-

آئی ءَ گوشتگ بلوچستان ءَ ریاست پاکستان ءِ زُلمانی کوہ ھمک گدان ءُ میتگ ءِ سر ءَ کپتگ کہ چریشی ءَ ھمک گِس چرے زوراکیانی مُجاں اندیم اِنت-

آئی ءَ گوشتگ اے وھد ءَ بلوچستان ءِ بازیں جاھاں زھرشانی، نندانک ءُ ھرتال برجاہ اَنت – ھب ءُ ھوشاپ ءَ زبیر ءِ بیگواھی ءَ زھرشانی نندانک برجاہ انت ءُ تربت ءَ شھید فدا چوک ءَ شھید ظریف ءُ شھید نوید ءِ کھول ءِ درکانودی کوش ءِ ھلاپ ءَ نندانک ءُ ھرتال برجاہ اِنت-

ڈاکٹر ماہ رنگ بلوچ ءَ گوشتگ بیگواھیں زبیر، شھید ظریف بلوچ ےُ شھید نوید ءِ کھولانی گون ءَ یکجھتی ءَ مروچی بلوچ یکجھتی شال ءَ یونیورسٹی ءِ دیم ءَ زھرشانی کنگ ءَ اِنت-

بلوچ یکجھتی کمیٹی ءَ تربت ءَ ھب ءَ زھرشانی کنوکانی گون ءَ ھمگرنچی کنگ ءِ واستا مروچی شال ءَ زھرشانی کنگ ءِ جار جتگ-

درشان ءَ گوشگ بیتگ کہ بلوچ یکجھتی کمیٹی شال زون ءِ نیمگ ءَ تربت ءَ شھید ظریف ءِ کھول ءِ نندانک ءُ ھب چوکی ءَ زبیر بلوچ ءِ کھول ءِ نندانک ءِ پلامرزی ءَ مروچی بیگاہ ءَ بلوچستان یونیورسٹی ءِ دیم ءَ زھرشانی کنت اِنت-

گیش گوشگ بیتگ ریاستی بدماشیں سیکورٹی ادارھاں ھب ءُ تربت ءَ برجاھیں زھرشانی ھلاس کنگ ءِ بیھار داتگ ءُ دگہ زوراکیانی کنگ ءِ پرمان کتگ چُشکہ بلوچ راج وتی مات ءُ گوھارانی رکینگ ءَ دگانی سر ءَ در بہ کپ اَنت-

بی وائی سی ءَ درشان ءَ گوشتگ ما شال ءِ گیرت داریں مھلوک ءَ گوں دزبندی کن ایں مروچی بیگاہ ءِ ساھت چار ءَ بلوچستان یونیورسٹی ءَ جنزوکیں زھرشانی روانک ءَ ھوار بہ بیت ءُ شھید ظریف بلوچ ءُ زبیر بلوچ ءِ کھول ءِ گون ءَ ھمگرنچی درشان بہ کن ات-

مستونگ ءِ ھند اسپلنجی ءَ چہ گوستگیں روچ ءَ دزگٹیں پاکستانی پوج ءِ سر ءَ سلاہ بنداں اُرش کتگ-

دمگی مردمانی رد ءَ مروچی سھب ءَ پاکستانی پوج ءِ سلاہ بندیں مردمان ھما وھد ءَ اُرش کتگ کہ آ مَرو ءِ نزیک ءَ پیشگامی ءَ بیتگ – اُرش ءَ ترندیں تراک ءُ تیرگواریانی توار اشکنگ بیتگ انت-

واکداں اے درگت ءَ دگہ گپ پیش نہ کتگ انت-

اسپلنجی ءُ کَش ءُ گوری دمگاں بلوچ آجوئی لوٹوکین گل پرکار انت پاکستانی پوج ءِ سر ءَ یکشلیں اُرش کنگ ءَ انت بلے داں انگت ءَ مروچی بیوکیں اُرش ءِ زمہ واری کس ءَ پہ وت نہ زرتگ-

روکپتی بلوچستان ءِ دمگ سرباز ءَ یک مردمے ایرانی چیریں ادارھاں آوار جنگ ءَ پد گون وت برتگ-

آوار جنگ بیتگیں مردم ءِ پجار ثناء اللہ گلام زئی ء تاج بخش جھمنند مغ سرباز ءِ نام ءَ زانگ بیتگ-

اھوالانی رد ءَ گوستگیں روچ ءِ ساھت یازدہ ءَ لس پوشاکی کارمنداں سرباز ءِ ھند مغ ءَ یک مردمے ابید ءِ آمیدگسی پرمان ءَ آوار جتگ ءُ پد ءَ ناشناسیں جاھے ءَ برتگ-

آئی ءِ آوار جنگ ءَ پد آ بیگواہ انت ءُ آئی ءِ بارو ءَ دگہ اھوال نہ بیتگ اَنت-

گوستگیں روچ ءَ ناشناسیں سلاہ بندیں مردماں یک نودربرے آوار جتگ ءُ پد ءَ آئی ءِ سر ءَ لٹ ءُ کٹ کنگ ءُ مِرچ پریچگ ءُ یل کنگ بیتگ-

اھوالانی رد ءَ روکپتی بلوچستان ءِ دمگ راسک ءَ معاز ابروفراخ ء داد مھمد نامیں ورنائیں نودربرے نیکراھی وانگ ءِ نزیک ءَ سلاہ بنداں آوار جتگ ءُ پد ءَ آ لٹ ءُ کٹ کنگ ءَ پد یل کنگ بیتگ-

اھوالانی رد ءَ نودربر راسک ءِ دمگ ششگیم ءِ جھمنند انت کہ آ گوستگیں روچ ءَ پشامگ نیکراھی وانگ جاہ ءِ نزیک ءَ برگ ءُ پد ءَ لٹ ءُ کٹ کنگ ءَ پد یل دیگ بیتگ-

آوار جنوکانی بارو ءَ دگہ گپ دیم ءَ نیتکگ اَنت نانکہ آوار جنی ءِ سبب زانگ بیتگ-

کیچ ءِ دمگ مند ءُ زراب عالم نامیں تپلے ءَ نادراھی ءِ سبب ءَ آسراتی ءِ نہ رسگ ءَ ساہ داتگ انت-

کھول ءِ رد ءَ گوستگیں شپ ءَ اچانگی تپ بیتگ ءَ کھول ءَ آ دمگی نادراہ جاہ ءَ برتگ کہ اود ءَ آ بنکی آسراتی دیگ ءَ پد آ گیش دیم ءَ مزنیں نادراہ جاھے ءَ برگ ءِ شَور داتگ-

کھول ءِ رد ءَ زھگ ءَ تربت ءَ برگ ءَ بوتگ اِنت کہ اود ءَ ھسپتال ءِ سر بوگ ءَ پیش زھگ ءَ ساہ داتگ اَنت-

دمگی مردمانی رد ءَ مند ءَ بنکی آسراتی ءِ نہ بوگ ءَ مھلوک کسانیں نادراھی ءَ وتی ساھاں دے اَنت ءُ دومی نیمگ ءَ ریاست ءُ آئی ءِ وزیر اے ٹاہ ءَ دے اَنت آیاں مند ءَ ھسپتال ءُ آسراتی داتگ بلے چَٹیں بے بنیں گپ اَنت-