روکپتی بلوچستان ءِ بنجاھی شھر زاھدان ءَ ایرانی لشکر ءَ یک مردمے آوار جنگ ءَ پد بیگواہ کتگ-
آوار جنگ بیتگیں مردم ءِ پجار حفیظ نھتانی ء امان اللہ جھمنند زاھدان ءِ نام ءَ زانگ بیتگ-
اھوالانی رد ءَ حفیظ گوستگیں پشمبے ءِ روچ ءَ برگ بیتگ کہ آئی ءِ کھول ءَ بازیں جست ءُ پرساں پد رند ءَ اھوال رس اتگ انت کہ حفیظ ایرانی لشکر ءَ دزگیر کتگ ءُ برتگ-
حفیظ ءِ بیگواھی ءُ آئی ءِ گرگ ءُ برگ ءِ بارو ءَ انتزامیہ ءِ نیمگ ءَ ھچ درشان دیم ءَ نیتکگ اَنت-
بلوچ زالبولانی سر ءَ لُٹ ءُ کُٹ کنگ جاہ ءَ دزکشی بہ کن اَنت ، درکانودی پرماناں مہ من اَنت، بلوچ یکجھتی کمیٹی ءِ راھشون
بلوچ یکجھتی کمیٹی ءِ راھشون ماہ رنگ بلوچ ءَ ھب نندانک ءِ میان ءَ زالبول ءُ چکانی سر ءَ ریاستی زوراکی ٰایر جنان ءَ بلوچ پولیس ءُ انتزامیہ ءِ کارمنداں چہ دزبندی کتگ کہ آ درھکومت ءِ درکانودی پرماناں منّگ ءَ جاہ ءَ اکلاکی جُرت ءَ پیش بدار اَنت ءُ وتی اوھد ءَ چہ دزکش بہ بنت-
ماہ رنگ بلوچ ءَ وتی درشان ءِ تہ ءَ گْوشتگ کہ ھب نندانک ءَ دزگیربیتگیں بلوچ زالبول انگت یل کنگ نہ بیتگ اَنت سرجمیں لَٹ ءُ کٹ ءُ دزگیری ءَ اَبید ھب نندانک برجاہ ءَ اِنت-
آئی ءَ گْوشتگ وتگڑیں سروزیر بلوچستان ءِ گوشگ پد ءَ ڈسٹرکٹ ایڈمنسٹریشن پرایمنیں زالبول ءُ چُکانی سر ءَ لَٹ ءُ کُٹ ءِ پرمان داتگ-
بلوچ یکجھتی کمیٹی ءِ راھشون ءِ گوشگ اِنت وھدے ھب چوکی ءَ ھوار ھما جاھاں زورانسری آوار جنی ءِ نشانگ بیتگیں مردمانی کھول نندانک دیگ ءَ اَنت اود ءِ انتزامیہ ءَ ھوار بلوچ کارمند وتی بلوچ زالبول ءُ چُکاں سر ءَ لَٹ ءُ کُٹ کنگ ءِ درانی در کانودی ءُ زالمی پرمانانی منّگ جاہ ءَ اکلاکی جُرت ءَ پیش بدار اَنت ءُ وتی اوھداں چہ دزکش بہ بنت-
آئی ءَ دیمتر ءَ گْوشتگ کہ بلوچستان ءَ بے کانودی ءُ ریاستی زوراکی ھَد ءَ گوستگ یک نیمگے مئے دوستناکاں زورانسری بیگواہ کن اَنت وھدے ما آیانی یل کنائینگ ھاتر ءَ پُرایمنیں زھرشانی کن ایں گُڑا زالبول ءُ چُکانی سر ءَ زوراکی کن اَنت آیاں دزگیر کن اَنت-
آئی ءَ وتی درشان ءِ گُڈی ءَ گْوشتگ کہ اے وھد ءَ یکرندے پد ءَ نندانک سر ءَ زوراکی کنگ ھاتر ءَ ریاستی پوج ءِ مزنیں کچے ءَ کارمند ساڑی اَنت، ما ھب ءِ شرمندیں راج ءَ را دزبندی کن آں کہ آ زورانسری آوار جنگ بیتگیں مردمانی کھول نندانک ءَ جوانیں وڑے ءَ بھر بزیر اَنت ءُ آیانی گوم ءَ یکجاھی درشان بکن اَنت-
بلوچستان ءِ جتاجتائیں دمگاں چہ زورانسری آوار جنیانی دْرچ یکشل ءَ برجاہ ءَ اِنت، دگہ دوازدہ مردم ءِ بیگواھیں ءِ کیس دیم ءَ اَتکگ اَنت-
گیشیں ھالانی رِد ءَ بیست ھشت فروری ءِ شپ ءَ پاکستانی پوج ءَ نوشکی ءِ دمگ چہ کلی جمالدینی ءَ دو برات عدنان ءُ ابرار جمالدینی ء اکبر جمالدینی آوار جتگ ءُ بیگواہ کتگ اَنت-
وھدے کہ بلوچستان ءِ بُنجاھی شھر چہ شال ءَ یک نودربرے ءُ آواران ءِ تھسیل مشکے ءِ جتاجتائیں دمگاں چہ نُھ مردم زورانسری آوار جنی ءِ نشانگ کنگ بیتگ اَنت-
بیگواہ کنگ بیتگیں مردمانی پجّار مومن ء اسلم، کامران ء محمد عالم، معراج ء نیاز محمد، زھیر ء نیاز محمد جھمنند ساکنان شریکی مشکے، سیف ء کامریڈ لطیف جھمنند میوار، صفدر ء عنایت جھمنند نوکجو مشکے، قمبرالدین ء دوستین، وشدل ء قادر داد، دوستین ء قادر داد جھمنند تراتدان مشکے ءِ نام ءَ چہ بیتگ اَنت-
گوشگ بیگ ءَ اِنت نُھ مردم پاکستانی پوج ءَ گوستگیں بیست ھشت فروری ءُ یک مارچ ءَ جتاجتائیں ھنداں چہ بیڑ وھد ءَ آوار جتگ ءُ بیگواہ کتگ اَنت-
ھمے وڑ لسبیلہ ءِ دمگ چہ وندر ءَ پاکستانی پوج ءَ الھی بخش ء جمعہ خان جھمنند آواران جھاؤ کورک چر چری نامیں مردمے آوار جنگ ءَ پد بیگواہ کتگ-
دمگی اِھوالکار رِد ءَ اے مرد بازیں وھدے ءَ پیسر چہ جھاؤ ءَ ھمکروچ پاکستانی پوج ءِ لشکر کشی ءَ چہ دلسیاہ بیتگ ءُ اتکگ وندر ءَ جھمنند بیتگ-
زانگ بہ بیت ھمے سال ءِ جنوری ءَ بگر تاں انو دو سد ءَ نزیک مردم زورانسری آوار جنی ءِ کیس نکش بیتگ اَنت- بلوچ سیاسی پارٹیاں زورانسری آوار جنی ءِ تُرسناکیں ھدے ءَ گیشی ءِ ترس درشان کتگ ءُ زوت گر ءُ دار لوٹ کتگ-
دومی نیمگ ءَ سرجمیں بلوچستان ءَ زورانسری آوارجنیانی ھلاپ ءَ مزنیں کچے ءَ زھرشانی ءُ بُنجاھی شھدگانی سر ءَ نندانک برجاہ ءَ اِنت، اے وھد ءَ کراچی، شال بُنجاھی شھدگ ءَ ھوار شال ءِ بازیں ھندانی سر ءَ زھرشانی کنگ بیگ ءَ اِنت-
کافکا، من ءُ تو
نبشتہ کار: زبیر بلوچ
رجانک: جھانزیب بلوچ
دی بلوچستان پوسٹ
من ترا کافکا ءِ تہ ءَ گنداں، تو من ءَ کافکا ءِ تہ ءَ گند ئے ءُ یکجاہ ما کافکا ءَ یکے دومی ءِ تہ ءَ گند ایں۔ کافکا ھمے وڑ ءَ زندگ اِنت فرانز کافکا 3 جولائی 1883 ءَ پراگ ءِ یک میان اُستمانی ءُ جرمن زبان ءِ گپ جنوکیں یھودی ٹبرے ءَ ودی بوتگ کہ نو چیک ریپبلک ءِ بھر اِنت۔ آ چہ ششیں زھگاں مستریں زھگ اَت۔ پریشانی ءِ گپ ایش اِنت کہ آئی ءِ دو کسانیں برات کسانی ءَ بیران بوتگ ءُ آئی ءَ گوں سے کسانیں براتاں یلہ داتگ۔ کافکا ءِ پت جرمن کافکا وتی بدیں تب ءِ سبب ءَ زانگ بوتگ کہ آئی ءَ باز بر ءَ وتی چُک ءِ نیمگ ءَ دیم داتگ۔ آئی ءَ کافکا ءِ لبزانک ءِ شوک ھم ناپسند کت ءُ آئی ءَ را پرار ءِ دروشم ءَ رد کت۔ کافکا ءَ وتی سرجمیں زند وتی ھاکمیں پت ءَ گوں ھوار بوگ ءِ جھد کتگ اَت کہ آئی ءِ نبشتانک ءِ سر ءَ سک باز اسرمند بوتگ اَت کافکا ءَ وتی دگہ راھے رندگیری واھگ ءَ باوجود وتی پت ءِ تہ ءَ دام ءِ تہ ءَ کپتگیں اھساس کت۔ آئی ءِ گیشتریں نبشتانک چہ وتی ھاندان ءَ دور، تھنائی ءَ بوتگ۔ آئی ءَ چہ وتی مرگ ءَ پیسر وتی بازیں نبشتانک سُتکگ اَنت ءُ وتی نزیکیں سنگت ءَ گْوشتگ ئِے کہ آ دگہ نبشتانکاں ھلاس بہ کنت۔
کافکا ءَ وتی سرجمیں زند ءَ کلینیکل ڈپریشن ءُ چاگردی بے چینی ءِ ھلاپ ءَ جنگ کتگ۔ جون 1924 ءَ آ ٹی بی ءِ نادراھی ءَ چہ بیران بوت۔
کافکا وتی گپ ءُ مئے لیکھانی وسیلہ ءَ وتی زند ءَ برجاہ دار اِیت- تئی، من ءُ کافکا ءِ وڑیں دنیا ءِ نیام ءَ کہ آئی ءَ یلہ داتگ اَنت۔
فرانز کافکا ءِ نامداریں نبشتانک چوشکہ میٹامورفوسس ءُ دی ٹرائل شاھکار اَنت کہ آ انگت ءَ سرجمیں دگنیا ءِ وانوکاں گونجگ ءَ اِنت۔ آئی ءِ نبشتانک چاگرد ءِ پیچیدگی ءُُ آئی ءِ تہ ءَ پرد ءِ جاہ ءِ پٹ ءُُ پول ءَ کن اَنت۔ کافکا ءِ بنگپ بلوچستان ءِ وڑیں نوآبادیاتی زمینانی ھکیکتانی سرءَ براہ ءِ راست لاگو نہ بنت بلے ذاتی سطح ءَ من وت ءَ آئی ءِ بیگانگی ءُ رنج ءِ احساس ءَ گوں ھمگرنچ گنداں۔
من کافکا ءِ وڑ ءَ نہ بوگ لوٹاں، پد ءَ ھم من وت ءَ ھمے وڑیں تجربہ ءِ زند گوازینگ ءَ گنداں- من ءَ انچوش پیش دارگ بیت کہ کافکا بوتگ۔ کافکا نہ ایوک ءَ وتی پت ءِ سکتی ءَ چہ بلکیں آئی ءِ وانوک ءِ ترجمانی ءَ چہ ھم جوڑ بوتگ۔ انگت من وتی شرتانی سر ءَ کافکا ءِ گوں ھوار بوگ ءِ راہ ءَ گچین کناں۔ آئی ءِ سرپد بوگ ءَ من وت ءَ سرپد بوگ ءِ جھد ءَ کناں۔
ذاتی جاہ: کافکا، من ءُ تو ذاتی جاہ ترا چے بزانت اِنت؟ تو بوت کنت کہ جیڑگ ءَ ئے کہ من اے گپ ءَ ھم پرچا جُست کنگ ءَ آں. بلے ھمے جُست منی سر ءَ زوراک بوت ءُ من ءَ آئی ءِ ارزشت ءِ سر ءَ جیڑگ ءَ لاچار کُت۔
کافکا ءِ آزمانک ”میٹامورفوسس“ ءِ تہ ءَ ذاتی جاہ ءِ لیکہ ءِ سر ءَ سک باز ھلاپ ورزی کنگ بوتگ۔ کھانی ءِ بندات ءَ وھدے گریگور سامسا کار ءِ ھاتر ءَ دیم ءَ آیگ ءَ ناکام بیت گڑا آئی ءِ باس -چیف کلرک – بے جار ءُ بے اجازت ءَ آئی ءِ لوگ ءَ سر بیت۔ اے کلاپ ورزی گریگور ءِ کار ءِ چاگرد ءِ پریشان کنوکیں ءُ آمرانہ دروشم ءَ پدر کنت۔ چیف کلرک ءِ تر ءُ تاب گریگور ءِ وشھالی ءِ جیڑہ ءَ چہ نہ اِنت بلکیں آئی ءَ وتی کارانی سرا لاپروائی کنگ ءِ سر ءَ ڈاہ ءُ شور کنگ ءَ اِنت۔
گریگور ءِ ذاتی جاہ ءِ اے خلاف ورزی آئی ءِ نجی زند ءُ آئی ءِ کار ءِ نیام ءَ سیمسراں دھندلا کنت ءُ آئی ءِ کار بے انسانیت کنوکیں اسراں پدر کنت۔ اے گریگور ءِ بیگانگی ءُ بے وسی ءِ گھتریں احساس ءِ الامت اِنت ءُ اے گپ ءَ پدر کنت کہ آئی ءِ لوگ ھم آئی ءِ زلم ءُ زوراکی ءِ کار ءِ زند ءَ چہ یک محفوظیں پناہ گاھے ءَ نہ اِنت۔ کافکا اے ندارگ ءَ نوکیں بیوروکریٹک کار ءِ نزام ءِ لوٹ ءُ بے انسانیت ءِ سر ءَ تنقید کنگ ءَ کارمرز کنت۔
اے گپ ءِ وانگ ءَ من ءَ وتی تجربتانی سر ءَ رکّینگ ءُ ھیال کنگ ءَ لاچار کت۔ من ءَ پرچا انچو دم ءِ کشگ ءِ احساس بیت؟ اے ھم نوآبادیاتی نادراھی نہ اِنت؟ یک انچیں نزامے کہ اود ءَ ھرکس وتی ھک ءَ زانت کہ دگر چے کنگ ءَ اِنت، اود ءَ چم ءُ گوشداروکیں گوشانی سر ءَ جاسوسی ذاتی ھدوداں گپت کنت۔
اے گپ ءَ من ءَ وتی دود ءُ ربیدگ ءِ تجربھانی سر ءَ جُست ءُ پُرس کنگ ءَ لاچار کُت۔ آیا مئے دودمان مارا راستی ءَ ذاتی جاہ ءِ کلاپ ورزی ءِ سکین ءَ دنت؟ من ءَ پت ءِ گپ وش یات اَنت کہ ”کسے ءِ اجازت ءَ ابید ھچبر کسے ءِ جیب ءَ پٹ ءُ پول مہ کن“۔ ھما وھد ءَ ھم کہ آئی ءَ من ءَ چہ وتی جیب ءَ زرّ زورگ ءِ اجازت دات گڑا اے گپ گران ءُ ناپسندیں اھساسے بوت۔
استعمار ءَ انچوش سما بیت کہ اے دود ءُ ربیدگ ءِ رھبند گار ءُ بیگواہ کتگ اَنت۔ ذاتی جاہ دور کنگ بوتگ، رازداری ءِ ھچ جاہ یلہ نہ داتگ۔ کافکا ءَ اے تاوان مگربی ، سرمایہ دارانی دنیا ءِ تہ ءَ دیستگ اَت- یک انچیں دنیا یے کہ اود ءَ ذاتی سیمسر ٹُکّر ٹُکّر بنت ءُ پرد وتی لھتیں بھراں چہ وتی زند ءَ گار ءُ بیگواہ کنگ ءِ ھم گار کن اَنت-
کافکا ءِ کسہ گونج اِیت پرچا کہ اے ایوک ءَ گریگور ءِ زند ءِ بابت ءَ نہ اِنت- اے مئے درستانی بابت ءَ اِنت، ھما نزامانی تہ ءَ زندگ بوگ کہ ما چہ ھما چیز ءَ گیش لوٹ اَنت کہ ما دیگ ءَ تیار ایں، مارا بے نکاب ءُ بے انسانیت ءِ اھساس ءَ یلہ دنت۔
آزمائش: کافکا، من ءُ تو
ھر جاہ کہ ما رو ایں، انچوش سما بیت کہ مارا پیسلہ کنگ بوگ ءَ اِنت، مدام مقدمہ ءِ سر ءَ اِنت۔
کافکا ءِ آزمانک ”آزمائش“ ءِ تہ ءَ جوزف ءِ یک نادیدگیں ءُ دوریں اتھارٹی یے ءِ دست ءَ دزگیر ءُ پراسیکیوشن کنگ بیت-آ ھچبر ھم نہ زانت کہ آئی ءِ سر ءَ کجام جرم ءِ الزام اِنت۔ اے بیانیہ ءِ سر ءَ ھچ وڑیں واقف ءِ اھساس نہ بیت پرچا کہ نوکیں چاگرد ءَ مارا ھم مدام آزمائش ءِ سر ءَ ایر کنگ بیت۔ توری سماجی، ڈیجیٹل، یا ادارہ جاتی جاھاں، مارا مدام مشاھدہ، اندازہ کنگ، ءُ ھر وھد ءَ سمجائینگ یاکہ سمبالگ ءِ ھچ وڑیں وسیلہ ءِ بے پیسلہ ءَ کنگ بیت۔
بیچلر ءِ ڈگری ءِ سرجم کنگ ءَ پد ، وھدے من چہ پنجاب ءَ پد ءَ بلوچستان ءَ سپر کت گڑا من ءَ اے اھساس ءَ چہ ھلاس نہ کت کہ من کافکا ءِ دی ٹرائل ءَ زندگ آں ۔ بے سبب ءَ من ءَ جُست ءُ پُرسانی بمباری کنگ بوت کہ ”
بلوچستان ءَ، من اسل ءَ آمدگس ءِ تہ ءَ آتک آں ، منی باندات ءِ بابت ءَ جست ءُ پرس کنگ بوگ ءَ اَت؟ اے مُدامی جُست ءُ پُرس ءَ من ءَ نادراھی ءِ احساس کُت۔ اے انچوش اَت کہ من ءَ یک مردمے ءِ بستار ءَ نہ گندگ بوتگ بلکیں یک چیزے ءِ بستار ءَ گندگ بوتگ اَت- یک چیزے کہ سروے ءِ چیر ءَ اَت، چو کہ یک مجرمے ءِ پٹ ءُ پول کنگ بوگ ءَ اَت۔ کافکا ءِ نگرانی ءِ ریاست ءِ پیشدارگ ، کہ اود ءَ مردماں مدام چارگ بیت ءُ آیانی کارانی سر ءَ بے دیمیں نزامانی وسیلہ ءَ تجزیہ کنگ بیت ، اے درستاں سک باز راستی لیک اَنت۔
اگاں کافکا 1924 ءَ بیران بوتگ بلے آ دنیا کہ آئی ءَ ’’دی ٹرائل‘‘ ءِ تہ ءَ پیش داشتگ اَت آ انگت سک باز زندگ اِنت۔ آئی ءِ کار یک بے وھدیں تجربہ یے ءِ سر ءَ قبضہ کنت- نادیدگیں واکدارانی دیم ءَ مدام پیسلہ کنگ، چارگ ءُ بے وس کنگ ءِ اھساس۔ ءُ مرچیگیں دنیا ءَ اے بے مٹیں پیسلہ ءِ چکر چہ پیسر ءَ گیشتر شنگ ءُ تالان اِنت۔ اے ھر جاہ ءَ ھست اِنت: چاگردی دنیا ءَ، ڈیجیٹل ءِ جاہ ءَ، ادارھانی تہ ءَ ءُ مئے وتی ذھن ءَ ھم۔
من وت ءَ کافکا ءِ کردار ، جوزف ءِ بستار ءَ روچ پہ روچ زندگ گنداں – من ءَ پریشان کنگ ءُ جُست کنگ بیت کہ من چے کنگ ءَ آں ءُ دیم ءَ چے کیت۔
تئی بابت ءَ چے؟ تو چوں مقدمہ ءِ سر ءَ ایر کنگ بوتگ ئے؟ زاناں شما کدی وتی لوگ ءَ دری مردمے ءِ وڑ ءَ مار اِتگ؟ بیگانگی اے مُدامی اھساس من ءَ کافکا ءِ وڑ ءَ مار اِیت کہ من پُشت ءَ کپگ لوٹاں ءُ گُشاں کہ ”من درکپگ نہ لوٹاں۔ اود ءَ انسان ھست اِنت۔”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
ھُزدار، زورانسری آوار جنیانی، بلوچ زالبولانی دزگیری ءُ ھب ءَ زالبولانی سر ءَ تچکی ءَ تیرگواری کنگ ءِ ھلاپ ءَ ھُزدار ءِ راج ءَ ھم تُرندیں زھرشانی کنان ءَ بُنجاھی شھدگ بند کتگ-
اِھوالکار رِد ءَ سرجمیں بلوچستان ءَ زورانسری آوار جنی ءِ ھلاپ ءَ زھرشانی تُرندی آورتگ ءُ گشیتر تھی ءُ ڈنی شھدگ زھرشانی کنوکاں بند کتگ اَنت- جتاجتائیں دمگاں راجی گم ءُ زھری ءِ سبب ءَ جاور نگیگ بیتگ اَنت، وھدے کہ زھرشانی کنوکاں زورانسری آوار جنی ءِ ھلاس کنگ ءُ دزگیریں زالبولاں زوت یل کنگ لوٹ کتگ-
بلوچستان ءَ برجاھیں زھرشانیانی سبب ءَ گاڑیانی روگ آیگ بند بیتگ، ءُ بازیں باپاری راہ ھم بند بیگ ھال اِنت-
بلوچ یکجھتی کمیٹی ءِ راھشون ڈاکٹر صبیحہ بلوچ ءَ گْوشتگ کہ پاکستان پیپلز پارٹی ( پی پی پی) ھرچ ٹارگٹ کلنگ ءُ آوار جنی ءِ زمہ وار اِنت، مارا اے دروگیں سوشلسٹ پارٹی پاشک کنگی اِنت تبکانی واستا جُھد ءِ ٹاہ ءَ جنت-
آئی ءَ گْوشتگ کہ مروچی شمئے مات گْھار دگانی سر ءَ اَنت، اے ریاست ءِ ھرچ ادارہ بے سوب بیتگ- مئے ایف آئی آر نبشتہ کنگ جاہ مارا گوشگ ءَ اِنت کہ شمارا دزگیر کن ایں – بے شک دزگیر بہ کن دانکہ آ مردم، کہ پی پی پی ءِ نیمگ ءَ ھکانی پھاز ءِ ٹاہ ءَ جنت، ملامت بہ بنت-
آئی ءَ گْوشتگ کہ مچی مول رِد ءَ مارا مُچی جُھد کنگی اِنت، اگاں ما یکجاہ بہ ایں یک تاکتے جوڑ بہ بہ ایں گُڑا ما ھزرانی یاسر ءَ واتر آورت کن ایں-
بلوچ یکجھتی کمیٹی ءِ بُنجاھی جارکش ءَ گْوشتگ کہ بلوچ زورانسری آوار جنگ بیتگیں کھول ءِ زھرشانی نندانک گوستگیں سے روچاں چہ ھب بھوائی بائی پاس سر ءَ برجاہ ءَ اِنت، اود ءَ شش بیگواھیں مردمانی کھول وتی مردمانی یل کنائینگ ھاتر ءَ زھرشانی ءَ اَنت- ریاستی انتظامیہ ناں زورانسری بیگواہ بیتگیں مردماں یل کنائینگ ءَ سوبمند بیتگ ناں ریاستی پوج ھلاپ ءَ کانودی کاروائی کنگ ءَ ساڑی اِنت- ءُ اسرمندیں کھولاں یکشل ءَ گپ ءُ دیوان نام ءَ بیھار ءُ تُرسینگ بیگ ءَ اِنت-
آیاں گْوشتگ کہ مروچی سُھب، ریاستی پوج ءُ سادھیں پوشاکانی تہ ءِ چیریں ادارھانی کارمنداں زھرشانی کنوکانی سر ءَ زوراکی کتگ، آیانی تہ ءَ مردین ءُ جنین بے کساس لَٹ ءُ کُٹانی نشانگ کتگ اَنت، زھرشانی کنوکانی سر ءَ تیرگواری کتگ ءُ لَٹ ءُ لُٹ کتگ اَنت- اے میان ءَ بازیں مردمے دزگیر کتگ ناشناسیں جاھے ءَ برتگ اَنت، آیانی تہ ءَ زورانسری بیگواہ شبیر بلوچ ءِ گھار سیما بلوچ، راشد بلوچ ءِ گھازرتک ماہ زیب بلوچ، ءُ ظفر گیشکوری ءِ پیرزالیں مات ءَ ھوار بازیں زالبولے ھوار اِنت-
جارکش ءَ گْوشتگ کہ اسرمندیں کھول وتی گپ سر ءَ اوشتاتگ اَنت ءُ وتی دوستناکانی ٹپ ءُ ٹوریں لاشاں مٹ کنگ یا ریاستی ادارھانی دروگیں میڑاں جنگ اجازت دیگ ءَ واستا ساڑی نہ اَنت- تُرندیں ریاستی زوراکی ءُ دزگیری ءَ اَبید ھب نندانک یکشل ءَ برجاہ ءَ اِنت – بلوچ یکجھتی کمیٹی اے اِھد کنت کہ آ اے جُھد ءَ زورانسری بیگواھیں مردمانی کھول ءِ گوم ءَ اوشتاتگ ءُ سرجمیں بلوچ راج ھاسکار کراچی ءُ ھب راج ءَ چہ دزبندی اِنت کہ آ زوت ھب نندانک ءَ سر بہ بنت-
آئی ءَ گْوشتگ کہ ما ریاست ءَ تچک کنگ لوٹ ایں بے میاریں زھرشانی کنوکانی سر ءَ زوراکی ءُ بلوچ زالبولانی دزگیری ھچ وڑ منّگ نک بیت- ما ھب انتزامیہ ءَ کڈن کنگ لوٹ ایں اگاں سرجمیں دزگیربیتگیں، ھوار بلوچ زالبول زوت یل کنگ نہ بیت گُڑا ما وتی دیم کار ءِ جار ءَ جن ایں، چریشی ءِ سرجمیں زمہ وار ریاست ءُ ھب انتزامیہ سر ءَ بنت-
بلوچ راجی آجوئی سنگر( براس ) ءِ جارکش بلوچ خان ءَ یک درشانے ءَ گوشتگ براس ءِ یک گچینی نیادے برجم دارگ بیتگ- کہ ایشی ءِ توک ءَ ھمسنتی گل، بلوچ لبریشن آرمی، بلوچستان لبریشن فرنٹ، بلوچ ریپبلکن گارڈز، ءُ سندھی آزادی ءِ گل سندھو دیش ریولوشنری آرمی ءِ یک گچینی پترے ءَ بھر زرتگ – اے پتری دیوان سَے روچاں برجاہ بیتگ ءُ آے آسری ءَ بلوچ راجی زرمبشت ءَ یک پیسلہ داریں تبکے ءَ سر کنگ ءَ گچینی سوڑگ بیتگ انت-
آئی ءَ گوشتگ نیاد ءَ اے گپ ءَ پدراھی بیتگ کہ براس آیوکیں وھداں زوت بلوچ راجی پوج ءِ دروشم ءَ دیم ءَ کیت انت- جتا جتائیں گلانی جھدکار ءُ سروکاں ھوار یک عسکری بنھشتے ءِ تک ءَ آرگ ءَ گچینی کمیٹی ءُ مھکمہ ءِ نوکترین دروشم دیگ بنت اِنت- ھمے وڑ جھلتریں تبکانی دراھیں ریجناں گل ءُ عسکری بنھشتاں مھکم ءُ نوکتر مھکم کنگ ءِ کار بندات کنگ بیت اِنت- اے امل ءِ بنکی مکسد بلوچ راجی سلاہ بندیں گلاں جتا جتائیں کاروائیاں کشگ ءُ یک مھکم ءُ ترندیں ءُ پیسلہ کاریں تاکتے ءِ دیم ءَ آرگ اِنت- کہ دشمن ءِ ھلاپ ءَ یک ترندیں پروشے ءِ آماچی بہ بیت اِنت-
جارکش ءَ گوشتگ نیاد ءَ پیسلہ کنگ بیتگ کہ پاکستان ءُ چین ءِ ھلاپ ءَ جنگ گیشتر ترندی آرگ بیت اِنت- گوریلا کاروائیاں نوکتریں عسکری ھکمت املی ءِ تک ءَ مھکم کن ایں- دانکہ دشمن ءَ گیشتر تاوان دات کت بہ کن ایں – ھمے وڑ جنگی میدان ءَ ٹیکنالوجی ءِ کارمرد کنگ ھم دیم ءَ آرگ بیت اِنت- دشمن ءِ انٹیلیجنس ءِ سرین ءِ پروش سرجم ءَ کنگ بیت اِنت – آئی ءِ عسکری پوزیشنانی نیزور کنگ ءُ جنگی وسائلانی نشانگ کنگ ءَ یکجاہ ءُ مھکمیں گچینی ءِ گشینگ بیتگ کہ زوت گامگیج زیرگ بیت اِنت-
آئی ءَ گیش گوشتگ کہ بلوچ مڈیانی لٹ ءُ پلوک، پاکستانی ءُ چینی سرمایہ دارارانی پُلپھانچی پریام،ءُ زورگریں پوج ءِ جاڑیگی ءِ ھلاپ ءَ جنگ ءِ گیش دیم ءَ آرگ ءِ پیسلہ کنگ بیتگ کہ بلوچستان ءِ دراھیں دگانی بندگ ءِ توک ءَ گیشی آرگ انت تاکہ زورگریں ریاست ءِ لاجسٹک، زرکاری ءُ عسکری لوٹ تبای بہ بنت اِنت- ایشی ءِ ھواری ءَ جتا جتائیں ھنداں نوکیں دروشمانی تک ءَ آپریشنزانی چن ءُ لانچ بوگ ءَ انت کہ ایشی ءِ زور ءَ دشمن ءِ سر ءُ پُر ےُ نوکریں بنجالانی سر ءَ زور پرینگ ءَ گیش کنت اِنت-
آئی ءَ گوشتگ بلوچ راجی جیڑہ ءَ میان اُستمانی پھناتان گیش دیم ءَ برگ ءِ واستا سپارتی بنھشت ءَ ھم نوکیں گامگیجاں دیم ءَ جنزینگ ءَ انت- پاکستانی ءُ چینی ریاستانی زُلم، بلوچ نسل کشی، زورانسری بیگواھی، پوجی زوراکی ءُ لٹ ءُ پُلی پریاماں میان اُستمانی تکاں جوانیں رنگے ءَ پیش کنگ ءَ یک سپارتی مھمے ءِ بندات ءَ کنت اِنت – اے درگت ءَ براس میان اُستمانی سپارتی ادارہ، انسانی ھکانی گل ءُ جتا جتائیں میان اُستمانی تاکتانی گون ءَ رھوتی ءَ گیشتر کنگ ءَ گچینی دلگوش دنت اِنت-
جارکش ءَ گوشتگ بلوچ میڈیا ءِ گیش دیم ءَ آرگ ءِ واستا جوانیں گچینی گامگیج زیرگ بیتگ انت – گھگیری میڈیا ءَ آ نوکتریں ساز ءُ سامان، میان اُستمانی اھوالکاری ادارھاں گوں رھوت کنگ، ءُ سوشل میڈیا ءَ بلوچ راجی درشانداب ءَ گیش شوکترین رنگے ءَ پیش کنگ ءَ نوکتریں گامگیج زیرگ بنت اِنت- دانکہ دشمن ءِ پروپکنڈا پروش دیگ بہ بنت ءُ بلوچ راجی زرمبشت راستیں رنگے ءَ دنیا ءِ دیم ءَ پیش کنگ اِنت-
بلوچ ھان ءَ گوشتگ براس دراھیں جھدکارانی سنچ، پکری ءُ عسکری تربیت ءِ واستا یک مچانکیں پریامے برجم کتگ- اے پریام ءِ تک ءَ سرمچاراں نا ایوک ءَ جنگی سنچداری ءَ تربیت دیگ بیت اِنت بلکین ایشی ءَ راجی نزریہ، آشوبی راجداری، ءُ دشمن ءِ لٹ ءُ پلی پندلانی ھلاپ ءَ پکری ءُ املی رنگ ءَ جاڑیگ بوگ ءَ ھیلکاری دنت اِنت- ھمک جھدکار ءَ اے سما المی انت کہ آئی ءِ جد ءُ جھد ایوک ءَ یک ٹولی یا گلے ءِ واستا نہ اِنت- بلکیں بلوچ راجی آجوئی ءِ واستا انت – ھمے سنچ یک مھکم داریں زرمبشتے ءِ بنھشت ءَ دار ایت-
آئی ءَ گوشتگ گوریلا جنگی رپکانی تک ءَ دیمروئی، کم ءَ چہ کم تاوان ءُ گیش دیم ءَ روگ ءِ واستا براس ءَ یک سرجمیں روڈ میپے ترتیب داتگ – اے رپکاری ءِ دشمن ءَ گیش زور دیگ ءَ مھکمیں آپریشنزانی چن ءُ لانچ بوگ ءَ انت – دانکہ جنگی کاروائیاں ٹیکنالوجی گیش ءَ چہ گیش کارمرد کنگ ءِ پریام پوشینگ بوگ ءَ انت – براس اے گپ ءَ سدکی دنت کہ گھگیر کاری ءِ ھمک گام ھما ڈول ءَ چِست کنگ بیت اِنت دشمن ءَ ترندیں تاوان بہ بیت ءُ بلوچ سرمچارانی جانی تاوان کم بہ بیت اِنت –
جارکش ءَ گوشتگ دراھیں ھمسنتیں گلاں ھوار دگر آجوئی دوستین لوٹوکیں گلاں رھوتی ءَ گیش مھکم کنگ ءُ آیاں براس ءِ بینر ءِ ساھگ ءِ چیر ءَ یکجاہ کنگ ءَ اے گپ ءَ کڈن کنت اِنت کہ بلوچ راجی گھگیری ءَ گیش دیم ءَ برگ ءُ ھمک تک ءَ مھکمین رنگے ءَ کجام ھم ٹولی داری ءَ گستا بوگ ءُ راجی جد ءُ جھد ءِ بنکی تَک ءَ زیران کنت اِنت-
جارکش ءَ گوشتگ براس ءِ لیکہ انت کہ بلوچ راجی آجوئی ءِ زمانت بس ایوک ءَ ھمسنتی انت، مھکمی انت ءُ راجی پوج ءِ آیگ انت – راجدپتر ءَ اے منانک ھست انت کہ آجوئی ءِ ایوکی ءِ کاروائیاں درکپتگ ءُ مھکمیں لشکری جنزگ ءِ تک ءَ یکجاھی ءَ بیتگ انت ، براس ھمے نزریہ ءَ دیم ءَ برگ ءَ انت کہ دانکہ بلوچ راجی زرمبشت ءَ یک ھنچین سنچے دے ایں کہ دشمن ءَ ھمک تک ءَ ھمک پندل ءَ بے سوب ءُ بلوچ راجی آجوئی ءِ رھبند ءِ روانی سرجم بیت کت بہ کنت اِنت-
براس ءِ جارکش ءَ گوشتگ کہ بلوچ مڈیانی سر ءَ زورگری ءَ کسے ءِ منگ نہ بیت اِنت- براس اے تک ءَ سدک کنت اِنت کہ چین ءَ ھوار کجام ھم زورگیر پاکستان ءِ ھواری ءَ بلوچ مڈیاں برت نہ کنت اِنت – براس ءَ اے پیسلہ داری ، سپارتی ءُ نزریات ءِ گاماں سربوگ ءَ اھد کتگ ءُ نی اے جنگ گیش ترند بیت اِنت ءُ ترندی ءَ دیم ءَ روت انت دانکہ بلوچ راجی آجوئی ءَ راستی ءَ بہ بہ ات اِنت-
زورانسری بیگواھیں مردمانی کھول ءُ بلوچ یکجھتی کمیٹی ءِ نندانک سوراب سی پیک دگ سر ءَ سیمی روچ ءَ ھم برجاہ ءَ اِنت، دگہ دو بیگواھیں مردمانی کھول زھرشانی ءَ ھوار بیتگ اَنت، بیگواھیں مردمانی یل کنائینگ ءَ تاں زھرشانی برجاہ دارگ جار جتگ-
سوراب نندانک سیمی روچ ءَ دگہ دو کھول بیگواھیں فضل بلوچ ءُ نصراللہ بلوچ ءِ کھول ھم نندانکجاہ ءَ سر بیتگ اَنت وتی مردمانی یل کنائینگ ھاتر ءَ زھرشانی ءَ ھوار بیتگ اَنت- اے وھد ءَ نندانک ءَ ساڑی سرجم دوازدہ بیگواھیں ورنایانی کھول اے زھرشانی ءِ بھر اَنت-
سیمی روچ ءَ نندانک ءِ سبب ءَ کراچی شال شھدگ ءُ سی پیک روٹ نیمگ ءَ گاڑیانی دراجیں لین لگّ اِتگ-
زانگ بہ بیت گوستگیں روچ ءَ واکدار ءَ کھول ءَ دو مردم ءِ یل کنائینگ ءِ دلجمی داتگ بلے کھول گوشتگ کہ زورانسری بیگواہ سرجمیں نُھیں مردم یل کنگ بہ بنت-
دومی نیمگ ءَ ھب ءَ زورانسری آوار جنی ءِ نندانک سیمی روچ ءَ برجاہ مروچی سُھب ءَ پولیس ءَ زھرشانی کنوکیں زالبول ءُ چُکانی سر ءَ تاکت کامرز کتگ-
پولیس ءَ زھرشانی کنوکانی سر ءَ تیرگواری ءَ ھوار لَٹ ءُ کُٹ ھم کتگ ءُ بیگواھیں مردمانی کھول ءُ بلوچ یکجھتی کمیٹی ءِ باسک دزگیر کتگ اَنت-
نندانک ءَ نشتگیں زھرشانی کنوکانی گوشگ اِنت کہ پیرزالیں زالبولاں ھوار نُھ مردم پولیس ءَ دزگیر کتگ ءُ ناشناسیں جاھے ءَ برتگ اَنت – پولیس لَٹ ءُ کُٹ ءَ اَبید کھول نندانک برجاہ ءَ اِنت-
ھمے وڑ مستونگ ءِ دمگ کردگاپ ءَ ھم دومی روچ ءَ زورانسری آوار جنی ءِ ھلاپ ءَ بُنجاھی شھدگ سر ءَ نندانک برجاہ-
چہ کراچی ءَ ھمگرنچیں دمگ بلوچستان ءِ باپاری شھر ھب ءَ زورانسری بیگواھیں مردمانی کھول ءِ پُرایمنیں زھرشانی سر ءَ پاکستانی پوج ءِ تیرگواری، ءُ زالبولانی دزگیری ءِ پُشدر ءَ شھر ءِ سرجمیں باپاری بُنجاہ بند اَنت- شھریاں پوج نیمگ ءَ چہ زالبول ءُ چُکانی سر ءَ تاکت کارمرز سر ءَ ھم ءُ زھری درشان کنان ءَ گْوشتگ کہ یک نیمگے ریاست آیانی دوستناکاں بیگواہ کنت دومی نیمگ ءَ اشاں چہ ھک پچ گرگ بیگ ءَ اِنت، یک شھری یے یا زالبول رمضان المبارکیں ماہ ءَ پہ شوک دگ سر ءَ نند اِیت ءُ زھرشانی نہ کنت بلکیں ریاست ءَ آ ھما ھد ءَ لاچار کتگ اَنت-
دومی نیمگ ءَ بھوانی ءِ ھند کراچی، شال شھدگ سر ءَ زالبولانی زھرشانی یکشل ءَ برجاہ ءَ اِنت، آئی ءَ گْوشتگ ھب ءِ مھلوک ءَ چہ دزبندی اِنت کہ آ اے زھرشانی ءَ ھوار بہ بنت-
