TBP Balochi

روکپتی بلوچستان ءَ بندوکیں یک کسے ءُ چہ مشھد ءَ سیادی داروکیں یک زالبولے ءَ چار کس ماں مشھد ءَ وکیل آباد زندان ءَ پاھو دیگ بیتگ اَنت-

اھوالانی رد ءَ پاھو دیگ بیتگیں مردمانی پجار آسیہ قوی چشم ء غلام رضا جھمنند حالق آباد مشھد، جلال افاق جھمنند مشھد حالق آباد، مسعود ریگی ء کریم جھمنند مشھد ءُ زاھدان، عارف صدیق پور جھمنند کرمان ءِ ناماں زانگ بیتگ انت-

اھوالانی رد ءَ اے مردم جتا جتائیں وھداں دزگیر کنگ ءُ برگ بیتگ انت-

اھوالانی رد ءَ مردمانی سر ءَ ایرانی آمیدگس ءَ بھتام جتگ کہ اے مردم گوں نشہ واپار ءَ بندوک بیتگ انت-

اھوالانی رد ءَ ایشانی توک ءَ مسعود ریگی گوستگیں یک روچے ءَ پیش ءُ آ دگہ زِک پاھو دیگ بیتگ انت-

بلوچستان ءِ دمگ زھری ءَ جمعیت علماء اسلام ءِ راھشون غلام سرور یک اُرشے ءَ بیران بیتگ-

بنداتی ھالانی رِد ءَ آ زھری نندانک ءَ چہ واتر روگ ءَ بیتگ کہ ناشناسیں سلاہ بندیں مردماں تراسانی ھند سر ءَ آ نشانگ کتگ – چریشی ءِ آسر ءَ جے یو آئی ءِ راھشون غلام سرور وتی ھمراہ امان اللہ ءَ ھوار بیران بیتگ-

اُرش ءَ جے یو آئی ءِ راھشون غلام سرور ءِ پھازوک ھم ٹپی بیتگ-

کراچی ءِ دمگ ملیر ءَ یاسر بلوچ ءِ زورانسری بیگواھی ءِ ھلاپ ءَ مرچی ھشت گنٹا ءَ دراجیں نندانک ءَ رند زھرشانی ءِ ننداک ھلاس بوتگ۔ کھول ءَ یاسر بلوچ ءِ آجوئی ءِ واستا انتزامیہ ءَ دو روچ ءِ وھد داتگ گشتگ ئِے کہ اگاں آ آجو نہ بوت گڑا آئندہ دیم ءِ گامگیج ءِ جار جنگ بیت انت۔

بلوچستان ءِ جتا جتائیں دمگاں زورانسری بیگواھیں مردمانی کھول رمزان ءِ شرپ دابیں ماہ ءِ بندات ءَ دگانی سر ءَ نندانک کنگ ءَ مجبور اَنت، وھدیکہ ھکومت مزاکرات ءِ تہ ءَ ناکام بوتگ۔چہ انتزامیہ ءِ نیمگا نندانک ءِ ھلاس کنگ ءِ واستا کھول ترس ءُ بیم دیگ بوتگ۔

زھرشانی کنوکانی گوشگ اِنت کہ دانکہ ھکومت زورانسری بیگواھیانی ھچ وڑیں کار ءُ کرد نہ کن اَنت

بلوچ کوم وتی دوستگین مردمانی زورانسری بیگواھی ءِ ھلاپ ءَ ننداک ءَ برجم داریں ءُ آیانی سلامتی ءِ آجو ءِ واستا ھرچ وڑیں جُھد ءَ برجم دار اِیں۔

بیگواھینانی پجار، بھادر علی کھیازئی، بشیر کھیازئی، علی رضا کھیازئی ءِ واستا کوئٹہ ءِ برجاھیں ننداک روانک چوشکہ گولی مار چوک، مغربی بائی پاس، کلی قمبرانی، سریاب کسٹم چوک ءِ سر ءَ نندانک ءِ روانک برجم اِنت دانکہ چہ ھکومتی گل ءَ مزاکرات کامیاب نہ بنت جتا جتائیں جاھانی نندانک برجم بیت۔

سلاہ بندیں مردماں لیویز چوکی ءِ سر ءَ اُرش کتگ –

مستونگ ءِ دمگ کردگاپ ءَ سلاہ بندیں مردماں سربند لیویز چیک پوسٹ ءِ سر ءَ اُرش کتگ- اود ءَ سلاہ بندیں مردماں چوکی ترندیں تیرگواری ءِ نشانگ کتگ-

لیویز چوکی ءِ سر ءَ سلاہ بندیں مردمانی اُرش ءِ آسر ءَ جاڑیگیں یک لیویز کارندھے زدگ بیتگ-

وئیل ءِ ھال ءِ سر بوگ ءَ گیش کارندہ ءُ پورسز وئیلجاہ ءَ سر بیتگ انت ءُ دمگ اش انگیر کتگ- ءُ اُرشکارانی پٹ ءُ پول اش بندات کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھشت فروری ءِ شپ ءَ بی ایل ایف ءِ سرمچاراں بلوچستان ءِ تیاب دپی شھر پسنی ءِ دمگ ریک پشت ھند سر ءَ موباھل ٹاور ءَ ھوار مشینری مانداشتگ اَنت-

جارکش ءَ گْوشتگ دگہ یک اُرشے بیست ھشت فروری ءِ شپ ءَ ادار یک نزیک ءَ سرمچاراں نوشکی ءِ دمگ زرین جنگل ءَ ھم سرمچاراں اس ٹیلی نار کمیونکیشن شرکت ءَ چہ ھمگرنچیں ٹاور تراکناکیں شوراں گوں تراکینتگ ءُ دومی مشینری مانداشتگ اَنت-

جارکش ءَ گْوشتگ کہ بلوچستان کوچگی دمگ ءَ زرورت ءَ چہ گیش ھال اِھوالی ٹاورانی پٹ کنگ گوں تُرندی ءَ برجاہ ءَ اِنت آیانی مکسد ھال اھوالی ٹاوراں پٹ کتگیں چاریگری سسٹم ءَ چہ سرمچارانی سُر ءُ پرانی دارگ اِنت-

جارکش ءَ گْوشتگ کہ بی ایل ایف اے دوئیں اُرشانی زمہ واری ءَ منّ اِیت ءُ سرجمیں بلوچستان ءَ ھال اھوالی ٹاورانی شنگ کنوکیں شرکتاں مکن کن ایں کہ آ وتی نزام ءَ زورگریں ریاستی پوج ءُ انٹیلیجنس ادارھاں آسراتی دیگ ءَ چہ دزکش بہ بنت اگاں ناں آ وتی تاوان ءِ زمہ وار وت بنت

بلوچستان ءَ زورانسری آوار جنیانی ھلاپ ءَ مزنیں کچے ءَ زھرشانی برجاہ، جتاجتائیں ھندانی سر ءَ شھدگ بند-

بلوچ یکجھتی کمیٹی جھالاوان ریجن ءُ اسرمندیں کھول ءَ سوراب سی پیک دگ سر ءَ دومی روچ ءَ نندانک برجاہ، دو رند ءَ ڈپٹی کمشنر سوراب ءِ گوم ءَ گپ دیوان بے سوب بیتگ – اسرمندیں کھول گْوشگ اِنت کہ آ نُھ کھولاں ھمگرنچ اَنت ءُ وتی گُڈی بیگواھیں مردمانی یل کنائینگ ءَ تاں نندانک برجاہ دار اَنت-

زانگ بہ بیت کہ پاکستانی پوج ءِ دست ءَ مجیب الرحمٰن ء محمد انور، نُھ جنوری دوھزار بیست پنچ ءِ بیگاہ ھپت ءَ چہ زھری ءَ بیگواہ بیتگ، عتیق الرحمٰن ء عبد القادر، سیزدہ جنوری دوھزار بیست پنچ ءِ نیم روچ ءِ ساھت دو ءَ چہ ملگزار، بیگواہ بیتگ – محمد حیات ء محمد عمر، کہ ھژدہ فروری دوھزار بیست پنچ ءِ نیم روچ دو ءَ چہ زھری ڈاک ءَ بیگواہ بیتگ – حافظ سراج احمد ء عبدالحمید، کہ دہ اکتوبر دوھزار بیست دو ءَ چہ سردار دودا خان اسٹیڈیم ، زھری ءَ بیگواہ بیتگ-

یاسر احمد ء گل محمد، کہ پنچ جون دوھزار بیست سے ءَ چہ زھری بلبل ءَ بیگواہ بیتگ- زکریا ء سعد اللہ، کہ سی اگست دوھزار بیست یک ءَ چہ پنجگور بیگواہ بیتگ- نوید احمد ء عبد رشید، کہ بیست نُھ اپریل دوھزار بیست سے ءَ ویگن ءَ ایر گپتگ چہ پیر عمر، ھُزدار ءَ بیگواہ بیتگ- محمد شفیق ء محمد حیات، کہ سی یک اگست دوھزار بیست دو ءَ چہ گدان ھوٹل زھری ءَ بیگواہ کنگ بیتگ- کھول ءَ آئی ءِ یل کنائینگ ءَ تاں بلوچ یکجھتی کمیٹی جھالاوان ریجن ءِ گوم ءَ زھرشانی ءِ برجاہ دارگ جار جتگ-

اود ءَ تربت ءَ زورانسری بیگواھیں مردمانی کھول ءَ یکرندے پد ءَ ایم ایٹ شھدگ جدگال ڈن سر ءَ بند کتگ-

چہ بھمن ءَ بیگواہ کنگ بیتگیں نعمان رفیق، اسماعیل خیر محمد ءُ نعیم بشیر ءِ کھول ءِ مردماں جدگال ڈن ( ڈی بلوچ پوائنٹ ) سر ءَ ایم ایٹ شھدگ نندانک داتگ ءُ بند کتگ-

کھول مردماں دمگی رسانکدر ءَ چہ تران کنان ءَ گْوشتگ کہ آ چہ بھمن ءَ بیگواہ کنگ بیتگ کہ آئی ءِ یل کنائینگ ھاتر ءَ ما اشی ءَ ساری ھم جتاجتائیں وھداں زھرشانی کتگ ءُ انتزامیہ ءَ مارا یل کنائینگ ءِ دلجمی داتگ بلے اشی ءَ اَبید آ یل کنگ نہ بیتگ چریشی ءَ لاچار بیتگ ءُ ما دوبر مروچی ایم ایٹ شھدگ بند کتگ-

زانگ بہ بیت کہ چہ بھمن ءَ یکیں شپ ءَ شش ورنا بیگواہ کنگ بیتگ آیانی تہ ءَ سے یل کنگ بیتگ بلے تنی وھدے نعمان رفیق، اسماعیل خیر محمد ءَ نعیم بشیر بیگواہ اَنت- آئی ءِ کھول ءَ یل کنائینگ لوٹ کتگ-

وھدے کہ زورانسری بیگواہ بھادر علی، علی رضا ءُ بشیر احمد کیازئی ءِ کھول نیمگ ءَ چہ بلوچستان ءِ بُنجاھی شھر شال ءِ جتاجتائیں دمگ گولیمار چوک، کسٹم سریاب ءُ بروری بائی پاس سر ءَ نندانک برجاہ-

کھول ءَ گْوشتگ کہ ما انتزامیہ ءَ تچک کنگ لوٹ ایں کہ دانکہ زورانسری آوار جنگ بیتگیں مردم یل کنگ نہ بیت اَنت زھرشانی ءَ تُرندتر کن ایں ءُ شال ءِ بُنجاھی شھدگاں ھم بند کن ایں- ما بلوچ راج ءَ چہ دزبندی کن ایں کہ مئے توار جوڑ بہ بنت ءُ دوستناکانی یل کنائینگ ءَ توار چست بہ کن اَنت-

آئی ءَ گْوشتگ کہ ما نہ لوٹ ایں کہ مئے براتاں درکانودی کوش یا دروگیں میڑاں نشانگ بکنت- مارا اے ریاست ءُ آئی ءِ ادارھانی سر ءَ ھچ ستک نیست-

ھمے وڑ ھب بھوانی ءِ نندانکجاہ ءَ سیمی روچ ءَ ھم نندانک برجاہ – گوستگیں شپ ءَ انتزامیہ آیگ ءَ پد گپ دیوان بے سوب – اے وھد ءَ نندانکجاہ ءَ یاسر حمید، جنید حمید، نصیر جان، ندیم بلوچ، احسان بلوچ، امین بگٹی بلوچ ءِ کھول نشتگ اَنت- کہ آیانی لوٹ ریاست ءَ چہ آیانی دوستناکانی پہ سلامتی یل کنائینگ لوٹ کتگ-

آیاں گوشتگ کہ ریاست ءُ آئی ءِ نمائندگان وھدے اتکگ اَنت آیانی کار تھنا ءُ تھنا لبزی بیتگ اَنت بلے شریں گامگیج نہ زرتگ اِت-

مستونگ ءِ دمگ کردگاپ ءَ ھم زورانسری آوار جنگ بیتگیں مردمانی کھول ءَ بُنجاھی شھدگ سر ءَ نندانک داتگ کھول ءَ جاوید سرپرہ، زاکر سرپرہ، راشد سرپرہ ءُ دگہ ھوار اَنت-

کردگاپ زھرشانی ءَ چہ انتزامیہ ءَ بے ادبی کتگ آیاں راہ پچ نہ کنگ ءِ سر ءَ بیھار داتگ اَنت-

پسنی ءَ نندانک ءَ پد چہ بیگواھیں مردماں پنچ مردم یل کنگ بیتگ ءُ لوگاں سر بیتگ اَنت-

ھالانی رِد ءَ احمد رضا آصف اللہ بخش، فیصل صوالی، ساجد صوالی ءُ محمد رضا ء رزاق یل کنگ بیتگ اَنت-

زانگ بہ بیت کہ اے مردمانی یل کنائینگ ھاتر ءَ پشمبے ءِ روچ ءَ کھول ءَ نندانک داتگ پسنی زیرو پوائنٹ ھند سر مکران کوسٹل ھائی وے گاڑیانی واستا بند کتگ- چریشی ءَ پد پاکستانی پوج ءَ آ دیم ءَ آورتگ ءُ یل داتگ اَنت-

بلوچستان ءِ دمگ کوھلو ءَ پاکستانی پوج ءِ لشکر کشی برجاہ

ھالانی رِد ءَ پاکستانی پوج نوئے شم، بالا ڈھاکہ ءُ کش گوراں پوجی لشکر کشی ءَ دلگوش اِنت-

گوستگیں یک ھپتگے ءَ چہ پاکستانی پوج ءَ کوھلو ءِ دمگ بارکھان ءِ جتاجتائیں ھندانی سر ءَ لشکر کشی کنگ ءَ اِنت- پوج ءَ اے میان ءَ شش مردم ءَ زورانسری آوار جنی ءَ ھوار دمگی مردمانی لوگ مانداشتگ اَنت-

لشکر کشی ءَ دلگوشیں پوج سلاہ بندیں مردماں اُرش ءِ نشانگ کتگ-

دمگی اِھوالکار رِد ءَ سے روچ ءَ تاں تُرندیں میڑاں پوج ءِ مزنیں کچے ءَ جانی تاوان چست کنگ کپتگ اود ءَ ایمبولنسز ءِ روگ آیگ گندگ بیتگ اَنت-

واکدار ءَ تنی وھدے اے درگت ءَ ھچ وڑیں درشان دیم ءَ نیتکگ-

روکپتی بلوچستان ءِ دمگ ھاش ءَ ایرانی لشکر ءَ بیڑ برتگ ءُ دو مردم آوار جتگ ءُ گون وت برتگ انت-

اھوالانی رد ءَ ایرانی لشکر ءَ ھاش ءِ دمگ قادر آباد ءَ دو مردم چہ لوگ ءَ دزگیر کتگ ءُ برتگ اَنت-

اے مردمانی پجار درمھمد گمشادزئی ء پکیر ءُ کریم گمشادزئی ء مھمد جھمنند قادر آباد ھاش ءِ ناماں زانگ بیتگ انت-

آوار جنگ ءُ برگ ءَ پد اے دوئیں مردمانی بارو ءَ دگہ سرپدی دیم ءَ نیتکگ اَنت-

چہ تربت ءَ زورانسری بیگواہ کنگ بیتگیں ورنا دین جان ءَ ھوار دگہ بیگواھیں مردمانی کھولاں جدگال ڈن ( ڈی بلوچ پوائنٹ ) ءَ ایم ایٹ شھدگ بند کتگ ءُ نندانک دیگ ءَ اَنت-

زھرشانی کنوکانی گوشگ اِنت کہ دانکہ دین جان ءَ ھوار دگہ بیگواھیں مردمانی یل کنائینگ دلجمی دیگ نہ بیت دانکہ ایم ایٹ شھدگ جدگال ڈن ھند سر بند بیت-

آیانی گوشگ اِنت دین جان ءُ دگہ بیگواھیں مردمانی یل کنائینگ ھاتر ءَ ما پیسر ءَ ھم زھرشانی کتگ بلے انتزامیہ ءَ مئے گوم ءَ یل کنائینگ کول کتگ زھرشانی ھلاس کنائینتگ بلے اشی ءَ اَبید آ یل نہ کتگ اَنت-

زانگ بہ بیت اے وھد ءَ تربت، پسنی ءَ ھوار ھب چوکی، سوراب ءُ شال ءَ زورانسری آوار جنی ءِ ھلاپ ءَ نندانک برجاہ ءَ اِنت ءُ بازیں دگ گاڑیانی واستا بند اَنت-

یونائیٹڈ بلوچ آرمی ءِ جارکش مزار بلوچ ءَ شنگ کتگیں درشان ءِ تہ ءَ گْوشتگ کہ یو بی اے ءِ سرمچاراں بیست چار فروری ءَ کلات ءِ دمگ نرمک ءَ ریاستی چاریگ نصرالدین ء واحد بخش جھمنند جلال آباد مچ سر ءَ تیرگواری کتگ چریشی ءِ آسر ءَ نصرالدین جاہ پہ جاھی مرتگ-

جارکش ءَ گْوشتگ کہ اے مرد گوستگیں بازیں سالاں چہ پاکستانی چیریں ادارھانی واستا کار کنگ ءَ۔بیتگ اے وڑیں سرجمیں مردماں کڈن کن ایں کہ آ زورگریں ریاست ءِ چاریگری ءُ پوجی چیک پوسٹاں ءُ ریاستی سرجمیں ادارھاں چہ گستا بہ بنت اگاں ناں آ وتی جان ءُ مال ءِ زمہ وار وت بنت-