TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بیست ھشت فروری ءَ بی ایل ایف ءِ سرمچاراں نیمروچ ءِ ساھت دو ءِ نزیک ءَ کیچ ءِ بُنجاھی شھر تربت ءِ دمگ میری ءَ برجاھیں زورگریں پوج ءِ چوکی سر ءَ پیسر ءَ گرنیڈ لانچر ءِ بازیں گولھے آس داتگ پد ءَ اشی ءَ پد مزنیں سلاھاں چہ اُرش کتگ-

جارکش ءَ گْوشتگ کہ سرمچاراں اے اُرش ءَ دُژمن ءِ دو کارمند ٹپی بیتگ اَنت وھدے کہ چوکی ءَ ھم تاوان رس اِتگ – اُرش ءَ پد زورگریں پوج ءِ کارمنداں داں دیراں نزیکیں آبادیانی نیمگ ءَ تیرگواری کتگ-

جارکش ءَ گْوشتگ کہ دگہ یک کاروائی ءُ مروچی نیمروچ ءِ ساھت دوازدہ ءِ نزیک ءَ بی ایل ایف ءِ سرمچاراں ھاران کُلّان ءِ ھند سر ءَ بند ساچی شرکت ءِ سائٹ سر ءَ اُرش کتگ یک ٹریکٹرے ءَ ھوار مشینری مانداشتگ اَنت، وھدے کہ اود ءَ ساڑی ئیں کارکنوکیں دری مردم کڈن کتگ اَنت ءُ یل داتگ اَنت-

جارکش ءَ گُڈی ءَ گْوشتگ کہ بی ایل ایف اے دوئیں کاروائیانی زمہ واری ءَ منّ اِیت ءُ بلوچستان ءِ وتواجھی ءَ تاں پاکستانی پوج، پوجی شوربندی ءُ پُلپانچیں شوربندیانی سر ءَ اُرش برجاہ بنت-

بلوچ نودربر یاسر بلوچ ءِ زورانسری آوار جنی ءِ ھلاپ ءَ بے نظیر بھٹو یونیورسٹی لیاری ءِ بلوچ اسٹوڈنٹس کونسل نیمگ ءَ یونیورسٹی نیمگ ءَ یک زھرشانی روانکے کشگ بیتگ اود یونیورسٹی ءِ سرجمیں نودربراں بھر زرتگ وتی سنگتیں نودربرانی یل کنائینگ لوٹ کتگ-

زانگ بہ بیت کہ یاسر بلوچ کہ بے نظیر بھٹو یونیورسٹی لیاری ءَ میڈیا سائنس ءَ چہ گریجویٹ نودربرے بیست پنچ فروری ءِ شپ ءَ کراچی گلشن اقبال ءِ دمگ ءَ چہ وتی لوگ ءَ روگ ءَ بیتگ پاکستانی پوج ءَ زورانسری آوار جنی ءِ نشانگ کتگ-

آئی ءِ کھول ءَ پریس کانفرنس کنان ءَ آئی ءِ یل کنائینگ لوٹ کتگ وھدے کہ مروچی بلوچ اسٹوڈنٹس کونسل لیاری نیمگ ءَ چہ یونیورسٹی ءَ روانکے کش اِتگ ءُ یاسر بلوچ ءِ یل کنائینگ لوٹ کتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ کہ سرمچاراں شال، پنجگور ءُ تربت ءَ سَے جتا جتائیں اُرشاں پاکستانی پوج نشانگ کتگ، چریشاں دشمن ءِ سَے کارندہ کشتگ انت ءُ کم چہ کم دَہ کارندہ زدگ کتگ انت-

جارکش ءَ گوشتگ بلوچ لبریشن آرمی ءِ سرمچاراں مروچی شال ءِ شھر ءَ جان مھمد دگ ءَ زورگریں پاکستانی پوج ءِ یک گاڑی یے ریموٹ کنٹرول بمبے ءِ نشانگ کتگ- سرمچاراں دشمن ءِ گاڑی ھما وھد ےَ نشانگ کتگ وھدیکہ دگ ءَ گوزگ ءَ بیتگ – تراک ءِ آسر ءَ سَے کارندہ جاہ پہ جاہ ءَ مرتگ انت ءُ سوبیدار ءَ ھوار پنچ کارندہ زدگ کتگ انت ءُ گاڑی سرجم ءَ تباہ بیتگ-

آئی ءَ دیمتر ءَ گوشتگ سرمچاراں یک دگہ کاروائی یے گوستگیں شپ ءَ پنجگور ءِ شھر ءَ زورگریں پاکستانی پوج ءِ بنجاھی بنجل ءِ پھریزی ءِ چوکی ءِ سر ءَ ھستین کارندی گرنیڈ لانچر گولہ نشانگ کتگ- تراک ءِ آسر ءَ دشمن ءِ سَے کارندہ زدگ بیتگ انت-

آئی ءَ گوشتگ یل دگہ کاروائی ءِ بلوچ لبریشن آرمی ءِ سرمچاراں 23 فروری ءِ شپ ءَ تربت ءِ دمگ ناسر آباد ءَ زورگریں پوج ءِ گرنیڈ لانچر ءِ گون ءَ نشانگ کتگ، اُرش ءِ آسر ءَ زورگریں پوج ءِ کم چہ کن دو کارندہ زدگ بیتگ انت-

گڈسر ءَ گوشتگ بلوچ لبریشن آرمی اے دراھیں اُرشانی زمہ واریاں من ایت-

بلوچستان ءِ جتاجتائیں دمگاں بیگواہ کنگ بیتگیں مردمانی کھول وتی مردمانی یل کنائینگ ھاتر ءَ نندانک ءِ داتگ-

گیشیں ھالانی رِد ءَ چہ بلوچستان ءَ زورانسری آوار جنی ءُ بیگواھیں دوستناکانی یل نہ کنگ ءِ بگیری ءَ جتاجتائیں شھراں نندانکانی دْرچ برجاہ ءَ اِنت، بیگواھیں مردمانی کھول نندانک داتگ کراچی چہ شال ءُ مکران ءَ رؤکیں سرجمیں شھدگ بند کتگ اَنت-

زھرشانی کنوکاں شال کراچی، کراچی ءَ چہ مکران ءَ ھوار سی پیک دگ سر ءَ نندانک داتگ شھدگ گاڑیانی واستا بند کتگ اَنت-

گوستگیں دو روچ ءَ چہ کراچی ءِ نزیک ءَ بلوچستان ءِ باپاری شھر ھب چوکی بھوانی ءِ ھند سر ءَ شال کراچی راجی شھدگ سر ءَ نندانک برجاہ ءَ اِنت- ھب چوکی نندانک ءَ بیگواھیں دو براتانی یاسر ءُ جنید ء عبدالحمید سرپرہ، ندیم بلوچ، نصیر بلوچ، اِحسان بلوچ ءُ امیم بگٹی کھول ھوار اَنت-

دومی نیمگ ءَ چہ زھری ءَ زورانسری آوار جنی ءِ نشانگ بیتگیں نُھ بیگواھیں مردمانی کھولاں مروچی سوراب ءِ نزیک ءَ دو جتاجتائیں نندانک سر ءَ نندانک داتگ کراچی چہ شال ءُ شال ءُ کراچی چہ مکران ءَ رؤکیں سی پیک شھدگ گاڑیانی واستا بند کتگ-

ھمے وڑ پسنی ءِ نزیک ءَ بیگواھیں مردمانی کھول یکرندے پد ءَ مُچ بیتگ اَنت کیچ ءَ رؤکیں دگ سر ءَ نندانک داتگ بند کتگ چریشی ءِ سبب ءَ گوادر ءَ ھوار دگہ دمگاں رؤکیں سرجمیں گاڑیانی روگ آیگ بند کتگ اَنت-

ھمے وڑ شپ وھد ءَ شال ءَ پاکستانی پوج ءَ یک لوگے ءِ سر ءَ بیڑبرتگ دو برات آوار جتگ اَنت چریشی ءَ پد آئی ءِ کھول نیمگ ءَ چہ شال ویسٹرن بائی پاس بند کتگ-

تنی وھدے بلوچستان ءِ چار جتاجتائیں شھراں بازیں ھندانی سر ءَ زھرشانی نندانکانی دْرچ برجاہ ءَ اِنت وھدے کہ بیگواھیں مردمانی کھول ءَ وتی دوستناکانی یل کنائینگ ءَ تاں نندانک برجاہ دارگ جار جتگ-

بلوچستان ءِ بُنجاھی شھر شال ءَ ناشناسیں مردماں پاکستانی پوج ءِ گاڑی گوں بمب اُرشے ءَ نشانگ کتگ-

پوج ءِ گاڑی جان محمد دگ ءَ نشانگ کنگ بیتگ-

ھالانی رِد ءَ گاڑی ءَ سوار کارمند مرتگ ءُ ٹپی بیتگ اَنت بلے واکدار نیمگ ءَ درشان ءِ آیگ پش کپتگ-

اُرش زمہ واری انگت ھچ گل ءَ نہ زرتگ-

بلوچستان ءِ دمگ بولان ءُ مستونگ ءَ پاکستانی پوج ڈیتھ اسکواڈ ھمراھی ءَ لشکر کشی برجاہ، لشکر کشی ءَ ڈرون بالگرد ءُ ھیلی کاپٹر بھر زیرگ ءَ اَنت-

پاکستانی پوج ءَ مروچی سھب ءَ چہ بولان ءُ مستونگ ءِ جتاجتائیں دمگاں مچ ، پیر غائب، بی بی نانی، ناگاھو، کابوئی، دلبند، مرو، اسپلنجی ءُ کش گوراں مزنیں کچے ءَ جھلی ءُ بُرزی لشکر کشی بندات کتگ-

اِھوالکار ءَ ٹی بی پی ءَ گْوشتگ کہ پاکستان پوج ءِ ھمراھی ءَ آئی ءِ جوڑ کتگیں ڈیتھ اسکواڈ ءِ کارمند ھم لشکر کشی ءَ بھر زیرگ ءَ اَنت وھدے کہ دمگ ءَ ڈرون بالگرد ءُ تیرگواری ھیلی کاپٹرانی بُرز بالی ھم برجاہ ءَ اِنت-

دمگی اِھوالکار رِد ءَ پوج ءِ مزنیں کچے ءَ دمگ ءَ پترتگ ، بلے تنی وھدے دزگیری یا جانی تاوان درگت ءَ ھچ وڑیں سرپدی نہ رس اِتگ-

واکدار ءَ انگت اے درگت ءَ ھچ وڑیں درشان شنگ نہ کتگ-

بلوچستان ءِ بُنجاھی شھر چہ شال ءَ پاکستانی پوج ءُ چیریں ادارھانی کارمنداں دو مردم زورانسری آوار جتگ ءُ بیگواہ کتگ اَنت- کھول ءَ زھرشانی کنان ءَ شھدگ بند کتگ-

شال ءِ دمگ چہ ویسٹرن بائی پاس ءَ شپ وھد ءَ پاکستانی پوج ءُ چیریں ادارھانی کارمنداں ٹکری بھادر کھیازئی ءُ آئی ءِ برات علی رضا کھیازئی زورانسری آوار جتگ ءُ بیگواہ کتگ اَنت-

اِھوالکار رِد ءَ گوستگیں شپ ءَ کساس ادار سے ءَ پوج ءِ کارمنداں ٹکری بھادر کھیازئی ءُ آئی ءِ برات علی رضا کھیازئی چست کتگ ءُ برتگ-

زانگ بہ بیت ٹکری بھادر علی پیسر ءَ ھم زورانسری آوار جنی ءِ نشانگ کنگ بیتگ-

دوئیں براتانی زورانسری آوار جنی ءِ ھلاپ ءَ ویسٹرن بائی پاس شال ءَ گاڑیانی روگ آیگ بند کتگ-

روکپتی بلوچستان ءِ دمگ بیرجند ءَ بندیگ جاہ ءَ یک بندیگیں بلوچے پاھو دیگ بیتگ –

گیشیں اھوالانی رد ءَ بندیگیں بلوچ ءِ پجار عبداللہ سپرزئی ءِ نام ءَ زانگ بیتگ-

اھوالانی رد ءَ عبداللہ سپر زئی پنچ سال پیش نشہ باپاری ءُ سلاھانی بھتام ءَ دزگیر کنگ بیتگ – چریشی ءَ پد آئی ءِ سر ءَ آمیدگس ءَ پاھو دیگ ءِ ھکم داتگ –

زانگ بہ بیت روکپتی بلوچستان ءَ بندیگیں مردمانی پاھو دیگ ءِ درچ یکشل ءَ برجاہ انت- کہ اود ءَ کساس گیشترین مردم نشہ باپاری ءِ بھتام ءَ پاھو دیگ بوگ ءَ انت-

لس سیاسی ءُ چاگردی مردمانی گوشگ انت کہ اے بندیگین مردماں آمیدگس ءَ وتی سپاھی کنگ ءِ موہ دیگ بوگ ءَ نہ اَنت-

ھب چوکی ءَ بیگواھیں کھولاں یکرندے پد ءَ زھرشانی کنانی ءَ شال کراچی راجی شھدگ ءِ سر ءَ نندانک داتگ ءُ بند کتگ ، کھول ءَ ھب بھوانی ءِ نزیک ءَ شھدگ ءِ سر ءَ زھرشانی نندانک داتگ چریشی ءِ سبب ءَ گاڑیانی روگ ءُ آیگ بند کتگ-

زھرشانی کنوکانی گوشگ اِنت کہ آ دمگی انتزامیہ ءَ چہ گوستگیں ماہ ءَ کنگ بیتگیں گپ دیوان ءُ بیست روچ وھد آسر بیگ ءَ دوستناکانی بے سوبی ءِ ھلاپ نندانک دیگ ءَ اَنت-

ھب ءَ اے نندانک ءَ نوکیں دروشم ءَ گیش دگہ دو کھول ھوار بیتگ اَنت، ءُ نو یکجاھی ھساب ءَ شش کھول ھب بھوانی ءَ نندانک داتگ ءُ وتی بیگواھیں دوستناکانی یل کنائینگ لوٹ کتگ-

اے زورانسری آوار جنی ءَ پاکستانی پوج دست ءَ بیگواھیں مردمانی کھول نیمگ ءَ چہ گوستگیں ماہ ءَ ھب بھوانی ءَ نندانک داتگ اَت، چریشی ءَ جتاجتائیں بیگواھیں مردمانی کھول ءَ بھرزرتگ اَت-

اے کھول ءَ ڈی سی ءِ نمائندگ ءَ چہ دلجمی دیگ ءَ پد بیست روچ ءَ وھدے داتگ ، بلے اے مدت ءِ آسر بیگ ءَ ھم آیانی دوستناک یل کنگ نہ بیتگ اَنت اشی ءَ پد کھول ءَ ریاستی واکدار بے سنجیدگی سر ءَ زھرشانی نندانک دوبر بندات کتگ-

زھرشانی کنوکانی گْوشگ اِنت دانکہ اشانی دوستناک یل کنگ نہ بیت اَنت شھدگ بند بیت ءُ نندانک برجاہ بیت-

آیاں واکدار ءَ چہ زوت گامگیج ءِ دزبندی کتگ ءُ وتی دوستناکانی یل کنائینگ ءَ تاں زھرشانی ئیں نندانک جار جتگ-

دیمتر ءَ گْوشتگ بلوچ یکجھتی کمیٹی لسبیلہ ریجن ءَ بیگواھیں مردم ءِ کھول اے نندانک ءِ سرجمی ءَ پلامرزی جار جتگ ءُ لوٹ کتگ کہ ریاست وتی کولاں سرجم بکنت ءُ بیگواھیں مردماں یل بہ کن اِت-

بلوچ یکجھتی کمیٹی ءِ نیمگ ءَ برجم داشتگیں ھب چوکی، مستونگ ءُ پنجگور ءَ زھرشانی کنگ بیتگ-

گیشیں ھالانی رِد ءَ دوئیں بلوچستان ءَ ریاستی ڈیتھ اسکواڈز نیمگ ءَ چہ شھریاں ٹارگٹ کلنگ، پوج نیمگ ءَ چہ زورانسری آوار جنی گیشی ءُ بیگواھیں مردم دروگیں میڑاں کُشگ ھلاپ ءَ بلوچ یکجھتی کمیٹی ءِ نیمگ ءَ چہ جتاجتائیں دمگاں زھرشانی ءُ روانک برجم داشتگ-

بلوچ یکجھتی کمیٹی ءِ نیمگ ءَ چہ مروچی بیست ھپت فروری دوھزار بیست پنچ ءَ لسبیلہ پریس کلب ھب ءَ ریاستی پالیسی ءِ ھلاپ ءَ زھرشانی کتگ، زھرشانی کنوکاں کُشگ دوردیگ ” مارو پھینکو ” پالیسی ءِ تُرندی ءَ گیش کنگ ءَ زھرشانی کتگ-

زھرشانی کنوکاں مزنیں کچے ءَ مردماں بھر زرتگ آیانی تہ ءَ بیگواھیں مردمانی کھول ھم ھوار بیتگ آیاں وتی دوستناکانی زوت یل کنائینگ لوٹ کتگ-

دومی نیمگ ءَ بلوچ یکجھتی کمیٹی مستونگ ءَ بیگواھیں مردمانی دروگیں میڑاں کُشگ ٹارگٹ کلنگ ءُ زورانسری آوار جنی ءِ ھلاپ ءَ شھید سفر خان چوک ءَ چہ روانک کش اِتگ، روانک ءَ جتاجتائیں شھدگاں چہ گوزان شھید سلطان چوک سر ءَ نندانک دروشم ءَ زرتگ اود ءَ زھرشانی کنوکاں زورانسری آوار جنی ءِ ھلاس کنگ ءُ بیگواھیں مردم ءِ یل کنائینگ لوٹ کتگ-

بلوچ یکجھتی کمیٹی پنجگور زون ءَ ھم پنجگور جاوید چوک ءَ زھرشانی کتگ، چریشی ءَ مزنیں کچے ءَ شھری آیانی تہ ءَ زالبول ءُ چک ھوار بیتگ اَنت بلوچ ورنایانی ٹارگٹ کلنگ ءُ زورانسری آوار جنی ءِ ھلاپ ءَ زھرشانی کتگ-

زھرشانی کنوکاں لوٹ کتگ کہ ریاستی زُلم ءُ زوراکی دْرچ ءَ بند کنگ بہ بیت ءُ بیگواھیں مردماں زوت یل بہ کن اِت-

ھمے وڑ بلوچ یکجھتی کمیٹی ءَ جار جتگ گْوشتگ کہ بی وائی سی راھشون باندا شال ءَ یک پریس کانفرنس برجم داشتگ-