TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بیگاہ 3:04 ءَ بی ایل ایف ءِ سرمچاراں کیچ ءِ بُنجاھی شھر تربت ایئرپورٹ ءِ تھی دروازگ سر ءَ زورگریں پوج ءِ چیک پوسٹ سر ءَ گرینیڈ لانچر ءَ چہ اُرش کتگ-

جارکش ءَ گْوشتگ کہ سرمچاراں اے اُرش ھما وھد ءَ کتگ وھدے دُژمنیں پوج ءِ کارمند مزنیں کچے ءَ ساڑی بیتگ اَنت- زورگریں پوج ءَ چو مدامی وڑ ءَ لَس آبادی سر ءَ تیر جتگ-

جارکش ءَ گْوشتگ بی ایل ایف اے اُرش زمہ واری ءَ منّ اِیت ءُ راج ءَ چہ دزبندی کن ایں کہ آ میڑ وھد ءَ دُژمن ءِ پدکرد ءَ بزان اَنت وتی پھاز ءَ دلجمی بدے اَنت-

بلوچستان ءِ دمگ کیچ ءَ پاکستانی پوج ءَ یک مردمے ءِ لاش لیویز فورس دست ءَ داتگ-

گیشیں ھالانی رِد ءَ کیچ ءِ دمگ عبدوئی ءَ پاکستانی پوج ءَ یک لاشے لیویز ءِ دست ءَ داتگ کہ آئی ءِ پجّار کنگ ھاتر ءَ نادُراھجاہ ءَ برتگ-

نادُراھجاہ ءَ لاش ءِ پجّار وفا ء اللہ بخش جھمنند پنجگور پروم نام ءَ چہ بیتگ-

اِھوالکار رِد ءَ اے مرد ءِ بدن ءَ تیرانی نشانگ ھست اَنت- گمان کنگ بیگ ءَ اِنت کہ اے مرد پاکستانی پوج ءَ تیر جتگ ءُ کُشتگ-

بلوچستان ءَ مروچی دزکپتگیں اے دومی لاش اِنت اشی ءَ ساری چہ مستونگ ءَ یک ورنایے لاش دزکپتگ کہ آ تیر جتگ کُشتگ-

چہ شال ءُ کراچی ءَ پاکستانی پوج ءَ سے مردم آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی پجّار نصیر احمد ء نسیم احمد جھمنند کراچی، گلزار عالم جھمنند پنجگور ءُ بشیر احمد جھمنند شال نام ءَ چہ بیتگ اَنت-

اے مردمانی تہ ءَ گلزار عالم اقرا یونیورسٹی کراچی ءَ پنچمی سمٹر نودربرے آ کراچی ءِ دمگ چہ گلشن اقبال ءَ پاکستانی پوج ءَ آوار جتگ ءُ بیگواہ کتگ-

ھمے وڑ شال ءِ دمگ چہ بروری ءَ پاکستانی پوج ءَ بیست یک فروری ءَ بشیر احمد محمد حسنی جھمنند بروری دگ شال آوار جتگ چریشی ءَ پد آ بیگواہ ءَ اِنت-

ھُزدار ءِ دمگ گریشہ ءِ جھمنند صابر بلوچ کھول ءَ آئی ءِ زورانسری آوار جنی ءِ ھلاپ ءَ سی پیک دگ نندانک داتگ چریشی ءِ سبب ءَ ھرچ وڑیں روگ آیگ بند بیتگ اَنت-

گریشہ جھمنند صابر بلوچ ء علی دوست بیست شش فروری دوھزار بیست پنچ ءِ سُھب چار وھد ءَ چہ کراچی ءَ پاکستانی پوج ءُ چیریں ادارھانی کارمند زورانسری بیگواہ کتگ اَنت-

آئی ءِ یل کنائینگ ھاتر ءَ آئی ءِ کھول ءَ نال سی پیک دگ ڈاٹ کراس سر ءَ زھرشانی کنان ءَ سرجمیں روگ ءُ آیگ بند کتگ اَنت-

بلوچ یکجھتی کمیٹی نال زون ءَ گْوشتگ کہ ما اے برجاھیں نندانک ءِ سرجمی ءَ پلامرزی ءَ کن ایں ءُ نال راج ءَ چہ دزبندی کن ایں کہ آ اے نندانک ءَ زوت ءَ چہ زوت بھر بزور اَنت-

بلوچستان ءِ دمگ مستونگ ءَ زورانسری بیگواھیں زھور سمالانی ءِ یل کنائینگ ءِ ھاتر ءَ شال کراچی ءِ شھدگ ءِ سر ءَ دو روچاں برجاھیں زھرشانی آئی ءِ یل بیگ ءَ پد ھلاس بوتگ-

زھرشانی نندانک ءِ سروکاں اسسٹنٹ کمشنر مستونگ مھمد اکرم حریفال ءَ سوبمندین گپ ءُ تران کتگ ءُ بیگواھیں زھور سمالانی ءِ یل کنگ ءَ پد بنجاھی شھدگ روانی ءِ واستا سرجم ءَ پچ کنگ بیتگ-

زانگ بہ بیت پاکستانی پوج ءِ دست ءَ زورانسری بیگواہ بیتگیں زھور سمالانی ءِ یل کنائینگ ءِ ھاتر ءَ کھول ءَ دو روچ ءَ پیش بنجاھی شھدگ ءِ سر ءَ نندانک داتگ بیتگ-

بنداتی روچ ءَ نواب ھوٹل مستونگ ءِ ھند ءَ زالبول ءُ زھگاں بنجاھی شھدگ بند کتگ ءُ روانی مھتل کتگ انت پد ءَ دومی روچ ءَ کھول ءَ زھرشانی گیش کتگ ءُ تپتان داں شال ءُ کراچی ءِ شھدگ لکپاس ءِ ھند ءَ بند کتگ-

سَے جاھاں زھرشانی نندانک ءِ سبب ءَ گاڑیانی دراجیں لین لگ اتگ انت ءُ مساپر شد ءُ تن ءَ مھتل بیتگ انت-

بلوچستان ءِ دمگ چہ مستونگ ءَ یک ورنایے ءِ لاش دزکپتگ-

لاش مستونگ ءِ کوچگی دمگ لاکھا ءَ دگ ءِ کش ءَ دزکپتگ – پولیس ءِ رد ءَ ناشناسیں مردماں ورنا تیر جتگ ءُ کشتگ-

ھسپتال ءِ رد ءَ کشگ بیتگیں ورنا ءِ پجار تنویر اھمد ء مھمد ھسین بنگلزئی ءِ نام ءَ زانگ بیتگ-

سیئٹل ، واشنگٹن : بلوچ راجی زْرمبشت ( بی این ایم ) ءَ چہ امریکی شھر مننداں دزبندی کرتگ کہ آ بلوچ راجی وتواجوھی اگبال ءِ پلہ مرزی بہ کن اَنت ، بلوچستان ءَ برجاھیں پاکستانی زوراکیانی بگیری ءَ توار چست بہ کن اَنت ءُ چہ وتی سرکار ءَ بہ لوٹ اَنت کہ آ پاکستان ءِ مالی ءُ لشکری کمک ءَ زیت ءَ زیت بند بہ کنت۔

بی این ایم ءِ باسکاں امریکا ءِ مردم سھی کرتگ اَنت کہ امریکا ءَ چہ وتی سنگ دیوکانی زراں پاکستان ءَ اربانی ڈالر ءِکمک کرتگ کہ ایشاں پاکستانی پوج پہ بلوچ راج ءِ چکچینی ءَ کارمرد کنگ ءَ اِنت۔

اے رد ءَ بی این ایم ءِ باسکاں سیئٹل ءَ سدانی کچ ءَ پنتاک بھر کرتگ ،کہ آئی ءِ تہ ءَ بلوچستان ءِ جاور سھرا کنگ بیتگ ’’ بلوچستان : چیردستیں راجے ‘‘ ءِ سرگپ ءَ اے پنتاک ءَ پاکستان ءِ زورگری ، برجاھیں مھترھندی زوراکی ءُ مزنیں کچے ءَ مردمی اگبالانی بگیریانی سر ءَ گپ نبشتہ اِنت۔

پنتاک ءَ چہ پاکستان ءِ نیمگ ءَ تْرام اتگیں رنگے ءَ زور بیگواھی ءُ در آمیدگسی کوشانی بارہ ءَ ھم نبشتہ کنگ بیتگ۔ بی این ایم ءِ رد ءَ چہ 2009 ءَ پد پاکستان ءَ ’’ آپریشن سائلنس ‘‘ ءِ نام ءَ آوار جنگ ءُ در آمیدگسی کوشانی شوندات تیز کرتگ۔ ھزاراں بلوچ زور بیگواہ کنگ بیتگ کہ چہ ایشاں گیشتر پد ءَ بھ واتر نہ بیتگ۔

بی این ایم ءِ مردمی اگبالانی تک پانک ءِ دیم ءَ آرتگیں گزارشانی رد ءَ تیوک ءَ فروری 2025 ءَ 65 ءَ گیش مردم زور بیگواہ کنگ ءُ سئے بلوچ در آمیدگسی کشگ بیتگ۔

بی این ایم ءَ دلگوش پرینتگ کہ نوک آبادی باریگ ءِ ٹپ دنیگت دْراہ نہ بیتگ اَنت ءُ زورگریں واکانی کش اتگیں دروگیں سیمسر مروچی ھم مردم کشگ ءَ اَنت۔پاکستان ءِ 27 مارچ 1948 ءَ بلوچستان ءِ زورگرگ ءَ پد بلوچ چکچینی برجاہ اِنت۔ بلوچ ءِ پجار ءُ ربیدگ ءِ گمسار کنگ ءِ تْرام اتگیں کوشست برجاہ اَنت، وانگ ، جاندْراھی ءُ روزگار پہ بلوچ ءِ ایرجیگ کنگ ءَ جنگ ابزارانی (ھتھیار ) رنگ ءَ کارمرد بیگ ءَ اَنت۔ پجیگ ءَ سیاسی کارکن ، نودربر ءُ زانتکار گچین کنگ ءُ کشگ بیگ ءَ اَنت۔

چہ بلوچستان ءِ جتا جتائیں دمگاں پنچ نپر ءِ لاش دزکپتگ انے آیاں چہ درستانی پجار زورانسری بیگواہ کتگیں مردمانی ناماں زانگ بیتگ انت۔

اھوالانی رد ءَ 24 پروری ءِ روچ چہ شعبان ءَ دزکپتگیں چار لاشانی پجار کنگ بوتگ، درستیں چاریں لاش چہ پیسر ءَ بیگواہ کُتگیں مردمانی ناماں زانگ بیتگ انت-

گوستگیں روچاں دزکپتگیں لاشانی پجار حافظ محمد طاہر ء حافظ محمد اکبر ہارونی ءُ زبیر احمد ہارونی ء عبدالصمد ہارونی ءِ ناماں زانگ بیتگ انت کہ گوستگیں سال ءِ دسمبر ءِ ماہ ءَ بلوچستان ءِ دمگ کلات ءِ ھند چہ گدر ءَ زورانسری بیگواہ کنگ بوتگ اَنت۔

انچش دگہ دو لاشانی پجار شاہ زیب شاہوانی ء رحمت اللہ، نعیم شاہوانی ء نورالدین شاہوانی جاھمنند چہ دشت ءِ ناماں زانگ بیتگ انت۔

اھوالانی رد ءَ شاہ زیب شاہوانی گوستگیں ماہ 7 جنوری ءَ لھڑی گیٹ چہ کلی خیراللہ ءَ بیگواہ بوتگ انچش نعیم احمد شاہوانی 2 جنوری ءَ چہ خروٹ آباد کوئٹہ ءَ زورانسری بیگواھی نشانگ کنگ بوتگ۔

یات بہ بہ اِت کہ اے اولی وئیل نہ اِنت کہ بلوچستان ءِ تہ ءَ زورانسری بیگواھیں مردماں دروگیں میڑ ءِ تہ ءَ کُشگ ءَ اَنت ایشی ءَ چہ پیسر سی ٹی ڈی ءُ اے دگہ ریاستیانی سر ءَ انچیں بُھتام جنگ بیتگ کہ آیاں بلوچ کوم ءِ ءُ انسانی ھکانی بگیری ءَ پد ماں پد زھرشانی کنگ بیگ ءَ اِنت-

گوستگیں روچ ءَ چہ آواران ءَ انتزامات ءَ یک کسے ءِ لاش دز کپتگ آئی ءِ پجار دمگی جھمنندی حمیداللہ ءِ نام ءَ بیتگ، کہ 15 دسمبر 2024 ءَ چہ خضدار ءَ پاکستانی لشکر ءَ بندیگجاہ ءَ بُرتگ۔

انسانی ھکانی گلاں، نامینتگیں ایمنسٹی انٹرنیشنل ءِ اے وئیل ءِ ترندیں مزاھمت کُرتگ ھکومت ءَ چہ لوٹ کُتگ اِش کہ آ لشکر ءِ دست ءَ بندیگیں مردماں بے کانودیں ادالت کُشگ ءِ پٹ ءُ پول ءَ کنت ءُ دزمانجیں اہلکاراں انساپ ءِ آمیدگس ءَ بہ بارت ات-

بلوچستان لبریشن فرنٹ یِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بیست سے فروری دوھزار بیست پنچ ءَ بی ایل ایف ءِ سرمچاراں چیریں ھالانی سر ءَ کاروائی کنان ءَ بلوچستان ءِ دمگ واشک ءِ ھند سلام بیک ءَ ریاستی سروکی ءَ پُرکاریں ڈیتھ اسکواڈ ءِ ھاسیں باسک میر ایوب عالم ملازئی کشتگ ءُ سلاہ وتی دستیگ کتگ اَنت-

جارکش ءَ گْوشتگ ملازئی بازیں سالاں چہ ریاستی چیردستی ءَ بیتگ- آ ڈیھ دوستیں بلوچانی آوار جنگ ءُ زورانسری آوار جنی وڑیں بلوچ بگیریں پُرکاریاں ھمگرنچ بیتگ-

ایوب ملازئی مزنیں وھدے ءَ چہ ڈیتھ اسکواڈ ء دگہ یک ھاسیں باسک شاھد ملازئی ءِ گوم ءَ دمگ ءَ بلوچ دُژمنیں ریاستی لشکر کشیانی شوربندی ءِ کارکنگ ھاسیں ءُ بُنجاھی کرد پیلو کتگ اِت – ا دمگ ءَ ڈیتھ اسکواڈ ءِ سلاہ بندیں کاروائیانی سروکی کتگ ءُ بلوچ سرمچارانی ھلاپ ءَ کار کنگ ھاتر ءَ دمگ ءَ شرپمندیں مردم چمپروشی ءُ تُرسینتگ اَنت-

جارکش ءَ گْوشتگ شاھد ملازئی ءُ ایوب ملازئی ءِ میان ءَ دلرنجی ءَ پد ریاستی ادارھاں ایوب ملازئی بلوچ زْرمبشت ءِ ھلاپ ءَ جتا یک سلاہ بندیں ٹولی یے زمہ واری داتگ ءُ اشی ءِ سروکی ءَ اے ٹولی ھاران ءُ واشک ءَ ھوار کش گور ءِ دمگاں وتی نیٹ ورک ءَ تلان کنگ ءَ بیتگ-

بی ایل ایگ ءِ انٹیلی جنس ٹولی ءَ آئی سر ءَ وتی نگاہ داشتگ ءُ کاروائی ءَ چہ ساری اے گپ دلجم کتگ کہ اُرش ءَ زھگ ءُ زالبولاں ھوار دگہ ھچ کس ءَ تاوان مہ رس اِیت-

جارکش ءَ گْوشتگ بی ایل ایف بلوچ راج ءَ چہ دزبندی کنت کہ ایوب ملازئی وڑیں بلوچ دُژمنیں کردانی دست ءَ کارمرز بیگ جاہ ءَ اے وڑیں کردانی پجّار ءَ سرمچارانی ھمرھداری ءَ بکن اَنت ءُ چاگرد ءَ راجی گدار ، منشیات پروش، دُز ءُ زمین دُزیں وڑیں مردمانی چہ ھلاس کنگ ءَ وتی راجی زمہ واری ءَ سرجم بہ کن اَنت-

بلوچ چُکچینی، زورانسری آوار جنی ءِ ھلاپ ءَ بلوچ یکجھتی کمیٹی ءِ نیمگ ءَ چہ سرجمیں بلوچستان ءَ زھرشانیانی درچ برجاہ ءَ اِنت وھدے کہ مروچی کراچی ءَ ھم زھرشانی کنگ بیتگ-

بلوچ یکجھتی کمیٹی ءِ نیمگ ءَ چہ شنگ بیتگیں یک درشانے ءِ تہ ءَ گوشگ بیتگ کہ گل ءَ بلوچستان ءَ درکانودی کُشت ءُ کوش ءُ ڈیتھ اسکواڈ جوڑ کنگ بلوچ چُکچینی ءِ گیش کنگ سبب ءَ سرجمیں بلوچستان ءَ زھرشانی ءِ جار جنگ بیتگ- راج ءَ زُلم ءُ زوراکی ءِ ھلاپ ءَ توار چست کنگ یکیں راہ اِنت آ وتی جیڑہ ءَ جھان دیم ءَ آرگ سرپد کنگ جاگہ ءُ گپ کنگ جاگہ پریس کلب اِنت اود ءَ ھرچ کس وتی جیڑہ سر ءَ زھرشانی کنگ ھک دار اِیت- اے جیڑہ ءَ مروچی کراچی پریس کلب دیم ءَ یک زھرشانی ءِ جار جتگ اَت بلے نو اے ھک ھم چہ بلوچ ءَ پچگرگ بیتگ-

بی وائی سی رِد ءَ پریس کلب ءَ اے وڑ ریاستی ادارھانی نیمگ ءَ چہ بند کنگ ریاست ءُ آئی ءِ ادارھاں ھوار جمھوریت ءِ ناراہ جنوکانی دیم ءَ شھماتے- مروچی کراچی پریس کلب سندھ ھکومت ءُ آئی ءِ ادراہ پولیس ءِ نیمگ ءَ چہ سرجمی ءَ بند کنگ بیت کہ ڈیھ ءِ راہ ءُ راھبندانی ھلاپ اِنت- پریس کلب پولیس ءُ ریاستی دگہ ادارھاں ھرچ نیمگ ءَ بند کتگ آیاں مارا دیم روگ ءَ نہ اِشتگ گُڑا ما ھمد ءَ دگ سر ءَ وتی زھرشانی نکش کنائینتگ-

آیاں گوشتگ کہ ما ریاست اے گپ ءِ جار ءَ جن ایں تچک کن ایں کہ اے وڑیں کاراں ما وتی جُھد ءَ چہ پُشت کنز نہ بہ ایں ءُ وتی راج ءِ ھرچ گم ءُ درداں ھواریں، ریاست کجام وڑیں پندل سازی بہ کنت بلے مئے جُھد برجاہ بیت-