TBP Balochi

کراچی ءِ دمگ لیاری ءَ مروچی سُھب ءَ پاکستانی پوج ءَ ھُزدار ءِ دمگ چہ گریشگ ءَ سیادی داروکیں ورنا صابر ء علی دوست آوار جتگ ءُ زورانسری بیگواہ کتگ-

دمگی اِھوالکار رِد ءَ پوج ءَ آ بے سبب ءَ آوار جتگ ءُ ناشناسیں جاھے ءَ برتگ، اود ءَ آئی ءِ جاور ءُ ساڑی بیگ درگت ءَ ھچ وڑیں ھال نہ رس اِتگ-

صابر ءِ کھول ءَ آئی ءِ زوت یل کنائینگ لوٹ کنان ءَ واکدار ءَ چہ دزبندی کتگ کہ آئی ءَ کانودی ھساب ءَ آمیدگس پیش بہ کن اَنت- آیاں انسانی ھکانی ادارھاں چہ ھم لوٹ کتگ کہ آ زورانسری آوار جنی ءِ ھلاپ ءَ توار چست بہ کن اَنت ءُ بیگواھیں مردمانی یل کنائینگ ءِ کرد ءَ پیلو بہ کن اَنت-

ھمے وڑ کراچی ءِ دمگ ملیر ءِ جھمنندیں نودربر یاسر بلوچ بیست چار ءُ بیست پنچ فروری دوھزار بیست چار شپ ءَ گلشن اقبال ءَ وتی سنگتاں چہ گند ءُ نند ءَ پد شپ دہ ءُ نیم نزیک ءَ واتر لوگ روگ ءَ راہ نیم ءَ بیگواہ کنگ بیتگ-

گیشیں ھالانی رِد ءَ یاسر علی ء سبزل علی، جھمنند ملیر گوٹھ کراچی، کہ شھید بینظیر بھٹو یونیورسٹی ءَ رسانکدر سائنسز ءِ نودربرے دوشمبے ءُ سے شمبے میانی شپ ءِ دہ نیم ءَ وتی سنگتاں گوں گند ءُ نند ءَ پد گلشن اقبال ءَ چہ لوگ ءَ روگ ءَ بیتگ بلے راہ نیم ءَ بیگواہ بیتگ- کھول ءُ سنگتاں چہ آئی ءِ اِھوال ھمے شپ ءَ بند بیتگ-

کھول اے تُرس ودی کنگ ءَ اَنت کہ آیاں دگہ بلوچ نودرانی وڑ ءَ زورانسری بیگواہ کتگ، آیاں دزبندی کتگ کہ یاسر زوت ءَ چہ یل بہ کن اِت ءُ آئی ءِ سلامتی ھال بدے اِت-

تربت ءِ دمگ کوشکلات ءَ بلوچی زبان ءِ نامی ئیں گشندہ استاد عارف بلوچ ءِ لوگ ءِ سر ءَ ناشناسیں گاڑی سواریں سلاہ بنداں تیرگواری کتگ- وشبھتی ءَ دگہ جانی تاوان پیش نیتکگ-

استاد عارف بلوچ ءَ دمگی رسانکدراں گوں گوشتگ تیرگواری ءِ وھد ءَ لوگ ءَ نہ بیتگ آں-

آئی ءِ رد ءَ اُرشکاراں تیرگواری ءِ ھواری ءَ زاہ ءُ بد ھم کتگ – آئی ءَ لوٹ کتگ کہ وئیل ءِ ھلاپ ءَ گامگیج زیرگ بہ بیت انت-

بیگواھیں زھور سمالانی ءِ زورانسری آوار جنی ءِ ھلاپ ءَ دو روچاں چہ برجاہ اِنت- نندانک سبب ءَ بلوچستان ءَ ھمگرنچ کنوکیں شھدگانی بند بیگ سبب ءَ شھدگانی سر ءَ گاڑیانی دراجیں لین لگّ اِتگ-

مروچی کھول ءَ وتی زھرشانی دْراجکش کنان ءَ تفتان گوں شال گوں کراچی راجی شھدگ لکپاس ءِ ھند سر ءَ ھرچ وڑیں گاڑیانی واستا بند کتگ-

زانگ بہ بیت کہ گوستگیں بیست چار کلاکاں چہ نواب ھوٹل ءِ ھند سر ءَ نندانک برجاہ ءَ اِنت نو نندانک ءِ زھرشانی کنوکاں وتی زھرشانی دْراجکش داتگ لکپاس ءِ ھند سر ءَ تفتان گوں شال شھدگ بند کتگ زھرشانی کنگ ءَ اَنت-

نندانک ءَ نشتگیں مردماں سرجمیں بلوچستان ءِ دگانی بند کنگ جار جتگ-

زھرشانی کنوکانی گوشگ اِنت کہ سیکورٹی ادارہ زھور سمالانی ءُ سیدگل سیدکلانی ءِ یل کنائینگ ھاتر ایماندار نہ اَنت ءُ گپ ءُ دیوان ءَ آؤکیں آپیسر گپ ءُ دیوان ءَ ساری ءَ اے گریو اَنت کہ ما بے وسیں مارا مستری نیست آ وتی بے وسی ءِ گریوگ ءُ گریو اَنت اشاں بیگواھیں بلوچاں چہ مراد نیست-

آیاں حکومت ءِ بُرزی واکداراں چہ لوٹ کتگ کہ بے وساں مئے گور ءَ گپ ءُ دیوان واستا راہ مدے اَنت ھمایانی گور ءَ مستری ھست آ گپ ءُ دیوان واستا بیا اَنت دانکہ بیگواھیں زھور سمالانی ءُ سیدکلانی یل کنائینگ بہ بنت-

آیاں گْوشتگ کہ اگاں ھکومتی ادارہ بیگواھیں مردمانی یل کنائینگ ءَ گامگیج نہ زور اَنت گُڑا ما اے نندانک دراجکش دے ایں اے درگت ءَ بلوچ راج ءَ دزبندی اِنت کہ آ مئے ھمراھداری ءَ بکن اَنت دانکہ زالم ءِ چمّاں چمّ پیشدارگ بیگواھیں مردماں یل کنائین اِت-

آیاں ٹرانسپورٹر ءُ مساپرانی منّت گپتگ کہ آ ھور ءُ تُرندیں سارتی ءَ اوپار کتگ ءُ مئے ھمراھداری کتگ اِت آیاں گْوشتگ مئے گور ءَ نندانک دیگ ءَ اَبید ھچ وڑیں راہ نیست ما لاچار بیتگ ءُ زالبول ءُ زھگانی ھمراھی ءَ دگ بند کتگ-

سرکاری پلامرزی ءِ سلاہ بندیں ٹولی ( ڈیتھ اسکواڈز) ءِ سروک شفیق مینگل ءِ بنجل دوبر ھزدار ءِ دمگ توتک ءَ برجم کنگ بوگ ءَ انت-

دمگی مردماں ٹی بی پی ءَ گوں گوشتگ شفیق مینگل ءِ سلاہ بندیں بنجل سیکورٹی ءِ ترس ءَ ھزدار ، چہ باڈری ءَ توتک ءَ برگ بوگ ءَ انت-

دمگ ءَ سلاہ بندیں ٹولی ءَ چیک پوسٹ برجم جتگ انت چریشی ءِ سبب ءَ دمگ ءَ ترس ءُ بیم ودی بیتگ-

شفیق مینگل ھزدار ءَ ھوار سرجمیں بلوچستان ءَ ڈیتھ اسکواڈ ءِ سروکی ءَ ھوار نیکراھی ناشرکارانی دوستانی پشتگیری ءِ نام ءَ زانگ بیت اِنت-

زانگ بہ بیت ھژدہ فروری دوھزار ءُ یازدہ ءَ پاکستانی پوج ءَ توتک ءِ میتگ ءِ چاریں نیمگ انگیر کتگ انت ءُ لوگ لوگ ءَ پٹ ءُ پول کتگ انت – بازیں اداراں برجاھیں آپریشن ءَ میتگ ءِ دراھیں مردین یکجاہ کتگ ءُ پد ءَ پوجی کارندھاں ناشناسیں جاھاں برتگ انت- پد ءَ لھتے مردم یل بیتگ بلے ھشتاد ءُ دو سالی ئیں مھمد رحیم خان کلندرانی ءُ آئی ءِ ٹک ءِ دگہ شانزدہ مردم یل نہ بیتگ انت-

اے آپریشن ءَ پد توتک ءِ دمگ شفیق مینگل ءَ دستیگ کتگ-

توتک ءِ شھر ءَ وتی بنجل ءِ جوڑینگ ءَ پد شفیق مینگل ءَ اود ءَ وتی ٹارچر سیل برجم کتگ ءُ سرجمیں بلوچستان ءَ لس مردم آوار جنگ ءَ پد اود ءَ زنداناں بندیگ کنگ بیتگ انت- دمگی مردمانی گوشگ انت اے روچاں مارا شپانکاں گوشتگ آیاں سجوئیں شپ ءَ شفیق ءِ بنجل ءَ پریاتانی توار اشکنگ بیتگ انت- ھنچش سما بیتگ کہ کسے ءَ لٹ ءُ کٹ کن ئے- شفیق مینگل ءَ وتی توتک ءِ بنجل ءَ گار جتگ ءُ اود ءَ کسے لٹانی چیر ءَ مرتگ گڑا آ ھمود ءَ کل کنگ بیتگ-

ھمے جاہ ءُ توتک مژی ءَ یک گوریں کبرے گندگ بیتگ ات کہ اے گوریں کبر ءِ نشانی سال دوھزار ءُ چاردہ ءَ یک شپانکے ءَ کتگ ات- اے گوریں کبراں یک سد ءُ شست ءُ ھشت لاش دزکپتگ انت – اے لاشانی جاور بے ھد ھراب بیتگ انت کہ آیانی بس ھڈ پشکپتگ انت- اے لاشانی توک ءَ بس دو مردمانی پجار بیتگ انت کہ آیانی سیادی بلوچستان ءِ دمگ آواران ءَ بیتگ-

گوستگیں روچ ءَ روکپتی بلوچستان ءِ تیابدپی شھر چھبار ءَ یک لوگے ءِ سر ءَ ایرانی لشکر ءَ بیڑ برتگ ات- شنگ بیتگیں تامراں گندگ بیت انت کہ اود ءَ مزنیں سلاہ کارمرد بوگ ءَ انت-

اھوالانی رد ءَ ایرانی لشکر ءَ چھبار ءَ یک لوگے ءِ سر ءَ بیڑ برتگ ءُ اود ءَ لوگ ءِ انگیر کنگ ءِ ھواری ءَ ٹوپاں مان بستگ-

اھوالانی دو ساھت ءَ بیوکیں جنگ ءَ دو سلاہ بندیں مردمانی اھوال پدر بیتگ انت-

ایرانی لشکر ءَ اھوالانی توک ءَ گوشتگ دو نپرانی کُشگ ءِ ھواری ءَ شش دگہ مردم دزگیر کتگ اَنت-

دومی نیمگ ءَ جیش العدل ءَ گوشتگ اے دوئیں کشگ بیتگیں مردم جیش العدل ءِ باسک بیتگ انت کہ گوستگیں روچ ءَ یک میڑے ءَ جنگ بیتگ اَنت-

مستونگ ءَ بیگواھیں مردمانی کھولاں وتی مردمانی یل کنائینگ ءَ تاں نندانک دیگ جار جتگ-

بلوچستان ءِ دمگ چہ مستونگ ءَ پاکستانی پوج دست ءَ زورانسری آوار جنی ءِ نشانگ کنگ بیتگیں بیگواھیں زھور احمد سمالانی ءُ سید گل سیدگلانی ءِ یل کنائینگ ھاتر ءَ آئی ءِ کھول ءَ شال کراچی بُنجاھی شھدگ گاڑیانی روگ آیگ واستا بند کتگ-

زھور احمد سمالانی ءُ سید گل سیدکلانی ءِ کھول نیمگ ءَ چہ مروچی سُھب ءَ مستونگ ءِ نزیک شال کراچی راجی شھدگ سر ءَ نندانک داتگ شھدگ گاڑیانی روگ ءُ آیگ واستا بند کتگ چریشی ءَ پد دمگی انتزامیہ ءَ چہ گپ دیوان ءِ بے سوبی ءَ پد کھول ءِ گوستگیں دہ کلاکاں چہ نندانک برجاہ ءَ اِنت-

نندانک ءِ سبب ءَ شال کراچی راجی شھدگ سر ءَ یکرندے پد ءَ گاڑیانی روگ آیگ بند اِنت ءُ درزنانی گاڑی گٹّ اَنت-

اے درگت ءَ کھول ءَ گْوشتگ کہ دانکہ زھور احمد سمالانی ءُ سیدگل یل کنگ نہ بیت اَنت ءُ سمالانی ھاؤس عمر آباد ءَ چیریں ادارھانی بیڑ ءُ بلوچ دوداں لگتمالی کنگ ءِ نہ اوشتوکیں درچ بند کنگ نہ بیت مئے نندانک بے مدت ءَ تاں برجاہ ءَ اِنت-

کھول ءَ دوئیں بیگواھیں مردمانی زوت یل کنگ لوٹ کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بیست یک فروری دوھزار بیست پنچ ءِ گل ءِ سنگتیں سرمچار سخی بخش پنّام ءِ قندیل ءُ بالاچ پنّام ءِ اسلم آواران ءِ دمگ تیرتیج ءَ گلی مشن ءِ میان ءَ پاکستانی پوج ءُ آئی ءِ جوڑ کتگیں ڈیتھ اسکواڈ گوم ءَ میڑ ءَ شھید بیتگ اَنت-

جارکش ءَ گْوشتگ کہ شھید سخی بخش پنّام ءِ قندیل بلوچ ء علی بخش بلوچ جھمنند تیرتیج آواران دوھزار بیست سے ءَ بلوچستان لبریشن فرنٹ ءِ بھر جوڑ بیتگ اَنت ءُ بلوچستان ءَ جتاجتائیں دمگاں جنگی پڑ ءَ وتی کرد جوانیں وڑے ءَ پیلو کتگ ئِے-

آئی ءَ گْوشتگ کہ سخی بلوچ بلوچی زبان ءِ ورنا ایں شائر ءُ نبشتکارے ھم بیتگ- آئی ءَ وتی شائری ءُ نبشتکارے ءَ شھید ءُ سرڈگار ءِ زبیداری جوانیں وڑے ءَ درشان کتگ-

جارکش ءَ گْوشتگ کہ شھید بالاچ پنّام ءِ اسلم ء علی بخش جھمنند گریشگ ھُزدار ءَ دوھزار بیست چار ءَ بلوچستان لبریشن فرنٹ ءَ بھر زرتگ ءُ آواران ءُ کولواہ ءَ بازیں جنگی پڑاں ھوار بیتگ- شھید بالاچ یک نودربرے بیتگ بلے راجی آجوئی ءِ فلسفے ءُ شئوری دروشم ءَ سرپد بیگ ءَ پد سلاہ بندیں جُھد ءَ ھوار بیتگ-

جارکش ءَ گوشتگ دوئیں سرمچاریں سنگت آواران ءِ دمگ تیرتیج ءَ پاکستانی پوج ءِ جوڑ بیتگیں ڈیتھ اسکواڈ، کہ اورنگزیب بزنجو ءِ سروکی ءَ بلوچ چُکچینی ءِ مراگش ءَ برجم داروک ءِ گوم ءَ میڑ ءَ شھید بیتگ اَنت-

جارکش ءَ گْوشتگ ڈیتھ اسکواڈ ءُ سرمچارانی میان ءَ بیتگیں اے میڑ ءَ ڈیتھ اسکواڈ ءِ ھاسیں باسک شبیر ( بیدی والا ) ھوار بازیں ڈیتھ اسکواڈ کارمند ٹپی بیتگ اَنت، وھدے کہ ڈیتھ اسکواڈ زورگریں دُژمنیں پوج ءِ کمک گون بیتگ-

جارکش ءَ گْوشتگ کہ بی ایل ایف آواران ءُ کولواہ ءِ سرجمیں گیرتمندیں راج ءَ را سرپد کنگ لوٹ اِیت کہ اورنگزیب ءُ آئی ءِ سرجمیں سنگتاں دزکشی بہ کن اَنت کہ بلوچ چُکچینی ءِ کرد ءَ پُرکار اَنت-

جارکش ءَ گْوشتگ بی ایل ایف سنگتیں سرمچاراں آیانی شھیدی سر ءَ اے اِھد ءِ ھمراھی ءَ سُھرچکیں دروت ندر کنت ءُ آیانی واھگ بلوچستان ءِ وتواجھی ءَ تاں جنگ برجاہ بیت-

بلوچستان ءَ زورانسری آوار جنی، ٹارگٹ کلنگ ءُ دروگیں میڑانی ھلاپ ءَ بلوچ یکجھتی کمیٹی نیمگ ءَ چہ روانکانی دْرچ برجاہ ءَ اِنت-

مروچی شال، پسنی ءُ نصیر آباد ءَ روانک کشگ بیتگ کہ آیانی تہ ءَ زالبول ءُ زھگاں ھوار مزنیں کچے ءَ مردماں بھر زرتگ دوگیں میڑاں، زورانسری آوار جنی ءُ ٹارگٹ کلنگ ءِ ھلاپ ءَ تُرندیں ناراہ جنگ بیتگ-

شال ءَ روانک سریاب لنک دگ ءَ چہ بندات بیتگ قمبرانی دگ ءَ آسر بیتگ-

اے میان ءَ بلوچ یکجھتی کمیٹی ءِ راھشوناں گْوشتگ کہ سرجمیں بلوچستان ءَ زورانسری آوار جنی، دروگیں میڑ ءُ ٹارگٹ کلنگ ءِ وئیلانی تہ ءَ گیشی آرگ بیتگ-

آیاں لوٹ کنان ءَ گْوشتگ کہ اگاں کسے میابار بیت گُڑا آئی ءَ کانود رِد ءَ آمیدگس ءَ پیش بہ کن اِت-

دومی نیمگ ڈیرہ مراد جمالی ءَ یک زھرشانی ئیں روانکے کشگ بیتگ-

زھرشانی ءَ چہ بلوچستان ءَ ریاستی سروکی ءَ برجاھیں ڈیتھ اسکواڈ ءِ ٹارگٹ کلنگ، تربت کیچ ءَ بلوچ ورنا کریم داد ءُ معراج بلوچ ءِ کوش، زورانسری آوار جنی ءُ نصیر آباد ءِ دمگ چھتر ءَ ریاستی پوج ءِ لشکر کشی ءِ ھلاپ ءَ ناراہ جتگ ءُ تران کتگ-

زانگ بہ بیت کہ بلوچ یکجھتی کمیٹی ءَ بلوچ ورنایانی ٹارگٹ کلنگ ءُ زورانسری آوار جنی ءِ ھلاپ ءَ سرجمیں بلوچستان ءِ زھرشانی ءِ جار جتگ-

درشان ءِ تہ ءَ گوشگ بیتگ کہ پاکستان پوج ءَ بلوچ راج ءِ ھلاپ ءَ زوراکی تُرند کتگ ، چریشی ءَ ٹارگٹ کلنگ ءُ زورانسری آوار جنی ءِ گیشی بیتگ – چیریں ادارہ ، سیکورٹی فورسز ءُ اشی ءَ ھمگرنچیں سلاہ بند مھمکی ءَ گوم ءَ بلوچ ورنایاں نشانگ کنگ ءَ اَنت ، چریشی ءَ دمگ ءَ انسانی ھکانی ھلاپ ءَ گیش بیگ ءَ اِنت-

ھمے وڑ تیاب دپی شھر گوادر ءِ دمگ پسنی ءَ ھم یک روانکے برجم دارگ بیتگ کہ اود ءَ راھشوناں ھوار زورانسری آوار جنگ بیتگیں مردمانی کھول ءَ وتی دوستناکانی اکس چست کتگ بیتگ اَنت آیانی یل کنائینگ لوٹ کتگ وھدے کہ ترانکاراں تران کنان ءَ بلوچستان ءَ برجاھیں ریاست زوراکی ءُ بلوچ چُکچینی ایر جتگ-

بلوچستان ءِ دمگ چہ کیچ ءَ پاکستانی لشکر ءَ پنجگور ءِ جھمنندیں دو ورنا دزگیر کتگ ءُ بیگواہ کتگ اَنت-

بیگواھیں مردمانی پجّار شاہنواز ء حاجی اللہ بخش ءُ عبدالخالق ء حاجی اللہ بخش ءِ ناماں چہ زانگ بوتگ اَنت ۔

بیگواہ بیتگیں دوئیں پنجگور ءِ دمگ ءِ پروم ءِ جھمنند اَنت اے یک فروری ءَ پاکستانی لشکر ءَ کیچ ءِ دمگ چہ ھوشاپ ءَ دزگیر کتگ اَنت چہ ایشی ءَ رند آ بیگواہ اَنت-

بلوچ لبریشن آرمی (بی ایل اے) ءِ ترجمان جیئند بلوچ ءَ درشان شنگ کتگ ءُ گْوشتگ کہ بی ایل اے ءِ سرمچاراں سے شمبے روچ ءَ قلات ءِ دمگ ءَ منگچر ءَ سیندک پروجیکٹ ءِ کاروان ءِ ءُ آئی ءِ پھریز کنوکیں پاکستانی لشکر ءِ سر ءَ اُرش کتگ ۔

آئی ءَ گْوشتگ اے اُرش بیگاہ ءِ وھد ءَ منگچر بازار ءِ نزیک ءَ بیتگ، وھدے بی ایل اے ءِ سرمچاراں راہ بستگ ءُ چینی کمپنی ءِ سی گاڑیانی کاروان ھوار نشانگ کتگ ۔ شوربندی ءَ ، سرمچاراں پیسر ءَ کاروان ءِ سیکورٹی ءَ ھواریں لشکر ءِ گاڑی ریموٹ کنٹرول آئی ای ڈی ءَ نشانگ کتگ ، ایشی ءِ آسر ءَ گاڑی سرجم ءَ تباہ بیتگ ۔ ایشی ءَ چہ رند ، دشمن ءِ دگہ دو گاڑیانی سر ءَ مزنیں سلاھانی گوم ءَ اُرش کتگ ، ایشی ءِآسر ءَ ھپت پوجی مُرتگ کم چہ کم یازدہ ٹپی بیتگ انت۔

جارکش ءَ دیمتر ءَ گْوشتگ کہ سرمچارانی دومی ٹولی ءَ لشکر ءِ سیندک پروجیکٹ ءِ کاروان ءَ گوں ھواریں گاڑی مزنیں سلاھانی ءُ گرنیڈ لانچرانی گون ءَ نشانگ کتگ اَنت ۔ اے کارروائی ءِ وھد ءَ یک ڈرائیورے دزگیر کتگ ، بلے بلوچ بوگ ءِ سبب ءَ سرپدی دیگ ءَ چہ رند یل داتگ۔ اُرش ءِ آسر ءَ یازدہ گاڑی ناکارہ بیتگ انت ۔

جیئند بلوچ ءَ گْوشتگ کہ بلوچ لبریشن آرمی اے گپ ءَ تچک کنت کہ بلوچستان ءَ درستیں لٹ ءُبپکی، کجام ڈنی کمپنی ءُ زورگیریں ریاست ءِ شریدارانی نشانگ کنگ مئے جد ءُ جھد ءِ بنکی نشانگ ءَ انت ۔ کجام ھم کمپنیاں بلوچستان ءِ مڈیانی پلگ ءُ ورگ ءَ ھوار انت آیاں اے بیھار ءَ دے آں کہ آ زوت وتی لُٹ ءُ پلی ءِ کردار ءَ یلو بہ دے انت ءُ بلوچستان ءَ چہ در بہ کپ انت ، اگاں ناں گڑا مئے اُرش گیشی ءَ گوں دیم ءَ کاینت ۔ سیندک، ریکوڈک ءُ آدگہ لٹ ءُ پلی بلوچ راج ءِ مرزی ءَ ابید سر ءَ مُشگ بیتگ انت، ءُ بی ایل اے اے وڑیں منسوبھانی دیم ءَ اوشتیت ءُ آیاں سوبمندی ءَ نیل ایت-

بی ایل اے ءِ جارکش ءَ گْوشتگ من دری مُلکانی کمپنی، زرکار ءُ ایشی ءِ ھَندی سھولت کاراں بیھار دے آں کہ آ زوگیریں ریاست ءِ ھرچ وڑیں زرکاری یاکہ واپاری مساماں گستہ بہ بنت۔ بلوچستان ءَ ھرکس لٹ ءُ پلیانی بھر بیت ، آ وت ءَ پہ مئے اُرشانی واستا جاڑیگ بہ کنت اِنت-